| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၈. ကိံသုကောပမသုတ္တဝဏ္ဏနာ
8. Kiṃsukopamasuttavaṇṇanā
၂၄၅. စတုန္နံ အရိယသစ္စာနံ ပရိညာဘိသမယာဒိဝသေန ဝိဝိဓဒသ္သနန္တိ ကိစ္စဝသေန နာနာဒသ္သနံ ဟောတီတိ ဝုတ္တံ, ‘‘ဒသ္သနန္တိ ပဌမမဂ္ဂသ္သေတံ အဓိဝစန’’န္တိ ။ တယိဒံ ဥပရိမဂ္ဂေသု ဘာဝနာပရိယာယသ္သ နိရုဠ္ဟတ္တာ ပဌမမဂ္ဂသ္သ ပဌမံ နိဗ္ဗာနဒသ္သနတော။ တေနာဟ ‘‘ပဌမမဂ္ဂော ဟီ’’တိအာဒိ ။ ကောစိ ယထာဝုတ္တံ အဝိပရီတံ အတ္ထံ အဇာနန္တော ဉာဏဒသ္သနံ နာမ အာရမ္မဏကရဏသ္သ ဝသေန အတိပ္ပသင္ဂံ အာသင္ကေယ္ယာတိ တံ နိဝတ္တေတုံ ‘‘ဂောတ္ရဘူ ပနာ’’တိအာဒိ ဝုတ္တံ။ န ဒသ္သနန္တိ ဝုစ္စတီတိ ဧတ္ထ ရာဇဒသ္သနံ ဥဒာဟရန္တိ။ စတ္တာရောပိ မဂ္ဂာ ဒသ္သနမေဝ ယထာဝုတ္တေနတ္ထေန, ဘာဝနာပရိယာယော ပန ဥပရိ တိဏ္ဏံ မဂ္ဂာနံ ပဌမမဂ္ဂဥပာယသ္သ ဘာဝနာကာရေန ပဝတ္တနတော။ ဒသ္သနံ ဝိသုဒ္ဓိ ဧတ္ထာတိ ဒသ္သနဝိသုဒ္ဓိကံ, နိဗ္ဗာနံ။ ဖသ္သာယတနံ ကမ္မဋ္ဌာနံ အသ္သ အတ္ထီတိ ဖသ္သာယတနကမ္မဋ္ဌာနိကော။ ဧသ နယော သေသေသုပိ ပဒေသု။
245. Catunnaṃ ariyasaccānaṃ pariññābhisamayādivasena vividhadassananti kiccavasena nānādassanaṃ hotīti vuttaṃ, ‘‘dassananti paṭhamamaggassetaṃ adhivacana’’nti . Tayidaṃ uparimaggesu bhāvanāpariyāyassa niruḷhattā paṭhamamaggassa paṭhamaṃ nibbānadassanato. Tenāha ‘‘paṭhamamaggo hī’’tiādi . Koci yathāvuttaṃ aviparītaṃ atthaṃ ajānanto ñāṇadassanaṃ nāma ārammaṇakaraṇassa vasena atippasaṅgaṃ āsaṅkeyyāti taṃ nivattetuṃ ‘‘gotrabhū panā’’tiādi vuttaṃ. Na dassananti vuccatīti ettha rājadassanaṃ udāharanti. Cattāropi maggā dassanameva yathāvuttenatthena, bhāvanāpariyāyo pana upari tiṇṇaṃ maggānaṃ paṭhamamaggaupāyassa bhāvanākārena pavattanato. Dassanaṃ visuddhi etthāti dassanavisuddhikaṃ, nibbānaṃ. Phassāyatanaṃ kammaṭṭhānaṃ assa atthīti phassāyatanakammaṭṭhāniko. Esa nayo sesesupi padesu.
ပဒေသသင္ခာရေသူတိ သင္ခာရေကဒေသေသု။ ဟေဋ္ဌိမပရိစ္ဆေဒေန ပထဝိအာဒိကေ ဓမ္မမတ္တေ ဒိဋ္ဌေ ရူပပရိဂ္ဂဟော, စက္ခုဝိညာဏာဒိကေ တံသဟဂတဓမ္မမတ္တေ ဒိဋ္ဌေ အရူပပရိဂ္ဂဟော စ သိဇ္ဈတီတိ ဝဒန္တိ။
Padesasaṅkhāresūti saṅkhārekadesesu. Heṭṭhimaparicchedena pathaviādike dhammamatte diṭṭhe rūpapariggaho, cakkhuviññāṇādike taṃsahagatadhammamatte diṭṭhe arūpapariggaho ca sijjhatīti vadanti.
အဓိဂတမဂ္ဂမေဝ ကထေသီတိ ယေန မုခေန ဝိပသ္သနာဘိနိဝေသံ အကာသိ, တမေဝသ္သ မုခံ ကထေသိ။ အယံ ပနာတိ ကမ္မဋ္ဌာနံ ပုစ္ဆန္တော ဘိက္ခု။ ဣမေသန္တိ ဖသ္သာယတနကမ္မဋ္ဌာနိကပဉ္စက္ခန္ဓကမ္မဋ္ဌာနိကာနံ ဝစနံ။ ‘‘အညမညံ န သမေတီ’’တိ ဝတ္ဝာ တမေဝတ္ထံ ပာကဋံ ကရောတိ ‘‘ပဌမေနာ’’တိအာဒိနာ။ ပဉ္စက္ခန္ဓဝိမုတ္တသ္သ သင္ခာရသ္သ အဘာဝာ ‘‘နိပ္ပဒေသေသူ’’တိ ဝုတ္တံ။ တထေဝာတိ ယထေဝ ဖသ္သာယတနကမ္မဋ္ဌာနိကံ, တထေဝ တံ ပဉ္စက္ခန္ဓကမ္မဋ္ဌာနိကံ ပုစ္ဆိတ္ဝာ။
Adhigatamaggameva kathesīti yena mukhena vipassanābhinivesaṃ akāsi, tamevassa mukhaṃ kathesi. Ayaṃ panāti kammaṭṭhānaṃ pucchanto bhikkhu. Imesanti phassāyatanakammaṭṭhānikapañcakkhandhakammaṭṭhānikānaṃ vacanaṃ. ‘‘Aññamaññaṃ na sametī’’ti vatvā tamevatthaṃ pākaṭaṃ karoti ‘‘paṭhamenā’’tiādinā. Pañcakkhandhavimuttassa saṅkhārassa abhāvā ‘‘nippadesesū’’ti vuttaṃ. Tathevāti yatheva phassāyatanakammaṭṭhānikaṃ, tatheva taṃ pañcakkhandhakammaṭṭhānikaṃ pucchitvā.
သမပ္ပဝတ္တာ ဓာတုယောတိ ရသာဒယော သရီရဓာတုယော သမပ္ပဝတ္တာ, န ဝိသမာကာရသဏ္ဌိတာ အဟေသုံ။ တေနာဟ ‘‘ကလ္လသရီရံ ဗလပ္ပတ္တ’’န္တိ။ ‘‘အတီတာ သင္ခာရာ’’တိအာဒိ ဝိပသ္သနာဘိနိဝေသဝသေန ဝုတ္တံ။ သမ္မသနံ သဗ္ဗတ္ထကမေဝ ဣစ္ဆိတဗ္ဗံ။ စာရိဘူမိန္တိ ဂောစရဋ္ဌာနံ။
Samappavattā dhātuyoti rasādayo sarīradhātuyo samappavattā, na visamākārasaṇṭhitā ahesuṃ. Tenāha ‘‘kallasarīraṃ balappatta’’nti. ‘‘Atītā saṅkhārā’’tiādi vipassanābhinivesavasena vuttaṃ. Sammasanaṃ sabbatthakameva icchitabbaṃ. Cāribhūminti gocaraṭṭhānaṃ.
ကာရကဘာဝန္တိ ဘာဝနာနုယုဉ္ဇနဘာဝံ။ ပဏ္ဍုရောဂပုရိသောတိ ပဏ္ဍုရောဂီ ပုရိသော။ အရိဋ္ဌန္တိ သုတ္တံ။ ဘေသဇ္ဇံ ကတ္ဝာတိ ဘေသဇ္ဇပယောဂံ ကတ္ဝာ။ ကရိသ္သာမီတိ ဘေသဇ္ဇံ ကရိသ္သာမိ။ ဈာမထုဏော ဝိယာတိ ဒဍ္ဎထုဏော ဝိယ ခာရကဇာလနဒ္ဓတ္တာ တရုဏမကုလသန္တာနသဉ္ဆန္နတ္တာ။
Kārakabhāvanti bhāvanānuyuñjanabhāvaṃ. Paṇḍurogapurisoti paṇḍurogī puriso. Ariṭṭhanti suttaṃ. Bhesajjaṃ katvāti bhesajjapayogaṃ katvā. Karissāmīti bhesajjaṃ karissāmi. Jhāmathuṇo viyāti daḍḍhathuṇo viya khārakajālanaddhattā taruṇamakulasantānasañchannattā.
ဒက္ခိဏဒ္ဝာရဂာမေတိ ဒက္ခိဏဒ္ဝာရသမီပေ ဂာမေ။ လောဟိတကောတိ လောဟိတဝဏ္ဏော။ ဩစိရကဇာတောတိ ဇာတဩလမ္ဗမာနစိရကော ဝိယ။ အာဒိန္နသိပာဋိကောတိ ဂဟိတဖလပောတကော။ သန္ဒစ္ဆာယောတိ ဗဟလစ္ဆာယော။ ယသ္မာ တသ္သ ရုက္ခသ္သ သာခာ အဝိရဠာ ဃနပ္ပတ္တာ အညမညံ သံသန္ဒိတ္ဝာ ဌိတာ, တသ္မာ ဆာယာပိသ္သ တာဒိသီတိ ဝုတ္တံ ‘‘သန္ဒစ္ဆာယော နာမ သံသန္ဒိတ္ဝာ ဌိတစ္ဆာယော’’တိ, ဃနစ္ဆာယောတိ အတ္ထော။ တတ္ထာတိအာဒိ ဥပမာသံသန္ဒနံ။
Dakkhiṇadvāragāmeti dakkhiṇadvārasamīpe gāme. Lohitakoti lohitavaṇṇo. Ocirakajātoti jātaolambamānacirako viya. Ādinnasipāṭikoti gahitaphalapotako. Sandacchāyoti bahalacchāyo. Yasmā tassa rukkhassa sākhā aviraḷā ghanappattā aññamaññaṃ saṃsanditvā ṭhitā, tasmā chāyāpissa tādisīti vuttaṃ ‘‘sandacchāyo nāma saṃsanditvā ṭhitacchāyo’’ti, ghanacchāyoti attho. Tatthātiādi upamāsaṃsandanaṃ.
ယေန ယေနာကာရေန အဓိမုတ္တာနန္တိ ဆဖသ္သာယတနာဒိမုခေန ယေန ယေန ဝိပသ္သနာဘိနိဝေသေန ဝိပသ္သန္တာနံ နိဗ္ဗာနဉ္စ အဓိမုတ္တာနံ။ သုဋ္ဌု ဝိသုဒ္ဓံ ပရိညာတိသမယာဒိသိဒ္ဓိယာ။ တေန တေနေဝာကာရေနာတိ အတ္တနာဓိမုတ္တာကာရေန။ ဣဒာနိ တံ တံ အာကာရံ ဥပမာယ သဒ္ဓိံ ယောဇေတ္ဝာ ဒသ္သေတုံ ‘‘ယထာ ဟီ’’တိအာဒိ အာရဒ္ဓံ။ တံ သုဝိညေယ္ယမေဝ။
Yenayenākārena adhimuttānanti chaphassāyatanādimukhena yena yena vipassanābhinivesena vipassantānaṃ nibbānañca adhimuttānaṃ. Suṭṭhu visuddhaṃ pariññātisamayādisiddhiyā. Tena tenevākārenāti attanādhimuttākārena. Idāni taṃ taṃ ākāraṃ upamāya saddhiṃ yojetvā dassetuṃ ‘‘yathā hī’’tiādi āraddhaṃ. Taṃ suviññeyyameva.
ဣဒန္တိ နဂရောပမံ။ တံ သလ္လက္ခိတန္တိ ကိံသုကောပမဒီပိတံ အတ္ထဇာတံ သစေ သလ္လက္ခိတံ။ အသ္သ ဘိက္ခုနော။ ဓမ္မဒေသနတ္ထန္တိ ယထာသလ္လက္ခိတသ္သ အတ္ထသ္သ ဝသေန လဒ္ဓဝိသေသသ္သ ဥပဗ္ရူဟနာယ။ တသ္သေဝတ္ထသ္သာတိ တသ္သ ဒသ္သနဝိသုဒ္ဓိသင္ခာတသ္သ အတ္ထသ္သ။ စောရာသင္ကာ န ဟောန္တိ မဇ္ဈိမဒေသရဇ္ဇသ္သ ပသန္နဘာဝတော။ တိပုရိသုဗ္ဗေဓာနီတိ ဥဗ္ဗေဓေန တိပုရိသပ္ပမာဏာနိ နာနာဘိတ္တိဝိစိတ္တာနိ ထမ္ဘာနံ ဥပရိ ဝိဝိဓမာလာကမ္မာဒိဝိစိတ္တဓနုရာကာရလက္ခိတာနိ မနောရမာနိ။ တေနာဟ ‘‘နဂရသ္သ အလင္ကာရတ္ထ’’န္တိ။ နဂရဒ္ဝာရသ္သ ထိရဘာဝာပာဒနဝသေန ဌပေတဗ္ဗတ္တာ ဝုတ္တံ ‘‘စောရနိဝာရဏတ္ထာနိပိ ဟောန္တိယေဝာ’’တိ။ ပိဋ္ဌသင္ဃာတသ္သာတိ ဒ္ဝာရဗာဟသ္သ။ ‘‘ဣမေ အာဝာသိကာ, ဣမေ အာဂန္တုကာ, တတ္ထာပိ စ ဣမေဟိ နဂရသ္သ နဂရသာမိကသ္သ စ အတ္ထော။ ဣမေသံ ဝသေန အနတ္ထော သိယာ’’တိ ဇာနနဉာဏသင္ခာတေန ပဏ္ဍိစ္စေန သမန္နာဂတော။ အညာတနိဝာရဏေ ပဋုဘာဝသင္ခာတေန ဝေယ္ယတ္တိယေန သမန္နာဂတော။ ဌာနုပ္ပတ္တိကပညာသင္ခာတာယာတိ တသ္မိံ တသ္မိံ အတ္ထကိစ္စေ တင္ခဏုပ္ပဇ္ဇနကပဋိဘာနသင္ခာတာယ။
Idanti nagaropamaṃ. Taṃ sallakkhitanti kiṃsukopamadīpitaṃ atthajātaṃ sace sallakkhitaṃ. Assa bhikkhuno. Dhammadesanatthanti yathāsallakkhitassa atthassa vasena laddhavisesassa upabrūhanāya. Tassevatthassāti tassa dassanavisuddhisaṅkhātassa atthassa. Corāsaṅkā na honti majjhimadesarajjassa pasannabhāvato. Tipurisubbedhānīti ubbedhena tipurisappamāṇāni nānābhittivicittāni thambhānaṃ upari vividhamālākammādivicittadhanurākāralakkhitāni manoramāni. Tenāha ‘‘nagarassa alaṅkārattha’’nti. Nagaradvārassa thirabhāvāpādanavasena ṭhapetabbattā vuttaṃ ‘‘coranivāraṇatthānipi hontiyevā’’ti. Piṭṭhasaṅghātassāti dvārabāhassa. ‘‘Ime āvāsikā, ime āgantukā, tatthāpi ca imehi nagarassa nagarasāmikassa ca attho. Imesaṃ vasena anattho siyā’’ti jānanañāṇasaṅkhātena paṇḍiccena samannāgato. Aññātanivāraṇe paṭubhāvasaṅkhātena veyyattiyena samannāgato. Ṭhānuppattikapaññāsaṅkhātāyāti tasmiṃ tasmiṃ atthakicce taṅkhaṇuppajjanakapaṭibhānasaṅkhātāya.
ရညာ အာယုတ္တော နိယောဇိတော ရာဇာယုတ္တော, တတ္ထ တတ္ထ ရညော ကာတဗ္ဗကိစ္စေ ဌပိတပုရိသော။ ကတိပာဟေယေဝာတိ ကတိပယဒိဝသေယေဝ အကိစ္စကရဏေန တသ္သ ဌာနံ ဝိဗ္ဘမော ဇာတောတိ ကတ္ဝာ ဝုတ္တံ – ‘‘သဗ္ဗာနိ ဝိနိစ္ဆယဋ္ဌာနာဒီနိ ဟာရေတ္ဝာ’’တိ။
Raññā āyutto niyojito rājāyutto, tattha tattha rañño kātabbakicce ṭhapitapuriso. Katipāheyevāti katipayadivaseyeva akiccakaraṇena tassa ṭhānaṃ vibbhamo jātoti katvā vuttaṃ – ‘‘sabbāni vinicchayaṭṭhānādīni hāretvā’’ti.
သီသမသ္သ ဆိန္ဒာဟီတိ သီသဘူတံ ဥတ္တမင္ဂဋ္ဌာနိယံ တတ္ထ တသ္သ ရာဇကိစ္စံ ဆိန္ဒာတိ အတ္ထော။ အညထာ တသ္သ ပာကတိကေ အတ္ထေ ဂယ္ဟမာနေ ပာဏာတိပာတော အာဏတ္တော နာမ သိယာ။ န ဟိ စက္ကဝတ္တိရာဇာ တာဒိသံ အာဏာပေတိ, အညေသမ္ပိ တတော နိဝာရကတ္တာ။ အထ ဝာ ဆိန္ဒာဟီတိ မမ အာဏာယ အသ္သ သီသံ ဆိန္ဒန္တော ဝိယ အတ္တာနံ ဒသ္သေဟိ, ဧဝံ သော တတ္ထောဝာဒပဋိကရတ္တပတ္တော ဩဒမေယ္ယာတိ, တထာ စေဝ ဥပရိ ပဋိပတ္တိ အာဂတာ။ တတ္ထာတိ ဧတသ္မိံ ပစ္စန္တိမနဂရေ။
Sīsamassa chindāhīti sīsabhūtaṃ uttamaṅgaṭṭhāniyaṃ tattha tassa rājakiccaṃ chindāti attho. Aññathā tassa pākatike atthe gayhamāne pāṇātipāto āṇatto nāma siyā. Na hi cakkavattirājā tādisaṃ āṇāpeti, aññesampi tato nivārakattā. Atha vā chindāhīti mama āṇāya assa sīsaṃ chindanto viya attānaṃ dassehi, evaṃ so tatthovādapaṭikarattapatto odameyyāti, tathā ceva upari paṭipatti āgatā. Tatthāti etasmiṃ paccantimanagare.
ဥပ္ပန္နေနာတိ သမထကမ္မဋ္ဌာနေ ဥပ္ပန္နေန။
Uppannenāti samathakammaṭṭhāne uppannena.
တသ္သေဝာတိ သက္ကာယသင္ခာတသ္သ နဂရသ္သ ‘‘ဒ္ဝာရာနီ’’တိ ဝုတ္တာနီတိ အာနေတ္ဝာ သမ္ဗန္ဓော။ ‘‘သီဃံ ဒူတယုဂ’’န္တိ ဝုတ္တာတိ ယောဇနာ။ ဟဒယဝတ္ထုရူပသ္သ မဇ္ဈေ သိင္ဃာဋကဘာဝေန ဂဟိတတ္တာ ‘‘ဟဒယဝတ္ထုသ္သ နိသ္သယဘူတာနံ မဟာဘူတာန’’န္တိ ဝုတ္တံ။ ယဒိ ဧဝံ ဝတ္ထုရူပမေဝ ဂဟေတဗ္ဗံ, တဒေဝေတ္ထ အဂ္ဂဟေတ္ဝာ ကသ္မာ မဟာဘူတဂ္ဂဟဏန္တိ အာဟ ‘‘ဝတ္ထုရူပသ္သ ဟီ’’တိအာဒိ။ ယာဒိသောတိ သမ္မာဒိဋ္ဌိအာဒီနံ ဝသေန ယာဒိသော ဧဝ ပုဗ္ဗေ အာဂတဝိပသ္သနာမဂ္ဂော။ ‘‘အယမ္ပိ အဋ္ဌင္ဂသမန္နာဂတတ္တာ တာဒိသော ဧဝာ’’တိ ဝတ္ဝာ အရိယမဂ္ဂော ‘‘ယထာဂတမဂ္ဂော’’တိ ဝုတ္တော။ ဣဒံ တာဝေတ္ထာတိ ဧတ္ထ ဧတသ္မိံ သုတ္တေ ဓမ္မဒေသနတ္ထံ အာဘတာယ ယထာဝုတ္တဥပမာယ ဣဒံ သံသန္ဒနံ။
Tassevāti sakkāyasaṅkhātassa nagarassa ‘‘dvārānī’’ti vuttānīti ānetvā sambandho. ‘‘Sīghaṃ dūtayuga’’nti vuttāti yojanā. Hadayavatthurūpassa majjhe siṅghāṭakabhāvena gahitattā ‘‘hadayavatthussa nissayabhūtānaṃ mahābhūtāna’’nti vuttaṃ. Yadi evaṃ vatthurūpameva gahetabbaṃ, tadevettha aggahetvā kasmā mahābhūtaggahaṇanti āha ‘‘vatthurūpassa hī’’tiādi. Yādisoti sammādiṭṭhiādīnaṃ vasena yādiso eva pubbe āgatavipassanāmaggo. ‘‘Ayampi aṭṭhaṅgasamannāgatattā tādiso evā’’ti vatvā ariyamaggo ‘‘yathāgatamaggo’’ti vutto. Idaṃ tāvetthāti ettha etasmiṃ sutte dhammadesanatthaṃ ābhatāya yathāvuttaupamāya idaṃ saṃsandanaṃ.
ဣဒံ သံသန္ဒနန္တိ ဣဒာနိ ဝက္ခမာနံ ဥပမာယ သံသန္ဒနံ။ နဂရသာမိဥပမာ ပဉ္စက္ခန္ဓဝသေန ဒသ္သနဝိသုဒ္ဓိပတ္တံ ခီဏာသဝံ ဒသ္သေတုံ အာဘတာ။ သိင္ဃာဋကူပမာ စတုမဟာဘူတဝသေန ဒသ္သနဝိသုဒ္ဓိပတ္တံ ခီဏာသဝံ ဒသ္သေတုံ အာဘတာတိ ယောဇနာ။ ‘‘စတုသစ္စမေဝ ကထိတ’’န္တိ ဝတ္ဝာ တာနိ သစ္စာနိ နိဒ္ဓာရေတ္ဝာ ဒသ္သေတုံ ‘‘သကလေနပိ ဟီ’’တိအာဒိ ဝုတ္တံ။ ဣဓ နဂရသမ္ဘာရော ဆဒ္ဝာရာဒယော။ တေန ဟိ ဆဖသ္သာယတနာဒယော ဥပမိတာ။ တေ ပန ဒုက္ခသစ္စပရိယာပန္နာတိ ဝုတ္တံ ‘‘နဂရသမ္ဘာရေန ဒုက္ခသစ္စမေဝ ကထိတ’’န္တိ။
Idaṃ saṃsandananti idāni vakkhamānaṃ upamāya saṃsandanaṃ. Nagarasāmiupamā pañcakkhandhavasena dassanavisuddhipattaṃ khīṇāsavaṃ dassetuṃ ābhatā. Siṅghāṭakūpamā catumahābhūtavasena dassanavisuddhipattaṃ khīṇāsavaṃ dassetuṃ ābhatāti yojanā. ‘‘Catusaccameva kathita’’nti vatvā tāni saccāni niddhāretvā dassetuṃ ‘‘sakalenapi hī’’tiādi vuttaṃ. Idha nagarasambhāro chadvārādayo. Tena hi chaphassāyatanādayo upamitā. Te pana dukkhasaccapariyāpannāti vuttaṃ ‘‘nagarasambhārena dukkhasaccameva kathita’’nti.
ကိံသုကောပမသုတ္တဝဏ္ဏနာ နိဋ္ဌိတာ။
Kiṃsukopamasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ကိံသုကောပမသုတ္တံ • 8. Kiṃsukopamasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. ကိံသုကောပမသုတ္တဝဏ္ဏနာ • 8. Kiṃsukopamasuttavaṇṇanā
