| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১১. কোধনসুত্তৰণ্ণনা
11. Kodhanasuttavaṇṇanā
৬৪. একাদসমে সপত্তকন্তাতি সপত্তানং ৰেরীনং কন্তা পিযা তেহি ইচ্ছিতপত্থিতা। সপত্তকরণাতি সপত্তানং ৰেরীনং অত্থকরণা। কোধপরেতোতি কোধানুগতো। পচুরত্থতাযাতি বহুঅত্থতায বহুহিততায। অনত্থম্পীতি অৰুদ্ধিম্পি। অত্থো মে গহিতোতি ৰুড্ঢি মে গহিতা।
64. Ekādasame sapattakantāti sapattānaṃ verīnaṃ kantā piyā tehi icchitapatthitā. Sapattakaraṇāti sapattānaṃ verīnaṃ atthakaraṇā. Kodhaparetoti kodhānugato. Pacuratthatāyāti bahuatthatāya bahuhitatāya. Anatthampīti avuddhimpi. Attho me gahitoti vuḍḍhi me gahitā.
অথো অত্থং গহেত্ৰানাতি অথো ৰুদ্ধিং গহেত্ৰা। অনত্থং অধিপজ্জতীতি অনত্থো মে গহিতোতি সল্লক্খেতি। ৰধং কত্ৰানাতি পাণাতিপাতকম্মং কত্ৰা। কোধসম্মদসম্মত্তোতি কোধমদেন মত্তো, আদিন্নগহিতপরামট্ঠোতি অত্থো। আযসক্যন্তি অযসভাৰং, অযসো নিযসো হোতীতি অত্থো। অন্তরতো জাতন্তি অব্ভন্তরে উপ্পন্নং। অত্থং ন জানাতীতি ৰুদ্ধিঅত্থং ন জানাতি। ধম্মং ন পস্সতীতি সমথৰিপস্সনাধম্মং ন পস্সতি। অন্ধতমন্তি অন্ধভাৰকরং তমং বহলতমং। সহতেতি অভিভৰতি।
Atho atthaṃ gahetvānāti atho vuddhiṃ gahetvā. Anatthaṃ adhipajjatīti anattho me gahitoti sallakkheti. Vadhaṃ katvānāti pāṇātipātakammaṃ katvā. Kodhasammadasammattoti kodhamadena matto, ādinnagahitaparāmaṭṭhoti attho. Āyasakyanti ayasabhāvaṃ, ayaso niyaso hotīti attho. Antarato jātanti abbhantare uppannaṃ. Atthaṃ na jānātīti vuddhiatthaṃ na jānāti. Dhammaṃ na passatīti samathavipassanādhammaṃ na passati. Andhatamanti andhabhāvakaraṃ tamaṃ bahalatamaṃ. Sahateti abhibhavati.
দুম্মঙ্কুযন্তি দুম্মঙ্কুভাৰং নিত্তেজতং দুব্বণ্ণমুখতং। যতো পতাযতীতি যদা নিব্বত্ততি। ন ৰাচো হোতি গারৰোতি ৰচনস্সপি গরুভাৰো ন হোতি। ন দীপং হোতি কিঞ্চনন্তি কাচি পতিট্ঠা নাম ন হোতি। তপনীযানীতি তাপজনকানি। ধম্মেহীতি সমথৰিপস্সনাধম্মেহি। আরকাতি দূরে। ব্রাহ্মণন্তি খীণাসৰব্রাহ্মণং। যায মাতু ভতোতি যায মাতরা ভতো পোসিতো। পাণদদিং সন্তিন্তি জীৰিতদাযিকং সমানং। হন্তি কুদ্ধো পুথুত্তানন্তি কুদ্ধো পুগ্গলো পুথু নানাকারণেহি অত্তানং হন্তি। নানারূপেসু মুচ্ছিতোতি নানারম্মণেসু অধিমুচ্ছিতো হুত্ৰা। রজ্জুযা বজ্ঝ মীযন্তীতি রজ্জুযা বন্ধিত্ৰা মরন্তি। পব্বতামপি কন্দরেতি পব্বতকন্দরেপি পতিত্ৰা মরন্তি।
Dummaṅkuyanti dummaṅkubhāvaṃ nittejataṃ dubbaṇṇamukhataṃ. Yato patāyatīti yadā nibbattati. Na vāco hoti gāravoti vacanassapi garubhāvo na hoti. Na dīpaṃ hoti kiñcananti kāci patiṭṭhā nāma na hoti. Tapanīyānīti tāpajanakāni. Dhammehīti samathavipassanādhammehi. Ārakāti dūre. Brāhmaṇanti khīṇāsavabrāhmaṇaṃ. Yāya mātu bhatoti yāya mātarā bhato posito. Pāṇadadiṃ santinti jīvitadāyikaṃ samānaṃ. Hanti kuddho puthuttānanti kuddho puggalo puthu nānākāraṇehi attānaṃ hanti. Nānārūpesu mucchitoti nānārammaṇesu adhimucchito hutvā. Rajjuyā bajjha mīyantīti rajjuyā bandhitvā maranti. Pabbatāmapi kandareti pabbatakandarepi patitvā maranti.
ভূনহচ্চানীতি হতৰুদ্ধীনি। ইতাযন্তি ইতি অযং। তং দমেন সমুচ্ছিন্দেতি তং কোধং দমেন ছিন্দেয্য। কতরেন দমেনাতি? পঞ্ঞাৰীরিযেন দিট্ঠিযাতি ৰিপস্সনাপঞ্ঞায চেৰ ৰিপস্সনাসম্পযুত্তেন কাযিকচেতসিকৰীরিযেন চ মগ্গসম্মাদিট্ঠিযা চ। তথেৰ ধম্মে সিক্খেথাতি যথা অকুসলং সমুচ্ছিন্দেয্য, সমথৰিপস্সনাধম্মেপি তথেৰ সিক্খেয্য। মা নো দুম্মঙ্কুযং অহূতি মা অম্হাকং দুম্মঙ্কুভাৰো অহোসীতি ইমমত্থং পত্থযমানা। অনাযাসাতি অনুপাযাসা। অনুস্সুকাতি কত্থচি উস্সুক্কং অনাপন্না। সেসং সব্বত্থ উত্তানমেৰাতি।
Bhūnahaccānīti hatavuddhīni. Itāyanti iti ayaṃ. Taṃ damena samucchindeti taṃ kodhaṃ damena chindeyya. Katarena damenāti? Paññāvīriyena diṭṭhiyāti vipassanāpaññāya ceva vipassanāsampayuttena kāyikacetasikavīriyena ca maggasammādiṭṭhiyā ca. Tatheva dhamme sikkhethāti yathā akusalaṃ samucchindeyya, samathavipassanādhammepi tatheva sikkheyya. Mā no dummaṅkuyaṃ ahūti mā amhākaṃ dummaṅkubhāvo ahosīti imamatthaṃ patthayamānā. Anāyāsāti anupāyāsā. Anussukāti katthaci ussukkaṃ anāpannā. Sesaṃ sabbattha uttānamevāti.
অব্যাকতৰগ্গো ছট্ঠো।
Abyākatavaggo chaṭṭho.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১১. কোধনসুত্তং • 11. Kodhanasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১১. কোধনসুত্তৰণ্ণনা • 11. Kodhanasuttavaṇṇanā
