| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৮. কিংসুকোপমসুত্তৰণ্ণনা
8. Kiṃsukopamasuttavaṇṇanā
২৪৫. অট্ঠমে দস্সনন্তি পঠমমগ্গস্সেতং অধিৰচনং। পঠমমগ্গো হি কিলেসপহানকিচ্চং সাধেন্তো পঠমং নিব্বানং পস্সতি, তস্মা দস্সনন্তি ৰুচ্চতি। গোত্রভুঞাণং পন কিঞ্চাপি মগ্গতো পঠমতরং পস্সতি, পস্সিত্ৰা পন কত্তব্বকিচ্চস্স কিলেসপহানস্স অভাৰেন ন দস্সনন্তি ৰুচ্চতি। অপিচ চত্তারোপি মগ্গা দস্সনমেৰ। কস্মা? সোতাপত্তিমগ্গক্খণে দস্সনং ৰিসুজ্ঝতি, ফলক্খণে ৰিসুদ্ধং। সকদাগামিঅনাগামিঅরহত্তমগ্গক্খণে ৰিসুজ্ঝতি, ফলক্খণে ৰিসুদ্ধন্তি এৰং কথেন্তানং ভিক্খূনং সুত্ৰা সো ভিক্খু ‘‘অহম্পি দস্সনং ৰিসোধেত্ৰা অরহত্তফলে পতিট্ঠিতো দস্সনৰিসুদ্ধিকং নিব্বানং সচ্ছিকত্ৰা ৰিহরিস্সামী’’তি তং ভিক্খুং উপসঙ্কমিত্ৰা এৰং পুচ্ছি। সো ফস্সাযতনকম্মট্ঠানিকো ছন্নং ফস্সাযতনানং ৰসেন রূপারূপধম্মে পরিগ্গহেত্ৰা অরহত্তং পত্তো। এত্থ হি পুরিমানি পঞ্চ আযতনানি রূপং, মনাযতনং অরূপং। ইতি সো অত্তনা অধিগতমগ্গমেৰ কথেসি।
245. Aṭṭhame dassananti paṭhamamaggassetaṃ adhivacanaṃ. Paṭhamamaggo hi kilesapahānakiccaṃ sādhento paṭhamaṃ nibbānaṃ passati, tasmā dassananti vuccati. Gotrabhuñāṇaṃ pana kiñcāpi maggato paṭhamataraṃ passati, passitvā pana kattabbakiccassa kilesapahānassa abhāvena na dassananti vuccati. Apica cattāropi maggā dassanameva. Kasmā? Sotāpattimaggakkhaṇe dassanaṃ visujjhati, phalakkhaṇe visuddhaṃ. Sakadāgāmianāgāmiarahattamaggakkhaṇe visujjhati, phalakkhaṇe visuddhanti evaṃ kathentānaṃ bhikkhūnaṃ sutvā so bhikkhu ‘‘ahampi dassanaṃ visodhetvā arahattaphale patiṭṭhito dassanavisuddhikaṃ nibbānaṃ sacchikatvā viharissāmī’’ti taṃ bhikkhuṃ upasaṅkamitvā evaṃ pucchi. So phassāyatanakammaṭṭhāniko channaṃ phassāyatanānaṃ vasena rūpārūpadhamme pariggahetvā arahattaṃ patto. Ettha hi purimāni pañca āyatanāni rūpaṃ, manāyatanaṃ arūpaṃ. Iti so attanā adhigatamaggameva kathesi.
অসন্তুট্ঠোতি পদেসসঙ্খারেসু ঠত্ৰা কথিতত্তা অসন্তুট্ঠো। এৰং কিরস্স অহোসি – ‘‘অযং পদেসসঙ্খারেসু ঠত্ৰা কথেসি। সক্কা নু খো পদেসসঙ্খারেসু ঠত্ৰা দস্সনৰিসুদ্ধিকং নিব্বানং পাপুণিতু’’ন্তি? ততো নং পুচ্ছি – ‘‘আৰুসো, ত্ৰংযেৰ নু খো ইদং দস্সনৰিসুদ্ধিকং নিব্বানং জানাসি, উদাহু অঞ্ঞেপি জানন্তা অত্থী’’তি। অত্থাৰুসো, অসুকৰিহারে অসুকত্থেরো নামাতি। সো তম্পি উপসঙ্কমিত্ৰা পুচ্ছি। এতেনুপাযেন অঞ্ঞম্পি অঞ্ঞম্পীতি।
Asantuṭṭhoti padesasaṅkhāresu ṭhatvā kathitattā asantuṭṭho. Evaṃ kirassa ahosi – ‘‘ayaṃ padesasaṅkhāresu ṭhatvā kathesi. Sakkā nu kho padesasaṅkhāresu ṭhatvā dassanavisuddhikaṃ nibbānaṃ pāpuṇitu’’nti? Tato naṃ pucchi – ‘‘āvuso, tvaṃyeva nu kho idaṃ dassanavisuddhikaṃ nibbānaṃ jānāsi, udāhu aññepi jānantā atthī’’ti. Atthāvuso, asukavihāre asukatthero nāmāti. So tampi upasaṅkamitvā pucchi. Etenupāyena aññampi aññampīti.
এত্থ চ দুতিযো পঞ্চক্খন্ধকম্মট্ঠানিকো রূপক্খন্ধৰসেন রূপং, সেসক্খন্ধৰসেন নামন্তি নামরূপং ৰৰত্থপেত্ৰা অনুক্কমেন অরহত্তং পত্তো। তস্মা সোপি অত্তনা অধিগতমগ্গমেৰ কথেসি। অযং পন ‘‘ইমেসং অঞ্ঞমঞ্ঞং ন সমেতি, পঠমেন সপ্পদেসসঙ্খারেসু ঠত্ৰাৰ কথিতং, ইমিনা নিপ্পদেসেসূ’’তি অসন্তুট্ঠো হুত্ৰা তথেৰ তং পুচ্ছিত্ৰা পক্কামি।
Ettha ca dutiyo pañcakkhandhakammaṭṭhāniko rūpakkhandhavasena rūpaṃ, sesakkhandhavasena nāmanti nāmarūpaṃ vavatthapetvā anukkamena arahattaṃ patto. Tasmā sopi attanā adhigatamaggameva kathesi. Ayaṃ pana ‘‘imesaṃ aññamaññaṃ na sameti, paṭhamena sappadesasaṅkhāresu ṭhatvāva kathitaṃ, iminā nippadesesū’’ti asantuṭṭho hutvā tatheva taṃ pucchitvā pakkāmi.
ততিযো মহাভূতকম্মট্ঠানিকো চত্তারি মহাভূতানি সঙ্খেপতো চ ৰিত্থারতো চ পরিগ্গহেত্ৰা অরহত্তং পত্তো, তস্মা অযম্পি অত্তনা অধিগতমগ্গমেৰ কথেসি। অযং পন ‘‘ইমেসং অঞ্ঞমঞ্ঞং ন সমেতি, পঠমেন সপ্পদেসসঙ্খারেসু ঠত্ৰা কথিতং, দুতিযেন নিপ্পদেসেসু, ততিযেন অতিসপ্পদেসেসূ’’তি অসন্তুট্ঠো হুত্ৰা তথেৰ তং পুচ্ছিত্ৰা পক্কামি।
Tatiyo mahābhūtakammaṭṭhāniko cattāri mahābhūtāni saṅkhepato ca vitthārato ca pariggahetvā arahattaṃ patto, tasmā ayampi attanā adhigatamaggameva kathesi. Ayaṃ pana ‘‘imesaṃ aññamaññaṃ na sameti, paṭhamena sappadesasaṅkhāresu ṭhatvā kathitaṃ, dutiyena nippadesesu, tatiyena atisappadesesū’’ti asantuṭṭho hutvā tatheva taṃ pucchitvā pakkāmi.
চতুত্থো তেভূমককম্মট্ঠানিকো। তস্স কির সমপ্পৰত্তা ধাতুযো অহেসুং, কল্লসরীরং বলপত্তং, কম্মট্ঠানানিপিস্স সব্বানেৰ সপ্পাযানি, অতীতা ৰা সঙ্খারা হোন্তু অনাগতা ৰা পচ্চুপ্পন্না ৰা কামাৰচরা ৰা রূপাৰচরা ৰা অরূপাৰচরা ৰা, সব্বেপি সপ্পাযাৰ। অসপ্পাযকম্মট্ঠানং নাম নত্থি। কালেসুপি পুরেভত্তং ৰা হোতু পচ্ছাভত্তং ৰা পঠমযামাদযো ৰা, অসপ্পাযো কালো নাম নত্থি। যথা নাম চারিভূমিং ওতিণ্ণো মহাহত্থী হত্থেন গহেতব্বং হত্থেনেৰ লুঞ্চিত্ৰা গণ্হাতি, পাদেহি পহরিত্ৰা গহেতব্বং পাদেহি পহরিত্ৰা গণ্হাতি, এৰমেৰ সকলে তেভূমকধম্মে কলাপগ্গাহেন গহেত্ৰা সম্মসন্তো অরহত্তং পত্তো, তস্মা এসোপি অত্তনা অধিগতমগ্গমেৰ কথেসি। অযং পন ‘‘ইমেসং অঞ্ঞমঞ্ঞং ন সমেতি। পঠমেন সপ্পদেসসঙ্খারেসু ঠত্ৰা কথিতং, দুতিযেন নিপ্পদেসেসু, পুন ততিযেন সপ্পদেসেসু, চতুত্থেন নিপ্পদেসেসুযেৰা’’তি অসন্তুট্ঠো হুত্ৰা তং পুচ্ছি – ‘‘কিং নু খো, আৰুসো, ইদং দস্সনৰিসুদ্ধিকং নিব্বানং তুম্হেহি অত্তনোৰ ধম্মতায ঞাতং, উদাহু কেনচি ৰো অক্খাত’’ন্তি? আৰুসো, মযং কিং জানাম? অত্থি পন সদেৰকে লোকে সম্মাসম্বুদ্ধো, তং নিস্সাযেতং অম্হেহি ঞাতন্তি। সো চিন্তেসি – ‘‘ইমে ভিক্খূ ময্হং অজ্ঝাসযং গহেত্ৰা কথেতুং ন সক্কোন্তি, অহং সব্বঞ্ঞুবুদ্ধমেৰ পুচ্ছিত্ৰা নিক্কঙ্খো ভৰিস্সামী’’তি যেন ভগৰা তেনুপসঙ্কমি।
Catuttho tebhūmakakammaṭṭhāniko. Tassa kira samappavattā dhātuyo ahesuṃ, kallasarīraṃ balapattaṃ, kammaṭṭhānānipissa sabbāneva sappāyāni, atītā vā saṅkhārā hontu anāgatā vā paccuppannā vā kāmāvacarā vā rūpāvacarā vā arūpāvacarā vā, sabbepi sappāyāva. Asappāyakammaṭṭhānaṃ nāma natthi. Kālesupi purebhattaṃ vā hotu pacchābhattaṃ vā paṭhamayāmādayo vā, asappāyo kālo nāma natthi. Yathā nāma cāribhūmiṃ otiṇṇo mahāhatthī hatthena gahetabbaṃ hattheneva luñcitvā gaṇhāti, pādehi paharitvā gahetabbaṃ pādehi paharitvā gaṇhāti, evameva sakale tebhūmakadhamme kalāpaggāhena gahetvā sammasanto arahattaṃ patto, tasmā esopi attanā adhigatamaggameva kathesi. Ayaṃ pana ‘‘imesaṃ aññamaññaṃ na sameti. Paṭhamena sappadesasaṅkhāresu ṭhatvā kathitaṃ, dutiyena nippadesesu, puna tatiyena sappadesesu, catutthena nippadesesuyevā’’ti asantuṭṭho hutvā taṃ pucchi – ‘‘kiṃ nu kho, āvuso, idaṃ dassanavisuddhikaṃ nibbānaṃ tumhehi attanova dhammatāya ñātaṃ, udāhu kenaci vo akkhāta’’nti? Āvuso, mayaṃ kiṃ jānāma? Atthi pana sadevake loke sammāsambuddho, taṃ nissāyetaṃ amhehi ñātanti. So cintesi – ‘‘ime bhikkhū mayhaṃ ajjhāsayaṃ gahetvā kathetuṃ na sakkonti, ahaṃ sabbaññubuddhameva pucchitvā nikkaṅkho bhavissāmī’’ti yena bhagavā tenupasaṅkami.
ভগৰা তস্স ৰচনং সুত্ৰা ‘‘যেহি তে পঞ্হো কথিতো, তে চত্তারোপি খীণাসৰা, সুকথিতং তেহি, ত্ৰং পন অত্তনো অন্ধবালতায তং ন সল্লক্খেসী’’তি ন এৰং ৰিহেসেসি। কারকভাৰং পনস্স ঞত্ৰা ‘‘অত্থগৰেসকো এস, ধম্মদেসনায এৰ নং বুজ্ঝাপেস্সামী’’তি কিংসুকোপমং আহরি। তত্থ ভূতং ৰত্থুং কত্ৰা এৰমত্থো ৰিভাৰেতব্বো – একস্মিং কির মহানগরে একো সব্বগন্থধরো ব্রাহ্মণৰেজ্জো পণ্ডিতো পটিৰসতি। অথেকো নগরস্স পাচীনদ্ৰারগামৰাসী পণ্ডুরোগপুরিসো তস্স সন্তিকং আগন্ত্ৰা তং ৰন্দিত্ৰা অট্ঠাসি। ৰেজ্জপণ্ডিতো তেন সদ্ধিং সম্মোদিত্ৰা ‘‘কেনত্থেন আগতোসি ভদ্রমুখা’’তি, পুচ্ছি। রোগেনম্হি, অয্য, উপদ্দুতো, ভেসজ্জং মে কথেহীতি। তেন হি, ভো, গচ্ছ, কিংসুকরুক্খং ছিন্দিত্ৰা, সোসেত্ৰা ঝাপেত্ৰা, তস্স খারোদকং গহেত্ৰা ইমিনা চিমিনা চ ভেসজ্জেন যোজেত্ৰা, অরিট্ঠং কত্ৰা পিৰ, তেন তে ফাসুকং ভৰিস্সতীতি। সো তথা কত্ৰা নিরোগো বলৰা পাসাদিকো জাতো।
Bhagavā tassa vacanaṃ sutvā ‘‘yehi te pañho kathito, te cattāropi khīṇāsavā, sukathitaṃ tehi, tvaṃ pana attano andhabālatāya taṃ na sallakkhesī’’ti na evaṃ vihesesi. Kārakabhāvaṃ panassa ñatvā ‘‘atthagavesako esa, dhammadesanāya eva naṃ bujjhāpessāmī’’ti kiṃsukopamaṃ āhari. Tattha bhūtaṃ vatthuṃ katvā evamattho vibhāvetabbo – ekasmiṃ kira mahānagare eko sabbaganthadharo brāhmaṇavejjo paṇḍito paṭivasati. Atheko nagarassa pācīnadvāragāmavāsī paṇḍurogapuriso tassa santikaṃ āgantvā taṃ vanditvā aṭṭhāsi. Vejjapaṇḍito tena saddhiṃ sammoditvā ‘‘kenatthena āgatosi bhadramukhā’’ti, pucchi. Rogenamhi, ayya, upadduto, bhesajjaṃ me kathehīti. Tena hi, bho, gaccha, kiṃsukarukkhaṃ chinditvā, sosetvā jhāpetvā, tassa khārodakaṃ gahetvā iminā ciminā ca bhesajjena yojetvā, ariṭṭhaṃ katvā piva, tena te phāsukaṃ bhavissatīti. So tathā katvā nirogo balavā pāsādiko jāto.
অথঞ্ঞো দক্খিণদ্ৰারগামৰাসী পুরিসো তেনেৰ রোগেন আতুরো ‘‘অসুকো কির ভেসজ্জং কত্ৰা অরোগো জাতো’’তি সুত্ৰা তং উপসঙ্কমিত্ৰা পুচ্ছি – ‘‘কেন তে, সম্ম, ফাসুকং জাত’’ন্তি। কিংসুকারিট্ঠেন নাম, গচ্ছ ত্ৰম্পি করোহীতি। সোপি তথা কত্ৰা তাদিসোৰ জাতো।
Athañño dakkhiṇadvāragāmavāsī puriso teneva rogena āturo ‘‘asuko kira bhesajjaṃ katvā arogo jāto’’ti sutvā taṃ upasaṅkamitvā pucchi – ‘‘kena te, samma, phāsukaṃ jāta’’nti. Kiṃsukāriṭṭhena nāma, gaccha tvampi karohīti. Sopi tathā katvā tādisova jāto.
অথঞ্ঞো পচ্ছিমদ্ৰারগামৰাসী…পে॰… উত্তরদ্ৰারগামৰাসী পুরিসো তেনেৰ রোগেন আতুরো ‘‘অসুকো কির ভেসজ্জং কত্ৰা অরোগো জাতো’’তি তং উপসঙ্কমিত্ৰা পুচ্ছি ‘‘কেন তে, সম্ম, ফাসুকং জাত’’ন্তি? কিংসুকারিট্ঠেন নাম, গচ্ছ ত্ৰম্পি করোহীতি। সোপি তথা কত্ৰা তাদিসোৰ জাতো।
Athañño pacchimadvāragāmavāsī…pe… uttaradvāragāmavāsī puriso teneva rogena āturo ‘‘asuko kira bhesajjaṃ katvā arogo jāto’’ti taṃ upasaṅkamitvā pucchi ‘‘kena te, samma, phāsukaṃ jāta’’nti? Kiṃsukāriṭṭhena nāma, gaccha tvampi karohīti. Sopi tathā katvā tādisova jāto.
অথঞ্ঞো পচ্চন্তৰাসী অদিট্ঠপুব্বকিংসুকো একো পুরিসো তেনেৰ রোগেন আতুরো চিরং তানি তানি ভেসজ্জানি কত্ৰা রোগে অৰূপসমমানে ‘‘অসুকো কির নগরস্স পাচীনদ্ৰারগামৰাসী পুরিসো ভেসজ্জং কত্ৰা অরোগো জাতো’’তি সুত্ৰা ‘‘গচ্ছামহম্পি, তেন কতভেসজ্জং করিস্সামী’’তি দণ্ডমোলুব্ভ অনুপুব্বেন তস্স সন্তিকং গন্ত্ৰা, ‘‘কেন তে, সম্ম, ফাসুকং জাত’’ন্তি পুচ্ছি। কিংসুকারিট্ঠেন সম্মাতি। কীদিসো পন সো কিংসুকোতি। ঝাপিতগামে ঠিতঝামথূণো ৰিযাতি। ইতি সো পুরিসো অত্তনা দিট্ঠাকারেনৰ কিংসুকং আচিক্খি। তেন হি দিট্ঠকালে কিংসুকো পতিতপত্তো খাণুককালে দিট্ঠত্তা তাদিসোৰ হোতি।
Athañño paccantavāsī adiṭṭhapubbakiṃsuko eko puriso teneva rogena āturo ciraṃ tāni tāni bhesajjāni katvā roge avūpasamamāne ‘‘asuko kira nagarassa pācīnadvāragāmavāsī puriso bhesajjaṃ katvā arogo jāto’’ti sutvā ‘‘gacchāmahampi, tena katabhesajjaṃ karissāmī’’ti daṇḍamolubbha anupubbena tassa santikaṃ gantvā, ‘‘kena te, samma, phāsukaṃ jāta’’nti pucchi. Kiṃsukāriṭṭhena sammāti. Kīdiso pana so kiṃsukoti. Jhāpitagāme ṭhitajhāmathūṇo viyāti. Iti so puriso attanā diṭṭhākārenava kiṃsukaṃ ācikkhi. Tena hi diṭṭhakāle kiṃsuko patitapatto khāṇukakāle diṭṭhattā tādisova hoti.
সো পন পুরিসো সুতমঙ্গলিকত্তা ‘‘অযং ‘ঝাপিতগামে ঝামথূণো ৰিযা’তি আহ, অমঙ্গলমেতং । এতস্মিঞ্হি মে ভেসজ্জে কতেপি রোগো ন ৰূপসমিস্সতী’’তি তস্স ৰেয্যাকরণেন অসন্তুট্ঠো তং পুচ্ছি – ‘‘কিং নু খো, ভো, ত্ৰঞ্ঞেৰ কিংসুকং জানাসি, উদাহু অঞ্ঞোপি অত্থী’’তি। অত্থি, ভো, দক্খিণদ্ৰারগামে অসুকো নামাতি। সো তং উপসঙ্কমিত্ৰা পুচ্ছি, স্ৰাস্স পুপ্ফিতকালে দিট্ঠত্তা অত্তনো দস্সনানুরূপেন ‘‘লোহিতকো কিংসুকো’’তি আহ। সো ‘‘অযং পুরিমেন ৰিরুদ্ধং আহ, কাল়কো লোহিতকতো সুৰিদূরদূরে’’তি তস্সপি ৰেয্যাকরণেন অসন্তুট্ঠো ‘‘অত্থি পন, ভো, অঞ্ঞোপি কোচি কিংসুকদস্সাৰী, যেন কিংসুকো দিট্ঠপুব্বো’’তি? পুচ্ছিত্ৰা, ‘‘অত্থি পচ্ছিমদ্ৰারগামে অসুকো নামা’’তি ৰুত্তে তম্পি উপসঙ্কমিত্ৰা পুচ্ছি। স্ৰাস্স ফলিতকালে দিট্ঠত্তা অত্তনো দস্সনানুরূপেন ‘‘ওচিরকজাতো আদিন্নসিপাটিকো’’তি আহ। ফলিতকালস্মিঞ্হি কিংসুকো ওলম্বমানচীরকো ৰিয অধোমুখং কত্ৰা গহিতঅসিকোসো ৰিয চ সিরীসরুক্খো ৰিয চ লম্বমানফলো হোতি। সো ‘‘অযং পুরিমেহি ৰিরুদ্ধং আহ, ন সক্কা ইমস্স ৰচনং গহেতু’’ন্তি তস্সপি ৰেয্যাকরণেন অসন্তুট্ঠো ‘‘অত্থি পন, ভো, অঞ্ঞোপি কোচি কিংসুকদস্সাৰী, যেন কিংসুকো দিট্ঠপুব্বো’’তি? পুচ্ছিত্ৰা, ‘‘অত্থি উত্তরদ্ৰারগামে অসুকো নামা’’তি ৰুত্তে তম্পি উপসঙ্কমিত্ৰা পুচ্ছি। সো অস্স সঞ্ছন্নপত্তকালে দিট্ঠত্তা অত্তনো দস্সনানুরূপেন ‘‘বহলপত্তপলাসো সন্দচ্ছাযো’’তি আহ। সন্দচ্ছাযো নাম সংসন্দিত্ৰা ঠিতচ্ছাযো।
So pana puriso sutamaṅgalikattā ‘‘ayaṃ ‘jhāpitagāme jhāmathūṇo viyā’ti āha, amaṅgalametaṃ . Etasmiñhi me bhesajje katepi rogo na vūpasamissatī’’ti tassa veyyākaraṇena asantuṭṭho taṃ pucchi – ‘‘kiṃ nu kho, bho, tvaññeva kiṃsukaṃ jānāsi, udāhu aññopi atthī’’ti. Atthi, bho, dakkhiṇadvāragāme asuko nāmāti. So taṃ upasaṅkamitvā pucchi, svāssa pupphitakāle diṭṭhattā attano dassanānurūpena ‘‘lohitako kiṃsuko’’ti āha. So ‘‘ayaṃ purimena viruddhaṃ āha, kāḷako lohitakato suvidūradūre’’ti tassapi veyyākaraṇena asantuṭṭho ‘‘atthi pana, bho, aññopi koci kiṃsukadassāvī, yena kiṃsuko diṭṭhapubbo’’ti? Pucchitvā, ‘‘atthi pacchimadvāragāme asuko nāmā’’ti vutte tampi upasaṅkamitvā pucchi. Svāssa phalitakāle diṭṭhattā attano dassanānurūpena ‘‘ocirakajāto ādinnasipāṭiko’’ti āha. Phalitakālasmiñhi kiṃsuko olambamānacīrako viya adhomukhaṃ katvā gahitaasikoso viya ca sirīsarukkho viya ca lambamānaphalo hoti. So ‘‘ayaṃ purimehi viruddhaṃ āha, na sakkā imassa vacanaṃ gahetu’’nti tassapi veyyākaraṇena asantuṭṭho ‘‘atthi pana, bho, aññopi koci kiṃsukadassāvī, yena kiṃsuko diṭṭhapubbo’’ti? Pucchitvā, ‘‘atthi uttaradvāragāme asuko nāmā’’ti vutte tampi upasaṅkamitvā pucchi. So assa sañchannapattakāle diṭṭhattā attano dassanānurūpena ‘‘bahalapattapalāso sandacchāyo’’ti āha. Sandacchāyo nāma saṃsanditvā ṭhitacchāyo.
সো ‘‘অযম্পি পুরিমেহি ৰিরুদ্ধং আহ, ন সক্কা ইমস্স ৰচনং গহেতু’’ন্তি তস্সপি ৰেয্যাকরণেন অসন্তুট্ঠো তং আহ, ‘‘কিং নু খো, ভো, তুম্হে অত্তনোৰ ধম্মতায কিংসুকং জানাথ, উদাহু কেনচি ৰো অক্খাতো’’তি? কিং, ভো, মযং জানাম? অত্থি পন মহানগরস্স মজ্ঝে অম্হাকং আচরিযো ৰেজ্জপণ্ডিতো, তং নিস্সায অম্হেহি ঞাতন্তি। ‘‘তেন হি অহম্পি আচরিযমেৰ উপসঙ্কমিত্ৰা নিক্কঙ্খো ভৰিস্সামী’’তি তস্স সন্তিকং উপসঙ্কমিত্ৰা তং ৰন্দিত্ৰা অট্ঠাসি। ৰেজ্জপণ্ডিতো তেন সদ্ধিং সম্মোদিত্ৰা, ‘‘কেনত্থেন আগতোসি ভদ্রমুখা’’তি পুচ্ছি। রোগেনম্হি, অয্য, উপদ্দুতো, ভেসজ্জং মে কথেথাতি। তেন হি, ভো, গচ্ছ, কিংসুকরুক্খং ছিন্দিত্ৰা সোসেত্ৰা ঝাপেত্ৰা তস্স খারোদকং গহেত্ৰা ইমিনা চিমিনা চ ভেসজ্জেন যোজেত্ৰা অরিট্ঠং কত্ৰা পিৰ, এতেন তে ফাসুকং ভৰিস্সতীতি। সো তথা কত্ৰা নিরোগো বলৰা পাসাদিকো জাতো।
So ‘‘ayampi purimehi viruddhaṃ āha, na sakkā imassa vacanaṃ gahetu’’nti tassapi veyyākaraṇena asantuṭṭho taṃ āha, ‘‘kiṃ nu kho, bho, tumhe attanova dhammatāya kiṃsukaṃ jānātha, udāhu kenaci vo akkhāto’’ti? Kiṃ, bho, mayaṃ jānāma? Atthi pana mahānagarassa majjhe amhākaṃ ācariyo vejjapaṇḍito, taṃ nissāya amhehi ñātanti. ‘‘Tena hi ahampi ācariyameva upasaṅkamitvā nikkaṅkho bhavissāmī’’ti tassa santikaṃ upasaṅkamitvā taṃ vanditvā aṭṭhāsi. Vejjapaṇḍito tena saddhiṃ sammoditvā, ‘‘kenatthena āgatosi bhadramukhā’’ti pucchi. Rogenamhi, ayya, upadduto, bhesajjaṃ me kathethāti. Tena hi, bho, gaccha, kiṃsukarukkhaṃ chinditvā sosetvā jhāpetvā tassa khārodakaṃ gahetvā iminā ciminā ca bhesajjena yojetvā ariṭṭhaṃ katvā piva, etena te phāsukaṃ bhavissatīti. So tathā katvā nirogo balavā pāsādiko jāto.
তত্থ মহানগরং ৰিয নিব্বাননগরং দট্ঠব্বং। ৰেজ্জপণ্ডিতো ৰিয সম্মাসম্বুদ্ধো। ৰুত্তম্পি চে তং ‘‘ভিসক্কো সল্লকত্তোতি খো, সুনক্খত্ত, তথাগতস্সেতং অধিৰচনং অরহতো সম্মাসম্বুদ্ধস্সা’’তি (ম॰ নি॰ ৩.৬৫) চতূসু দ্ৰারগামেসু চত্তারো ৰেজ্জন্তেৰাসিকা ৰিয চত্তারো দস্সনৰিসুদ্ধিপত্তা খীণাসৰা। পচ্চন্তৰাসী পঠমপুরিসো ৰিয পঞ্হপুচ্ছকো ভিক্খু। পচ্চন্তৰাসিনো চতুন্নং ৰেজ্জন্তেৰাসিকানং কথায অসন্তুট্ঠস্স আচরিযমেৰ উপসঙ্কমিত্ৰা পুচ্ছনকালো ৰিয ইমস্স ভিক্খুনো চতুন্নং দস্সনৰিসুদ্ধিপত্তানং খীণাসৰানং কথায অসন্তুট্ঠস্স সত্থারং উপসঙ্কমিত্ৰা পুচ্ছনকালো।
Tattha mahānagaraṃ viya nibbānanagaraṃ daṭṭhabbaṃ. Vejjapaṇḍito viya sammāsambuddho. Vuttampi ce taṃ ‘‘bhisakko sallakattoti kho, sunakkhatta, tathāgatassetaṃ adhivacanaṃ arahato sammāsambuddhassā’’ti (ma. ni. 3.65) catūsu dvāragāmesu cattāro vejjantevāsikā viya cattāro dassanavisuddhipattā khīṇāsavā. Paccantavāsī paṭhamapuriso viya pañhapucchako bhikkhu. Paccantavāsino catunnaṃ vejjantevāsikānaṃ kathāya asantuṭṭhassa ācariyameva upasaṅkamitvā pucchanakālo viya imassa bhikkhuno catunnaṃ dassanavisuddhipattānaṃ khīṇāsavānaṃ kathāya asantuṭṭhassa satthāraṃ upasaṅkamitvā pucchanakālo.
যথা যথা অধিমুত্তানন্তি যেন যেনাকারেন অধিমুত্তানং। দস্সনং সুৰিসুদ্ধন্তি নিব্বানদস্সনং সুট্ঠু ৰিসুদ্ধং। তথা তথা খো তেহি সপ্পুরিসেহি ব্যাকতন্তি তেন তেনেৰাকারেন তুয্হং তেহি সপ্পুরিসেহি কথিতং। যথা হি ‘‘কাল়কো কিংসুকো’’তি কথেন্তো ন অঞ্ঞং কথেসি, অত্তনা দিট্ঠনযেন কিংসুকমেৰ কথেসি, এৰমেৰ ছফস্সাযতনানং ৰসেন দস্সনৰিসুদ্ধিপত্তখীণাসৰোপি ইমং পঞ্হং কথেন্তো ন অঞ্ঞং কথেসি, অত্তনা অধিগতমগ্গেন দস্সনৰিসুদ্ধিকং নিব্বানমেৰ কথেসি।
Yathā yathā adhimuttānanti yena yenākārena adhimuttānaṃ. Dassanaṃ suvisuddhanti nibbānadassanaṃ suṭṭhu visuddhaṃ. Tathā tathā kho tehi sappurisehi byākatanti tena tenevākārena tuyhaṃ tehi sappurisehi kathitaṃ. Yathā hi ‘‘kāḷako kiṃsuko’’ti kathento na aññaṃ kathesi, attanā diṭṭhanayena kiṃsukameva kathesi, evameva chaphassāyatanānaṃ vasena dassanavisuddhipattakhīṇāsavopi imaṃ pañhaṃ kathento na aññaṃ kathesi, attanā adhigatamaggena dassanavisuddhikaṃ nibbānameva kathesi.
যথা চ ‘‘লোহিতকো ওচিরকজাতো বহলপত্তপলাসো কিংসুকো’’তি কথেন্তোপি ন অঞ্ঞং কথেসি, অত্তনা দিট্ঠনযেন কিংসুকমেৰ কথেসি, এৰমেৰ পঞ্চুপাদানক্খন্ধৰসেন চতুমহাভূতৰসেন তেভূমকধম্মৰসেন দস্সনৰিসুদ্ধিপত্তখীণাসৰোপি ইমং পঞ্হং কথেন্তো ন অঞ্ঞং কথেসি, অত্তনা অধিগতমগ্গেন দস্সনৰিসুদ্ধিকং নিব্বানমেৰ কথেসি।
Yathā ca ‘‘lohitako ocirakajāto bahalapattapalāso kiṃsuko’’ti kathentopi na aññaṃ kathesi, attanā diṭṭhanayena kiṃsukameva kathesi, evameva pañcupādānakkhandhavasena catumahābhūtavasena tebhūmakadhammavasena dassanavisuddhipattakhīṇāsavopi imaṃ pañhaṃ kathento na aññaṃ kathesi, attanā adhigatamaggena dassanavisuddhikaṃ nibbānameva kathesi.
তত্থ যথা কাল়ককালে কিংসুকদস্সাৰিনোপি তং দস্সনং ভূতং তচ্ছং ন তেন অঞ্ঞং দিট্ঠং, কিংসুকোৰ দিট্ঠো, এৰমেৰ ছফস্সাযতনৰসেন দস্সনৰিসুদ্ধিপত্তস্সাপি খীণাসৰস্স দস্সনং ভূতং তচ্ছং, ন তেন অঞ্ঞং কথিতং, অত্তনা অধিগতমগ্গেন দস্সনৰিসুদ্ধিকং নিব্বানমেৰ কথিতং। যথা চ লোহিতকালে ওচিরকজাতকালে বহলপত্তপলাসকালে কিংসুকদস্সাৰিনোপি তং দস্সনং ভূতং তচ্ছং, ন তেন অঞ্ঞং দিট্ঠং, কিংসুকোৰ দিট্ঠো, এৰমেৰ পঞ্চুপাদানক্খন্ধৰসেন চতুমহাভূতৰসেন তেভূমকধম্মৰসেন দস্সনৰিসুদ্ধিপত্তস্সাপি খীণাসৰস্স দস্সনং ভূতং তচ্ছং, ন তেন অঞ্ঞং কথিতং, অত্তনা অধিগতমগ্গেন দস্সনৰিসুদ্ধিকং নিব্বানমেৰ কথিতং।
Tattha yathā kāḷakakāle kiṃsukadassāvinopi taṃ dassanaṃ bhūtaṃ tacchaṃ na tena aññaṃ diṭṭhaṃ, kiṃsukova diṭṭho, evameva chaphassāyatanavasena dassanavisuddhipattassāpi khīṇāsavassa dassanaṃ bhūtaṃ tacchaṃ, na tena aññaṃ kathitaṃ, attanā adhigatamaggena dassanavisuddhikaṃ nibbānameva kathitaṃ. Yathā ca lohitakāle ocirakajātakāle bahalapattapalāsakāle kiṃsukadassāvinopi taṃ dassanaṃ bhūtaṃ tacchaṃ, na tena aññaṃ diṭṭhaṃ, kiṃsukova diṭṭho, evameva pañcupādānakkhandhavasena catumahābhūtavasena tebhūmakadhammavasena dassanavisuddhipattassāpi khīṇāsavassa dassanaṃ bhūtaṃ tacchaṃ, na tena aññaṃ kathitaṃ, attanā adhigatamaggena dassanavisuddhikaṃ nibbānameva kathitaṃ.
সেয্যথাপি , ভিক্খু রঞ্ঞো পচ্চন্তিমং নগরন্তি ইদং কস্মা আরদ্ধং? সচে তেন ভিক্খুনা তং সল্লক্খিতং, অথস্স ধম্মদেসনত্থং আরদ্ধং। সচে ন সল্লক্খিতং, অথস্স ইমিনা নগরোপমেন তস্সেৰত্থস্স দীপনত্থায আৰিভাৰনত্থায আরদ্ধং। তত্থ যস্মা মজ্ঝিমপদেসে নগরস্স পাকারাদীনি থিরানি ৰা হোন্তু দুব্বলানি ৰা, সব্বসো ৰা মা হোন্তু, চোরাসঙ্কা ন হোন্তি, তস্মা তং অগ্গহেত্ৰা ‘‘পচ্চন্তিমং নগর’’ন্তি আহ। দল়্হুদ্ধাপন্তি থিরপাকারং। দল়্হপাকারতোরণন্তি থিরপাকারঞ্চেৰ থিরতোরণঞ্চ। তোরণানি নাম হি পুরিসুব্বেধানি নগরস্স অলঙ্কারত্থং করীযন্তি, চোরনিৰারণত্থানিপি হোন্তিযেৰ। অথ ৰা তোরণন্তি পিট্ঠসঙ্ঘাটস্সেতং নামং, থিরপিট্ঠসঙ্ঘাটন্তিপি অত্থো। ছদ্ৰারন্তি নগরদ্ৰারং নাম একম্পি হোতি দ্ৰেপি সতম্পি সহস্সম্পি, ইধ পন সত্থা ছদ্ৰারিকনগরং দস্সেন্তো এৰমাহ। পণ্ডিতোতি পণ্ডিচ্চেন সমন্নাগতো। ব্যত্তোতি ৰেয্যত্তিযেন সমন্নাগতো ৰিসদঞাণো। মেধাৰীতি ঠানুপ্পত্তিকপঞ্ঞাসঙ্খাতায মেধায সমন্নাগতো।
Seyyathāpi, bhikkhu rañño paccantimaṃ nagaranti idaṃ kasmā āraddhaṃ? Sace tena bhikkhunā taṃ sallakkhitaṃ, athassa dhammadesanatthaṃ āraddhaṃ. Sace na sallakkhitaṃ, athassa iminā nagaropamena tassevatthassa dīpanatthāya āvibhāvanatthāya āraddhaṃ. Tattha yasmā majjhimapadese nagarassa pākārādīni thirāni vā hontu dubbalāni vā, sabbaso vā mā hontu, corāsaṅkā na honti, tasmā taṃ aggahetvā ‘‘paccantimaṃ nagara’’nti āha. Daḷhuddhāpanti thirapākāraṃ. Daḷhapākāratoraṇanti thirapākārañceva thiratoraṇañca. Toraṇāni nāma hi purisubbedhāni nagarassa alaṅkāratthaṃ karīyanti, coranivāraṇatthānipi hontiyeva. Atha vā toraṇanti piṭṭhasaṅghāṭassetaṃ nāmaṃ, thirapiṭṭhasaṅghāṭantipi attho. Chadvāranti nagaradvāraṃ nāma ekampi hoti dvepi satampi sahassampi, idha pana satthā chadvārikanagaraṃ dassento evamāha. Paṇḍitoti paṇḍiccena samannāgato. Byattoti veyyattiyena samannāgato visadañāṇo. Medhāvīti ṭhānuppattikapaññāsaṅkhātāya medhāya samannāgato.
পুরত্থিমায দিসাযাতিআদিম্হি ভূতমত্থং কত্ৰা এৰমত্থো ৰেদিতব্বো – সমিদ্ধে কির মহানগরে সত্তরতনসম্পন্নো রাজা চক্কৰত্তি রজ্জং অনুসাসতি, তস্সেতং পচ্চন্তনগরং রাজাযুত্তৰিরহিতং , অথ পুরিসা আগন্ত্ৰা ‘‘অম্হাকং, দেৰ, নগরে আযুত্তকো নত্থি, দেহি নো কিঞ্চি আযুত্তক’’ন্তি আহংসু। রাজা একং পুত্তং দত্ৰা ‘‘গচ্ছথ, এতং আদায তত্থ অভিসিঞ্চিত্ৰা ৰিনিচ্ছযট্ঠানাদীনি কত্ৰা ৰসথা’’তি। তে তথা অকংসু। রাজপুত্তো পাপমিত্তসংসগ্গেন কতিপাহেযেৰ সুরাসোণ্ডো হুত্ৰা, সব্বানি ৰিনিচ্ছযট্ঠানাদীনি হারেত্ৰা, নগরমজ্ঝে ধুত্তেহি পরিৰারিতো সুরং পিৰন্তো নচ্চগীতাদিরতিযা ৰীতিনামেতি। অথ রঞ্ঞো আগন্ত্ৰা আরোচযিংসু।
Puratthimāya disāyātiādimhi bhūtamatthaṃ katvā evamattho veditabbo – samiddhe kira mahānagare sattaratanasampanno rājā cakkavatti rajjaṃ anusāsati, tassetaṃ paccantanagaraṃ rājāyuttavirahitaṃ , atha purisā āgantvā ‘‘amhākaṃ, deva, nagare āyuttako natthi, dehi no kiñci āyuttaka’’nti āhaṃsu. Rājā ekaṃ puttaṃ datvā ‘‘gacchatha, etaṃ ādāya tattha abhisiñcitvā vinicchayaṭṭhānādīni katvā vasathā’’ti. Te tathā akaṃsu. Rājaputto pāpamittasaṃsaggena katipāheyeva surāsoṇḍo hutvā, sabbāni vinicchayaṭṭhānādīni hāretvā, nagaramajjhe dhuttehi parivārito suraṃ pivanto naccagītādiratiyā vītināmeti. Atha rañño āgantvā ārocayiṃsu.
রাজা একং পণ্ডিতং অমচ্চং আণাপেসি – ‘‘গচ্ছ কুমারং ওৰদিত্ৰা, ৰিনিচ্ছযট্ঠানাদীনি কারেত্ৰা, পুন অভিসেকং কত্ৰা, এহী’’তি। ন সক্কা, দেৰ, কুমারং ওৰদিতুং, চণ্ডো কুমারো ঘাতেয্যাপি মন্তি। অথেকং বলসম্পন্নং যোধং আণাপেসি – ‘‘ত্ৰং ইমিনা সদ্ধিং গন্ত্ৰা সচে সো ওৰাদে ন তিট্ঠতি, সীসমস্স ছিন্দাহী’’তি। ইতি সো অমচ্চো যোধো চাতি ইদং সীঘং দূতযুগং তত্থ গন্ত্ৰা দোৰারিকং পুচ্ছি – ‘‘কহং, ভো, নগরস্স সামি কুমারো’’তি। এস মজ্ঝেসিঙ্ঘাটকে সুরং পিৰন্তো ধুত্তপরিৰারিতো গীতাদিরতিং অনুভোন্তো নিসিন্নোতি। অথ তং দূতযুগং গন্ত্ৰা অমচ্চো তাৰেত্থ, ‘‘সামি, ৰিনিচ্ছযট্ঠানাদীনি কির কারেত্ৰা সাধুকং রজ্জং অনুসাসা’’তি আহ। কুমারো অসুণন্তো ৰিয নিসীদি। অথ নং যোধো সীসে গহেত্ৰা, ‘‘সচে রঞ্ঞো আণং করোসি, কর, নো চে, এত্থেৰ তে সীসং পাতেস্সামী’’তি খগ্গং অব্বাহি। পরিচারকা ধুত্তা তাৰদেৰ দিসাসু পলাযিংসু। কুমারো ভীতো সাসনং সম্পটিচ্ছি। অথস্স তে তত্থেৰ অভিসেকং কত্ৰা সেতচ্ছত্তং উস্সাপেত্ৰা ‘‘সম্মা রজ্জং অনুসাসাহী’’তি রঞ্ঞা ৰুত্তং যথাভূতৰচনং নিয্যাতেত্ৰা যথাগতমগ্গমেৰ পটিপজ্জিংসু। ইমমত্থং আৰিকরোন্তো ভগৰা ‘‘পুরত্থিমায দিসাযা’’তি আহ।
Rājā ekaṃ paṇḍitaṃ amaccaṃ āṇāpesi – ‘‘gaccha kumāraṃ ovaditvā, vinicchayaṭṭhānādīni kāretvā, puna abhisekaṃ katvā, ehī’’ti. Na sakkā, deva, kumāraṃ ovadituṃ, caṇḍo kumāro ghāteyyāpi manti. Athekaṃ balasampannaṃ yodhaṃ āṇāpesi – ‘‘tvaṃ iminā saddhiṃ gantvā sace so ovāde na tiṭṭhati, sīsamassa chindāhī’’ti. Iti so amacco yodho cāti idaṃ sīghaṃ dūtayugaṃ tattha gantvā dovārikaṃ pucchi – ‘‘kahaṃ, bho, nagarassa sāmi kumāro’’ti. Esa majjhesiṅghāṭake suraṃ pivanto dhuttaparivārito gītādiratiṃ anubhonto nisinnoti. Atha taṃ dūtayugaṃ gantvā amacco tāvettha, ‘‘sāmi, vinicchayaṭṭhānādīni kira kāretvā sādhukaṃ rajjaṃ anusāsā’’ti āha. Kumāro asuṇanto viya nisīdi. Atha naṃ yodho sīse gahetvā, ‘‘sace rañño āṇaṃ karosi, kara, no ce, ettheva te sīsaṃ pātessāmī’’ti khaggaṃ abbāhi. Paricārakā dhuttā tāvadeva disāsu palāyiṃsu. Kumāro bhīto sāsanaṃ sampaṭicchi. Athassa te tattheva abhisekaṃ katvā setacchattaṃ ussāpetvā ‘‘sammā rajjaṃ anusāsāhī’’ti raññā vuttaṃ yathābhūtavacanaṃ niyyātetvā yathāgatamaggameva paṭipajjiṃsu. Imamatthaṃ āvikaronto bhagavā ‘‘puratthimāya disāyā’’ti āha.
তত্রিদং ওপম্মসংসন্দনং – সমিদ্ধমহানগরং ৰিয হি নিব্বাননগরং দট্ঠব্বং, সত্তরতনসমন্নাগতো রাজা চক্কৰত্তি ৰিয সত্তবোজ্ঝঙ্গরতনসমন্নাগতো ধম্মরাজা সম্মাসম্বুদ্ধো, পচ্চন্তিমনগরং ৰিয সক্কাযনগরং, তস্মিং নগরে কূটরাজপুত্তো ৰিয ইমস্স ভিক্খুনো কূটচিত্তুপ্পাদো, কূটরাজপুত্তস্স ধুত্তেহি পরিৰারিতকালো ৰিয ইমস্স ভিক্খুনো পঞ্চহি নীৰরণেহি সমঙ্গিকালো, দ্ৰে সীঘদূতা ৰিয সমথকম্মট্ঠানঞ্চ ৰিপস্সনাকম্মট্ঠানঞ্চ, মহাযোধেন সীসে গহিতকালো ৰিয উপ্পন্নপঠমজ্ঝানসমাধিনা নিচ্চলং কত্ৰা চিত্তগ্গহিতকালো, যোধেন সীসে গহিতমত্তে ধুত্তানং দিসাসু পলাযিত্ৰা দূরীভাৰো ৰিয পঠমজ্ঝানম্হি উপ্পন্নমত্তে নীৰরণানং দূরীভাৰো, ‘‘করিস্সামি রঞ্ঞো সাসন’’ন্তি সম্পটিচ্ছিতমত্তে ৰিস্সট্ঠকালো ৰিয ঝানতো ৰুট্ঠিতকালো, অমচ্চেন রঞ্ঞো সাসনং আরোচিতকালো ৰিয সমাধিনা চিত্তং কম্মনিযং কত্ৰা ৰিপস্সনাকম্মট্ঠানস্স ৰড্ঢিতকালো, তত্থেৰস্স তেহি দ্ৰীহি দূতেহি কতাভিসেকস্স সেতচ্ছত্তউস্সাপনং ৰিয সমথৰিপস্সনাকম্মট্ঠানং নিস্সায অরহত্তপ্পত্তস্স ৰিমুত্তিসেতচ্ছত্তুস্সাপনং ৰেদিতব্বং।
Tatridaṃ opammasaṃsandanaṃ – samiddhamahānagaraṃ viya hi nibbānanagaraṃ daṭṭhabbaṃ, sattaratanasamannāgato rājā cakkavatti viya sattabojjhaṅgaratanasamannāgato dhammarājā sammāsambuddho, paccantimanagaraṃ viya sakkāyanagaraṃ, tasmiṃ nagare kūṭarājaputto viya imassa bhikkhuno kūṭacittuppādo, kūṭarājaputtassa dhuttehi parivāritakālo viya imassa bhikkhuno pañcahi nīvaraṇehi samaṅgikālo, dve sīghadūtā viya samathakammaṭṭhānañca vipassanākammaṭṭhānañca, mahāyodhena sīse gahitakālo viya uppannapaṭhamajjhānasamādhinā niccalaṃ katvā cittaggahitakālo, yodhena sīse gahitamatte dhuttānaṃ disāsu palāyitvā dūrībhāvo viya paṭhamajjhānamhi uppannamatte nīvaraṇānaṃ dūrībhāvo, ‘‘karissāmi rañño sāsana’’nti sampaṭicchitamatte vissaṭṭhakālo viya jhānato vuṭṭhitakālo, amaccena rañño sāsanaṃ ārocitakālo viya samādhinā cittaṃ kammaniyaṃ katvā vipassanākammaṭṭhānassa vaḍḍhitakālo, tatthevassa tehi dvīhi dūtehi katābhisekassa setacchattaussāpanaṃ viya samathavipassanākammaṭṭhānaṃ nissāya arahattappattassa vimuttisetacchattussāpanaṃ veditabbaṃ.
নগরন্তি খো ভিক্খু ইমস্সেতং চাতুমহাভূতিকস্স কাযস্স অধিৰচনন্তিআদীসু পন চাতুমহাভূতিকস্সাতিআদীনং পদানং অত্থো হেট্ঠা ৰিত্থারিতোৰ। কেৰলং পন ৰিঞ্ঞাণরাজপুত্তস্স নিৰাসট্ঠানত্তা এত্থ কাযো ‘‘নগর’’ন্তি ৰুত্তো, তস্সেৰ দ্ৰারভূতত্তা ছ আযতনানি ‘‘দ্ৰারানী’’তি, তেসু দ্ৰারেসু নিচ্চং সুপ্পতিট্ঠিতত্তা সতি ‘‘দোৰারিকো’’তি, কম্মট্ঠানং আচিক্খন্তেন ধম্মরাজেন পেসিতত্তা সমথৰিপস্সনা ‘‘সীঘং দূতযুগ’’ন্তি। এত্থ মহাযোধো ৰিয সমথো, পণ্ডিতামচ্চো ৰিয ৰিপস্সনা ৰেদিতব্বা।
Nagaranti kho bhikkhu imassetaṃ cātumahābhūtikassa kāyassa adhivacanantiādīsu pana cātumahābhūtikassātiādīnaṃ padānaṃ attho heṭṭhā vitthāritova. Kevalaṃ pana viññāṇarājaputtassa nivāsaṭṭhānattā ettha kāyo ‘‘nagara’’nti vutto, tasseva dvārabhūtattā cha āyatanāni ‘‘dvārānī’’ti, tesu dvāresu niccaṃ suppatiṭṭhitattā sati ‘‘dovāriko’’ti, kammaṭṭhānaṃ ācikkhantena dhammarājena pesitattā samathavipassanā ‘‘sīghaṃ dūtayuga’’nti. Ettha mahāyodho viya samatho, paṇḍitāmacco viya vipassanā veditabbā.
মজ্ঝে সিঙ্ঘাটকোতি নগরমজ্ঝে সিঙ্ঘাটকো। মহাভূতানন্তি হদযৰত্থুস্স নিস্সযভূতানং মহাভূতানং । ৰত্থুরূপস্স হি পচ্চযদস্সনত্থমেৰেতং চতুমহাভূতগ্গহণং কতং। নগরমজ্ঝে পন সো রাজকুমারো ৰিয সরীরমজ্ঝে হদযরূপসিঙ্ঘাটকে নিসিন্নো সমথৰিপস্সনাদূতেহি অরহত্তাভিসেকেন অভিসিঞ্চিতব্বো ৰিপস্সনাৰিঞ্ঞাণরাজপুত্তো দট্ঠব্বো। নিব্বানং পন যথাভূতসভাৰং অকুপ্পং অধিকারীতি কত্ৰা যথাভূতং ৰচনন্তি ৰুত্তং। অরিযমগ্গো পন যাদিসোৰ পুব্বভাগৰিপস্সনামগ্গো, অযম্পি অট্ঠঙ্গসমন্নাগতত্তা তাদিসোযেৰাতি কত্ৰা যথাগতমগ্গোতি ৰুত্তো। ইদং তাৰেত্থ ধম্মদেসনত্থং আভতায উপমায সংসন্দনং।
Majjhe siṅghāṭakoti nagaramajjhe siṅghāṭako. Mahābhūtānanti hadayavatthussa nissayabhūtānaṃ mahābhūtānaṃ . Vatthurūpassa hi paccayadassanatthamevetaṃ catumahābhūtaggahaṇaṃ kataṃ. Nagaramajjhe pana so rājakumāro viya sarīramajjhe hadayarūpasiṅghāṭake nisinno samathavipassanādūtehi arahattābhisekena abhisiñcitabbo vipassanāviññāṇarājaputto daṭṭhabbo. Nibbānaṃ pana yathābhūtasabhāvaṃ akuppaṃ adhikārīti katvā yathābhūtaṃ vacananti vuttaṃ. Ariyamaggo pana yādisova pubbabhāgavipassanāmaggo, ayampi aṭṭhaṅgasamannāgatattā tādisoyevāti katvā yathāgatamaggoti vutto. Idaṃ tāvettha dhammadesanatthaṃ ābhatāya upamāya saṃsandanaṃ.
তস্সেৰত্থস্স পাকটীকরণত্থং আভতপক্খে পন ইদং সংসন্দনং – এত্থ হি ছদ্ৰারূপমা ছফস্সাযতনৰসেন দস্সনৰিসুদ্ধিপত্তং খীণাসৰং দস্সেতুং আভতা, নগরসামিউপমা পঞ্চক্খন্ধৰসেন, সিঙ্ঘাটকূপমা চতুমহাভূতৰসেন, নগরূপমা তেভূমকধম্মৰসেন দস্সনৰিসুদ্ধিপত্তং খীণাসৰং দস্সেতুং আভতা। সঙ্খেপতো পনিমস্মিং সুত্তে চতুসচ্চমেৰ কথিতং। সকলেনপি হি নগরসম্ভারেন দুক্খসচ্চমেৰ কথিতং, যথাভূতৰচনেন নিরোধসচ্চং, যথাগতমগ্গেন মগ্গসচ্চং, দুক্খস্স পন পভাৰিকা তণ্হা সমুদযসচ্চং। দেসনাপরিযোসানে পঞ্হপুচ্ছকো ভিক্খু সোতাপত্তিফলে পতিট্ঠিতোতি।
Tassevatthassa pākaṭīkaraṇatthaṃ ābhatapakkhe pana idaṃ saṃsandanaṃ – ettha hi chadvārūpamā chaphassāyatanavasena dassanavisuddhipattaṃ khīṇāsavaṃ dassetuṃ ābhatā, nagarasāmiupamā pañcakkhandhavasena, siṅghāṭakūpamā catumahābhūtavasena, nagarūpamā tebhūmakadhammavasena dassanavisuddhipattaṃ khīṇāsavaṃ dassetuṃ ābhatā. Saṅkhepato panimasmiṃ sutte catusaccameva kathitaṃ. Sakalenapi hi nagarasambhārena dukkhasaccameva kathitaṃ, yathābhūtavacanena nirodhasaccaṃ, yathāgatamaggena maggasaccaṃ, dukkhassa pana pabhāvikā taṇhā samudayasaccaṃ. Desanāpariyosāne pañhapucchako bhikkhu sotāpattiphale patiṭṭhitoti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. কিংসুকোপমসুত্তং • 8. Kiṃsukopamasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. কিংসুকোপমসুত্তৰণ্ণনা • 8. Kiṃsukopamasuttavaṇṇanā
