| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[248] 8. கிங்ஸுகோபமஜாதகவண்ணனா
[248] 8. Kiṃsukopamajātakavaṇṇanā
ஸப்³பே³ஹி கிங்ஸுகோ தி³ட்டோ²தி இத³ங் ஸத்தா² ஜேதவனே விஹரந்தோ கிங்ஸுகோபமஸுத்தந்தங் ஆரப்³ப⁴ கதே²ஸி. சத்தாரோ ஹி பி⁴க்கூ² ததா²க³தங் உபஸங்கமித்வா கம்மட்டா²னங் யாசிங்ஸு, ஸத்தா² தேஸங் கம்மட்டா²னங் கதே²ஸி. தே கம்மட்டா²னங் க³ஹெத்வா அத்தனோ ரத்திட்டா²னதி³வாட்டா²னானி அக³மிங்ஸு. தேஸு ஏகோ ச² ப²ஸ்ஸாயதனானி பரிக்³க³ண்ஹித்வா அரஹத்தங் பாபுணி, ஏகோ பஞ்சக்க²ந்தே⁴, ஏகோ சத்தாரோ மஹாபூ⁴தே, ஏகோ அட்டா²ரஸ தா⁴துயோ. தே அத்தனோ அத்தனோ அதி⁴க³தவிஸேஸங் ஸத்து² ஆரோசேஸுங். அதே²கஸ்ஸ பி⁴க்கு²னோ பரிவிதக்கோ உத³பாதி³ – ‘‘இமேஸங் கம்மட்டா²னானி நானா, நிப்³பா³னங் ஏகங், கத²ங் ஸப்³பே³ஹி அரஹத்தங் பத்த’’ந்தி. ஸோ ஸத்தா²ரங் புச்சி². ஸத்தா² ‘‘கிங் தே, பி⁴க்கு², கிங்ஸுகதி³ட்ட²பா⁴திகேஹி நானத்த’’ந்தி வத்வா ‘‘இத³ங் நோ, ப⁴ந்தே, காரணங் கதே²தா²’’தி பி⁴க்கூ²ஹி யாசிதோ அதீதங் ஆஹரி.
Sabbehikiṃsuko diṭṭhoti idaṃ satthā jetavane viharanto kiṃsukopamasuttantaṃ ārabbha kathesi. Cattāro hi bhikkhū tathāgataṃ upasaṅkamitvā kammaṭṭhānaṃ yāciṃsu, satthā tesaṃ kammaṭṭhānaṃ kathesi. Te kammaṭṭhānaṃ gahetvā attano rattiṭṭhānadivāṭṭhānāni agamiṃsu. Tesu eko cha phassāyatanāni pariggaṇhitvā arahattaṃ pāpuṇi, eko pañcakkhandhe, eko cattāro mahābhūte, eko aṭṭhārasa dhātuyo. Te attano attano adhigatavisesaṃ satthu ārocesuṃ. Athekassa bhikkhuno parivitakko udapādi – ‘‘imesaṃ kammaṭṭhānāni nānā, nibbānaṃ ekaṃ, kathaṃ sabbehi arahattaṃ patta’’nti. So satthāraṃ pucchi. Satthā ‘‘kiṃ te, bhikkhu, kiṃsukadiṭṭhabhātikehi nānatta’’nti vatvā ‘‘idaṃ no, bhante, kāraṇaṃ kathethā’’ti bhikkhūhi yācito atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே தஸ்ஸ சத்தாரோ புத்தா அஹேஸுங். தே ஏகதி³வஸங் ஸாரதி²ங் பக்கோஸெத்வா ‘‘மயங், ஸம்ம, கிங்ஸுகங் த³ட்டு²காமா, கிங்ஸுகருக்க²ங் நோ த³ஸ்ஸேஹீ’’தி ஆஹங்ஸு. ஸாரதி² ‘‘ஸாது⁴, த³ஸ்ஸெஸ்ஸாமீ’’தி வத்வா சதுன்னம்பி ஏகதோ அத³ஸ்ஸெத்வா ஜெட்ட²ராஜபுத்தங் தாவ ரதே² நிஸீதா³பெத்வா அரஞ்ஞங் நெத்வா ‘‘அயங் கிங்ஸுகோ’’தி கா²ணுககாலே கிங்ஸுகங் த³ஸ்ஸேஸி. அபரஸ்ஸ ப³ஹலபலாஸகாலே, அபரஸ்ஸ புப்பி²தகாலே, அபரஸ்ஸ ப²லிதகாலே. அபரபா⁴கே³ சத்தாரோபி பா⁴தரோ ஏகதோ நிஸின்னா ‘‘கிங்ஸுகோ நாம கீதி³ஸோ’’தி கத²ங் ஸமுட்டா²பேஸுங். ததோ ஏகோ ‘‘ஸெய்யாதா²பி ஜா²மதூ²ணோ’’தி ஆஹ. து³தியோ ‘‘ஸெய்யதா²பி நிக்³ரோத⁴ருக்கோ²’’தி, ததியோ ‘‘ஸெய்யதா²பி மங்ஸபேஸீ’’தி, சதுத்தோ² ‘‘ஸெய்யதா²பி ஸிரீஸோ’’தி. தே அஞ்ஞமஞ்ஞஸ்ஸ கதா²ய அபரிதுட்டா² பிது ஸந்திகங் க³ந்த்வா ‘‘தே³வ, கிங்ஸுகோ நாம கீதி³ஸோ’’தி புச்சி²த்வா ‘‘தும்ஹேஹி கிங் கதி²த’’ந்தி வுத்தே அத்தனா கதி²தனீஹாரங் ரஞ்ஞோ கதே²ஸுங். ராஜா ‘‘சதூஹிபி தும்ஹேஹி கிங்ஸுகோ தி³ட்டோ², கேவலங் வோ கிங்ஸுகஸ்ஸ த³ஸ்ஸெந்தோ ஸாரதி² ‘இமஸ்மிங் காலே கிங்ஸுகோ கீதி³ஸோ , இமஸ்மிங் கீதி³ஸோ’தி விப⁴ஜித்வா ந புச்சி²தோ, தேன வோ கங்கா² உப்பன்னா’’தி வத்வா பட²மங் கா³த²மாஹ –
Atīte bārāṇasiyaṃ brahmadatte rajjaṃ kārente tassa cattāro puttā ahesuṃ. Te ekadivasaṃ sārathiṃ pakkosetvā ‘‘mayaṃ, samma, kiṃsukaṃ daṭṭhukāmā, kiṃsukarukkhaṃ no dassehī’’ti āhaṃsu. Sārathi ‘‘sādhu, dassessāmī’’ti vatvā catunnampi ekato adassetvā jeṭṭharājaputtaṃ tāva rathe nisīdāpetvā araññaṃ netvā ‘‘ayaṃ kiṃsuko’’ti khāṇukakāle kiṃsukaṃ dassesi. Aparassa bahalapalāsakāle, aparassa pupphitakāle, aparassa phalitakāle. Aparabhāge cattāropi bhātaro ekato nisinnā ‘‘kiṃsuko nāma kīdiso’’ti kathaṃ samuṭṭhāpesuṃ. Tato eko ‘‘seyyāthāpi jhāmathūṇo’’ti āha. Dutiyo ‘‘seyyathāpi nigrodharukkho’’ti, tatiyo ‘‘seyyathāpi maṃsapesī’’ti, catuttho ‘‘seyyathāpi sirīso’’ti. Te aññamaññassa kathāya aparituṭṭhā pitu santikaṃ gantvā ‘‘deva, kiṃsuko nāma kīdiso’’ti pucchitvā ‘‘tumhehi kiṃ kathita’’nti vutte attanā kathitanīhāraṃ rañño kathesuṃ. Rājā ‘‘catūhipi tumhehi kiṃsuko diṭṭho, kevalaṃ vo kiṃsukassa dassento sārathi ‘imasmiṃ kāle kiṃsuko kīdiso , imasmiṃ kīdiso’ti vibhajitvā na pucchito, tena vo kaṅkhā uppannā’’ti vatvā paṭhamaṃ gāthamāha –
196.
196.
‘‘ஸப்³பே³ஹி கிங்ஸுகோ தி³ட்டோ², கிங் ந்வெத்த² விசிகிச்ச²த²;
‘‘Sabbehi kiṃsuko diṭṭho, kiṃ nvettha vicikicchatha;
ந ஹி ஸப்³பே³ஸு டா²னேஸு, ஸாரதீ² பரிபுச்சி²தோ’’தி.
Na hi sabbesu ṭhānesu, sārathī paripucchito’’ti.
தத்த² ந ஹி ஸப்³பே³ஸு டா²னேஸு, ஸாரதீ² பரிபுச்சி²தோதி ஸப்³பே³ஹி வோ கிங்ஸுகோ தி³ட்டோ², கிங் நு தும்ஹே எத்த² விசிகிச்ச²த², ஸப்³பே³ஸு டா²னேஸு கிங்ஸுகோவேஸோ, தும்ஹேஹி பன ந ஹி ஸப்³பே³ஸு டா²னேஸு ஸாரதி² பரிபுச்சி²தோ, தேன வோ கங்கா² உப்பன்னாதி.
Tattha na hi sabbesu ṭhānesu, sārathī paripucchitoti sabbehi vo kiṃsuko diṭṭho, kiṃ nu tumhe ettha vicikicchatha, sabbesu ṭhānesu kiṃsukoveso, tumhehi pana na hi sabbesu ṭhānesu sārathi paripucchito, tena vo kaṅkhā uppannāti.
ஸத்தா² இமங் காரணங் த³ஸ்ஸெத்வா ‘‘யதா², பி⁴க்கு², தே சத்தாரோ பா⁴திகா விபா⁴க³ங் கத்வா அபுச்சி²தத்தா கிங்ஸுகே கங்க²ங் உப்பாதே³ஸுங், ஏவங் த்வம்பி இமஸ்மிங் த⁴ம்மே கங்க²ங் உப்பாதே³ஸீ’’தி வத்வா அபி⁴ஸம்பு³த்³தோ⁴ ஹுத்வா து³தியங் கா³த²மாஹ –
Satthā imaṃ kāraṇaṃ dassetvā ‘‘yathā, bhikkhu, te cattāro bhātikā vibhāgaṃ katvā apucchitattā kiṃsuke kaṅkhaṃ uppādesuṃ, evaṃ tvampi imasmiṃ dhamme kaṅkhaṃ uppādesī’’ti vatvā abhisambuddho hutvā dutiyaṃ gāthamāha –
197.
197.
‘‘ஏவங் ஸப்³பே³ஹி ஞாணேஹி, யேஸங் த⁴ம்மா அஜானிதா;
‘‘Evaṃ sabbehi ñāṇehi, yesaṃ dhammā ajānitā;
தே வே த⁴ம்மேஸு கங்க²ந்தி, கிங்ஸுகஸ்மிங்வ பா⁴தரோ’’தி.
Te ve dhammesu kaṅkhanti, kiṃsukasmiṃva bhātaro’’ti.
தஸ்ஸத்தோ² – யதா² தே பா⁴தரோ ஸப்³பே³ஸு டா²னேஸு கிங்ஸுகஸ்ஸ அதி³ட்ட²த்தா கங்கி²ங்ஸு, ஏவங் ஸப்³பே³ஹி விபஸ்ஸனாஞாணேஹி யேஸங் ஸப்³பே³ ச²ப²ஸ்ஸாயதனக²ந்த⁴பூ⁴ததா⁴துபே⁴தா³ த⁴ம்மா அஜானிதா, ஸோதாபத்திமக்³க³ஸ்ஸ அனதி⁴க³தத்தா அப்படிவித்³தா⁴, தே வே தேஸு ப²ஸ்ஸாயதனாதி³த⁴ம்மேஸு கங்க²ந்தி யதா² ஏகஸ்மிங்யேவ கிங்ஸுகஸ்மிங் சத்தாரோ பா⁴தரோதி.
Tassattho – yathā te bhātaro sabbesu ṭhānesu kiṃsukassa adiṭṭhattā kaṅkhiṃsu, evaṃ sabbehi vipassanāñāṇehi yesaṃ sabbe chaphassāyatanakhandhabhūtadhātubhedā dhammā ajānitā, sotāpattimaggassa anadhigatattā appaṭividdhā, te ve tesu phassāyatanādidhammesu kaṅkhanti yathā ekasmiṃyeva kiṃsukasmiṃ cattāro bhātaroti.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ பா³ராணஸிராஜா அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā bārāṇasirājā ahameva ahosi’’nti.
கிங்ஸுகோபமஜாதகவண்ணனா அட்ட²மா.
Kiṃsukopamajātakavaṇṇanā aṭṭhamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 248. கிங்ஸுகோபமஜாதகங் • 248. Kiṃsukopamajātakaṃ
