| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
4. கிமிலத்தே²ரஅபதா³னவண்ணனா
4. Kimilattheraapadānavaṇṇanā
சதுத்தா²பதா³னே நிப்³பு³தே ககுஸந்த⁴ம்ஹீதிஆதி³கங் ஆயஸ்மதோ கிமிலத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ககுஸந்த⁴ஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதங் பத்தோ பரினிப்³பு³தே ஸத்த²ரி தஸ்ஸ தா⁴துயோ உத்³தி³ஸ்ஸ ஸலலமாலாஹி மண்ட³பங் காரெத்வா பூஜங் அகாஸி. ஸோ தேன புஞ்ஞகம்மேன தாவதிங்ஸேஸு உப்பஜ்ஜித்வா அபராபரங் தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ கபிலவத்து²னக³ரே ஸக்யராஜகுலே நிப்³ப³த்தித்வா கிமிலோதி தஸ்ஸ நாமங் அகாஸி. ஸோ வயப்பத்தோ போ⁴க³ஸம்பத்தியா பமத்தோ விஹரதி. தஸ்ஸ ஞாணபரிபாகங் ஞத்வா ஸங்வேக³ஜனநத்த²ங் அனுபியாயங் விஹரந்தோ ஸத்தா² பட²மயொப்³ப³னே டி²தங் ரமணீயங் இத்தி²ரூபங் அபி⁴னிம்மினித்வா புரதோ த³ஸ்ஸெத்வா புன அனுக்கமேன யதா² ஜராரோக³விபத்தீஹி அபி⁴பூ⁴தா தி³ஸ்ஸதி, ததா² அகாஸி. தங் தி³ஸ்வா கிமிலகுமாரோ அதிவிய ஸங்வேக³ஜாதோ அத்தனோ ஸங்வேக³ங் பகாஸெந்தோ ப⁴க³வதோ பாகடங் கத்வா லத்³தா⁴னுஸாஸனோ அரஹத்தங் பாபுணி.
Catutthāpadāne nibbute kakusandhamhītiādikaṃ āyasmato kimilattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto kakusandhassa bhagavato kāle kulagehe nibbattitvā viññutaṃ patto parinibbute satthari tassa dhātuyo uddissa salalamālāhi maṇḍapaṃ kāretvā pūjaṃ akāsi. So tena puññakammena tāvatiṃsesu uppajjitvā aparāparaṃ devamanussesu saṃsaranto imasmiṃ buddhuppāde kapilavatthunagare sakyarājakule nibbattitvā kimiloti tassa nāmaṃ akāsi. So vayappatto bhogasampattiyā pamatto viharati. Tassa ñāṇaparipākaṃ ñatvā saṃvegajananatthaṃ anupiyāyaṃ viharanto satthā paṭhamayobbane ṭhitaṃ ramaṇīyaṃ itthirūpaṃ abhinimminitvā purato dassetvā puna anukkamena yathā jarārogavipattīhi abhibhūtā dissati, tathā akāsi. Taṃ disvā kimilakumāro ativiya saṃvegajāto attano saṃvegaṃ pakāsento bhagavato pākaṭaṃ katvā laddhānusāsano arahattaṃ pāpuṇi.
42. ஸோ அரஹத்தங் பத்வா ஸோமனஸ்ஸஜாதோ அத்தனோ புப்³ப³சரிதாபதா³னங் பகாஸெந்தோ நிப்³பு³தே ககுஸந்த⁴ம்ஹீதிஆதி³மாஹ. ப்³ராஹ்மணம்ஹி வுஸீமதீதி பஞ்சஹி வஸிதாஹி வஸிப்பத்தம்ஹி ப⁴க³வதி. ப்³ராஹ்மணஸ்ஸ ஸப்³ப³கு³ணக³ணேஹி மண்டி³தத்தா அபி⁴வூள்ஹீதத்தா ப்³ராஹ்மணம்ஹி ககுஸந்தே⁴ ப⁴க³வதி பரினிப்³பு³தேதி அத்தோ². ஸேஸங் ஸப்³ப³ங் உத்தானமேவாதி.
42. So arahattaṃ patvā somanassajāto attano pubbacaritāpadānaṃ pakāsento nibbute kakusandhamhītiādimāha. Brāhmaṇamhi vusīmatīti pañcahi vasitāhi vasippattamhi bhagavati. Brāhmaṇassa sabbaguṇagaṇehi maṇḍitattā abhivūḷhītattā brāhmaṇamhi kakusandhe bhagavati parinibbuteti attho. Sesaṃ sabbaṃ uttānamevāti.
கிமிலத்தே²ரஅபதா³னவண்ணனா ஸமத்தா.
Kimilattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 4. கிமிலத்தே²ரஅபதா³னங் • 4. Kimilattheraapadānaṃ
