| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༡. ཀོདྷཔེཡྻཱལཾ
1. Kodhapeyyālaṃ
༡༨༡. ཨིཏོ པརེསུ ཀུཛ྄ཛྷནལཀྑཎོ ཀོདྷོ། ཨུཔནནྡྷནལཀྑཎོ ཨུཔནཱཧོ། སུཀཏཀརཎམཀྑནལཀྑཎོ མཀྑོ། ཡུགགྒཱཧལཀྑཎོ པལཱསོ། ཨུསཱུཡནལཀྑཎཱ ཨིསྶཱ། པཉྩམཙྪེརབྷཱཝོ མཙྪརིཡཾ། ཏཾ སབྦམྤི མཙྪརཱཡནལཀྑཎཾ། ཀཏཔཊིཙྪཱདནལཀྑཎཱ མཱཡཱ། ཀེརཱཊིཀལཀྑཎཾ སཱཋེཡྻཾ། ཨལཛྫནཱཀཱརོ ཨཧིརིཀཾ། ཨུཔཝཱདཏོ ཨབྷཱཡནཱཀཱརོ ཨནོཏྟཔྤཾ། ཨཀྐོདྷཱདཡོ ཏེསཾ པཊིཔཀྑཝསེན ཝེདིཏབྦཱ།
181. Ito paresu kujjhanalakkhaṇo kodho. Upanandhanalakkhaṇo upanāho. Sukatakaraṇamakkhanalakkhaṇo makkho. Yugaggāhalakkhaṇo palāso. Usūyanalakkhaṇā issā. Pañcamaccherabhāvo macchariyaṃ. Taṃ sabbampi maccharāyanalakkhaṇaṃ. Katapaṭicchādanalakkhaṇā māyā. Kerāṭikalakkhaṇaṃ sāṭheyyaṃ. Alajjanākāro ahirikaṃ. Upavādato abhāyanākāro anottappaṃ. Akkodhādayo tesaṃ paṭipakkhavasena veditabbā.
༡༨༥. སེཀྑསྶ བྷིཀྑུནོཏི སཏྟཝིདྷསྶཱཔི སེཀྑསྶ ཨུཔརིཨུཔརིགུཎེཧི པརིཧཱནཱཡ སཾཝཏྟནྟི, པུཐུཛྫནསྶ པན པཋམཏརཾཡེཝ པརིཧཱནཱཡ སཾཝཏྟནྟཱིཏི ཝེདིཏབྦཱ། ཨཔརིཧཱནཱཡཱཏི ཨུཔརིཨུཔརིགུཎེཧི ཨཔརིཧཱནཏྠཱཡ།
185.Sekkhassa bhikkhunoti sattavidhassāpi sekkhassa upariupariguṇehi parihānāya saṃvattanti, puthujjanassa pana paṭhamataraṃyeva parihānāya saṃvattantīti veditabbā. Aparihānāyāti upariupariguṇehi aparihānatthāya.
༡༨༧. ཡཐཱབྷཏཾ ནིཀྑིཏྟོཏི ཡཐཱ ཨཱནེཏྭཱ ནིཀྑིཏྟོ, ཨེཝཾ ནིརཡེ པཏིཊྛིཏོ ཝཱཏི ཝེདིཏབྦོ།
187.Yathābhataṃ nikkhittoti yathā ānetvā nikkhitto, evaṃ niraye patiṭṭhito vāti veditabbo.
༡༩༠. ཨེཀཙྩོཏི ཡསྶེཏེ ཀོདྷཱདཡོ ཨཏྠི, སོ ཨེཀཙྩོ ནཱམ།
190.Ekaccoti yassete kodhādayo atthi, so ekacco nāma.
ཀོདྷཔེཡྻཱལཾ ནིཊྛིཏཾ།
Kodhapeyyālaṃ niṭṭhitaṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡. ཀོདྷཔེཡྻཱལཾ • 1. Kodhapeyyālaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡. ཀོདྷཔེཡྻཱལཾ • 1. Kodhapeyyālaṃ
