| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. কোকালিকসুত্তৰণ্ণনা
10. Kokālikasuttavaṇṇanā
১৮১. দ্ৰে কোকালিকনামকা ভিক্খূ, ততো ইধ অধিপ্পেতং নিদ্ধারেত্ৰা দস্সেতুং – ‘‘কো অযং কোকালিকো’’তি? পুচ্ছা। সুত্তস্স অট্ঠুপ্পত্তিং দস্সেতুং – ‘‘কস্মা চ উপসঙ্কমী’’তি? পুচ্ছা । অযং কিরাতিআদি যথাক্কমং তাসং ৰিস্সজ্জনং। ৰিৰেকৰাসং ৰসিতুকামত্তা অপ্পিচ্ছতায চ মা কস্সচি…পে॰… ৰসিংসু।
181. Dve kokālikanāmakā bhikkhū, tato idha adhippetaṃ niddhāretvā dassetuṃ – ‘‘ko ayaṃ kokāliko’’ti? Pucchā. Suttassa aṭṭhuppattiṃ dassetuṃ – ‘‘kasmā ca upasaṅkamī’’ti? Pucchā . Ayaṃ kirātiādi yathākkamaṃ tāsaṃ vissajjanaṃ. Vivekavāsaṃ vasitukāmattā appicchatāya ca mā kassaci…pe… vasiṃsu.
পক্কমিস্সন্তীতি আঘাতং উপ্পাদেসি অত্তনো ইচ্ছাৰিঘাতনতো। থেরা ভিক্খুসঙ্ঘস্স নিয্যাদযিংসু পযুত্তৰাচায অকতত্তা থেরেহি চ অদীপিতত্তা। পুব্বেপি…পে॰… মঞ্ঞেতি ইমিনা থেরানং কোহঞ্ঞে ঠিতভাৰং আসঙ্কতি অৰণে ৰণং পস্সন্তো ৰিয, সুদ্ধে আদাসতলে লেখং উট্ঠাপেন্তো ৰিয চ।
Pakkamissantīti āghātaṃ uppādesi attano icchāvighātanato. Therā bhikkhusaṅghassa niyyādayiṃsu payuttavācāya akatattā therehi ca adīpitattā. Pubbepi…pe… maññeti iminā therānaṃ kohaññe ṭhitabhāvaṃ āsaṅkati avaṇe vaṇaṃ passanto viya, suddhe ādāsatale lekhaṃ uṭṭhāpento viya ca.
অপরজ্ঝিত্ৰাতি ভগৰতো সম্মুখা ‘‘পাপভিক্খূ জাতা’’তি ৰত্ৰা। আহ ‘‘সদ্ধায আকরো পসাদাৰহো’’তি। পৰত্তসদ্ধাযিকো ৰাতি অত্থোতি আহ ‘‘সদ্ধাতব্বৰচনো’’তি।
Aparajjhitvāti bhagavato sammukhā ‘‘pāpabhikkhū jātā’’ti vatvā. Āha ‘‘saddhāya ākaro pasādāvaho’’ti. Pavattasaddhāyiko vāti atthoti āha ‘‘saddhātabbavacano’’ti.
পীল়কা নাম বাহিরতো পট্ঠায অট্ঠিং ভিন্দতি, ইমা পন পঠমংযেৰ অট্ঠিং ভিন্দিত্ৰা উগ্গতা। তরুণবেলুৰমত্তিযোতি তরুণবিল্লফলমত্তিযো। ৰিসগিলিতোতি খিত্তপহরণো। তঞ্চ বল়িসং ৰিসসমঞ্ঞা লোকে। ‘‘আরক্খদেৰতানং সুত্ৰা’’তি পদং আনেত্ৰা সম্বন্ধো।
Pīḷakā nāma bāhirato paṭṭhāya aṭṭhiṃ bhindati, imā pana paṭhamaṃyeva aṭṭhiṃ bhinditvā uggatā. Taruṇabeluvamattiyoti taruṇabillaphalamattiyo. Visagilitoti khittapaharaṇo. Tañca baḷisaṃ visasamaññā loke. ‘‘Ārakkhadevatānaṃ sutvā’’ti padaṃ ānetvā sambandho.
মগধরট্ঠে সংৰোহারতো মাগধকো পত্তো, তেন। তিলসকটং তিলৰাহাএতি ৰুত্তো। পচ্চিতব্বট্ঠানস্সাতি নিরযদুক্খেন পচ্চিতব্বপদেসস্স। এতং ‘‘অব্বুদো’’তি নামং।
Magadharaṭṭhe saṃvohārato māgadhako patto, tena. Tilasakaṭaṃ tilavāhāeti vutto. Paccitabbaṭṭhānassāti nirayadukkhena paccitabbapadesassa. Etaṃ ‘‘abbudo’’ti nāmaṃ.
ৰস্সগণনাতি একতো পট্ঠায দসগুণিতং অব্বুদআযুম্হি, ততো পরং ৰীসতিগুণং নিরব্বুদাদীসু ৰস্সগণনা ৰেদিতব্বা। সব্বত্থাতি অববাদীসু পদুমপরিযোসানেসু সব্বেসু নিরযেসু। এসেৰ নযোতি হেট্ঠিমতো উপরিমস্স উপরিমস্স ৰীসতিগুণতং অতিদিসতি।
Vassagaṇanāti ekato paṭṭhāya dasaguṇitaṃ abbudaāyumhi, tato paraṃ vīsatiguṇaṃ nirabbudādīsu vassagaṇanā veditabbā. Sabbatthāti ababādīsu padumapariyosānesu sabbesu nirayesu. Eseva nayoti heṭṭhimato uparimassa uparimassa vīsatiguṇataṃ atidisati.
কোকালিকসুত্তৰণ্ণনা নিট্ঠিতা।
Kokālikasuttavaṇṇanā niṭṭhitā.
পঠমৰগ্গৰণ্ণনা নিট্ঠিতা।
Paṭhamavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. কোকালিকসুত্তং • 10. Kokālikasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. কোকালিকসুত্তৰণ্ণনা • 10. Kokālikasuttavaṇṇanā
