Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya

    ১১. কোধনসুত্তং

    11. Kodhanasuttaṃ

    ৬৪. ‘‘সত্তিমে , ভিক্খৰে, ধম্মা সপত্তকন্তা সপত্তকরণা কোধনং আগচ্ছন্তি ইত্থিং ৰা পুরিসং ৰা। কতমে সত্ত? ইধ, ভিক্খৰে, সপত্তো সপত্তস্স এৰং ইচ্ছতি – ‘অহো ৰতাযং দুব্বণ্ণো অস্সা’তি! তং কিস্স হেতু? ন, ভিক্খৰে, সপত্তো সপত্তস্স ৰণ্ণৰতায নন্দতি। কোধনোযং 1, ভিক্খৰে, পুরিসপুগ্গলো কোধাভিভূতো কোধপরেতো, কিঞ্চাপি সো হোতি সুন্হাতো সুৰিলিত্তো কপ্পিতকেসমস্সু ওদাতৰত্থৰসনো 2; অথ খো সো দুব্বণ্ণোৰ হোতি কোধাভিভূতো। অযং, ভিক্খৰে, পঠমো ধম্মো সপত্তকন্তো সপত্তকরণো কোধনং আগচ্ছতি ইত্থিং ৰা পুরিসং ৰা।

    64. ‘‘Sattime , bhikkhave, dhammā sapattakantā sapattakaraṇā kodhanaṃ āgacchanti itthiṃ vā purisaṃ vā. Katame satta? Idha, bhikkhave, sapatto sapattassa evaṃ icchati – ‘aho vatāyaṃ dubbaṇṇo assā’ti! Taṃ kissa hetu? Na, bhikkhave, sapatto sapattassa vaṇṇavatāya nandati. Kodhanoyaṃ 3, bhikkhave, purisapuggalo kodhābhibhūto kodhapareto, kiñcāpi so hoti sunhāto suvilitto kappitakesamassu odātavatthavasano 4; atha kho so dubbaṇṇova hoti kodhābhibhūto. Ayaṃ, bhikkhave, paṭhamo dhammo sapattakanto sapattakaraṇo kodhanaṃ āgacchati itthiṃ vā purisaṃ vā.

    ‘‘পুন চপরং, ভিক্খৰে, সপত্তো সপত্তস্স এৰং ইচ্ছতি – ‘অহো ৰতাযং দুক্খং সযেয্যা’তি! তং কিস্স হেতু? ন, ভিক্খৰে, সপত্তো সপত্তস্স সুখসেয্যায নন্দতি। কোধনোযং, ভিক্খৰে, পুরিসপুগ্গলো কোধাভিভূতো কোধপরেতো, কিঞ্চাপি সো পল্লঙ্কে সেতি গোনকত্থতে পটলিকত্থতে কদলিমিগপৰরপচ্চত্থরণে সউত্তরচ্ছদে উভতোলোহিতকূপধানে; অথ খো সো দুক্খঞ্ঞেৰ সেতি কোধাভিভূতো। অযং, ভিক্খৰে, দুতিযো ধম্মো সপত্তকন্তো সপত্তকরণো কোধনং আগচ্ছতি ইত্থিং ৰা পুরিসং ৰা।

    ‘‘Puna caparaṃ, bhikkhave, sapatto sapattassa evaṃ icchati – ‘aho vatāyaṃ dukkhaṃ sayeyyā’ti! Taṃ kissa hetu? Na, bhikkhave, sapatto sapattassa sukhaseyyāya nandati. Kodhanoyaṃ, bhikkhave, purisapuggalo kodhābhibhūto kodhapareto, kiñcāpi so pallaṅke seti gonakatthate paṭalikatthate kadalimigapavarapaccattharaṇe sauttaracchade ubhatolohitakūpadhāne; atha kho so dukkhaññeva seti kodhābhibhūto. Ayaṃ, bhikkhave, dutiyo dhammo sapattakanto sapattakaraṇo kodhanaṃ āgacchati itthiṃ vā purisaṃ vā.

    ‘‘পুন চপরং, ভিক্খৰে, সপত্তো সপত্তস্স এৰং ইচ্ছতি – ‘অহো ৰতাযং ন পচুরত্থো অস্সা’তি! তং কিস্স হেতু? ন, ভিক্খৰে, সপত্তো সপত্তস্স পচুরত্থতায নন্দতি । কোধনোযং , ভিক্খৰে, পুরিসপুগ্গলো কোধাভিভূতো কোধপরেতো, অনত্থম্পি গহেত্ৰা ‘অত্থো মে গহিতো’তি মঞ্ঞতি , অত্থম্পি গহেত্ৰা ‘অনত্থো মে গহিতো’তি মঞ্ঞতি। তস্সিমে ধম্মা অঞ্ঞমঞ্ঞং ৰিপচ্চনীকা গহিতা দীঘরত্তং অহিতায দুক্খায সংৰত্তন্তি কোধাভিভূতস্স। অযং, ভিক্খৰে, ততিযো ধম্মো সপত্তকন্তো সপত্তকরণো কোধনং আগচ্ছতি ইত্থিং ৰা পুরিসং ৰা।

    ‘‘Puna caparaṃ, bhikkhave, sapatto sapattassa evaṃ icchati – ‘aho vatāyaṃ na pacurattho assā’ti! Taṃ kissa hetu? Na, bhikkhave, sapatto sapattassa pacuratthatāya nandati . Kodhanoyaṃ , bhikkhave, purisapuggalo kodhābhibhūto kodhapareto, anatthampi gahetvā ‘attho me gahito’ti maññati , atthampi gahetvā ‘anattho me gahito’ti maññati. Tassime dhammā aññamaññaṃ vipaccanīkā gahitā dīgharattaṃ ahitāya dukkhāya saṃvattanti kodhābhibhūtassa. Ayaṃ, bhikkhave, tatiyo dhammo sapattakanto sapattakaraṇo kodhanaṃ āgacchati itthiṃ vā purisaṃ vā.

    ‘‘পুন চপরং, ভিক্খৰে, সপত্তো সপত্তস্স এৰং ইচ্ছতি – ‘অহো ৰতাযং ন ভোগৰা অস্সা’তি! তং কিস্স হেতু? ন, ভিক্খৰে, সপত্তো সপত্তস্স ভোগৰতায নন্দতি। কোধনস্স, ভিক্খৰে, পুরিসপুগ্গলস্স কোধাভিভূতস্স কোধপরেতস্স, যেপিস্স তে হোন্তি ভোগা উট্ঠানৰীরিযাধিগতা বাহাবলপরিচিতা সেদাৰক্খিত্তা ধম্মিকা ধম্মলদ্ধা, তেপি রাজানো রাজকোসং পৰেসেন্তি কোধাভিভূতস্স। অযং, ভিক্খৰে, চতুত্থো ধম্মো সপত্তকন্তো সপত্তকরণো কোধনং আগচ্ছতি ইত্থিং ৰা পুরিসং ৰা।

    ‘‘Puna caparaṃ, bhikkhave, sapatto sapattassa evaṃ icchati – ‘aho vatāyaṃ na bhogavā assā’ti! Taṃ kissa hetu? Na, bhikkhave, sapatto sapattassa bhogavatāya nandati. Kodhanassa, bhikkhave, purisapuggalassa kodhābhibhūtassa kodhaparetassa, yepissa te honti bhogā uṭṭhānavīriyādhigatā bāhābalaparicitā sedāvakkhittā dhammikā dhammaladdhā, tepi rājāno rājakosaṃ pavesenti kodhābhibhūtassa. Ayaṃ, bhikkhave, catuttho dhammo sapattakanto sapattakaraṇo kodhanaṃ āgacchati itthiṃ vā purisaṃ vā.

    ‘‘পুন চপরং, ভিক্খৰে, সপত্তো সপত্তস্স এৰং ইচ্ছতি – ‘অহো ৰতাযং ন যসৰা অস্সা’তি! তং কিস্স হেতু? ন, ভিক্খৰে, সপত্তো সপত্তস্স যসৰতায নন্দতি। কোধনোযং, ভিক্খৰে, পুরিসপুগ্গলো কোধাভিভূতো কোধপরেতো, যোপিস্স সো হোতি যসো অপ্পমাদাধিগতো, তম্হাপি ধংসতি কোধাভিভূতো। অযং, ভিক্খৰে, পঞ্চমো ধম্মো সপত্তকন্তো সপত্তকরণো কোধনং আগচ্ছতি ইত্থিং ৰা পুরিসং ৰা।

    ‘‘Puna caparaṃ, bhikkhave, sapatto sapattassa evaṃ icchati – ‘aho vatāyaṃ na yasavā assā’ti! Taṃ kissa hetu? Na, bhikkhave, sapatto sapattassa yasavatāya nandati. Kodhanoyaṃ, bhikkhave, purisapuggalo kodhābhibhūto kodhapareto, yopissa so hoti yaso appamādādhigato, tamhāpi dhaṃsati kodhābhibhūto. Ayaṃ, bhikkhave, pañcamo dhammo sapattakanto sapattakaraṇo kodhanaṃ āgacchati itthiṃ vā purisaṃ vā.

    ‘‘পুন চপরং, ভিক্খৰে, সপত্তো সপত্তস্স এৰং ইচ্ছতি – ‘অহো ৰতাযং ন মিত্তৰা অস্সা’তি! তং কিস্স হেতু? ন, ভিক্খৰে, সপত্তো সপত্তস্স মিত্তৰতায নন্দতি। কোধনং, ভিক্খৰে, পুরিসপুগ্গলং কোধাভিভূতং কোধপরেতং, যেপিস্স তে হোন্তি মিত্তামচ্চা ঞাতিসালোহিতা, তেপি আরকা পরিৰজ্জন্তি কোধাভিভূতং। অযং, ভিক্খৰে, ছট্ঠো ধম্মো সপত্তকন্তো সপত্তকরণো কোধনং আগচ্ছতি ইত্থিং ৰা পুরিসং ৰা।

    ‘‘Puna caparaṃ, bhikkhave, sapatto sapattassa evaṃ icchati – ‘aho vatāyaṃ na mittavā assā’ti! Taṃ kissa hetu? Na, bhikkhave, sapatto sapattassa mittavatāya nandati. Kodhanaṃ, bhikkhave, purisapuggalaṃ kodhābhibhūtaṃ kodhaparetaṃ, yepissa te honti mittāmaccā ñātisālohitā, tepi ārakā parivajjanti kodhābhibhūtaṃ. Ayaṃ, bhikkhave, chaṭṭho dhammo sapattakanto sapattakaraṇo kodhanaṃ āgacchati itthiṃ vā purisaṃ vā.

    ‘‘পুন চপরং, ভিক্খৰে, সপত্তো সপত্তস্স এৰং ইচ্ছতি – ‘অহো ৰতাযং কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্যা’তি! তং কিস্স হেতু? ন, ভিক্খৰে, সপত্তো সপত্তস্স সুগতিগমনে নন্দতি। কোধনোযং, ভিক্খৰে, পুরিসপুগ্গলো কোধাভিভূতো কোধপরেতো কাযেন দুচ্চরিতং চরতি, ৰাচায দুচ্চরিতং চরতি, মনসা দুচ্চরিতং চরতি। সো কাযেন দুচ্চরিতং চরিত্ৰা ৰাচায…পে॰… কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জতি কোধাভিভূতো। অযং, ভিক্খৰে, সত্তমো ধম্মো সপত্তকন্তো সপত্তকরণো কোধনং আগচ্ছতি ইত্থিং ৰা পুরিসং ৰা। ইমে খো, ভিক্খৰে, সত্ত ধম্মা সপত্তকন্তা সপত্তকরণা কোধনং আগচ্ছন্তি ইত্থিং ৰা পুরিসং ৰা’’তি।

    ‘‘Puna caparaṃ, bhikkhave, sapatto sapattassa evaṃ icchati – ‘aho vatāyaṃ kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjeyyā’ti! Taṃ kissa hetu? Na, bhikkhave, sapatto sapattassa sugatigamane nandati. Kodhanoyaṃ, bhikkhave, purisapuggalo kodhābhibhūto kodhapareto kāyena duccaritaṃ carati, vācāya duccaritaṃ carati, manasā duccaritaṃ carati. So kāyena duccaritaṃ caritvā vācāya…pe… kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati kodhābhibhūto. Ayaṃ, bhikkhave, sattamo dhammo sapattakanto sapattakaraṇo kodhanaṃ āgacchati itthiṃ vā purisaṃ vā. Ime kho, bhikkhave, satta dhammā sapattakantā sapattakaraṇā kodhanaṃ āgacchanti itthiṃ vā purisaṃ vā’’ti.

    ‘‘কোধনো দুব্বণ্ণো হোতি, অথো দুক্খম্পি সেতি সো।

    ‘‘Kodhano dubbaṇṇo hoti, atho dukkhampi seti so;

    অথো অত্থং গহেত্ৰান, অনত্থং অধিপজ্জতি 5॥

    Atho atthaṃ gahetvāna, anatthaṃ adhipajjati 6.

    ‘‘ততো কাযেন ৰাচায, ৰধং কত্ৰান কোধনো।

    ‘‘Tato kāyena vācāya, vadhaṃ katvāna kodhano;

    কোধাভিভূতো পুরিসো, ধনজানিং নিগচ্ছতি॥

    Kodhābhibhūto puriso, dhanajāniṃ nigacchati.

    ‘‘কোধসম্মদসম্মত্তো , আযসক্যং 7 নিগচ্ছতি।

    ‘‘Kodhasammadasammatto , āyasakyaṃ 8 nigacchati;

    ঞাতিমিত্তা সুহজ্জা চ, পরিৰজ্জন্তি কোধনং॥

    Ñātimittā suhajjā ca, parivajjanti kodhanaṃ.

    9 ‘‘অনত্থজননো কোধো, কোধো চিত্তপ্পকোপনো।

    10 ‘‘Anatthajanano kodho, kodho cittappakopano;

    ভযমন্তরতো জাতং, তং জনো নাৰবুজ্ঝতি॥

    Bhayamantarato jātaṃ, taṃ jano nāvabujjhati.

    ‘‘কুদ্ধো অত্থং ন জানাতি, কুদ্ধো ধম্মং ন পস্সতি।

    ‘‘Kuddho atthaṃ na jānāti, kuddho dhammaṃ na passati;

    অন্ধতমং তদা হোতি, যং কোধো সহতে নরং॥

    Andhatamaṃ tadā hoti, yaṃ kodho sahate naraṃ.

    ‘‘যং কুদ্ধো উপরোধেতি, সুকরং ৰিয দুক্করং।

    ‘‘Yaṃ kuddho uparodheti, sukaraṃ viya dukkaraṃ;

    পচ্ছা সো ৰিগতে কোধে, অগ্গিদড্ঢোৰ তপ্পতি॥

    Pacchā so vigate kodhe, aggidaḍḍhova tappati.

    ‘‘দুম্মঙ্কুযং পদস্সেতি 11, ধূমং ধূমীৰ পাৰকো।

    ‘‘Dummaṅkuyaṃ padasseti 12, dhūmaṃ dhūmīva pāvako;

    যতো পতাযতি কোধো, যেন কুজ্ঝন্তি মানৰা॥

    Yato patāyati kodho, yena kujjhanti mānavā.

    ‘‘নাস্স হিরী ন ওত্তপ্পং 13, ন ৰাচো হোতি গারৰো।

    ‘‘Nāssa hirī na ottappaṃ 14, na vāco hoti gāravo;

    কোধেন অভিভূতস্স, ন দীপং হোতি কিঞ্চনং॥

    Kodhena abhibhūtassa, na dīpaṃ hoti kiñcanaṃ.

    ‘‘তপনীযানি কম্মানি, যানি ধম্মেহি আরকা।

    ‘‘Tapanīyāni kammāni, yāni dhammehi ārakā;

    তানি আরোচযিস্সামি, তং সুণাথ যথা তথং॥

    Tāni ārocayissāmi, taṃ suṇātha yathā tathaṃ.

    ‘‘কুদ্ধো হি পিতরং হন্তি, হন্তি কুদ্ধো সমাতরং।

    ‘‘Kuddho hi pitaraṃ hanti, hanti kuddho samātaraṃ;

    কুদ্ধো হি ব্রাহ্মণং হন্তি, হন্তি কুদ্ধো পুথুজ্জনং॥

    Kuddho hi brāhmaṇaṃ hanti, hanti kuddho puthujjanaṃ.

    ‘‘যায মাতু ভতো পোসো, ইমং লোকং অৰেক্খতি।

    ‘‘Yāya mātu bhato poso, imaṃ lokaṃ avekkhati;

    তম্পি পাণদদিং সন্তিং, হন্তি কুদ্ধো পুথুজ্জনো॥

    Tampi pāṇadadiṃ santiṃ, hanti kuddho puthujjano.

    ‘‘অত্তূপমা হি তে সত্তা, অত্তা হি পরমো 15 পিযো।

    ‘‘Attūpamā hi te sattā, attā hi paramo 16 piyo;

    হন্তি কুদ্ধো পুথুত্তানং, নানারূপেসু মুচ্ছিতো॥

    Hanti kuddho puthuttānaṃ, nānārūpesu mucchito.

    ‘‘অসিনা হন্তি অত্তানং, ৰিসং খাদন্তি মুচ্ছিতা।

    ‘‘Asinā hanti attānaṃ, visaṃ khādanti mucchitā;

    রজ্জুযা বজ্ঝ মীযন্তি, পব্বতামপি কন্দরে॥

    Rajjuyā bajjha mīyanti, pabbatāmapi kandare.

    ‘‘ভূনহচ্চানি 17 কম্মানি, অত্তমারণিযানি চ।

    ‘‘Bhūnahaccāni 18 kammāni, attamāraṇiyāni ca;

    করোন্তা নাৰবুজ্ঝন্তি 19, কোধজাতো পরাভৰো॥

    Karontā nāvabujjhanti 20, kodhajāto parābhavo.

    ‘‘ইতাযং কোধরূপেন, মচ্চুপাসো গুহাসযো।

    ‘‘Itāyaṃ kodharūpena, maccupāso guhāsayo;

    তং দমেন সমুচ্ছিন্দে, পঞ্ঞাৰীরিযেন দিট্ঠিযা॥

    Taṃ damena samucchinde, paññāvīriyena diṭṭhiyā.

    ‘‘যথা মেতং 21 অকুসলং, সমুচ্ছিন্দেথ পণ্ডিতো।

    ‘‘Yathā metaṃ 22 akusalaṃ, samucchindetha paṇḍito;

    তথেৰ ধম্মে সিক্খেথ, মা নো দুম্মঙ্কুযং অহু॥

    Tatheva dhamme sikkhetha, mā no dummaṅkuyaṃ ahu.

    ‘‘ৰীতকোধা অনাযাসা, ৰীতলোভা অনুস্সুকা 23।

    ‘‘Vītakodhā anāyāsā, vītalobhā anussukā 24;

    দন্তা কোধং পহন্ত্ৰান, পরিনিব্বন্তি অনাসৰা’’তি 25॥ একাদসমং।

    Dantā kodhaṃ pahantvāna, parinibbanti anāsavā’’ti 26. ekādasamaṃ;

    অব্যাকতৰগ্গো ছট্ঠো।

    Abyākatavaggo chaṭṭho.

    তস্সুদ্দানং –

    Tassuddānaṃ –

    অব্যাকতো পুরিসগতি, তিস্স সীহ অরক্খিযং।

    Abyākato purisagati, tissa sīha arakkhiyaṃ;

    কিমিলং সত্ত পচলা, মেত্তা ভরিযা কোধেকাদসাতি॥

    Kimilaṃ satta pacalā, mettā bhariyā kodhekādasāti.




    Next: ৭. মহাৰগ্গো • 7. Mahāvaggo




    Footnotes:
    1. কোধনাযং (ক॰)
    2. ওদাতৰসনো (ক॰)
    3. kodhanāyaṃ (ka.)
    4. odātavasano (ka.)
    5. অধিগচ্ছতি (সী॰), পটিপজ্জতি (স্যা॰)
    6. adhigacchati (sī.), paṭipajjati (syā.)
    7. আযসক্খং (স্যা॰)
    8. āyasakkhaṃ (syā.)
    9. ইতিৰু॰ ৮৮ ইতিৰুত্তকেপি
    10. itivu. 88 itivuttakepi
    11. সদস্সেতি (সী॰), পঠমং দস্সেতি (স্যা॰)
    12. sadasseti (sī.), paṭhamaṃ dasseti (syā.)
    13. ন অস্স হিরী ওত্তপ্পঞ্চ (ক॰)
    14. na assa hirī ottappañca (ka.)
    15. পরমং (সী॰ স্যা॰)
    16. paramaṃ (sī. syā.)
    17. ভূতহচ্চানি (সী॰ স্যা॰)
    18. bhūtahaccāni (sī. syā.)
    19. করোন্তো নাৰবুজ্ঝতি (ক॰)
    20. karonto nāvabujjhati (ka.)
    21. একমেতং (স্যা॰), একমেতং (সী॰)
    22. ekametaṃ (syā.), ekametaṃ (sī.)
    23. অনিস্সুকা (সী॰ স্যা॰) তদট্ঠকথাসু পন ‘‘অনুস্সুকা’’ ত্ৰেৰ দিস্সতি
    24. anissukā (sī. syā.) tadaṭṭhakathāsu pana ‘‘anussukā’’ tveva dissati
    25. পরিনিব্বিস্সথনাসৰাতি (স্যা॰), পরিনিব্বিংসু অনাসৰাতি (ক॰)
    26. parinibbissathanāsavāti (syā.), parinibbiṃsu anāsavāti (ka.)



    Related texts:



    অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১১. কোধনসুত্তৰণ্ণনা • 11. Kodhanasuttavaṇṇanā

    টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১১. কোধনসুত্তৰণ্ণনা • 11. Kodhanasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact