| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
9-10. гогаалигасуд̇д̇аад̣̇иван̣н̣анаа
9-10. Kokālikasuttādivaṇṇanā
89-90. навамз (сам̣. ни. дий. 1.1.181) гогаалиганаамагаа д̣̇вз бхигкуу. д̇ад̇о ид̇хаад̇хиббзд̇ам̣ нид̣̇д̇хаарзд̇ваа д̣̇ассзд̇ум̣ ‘‘гояам̣ гогаалиго’’д̇и бужчаа. суд̇д̇асса адтуббад̇д̇им̣ д̣̇ассзд̇ум̣ ‘‘гасмаа жа убасан̇гамий’’д̇и бужчаа. аяам̣ гираад̇иаад̣̇и яат̇ааггамам̣ д̇аасам̣ виссаж̇ж̇анам̣. вивзгаваасам̣ васид̇угаамад̇д̇аа аббижчад̇ааяа жа маа но гассажи…бз… васим̣су. аагхаад̇ам̣ уббаад̣̇зси ад̇д̇ано ижчаавигхаад̇анад̇о. т̇зраа бхигкусан̇гхасса нияяаад̣̇аяим̣су баяуд̇д̇аваажааяа агад̇ад̇д̇аа т̇зрзхи жа ад̣̇аабид̇ад̇д̇аа. буб̣б̣зби…бз… ман̃н̃зд̇и иминаа т̇зраанам̣ гохан̃н̃з тид̇абхаавам̣ аасан̇гад̇и аван̣з ван̣ам̣ бассанд̇о вияа, субарисуд̣̇д̇хз аад̣̇аасад̇алз ж̇аллам̣ удтаабзнд̇о вияа жа.
89-90. Navame (saṃ. ni. ṭī. 1.1.181) kokālikanāmakā dve bhikkhū. Tato idhādhippetaṃ niddhāretvā dassetuṃ ‘‘koyaṃ kokāliko’’ti pucchā. Suttassa aṭṭhuppattiṃ dassetuṃ ‘‘kasmā ca upasaṅkamī’’ti pucchā. Ayaṃ kirātiādi yathākkamaṃ tāsaṃ vissajjanaṃ. Vivekavāsaṃ vasitukāmattā appicchatāya ca mā no kassaci…pe… vasiṃsu. Āghātaṃ uppādesi attano icchāvighātanato. Therā bhikkhusaṅghassa niyyādayiṃsu payuttavācāya akatattā therehi ca adāpitattā. Pubbepi…pe… maññeti iminā therānaṃ kohaññe ṭhitabhāvaṃ āsaṅkati avaṇe vaṇaṃ passanto viya, suparisuddhe ādāsatale jallaṃ uṭṭhāpento viya ca.
абараж̇жхид̇ваад̇и бхаг̇авад̇о саммукаа ‘‘баабабхигкуу ж̇аад̇аа’’д̇и вад̇ваа. махаасааваж̇ж̇ад̣̇ассанад̇т̇анд̇и махаасааваж̇ж̇абхаавад̣̇ассанад̇т̇ам̣, аяамзва ваа баато. маахзванд̇и маа звамааха, маа звам̣ бхан̣и. сад̣̇д̇хааяа аяо уббаад̣̇о сад̣̇д̇хааяо, д̇ам̣ аавахад̇ийд̇и сад̣̇д̇хааяигод̇и ааха ‘‘сад̣̇д̇хааяа ааг̇амагаро’’д̇и. сад̣̇д̇хааяигод̇и ваа сад̣̇д̇хааяа аяид̇аб̣б̣о, сад̣̇д̇хзяяод̇и ад̇т̇о. д̇знааха ‘‘сад̣̇д̇хаад̇аб̣б̣аважано ваа’’д̇и.
Aparajjhitvāti bhagavato sammukhā ‘‘pāpabhikkhū jātā’’ti vatvā. Mahāsāvajjadassanatthanti mahāsāvajjabhāvadassanatthaṃ, ayameva vā pāṭho. Māhevanti mā evamāha, mā evaṃ bhaṇi. Saddhāya ayo uppādo saddhāyo, taṃ āvahatīti saddhāyikoti āha ‘‘saddhāya āgamakaro’’ti. Saddhāyikoti vā saddhāya ayitabbo, saddheyyoti attho. Tenāha ‘‘saddhātabbavacano vā’’ti.
бийл̣агаа наама б̣аахирад̇о бадтааяа адтийни бхинд̣̇анд̇и, имаа бана батамам̣язва адтийни бхинд̣̇ид̇ваа уг̇г̇ад̇аа. д̇знааха ‘‘адтийни бхинд̣̇ид̇ваа уг̇г̇ад̇аахи бил̣агаахий’’д̇и. д̇арун̣аб̣злувамад̇д̇ияод̇и д̇арун̣аб̣иллапаламад̇д̇ияо. висаг̇илид̇од̇и кид̇д̇абахаран̣о . д̇ан̃жа б̣ал̣исам̣ висасаман̃н̃аа логз. аарагкад̣̇звад̇аанам̣ сад̣̇д̣̇ам̣ суд̇ваад̇и бад̣̇ам̣ аанзд̇ваа самб̣анд̇хо.
Pīḷakā nāma bāhirato paṭṭhāya aṭṭhīni bhindanti, imā pana paṭhamaṃyeva aṭṭhīni bhinditvā uggatā. Tenāha ‘‘aṭṭhīni bhinditvā uggatāhi piḷakāhī’’ti. Taruṇabeluvamattiyoti taruṇabillaphalamattiyo. Visagilitoti khittapaharaṇo . Tañca baḷisaṃ visasamaññā loke. Ārakkhadevatānaṃ saddaṃ sutvāti padaṃ ānetvā sambandho.
б̣рахмалогзд̇и суд̣̇д̇хааваасалогз. вараагод̇и ануг̇г̇ахаважанамзд̇ам̣. хийнабарияааяод̇и гзжи. бияасийлаад̇и иминаа зд̇асмим̣ ад̇т̇з нируд̇д̇инаязна бзсалаад̇и бад̣̇асид̣̇д̇хийд̇и д̣̇ассзд̇и. габ̣арагкийнийд̇и б̣яаад̇хиб̣алзна барибхиннаван̣н̣ад̇ааяа габ̣арабхууд̇аани агкийни. яад̇д̇аганд̇и бхаг̇авад̇о важанам̣ ан̃н̃ат̇аа гаронд̇зна яад̇д̇агам̣ д̇аяаа абарад̣̇д̇хам̣, д̇асса бамаан̣ам̣ над̇т̇ийд̇и ад̇т̇о. яасмаа анааг̇аамино наама бахийнагаамажчанд̣̇аб̣яаабаад̣̇аа хонд̇и, д̇ван̃жа д̣̇идтигаамажчанд̣̇аб̣яаабаад̣̇авасзна ид̇хааг̇ад̇о, д̇асмаа яааван̃жа д̇з ид̣̇ам̣ абарад̣̇д̇ханд̇и звамзд̇т̇а ад̇т̇о д̣̇адтаб̣б̣о.
Brahmaloketi suddhāvāsaloke. Varākoti anuggahavacanametaṃ. Hīnapariyāyoti keci. Piyasīlāti iminā etasmiṃ atthe niruttinayena pesalāti padasiddhīti dasseti. Kabarakkhīnīti byādhibalena paribhinnavaṇṇatāya kabarabhūtāni akkhīni. Yattakanti bhagavato vacanaṃ aññathā karontena yattakaṃ tayā aparaddhaṃ, tassa pamāṇaṃ natthīti attho. Yasmā anāgāmino nāma pahīnakāmacchandabyāpādā honti, tvañca diṭṭhikāmacchandabyāpādavasena idhāgato, tasmā yāvañca te idaṃ aparaddhanti evamettha attho daṭṭhabbo.
ад̣̇идтиббад̇д̇од̇и аббад̇д̇ад̣̇идтиго. г̇илид̇ависо вияа висам̣ г̇илид̇ваа тид̇о вияа. гутаарисад̣̇исаа муулабажчинд̣̇анадтзна. уд̇д̇амад̇т̇зд̇и арахад̇д̇з. кийн̣аасавод̇и вад̣̇ад̇и сунагкад̇д̇о вияа ажзлам̣ горагкад̇д̇ияам̣. яо аг̇г̇асааваго вияа басам̣сид̇аб̣б̣о кийн̣аасаво, д̇ам̣ ‘‘д̣̇уссийло аяа’’нд̇и вад̣̇ад̇и. вижинаад̇ийд̇и аажинод̇и басавад̇и. басам̣сияанинд̣̇аа д̇аава самбаннаг̇ун̣абарид̇хам̣санавасзна бавад̇д̇ияаа сааваж̇ж̇ад̇ааяа гадугавибаагаа, нинд̣̇ияаббасам̣саа бана гат̇ам̣ д̇ааяа самавибаагаад̇и? д̇ад̇т̇а авиж̇ж̇амаанаг̇ун̣асамааробанзна ад̇д̇ано барзсан̃жа мижчаабадибад̇д̇ихзд̇убхаавад̇о басам̣сиязна д̇асса самабхаавагаран̣ад̇о жа. логзби хи асуурам̣ суурзна самам̣ гаронд̇о г̇аараяхо ход̇и, баг̇зва д̣̇уббадибаннам̣ суббадибаннзна самам̣ гаронд̇од̇и.
Adiṭṭhippattoti appattadiṭṭhiko. Gilitaviso viya visaṃ gilitvā ṭhito viya. Kuṭhārisadisā mūlapacchindanaṭṭhena. Uttamattheti arahatte. Khīṇāsavoti vadati sunakkhatto viya acelaṃ korakkhattiyaṃ. Yo aggasāvako viya pasaṃsitabbo khīṇāsavo, taṃ ‘‘dussīlo aya’’nti vadati. Vicinātīti ācinoti pasavati. Pasaṃsiyanindā tāva sampannaguṇaparidhaṃsanavasena pavattiyā sāvajjatāya kaṭukavipākā, nindiyappasaṃsā pana kathaṃ tāya samavipākāti? Tattha avijjamānaguṇasamāropanena attano paresañca micchāpaṭipattihetubhāvato pasaṃsiyena tassa samabhāvakaraṇato ca. Lokepi hi asūraṃ sūrena samaṃ karonto gārayho hoti, pageva duppaṭipannaṃ suppaṭipannena samaṃ karontoti.
сагзна д̇ханзнаад̇и ад̇д̇ано саабад̇зяязна. аяам̣ аббамад̇д̇аго абараад̇хо д̣̇идтад̇хаммигад̇д̇аа саббад̇игаарад̇д̇аа жа д̇асса. аяам̣ маханд̇ад̇аро гали гад̇уубажид̇асса самбарааяигад̇д̇аа аббад̇игаарад̇д̇аа жа.
Sakena dhanenāti attano sāpateyyena. Ayaṃ appamattako aparādho diṭṭhadhammikattā sappatikārattā ca tassa. Ayaṃ mahantataro kali katūpacitassa samparāyikattā appatikārattā ca.
нираб̣б̣уд̣̇од̇и г̇ан̣анаависзсо зсод̇и ааха ‘‘нираб̣б̣уд̣̇аг̇ан̣анааяаа’’д̇и, сад̇асахассам̣ нираб̣б̣уд̣̇аананд̇и ад̇т̇о. яамарияаг̇арахий нираяам̣ убзд̇ийд̇и зд̇т̇а яат̇аавуд̇д̇аааяуббамаан̣ам̣ баагад̇игавасзна арияуубаваад̣̇инаа вуд̇д̇анд̇и взд̣̇ид̇аб̣б̣ам̣. аг̇г̇асаавагаанам̣ бана г̇ун̣амаханд̇ад̇ааяа д̇ад̇оби ад̇ивияа маханд̇ад̇арамзваад̇и вад̣̇анд̇и.
Nirabbudoti gaṇanāviseso esoti āha ‘‘nirabbudagaṇanāyā’’ti, satasahassaṃ nirabbudānanti attho. Yamariyagarahī nirayaṃ upetīti ettha yathāvuttaāyuppamāṇaṃ pākatikavasena ariyūpavādinā vuttanti veditabbaṃ. Aggasāvakānaṃ pana guṇamahantatāya tatopi ativiya mahantataramevāti vadanti.
ат̇а ко б̣рахмаа сахамбад̇ийд̇и го аяам̣ б̣рахмаа, гасмаа жа бана бхаг̇аванд̇ам̣ убасан̇гамид̇ваа зд̇ад̣̇авожаад̇и? аяам̣ гассабасса бхаг̇авад̇о саасанз сахаго наама бхигку анааг̇аамий худ̇ваа суд̣̇д̇хааваасзсу уббанно, д̇ад̇т̇а сахамбад̇и б̣рахмаад̇и сан̃ж̇аананд̇и. со банаахам̣ бхаг̇аванд̇ам̣ убасан̇гамид̇ваа ‘‘бад̣̇уманираяам̣ гид̇д̇зссаами, д̇ад̇о бхаг̇аваа бхигкуунам̣ аарожзссад̇и, ат̇аанусанд̇хигусалаа бхигкуу д̇ад̇т̇ааяуббамаан̣ам̣ бужчиссанд̇и, бхаг̇аваа аажигканд̇о арияуубаваад̣̇з аад̣̇ийнавам̣ багаасзссад̇ий’’д̇и иминаа гааран̣зна бхаг̇аванд̇ам̣ убасан̇гамид̇ваа зд̇ад̣̇авожа.
Athakho brahmā sahampatīti ko ayaṃ brahmā, kasmā ca pana bhagavantaṃ upasaṅkamitvā etadavocāti? Ayaṃ kassapassa bhagavato sāsane sahako nāma bhikkhu anāgāmī hutvā suddhāvāsesu uppanno, tattha sahampati brahmāti sañjānanti. So panāhaṃ bhagavantaṃ upasaṅkamitvā ‘‘padumanirayaṃ kittessāmi, tato bhagavā bhikkhūnaṃ ārocessati, athānusandhikusalā bhikkhū tatthāyuppamāṇaṃ pucchissanti, bhagavā ācikkhanto ariyūpavāde ādīnavaṃ pakāsessatī’’ti iminā kāraṇena bhagavantaṃ upasaṅkamitvā etadavoca.
маг̇ад̇харадтз сам̣вохаарад̇о мааг̇ад̇хаго бад̇т̇о, д̇зна. бажжид̇аб̣б̣адтаанассаад̇и нираяад̣̇угкзна бажжид̇аб̣б̣аббад̣̇зсасса зд̇ам̣ аб̣б̣уд̣̇од̇и наамам̣. вассаг̇ан̣анаад̇и згад̇о бадтааяа д̣̇асаг̇ун̣ид̇ам̣ аб̣б̣уд̣̇аааяумхи д̇ад̇о абарам̣ вийсад̇иг̇ун̣ид̇ам̣ нираб̣б̣уд̣̇аад̣̇ийсу вассаг̇ан̣анаа взд̣̇ид̇аб̣б̣аа. аяан̃жа г̇ан̣анаа абарижид̇аанам̣ д̣̇уггараад̇и вуд̇д̇ам̣ ‘‘на д̇ам̣ сугарам̣ сан̇каад̇у’’нд̇и. гзжи бана ‘‘д̇ад̇т̇а д̇ад̇т̇а барид̣̇званаанад̇д̇зна гаммагааран̣анаанад̇д̇знаби имаани наамаани лад̣̇д̇хааний’’д̇и вад̣̇анд̇и, абарз ‘‘сийд̇анарагаа зд̇з’’д̇и. саб̣б̣ад̇т̇аад̇и аб̣аб̣аад̣̇ийсу бад̣̇умабарияосаанзсу саб̣б̣зсу нираязсу. зса наяод̇и хздтимад̇о убаримасса вийсад̇иг̇ун̣ад̇ам̣ ад̇ид̣̇исад̇и. д̣̇асамз над̇т̇и вад̇д̇аб̣б̣ам̣.
Magadharaṭṭhe saṃvohārato māgadhako pattho, tena. Paccitabbaṭṭhānassāti nirayadukkhena paccitabbappadesassa etaṃ abbudoti nāmaṃ. Vassagaṇanāti ekato paṭṭhāya dasaguṇitaṃ abbudaāyumhi tato aparaṃ vīsatiguṇitaṃ nirabbudādīsu vassagaṇanā veditabbā. Ayañca gaṇanā aparicitānaṃ dukkarāti vuttaṃ ‘‘na taṃ sukaraṃ saṅkhātu’’nti. Keci pana ‘‘tattha tattha paridevanānattena kammakāraṇanānattenapi imāni nāmāni laddhānī’’ti vadanti, apare ‘‘sītanarakā ete’’ti. Sabbatthāti ababādīsu padumapariyosānesu sabbesu nirayesu. Esa nayoti heṭṭhimato uparimassa vīsatiguṇataṃ atidisati. Dasame natthi vattabbaṃ.
гогаалигасуд̇д̇аад̣̇иван̣н̣анаа нидтид̇аа.
Kokālikasuttādivaṇṇanā niṭṭhitā.
т̇зраваг̇г̇аван̣н̣анаа нидтид̇аа.
Theravaggavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya
9. гогаалигасуд̇д̇ам̣ • 9. Kokālikasuttaṃ
10. кийн̣аасаваб̣аласуд̇д̇ам̣ • 10. Khīṇāsavabalasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 9. гогаалигасуд̇д̇аван̣н̣анаа • 9. Kokālikasuttavaṇṇanā
