| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. කින්‌නුසීහසුත්‌තං
2. Kinnusīhasuttaṃ
148. එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන භගවා මහතියා පරිසාය පරිවුතො ධම්‌මං දෙසෙති.
148. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavā mahatiyā parisāya parivuto dhammaṃ deseti.
අථ ඛො මාරස්‌ස පාපිමතො එතදහොසි – ‘‘අයං ඛො සමණො ගොතමො මහතියා පරිසාය පරිවුතො ධම්‌මං දෙසෙති. යංනූනාහං යෙන සමණො ගොතමො තෙනුපසඞ්‌කමෙය්‍යං විචක්‌ඛුකම්‌මායා’’ති. අථ ඛො මාරො පාපිමා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං ගාථාය අජ්‌ඣභාසි –
Atha kho mārassa pāpimato etadahosi – ‘‘ayaṃ kho samaṇo gotamo mahatiyā parisāya parivuto dhammaṃ deseti. Yaṃnūnāhaṃ yena samaṇo gotamo tenupasaṅkameyyaṃ vicakkhukammāyā’’ti. Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘කින්‌නු සීහොව නදසි, පරිසායං විසාරදො;
‘‘Kinnu sīhova nadasi, parisāyaṃ visārado;
පටිමල්‌ලො හි තෙ අත්‌ථි, විජිතාවී නු මඤ්‌ඤසී’’ති.
Paṭimallo hi te atthi, vijitāvī nu maññasī’’ti.
‘‘නදන්‌ති වෙ මහාවීරා, පරිසාසු විසාරදා;
‘‘Nadanti ve mahāvīrā, parisāsu visāradā;
තථාගතා බලප්‌පත්‌තා, තිණ්‌ණා ලොකෙ විසත්‌තික’’න්‌ති.
Tathāgatā balappattā, tiṇṇā loke visattika’’nti.
අථ ඛො මාරො පාපිමා ‘‘ජානාති මං භගවා, ජානාති මං සුගතො’’ති දුක්‌ඛී දුම්‌මනො තත්‌ථෙවන්‌තරධායීති.
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. කින්‌නුසීහසුත්‌තවණ්‌ණනා • 2. Kinnusīhasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. කිංනුසීහසුත්‌තවණ්‌ණනා • 2. Kiṃnusīhasuttavaṇṇanā
