| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
11. கோத⁴னஸுத்தவண்ணனா
11. Kodhanasuttavaṇṇanā
64. ஏகாத³ஸமே ஸபத்தகந்தாதி ஸபத்தானங் வேரீனங் கந்தா பியா தேஹி இச்சி²தபத்தி²தா. ஸபத்தகரணாதி ஸபத்தானங் வேரீனங் அத்த²கரணா. கோத⁴பரேதோதி கோதா⁴னுக³தோ. பசுரத்த²தாயாதி ப³ஹுஅத்த²தாய ப³ஹுஹிததாய. அனத்த²ம்பீதி அவுத்³தி⁴ம்பி. அத்தோ² மே க³ஹிதோதி வுட்³டி⁴ மே க³ஹிதா.
64. Ekādasame sapattakantāti sapattānaṃ verīnaṃ kantā piyā tehi icchitapatthitā. Sapattakaraṇāti sapattānaṃ verīnaṃ atthakaraṇā. Kodhaparetoti kodhānugato. Pacuratthatāyāti bahuatthatāya bahuhitatāya. Anatthampīti avuddhimpi. Attho me gahitoti vuḍḍhi me gahitā.
அதோ² அத்த²ங் க³ஹெத்வானாதி அதோ² வுத்³தி⁴ங் க³ஹெத்வா. அனத்த²ங் அதி⁴பஜ்ஜதீதி அனத்தோ² மே க³ஹிதோதி ஸல்லக்கே²தி. வத⁴ங் கத்வானாதி பாணாதிபாதகம்மங் கத்வா. கோத⁴ஸம்மத³ஸம்மத்தோதி கோத⁴மதே³ன மத்தோ, ஆதி³ன்னக³ஹிதபராமட்டோ²தி அத்தோ². ஆயஸக்யந்தி அயஸபா⁴வங், அயஸோ நியஸோ ஹோதீதி அத்தோ². அந்தரதோ ஜாதந்தி அப்³ப⁴ந்தரே உப்பன்னங். அத்த²ங் ந ஜானாதீதி வுத்³தி⁴அத்த²ங் ந ஜானாதி. த⁴ம்மங் ந பஸ்ஸதீதி ஸமத²விபஸ்ஸனாத⁴ம்மங் ந பஸ்ஸதி. அந்த⁴தமந்தி அந்த⁴பா⁴வகரங் தமங் ப³ஹலதமங். ஸஹதேதி அபி⁴ப⁴வதி.
Atho atthaṃ gahetvānāti atho vuddhiṃ gahetvā. Anatthaṃ adhipajjatīti anattho me gahitoti sallakkheti. Vadhaṃ katvānāti pāṇātipātakammaṃ katvā. Kodhasammadasammattoti kodhamadena matto, ādinnagahitaparāmaṭṭhoti attho. Āyasakyanti ayasabhāvaṃ, ayaso niyaso hotīti attho. Antarato jātanti abbhantare uppannaṃ. Atthaṃ na jānātīti vuddhiatthaṃ na jānāti. Dhammaṃ na passatīti samathavipassanādhammaṃ na passati. Andhatamanti andhabhāvakaraṃ tamaṃ bahalatamaṃ. Sahateti abhibhavati.
து³ம்மங்குயந்தி து³ம்மங்குபா⁴வங் நித்தேஜதங் து³ப்³ப³ண்ணமுக²தங். யதோ பதாயதீதி யதா³ நிப்³ப³த்ததி. ந வாசோ ஹோதி கா³ரவோதி வசனஸ்ஸபி க³ருபா⁴வோ ந ஹோதி. ந தீ³பங் ஹோதி கிஞ்சனந்தி காசி பதிட்டா² நாம ந ஹோதி. தபனீயானீதி தாபஜனகானி. த⁴ம்மேஹீதி ஸமத²விபஸ்ஸனாத⁴ம்மேஹி. ஆரகாதி தூ³ரே. ப்³ராஹ்மணந்தி கீ²ணாஸவப்³ராஹ்மணங். யாய மாது ப⁴தோதி யாய மாதரா ப⁴தோ போஸிதோ. பாணத³தி³ங் ஸந்திந்தி ஜீவிததா³யிகங் ஸமானங். ஹந்தி குத்³தோ⁴ புது²த்தானந்தி குத்³தோ⁴ புக்³க³லோ புது² நானாகாரணேஹி அத்தானங் ஹந்தி. நானாரூபேஸு முச்சி²தோதி நானாரம்மணேஸு அதி⁴முச்சி²தோ ஹுத்வா. ரஜ்ஜுயா ப³ஜ்ஜ² மீயந்தீதி ரஜ்ஜுயா ப³ந்தி⁴த்வா மரந்தி. பப்³ப³தாமபி கந்த³ரேதி பப்³ப³தகந்த³ரேபி பதித்வா மரந்தி.
Dummaṅkuyanti dummaṅkubhāvaṃ nittejataṃ dubbaṇṇamukhataṃ. Yato patāyatīti yadā nibbattati. Na vāco hoti gāravoti vacanassapi garubhāvo na hoti. Na dīpaṃ hoti kiñcananti kāci patiṭṭhā nāma na hoti. Tapanīyānīti tāpajanakāni. Dhammehīti samathavipassanādhammehi. Ārakāti dūre. Brāhmaṇanti khīṇāsavabrāhmaṇaṃ. Yāya mātu bhatoti yāya mātarā bhato posito. Pāṇadadiṃ santinti jīvitadāyikaṃ samānaṃ. Hanti kuddho puthuttānanti kuddho puggalo puthu nānākāraṇehi attānaṃ hanti. Nānārūpesu mucchitoti nānārammaṇesu adhimucchito hutvā. Rajjuyā bajjha mīyantīti rajjuyā bandhitvā maranti. Pabbatāmapi kandareti pabbatakandarepi patitvā maranti.
பூ⁴னஹச்சானீதி ஹதவுத்³தீ⁴னி. இதாயந்தி இதி அயங். தங் த³மேன ஸமுச்சி²ந்தே³தி தங் கோத⁴ங் த³மேன சி²ந்தெ³ய்ய. கதரேன த³மேனாதி? பஞ்ஞாவீரியேன தி³ட்டி²யாதி விபஸ்ஸனாபஞ்ஞாய சேவ விபஸ்ஸனாஸம்பயுத்தேன காயிகசேதஸிகவீரியேன ச மக்³க³ஸம்மாதி³ட்டி²யா ச. ததே²வ த⁴ம்மே ஸிக்கே²தா²தி யதா² அகுஸலங் ஸமுச்சி²ந்தெ³ய்ய, ஸமத²விபஸ்ஸனாத⁴ம்மேபி ததே²வ ஸிக்கெ²ய்ய. மா நோ து³ம்மங்குயங் அஹூதி மா அம்ஹாகங் து³ம்மங்குபா⁴வோ அஹோஸீதி இமமத்த²ங் பத்த²யமானா. அனாயாஸாதி அனுபாயாஸா. அனுஸ்ஸுகாதி கத்த²சி உஸ்ஸுக்கங் அனாபன்னா. ஸேஸங் ஸப்³ப³த்த² உத்தானமேவாதி.
Bhūnahaccānīti hatavuddhīni. Itāyanti iti ayaṃ. Taṃ damena samucchindeti taṃ kodhaṃ damena chindeyya. Katarena damenāti? Paññāvīriyena diṭṭhiyāti vipassanāpaññāya ceva vipassanāsampayuttena kāyikacetasikavīriyena ca maggasammādiṭṭhiyā ca. Tatheva dhamme sikkhethāti yathā akusalaṃ samucchindeyya, samathavipassanādhammepi tatheva sikkheyya. Mā no dummaṅkuyaṃ ahūti mā amhākaṃ dummaṅkubhāvo ahosīti imamatthaṃ patthayamānā. Anāyāsāti anupāyāsā. Anussukāti katthaci ussukkaṃ anāpannā. Sesaṃ sabbattha uttānamevāti.
அப்³யாகதவக்³கோ³ ச²ட்டோ².
Abyākatavaggo chaṭṭho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 11. கோத⁴னஸுத்தங் • 11. Kodhanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 11. கோத⁴னஸுத்தவண்ணனா • 11. Kodhanasuttavaṇṇanā
