| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
1. கோத⁴பெய்யாலங்
1. Kodhapeyyālaṃ
181. இதோ பரேஸு கோத⁴வக்³கா³தீ³ஸு உபனந்த⁴னலக்க²ணோதி குஜ்ஜ²னவஸேன ‘‘அக்கொச்சி² மங் அவதி⁴ ம’’ந்திஆதி³னா (த⁴॰ ப॰ 3, 4) சித்தபரியோனந்த⁴னலக்க²ணோ. புப்³ப³காலிகங் கோத⁴ங் உபனய்ஹதி ப³ந்த⁴தி, குஜ்ஜ²னாகாரங் பப³ந்த⁴தி க⁴டேதி. ஆகா⁴தவத்து²னா சித்தங் ப³ந்த⁴ந்தீ விய ஹோதீதி அபரகாலோ கோதோ⁴ உபனாஹோ. ஸுட்டு² கதங் காரணங் உபகாரோ ஸுகதகாரணங், தஸ்ஸ புப்³ப³காரிதாலக்க²ணஸ்ஸ கு³ணஸ்ஸ மக்க²னங் உத³கபுஞ்ச²னியா விய ஸரீரானுக³தஸ்ஸ உத³கஸ்ஸ புஞ்ச²னங் வினாஸனங் லக்க²ணமேதஸ்ஸாதி ஸுகதகரணமக்க²னலக்க²ணோ. ததா² ஹி ஸோ பரேஸங் கு³ணானங் மக்க²னட்டே²ன மக்கோ²தி வுச்சதி. ப³ஹுஸ்ஸுதேபி புக்³க³லே அஜ்ஜொ²த்த²ரிங்ஸு, ‘‘ஈதி³ஸஸ்ஸ ச ப³ஹுஸ்ஸுதஸ்ஸ அனியதா க³ஹிதா, தவ ச மம ச கோ விஸேஸோ’’திஆதி³னா நயேன உப்பஜ்ஜமானோ யுக³க்³கா³ஹீ பலாஸோதி ஆஹ ‘‘யுக³க்³கா³ஹலக்க²ணோ பலாஸோ’’தி. தத்த² யுக³க்³கா³ஹோ நாம ஸமது⁴ரக்³கா³ஹோ, அஸமம்பி அத்தனா ஸமங் கத்வா க³ண்ஹனங். பலாஸதீதி பலாஸோ, பரேஸங் கு³ணே ட³ங்ஸித்வா த³ந்தேஹி விய சி²ந்தி³த்வா அத்தனோ கு³ணேஹி ஸமே கரோதீதி அத்தோ².
181. Ito paresu kodhavaggādīsu upanandhanalakkhaṇoti kujjhanavasena ‘‘akkocchi maṃ avadhi ma’’ntiādinā (dha. pa. 3, 4) cittapariyonandhanalakkhaṇo. Pubbakālikaṃ kodhaṃ upanayhati bandhati, kujjhanākāraṃ pabandhati ghaṭeti. Āghātavatthunā cittaṃ bandhantī viya hotīti aparakālo kodho upanāho. Suṭṭhu kataṃ kāraṇaṃ upakāro sukatakāraṇaṃ, tassa pubbakāritālakkhaṇassa guṇassa makkhanaṃ udakapuñchaniyā viya sarīrānugatassa udakassa puñchanaṃ vināsanaṃ lakkhaṇametassāti sukatakaraṇamakkhanalakkhaṇo. Tathā hi so paresaṃ guṇānaṃ makkhanaṭṭhena makkhoti vuccati. Bahussutepi puggale ajjhotthariṃsu, ‘‘īdisassa ca bahussutassa aniyatā gahitā, tava ca mama ca ko viseso’’tiādinā nayena uppajjamāno yugaggāhī palāsoti āha ‘‘yugaggāhalakkhaṇo palāso’’ti. Tattha yugaggāho nāma samadhuraggāho, asamampi attanā samaṃ katvā gaṇhanaṃ. Palāsatīti palāso, paresaṃ guṇe ḍaṃsitvā dantehi viya chinditvā attano guṇehi same karotīti attho.
உஸூயனலக்க²ணாதி பரேஸங் ஸக்காராதீ³னி கி²ய்யனலக்க²ணா. மச்சே²ரஸ்ஸ பா⁴வோ மச்ச²ரியங். தஞ்ச ஆவாஸமச்ச²ரியாதி³வஸேன பஞ்சவித⁴ந்தி ஆஹ ‘‘பஞ்சமச்சே²ரபா⁴வோ மச்ச²ரிய’’ந்தி. மச்ச²ராயனலக்க²ணந்தி அத்தனோ ஸம்பத்தியா பரேஹி ஸாதா⁴ரணபா⁴வே அஸஹனலக்க²ணங். கதப்படிச்சா²த³னலக்க²ணாதி கதபாபப்படிச்சா²த³னலக்க²ணா. கேராடிகபா⁴வேன உப்பஜ்ஜமானங் ஸாடெ²ய்யந்தி ஆஹ ‘‘கேராடிகலக்க²ணங் ஸாடெ²ய்ய’’ந்தி. அஞ்ஞதா² அத்தனோ பவேத³னபுக்³க³லோ கேராடிகோ நேகதிகவாணிஜோதி வத³ந்தி. கேராடிகோ ஹி புக்³க³லோ ஆனந்த³மச்சோ² விய ஹோதி.
Usūyanalakkhaṇāti paresaṃ sakkārādīni khiyyanalakkhaṇā. Maccherassa bhāvo macchariyaṃ. Tañca āvāsamacchariyādivasena pañcavidhanti āha ‘‘pañcamaccherabhāvo macchariya’’nti. Maccharāyanalakkhaṇanti attano sampattiyā parehi sādhāraṇabhāve asahanalakkhaṇaṃ. Katappaṭicchādanalakkhaṇāti katapāpappaṭicchādanalakkhaṇā. Kerāṭikabhāvena uppajjamānaṃ sāṭheyyanti āha ‘‘kerāṭikalakkhaṇaṃ sāṭheyya’’nti. Aññathā attano pavedanapuggalo kerāṭiko nekatikavāṇijoti vadanti. Kerāṭiko hi puggalo ānandamaccho viya hoti.
187. யதா²ப⁴தங் நிக்கி²த்தோ ஏவங் நிரயேதி யதா² ஆப⁴தங் கஞ்சி ஆஹரித்வா ட²பிதோ, ஏவங் அத்தனோ கம்முனா நிக்கி²த்தோ நிரயே ட²பிதோயேவாதி அத்தோ².
187.Yathābhataṃ nikkhitto evaṃ nirayeti yathā ābhataṃ kañci āharitvā ṭhapito, evaṃ attano kammunā nikkhitto niraye ṭhapitoyevāti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. கோத⁴பெய்யாலங் • 1. Kodhapeyyālaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. கோத⁴பெய்யாலங் • 1. Kodhapeyyālaṃ
