| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๑๐. โกกาลิกสุตฺตวณฺณนา
10. Kokālikasuttavaṇṇanā
๑๘๑. เทฺว โกกาลิกนามกา ภิกฺขู, ตโต อิธ อธิเปฺปตํ นิทฺธาเรตฺวา ทเสฺสตุํ – ‘‘โก อยํ โกกาลิโก’’ติ? ปุจฺฉาฯ สุตฺตสฺส อฎฺฐุปฺปตฺติํ ทเสฺสตุํ – ‘‘กสฺมา จ อุปสงฺกมี’’ติ? ปุจฺฉา ฯ อยํ กิราติอาทิ ยถากฺกมํ ตาสํ วิสฺสชฺชนํฯ วิเวกวาสํ วสิตุกามตฺตา อปฺปิจฺฉตาย จ มา กสฺสจิ…เป.… วสิํสุฯ
181. Dve kokālikanāmakā bhikkhū, tato idha adhippetaṃ niddhāretvā dassetuṃ – ‘‘ko ayaṃ kokāliko’’ti? Pucchā. Suttassa aṭṭhuppattiṃ dassetuṃ – ‘‘kasmā ca upasaṅkamī’’ti? Pucchā . Ayaṃ kirātiādi yathākkamaṃ tāsaṃ vissajjanaṃ. Vivekavāsaṃ vasitukāmattā appicchatāya ca mā kassaci…pe… vasiṃsu.
ปกฺกมิสฺสนฺตีติ อาฆาตํ อุปฺปาเทสิ อตฺตโน อิจฺฉาวิฆาตนโตฯ เถรา ภิกฺขุสงฺฆสฺส นิยฺยาทยิํสุ ปยุตฺตวาจาย อกตตฺตา เถเรหิ จ อทีปิตตฺตาฯ ปุเพฺพปิ…เป.… มเญฺญติ อิมินา เถรานํ โกหเญฺญ ฐิตภาวํ อาสงฺกติ อวเณ วณํ ปสฺสโนฺต วิย, สุเทฺธ อาทาสตเล เลขํ อุฎฺฐาเปโนฺต วิย จฯ
Pakkamissantīti āghātaṃ uppādesi attano icchāvighātanato. Therā bhikkhusaṅghassa niyyādayiṃsu payuttavācāya akatattā therehi ca adīpitattā. Pubbepi…pe… maññeti iminā therānaṃ kohaññe ṭhitabhāvaṃ āsaṅkati avaṇe vaṇaṃ passanto viya, suddhe ādāsatale lekhaṃ uṭṭhāpento viya ca.
อปรชฺฌิตฺวาติ ภควโต สมฺมุขา ‘‘ปาปภิกฺขู ชาตา’’ติ วตฺวาฯ อาห ‘‘สทฺธาย อากโร ปสาทาวโห’’ติฯ ปวตฺตสทฺธายิโก วาติ อโตฺถติ อาห ‘‘สทฺธาตพฺพวจโน’’ติฯ
Aparajjhitvāti bhagavato sammukhā ‘‘pāpabhikkhū jātā’’ti vatvā. Āha ‘‘saddhāya ākaro pasādāvaho’’ti. Pavattasaddhāyiko vāti atthoti āha ‘‘saddhātabbavacano’’ti.
ปีฬกา นาม พาหิรโต ปฎฺฐาย อฎฺฐิํ ภินฺทติ, อิมา ปน ปฐมํเยว อฎฺฐิํ ภินฺทิตฺวา อุคฺคตาฯ ตรุณเพลุวมตฺติโยติ ตรุณพิลฺลผลมตฺติโยฯ วิสคิลิโตติ ขิตฺตปหรโณฯ ตญฺจ พฬิสํ วิสสมญฺญา โลเกฯ ‘‘อารกฺขเทวตานํ สุตฺวา’’ติ ปทํ อาเนตฺวา สมฺพโนฺธฯ
Pīḷakā nāma bāhirato paṭṭhāya aṭṭhiṃ bhindati, imā pana paṭhamaṃyeva aṭṭhiṃ bhinditvā uggatā. Taruṇabeluvamattiyoti taruṇabillaphalamattiyo. Visagilitoti khittapaharaṇo. Tañca baḷisaṃ visasamaññā loke. ‘‘Ārakkhadevatānaṃ sutvā’’ti padaṃ ānetvā sambandho.
มคธรเฎฺฐ สํโวหารโต มาคธโก ปโตฺต, เตนฯ ติลสกฎํ ติลวาหาเอติ วุโตฺตฯ ปจฺจิตพฺพฎฺฐานสฺสาติ นิรยทุเกฺขน ปจฺจิตพฺพปเทสสฺสฯ เอตํ ‘‘อพฺพุโท’’ติ นามํฯ
Magadharaṭṭhe saṃvohārato māgadhako patto, tena. Tilasakaṭaṃ tilavāhāeti vutto. Paccitabbaṭṭhānassāti nirayadukkhena paccitabbapadesassa. Etaṃ ‘‘abbudo’’ti nāmaṃ.
วสฺสคณนาติ เอกโต ปฎฺฐาย ทสคุณิตํ อพฺพุทอายุมฺหิ, ตโต ปรํ วีสติคุณํ นิรพฺพุทาทีสุ วสฺสคณนา เวทิตพฺพาฯ สพฺพตฺถาติ อพพาทีสุ ปทุมปริโยสาเนสุ สเพฺพสุ นิรเยสุฯ เอเสว นโยติ เหฎฺฐิมโต อุปริมสฺส อุปริมสฺส วีสติคุณตํ อติทิสติฯ
Vassagaṇanāti ekato paṭṭhāya dasaguṇitaṃ abbudaāyumhi, tato paraṃ vīsatiguṇaṃ nirabbudādīsu vassagaṇanā veditabbā. Sabbatthāti ababādīsu padumapariyosānesu sabbesu nirayesu. Eseva nayoti heṭṭhimato uparimassa uparimassa vīsatiguṇataṃ atidisati.
โกกาลิกสุตฺตวณฺณนา นิฎฺฐิตาฯ
Kokālikasuttavaṇṇanā niṭṭhitā.
ปฐมวคฺควณฺณนา นิฎฺฐิตาฯ
Paṭhamavaggavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๑๐. โกกาลิกสุตฺตํ • 10. Kokālikasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑๐. โกกาลิกสุตฺตวณฺณนา • 10. Kokālikasuttavaṇṇanā
