| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
3. කිසාගොතමීසුත්‌තවණ්‌ණනා
3. Kisāgotamīsuttavaṇṇanā
164. ‘‘කිසාගොතමී’’ති එත්‌ථ කා පනායං කිසාගොතමී, කිස්‌ස අයං භික්‌ඛුනී හුත්‌වා සමණධම්‌මං මත්‌ථකං පාපෙසීති තමත්‌ථං විභාවෙතුං ‘‘පුබ්‌බෙ කිරා’’තිආදිමාරද්‌ධං. අඞ්‌ගාරාවාති අද්‌දාරිට්‌ඨකවණ්‌ණඅඞ්‌ගාරා එව ජාතා. දාරුසාකන්‌ති අද්‌ධමාසකෙන දාරුං සාකඤ්‌ච ආහරිස්‌සාමීති අන්‌තරාපණෙ අන්‌තරවීථිං ගතා.
164. ‘‘Kisāgotamī’’ti ettha kā panāyaṃ kisāgotamī, kissa ayaṃ bhikkhunī hutvā samaṇadhammaṃ matthakaṃ pāpesīti tamatthaṃ vibhāvetuṃ ‘‘pubbe kirā’’tiādimāraddhaṃ. Aṅgārāvāti addāriṭṭhakavaṇṇaaṅgārā eva jātā. Dārusākanti addhamāsakena dāruṃ sākañca āharissāmīti antarāpaṇe antaravīthiṃ gatā.
සිද්‌ධත්‌ථකන්‌ති සාසපං. සාලායන්‌ති අනාථසාලායං. ඛුරග්‌ගෙයෙවාති ඛුරසිඛෙ එව, කෙසොරොහනක්‌ඛණෙ එවාති අත්‌ථො.
Siddhatthakanti sāsapaṃ. Sālāyanti anāthasālāyaṃ. Khuraggeyevāti khurasikhe eva, kesorohanakkhaṇe evāti attho.
එකමාසීති එත්‌ථ ම-කාරො පදසන්‌ධිකරො. සංහිතාවසෙන ච පුරිමපදෙ වා රස්‌සත්‌තං. පරපදෙ වා දීඝත්‌තන්‌ති ආහ ‘‘එකා ආසී’’ති. භාවනපුංසකමෙතං ‘‘එකමන්‌තං නිසීදී’’තිආදීසු විය. පුත්‌තමරණං අන්‌තං අතීතං ඉදානි පුත්‌තමරණස්‌ස අභාවතො. තෙනෙවාහ ‘‘පුත්‌තමරණං නාම නත්‌ථී’’ති. පුරිසං ගවෙසිතුන්‌ති යථා මය්‌හං පුරිසගවෙසනා නාම සබ්‌බසො නත්‌ථි, තථා එව පුත්‌තගවෙසනාපි නත්‌ථි, තස්‌මා මෙ පුත්‌තමරණං එතදන්‌තං, සබ්‌බෙසු ඛන්‌ධාදීසු භවාදීසු ච තණ්‌හානන්‌දියා අභාවකථනෙන සබ්‌බසත්‌තෙසු තණ්‌හා සබ්‌බසො විසොසිතා, තස්‌සායෙව කාරකඅවිජ්‌ජාක්‌ඛන්‌ධො පදාලිතොති අත්‌තනො නික්‌කිලෙසතං පවෙදෙන්‌තී ථෙරී සීහනාදං නදීති.
Ekamāsīti ettha ma-kāro padasandhikaro. Saṃhitāvasena ca purimapade vā rassattaṃ. Parapade vā dīghattanti āha ‘‘ekā āsī’’ti. Bhāvanapuṃsakametaṃ ‘‘ekamantaṃ nisīdī’’tiādīsu viya. Puttamaraṇaṃ antaṃ atītaṃ idāni puttamaraṇassa abhāvato. Tenevāha ‘‘puttamaraṇaṃ nāma natthī’’ti. Purisaṃ gavesitunti yathā mayhaṃ purisagavesanā nāma sabbaso natthi, tathā eva puttagavesanāpi natthi, tasmā me puttamaraṇaṃ etadantaṃ, sabbesu khandhādīsu bhavādīsu ca taṇhānandiyā abhāvakathanena sabbasattesu taṇhā sabbaso visositā, tassāyeva kārakaavijjākkhandho padālitoti attano nikkilesataṃ pavedentī therī sīhanādaṃ nadīti.
කිසාගොතමීසුත්‌තවණ්‌ණනා නිට්‌ඨිතා.
Kisāgotamīsuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 3. කිසාගොතමීසුත්‌තං • 3. Kisāgotamīsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. කිසාගොතමීසුත්‌තවණ්‌ණනා • 3. Kisāgotamīsuttavaṇṇanā
