| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༣. ཀིསཱགོཏམཱིསུཏྟཝཎྞནཱ
3. Kisāgotamīsuttavaṇṇanā
༡༦༤. ཏཏིཡེ ཀིསཱགོཏམཱིཏི ཨཔྤམཾསལོཧིཏཏཱཡ ཀིསཱ, གོཏམཱིཏི པནསྶཱ ནཱམཾ། པུབྦེ ཀིར སཱཝཏྠིཡཾ ཨེཀསྨིཾ ཀུལེ ཨསཱིཏིཀོཊིདྷནཾ སབྦཾ ཨངྒཱརཱཝ ཛཱཏཾ། ཀུཊུམྦིཀོ ཨངྒཱརཛཱཏཱནི ཨནཱིཧརིཏྭཱ – ‘‘ཨཝསྶཾ ཀོཙི པུཉྙཝཱ བྷཝིསྶཏི, ཏསྶ པུཉྙེན པུན པཱཀཏིཀཾ བྷཝིསྶཏཱི’’ཏི སུཝཎྞཧིརཉྙསྶ ཙཱཊིཡོ པཱུརེཏྭཱ ཨཱཔཎེ ཋཔེཏྭཱ སམཱིཔེ ནིསཱིདི། ཨཐེཀཱ དུགྒཏཀུལསྶ དྷཱིཏཱ – ‘‘ཨཌྜྷམཱསཀཾ གཧེཏྭཱ དཱརུསཱཀཾ ཨཱཧརིསྶཱམཱི’’ཏི ཝཱིཐིཾ གཏཱ ཏཾ དིསྭཱ ཀུཊུམྦིཀཾ ཨཱཧ – ‘‘ཨཱཔཎེ ཏཱཝ དྷནཾ ཨེཏྟཀཾ, གེཧེ ཀིཏྟཀཾ བྷཝིསྶཏཱི’’ཏི། ཀིཾ དིསྭཱ ཨམྨ ཨེཝཾ ཀཐེསཱིཏི? ཨིམཾ ཧིརཉྙསུཝཎྞནྟི། སོ ‘‘པུཉྙཝཏཱི ཨེསཱ བྷཝིསྶཏཱི’’ཏི ཏསྶཱ ཝསནཊྛཱནཾ པུཙྪིཏྭཱ ཨཱཔཎེ བྷཎྜཾ པཊིསཱམེཏྭཱ ཏསྶཱ མཱཏཱཔིཏརོ ཨུཔསངྐམིཏྭཱ ཨེཝམཱཧ – ‘‘ཨམྷཱཀཾ གེཧེ ཝཡཔྤཏྟོ དཱརཀོ ཨཏྠི, ཏསྶེཏཾ དཱརིཀཾ དེཐཱ’’ཏི། ཀིཾ སཱམི དུགྒཏེཧི སདྡྷིཾ ཀེལི༹ཾ ཀརོསཱིཏི? མིཏྟསནྠཝོ ནཱམ དུགྒཏེཧིཔི སདྡྷིཾ ཧོཏི, དེཐ ནཾ, ཀུཊུམྦསཱམིནཱི བྷཝིསྶཏཱིཏི ནཾ གཧེཏྭཱ གྷརཾ ཨཱནེསི། སཱ སཾཝཱསམནྭཱཡ པུཏྟཾ ཝིཛཱཏཱ། པུཏྟོ པདསཱ ཨཱཧིཎྜནཀཱལེ ཀཱལམཀཱསི། སཱ དུགྒཏཀུལེ ཨུཔྤཛྫིཏྭཱ མཧཱཀུལཾ གནྟྭཱཔི ‘‘པུཏྟཝིནཱསཾ པཏྟཱམྷཱི’’ཏི ཨུཔྤནྣབལཝསོཀཱ པུཏྟསྶ སརཱིརཀིཙྩཾ ཝཱརེཏྭཱ ཏཾ མཏཀལེ༹ཝརཾ ཨཱདཱཡ ནགརེ ཝིཔྤལཔནྟཱི ཙརཏི།
164. Tatiye kisāgotamīti appamaṃsalohitatāya kisā, gotamīti panassā nāmaṃ. Pubbe kira sāvatthiyaṃ ekasmiṃ kule asītikoṭidhanaṃ sabbaṃ aṅgārāva jātaṃ. Kuṭumbiko aṅgārajātāni anīharitvā – ‘‘avassaṃ koci puññavā bhavissati, tassa puññena puna pākatikaṃ bhavissatī’’ti suvaṇṇahiraññassa cāṭiyo pūretvā āpaṇe ṭhapetvā samīpe nisīdi. Athekā duggatakulassa dhītā – ‘‘aḍḍhamāsakaṃ gahetvā dārusākaṃ āharissāmī’’ti vīthiṃ gatā taṃ disvā kuṭumbikaṃ āha – ‘‘āpaṇe tāva dhanaṃ ettakaṃ, gehe kittakaṃ bhavissatī’’ti. Kiṃ disvā amma evaṃ kathesīti? Imaṃ hiraññasuvaṇṇanti. So ‘‘puññavatī esā bhavissatī’’ti tassā vasanaṭṭhānaṃ pucchitvā āpaṇe bhaṇḍaṃ paṭisāmetvā tassā mātāpitaro upasaṅkamitvā evamāha – ‘‘amhākaṃ gehe vayappatto dārako atthi, tassetaṃ dārikaṃ dethā’’ti. Kiṃ sāmi duggatehi saddhiṃ keḷiṃ karosīti? Mittasanthavo nāma duggatehipi saddhiṃ hoti, detha naṃ, kuṭumbasāminī bhavissatīti naṃ gahetvā gharaṃ ānesi. Sā saṃvāsamanvāya puttaṃ vijātā. Putto padasā āhiṇḍanakāle kālamakāsi. Sā duggatakule uppajjitvā mahākulaṃ gantvāpi ‘‘puttavināsaṃ pattāmhī’’ti uppannabalavasokā puttassa sarīrakiccaṃ vāretvā taṃ matakaḷevaraṃ ādāya nagare vippalapantī carati.
ཨེཀདིཝསཾ མཧཏིཡཱ བུདྡྷཝཱིཐིཡཱ དསབལསྶ སནྟིཀཾ གནྟྭཱ – ‘‘པུཏྟསྶ མེ ཨརོགབྷཱཝཏྠཱཡ བྷེསཛྫཾ དེཐ བྷགཝཱ’’ཏི ཨཱཧ། གཙྪ སཱཝཏྠིཾ ཨཱཧིཎྜིཏྭཱ ཡསྨིཾ གེཧེ མཏཔུབྦོ ནཏྠི, ཏཏོ སིདྡྷཏྠཀཾ ཨཱཧར, པུཏྟསྶ ཏེ བྷེསཛྫཾ བྷཝིསྶཏཱིཏི། སཱ ནགརཾ པཝིསིཏྭཱ དྷུརགེཧཏོ པཊྛཱཡ བྷགཝཏཱ ཝུཏྟནཡེན གནྟྭཱ སིདྡྷཏྠཀཾ ཡཱཙནྟཱི གྷརེ གྷརེ, ‘‘ཀུཏོ ཏྭཾ ཨེཝརཱུཔཾ གྷརཾ པསྶིསྶསཱི’’ཏི ཝུཏྟཱ ཀཏིཔཡཱནི གེཧཱནི ཨཱཧིཎྜིཏྭཱ – ‘‘སབྦེསམྤི ཀིརཱཡཾ དྷམྨཏཱ, ན མཡ྄ཧཾ པུཏྟསྶེཝཱ’’ཏི སཱལཱཡཾ ཚཝཾ ཚཌྜེཏྭཱ པབྦཛྫཾ ཡཱཙི། སཏྠཱ ‘‘ཨིམཾ པབྦཱཛེཏཱུ’’ཏི བྷིཀྑུནིཨུཔསྶཡཾ པེསེསི། སཱ ཁུརགྒེཡེཝ ཨརཧཏྟཾ པཱཔུཎི། ཨིམཾ ཐེརིཾ སནྡྷཱཡ ‘‘ཨཐ ཁོ ཀིསཱགོཏམཱི’’ཏི ཝུཏྟཾ།
Ekadivasaṃ mahatiyā buddhavīthiyā dasabalassa santikaṃ gantvā – ‘‘puttassa me arogabhāvatthāya bhesajjaṃ detha bhagavā’’ti āha. Gaccha sāvatthiṃ āhiṇḍitvā yasmiṃ gehe matapubbo natthi, tato siddhatthakaṃ āhara, puttassa te bhesajjaṃ bhavissatīti. Sā nagaraṃ pavisitvā dhuragehato paṭṭhāya bhagavatā vuttanayena gantvā siddhatthakaṃ yācantī ghare ghare, ‘‘kuto tvaṃ evarūpaṃ gharaṃ passissasī’’ti vuttā katipayāni gehāni āhiṇḍitvā – ‘‘sabbesampi kirāyaṃ dhammatā, na mayhaṃ puttassevā’’ti sālāyaṃ chavaṃ chaḍḍetvā pabbajjaṃ yāci. Satthā ‘‘imaṃ pabbājetū’’ti bhikkhuniupassayaṃ pesesi. Sā khuraggeyeva arahattaṃ pāpuṇi. Imaṃ theriṃ sandhāya ‘‘atha kho kisāgotamī’’ti vuttaṃ.
ཨེཀམཱསཱིཏི ཨེཀཱ ཨཱསི། རུདམྨུཁཱིཏི རུདམཱནམུཁཱི ཝིཡ། ཨཙྩནྟཾ མཏཔུཏྟཱམྷཱིཏི ཨེཏྠ ཨནྟཾ ཨཏཱིཏཾ ཨཙྩནྟཾ, བྷཱཝནཔུཾསཀམེཏཾ། ཨིདཾ ཝུཏྟཾ ཧོཏི – ཡཐཱ པུཏྟམརཎཾ ཨནྟཾ ཨཏཱིཏཾ ཧོཏི, ཨེཝཾ མཏཔུཏྟཱ ཨཧཾ, ཨིདཱནི མམ པུན པུཏྟམརཎཾ ནཱམ ནཏྠི། པུརིསཱ ཨེཏདནྟིཀཱཏི པུརིསཱཔི མེ ཨེཏདནྟིཀཱཝ ། ཡོ མེ པུཏྟམརཎསྶ ཨནྟོ, པུརིསཱནམྤི མེ ཨེསེཝནྟོ, ཨབྷབྦཱ ཨཧཾ ཨིདཱནི པུརིསཾ གཝེསིཏུནྟི། སབྦཏྠ ཝིཧཏཱ ནནྡཱིཏི སབྦེསུ ཁནྡྷཱཡཏནདྷཱཏུབྷཝཡོནིགཏིཋིཏིནིཝཱསེསུ མམ ཏཎྷཱནནྡཱི ཝིཧཏཱ། ཏམོཀྑནྡྷོཏི ཨཝིཛྫཱཀྑནྡྷོ། པདཱལིཏོཏི ཉཱཎེན བྷིནྣོ། ཏཏིཡཾ།
Ekamāsīti ekā āsi. Rudammukhīti rudamānamukhī viya. Accantaṃ mataputtāmhīti ettha antaṃ atītaṃ accantaṃ, bhāvanapuṃsakametaṃ. Idaṃ vuttaṃ hoti – yathā puttamaraṇaṃ antaṃ atītaṃ hoti, evaṃ mataputtā ahaṃ, idāni mama puna puttamaraṇaṃ nāma natthi. Purisā etadantikāti purisāpi me etadantikāva . Yo me puttamaraṇassa anto, purisānampi me esevanto, abhabbā ahaṃ idāni purisaṃ gavesitunti. Sabbattha vihatā nandīti sabbesu khandhāyatanadhātubhavayonigatiṭhitinivāsesu mama taṇhānandī vihatā. Tamokkhandhoti avijjākkhandho. Padālitoti ñāṇena bhinno. Tatiyaṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༣. ཀིསཱགོཏམཱིསུཏྟཾ • 3. Kisāgotamīsuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༣. ཀིསཱགོཏམཱིསུཏྟཝཎྞནཱ • 3. Kisāgotamīsuttavaṇṇanā
