| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
8. கிமிலத்தே²ரகா³தா²வண்ணனா
8. Kimilattheragāthāvaṇṇanā
பாசீனவங்ஸதா³யம்ஹீதிஆதி³கா ஆயஸ்மதோ கிமிலத்தே²ரஸ்ஸ கா³தா². கா உப்பத்தி? தஸ்ஸ புப்³ப³யோகோ³ ஸங்வேகு³ப்பத்தி பப்³ப³ஜ்ஜா ச ஏககனிபாதே ‘‘அபி⁴ஸத்தோ’’தி கா³தா²ய ஸங்வண்ணனாயங் வுத்தாயேவ. தாய ச கா³தா²ய தே²ரேன அத்தனோ விஸேஸாதி⁴க³மஸ்ஸ காரணங் த³ஸ்ஸிதங். இத⁴ பன அதி⁴க³தவிஸேஸஸ்ஸ அத்தனோ ஆயஸ்மதா ச அனுருத்³தே⁴ன ஆயஸ்மதா ச நந்தி³யேன ஸஹ ஸமக்³க³வாஸோ த³ஸ்ஸிதோதி வேதி³தப்³ப³ங். ஸமக்³க³வாஸங் பன வஸந்தா தே யதா² ச வஸிங்ஸு, தங் த³ஸ்ஸெந்தோ –
Pācīnavaṃsadāyamhītiādikā āyasmato kimilattherassa gāthā. Kā uppatti? Tassa pubbayogo saṃveguppatti pabbajjā ca ekakanipāte ‘‘abhisatto’’ti gāthāya saṃvaṇṇanāyaṃ vuttāyeva. Tāya ca gāthāya therena attano visesādhigamassa kāraṇaṃ dassitaṃ. Idha pana adhigatavisesassa attano āyasmatā ca anuruddhena āyasmatā ca nandiyena saha samaggavāso dassitoti veditabbaṃ. Samaggavāsaṃ pana vasantā te yathā ca vasiṃsu, taṃ dassento –
155.
155.
‘‘பாசீனவங்ஸதா³யம்ஹி, ஸக்யபுத்தா ஸஹாயகா;
‘‘Pācīnavaṃsadāyamhi, sakyaputtā sahāyakā;
பஹாயானப்பகே போ⁴கே³, உஞ்சே² பத்தாக³தே ரதா.
Pahāyānappake bhoge, uñche pattāgate ratā.
156.
156.
‘‘ஆரத்³த⁴வீரியா பஹிதத்தா, நிச்சங் த³ள்ஹபரக்கமா;
‘‘Āraddhavīriyā pahitattā, niccaṃ daḷhaparakkamā;
ரமந்தி த⁴ம்மரதியா, ஹித்வான லோகியங் ரதி’’ந்தி. – கா³தா²த்³வயங் அபா⁴ஸி;
Ramanti dhammaratiyā, hitvāna lokiyaṃ rati’’nti. – gāthādvayaṃ abhāsi;
தத்த² பாசீனவங்ஸதா³யம்ஹீதி பாசீனவங்ஸனாமகே ரக்கி²தகோ³பிதே ஸஹபரிச்சே²தே³ வனே. தஞ்ஹி வனங் கா³மஸ்ஸ பாசீனதி³ஸாயங் டி²தத்தா வங்ஸகு³ம்ப³பரிக்கி²த்தத்தா ச ‘‘பாசீனவங்ஸதா³யோ’’தி வுத்தோ, வங்ஸவனபா⁴வேன வாதி. ஸக்யபுத்தாதி அனுருத்³த⁴த்தே²ராத³யோ ஸக்யராஜகுமாரா. ஸஹாயகாதி ஸங்வேகு³ப்பத்திபப்³ப³ஜ்ஜாஸமணத⁴ம்மகரணஸங்வாஸேஹி ஸஹ அயனதோ பவத்தனதோ ஸஹாயகா. பஹாயானப்பகே போ⁴கே³தி உளாரேன புஞ்ஞானுபா⁴வேன அதி⁴க³தே குலபரம்பராக³தே ச மஹந்தே போ⁴க³க்க²ந்தே⁴ ச²ட்³டெ³த்வா. ‘‘ஸஹாயானப்பகே’’திபி பாளி. உஞ்சே² பத்தாக³தே ரதாதி உஞ்சா²சரியாய ஆப⁴தத்தா உஞ்சே² பத்தே ஆக³தத்தா பத்தாக³தே பத்தபரியாபன்னே ரதா அபி⁴ரதா, ஸங்க⁴ப⁴த்தாதி³அதிரேகலாப⁴ங் படிக்கி²பித்வா ஜங்க⁴ப³லங் நிஸ்ஸாய பி⁴க்கா²சரியாய லத்³தே⁴ன மிஸ்ஸகப⁴த்தேனேவ ஸந்துட்டா²தி அத்தோ².
Tattha pācīnavaṃsadāyamhīti pācīnavaṃsanāmake rakkhitagopite sahaparicchede vane. Tañhi vanaṃ gāmassa pācīnadisāyaṃ ṭhitattā vaṃsagumbaparikkhittattā ca ‘‘pācīnavaṃsadāyo’’ti vutto, vaṃsavanabhāvena vāti. Sakyaputtāti anuruddhattherādayo sakyarājakumārā. Sahāyakāti saṃveguppattipabbajjāsamaṇadhammakaraṇasaṃvāsehi saha ayanato pavattanato sahāyakā. Pahāyānappake bhogeti uḷārena puññānubhāvena adhigate kulaparamparāgate ca mahante bhogakkhandhe chaḍḍetvā. ‘‘Sahāyānappake’’tipi pāḷi. Uñche pattāgate ratāti uñchācariyāya ābhatattā uñche patte āgatattā pattāgate pattapariyāpanne ratā abhiratā, saṅghabhattādiatirekalābhaṃ paṭikkhipitvā jaṅghabalaṃ nissāya bhikkhācariyāya laddhena missakabhatteneva santuṭṭhāti attho.
ஆரத்³த⁴வீரியாதி உத்தமத்த²ஸ்ஸ அதி⁴க³மாய ஆதி³தோவ பகே³வ ஸம்பாதி³தவீரியா. பஹிதத்தாதி நின்னபோணபப்³பா⁴ரபா⁴வேன காலேன காலங் ஸமாபஜ்ஜனேன ச நிப்³பா³னங் பதிபேஸிதசித்தா. நிச்சங் த³ள்ஹபரக்கமாதி வத்தபடிபத்தீஸு தி³ட்ட²த⁴ம்மஸுக²விஹாரானுயோகே³ன ஸப்³ப³காலங் அஸிதி²லபரக்கமா. ரமந்தி த⁴ம்மரதியா, ஹித்வான லோகியங் ரதிந்தி லோகே விதி³ததாய லோகபரியாபன்னதாய ச லோகியங் ரூபாரம்மணாதி³ரதிங் பஹாய மக்³க³பஞ்ஞாய பஜஹித்வா லோகுத்தரத⁴ம்மரதியா அக்³க³ப²லனிப்³பா³னாபி⁴ரதியா ச ரமந்தி அபி⁴ரமந்தீதி.
Āraddhavīriyāti uttamatthassa adhigamāya āditova pageva sampāditavīriyā. Pahitattāti ninnapoṇapabbhārabhāvena kālena kālaṃ samāpajjanena ca nibbānaṃ patipesitacittā. Niccaṃ daḷhaparakkamāti vattapaṭipattīsu diṭṭhadhammasukhavihārānuyogena sabbakālaṃ asithilaparakkamā. Ramanti dhammaratiyā, hitvāna lokiyaṃ ratinti loke viditatāya lokapariyāpannatāya ca lokiyaṃ rūpārammaṇādiratiṃ pahāya maggapaññāya pajahitvā lokuttaradhammaratiyā aggaphalanibbānābhiratiyā ca ramanti abhiramantīti.
கிமிலத்தே²ரகா³தா²வண்ணனா நிட்டி²தா.
Kimilattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 8. கிமிலத்தே²ரகா³தா² • 8. Kimilattheragāthā
