Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya

    ༡༠. ཀཱིཊཱགིརིསུཏྟཾ

    10. Kīṭāgirisuttaṃ

    ༡༧༤. ཨེཝཾ མེ སུཏཾ – ཨེཀཾ སམཡཾ བྷགཝཱ ཀཱསཱིསུ ཙཱརིཀཾ ཙརཏི མཧཏཱ བྷིཀྑུསངྒྷེན སདྡྷིཾ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘ཨཧཾ ཁོ, བྷིཀྑཝེ, ཨཉྙཏྲེཝ རཏྟིབྷོཛནཱ 1 བྷུཉྫཱམི། ཨཉྙཏྲ ཁོ པནཱཧཾ, བྷིཀྑཝེ, རཏྟིབྷོཛནཱ བྷུཉྫམཱནོ ཨཔྤཱབཱདྷཏཉྩ སཉྫཱནཱམི ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩ། ཨེཐ, ཏུམྷེཔི, བྷིཀྑཝེ, ཨཉྙཏྲེཝ རཏྟིབྷོཛནཱ བྷུཉྫཐ། ཨཉྙཏྲ ཁོ པན, བྷིཀྑཝེ, ཏུམྷེཔི རཏྟིབྷོཛནཱ བྷུཉྫམཱནཱ ཨཔྤཱབཱདྷཏཉྩ སཉྫཱནིསྶཐ ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩཱ’’ཏི། ‘‘ཨེཝཾ, བྷནྟེ’’ཏི ཁོ ཏེ བྷིཀྑཱུ བྷགཝཏོ པཙྩསྶོསུཾ། ཨཐ ཁོ བྷགཝཱ ཀཱསཱིསུ ཨནུཔུབྦེན ཙཱརིཀཾ ཙརམཱནོ ཡེན ཀཱིཊཱགིརི ནཱམ ཀཱསཱིནཾ ནིགམོ ཏདཝསརི། ཏཏྲ སུདཾ བྷགཝཱ ཀཱིཊཱགིརིསྨིཾ ཝིཧརཏི ཀཱསཱིནཾ ནིགམེ།

    174. Evaṃ me sutaṃ – ekaṃ samayaṃ bhagavā kāsīsu cārikaṃ carati mahatā bhikkhusaṅghena saddhiṃ. Tatra kho bhagavā bhikkhū āmantesi – ‘‘ahaṃ kho, bhikkhave, aññatreva rattibhojanā 2 bhuñjāmi. Aññatra kho panāhaṃ, bhikkhave, rattibhojanā bhuñjamāno appābādhatañca sañjānāmi appātaṅkatañca lahuṭṭhānañca balañca phāsuvihārañca. Etha, tumhepi, bhikkhave, aññatreva rattibhojanā bhuñjatha. Aññatra kho pana, bhikkhave, tumhepi rattibhojanā bhuñjamānā appābādhatañca sañjānissatha appātaṅkatañca lahuṭṭhānañca balañca phāsuvihārañcā’’ti. ‘‘Evaṃ, bhante’’ti kho te bhikkhū bhagavato paccassosuṃ. Atha kho bhagavā kāsīsu anupubbena cārikaṃ caramāno yena kīṭāgiri nāma kāsīnaṃ nigamo tadavasari. Tatra sudaṃ bhagavā kīṭāgirismiṃ viharati kāsīnaṃ nigame.

    ༡༧༥. ཏེན ཁོ པན སམཡེན ཨསྶཛིཔུནབྦསུཀཱ ནཱམ བྷིཀྑཱུ ཀཱིཊཱགིརིསྨིཾ ཨཱཝཱསིཀཱ ཧོནྟི། ཨཐ ཁོ སམྦཧུལཱ བྷིཀྑཱུ ཡེན ཨསྶཛིཔུནབྦསུཀཱ བྷིཀྑཱུ ཏེནུཔསངྐམིཾསུ; ཨུཔསངྐམིཏྭཱ ཨསྶཛིཔུནབྦསུཀེ བྷིཀྑཱུ ཨེཏདཝོཙུཾ – ‘‘བྷགཝཱ ཁོ, ཨཱཝུསོ, ཨཉྙཏྲེཝ རཏྟིབྷོཛནཱ བྷུཉྫཏི བྷིཀྑུསངྒྷོ ཙ། ཨཉྙཏྲ ཁོ པནཱཝུསོ, རཏྟིབྷོཛནཱ བྷུཉྫམཱནཱ ཨཔྤཱབཱདྷཏཉྩ སཉྫཱནནྟི ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩ། ཨེཐ, ཏུམྷེཔི, ཨཱཝུསོ, ཨཉྙཏྲེཝ རཏྟིབྷོཛནཱ བྷུཉྫཐ། ཨཉྙཏྲ ཁོ པནཱཝུསོ, ཏུམྷེཔི རཏྟིབྷོཛནཱ བྷུཉྫམཱནཱ ཨཔྤཱབཱདྷཏཉྩ སཉྫཱནིསྶཐ ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩཱ’’ཏི ། ཨེཝཾ ཝུཏྟེ, ཨསྶཛིཔུནབྦསུཀཱ བྷིཀྑཱུ ཏེ བྷིཀྑཱུ ཨེཏདཝོཙུཾ – ‘‘མཡཾ ཁོ, ཨཱཝུསོ, སཱཡཉྩེཝ བྷུཉྫཱམ པཱཏོ ཙ དིཝཱ ཙ ཝིཀཱལེ། ཏེ མཡཾ སཱཡཉྩེཝ བྷུཉྫམཱནཱ པཱཏོ ཙ དིཝཱ ཙ ཝིཀཱལེ ཨཔྤཱབཱདྷཏཉྩ སཉྫཱནཱམ ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩ། ཏེ མཡཾ ཀིཾ སནྡིཊྛིཀཾ ཧིཏྭཱ ཀཱལིཀཾ ཨནུདྷཱཝིསྶཱམ? སཱཡཉྩེཝ མཡཾ བྷུཉྫིསྶཱམ པཱཏོ ཙ དིཝཱ ཙ ཝིཀཱལེ’’ཏི།

    175. Tena kho pana samayena assajipunabbasukā nāma bhikkhū kīṭāgirismiṃ āvāsikā honti. Atha kho sambahulā bhikkhū yena assajipunabbasukā bhikkhū tenupasaṅkamiṃsu; upasaṅkamitvā assajipunabbasuke bhikkhū etadavocuṃ – ‘‘bhagavā kho, āvuso, aññatreva rattibhojanā bhuñjati bhikkhusaṅgho ca. Aññatra kho panāvuso, rattibhojanā bhuñjamānā appābādhatañca sañjānanti appātaṅkatañca lahuṭṭhānañca balañca phāsuvihārañca. Etha, tumhepi, āvuso, aññatreva rattibhojanā bhuñjatha. Aññatra kho panāvuso, tumhepi rattibhojanā bhuñjamānā appābādhatañca sañjānissatha appātaṅkatañca lahuṭṭhānañca balañca phāsuvihārañcā’’ti . Evaṃ vutte, assajipunabbasukā bhikkhū te bhikkhū etadavocuṃ – ‘‘mayaṃ kho, āvuso, sāyañceva bhuñjāma pāto ca divā ca vikāle. Te mayaṃ sāyañceva bhuñjamānā pāto ca divā ca vikāle appābādhatañca sañjānāma appātaṅkatañca lahuṭṭhānañca balañca phāsuvihārañca. Te mayaṃ kiṃ sandiṭṭhikaṃ hitvā kālikaṃ anudhāvissāma? Sāyañceva mayaṃ bhuñjissāma pāto ca divā ca vikāle’’ti.

    ཡཏོ ཁོ ཏེ བྷིཀྑཱུ ནཱསཀྑིཾསུ ཨསྶཛིཔུནབྦསུཀེ བྷིཀྑཱུ སཉྙཱཔེཏུཾ, ཨཐ ཡེན བྷགཝཱ ཏེནུཔསངྐམིཾསུ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣཱ ཁོ ཏེ བྷིཀྑཱུ བྷགཝནྟཾ ཨེཏདཝོཙུཾ – ‘‘ཨིདྷ མཡཾ, བྷནྟེ, ཡེན ཨསྶཛིཔུནབྦསུཀཱ བྷིཀྑཱུ ཏེནུཔསངྐམིམྷ; ཨུཔསངྐམིཏྭཱ ཨསྶཛིཔུནབྦསུཀེ བྷིཀྑཱུ ཨེཏདཝོཙུམྷ – ‘བྷགཝཱ ཁོ, ཨཱཝུསོ, ཨཉྙཏྲེཝ རཏྟིབྷོཛནཱ བྷུཉྫཏི བྷིཀྑུསངྒྷོ ཙ; ཨཉྙཏྲ ཁོ པནཱཝུསོ, རཏྟིབྷོཛནཱ བྷུཉྫམཱནཱ ཨཔྤཱབཱདྷཏཉྩ སཉྫཱནནྟི ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩ། ཨེཐ, ཏུམྷེཔི, ཨཱཝུསོ , ཨཉྙཏྲེཝ རཏྟིབྷོཛནཱ བྷུཉྫཐ། ཨཉྙཏྲ ཁོ པནཱཝུསོ, ཏུམྷེཔི རཏྟིབྷོཛནཱ བྷུཉྫམཱནཱ ཨཔྤཱབཱདྷཏཉྩ སཉྫཱནིསྶཐ ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩཱ’ཏི། ཨེཝཾ ཝུཏྟེ, བྷནྟེ, ཨསྶཛིཔུནབྦསུཀཱ བྷིཀྑཱུ ཨམྷེ ཨེཏདཝོཙུཾ – ‘མཡཾ ཁོ, ཨཱཝུསོ, སཱཡཉྩེཝ བྷུཉྫཱམ པཱཏོ ཙ དིཝཱ ཙ ཝིཀཱལེ། ཏེ མཡཾ སཱཡཉྩེཝ བྷུཉྫམཱནཱ པཱཏོ ཙ དིཝཱ ཙ ཝིཀཱལེ ཨཔྤཱབཱདྷཏཉྩ སཉྫཱནཱམ ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩ། ཏེ མཡཾ ཀིཾ སནྡིཊྛིཀཾ ཧིཏྭཱ ཀཱལིཀཾ ཨནུདྷཱཝིསྶཱམ? སཱཡཉྩེཝ མཡཾ བྷུཉྫིསྶཱམ པཱཏོ ཙ དིཝཱ ཙ ཝིཀཱལེ’ཏི། ཡཏོ ཁོ མཡཾ, བྷནྟེ, ནཱསཀྑིམྷ ཨསྶཛིཔུནབྦསུཀེ བྷིཀྑཱུ སཉྙཱཔེཏུཾ, ཨཐ མཡཾ ཨེཏམཏྠཾ བྷགཝཏོ ཨཱརོཙེམཱ’’ཏི།

    Yato kho te bhikkhū nāsakkhiṃsu assajipunabbasuke bhikkhū saññāpetuṃ, atha yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha mayaṃ, bhante, yena assajipunabbasukā bhikkhū tenupasaṅkamimha; upasaṅkamitvā assajipunabbasuke bhikkhū etadavocumha – ‘bhagavā kho, āvuso, aññatreva rattibhojanā bhuñjati bhikkhusaṅgho ca; aññatra kho panāvuso, rattibhojanā bhuñjamānā appābādhatañca sañjānanti appātaṅkatañca lahuṭṭhānañca balañca phāsuvihārañca. Etha, tumhepi, āvuso , aññatreva rattibhojanā bhuñjatha. Aññatra kho panāvuso, tumhepi rattibhojanā bhuñjamānā appābādhatañca sañjānissatha appātaṅkatañca lahuṭṭhānañca balañca phāsuvihārañcā’ti. Evaṃ vutte, bhante, assajipunabbasukā bhikkhū amhe etadavocuṃ – ‘mayaṃ kho, āvuso, sāyañceva bhuñjāma pāto ca divā ca vikāle. Te mayaṃ sāyañceva bhuñjamānā pāto ca divā ca vikāle appābādhatañca sañjānāma appātaṅkatañca lahuṭṭhānañca balañca phāsuvihārañca. Te mayaṃ kiṃ sandiṭṭhikaṃ hitvā kālikaṃ anudhāvissāma? Sāyañceva mayaṃ bhuñjissāma pāto ca divā ca vikāle’ti. Yato kho mayaṃ, bhante, nāsakkhimha assajipunabbasuke bhikkhū saññāpetuṃ, atha mayaṃ etamatthaṃ bhagavato ārocemā’’ti.

    ༡༧༦. ཨཐ ཁོ བྷགཝཱ ཨཉྙཏརཾ བྷིཀྑུཾ ཨཱམནྟེསི – ‘‘ཨེཧི ཏྭཾ, བྷིཀྑུ, མམ ཝཙནེན ཨསྶཛིཔུནབྦསུཀེ བྷིཀྑཱུ ཨཱམནྟེཧི – ‘སཏྠཱ ཨཱཡསྨནྟེ ཨཱམནྟེཏཱི’’’ཏི། ‘‘ཨེཝཾ, བྷནྟེ’’ཏི ཁོ སོ བྷིཀྑུ བྷགཝཏོ པཊིསྶུཏྭཱ ཡེན ཨསྶཛིཔུནབྦསུཀཱ བྷིཀྑཱུ ཏེནུཔསངྐམི; ཨུཔསངྐམིཏྭཱ ཨསྶཛིཔུནབྦསུཀེ བྷིཀྑཱུ ཨེཏདཝོཙ – ‘‘སཏྠཱ ཨཱཡསྨནྟེ ཨཱམནྟེཏཱི’’ཏི། ‘‘ཨེཝམཱཝུསོ’’ཏི ཁོ ཨསྶཛིཔུནབྦསུཀཱ བྷིཀྑཱུ ཏསྶ བྷིཀྑུནོ པཊིསྶུཏྭཱ ཡེན བྷགཝཱ ཏེནུཔསངྐམིཾསུ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣེ ཁོ ཨསྶཛིཔུནབྦསུཀེ བྷིཀྑཱུ བྷགཝཱ ཨེཏདཝོཙ – ‘‘སཙྩཾ ཀིར, བྷིཀྑཝེ, སམྦཧུལཱ བྷིཀྑཱུ ཏུམྷེ ཨུཔསངྐམིཏྭཱ ཨེཏདཝོཙུཾ – ‘བྷགཝཱ ཁོ, ཨཱཝུསོ, ཨཉྙཏྲེཝ རཏྟིབྷོཛནཱ བྷུཉྫཏི བྷིཀྑུསངྒྷོ ཙ། ཨཉྙཏྲ ཁོ པནཱཝུསོ, རཏྟིབྷོཛནཱ བྷུཉྫམཱནཱ ཨཔྤཱབཱདྷཏཉྩ སཉྫཱནནྟི ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩ། ཨེཐ, ཏུམྷེཔི, ཨཱཝུསོ, ཨཉྙཏྲེཝ རཏྟིབྷོཛནཱ བྷུཉྫཐ། ཨཉྙཏྲ ཁོ པནཱཝུསོ, ཏུམྷེཔི རཏྟིབྷོཛནཱ བྷུཉྫམཱནཱ ཨཔྤཱབཱདྷཏཉྩ སཉྫཱནིསྶཐ ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩཱ’ཏི། ཨེཝཾ ཝུཏྟེ ཀིར 3, བྷིཀྑཝེ, ཏུམྷེ ཏེ བྷིཀྑཱུ ཨེཝཾ ཨཝཙུཏྠ – ‘མཡཾ ཁོ པནཱཝུསོ, སཱཡཉྩེཝ བྷུཉྫཱམ པཱཏོ ཙ དིཝཱ ཙ ཝིཀཱལེ། ཏེ མཡཾ སཱཡཉྩེཝ བྷུཉྫམཱནཱ པཱཏོ ཙ དིཝཱ ཙ ཝིཀཱལེ ཨཔྤཱབཱདྷཏཉྩ སཉྫཱནཱམ ཨཔྤཱཏངྐཏཉྩ ལཧུཊྛཱནཉྩ བལཉྩ ཕཱསུཝིཧཱརཉྩ། ཏེ མཡཾ ཀིཾ སནྡིཊྛིཀཾ ཧིཏྭཱ ཀཱལིཀཾ ཨནུདྷཱཝིསྶཱམ? སཱཡཉྩེཝ མཡཾ བྷུཉྫིསྶཱམ པཱཏོ ཙ དིཝཱ ཙ ཝིཀཱལེ’’’ཏི། ‘‘ཨེཝཾ, བྷནྟེ’’།

    176. Atha kho bhagavā aññataraṃ bhikkhuṃ āmantesi – ‘‘ehi tvaṃ, bhikkhu, mama vacanena assajipunabbasuke bhikkhū āmantehi – ‘satthā āyasmante āmantetī’’’ti. ‘‘Evaṃ, bhante’’ti kho so bhikkhu bhagavato paṭissutvā yena assajipunabbasukā bhikkhū tenupasaṅkami; upasaṅkamitvā assajipunabbasuke bhikkhū etadavoca – ‘‘satthā āyasmante āmantetī’’ti. ‘‘Evamāvuso’’ti kho assajipunabbasukā bhikkhū tassa bhikkhuno paṭissutvā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinne kho assajipunabbasuke bhikkhū bhagavā etadavoca – ‘‘saccaṃ kira, bhikkhave, sambahulā bhikkhū tumhe upasaṅkamitvā etadavocuṃ – ‘bhagavā kho, āvuso, aññatreva rattibhojanā bhuñjati bhikkhusaṅgho ca. Aññatra kho panāvuso, rattibhojanā bhuñjamānā appābādhatañca sañjānanti appātaṅkatañca lahuṭṭhānañca balañca phāsuvihārañca. Etha, tumhepi, āvuso, aññatreva rattibhojanā bhuñjatha. Aññatra kho panāvuso, tumhepi rattibhojanā bhuñjamānā appābādhatañca sañjānissatha appātaṅkatañca lahuṭṭhānañca balañca phāsuvihārañcā’ti. Evaṃ vutte kira 4, bhikkhave, tumhe te bhikkhū evaṃ avacuttha – ‘mayaṃ kho panāvuso, sāyañceva bhuñjāma pāto ca divā ca vikāle. Te mayaṃ sāyañceva bhuñjamānā pāto ca divā ca vikāle appābādhatañca sañjānāma appātaṅkatañca lahuṭṭhānañca balañca phāsuvihārañca. Te mayaṃ kiṃ sandiṭṭhikaṃ hitvā kālikaṃ anudhāvissāma? Sāyañceva mayaṃ bhuñjissāma pāto ca divā ca vikāle’’’ti. ‘‘Evaṃ, bhante’’.

    ༡༧༧. ‘‘ཀིཾ ནུ མེ ཏུམྷེ, བྷིཀྑཝེ, ཨེཝཾ དྷམྨཾ དེསིཏཾ ཨཱཛཱནཱཐ ཡཾ ཀིཉྩཱཡཾ པུརིསཔུགྒལོ པཊིསཾཝེདེཏི སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ ཏསྶ ཨཀུསལཱ དྷམྨཱ པརིཧཱཡནྟི ཀུསལཱ དྷམྨཱ ཨབྷིཝཌྜྷནྟཱི’’ཏི? ‘‘ནོ ཧེཏཾ, བྷནྟེ’’། ‘‘ནནུ མེ ཏུམྷེ, བྷིཀྑཝེ, ཨེཝཾ དྷམྨཾ དེསིཏཾ ཨཱཛཱནཱཐ ཨིདྷེཀཙྩསྶ ཡཾ ཨེཝརཱུཔཾ སུཁཾ ཝེདནཾ ཝེདཡཏོ ཨཀུསལཱ དྷམྨཱ ཨབྷིཝཌྜྷནྟི ཀུསལཱ དྷམྨཱ པརིཧཱཡནྟི, ཨིདྷ པནེཀཙྩསྶ ཨེཝརཱུཔཾ སུཁཾ ཝེདནཾ ཝེདཡཏོ ཨཀུསལཱ དྷམྨཱ པརིཧཱཡནྟི , ཀུསལཱ དྷམྨཱ ཨབྷིཝཌྜྷནྟི, ཨིདྷེཀཙྩསྶ ཨེཝརཱུཔཾ དུཀྑཾ ཝེདནཾ ཝེདཡཏོ ཨཀུསལཱ དྷམྨཱ ཨབྷིཝཌྜྷནྟི ཀུསལཱ དྷམྨཱ པརིཧཱཡནྟི, ཨིདྷ པནེཀཙྩསྶ ཨེཝརཱུཔཾ དུཀྑཾ ཝེདནཾ ཝེདཡཏོ ཨཀུསལཱ དྷམྨཱ པརིཧཱཡནྟི ཀུསལཱ དྷམྨཱ ཨབྷིཝཌྜྷནྟི, ཨིདྷེཀཙྩསྶ ཨེཝརཱུཔཾ ཨདུཀྑམསུཁཾ ཝེདནཾ ཝེདཡཏོ ཨཀུསལཱ དྷམྨཱ ཨབྷིཝཌྜྷནྟི ཀུསལཱ དྷམྨཱ པརིཧཱཡནྟི, ཨིདྷ པནེཀཙྩསྶ ཨེཝརཱུཔཾ ཨདུཀྑམསུཁཾ ཝེདནཾ ཝེདཡཏོ ཨཀུསལཱ དྷམྨཱ པརིཧཱཡནྟི ཀུསལཱ དྷམྨཱ ཨབྷིཝཌྜྷནྟཱི’’ཏི? ‘‘ཨེཝཾ, བྷནྟེ’’།

    177. ‘‘Kiṃ nu me tumhe, bhikkhave, evaṃ dhammaṃ desitaṃ ājānātha yaṃ kiñcāyaṃ purisapuggalo paṭisaṃvedeti sukhaṃ vā dukkhaṃ vā adukkhamasukhaṃ vā tassa akusalā dhammā parihāyanti kusalā dhammā abhivaḍḍhantī’’ti? ‘‘No hetaṃ, bhante’’. ‘‘Nanu me tumhe, bhikkhave, evaṃ dhammaṃ desitaṃ ājānātha idhekaccassa yaṃ evarūpaṃ sukhaṃ vedanaṃ vedayato akusalā dhammā abhivaḍḍhanti kusalā dhammā parihāyanti, idha panekaccassa evarūpaṃ sukhaṃ vedanaṃ vedayato akusalā dhammā parihāyanti , kusalā dhammā abhivaḍḍhanti, idhekaccassa evarūpaṃ dukkhaṃ vedanaṃ vedayato akusalā dhammā abhivaḍḍhanti kusalā dhammā parihāyanti, idha panekaccassa evarūpaṃ dukkhaṃ vedanaṃ vedayato akusalā dhammā parihāyanti kusalā dhammā abhivaḍḍhanti, idhekaccassa evarūpaṃ adukkhamasukhaṃ vedanaṃ vedayato akusalā dhammā abhivaḍḍhanti kusalā dhammā parihāyanti, idha panekaccassa evarūpaṃ adukkhamasukhaṃ vedanaṃ vedayato akusalā dhammā parihāyanti kusalā dhammā abhivaḍḍhantī’’ti? ‘‘Evaṃ, bhante’’.

    ༡༧༨. ‘‘སཱདྷུ, བྷིཀྑཝེ! མཡཱ ཙེཏཾ, བྷིཀྑཝེ, ཨཉྙཱཏཾ ཨབྷཝིསྶ ཨདིཊྛཾ ཨཝིདིཏཾ ཨསཙྪིཀཏཾ ཨཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ སུཁཾ ཝེདནཾ ཝེདཡཏོ ཨཀུསལཱ དྷམྨཱ ཨབྷིཝཌྜྷནྟི ཀུསལཱ དྷམྨཱ པརིཧཱཡནྟཱི’ཏི, ཨེཝཱཧཾ ཨཛཱནནྟོ ‘ཨེཝརཱུཔཾ སུཁཾ ཝེདནཾ པཛཧཐཱ’ཏི ཝདེཡྻཾ; ཨཔི ནུ མེ ཨེཏཾ, བྷིཀྑཝེ, པཏིརཱུཔཾ ཨབྷཝིསྶཱ’’ཏི? ‘‘ནོ ཧེཏཾ, བྷནྟེ’’། ‘‘ཡསྨཱ ཙ ཁོ ཨེཏཾ, བྷིཀྑཝེ, མཡཱ ཉཱཏཾ དིཊྛཾ ཝིདིཏཾ སཙྪིཀཏཾ ཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ སུཁཾ ཝེདནཾ ཝེདཡཏོ ཨཀུསལཱ དྷམྨཱ ཨབྷིཝཌྜྷནྟི ཀུསལཱ དྷམྨཱ པརིཧཱཡནྟཱི’ཏི, ཏསྨཱཧཾ ‘ཨེཝརཱུཔཾ སུཁཾ ཝེདནཾ པཛཧཐཱ’ཏི ཝདཱམི། མཡཱ ཙེཏཾ, བྷིཀྑཝེ, ཨཉྙཱཏཾ ཨབྷཝིསྶ ཨདིཊྛཾ ཨཝིདིཏཾ ཨསཙྪིཀཏཾ ཨཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ སུཁཾ ཝེདནཾ ཝེདཡཏོ ཨཀུསལཱ དྷམྨཱ པརིཧཱཡནྟི ཀུསལཱ དྷམྨཱ ཨབྷིཝཌྜྷནྟཱི’ཏི, ཨེཝཱཧཾ ཨཛཱནནྟོ ‘ཨེཝརཱུཔཾ སུཁཾ ཝེདནཾ ཨུཔསམྤཛྫ ཝིཧརཐཱ’ཏི ཝདེཡྻཾ; ཨཔི ནུ མེ ཨེཏཾ, བྷིཀྑཝེ, པཏིརཱུཔཾ ཨབྷཝིསྶཱ’’ཏི? ‘‘ནོ ཧེཏཾ, བྷནྟེ’’། ‘‘ཡསྨཱ ཙ ཁོ ཨེཏཾ, བྷིཀྑཝེ, མཡཱ ཉཱཏཾ དིཊྛཾ ཝིདིཏཾ སཙྪིཀཏཾ ཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ སུཁཾ ཝེདནཾ ཝེདཡཏོ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟཱི’ཏི, ཏསྨཱཧཾ ‘ཨེཝརཱུཔཾ སུཁཾ ཝེདནཾ ཨུཔསམྤཛྫ ཝིཧརཐཱ’ཏི ཝདཱམི།

    178. ‘‘Sādhu, bhikkhave! Mayā cetaṃ, bhikkhave, aññātaṃ abhavissa adiṭṭhaṃ aviditaṃ asacchikataṃ aphassitaṃ paññāya – ‘idhekaccassa evarūpaṃ sukhaṃ vedanaṃ vedayato akusalā dhammā abhivaḍḍhanti kusalā dhammā parihāyantī’ti, evāhaṃ ajānanto ‘evarūpaṃ sukhaṃ vedanaṃ pajahathā’ti vadeyyaṃ; api nu me etaṃ, bhikkhave, patirūpaṃ abhavissā’’ti? ‘‘No hetaṃ, bhante’’. ‘‘Yasmā ca kho etaṃ, bhikkhave, mayā ñātaṃ diṭṭhaṃ viditaṃ sacchikataṃ phassitaṃ paññāya – ‘idhekaccassa evarūpaṃ sukhaṃ vedanaṃ vedayato akusalā dhammā abhivaḍḍhanti kusalā dhammā parihāyantī’ti, tasmāhaṃ ‘evarūpaṃ sukhaṃ vedanaṃ pajahathā’ti vadāmi. Mayā cetaṃ, bhikkhave, aññātaṃ abhavissa adiṭṭhaṃ aviditaṃ asacchikataṃ aphassitaṃ paññāya – ‘idhekaccassa evarūpaṃ sukhaṃ vedanaṃ vedayato akusalā dhammā parihāyanti kusalā dhammā abhivaḍḍhantī’ti, evāhaṃ ajānanto ‘evarūpaṃ sukhaṃ vedanaṃ upasampajja viharathā’ti vadeyyaṃ; api nu me etaṃ, bhikkhave, patirūpaṃ abhavissā’’ti? ‘‘No hetaṃ, bhante’’. ‘‘Yasmā ca kho etaṃ, bhikkhave, mayā ñātaṃ diṭṭhaṃ viditaṃ sacchikataṃ phassitaṃ paññāya – ‘idhekaccassa evarūpaṃ sukhaṃ vedanaṃ vedayato akusalā dhammā parihāyanti, kusalā dhammā abhivaḍḍhantī’ti, tasmāhaṃ ‘evarūpaṃ sukhaṃ vedanaṃ upasampajja viharathā’ti vadāmi.

    ༡༧༩. ‘‘མཡཱ ཙེཏཾ, བྷིཀྑཝེ, ཨཉྙཱཏཾ ཨབྷཝིསྶ ཨདིཊྛཾ ཨཝིདིཏཾ ཨསཙྪིཀཏཾ ཨཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ དུཀྑཾ ཝེདནཾ ཝེདཡཏོ ཨཀུསལཱ དྷམྨཱ ཨབྷིཝཌྜྷནྟི ཀུསལཱ དྷམྨཱ པརིཧཱཡནྟཱི’ཏི, ཨེཝཱཧཾ ཨཛཱནནྟོ ‘ཨེཝརཱུཔཾ དུཀྑཾ ཝེདནཾ པཛཧཐཱ’ཏི ཝདེཡྻཾ; ཨཔི ནུ མེ ཨེཏཾ, བྷིཀྑཝེ, པཏིརཱུཔཾ ཨབྷཝིསྶཱ’’ཏི? ‘‘ནོ ཧེཏཾ, བྷནྟེ’’། ‘‘ཡསྨཱ ཙ ཁོ ཨེཏཾ, བྷིཀྑཝེ, མཡཱ ཉཱཏཾ དིཊྛཾ ཝིདིཏཾ སཙྪིཀཏཾ ཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ དུཀྑཾ ཝེདནཾ ཝེདཡཏོ ཨཀུསལཱ དྷམྨཱ ཨབྷིཝཌྜྷནྟི ཀུསལཱ དྷམྨཱ པརིཧཱཡནྟཱི’ཏི, ཏསྨཱཧཾ ‘ཨེཝརཱུཔཾ དུཀྑཾ ཝེདནཾ པཛཧཐཱ’ཏི ཝདཱམི། མཡཱ ཙེཏཾ, བྷིཀྑཝེ, ཨཉྙཱཏཾ ཨབྷཝིསྶ ཨདིཊྛཾ ཨཝིདིཏཾ ཨསཙྪིཀཏཾ ཨཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ དུཀྑཾ ཝེདནཾ ཝེདཡཏོ ཨཀུསལཱ དྷམྨཱ པརིཧཱཡནྟི ཀུསལཱ དྷམྨཱ ཨབྷིཝཌྜྷནྟཱི’ཏི, ཨེཝཱཧཾ ཨཛཱནནྟོ ‘ཨེཝརཱུཔཾ དུཀྑཾ ཝེདནཾ ཨུཔསམྤཛྫ ཝིཧརཐཱ’ཏི ཝདེཡྻཾ; ཨཔི ནུ མེ ཨེཏཾ, བྷིཀྑཝེ, པཏིརཱུཔཾ ཨབྷཝིསྶཱ’’ཏི ? ‘‘ནོ ཧེཏཾ, བྷནྟེ’’། ‘‘ཡསྨཱ ཙ ཁོ ཨེཏཾ, བྷིཀྑཝེ, མཡཱ ཉཱཏཾ དིཊྛཾ ཝིདིཏཾ སཙྪིཀཏཾ ཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ དུཀྑཾ ཝེདནཾ ཝེདཡཏོ ཨཀུསལཱ དྷམྨཱ པརིཧཱཡནྟི ཀུསལཱ དྷམྨཱ ཨབྷིཝཌྜྷནྟཱི’ཏི, ཏསྨཱཧཾ ‘ཨེཝརཱུཔཾ དུཀྑཾ ཝེདནཾ ཨུཔསམྤཛྫ ཝིཧརཐཱ’ཏི ཝདཱམི།

    179. ‘‘Mayā cetaṃ, bhikkhave, aññātaṃ abhavissa adiṭṭhaṃ aviditaṃ asacchikataṃ aphassitaṃ paññāya – ‘idhekaccassa evarūpaṃ dukkhaṃ vedanaṃ vedayato akusalā dhammā abhivaḍḍhanti kusalā dhammā parihāyantī’ti, evāhaṃ ajānanto ‘evarūpaṃ dukkhaṃ vedanaṃ pajahathā’ti vadeyyaṃ; api nu me etaṃ, bhikkhave, patirūpaṃ abhavissā’’ti? ‘‘No hetaṃ, bhante’’. ‘‘Yasmā ca kho etaṃ, bhikkhave, mayā ñātaṃ diṭṭhaṃ viditaṃ sacchikataṃ phassitaṃ paññāya – ‘idhekaccassa evarūpaṃ dukkhaṃ vedanaṃ vedayato akusalā dhammā abhivaḍḍhanti kusalā dhammā parihāyantī’ti, tasmāhaṃ ‘evarūpaṃ dukkhaṃ vedanaṃ pajahathā’ti vadāmi. Mayā cetaṃ, bhikkhave, aññātaṃ abhavissa adiṭṭhaṃ aviditaṃ asacchikataṃ aphassitaṃ paññāya – ‘idhekaccassa evarūpaṃ dukkhaṃ vedanaṃ vedayato akusalā dhammā parihāyanti kusalā dhammā abhivaḍḍhantī’ti, evāhaṃ ajānanto ‘evarūpaṃ dukkhaṃ vedanaṃ upasampajja viharathā’ti vadeyyaṃ; api nu me etaṃ, bhikkhave, patirūpaṃ abhavissā’’ti ? ‘‘No hetaṃ, bhante’’. ‘‘Yasmā ca kho etaṃ, bhikkhave, mayā ñātaṃ diṭṭhaṃ viditaṃ sacchikataṃ phassitaṃ paññāya – ‘idhekaccassa evarūpaṃ dukkhaṃ vedanaṃ vedayato akusalā dhammā parihāyanti kusalā dhammā abhivaḍḍhantī’ti, tasmāhaṃ ‘evarūpaṃ dukkhaṃ vedanaṃ upasampajja viharathā’ti vadāmi.

    ༡༨༠. ‘‘མཡཱ ཙེཏཾ, བྷིཀྑཝེ, ཨཉྙཱཏཾ ཨབྷཝིསྶ ཨདིཊྛཾ ཨཝིདིཏཾ ཨསཙྪིཀཏཾ ཨཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ ཨདུཀྑམསུཁཾ ཝེདནཾ ཝེདཡཏོ ཨཀུསལཱ དྷམྨཱ ཨབྷིཝཌྜྷནྟི ཀུསལཱ དྷམྨཱ པརིཧཱཡནྟཱི’ཏི, ཨེཝཱཧཾ ཨཛཱནནྟོ ‘ཨེཝརཱུཔཾ ཨདུཀྑམསུཁཾ ཝེདནཾ པཛཧཐཱ’ཏི ཝདེཡྻཾ; ཨཔི ནུ མེ ཨེཏཾ, བྷིཀྑཝེ, པཏིརཱུཔཾ ཨབྷཝིསྶཱ’’ཏི? ‘‘ནོ ཧེཏཾ, བྷནྟེ’’། ‘‘ཡསྨཱ ཙ ཁོ ཨེཏཾ, བྷིཀྑཝེ, མཡཱ ཉཱཏཾ དིཊྛཾ ཝིདིཏཾ སཙྪིཀཏཾ ཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ ཨདུཀྑམསུཁཾ ཝེདནཾ ཝེདཡཏོ ཨཀུསལཱ དྷམྨཱ ཨབྷིཝཌྜྷནྟི ཀུསལཱ དྷམྨཱ པརིཧཱཡནྟཱི’ཏི, ཏསྨཱཧཾ ‘ཨེཝརཱུཔཾ ཨདུཀྑམསུཁཾ ཝེདནཾ པཛཧཐཱ’ཏི ཝདཱམི’’། མཡཱ ཙེཏཾ, བྷིཀྑཝེ, ཨཉྙཱཏཾ ཨབྷཝིསྶ ཨདིཊྛཾ ཨཝིདིཏཾ ཨསཙྪིཀཏཾ ཨཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ ཨདུཀྑམསུཁཾ ཝེདནཾ ཝེདཡཏོ ཨཀུསལཱ དྷམྨཱ པརིཧཱཡནྟི ཀུསལཱ དྷམྨཱ ཨབྷིཝཌྜྷནྟཱི’ཏི, ཨེཝཱཧཾ ཨཛཱནནྟོ ‘ཨེཝརཱུཔཾ ཨདུཀྑམསུཁཾ ཝེདནཾ ཨུཔསམྤཛྫ ཝིཧརཐཱ’ཏི ཝདེཡྻཾ; ཨཔི ནུ མེ ཨེཏཾ, བྷིཀྑཝེ, པཏིརཱུཔཾ ཨབྷཝིསྶཱ’’ཏི? ‘‘ནོ ཧེཏཾ, བྷནྟེ’’། ‘‘ཡསྨཱ ཙ ཁོ ཨེཏཾ, བྷིཀྑཝེ, མཡཱ ཉཱཏཾ དིཊྛཾ ཝིདིཏཾ སཙྪིཀཏཾ ཕསྶིཏཾ པཉྙཱཡ – ‘ཨིདྷེཀཙྩསྶ ཨེཝརཱུཔཾ ཨདུཀྑམསུཁཾ ཝེདནཾ ཝེདཡཏོ ཨཀུསལཱ དྷམྨཱ པརིཧཱཡནྟི ཀུསལཱ དྷམྨཱ ཨབྷིཝཌྜྷནྟཱི’ཏི, ཏསྨཱཧཾ ‘ཨེཝརཱུཔཾ ཨདུཀྑམསུཁཾ ཝེདནཾ ཨུཔསམྤཛྫ ཝིཧརཐཱ’ཏི ཝདཱམི།

    180. ‘‘Mayā cetaṃ, bhikkhave, aññātaṃ abhavissa adiṭṭhaṃ aviditaṃ asacchikataṃ aphassitaṃ paññāya – ‘idhekaccassa evarūpaṃ adukkhamasukhaṃ vedanaṃ vedayato akusalā dhammā abhivaḍḍhanti kusalā dhammā parihāyantī’ti, evāhaṃ ajānanto ‘evarūpaṃ adukkhamasukhaṃ vedanaṃ pajahathā’ti vadeyyaṃ; api nu me etaṃ, bhikkhave, patirūpaṃ abhavissā’’ti? ‘‘No hetaṃ, bhante’’. ‘‘Yasmā ca kho etaṃ, bhikkhave, mayā ñātaṃ diṭṭhaṃ viditaṃ sacchikataṃ phassitaṃ paññāya – ‘idhekaccassa evarūpaṃ adukkhamasukhaṃ vedanaṃ vedayato akusalā dhammā abhivaḍḍhanti kusalā dhammā parihāyantī’ti, tasmāhaṃ ‘evarūpaṃ adukkhamasukhaṃ vedanaṃ pajahathā’ti vadāmi’’. Mayā cetaṃ, bhikkhave, aññātaṃ abhavissa adiṭṭhaṃ aviditaṃ asacchikataṃ aphassitaṃ paññāya – ‘idhekaccassa evarūpaṃ adukkhamasukhaṃ vedanaṃ vedayato akusalā dhammā parihāyanti kusalā dhammā abhivaḍḍhantī’ti, evāhaṃ ajānanto ‘evarūpaṃ adukkhamasukhaṃ vedanaṃ upasampajja viharathā’ti vadeyyaṃ; api nu me etaṃ, bhikkhave, patirūpaṃ abhavissā’’ti? ‘‘No hetaṃ, bhante’’. ‘‘Yasmā ca kho etaṃ, bhikkhave, mayā ñātaṃ diṭṭhaṃ viditaṃ sacchikataṃ phassitaṃ paññāya – ‘idhekaccassa evarūpaṃ adukkhamasukhaṃ vedanaṃ vedayato akusalā dhammā parihāyanti kusalā dhammā abhivaḍḍhantī’ti, tasmāhaṃ ‘evarūpaṃ adukkhamasukhaṃ vedanaṃ upasampajja viharathā’ti vadāmi.

    ༡༨༡. ‘‘ནཱཧཾ, བྷིཀྑཝེ, སབྦེསཾཡེཝ བྷིཀྑཱུནཾ ‘ཨཔྤམཱདེན ཀརཎཱིཡ’ནྟི ཝདཱམི; ན པནཱཧཾ, བྷིཀྑཝེ, སབྦེསཾཡེཝ བྷིཀྑཱུནཾ ‘ན ཨཔྤམཱདེན ཀརཎཱིཡ’ནྟི ཝདཱམི། ཡེ ཏེ, བྷིཀྑཝེ, བྷིཀྑཱུ ཨརཧནྟོ ཁཱིཎཱསཝཱ ཝུསིཏཝནྟོ ཀཏཀརཎཱིཡཱ ཨོཧིཏབྷཱརཱ ཨནུཔྤཏྟསདཏྠཱ པརིཀྑཱིཎབྷཝསཾཡོཛནཱ སམྨདཉྙཱ ཝིམུཏྟཱ, ཏཐཱརཱུཔཱནཱཧཾ, བྷིཀྑཝེ, བྷིཀྑཱུནཾ ‘ན ཨཔྤམཱདེན ཀརཎཱིཡ’ནྟི ཝདཱམི། ཏཾ ཀིསྶ ཧེཏུ? ཀཏཾ ཏེསཾ ཨཔྤམཱདེན། ཨབྷབྦཱ ཏེ པམཛྫིཏུཾ། ཡེ ཙ ཁོ ཏེ, བྷིཀྑཝེ, བྷིཀྑཱུ སེཀྑཱ ཨཔྤཏྟམཱནསཱ ཨནུཏྟརཾ ཡོགཀྑེམཾ པཏྠཡམཱནཱ ཝིཧརནྟི, ཏཐཱརཱུཔཱནཱཧཾ, བྷིཀྑཝེ, བྷིཀྑཱུནཾ ‘ཨཔྤམཱདེན ཀརཎཱིཡ’ནྟྣྟྟི ཝདཱམི། ཏཾ ཀིསྶ ཧེཏུ? ཨཔྤེཝ ནཱམིམེ ཨཱཡསྨནྟོ ཨནུལོམིཀཱནི སེནཱསནཱནི པཊིསེཝམཱནཱ ཀལྱཱཎམིཏྟེ བྷཛམཱནཱ ཨིནྡྲིཡཱནི སམནྣཱནཡམཱནཱ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརེཡྻུནྟི! ཨིམཾ ཁོ ཨཧཾ, བྷིཀྑཝེ, ཨིམེསཾ བྷིཀྑཱུནཾ ཨཔྤམཱདཕལཾ སམྤསྶམཱནོ ‘ཨཔྤམཱདེན ཀརཎཱིཡ’ནྟྣྟྟི ཝདཱམི།

    181. ‘‘Nāhaṃ, bhikkhave, sabbesaṃyeva bhikkhūnaṃ ‘appamādena karaṇīya’nti vadāmi; na panāhaṃ, bhikkhave, sabbesaṃyeva bhikkhūnaṃ ‘na appamādena karaṇīya’nti vadāmi. Ye te, bhikkhave, bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaṃyojanā sammadaññā vimuttā, tathārūpānāhaṃ, bhikkhave, bhikkhūnaṃ ‘na appamādena karaṇīya’nti vadāmi. Taṃ kissa hetu? Kataṃ tesaṃ appamādena. Abhabbā te pamajjituṃ. Ye ca kho te, bhikkhave, bhikkhū sekkhā appattamānasā anuttaraṃ yogakkhemaṃ patthayamānā viharanti, tathārūpānāhaṃ, bhikkhave, bhikkhūnaṃ ‘appamādena karaṇīya’ntntti vadāmi. Taṃ kissa hetu? Appeva nāmime āyasmanto anulomikāni senāsanāni paṭisevamānā kalyāṇamitte bhajamānā indriyāni samannānayamānā – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihareyyunti! Imaṃ kho ahaṃ, bhikkhave, imesaṃ bhikkhūnaṃ appamādaphalaṃ sampassamāno ‘appamādena karaṇīya’ntntti vadāmi.

    ༡༨༢. ‘‘སཏྟིམེ , བྷིཀྑཝེ, པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ སཏྟ? ཨུབྷཏོབྷཱགཝིམུཏྟོ, པཉྙཱཝིམུཏྟོ, ཀཱཡསཀྑི, དིཊྛིཔྤཏྟོ, སདྡྷཱཝིམུཏྟོ, དྷམྨཱནུསཱརཱི, སདྡྷཱནུསཱརཱི།

    182. ‘‘Sattime , bhikkhave, puggalā santo saṃvijjamānā lokasmiṃ. Katame satta? Ubhatobhāgavimutto, paññāvimutto, kāyasakkhi, diṭṭhippatto, saddhāvimutto, dhammānusārī, saddhānusārī.

    ‘‘ཀཏམོ ཙ, བྷིཀྑཝེ, པུགྒལོ ཨུབྷཏོབྷཱགཝིམུཏྟོ? ཨིདྷ, བྷིཀྑཝེ, ཨེཀཙྩོ པུགྒལོ ཡེ ཏེ སནྟཱ ཝིམོཀྑཱ ཨཏིཀྐམྨ རཱུཔེ ཨཱརུཔྤཱ ཏེ ཀཱཡེན ཕུསིཏྭཱ 5 ཝིཧརཏི པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟི། ཨཡཾ ཝུཙྩཏི, བྷིཀྑཝེ, པུགྒལོ ཨུབྷཏོབྷཱགཝིམུཏྟོ ཨིམསྶ ཁོ ཨཧཾ, བྷིཀྑཝེ, བྷིཀྑུནོ ‘ན ཨཔྤམཱདེན ཀརཎཱིཡ’ནྟི ཝདཱམི། ཏཾ ཀིསྶ ཧེཏུ? ཀཏཾ ཏསྶ ཨཔྤམཱདེན། ཨབྷབྦོ སོ པམཛྫིཏུཾ།

    ‘‘Katamo ca, bhikkhave, puggalo ubhatobhāgavimutto? Idha, bhikkhave, ekacco puggalo ye te santā vimokkhā atikkamma rūpe āruppā te kāyena phusitvā 6 viharati paññāya cassa disvā āsavā parikkhīṇā honti. Ayaṃ vuccati, bhikkhave, puggalo ubhatobhāgavimutto imassa kho ahaṃ, bhikkhave, bhikkhuno ‘na appamādena karaṇīya’nti vadāmi. Taṃ kissa hetu? Kataṃ tassa appamādena. Abhabbo so pamajjituṃ.

    ‘‘ཀཏམོ ཙ, བྷིཀྑཝེ, པུགྒལོ པཉྙཱཝིམུཏྟོ? ཨིདྷ, བྷིཀྑཝེ, ཨེཀཙྩོ པུགྒལོ ཡེ ཏེ སནྟཱ ཝིམོཀྑཱ ཨཏིཀྐམྨ རཱུཔེ ཨཱརུཔྤཱ ཏེ ན ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟི། ཨཡཾ ཝུཙྩཏི, བྷིཀྑཝེ, པུགྒལོ པཉྙཱཝིམུཏྟོ། ཨིམསྶཔི ཁོ ཨཧཾ, བྷིཀྑཝེ, བྷིཀྑུནོ ‘ན ཨཔྤམཱདེན ཀརཎཱིཡ’ནྟི ཝདཱམི། ཏཾ ཀིསྶ ཧེཏུ? ཀཏཾ ཏསྶ ཨཔྤམཱདེན། ཨབྷབྦོ སོ པམཛྫིཏུཾ།

    ‘‘Katamo ca, bhikkhave, puggalo paññāvimutto? Idha, bhikkhave, ekacco puggalo ye te santā vimokkhā atikkamma rūpe āruppā te na kāyena phusitvā viharati, paññāya cassa disvā āsavā parikkhīṇā honti. Ayaṃ vuccati, bhikkhave, puggalo paññāvimutto. Imassapi kho ahaṃ, bhikkhave, bhikkhuno ‘na appamādena karaṇīya’nti vadāmi. Taṃ kissa hetu? Kataṃ tassa appamādena. Abhabbo so pamajjituṃ.

    ‘‘ཀཏམོ ཙ, བྷིཀྑཝེ, པུགྒལོ ཀཱཡསཀྑི? ཨིདྷ, བྷིཀྑཝེ, ཨེཀཙྩོ པུགྒལོ ཡེ ཏེ སནྟཱ ཝིམོཀྑཱ ཨཏིཀྐམྨ རཱུཔེ ཨཱརུཔྤཱ ཏེ ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨེཀཙྩེ ཨཱསཝཱ པརིཀྑཱིཎཱ ཧོནྟི། ཨཡཾ ཝུཙྩཏི, བྷིཀྑཝེ, པུགྒལོ ཀཱཡསཀྑི། ཨིམསྶ ཁོ ཨཧཾ, བྷིཀྑཝེ, བྷིཀྑུནོ ‘ཨཔྤམཱདེན ཀརཎཱིཡ’ནྟི ཝདཱམི། ཏཾ ཀིསྶ ཧེཏུ? ཨཔྤེཝ ནཱམ ཨཡམཱཡསྨཱ ཨནུལོམིཀཱནི སེནཱསནཱནི པཊིསེཝམཱནོ ཀལྱཱཎམིཏྟེ བྷཛམཱནོ ཨིནྡྲིཡཱནི སམནྣཱནཡམཱནོ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརེཡྻཱཏི! ཨིམཾ ཁོ ཨཧཾ, བྷིཀྑཝེ, ཨིམསྶ བྷིཀྑུནོ ཨཔྤམཱདཕལཾ སམྤསྶམཱནོ ‘ཨཔྤམཱདེན ཀརཎཱིཡ’ནྟྣྟྟི ཝདཱམི།

    ‘‘Katamo ca, bhikkhave, puggalo kāyasakkhi? Idha, bhikkhave, ekacco puggalo ye te santā vimokkhā atikkamma rūpe āruppā te kāyena phusitvā viharati, paññāya cassa disvā ekacce āsavā parikkhīṇā honti. Ayaṃ vuccati, bhikkhave, puggalo kāyasakkhi. Imassa kho ahaṃ, bhikkhave, bhikkhuno ‘appamādena karaṇīya’nti vadāmi. Taṃ kissa hetu? Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihareyyāti! Imaṃ kho ahaṃ, bhikkhave, imassa bhikkhuno appamādaphalaṃ sampassamāno ‘appamādena karaṇīya’ntntti vadāmi.

    ‘‘ཀཏམོ ཙ, བྷིཀྑཝེ, པུགྒལོ དིཊྛིཔྤཏྟོ? ཨིདྷ, བྷིཀྑཝེ, ཨེཀཙྩོ པུགྒལོ ཡེ ཏེ སནྟཱ ཝིམོཀྑཱ ཨཏིཀྐམྨ རཱུཔེ ཨཱརུཔྤཱ ཏེ ན ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨེཀཙྩེ ཨཱསཝཱ པརིཀྑཱིཎཱ ཧོནྟི, ཏཐཱགཏཔྤཝེདིཏཱ ཙསྶ དྷམྨཱ པཉྙཱཡ ཝོདིཊྛཱ ཧོནྟི ཝོཙརིཏཱ། ཨཡཾ ཝུཙྩཏི, བྷིཀྑཝེ, པུགྒལོ དིཊྛིཔྤཏྟོ། ཨིམསྶཔི ཁོ ཨཧཾ, བྷིཀྑཝེ, བྷིཀྑུནོ ‘ཨཔྤམཱདེན ཀརཎཱིཡ’ནྟི ཝདཱམི། ཏཾ ཀིསྶ ཧེཏུ? ཨཔྤེཝ ནཱམ ཨཡམཱཡསྨཱ ཨནུལོམིཀཱནི སེནཱསནཱནི པཊིསེཝམཱནོ ཀལྱཱཎམིཏྟེ བྷཛམཱནོ ཨིནྡྲིཡཱནི སམནྣཱནཡམཱནོ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརེཡྻཱཏི! ཨིམཾ ཁོ ཨཧཾ, བྷིཀྑཝེ, ཨིམསྶ བྷིཀྑུནོ ཨཔྤམཱདཕལཾ སམྤསྶམཱནོ ‘ཨཔྤམཱདེན ཀརཎཱིཡ’ནྟྣྟྟི ཝདཱམི།

    ‘‘Katamo ca, bhikkhave, puggalo diṭṭhippatto? Idha, bhikkhave, ekacco puggalo ye te santā vimokkhā atikkamma rūpe āruppā te na kāyena phusitvā viharati, paññāya cassa disvā ekacce āsavā parikkhīṇā honti, tathāgatappaveditā cassa dhammā paññāya vodiṭṭhā honti vocaritā. Ayaṃ vuccati, bhikkhave, puggalo diṭṭhippatto. Imassapi kho ahaṃ, bhikkhave, bhikkhuno ‘appamādena karaṇīya’nti vadāmi. Taṃ kissa hetu? Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihareyyāti! Imaṃ kho ahaṃ, bhikkhave, imassa bhikkhuno appamādaphalaṃ sampassamāno ‘appamādena karaṇīya’ntntti vadāmi.

    ‘‘ཀཏམོ ཙ, བྷིཀྑཝེ, པུགྒལོ སདྡྷཱཝིམུཏྟོ། ཨིདྷ, བྷིཀྑཝེ, ཨེཀཙྩོ པུགྒལོ ཡེ ཏེ སནྟཱ ཝིམོཀྑཱ ཨཏིཀྐམྨ རཱུཔེ ཨཱརུཔྤཱ ཏེ ན ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨེཀཙྩེ ཨཱསཝཱ པརིཀྑཱིཎཱ ཧོནྟི, ཏཐཱགཏེ ཙསྶ སདྡྷཱ ནིཝིཊྛཱ ཧོཏི མཱུལཛཱཏཱ པཏིཊྛིཏཱ། ཨཡཾ ཝུཙྩཏི, བྷིཀྑཝེ, པུགྒལོ སདྡྷཱཝིམུཏྟོ། ཨིམསྶཔི ཁོ ཨཧཾ, བྷིཀྑཝེ, བྷིཀྑུནོ ‘ཨཔྤམཱདེན ཀརཎཱིཡ’ནྟྣྟྟི ཝདཱམི། ཏཾ ཀིསྶ ཧེཏུ? ཨཔྤེཝ ནཱམ ཨཡམཱཡསྨཱ ཨནུལོམིཀཱནི སེནཱསནཱནི པཊིསེཝམཱནོ ཀལྱཱཎམིཏྟེ བྷཛམཱནོ ཨིནྡྲིཡཱནི སམནྣཱནཡམཱནོ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརེཡྻཱཏི! ཨིམཾ ཁོ ཨཧཾ, བྷིཀྑཝེ, ཨིམསྶ བྷིཀྑུནོ ཨཔྤམཱདཕལཾ སམྤསྶམཱནོ ‘ཨཔྤམཱདེན ཀརཎཱིཡ’ནྟྣྟྟི ཝདཱམི།

    ‘‘Katamo ca, bhikkhave, puggalo saddhāvimutto. Idha, bhikkhave, ekacco puggalo ye te santā vimokkhā atikkamma rūpe āruppā te na kāyena phusitvā viharati, paññāya cassa disvā ekacce āsavā parikkhīṇā honti, tathāgate cassa saddhā niviṭṭhā hoti mūlajātā patiṭṭhitā. Ayaṃ vuccati, bhikkhave, puggalo saddhāvimutto. Imassapi kho ahaṃ, bhikkhave, bhikkhuno ‘appamādena karaṇīya’ntntti vadāmi. Taṃ kissa hetu? Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihareyyāti! Imaṃ kho ahaṃ, bhikkhave, imassa bhikkhuno appamādaphalaṃ sampassamāno ‘appamādena karaṇīya’ntntti vadāmi.

    ‘‘ཀཏམོ ཙ, བྷིཀྑཝེ, པུགྒལོ དྷམྨཱནུསཱརཱི? ཨིདྷ, བྷིཀྑཝེ, ཨེཀཙྩོ པུགྒལོ ཡེ ཏེ སནྟཱ ཝིམོཀྑཱ ཨཏིཀྐམྨ རཱུཔེ ཨཱརུཔྤཱ ཏེ ན ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨེཀཙྩེ ཨཱསཝཱ པརིཀྑཱིཎཱ 7 ཧོནྟི, ཏཐཱགཏཔྤཝེདིཏཱ ཙསྶ དྷམྨཱ པཉྙཱཡ མཏྟསོ ནིཛ྄ཛྷཱནཾ ཁམནྟི, ཨཔི ཙསྶ ཨིམེ དྷམྨཱ ཧོནྟི, སེཡྻཐིདཾ – སདྡྷིནྡྲིཡཾ, ཝཱིརིཡིནྡྲིཡཾ, སཏིནྡྲིཡཾ, སམཱདྷིནྡྲིཡཾ, པཉྙིནྡྲིཡཾ། ཨཡཾ ཝུཙྩཏི, བྷིཀྑཝེ, པུགྒལོ དྷམྨཱནུསཱརཱི། ཨིམསྶཔི ཁོ ཨཧཾ, བྷིཀྑཝེ, བྷིཀྑུནོ ‘ཨཔྤམཱདེན ཀརཎཱིཡ’ནྟི ཝདཱམི། ཏཾ ཀིསྶ ཧེཏུ? ཨཔྤེཝ ནཱམ ཨཡམཱཡསྨཱ ཨནུལོམིཀཱནི སེནཱསནཱནི པཊིསེཝམཱནོ ཀལྱཱཎམིཏྟེ བྷཛམཱནོ ཨིནྡྲིཡཱནི སམནྣཱནཡམཱནོ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརེཡྻཱཏི ! ཨིམཾ ཁོ ཨཧཾ, བྷིཀྑཝེ, ཨིམསྶ བྷིཀྑུནོ ཨཔྤམཱདཕལཾ སམྤསྶམཱནོ ‘ཨཔྤམཱདེན ཀརཎཱིཡ’ནྟི ཝདཱམི།

    ‘‘Katamo ca, bhikkhave, puggalo dhammānusārī? Idha, bhikkhave, ekacco puggalo ye te santā vimokkhā atikkamma rūpe āruppā te na kāyena phusitvā viharati, paññāya cassa disvā ekacce āsavā parikkhīṇā 8 honti, tathāgatappaveditā cassa dhammā paññāya mattaso nijjhānaṃ khamanti, api cassa ime dhammā honti, seyyathidaṃ – saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ. Ayaṃ vuccati, bhikkhave, puggalo dhammānusārī. Imassapi kho ahaṃ, bhikkhave, bhikkhuno ‘appamādena karaṇīya’nti vadāmi. Taṃ kissa hetu? Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihareyyāti ! Imaṃ kho ahaṃ, bhikkhave, imassa bhikkhuno appamādaphalaṃ sampassamāno ‘appamādena karaṇīya’nti vadāmi.

    ‘‘ཀཏམོ ཙ, བྷིཀྑཝེ, པུགྒལོ སདྡྷཱནུསཱརཱི? ཨིདྷ, བྷིཀྑཝེ, ཨེཀཙྩོ པུགྒལོ ཡེ ཏེ སནྟཱ ཝིམོཀྑཱ ཨཏིཀྐམྨ རཱུཔེ ཨཱརུཔྤཱ ཏེ ན ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨེཀཙྩེ ཨཱསཝཱ པརིཀྑཱིཎཱ 9 ཧོནྟི, ཏཐཱགཏེ ཙསྶ སདྡྷཱམཏྟཾ ཧོཏི པེམམཏྟཾ, ཨཔི ཙསྶ ཨིམེ དྷམྨཱ ཧོནྟི, སེཡྻཐིདཾ – སདྡྷིནྡྲིཡཾ, ཝཱིརིཡིནྡྲིཡཾ, སཏིནྡྲིཡཾ, སམཱདྷིནྡྲིཡཾ, པཉྙིནྡྲིཡཾ། ཨཡཾ ཝུཙྩཏི, བྷིཀྑཝེ, པུགྒལོ སདྡྷཱནུསཱརཱི། ཨིམསྶཔི ཁོ ཨཧཾ, བྷིཀྑཝེ, བྷིཀྑུནོ ‘ཨཔྤམཱདེན ཀརཎཱིཡ’ནྟྣྟྟི ཝདཱམི། ཏཾ ཀིསྶ ཧེཏུ? ཨཔྤེཝ ནཱམ ཨཡམཱཡསྨཱ ཨནུལོམིཀཱནི སེནཱསནཱནི པཊིསེཝམཱནོ ཀལྱཱཎམིཏྟེ བྷཛམཱནོ ཨིནྡྲིཡཱནི སམནྣཱནཡམཱནོ – ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི ཏདནུཏྟརཾ – བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརེཡྻཱཏི! ཨིམཾ ཁོ ཨཧཾ, བྷིཀྑཝེ, ཨིམསྶ བྷིཀྑུནོ ཨཔྤམཱདཕལཾ སམྤསྶམཱནོ ‘ཨཔྤམཱདེན ཀརཎཱིཡ’ནྟྣྟྟི ཝདཱམི།

    ‘‘Katamo ca, bhikkhave, puggalo saddhānusārī? Idha, bhikkhave, ekacco puggalo ye te santā vimokkhā atikkamma rūpe āruppā te na kāyena phusitvā viharati, paññāya cassa disvā ekacce āsavā parikkhīṇā 10 honti, tathāgate cassa saddhāmattaṃ hoti pemamattaṃ, api cassa ime dhammā honti, seyyathidaṃ – saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ. Ayaṃ vuccati, bhikkhave, puggalo saddhānusārī. Imassapi kho ahaṃ, bhikkhave, bhikkhuno ‘appamādena karaṇīya’ntntti vadāmi. Taṃ kissa hetu? Appeva nāma ayamāyasmā anulomikāni senāsanāni paṭisevamāno kalyāṇamitte bhajamāno indriyāni samannānayamāno – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihareyyāti! Imaṃ kho ahaṃ, bhikkhave, imassa bhikkhuno appamādaphalaṃ sampassamāno ‘appamādena karaṇīya’ntntti vadāmi.

    ༡༨༣. ‘‘ནཱཧཾ, བྷིཀྑཝེ, ཨཱདིཀེནེཝ ཨཉྙཱརཱདྷནཾ ཝདཱམི; ཨཔི ཙ, བྷིཀྑཝེ, ཨནུཔུབྦསིཀྑཱ ཨནུཔུབྦཀིརིཡཱ ཨནུཔུབྦཔཊིཔདཱ ཨཉྙཱརཱདྷནཱ ཧོཏི། ཀཐཉྩ, བྷིཀྑཝེ, ཨནུཔུབྦསིཀྑཱ ཨནུཔུབྦཀིརིཡཱ ཨནུཔུབྦཔཊིཔདཱ ཨཉྙཱརཱདྷནཱ ཧོཏི? ཨིདྷ, བྷིཀྑཝེ, སདྡྷཱཛཱཏོ ཨུཔསངྐམཏི, ཨུཔསངྐམནྟོ པཡིརུཔཱསཏི, པཡིརུཔཱསནྟོ སོཏཾ ཨོདཧཏི, ཨོཧིཏསོཏོ དྷམྨཾ སུཎཱཏི, སུཏྭཱ དྷམྨཾ དྷཱརེཏི, དྷཏཱནཾ 11 དྷམྨཱནཾ ཨཏྠཾ ཨུཔཔརིཀྑཏི, ཨཏྠཾ ཨུཔཔརིཀྑཏོ དྷམྨཱ ནིཛ྄ཛྷཱནཾ ཁམནྟི, དྷམྨནིཛ྄ཛྷཱནཀྑནྟིཡཱ སཏི ཚནྡོ ཛཱཡཏི, ཚནྡཛཱཏོ ཨུསྶཧཏི, ཨུསྶཱཧེཏྭཱ ཏུལེཏི, ཏུལཡིཏྭཱ པདཧཏི, པཧིཏཏྟོ སམཱནོ ཀཱཡེན ཙེཝ པརམསཙྩཾ སཙྪིཀརོཏི, པཉྙཱཡ ཙ ནཾ ཨཏིཝིཛ྄ཛྷ པསྶཏི། སཱཔི ནཱམ, བྷིཀྑཝེ, སདྡྷཱ ནཱཧོསི; ཏམྤི ནཱམ, བྷིཀྑཝེ, ཨུཔསངྐམནཾ ནཱཧོསི; སཱཔི ནཱམ, བྷིཀྑཝེ, པཡིརུཔཱསནཱ ནཱཧོསི; ཏམྤི ནཱམ, བྷིཀྑཝེ, སོཏཱཝདྷཱནཾ ནཱཧོསི ; ཏམྤི ནཱམ, བྷིཀྑཝེ, དྷམྨསྶཝནཾ ནཱཧོསི; སཱཔི ནཱམ, བྷིཀྑཝེ, དྷམྨདྷཱརཎཱ ནཱཧོསི; སཱཔི ནཱམ, བྷིཀྑཝེ, ཨཏྠཱུཔཔརིཀྑཱ ནཱཧོསི; སཱཔི ནཱམ, བྷིཀྑཝེ, དྷམྨནིཛ྄ཛྷཱནཀྑནྟི ནཱཧོསི; སོཔི ནཱམ, བྷིཀྑཝེ, ཚནྡོ ནཱཧོསི; སོཔི ནཱམ, བྷིཀྑཝེ, ཨུསྶཱཧོ ནཱཧོསི; སཱཔི ནཱམ, བྷིཀྑཝེ, ཏུལནཱ ནཱཧོསི; ཏམྤི ནཱམ, བྷིཀྑཝེ, པདྷཱནཾ ནཱཧོསི། ཝིཔྤཊིཔནྣཱཏྠ, བྷིཀྑཝེ, མིཙྪཱཔཊིཔནྣཱཏྠ, བྷིཀྑཝེ། ཀཱིཝ དཱུརེཝིམེ, བྷིཀྑཝེ, མོགྷཔུརིསཱ ཨཔཀྐནྟཱ ཨིམམྷཱ དྷམྨཝིནཡཱ།

    183. ‘‘Nāhaṃ, bhikkhave, ādikeneva aññārādhanaṃ vadāmi; api ca, bhikkhave, anupubbasikkhā anupubbakiriyā anupubbapaṭipadā aññārādhanā hoti. Kathañca, bhikkhave, anupubbasikkhā anupubbakiriyā anupubbapaṭipadā aññārādhanā hoti? Idha, bhikkhave, saddhājāto upasaṅkamati, upasaṅkamanto payirupāsati, payirupāsanto sotaṃ odahati, ohitasoto dhammaṃ suṇāti, sutvā dhammaṃ dhāreti, dhatānaṃ 12 dhammānaṃ atthaṃ upaparikkhati, atthaṃ upaparikkhato dhammā nijjhānaṃ khamanti, dhammanijjhānakkhantiyā sati chando jāyati, chandajāto ussahati, ussāhetvā tuleti, tulayitvā padahati, pahitatto samāno kāyena ceva paramasaccaṃ sacchikaroti, paññāya ca naṃ ativijjha passati. Sāpi nāma, bhikkhave, saddhā nāhosi; tampi nāma, bhikkhave, upasaṅkamanaṃ nāhosi; sāpi nāma, bhikkhave, payirupāsanā nāhosi; tampi nāma, bhikkhave, sotāvadhānaṃ nāhosi ; tampi nāma, bhikkhave, dhammassavanaṃ nāhosi; sāpi nāma, bhikkhave, dhammadhāraṇā nāhosi; sāpi nāma, bhikkhave, atthūpaparikkhā nāhosi; sāpi nāma, bhikkhave, dhammanijjhānakkhanti nāhosi; sopi nāma, bhikkhave, chando nāhosi; sopi nāma, bhikkhave, ussāho nāhosi; sāpi nāma, bhikkhave, tulanā nāhosi; tampi nāma, bhikkhave, padhānaṃ nāhosi. Vippaṭipannāttha, bhikkhave, micchāpaṭipannāttha, bhikkhave. Kīva dūrevime, bhikkhave, moghapurisā apakkantā imamhā dhammavinayā.

    ༡༨༤. ‘‘ཨཏྠི , བྷིཀྑཝེ, ཙཏུཔྤདཾ ཝེཡྻཱཀརཎཾ ཡསྶུདྡིཊྛསྶ ཝིཉྙཱུ པུརིསོ ནཙིརསྶེཝ པཉྙཱཡཏྠཾ ཨཱཛཱནེཡྻ། ཨུདྡིསིསྶཱམི ཝོ 13, བྷིཀྑཝེ, ཨཱཛཱནིསྶཐ མེ ཏ’’ནྟི? ‘‘ཀེ ཙ མཡཾ, བྷནྟེ, ཀེ ཙ དྷམྨསྶ ཨཉྙཱཏཱརོ’’ཏི? ཡོཔི སོ, བྷིཀྑཝེ, སཏྠཱ ཨཱམིསགརུ ཨཱམིསདཱཡཱདོ ཨཱམིསེཧི སཾསཊྛོ ཝིཧརཏི ཏསྶ པཱཡཾ ཨེཝརཱུཔཱི པཎོཔཎཝིཡཱ ན ཨུཔེཏི – ‘ཨེཝཉྩ ནོ ཨསྶ ཨཐ ནཾ ཀརེཡྻཱམ, ན ཙ ནོ ཨེཝམསྶ ན ནཾ ཀརེཡྻཱམཱ’ཏི, ཀིཾ པན, བྷིཀྑཝེ, ཡཾ ཏཐཱགཏོ སབྦསོ ཨཱམིསེཧི ཝིསཾསཊྛོ ཝིཧརཏི། སདྡྷསྶ, བྷིཀྑཝེ, སཱཝཀསྶ སཏྠུསཱསནེ པརིཡོགཱཧིཡ 14 ཝཏྟཏོ ཨཡམནུདྷམྨོ ཧོཏི – ‘སཏྠཱ བྷགཝཱ, སཱཝཀོཧམསྨི; ཛཱནཱཏི བྷགཝཱ, ནཱཧཾ ཛཱནཱམཱི’ཏི། སདྡྷསྶ, བྷིཀྑཝེ, སཱཝཀསྶ སཏྠུསཱསནེ པརིཡོགཱཧིཡ ཝཏྟཏོ རུལ༹ྷནཱིཡཾ 15 སཏྠུསཱསནཾ ཧོཏི ཨོཛཝནྟཾ། སདྡྷསྶ, བྷིཀྑཝེ, སཱཝཀསྶ སཏྠུསཱསནེ པརིཡོགཱཧིཡ ཝཏྟཏོ ཨཡམནུདྷམྨོ ཧོཏི – ‘ཀཱམཾ ཏཙོ ཙ ནྷཱརུ ཙ ཨཊྛི ཙ ཨཝསིསྶཏུ, སརཱིརེ ཨུཔསུསྶཏུ 16 མཾསལོཧིཏཾ, ཡཾ ཏཾ པུརིསཐཱམེན པུརིསཝཱིརིཡེན པུརིསཔརཀྐམེན པཏྟབྦཾ ན ཏཾ ཨཔཱཔུཎིཏྭཱ ཝཱིརིཡསྶ སཎྛཱནཾ 17 བྷཝིསྶཏཱི’ཏི། སདྡྷསྶ, བྷིཀྑཝེ, སཱཝཀསྶ སཏྠུསཱསནེ པརིཡོགཱཧིཡ ཝཏྟཏོ དྭིནྣཾ ཕལཱནཾ ཨཉྙཏརཾ ཕལཾ པཱཊིཀངྑཾ – དིཊྛེཝ དྷམྨེ ཨཉྙཱ, སཏི ཝཱ ཨུཔཱདིསེསེ ཨནཱགཱམིཏཱ’’ཏི།

    184. ‘‘Atthi , bhikkhave, catuppadaṃ veyyākaraṇaṃ yassuddiṭṭhassa viññū puriso nacirasseva paññāyatthaṃ ājāneyya. Uddisissāmi vo 18, bhikkhave, ājānissatha me ta’’nti? ‘‘Ke ca mayaṃ, bhante, ke ca dhammassa aññātāro’’ti? Yopi so, bhikkhave, satthā āmisagaru āmisadāyādo āmisehi saṃsaṭṭho viharati tassa pāyaṃ evarūpī paṇopaṇaviyā na upeti – ‘evañca no assa atha naṃ kareyyāma, na ca no evamassa na naṃ kareyyāmā’ti, kiṃ pana, bhikkhave, yaṃ tathāgato sabbaso āmisehi visaṃsaṭṭho viharati. Saddhassa, bhikkhave, sāvakassa satthusāsane pariyogāhiya 19 vattato ayamanudhammo hoti – ‘satthā bhagavā, sāvakohamasmi; jānāti bhagavā, nāhaṃ jānāmī’ti. Saddhassa, bhikkhave, sāvakassa satthusāsane pariyogāhiya vattato ruḷhanīyaṃ 20 satthusāsanaṃ hoti ojavantaṃ. Saddhassa, bhikkhave, sāvakassa satthusāsane pariyogāhiya vattato ayamanudhammo hoti – ‘kāmaṃ taco ca nhāru ca aṭṭhi ca avasissatu, sarīre upasussatu 21 maṃsalohitaṃ, yaṃ taṃ purisathāmena purisavīriyena purisaparakkamena pattabbaṃ na taṃ apāpuṇitvā vīriyassa saṇṭhānaṃ 22 bhavissatī’ti. Saddhassa, bhikkhave, sāvakassa satthusāsane pariyogāhiya vattato dvinnaṃ phalānaṃ aññataraṃ phalaṃ pāṭikaṅkhaṃ – diṭṭheva dhamme aññā, sati vā upādisese anāgāmitā’’ti.

    ཨིདམཝོཙ བྷགཝཱ། ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི།

    Idamavoca bhagavā. Attamanā te bhikkhū bhagavato bhāsitaṃ abhinandunti.

    ཀཱིཊཱགིརིསུཏྟཾ ནིཊྛིཏཾ དསམཾ།

    Kīṭāgirisuttaṃ niṭṭhitaṃ dasamaṃ.

    བྷིཀྑུཝགྒོ ནིཊྛིཏོ དུཏིཡོ།

    Bhikkhuvaggo niṭṭhito dutiyo.

    ཏསྶུདྡཱནཾ –

    Tassuddānaṃ –

    ཀུཉྫར-རཱཧུལ-སསྶཏལོཀོ, མཱལུཀྱཔུཏྟོ ཙ བྷདྡཱལི-ནཱམོ།

    Kuñjara-rāhula-sassataloko, mālukyaputto ca bhaddāli-nāmo;

    ཁུདྡ-དིཛཱཐ-སཧམྤཏིཡཱཙཾ, ནཱལ༹ཀ-རཉྙིཀིཊཱགིརིནཱམོ༎

    Khudda-dijātha-sahampatiyācaṃ, nāḷaka-raññikiṭāgirināmo.




    Next: ༡. ཏེཝིཛྫཝཙྪསུཏྟཾ • 1. Tevijjavacchasuttaṃ




    Footnotes:
    1. རཏྟིབྷོཛནཾ (ཀ॰)
    2. rattibhojanaṃ (ka.)
    3. ཀིཾ ནུ (ཀ॰)
    4. kiṃ nu (ka.)
    5. ཕསྶིཏྭཱ (སཱི॰ པཱི॰)
    6. phassitvā (sī. pī.)
    7. དིསྭཱ ཨཱསཝཱ ཨཔརིཀྑཱིཎཱ (སཱི॰ པཱི॰)
    8. disvā āsavā aparikkhīṇā (sī. pī.)
    9. དིསྭཱ ཨཱསཝཱ ཨཔརིཀྑཱིཎཱ (སཱི॰ པཱི॰)
    10. disvā āsavā aparikkhīṇā (sī. pī.)
    11. དྷཱཏཱནཾ (ཀ॰)
    12. dhātānaṃ (ka.)
    13. ཨུདྡིཊྛསྶཱཔི (ཀ॰)
    14. པརིཡོགཱཡ (སཱི॰ པཱི॰ ཀ॰), པརིཡོགཡ྄ཧ (སྱཱ॰ ཀཾ॰)
    15. རུམྷནིཡཾ (སཱི॰ པཱི॰)
    16. ཨུཔསུསྶཏུ སརཱིརེ (སཱི॰), སརཱིརེ ཨཝསུསྶཏུ (ཀ॰)
    17. སནྠཱནཾ (སཱི॰ སྱཱ॰ པཱི॰)
    18. uddiṭṭhassāpi (ka.)
    19. pariyogāya (sī. pī. ka.), pariyogayha (syā. kaṃ.)
    20. rumhaniyaṃ (sī. pī.)
    21. upasussatu sarīre (sī.), sarīre avasussatu (ka.)
    22. santhānaṃ (sī. syā. pī.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༡༠. ཀཱིཊཱགིརིསུཏྟཝཎྞནཱ • 10. Kīṭāgirisuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༡༠. ཀཱིཊཱགིརིསུཏྟཝཎྞནཱ • 10. Kīṭāgirisuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact