| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
10. гогаалигасуд̇д̇аван̣н̣анаа
10. Kokālikasuttavaṇṇanā
181. д̣̇асамз гогаалиго бхигку язна бхаг̇аваа д̇знубасан̇гамийд̇и, го аяам̣ гогаалиго, гасмаа жа убасан̇гами? аяам̣ гира гогаалигарадтз гогаалиганаг̇арз гогаалигасздтисса буд̇д̇о баб̣б̣аж̇ид̇ваа бид̇араа гаараабид̇з вихаарз бадивасад̇и жуул̣агогаалигод̇и наамзна, на д̣̇звад̣̇ад̇д̇асса сиссо. со хи б̣раахман̣абуд̇д̇о махаагогаалиго наама. бхаг̇авад̇и бана саавад̇т̇ияам̣ вихаранд̇з д̣̇вз аг̇г̇асаавагаа бан̃жамад̇д̇зхи бхигкусад̇зхи сад̣̇д̇хим̣ ж̇анабад̣̇ажааригам̣ жарамаанаа убагадтааяа вассуубанааяигааяа вивзгааваасам̣ васид̇угаамаа д̇з бхигкуу уяяож̇зд̇ваа ад̇д̇ано бад̇д̇ажийварамаад̣̇ааяа д̇асмим̣ ж̇анабад̣̇з д̇ам̣ наг̇арам̣ бад̇ваа д̇ам̣ вихаарам̣ аг̇амам̣су. д̇ад̇т̇а нзсам̣ гогаалиго вад̇д̇ам̣ д̣̇ассзси. д̇з д̇зна сад̣̇д̇хим̣ саммод̣̇ид̇ваа, ‘‘аавусо, маяам̣ ид̇ха д̇змаасам̣ васиссаама, маа гассажи аарожзхий’’д̇и бадин̃н̃ам̣ г̇ахзд̇ваа васим̣су. васид̇ваа бавааран̣аад̣̇ивасз баваарзд̇ваа, ‘‘г̇ажчаама маяам̣, аавусо’’д̇и гогаалигам̣ аабужчим̣су. гогаалиго ‘‘аж̇ж̇згад̣̇ивасам̣, аавусо, васид̇ваа свз г̇амиссат̇аа’’д̇и вад̇ваа д̣̇уд̇ияад̣̇ивасз наг̇арам̣ бависид̇ваа мануссз ааманд̇зси – ‘‘аавусо, д̇умхз аг̇г̇асаавагз ид̇хааг̇анд̇ваа васамаанзби на ж̇аанаат̇а, на нз гожи бажжаязнааби ниманд̇зд̇ий’’д̇и. наг̇араваасино, ‘‘гахам̣, бханд̇з, т̇зраа, гасмаа но на аарожаяид̇т̇аа’’д̇и? гим̣ аавусо аарожид̇зна, гим̣ на бассат̇а д̣̇вз бхигкуу т̇зраасанз нисийд̣̇анд̇з, зд̇з аг̇г̇асаавагаад̇и. д̇з киббам̣ саннибад̇ид̇ваа саббипаан̣ид̇аад̣̇ийни жзва жийварад̣̇уссаани жа сам̣харим̣су.
181. Dasame kokāliko bhikkhu yena bhagavā tenupasaṅkamīti, ko ayaṃ kokāliko, kasmā ca upasaṅkami? Ayaṃ kira kokālikaraṭṭhe kokālikanagare kokālikaseṭṭhissa putto pabbajitvā pitarā kārāpite vihāre paṭivasati cūḷakokālikoti nāmena, na devadattassa sisso. So hi brāhmaṇaputto mahākokāliko nāma. Bhagavati pana sāvatthiyaṃ viharante dve aggasāvakā pañcamattehi bhikkhusatehi saddhiṃ janapadacārikaṃ caramānā upakaṭṭhāya vassūpanāyikāya vivekāvāsaṃ vasitukāmā te bhikkhū uyyojetvā attano pattacīvaramādāya tasmiṃ janapade taṃ nagaraṃ patvā taṃ vihāraṃ agamaṃsu. Tattha nesaṃ kokāliko vattaṃ dassesi. Te tena saddhiṃ sammoditvā, ‘‘āvuso, mayaṃ idha temāsaṃ vasissāma, mā kassaci ārocehī’’ti paṭiññaṃ gahetvā vasiṃsu. Vasitvā pavāraṇādivase pavāretvā, ‘‘gacchāma mayaṃ, āvuso’’ti kokālikaṃ āpucchiṃsu. Kokāliko ‘‘ajjekadivasaṃ, āvuso, vasitvā sve gamissathā’’ti vatvā dutiyadivase nagaraṃ pavisitvā manusse āmantesi – ‘‘āvuso, tumhe aggasāvake idhāgantvā vasamānepi na jānātha, na ne koci paccayenāpi nimantetī’’ti. Nagaravāsino, ‘‘kahaṃ, bhante, therā, kasmā no na ārocayitthā’’ti? Kiṃ āvuso ārocitena, kiṃ na passatha dve bhikkhū therāsane nisīdante, ete aggasāvakāti. Te khippaṃ sannipatitvā sappiphāṇitādīni ceva cīvaradussāni ca saṃhariṃsu.
гогаалиго жинд̇зси – ‘‘барамаббижчаа аг̇г̇асаавагаа баяуд̇д̇аваажааяа уббаннам̣ лаабхам̣ на саад̣̇ияиссанд̇и , асаад̣̇ияанд̇аа ‘ааваасигасса д̣̇зт̇аа’д̇и вагканд̇ий’’д̇и. д̇ам̣ д̇ам̣ лаабхам̣ г̇аахаабзд̇ваа т̇зраанам̣ санд̇игам̣ аг̇амааси. т̇зраа д̣̇исваава ‘‘имз бажжаяаа нзва амхаагам̣, на гогаалигасса габбанд̇ий’’д̇и бадигкибид̇ваа баггамим̣су. гогаалиго ‘‘гат̇ам̣ хи наама ад̇д̇анаа аг̇ан̣ханд̇аа маяхамби ад̣̇аабзд̇ваа баггамиссанд̇ий’’д̇и? аагхаад̇ам̣ уббаад̣̇зси. д̇зби бхаг̇авад̇о санд̇игам̣ г̇анд̇ваа бхаг̇аванд̇ам̣ ванд̣̇ид̇ваа буна ад̇д̇ано барисам̣ аад̣̇ааяа ж̇анабад̣̇ажааригам̣ жаранд̇аа анубуб̣б̣зна д̇асмим̣ радтз д̇амзва наг̇арам̣ бажжааг̇амим̣су. нааг̇араа т̇зрз сан̃ж̇аанид̇ваа саха баригкаарзхи д̣̇аанам̣ саж̇ж̇ид̇ваа наг̇арамаж̇жхз ман̣д̣абам̣ гад̇ваа д̣̇аанам̣ ад̣̇ам̣су, т̇зраанан̃жа баригкаарз убанаамзсум̣. т̇зраа бхигкусан̇гхасса нияяаад̣̇аяим̣су. д̇ам̣ д̣̇исваа гогаалиго жинд̇зси – ‘‘имз буб̣б̣з аббижчаа ахзсум̣, ид̣̇аани баабижчаа ж̇аад̇аа, буб̣б̣зби аббижчасанд̇удтабавивид̇д̇асад̣̇исаа ман̃н̃з’’д̇и т̇зрз убасан̇гамид̇ваа, ‘‘аавусо, д̇умхз буб̣б̣з аббижчаа вияа, ид̣̇аани бана баабабхигкуу ж̇аад̇аа’’д̇и вад̇ваа ‘‘мууладтаанзязва нзсам̣ бад̇идтам̣ бхинд̣̇иссаамий’’д̇и д̇арамаанаруубо нигкамид̇ваа саавад̇т̇им̣ г̇анд̇ваа язна бхаг̇аваа д̇знубасан̇гами. аяамзва гогаалиго иминаа жа гааран̣зна убасан̇гамийд̇и взд̣̇ид̇аб̣б̣о.
Kokāliko cintesi – ‘‘paramappicchā aggasāvakā payuttavācāya uppannaṃ lābhaṃ na sādiyissanti , asādiyantā ‘āvāsikassa dethā’ti vakkhantī’’ti. Taṃ taṃ lābhaṃ gāhāpetvā therānaṃ santikaṃ agamāsi. Therā disvāva ‘‘ime paccayā neva amhākaṃ, na kokālikassa kappantī’’ti paṭikkhipitvā pakkamiṃsu. Kokāliko ‘‘kathaṃ hi nāma attanā agaṇhantā mayhampi adāpetvā pakkamissantī’’ti? Āghātaṃ uppādesi. Tepi bhagavato santikaṃ gantvā bhagavantaṃ vanditvā puna attano parisaṃ ādāya janapadacārikaṃ carantā anupubbena tasmiṃ raṭṭhe tameva nagaraṃ paccāgamiṃsu. Nāgarā there sañjānitvā saha parikkhārehi dānaṃ sajjitvā nagaramajjhe maṇḍapaṃ katvā dānaṃ adaṃsu, therānañca parikkhāre upanāmesuṃ. Therā bhikkhusaṅghassa niyyādayiṃsu. Taṃ disvā kokāliko cintesi – ‘‘ime pubbe appicchā ahesuṃ, idāni pāpicchā jātā, pubbepi appicchasantuṭṭhapavivittasadisā maññe’’ti there upasaṅkamitvā, ‘‘āvuso, tumhe pubbe appicchā viya, idāni pana pāpabhikkhū jātā’’ti vatvā ‘‘mūlaṭṭhāneyeva nesaṃ patiṭṭhaṃ bhindissāmī’’ti taramānarūpo nikkhamitvā sāvatthiṃ gantvā yena bhagavā tenupasaṅkami. Ayameva kokāliko iminā ca kāraṇena upasaṅkamīti veditabbo.
бхаг̇аваа д̇ам̣ д̇урид̇ад̇урид̇ам̣ ааг̇ажчанд̇ам̣ д̣̇исваава ааваж̇ж̇знд̇о ан̃н̃ааси – ‘‘аяам̣ аг̇г̇асаавагз аггосид̇угаамо ааг̇ад̇о’’д̇и. ‘‘саггаа ну ко бадисзд̇хзд̇у’’нд̇и жа ааваж̇ж̇знд̇о, ‘‘на саггаа бадисзд̇хзд̇ум̣, т̇зрзсу абараж̇жхид̇ваа гаалан̇гад̇о згам̣сзна бад̣̇уманираяз ниб̣б̣ад̇д̇иссад̇ий’’д̇и д̣̇исваа, ‘‘саарибуд̇д̇амог̇г̇аллаанзби наама г̇араханд̇ам̣ суд̇ваа на нисзд̇хзд̇ий’’д̇и ваад̣̇аможанад̇т̇ам̣ арияуубаваад̣̇асса жа махаасааваж̇ж̇абхаавад̣̇ассанад̇т̇ам̣ маа хзванд̇и д̇игкад̇д̇ум̣ бадисзд̇хзси. д̇ад̇т̇а маа хзванд̇и маа звам̣ абхан̣и. сад̣̇д̇хааяигод̇и сад̣̇д̇хааяа аагаро басаад̣̇аавахо сад̣̇д̇хаад̇аб̣б̣аважано ваа. бажжаяигод̇и бад̇д̇ияааяид̇аб̣б̣аважано.
Bhagavā taṃ turitaturitaṃ āgacchantaṃ disvāva āvajjento aññāsi – ‘‘ayaṃ aggasāvake akkositukāmo āgato’’ti. ‘‘Sakkā nu kho paṭisedhetu’’nti ca āvajjento, ‘‘na sakkā paṭisedhetuṃ, theresu aparajjhitvā kālaṅkato ekaṃsena padumaniraye nibbattissatī’’ti disvā, ‘‘sāriputtamoggallānepi nāma garahantaṃ sutvā na nisedhetī’’ti vādamocanatthaṃ ariyūpavādassa ca mahāsāvajjabhāvadassanatthaṃ mā hevanti tikkhattuṃ paṭisedhesi. Tattha mā hevanti mā evaṃ abhaṇi. Saddhāyikoti saddhāya ākaro pasādāvaho saddhātabbavacano vā. Paccayikoti pattiyāyitabbavacano.
баггаамийд̇и гаммаанубхаавзна жод̣̇ияамаано баггаами. огаасагад̇ам̣ хи гаммам̣ на саггаа бадиб̣аахид̇ум̣, д̇ам̣ д̇асса д̇ад̇т̇а таад̇ум̣ на ад̣̇ааси. ажирабагганд̇ассаад̇и багганд̇асса сад̇о на жирзнзва. саб̣б̣о гааяо пудо ахосийд̇и гзсаг̇г̇амад̇д̇амби огаасам̣ ааваж̇ж̇зд̇ваа сагаласарийрам̣ адтийни бхинд̣̇ид̇ваа уг̇г̇ад̇аахи бийл̣агаахи аж̇жход̇т̇адам̣ ахоси. яасмаа бана б̣уд̣̇д̇хаанубхаавзна д̇ат̇ааруубам̣ гаммам̣ б̣уд̣̇д̇хаанам̣ саммукийбхаавз вибаагам̣ на д̣̇зд̇и, д̣̇ассануубажаарз виж̇ахид̇амад̇д̇з д̣̇зд̇и, д̇асмаа д̇асса ажирабагганд̇асса бийл̣агаа удтахим̣су. галааяамад̇д̇ияод̇и жан̣агамад̇д̇ияо. б̣злувасалаадугамад̇д̇ияод̇и д̇арун̣аб̣злувамад̇д̇ияо. (б̣илламад̇д̇ияод̇и махааб̣злувамад̇д̇ияо.) бабхиж̇ж̇им̣сууд̇и бхиж̇ж̇им̣су. д̇аасу бхиннаасу сагаласарийрам̣ банасабаггам̣ вияа ахоси. со баггзна г̇ад̇д̇зна ж̇зд̇аванад̣̇ваарагодтагз висаг̇илид̇о мажчо вияа гад̣̇алибад̇д̇зсу саяи. ат̇а д̇хаммасаванад̇т̇ам̣ ааг̇ад̇ааг̇ад̇аа мануссаа – ‘‘д̇хи гогаалига, д̇хи гогаалига, аяуд̇д̇амагааси, ад̇д̇аноязва мукам̣ ниссааяа анаяаб̣яасанам̣ бад̇д̇о’’д̇и аахам̣су. д̇зсам̣ суд̇ваа аарагкад̣̇звад̇аа д̇хи-гаарам̣ агам̣су. аарагкагад̣̇звад̇аанам̣ аагаасад̣̇звад̇аад̇и иминаа убааязна яаава аганидтабхаванаа згад̇хигааро уд̣̇абаад̣̇и. ат̇асса убаж̇жхааяо ааг̇анд̇ваа оваад̣̇ам̣ аг̇ан̣ханд̇ам̣ н̃ад̇ваа г̇арахид̇ваа баггаами.
Pakkāmīti kammānubhāvena codiyamāno pakkāmi. Okāsakataṃ hi kammaṃ na sakkā paṭibāhituṃ, taṃ tassa tattha ṭhātuṃ na adāsi. Acirapakkantassāti pakkantassa sato na cireneva. Sabbo kāyo phuṭoahosīti kesaggamattampi okāsaṃ āvajjetvā sakalasarīraṃ aṭṭhīni bhinditvā uggatāhi pīḷakāhi ajjhotthaṭaṃ ahosi. Yasmā pana buddhānubhāvena tathārūpaṃ kammaṃ buddhānaṃ sammukhībhāve vipākaṃ na deti, dassanūpacāre vijahitamatte deti, tasmā tassa acirapakkantassa pīḷakā uṭṭhahiṃsu. Kalāyamattiyoti caṇakamattiyo. Beluvasalāṭukamattiyoti taruṇabeluvamattiyo. (Billamattiyoti mahābeluvamattiyo.) Pabhijjiṃsūti bhijjiṃsu. Tāsu bhinnāsu sakalasarīraṃ panasapakkaṃ viya ahosi. So pakkena gattena jetavanadvārakoṭṭhake visagilito maccho viya kadalipattesu sayi. Atha dhammasavanatthaṃ āgatāgatā manussā – ‘‘dhi kokālika, dhi kokālika, ayuttamakāsi, attanoyeva mukhaṃ nissāya anayabyasanaṃ patto’’ti āhaṃsu. Tesaṃ sutvā ārakkhadevatā dhi-kāraṃ akaṃsu. Ārakkhakadevatānaṃ ākāsadevatāti iminā upāyena yāva akaniṭṭhabhavanā ekadhikāro udapādi. Athassa upajjhāyo āgantvā ovādaṃ agaṇhantaṃ ñatvā garahitvā pakkāmi.
гааламагаасийд̇и убаж̇жхааяз багганд̇з гааламагааси. бад̣̇умам̣ нираяанд̇и баадиязгго бад̣̇уманираяо наама над̇т̇и, авийжимахаанираяамхиязва бана бад̣̇умаг̇ан̣анааяа бажжид̇аб̣б̣з згасмим̣ таанз ниб̣б̣ад̇д̇и.
Kālamakāsīti upajjhāye pakkante kālamakāsi. Padumaṃ nirayanti pāṭiyekko padumanirayo nāma natthi, avīcimahānirayamhiyeva pana padumagaṇanāya paccitabbe ekasmiṃ ṭhāne nibbatti.
вийсад̇икааригод̇и мааг̇ад̇хагзна бад̇т̇зна жад̇д̇ааро бад̇т̇аа госаларадтз згабад̇т̇о ход̇и, д̇зна бад̇т̇зна жад̇д̇ааро бад̇т̇аа аал̣хагам̣, жад̇д̇аари аал̣хагаани д̣̇он̣ам̣, жад̇уд̣̇он̣аа маанигаа, жад̇умаанигаа каарий, д̇ааяа каарияаа вийсад̇икаариго. д̇илавааход̇и мааг̇ад̇хагаанам̣ сукумад̇илаанам̣ д̇иласагадам̣. аб̣б̣уд̣̇о нираяод̇и аб̣б̣уд̣̇о наама баадиязгго нираяо над̇т̇и. авийжимхиязва бана аб̣б̣уд̣̇аг̇ан̣анааяа бажжид̇аб̣б̣адтаанассзд̇ам̣ наамам̣. нираб̣б̣уд̣̇аад̣̇ийсуби зсзва наяо.
Vīsatikhārikoti māgadhakena patthena cattāro patthā kosalaraṭṭhe ekapattho hoti, tena patthena cattāro patthā āḷhakaṃ, cattāri āḷhakāni doṇaṃ, catudoṇā mānikā, catumānikā khārī, tāya khāriyā vīsatikhāriko. Tilavāhoti māgadhakānaṃ sukhumatilānaṃ tilasakaṭaṃ. Abbudo nirayoti abbudo nāma pāṭiyekko nirayo natthi. Avīcimhiyeva pana abbudagaṇanāya paccitabbaṭṭhānassetaṃ nāmaṃ. Nirabbudādīsupi eseva nayo.
вассаг̇ан̣анааби банзд̇т̇а звам̣ взд̣̇ид̇аб̣б̣аа – яат̇зва хи сад̇ам̣ сад̇асахассаани годи ход̇и, звам̣ сад̇ам̣ сад̇асахассагодияо багоди наама ход̇и, сад̇ам̣ сад̇асахассабагодияо годибагоди наама, сад̇ам̣ сад̇асахассагодибагодияо нахуд̇ам̣, сад̇ам̣ сад̇асахассанахуд̇аани ниннахуд̇ам̣, сад̇ам̣ сад̇асахассаниннахуд̇аани згам̣ аб̣б̣уд̣̇ам̣, д̇ад̇о вийсад̇иг̇ун̣ам̣ нираб̣б̣уд̣̇ам̣. зсзва наяо саб̣б̣ад̇т̇аад̇и. д̣̇асамам̣.
Vassagaṇanāpi panettha evaṃ veditabbā – yatheva hi sataṃ satasahassāni koṭi hoti, evaṃ sataṃ satasahassakoṭiyo pakoṭi nāma hoti, sataṃ satasahassapakoṭiyo koṭipakoṭi nāma, sataṃ satasahassakoṭipakoṭiyo nahutaṃ, sataṃ satasahassanahutāni ninnahutaṃ, sataṃ satasahassaninnahutāni ekaṃ abbudaṃ, tato vīsatiguṇaṃ nirabbudaṃ. Eseva nayo sabbatthāti. Dasamaṃ.
батамо ваг̇г̇о.
Paṭhamo vaggo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 10. гогаалигасуд̇д̇ам̣ • 10. Kokālikasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 10. гогаалигасуд̇д̇аван̣н̣анаа • 10. Kokālikasuttavaṇṇanā
