| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
9. гогаалигасуд̇д̇аван̣н̣анаа
9. Kokālikasuttavaṇṇanā
89. навамз гогаалиго бхигку язна бхаг̇аваа д̇знубасан̇гамийд̇и гояам̣ гогаалиго, гасмаа жа убасан̇гами? аяам̣ гира гогаалигарадтз гогаалиганаг̇арз гогаалигасздтисса буд̇д̇о баб̣б̣аж̇ид̇ваа бид̇араа гаарид̇з вихаарз васад̇и жуул̣агогаалигод̇и наамзна, на бана д̣̇звад̣̇ад̇д̇асса сиссо. со хи б̣раахман̣абуд̇д̇о махаагогаалиго наама. бхаг̇авад̇и бана саавад̇т̇ияам̣ вихаранд̇з д̣̇вз аг̇г̇асаавагаа бан̃жамад̇д̇зхи бхигкусад̇зхи сад̣̇д̇хим̣ ж̇анабад̣̇ажааригам̣ жарамаанаа убагадтааяа вассуубанааяигааяа вивзгаваасам̣ васид̇угаамаа д̇з бхигкуу уяяож̇зд̇ваа ад̇д̇ано бад̇д̇ажийварамаад̣̇ааяа д̇асмим̣ ж̇анабад̣̇з д̇ам̣ наг̇арам̣ бад̇ваа вихаарам̣ аг̇амим̣су. д̇ад̇т̇а нзсам̣ гогаалиго вад̇д̇ам̣ агааси. д̇зби д̇зна сад̣̇д̇хим̣ саммод̣̇ид̇ваа, ‘‘аавусо, маяам̣ ид̇ха д̇змаасам̣ васиссаама, маа но гассажи аарожзсий’’д̇и бадин̃н̃ам̣ г̇ахзд̇ваа васим̣су. васид̇ваа бавааран̣аад̣̇ивасз баваарзд̇ваа ‘‘г̇ажчаама маяам̣, аавусо’’д̇и гогаалигам̣ аабужчим̣су. гогаалиго ‘‘аж̇ж̇а, аавусо, згад̣̇ивасам̣ васид̇ваа свз г̇амиссат̇аа’’д̇и вад̇ваа д̣̇уд̇ияад̣̇ивасз наг̇арам̣ бависид̇ваа мануссз ааманд̇зси – ‘‘аавусо, д̇умхз д̣̇вз аг̇г̇асаавагз ид̇ха ааг̇анд̇ваа васамаанзби на ж̇аанаат̇а, на д̇з гожи бажжаязнаби ниманд̇зд̇ий’’д̇и. наг̇араваасино ‘‘гахам̣, бханд̇з, т̇зраа, гасмаа но наарожаяид̇т̇аа’’д̇и? гим̣, аавусо, аарожид̇зна, гим̣ на бассат̇а д̣̇вз бхигкуу т̇зраасанз нисийд̣̇анд̇з, зд̇з аг̇г̇асаавагаад̇и. д̇з киббам̣ саннибад̇ид̇ваа саббипаан̣ид̇аад̣̇ийни жзва жийварад̣̇уссаани жа сам̣харим̣су.
89. Navame kokāliko bhikkhu yena bhagavā tenupasaṅkamīti koyaṃ kokāliko, kasmā ca upasaṅkami? Ayaṃ kira kokālikaraṭṭhe kokālikanagare kokālikaseṭṭhissa putto pabbajitvā pitarā kārite vihāre vasati cūḷakokālikoti nāmena, na pana devadattassa sisso. So hi brāhmaṇaputto mahākokāliko nāma. Bhagavati pana sāvatthiyaṃ viharante dve aggasāvakā pañcamattehi bhikkhusatehi saddhiṃ janapadacārikaṃ caramānā upakaṭṭhāya vassūpanāyikāya vivekavāsaṃ vasitukāmā te bhikkhū uyyojetvā attano pattacīvaramādāya tasmiṃ janapade taṃ nagaraṃ patvā vihāraṃ agamiṃsu. Tattha nesaṃ kokāliko vattaṃ akāsi. Tepi tena saddhiṃ sammoditvā, ‘‘āvuso, mayaṃ idha temāsaṃ vasissāma, mā no kassaci ārocesī’’ti paṭiññaṃ gahetvā vasiṃsu. Vasitvā pavāraṇādivase pavāretvā ‘‘gacchāma mayaṃ, āvuso’’ti kokālikaṃ āpucchiṃsu. Kokāliko ‘‘ajja, āvuso, ekadivasaṃ vasitvā sve gamissathā’’ti vatvā dutiyadivase nagaraṃ pavisitvā manusse āmantesi – ‘‘āvuso, tumhe dve aggasāvake idha āgantvā vasamānepi na jānātha, na te koci paccayenapi nimantetī’’ti. Nagaravāsino ‘‘kahaṃ, bhante, therā, kasmā no nārocayitthā’’ti? Kiṃ, āvuso, ārocitena, kiṃ na passatha dve bhikkhū therāsane nisīdante, ete aggasāvakāti. Te khippaṃ sannipatitvā sappiphāṇitādīni ceva cīvaradussāni ca saṃhariṃsu.
гогаалиго жинд̇зси – ‘‘барамаббижчаа аг̇г̇асаавагаа баяуд̇д̇аваажааяа уббанналаабхам̣ на саад̣̇ияиссанд̇и, асаад̣̇ияанд̇аа ‘ааваасигасса д̣̇зт̇аа’д̇и вагканд̇ий’’д̇и д̇ам̣ лаабхам̣ г̇аахаабзд̇ваа т̇зраанам̣ санд̇игам̣ аг̇амааси. т̇зраа д̣̇исваава ‘‘имз бажжаяаа нзва амхаагам̣, на гогаалигасса габбанд̇ий’’д̇и бадигкибид̇ваа баггамим̣су. гогаалиго ‘‘гат̇ан̃хи наама саяам̣ аг̇г̇ан̣ханд̇аа маяхамби ад̣̇аабзд̇ваа баггамиссанд̇ий’’д̇и аагхаад̇ам̣ уббаад̣̇зси . д̇зби бхаг̇авад̇о санд̇игам̣ г̇анд̇ваа бхаг̇аванд̇ам̣ ванд̣̇ид̇ваа буна ад̇д̇ано барисам̣ аад̣̇ааяа ж̇анабад̣̇ажааригам̣ жаранд̇аа анубуб̣б̣зна д̇асмим̣ радтз д̇амзва наг̇арам̣ бажжааг̇амим̣су. нааг̇араа т̇зрз сан̃ж̇аанид̇ваа саха баригкаарзхи д̣̇аанам̣ саж̇ж̇зд̇ваа наг̇арамаж̇жхз ман̣д̣абам̣ гад̇ваа д̣̇аанам̣ ад̣̇ам̣су, т̇зраанан̃жа баригкаарз убанаамзсум̣. т̇зраа бхигкусан̇гхасса нияяаад̣̇аяим̣су. д̇ам̣ д̣̇исваа гогаалиго жинд̇зси – ‘‘имз буб̣б̣з аббижчаа ахзсум̣, ид̣̇аани баабижчаа ж̇аад̇аа, буб̣б̣зби аббижчасанд̇удтабавивид̇д̇асад̣̇исаава ман̃н̃з’’д̇и т̇зрз убасан̇гамид̇ваа, ‘‘аавусо, д̇умхз буб̣б̣з аббижчаа вияа, ид̣̇аани бана баабабхигкуу ж̇аад̇ад̇т̇аа’’д̇и вад̇ваа ‘‘мууладтаанзязва нзсам̣ бад̇идтам̣ бхинд̣̇иссаамий’’д̇и д̇арамаанаруубо нигкамид̇ваа язна бхаг̇аваа д̇знубасан̇гами. аяамзса гогаалиго, иминаа жа гааран̣зна убасан̇гамийд̇и взд̣̇ид̇аб̣б̣о.
Kokāliko cintesi – ‘‘paramappicchā aggasāvakā payuttavācāya uppannalābhaṃ na sādiyissanti, asādiyantā ‘āvāsikassa dethā’ti vakkhantī’’ti taṃ lābhaṃ gāhāpetvā therānaṃ santikaṃ agamāsi. Therā disvāva ‘‘ime paccayā neva amhākaṃ, na kokālikassa kappantī’’ti paṭikkhipitvā pakkamiṃsu. Kokāliko ‘‘kathañhi nāma sayaṃ aggaṇhantā mayhampi adāpetvā pakkamissantī’’ti āghātaṃ uppādesi . Tepi bhagavato santikaṃ gantvā bhagavantaṃ vanditvā puna attano parisaṃ ādāya janapadacārikaṃ carantā anupubbena tasmiṃ raṭṭhe tameva nagaraṃ paccāgamiṃsu. Nāgarā there sañjānitvā saha parikkhārehi dānaṃ sajjetvā nagaramajjhe maṇḍapaṃ katvā dānaṃ adaṃsu, therānañca parikkhāre upanāmesuṃ. Therā bhikkhusaṅghassa niyyādayiṃsu. Taṃ disvā kokāliko cintesi – ‘‘ime pubbe appicchā ahesuṃ, idāni pāpicchā jātā, pubbepi appicchasantuṭṭhapavivittasadisāva maññe’’ti there upasaṅkamitvā, ‘‘āvuso, tumhe pubbe appicchā viya, idāni pana pāpabhikkhū jātatthā’’ti vatvā ‘‘mūlaṭṭhāneyeva nesaṃ patiṭṭhaṃ bhindissāmī’’ti taramānarūpo nikkhamitvā yena bhagavā tenupasaṅkami. Ayamesa kokāliko, iminā ca kāraṇena upasaṅkamīti veditabbo.
бхаг̇аваа д̇ам̣ д̇урид̇ад̇урид̇ам̣ ааг̇ажчанд̇ам̣ д̣̇исваава ааваж̇ж̇знд̇о ан̃н̃ааси ‘‘аяам̣ аг̇г̇асаавагз аггосид̇угаамо ааг̇ад̇о, саггаа ну ко бадисзд̇хзд̇у’’нд̇и. д̇ад̇о ‘‘на саггаа бадисзд̇хзд̇ум̣, т̇зрзсу абараж̇жхид̇ваа ааг̇ад̇о, згам̣сзна бана бад̣̇уманираяз ниб̣б̣ад̇д̇иссад̇ий’’д̇и д̣̇исваа ‘‘саарибуд̇д̇амог̇г̇аллаанзби наама г̇араханд̇ам̣ суд̇ваа на нисзд̇хзд̇ий’’д̇и ваад̣̇аможанад̇т̇ам̣ арияуубаваад̣̇асса жа махаасааваж̇ж̇абхаавад̣̇ассанад̇т̇ам̣ маа хзванд̇и д̇игкад̇д̇ум̣ бадисзд̇хзси. д̇ад̇т̇а маа хзванд̇и маа звам̣ абхан̣и. сад̣̇д̇хааяигод̇и сад̣̇д̇хааяа ааг̇амагаро басаад̣̇аавахо, сад̣̇д̇хаад̇аб̣б̣аважано ваа. бажжаяигод̇и бад̇д̇ияааяид̇аб̣б̣аважано.
Bhagavā taṃ turitaturitaṃ āgacchantaṃ disvāva āvajjento aññāsi ‘‘ayaṃ aggasāvake akkositukāmo āgato, sakkā nu kho paṭisedhetu’’nti. Tato ‘‘na sakkā paṭisedhetuṃ, theresu aparajjhitvā āgato, ekaṃsena pana padumaniraye nibbattissatī’’ti disvā ‘‘sāriputtamoggallānepi nāma garahantaṃ sutvā na nisedhetī’’ti vādamocanatthaṃ ariyūpavādassa ca mahāsāvajjabhāvadassanatthaṃ mā hevanti tikkhattuṃ paṭisedhesi. Tattha mā hevanti mā evaṃ abhaṇi. Saddhāyikoti saddhāya āgamakaro pasādāvaho, saddhātabbavacano vā. Paccayikoti pattiyāyitabbavacano.
баггаамийд̇и гаммаанубхаавзна жод̣̇ияамаано баггаами. огаасагад̇ан̃хи гаммам̣ на саггаа бадиб̣аахид̇ум̣. ажирабагганд̇ассаад̇и багганд̇асса сад̇о нажирзнзва. саб̣б̣о гааяо пудо ахосийд̇и гзсаг̇г̇амад̇д̇амби огаасам̣ аваж̇ж̇зд̇ваа сагаласарийрам̣ адтийни бхинд̣̇ид̇ваа уг̇г̇ад̇аахи бийл̣агаахи аж̇жход̇т̇адам̣ ахоси. яасмаа бана б̣уд̣̇д̇хаанубхаавзна д̇ат̇ааруубам̣ гаммам̣ б̣уд̣̇д̇хаанам̣ саммукийбхаавз вибаагам̣ д̣̇аад̇ум̣ на саггод̇и, д̣̇ассануубажаарз виж̇ахид̇амад̇д̇з д̣̇зд̇и, д̇асмаа д̇асса ажирабагганд̇асса бийл̣агаа удтахим̣су. галааяамад̇д̇ияод̇и жан̣агамад̇д̇ияо. б̣злувасалаадугамад̇д̇ияод̇и д̇арун̣аб̣злувамад̇д̇ияо. бабхиж̇ж̇им̣сууд̇и бхиж̇ж̇им̣су. д̇аасу бхиннаасу сагаласарийрам̣ банасабаггам̣ вияа ахоси. со баггзна г̇ад̇д̇зна ж̇зд̇аванад̣̇ваарагодтагз висаг̇илид̇о мажчо вияа гад̣̇алибад̇д̇зсу нибаж̇ж̇и. ат̇а д̇хаммассаванад̇т̇ам̣ ааг̇ад̇ааг̇ад̇аа мануссаа ‘‘д̇хи гогаалига, д̇хи гогаалига, аяуд̇д̇амагааси, ад̇д̇аноязва мукам̣ ниссааяа анаяаб̣яасанам̣ бад̇д̇осий’’д̇и аахам̣су. д̇зсам̣ сад̣̇д̣̇ам̣ суд̇ваа аарагкад̣̇звад̇аа д̇хиггаарамагам̣су, аарагкад̣̇звад̇аанам̣ аагаасад̣̇звад̇аад̇и иминаа убааязна яаава аганидтабхаванаа згад̇хиггааро уд̣̇абаад̣̇и.
Pakkāmīti kammānubhāvena codiyamāno pakkāmi. Okāsakatañhi kammaṃ na sakkā paṭibāhituṃ. Acirapakkantassāti pakkantassa sato nacireneva. Sabbo kāyo phuṭo ahosīti kesaggamattampi okāsaṃ avajjetvā sakalasarīraṃ aṭṭhīni bhinditvā uggatāhi pīḷakāhi ajjhotthaṭaṃ ahosi. Yasmā pana buddhānubhāvena tathārūpaṃ kammaṃ buddhānaṃ sammukhībhāve vipākaṃ dātuṃ na sakkoti, dassanūpacāre vijahitamatte deti, tasmā tassa acirapakkantassa pīḷakā uṭṭhahiṃsu. Kalāyamattiyoti caṇakamattiyo. Beluvasalāṭukamattiyoti taruṇabeluvamattiyo. Pabhijjiṃsūti bhijjiṃsu. Tāsu bhinnāsu sakalasarīraṃ panasapakkaṃ viya ahosi. So pakkena gattena jetavanadvārakoṭṭhake visagilito maccho viya kadalipattesu nipajji. Atha dhammassavanatthaṃ āgatāgatā manussā ‘‘dhi kokālika, dhi kokālika, ayuttamakāsi, attanoyeva mukhaṃ nissāya anayabyasanaṃ pattosī’’ti āhaṃsu. Tesaṃ saddaṃ sutvā ārakkhadevatā dhikkāramakaṃsu, ārakkhadevatānaṃ ākāsadevatāti iminā upāyena yāva akaniṭṭhabhavanā ekadhikkāro udapādi.
д̇урууд̇и гогаалигасса убаж̇жхааяо д̇уруд̇т̇зро наама анааг̇аамипалам̣ вад̇ваа б̣рахмалогз ниб̣б̣ад̇д̇о. со бхуммадтад̣̇звад̇аа аад̣̇им̣ гад̇ваа ‘‘аяуд̇д̇ам̣ гогаалигзна гад̇ам̣ аг̇г̇асаавагз анд̇имавад̇т̇унаа аб̣бхаажигканд̇знаа’’д̇и барамбарааяа б̣рахмалогасамбад̇д̇ам̣ д̇ам̣ сад̣̇д̣̇ам̣ суд̇ваа ‘‘маа маяхам̣ бассанд̇ассзва варааго насси, овад̣̇иссаами нам̣ т̇зрзсу жид̇д̇аббасаад̣̇ад̇т̇ааяаа’’д̇и ааг̇анд̇ваа д̇асса бурад̇о адтааси. д̇ам̣ санд̇хааязд̇ам̣ вуд̇д̇ам̣ – ‘‘д̇уруу бажжзгаб̣рахмаа’’д̇и. бзсалаад̇и бияасийлаа. госи д̇вам̣, аавусод̇и нисиннагова габ̣арагкийни уммийлзд̇ваа звамааха. басса яааван̃жа д̇з ид̣̇ам̣ абарад̣̇д̇хад̇и яад̇д̇агам̣ д̇аяаа абарад̣̇д̇хам̣, ад̇д̇ано налаадз махааг̇ан̣д̣ам̣ абассанд̇о саасабамад̇д̇ааяа бийл̣агааяа мам̣ жод̣̇зд̇аб̣б̣ам̣ ман̃н̃асийд̇и ааха.
Turūti kokālikassa upajjhāyo turutthero nāma anāgāmiphalaṃ vatvā brahmaloke nibbatto. So bhummaṭṭhadevatā ādiṃ katvā ‘‘ayuttaṃ kokālikena kataṃ aggasāvake antimavatthunā abbhācikkhantenā’’ti paramparāya brahmalokasampattaṃ taṃ saddaṃ sutvā ‘‘mā mayhaṃ passantasseva varāko nassi, ovadissāmi naṃ theresu cittappasādatthāyā’’ti āgantvā tassa purato aṭṭhāsi. Taṃ sandhāyetaṃ vuttaṃ – ‘‘turū paccekabrahmā’’ti. Pesalāti piyasīlā. Kosi tvaṃ, āvusoti nisinnakova kabarakkhīni ummīletvā evamāha. Passa yāvañca te idaṃ aparaddhati yattakaṃ tayā aparaddhaṃ, attano nalāṭe mahāgaṇḍaṃ apassanto sāsapamattāya pīḷakāya maṃ codetabbaṃ maññasīti āha.
ат̇а нам̣ ‘‘ад̣̇идтиббад̇д̇о аяам̣ гогаалиго, г̇илид̇ависо вияа на гассажи важанам̣ на гариссад̇ий’’д̇и н̃ад̇ваа бурисасса хийд̇иаад̣̇имааха. д̇ад̇т̇а гутаарийд̇и гутаарисад̣̇исаа парусаваажаа. чинд̣̇ад̇ийд̇и гусаламууласан̇каад̇з муулзязва ниганд̇ад̇и. нинд̣̇ияанд̇и нинд̣̇ид̇аб̣б̣ам̣ д̣̇уссийлабуг̇г̇алам̣. басам̣сад̇ийд̇и уд̇д̇амад̇т̇з самбхаавзд̇ваа кийн̣аасавод̇и вад̣̇ад̇и. д̇ам̣ ваа нинд̣̇ад̇и яо басам̣сияод̇и яо ваа басам̣сид̇аб̣б̣о кийн̣аасаво, д̇ам̣ анд̇имавад̇т̇унаа жод̣̇знд̇о ‘‘д̣̇уссийло аяа’’нд̇и вад̣̇ад̇и. вижинаад̇и мукзна со галинд̇и со д̇ам̣ абараад̇хам̣ мукзна вижинаад̇и наама. галинаа д̇знаад̇и д̇зна абараад̇хзна сукам̣ на винд̣̇ад̇и. нинд̣̇ияабасам̣сааяа хи басам̣сияанинд̣̇ааяа жа самагова вибааго.
Atha naṃ ‘‘adiṭṭhippatto ayaṃ kokāliko, gilitaviso viya na kassaci vacanaṃ na karissatī’’ti ñatvā purisassa hītiādimāha. Tattha kuṭhārīti kuṭhārisadisā pharusavācā. Chindatīti kusalamūlasaṅkhāte mūleyeva nikantati. Nindiyanti ninditabbaṃ dussīlapuggalaṃ. Pasaṃsatīti uttamatthe sambhāvetvā khīṇāsavoti vadati. Taṃ vā nindati yo pasaṃsiyoti yo vā pasaṃsitabbo khīṇāsavo, taṃ antimavatthunā codento ‘‘dussīlo aya’’nti vadati. Vicināti mukhena so kalinti so taṃ aparādhaṃ mukhena vicināti nāma. Kalinātenāti tena aparādhena sukhaṃ na vindati. Nindiyapasaṃsāya hi pasaṃsiyanindāya ca samakova vipāko.
саб̣б̣ассааби сахааби ад̇д̇анаад̇и саб̣б̣зна сагзна д̇ханзнаби ад̇д̇анааби сад̣̇д̇хим̣ яо агкзсу д̇ханабарааж̇аяо наама, аяам̣ аббамад̇д̇аго абараад̇хо. яо суг̇ад̇зсууд̇и яо бана саммаг̇г̇ад̇зсу буг̇г̇алзсу жид̇д̇ам̣ д̣̇уусзяяа, аяам̣ жид̇д̇абад̣̇осова д̇ад̇о галид̇о маханд̇ад̇аро гали.
Sabbassāpi sahāpi attanāti sabbena sakena dhanenapi attanāpi saddhiṃ yo akkhesu dhanaparājayo nāma, ayaṃ appamattako aparādho. Yo sugatesūti yo pana sammaggatesu puggalesu cittaṃ dūseyya, ayaṃ cittapadosova tato kalito mahantataro kali.
ид̣̇аани д̇асса маханд̇ад̇арабхаавам̣ д̣̇ассзнд̇о сад̇ам̣ сахассаананд̇иаад̣̇имааха. д̇ад̇т̇а сад̇ам̣ сахассаананд̇и нираб̣б̣уд̣̇аг̇ан̣анааяа сад̇асахассан̃жа. чад̇д̇им̣сад̇ийд̇и абараани чад̇д̇им̣сад̇и нираб̣б̣уд̣̇аани. бан̃жа жаад̇и аб̣б̣уд̣̇аг̇ан̣анааяа бан̃жа аб̣б̣уд̣̇аани. яамарияаг̇арахийд̇и яам̣ арияз г̇араханд̇о нираяам̣ убабаж̇ж̇ад̇и, д̇ад̇т̇а зд̇д̇агам̣ ааяуббамаан̣анд̇и ад̇т̇о.
Idāni tassa mahantatarabhāvaṃ dassento sataṃ sahassānantiādimāha. Tattha sataṃ sahassānanti nirabbudagaṇanāya satasahassañca. Chattiṃsatīti aparāni chattiṃsati nirabbudāni. Pañca cāti abbudagaṇanāya pañca abbudāni. Yamariyagarahīti yaṃ ariye garahanto nirayaṃ upapajjati, tattha ettakaṃ āyuppamāṇanti attho.
гааламагаасийд̇и убаж̇жхааяз багганд̇з гаалам̣ агааси. бад̣̇уманираяанд̇и баадиязгго бад̣̇уманираяо наама над̇т̇и, авийжимахаанираяасмим̣язва бана бад̣̇умаг̇ан̣анааяа бажжид̇аб̣б̣з згасмим̣ таанз ниб̣б̣ад̇д̇и.
Kālamakāsīti upajjhāye pakkante kālaṃ akāsi. Padumanirayanti pāṭiyekko padumanirayo nāma natthi, avīcimahānirayasmiṃyeva pana padumagaṇanāya paccitabbe ekasmiṃ ṭhāne nibbatti.
вийсад̇икааригод̇и мааг̇ад̇хагзна бад̇т̇зна жад̇д̇ааро бад̇т̇аа, госаларадтз зго бад̇т̇о ход̇и. д̇зна бад̇т̇зна жад̇д̇ааро бад̇т̇аа аал̣хагам̣ , жад̇д̇аари аал̣хагаани д̣̇он̣ам̣, жад̇уд̣̇он̣аа маанигаа, жад̇умаанигаа каарий, д̇ааяа каарияаа вийсад̇икаариго. д̇илавааход̇и мааг̇ад̇хагаанам̣ сукумад̇илаанам̣ д̇иласагадам̣. аб̣б̣уд̣̇о нираяод̇и аб̣б̣уд̣̇о наама баадиязгго нираяо над̇т̇и, авийжимхиязва бана аб̣б̣уд̣̇аг̇ан̣анааяа бажжид̇аб̣б̣адтаанассзд̇ам̣ наамам̣. нираб̣б̣уд̣̇аад̣̇ийсуби зсзва наяо.
Vīsatikhārikoti māgadhakena patthena cattāro patthā, kosalaraṭṭhe eko pattho hoti. Tena patthena cattāro patthā āḷhakaṃ , cattāri āḷhakāni doṇaṃ, catudoṇā mānikā, catumānikā khārī, tāya khāriyā vīsatikhāriko. Tilavāhoti māgadhakānaṃ sukhumatilānaṃ tilasakaṭaṃ. Abbudo nirayoti abbudo nāma pāṭiyekko nirayo natthi, avīcimhiyeva pana abbudagaṇanāya paccitabbaṭṭhānassetaṃ nāmaṃ. Nirabbudādīsupi eseva nayo.
вассаг̇ан̣анааби банзд̇т̇а звам̣ взд̣̇ид̇аб̣б̣аа – яат̇зва хи сад̇ам̣ сад̇асахассаани годи ход̇и, звам̣ сад̇ам̣ сад̇асахассагодияо багоди наама ход̇и, сад̇ам̣ сад̇асахассабагодияо годибагоди наама, сад̇ам̣ сад̇асахассагодибагодияо нахуд̇ам̣, сад̇ам̣ сад̇асахассанахуд̇аани ниннахуд̇ам̣, сад̇ам̣ сад̇асахассаниннахуд̇аани згам̣ аб̣б̣уд̣̇ам̣, д̇ад̇о вийсад̇иг̇ун̣ам̣ нираб̣б̣уд̣̇ам̣, зса наяо саб̣б̣ад̇т̇аад̇и. д̣̇асамам̣ хздтаа вуд̇д̇анаязнзва взд̣̇ид̇аб̣б̣ам̣. сзсам̣ саб̣б̣ад̇т̇а уд̇д̇аанад̇т̇амзваад̇и.
Vassagaṇanāpi panettha evaṃ veditabbā – yatheva hi sataṃ satasahassāni koṭi hoti, evaṃ sataṃ satasahassakoṭiyo pakoṭi nāma hoti, sataṃ satasahassapakoṭiyo koṭipakoṭi nāma, sataṃ satasahassakoṭipakoṭiyo nahutaṃ, sataṃ satasahassanahutāni ninnahutaṃ, sataṃ satasahassaninnahutāni ekaṃ abbudaṃ, tato vīsatiguṇaṃ nirabbudaṃ, esa nayo sabbatthāti. Dasamaṃ heṭṭhā vuttanayeneva veditabbaṃ. Sesaṃ sabbattha uttānatthamevāti.
т̇зраваг̇г̇о жад̇уд̇т̇о.
Theravaggo catuttho.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 9. гогаалигасуд̇д̇ам̣ • 9. Kokālikasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 9-10. гогаалигасуд̇д̇аад̣̇иван̣н̣анаа • 9-10. Kokālikasuttādivaṇṇanā
