| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೦. ಕೋಕಾಲಿಕಸುತ್ತವಣ್ಣನಾ
10. Kokālikasuttavaṇṇanā
೧೮೧. ದ್ವೇ ಕೋಕಾಲಿಕನಾಮಕಾ ಭಿಕ್ಖೂ, ತತೋ ಇಧ ಅಧಿಪ್ಪೇತಂ ನಿದ್ಧಾರೇತ್ವಾ ದಸ್ಸೇತುಂ – ‘‘ಕೋ ಅಯಂ ಕೋಕಾಲಿಕೋ’’ತಿ? ಪುಚ್ಛಾ। ಸುತ್ತಸ್ಸ ಅಟ್ಠುಪ್ಪತ್ತಿಂ ದಸ್ಸೇತುಂ – ‘‘ಕಸ್ಮಾ ಚ ಉಪಸಙ್ಕಮೀ’’ತಿ? ಪುಚ್ಛಾ । ಅಯಂ ಕಿರಾತಿಆದಿ ಯಥಾಕ್ಕಮಂ ತಾಸಂ ವಿಸ್ಸಜ್ಜನಂ। ವಿವೇಕವಾಸಂ ವಸಿತುಕಾಮತ್ತಾ ಅಪ್ಪಿಚ್ಛತಾಯ ಚ ಮಾ ಕಸ್ಸಚಿ…ಪೇ॰… ವಸಿಂಸು।
181. Dve kokālikanāmakā bhikkhū, tato idha adhippetaṃ niddhāretvā dassetuṃ – ‘‘ko ayaṃ kokāliko’’ti? Pucchā. Suttassa aṭṭhuppattiṃ dassetuṃ – ‘‘kasmā ca upasaṅkamī’’ti? Pucchā . Ayaṃ kirātiādi yathākkamaṃ tāsaṃ vissajjanaṃ. Vivekavāsaṃ vasitukāmattā appicchatāya ca mā kassaci…pe… vasiṃsu.
ಪಕ್ಕಮಿಸ್ಸನ್ತೀತಿ ಆಘಾತಂ ಉಪ್ಪಾದೇಸಿ ಅತ್ತನೋ ಇಚ್ಛಾವಿಘಾತನತೋ। ಥೇರಾ ಭಿಕ್ಖುಸಙ್ಘಸ್ಸ ನಿಯ್ಯಾದಯಿಂಸು ಪಯುತ್ತವಾಚಾಯ ಅಕತತ್ತಾ ಥೇರೇಹಿ ಚ ಅದೀಪಿತತ್ತಾ। ಪುಬ್ಬೇಪಿ…ಪೇ॰… ಮಞ್ಞೇತಿ ಇಮಿನಾ ಥೇರಾನಂ ಕೋಹಞ್ಞೇ ಠಿತಭಾವಂ ಆಸಙ್ಕತಿ ಅವಣೇ ವಣಂ ಪಸ್ಸನ್ತೋ ವಿಯ, ಸುದ್ಧೇ ಆದಾಸತಲೇ ಲೇಖಂ ಉಟ್ಠಾಪೇನ್ತೋ ವಿಯ ಚ।
Pakkamissantīti āghātaṃ uppādesi attano icchāvighātanato. Therā bhikkhusaṅghassa niyyādayiṃsu payuttavācāya akatattā therehi ca adīpitattā. Pubbepi…pe… maññeti iminā therānaṃ kohaññe ṭhitabhāvaṃ āsaṅkati avaṇe vaṇaṃ passanto viya, suddhe ādāsatale lekhaṃ uṭṭhāpento viya ca.
ಅಪರಜ್ಝಿತ್ವಾತಿ ಭಗವತೋ ಸಮ್ಮುಖಾ ‘‘ಪಾಪಭಿಕ್ಖೂ ಜಾತಾ’’ತಿ ವತ್ವಾ। ಆಹ ‘‘ಸದ್ಧಾಯ ಆಕರೋ ಪಸಾದಾವಹೋ’’ತಿ। ಪವತ್ತಸದ್ಧಾಯಿಕೋ ವಾತಿ ಅತ್ಥೋತಿ ಆಹ ‘‘ಸದ್ಧಾತಬ್ಬವಚನೋ’’ತಿ।
Aparajjhitvāti bhagavato sammukhā ‘‘pāpabhikkhū jātā’’ti vatvā. Āha ‘‘saddhāya ākaro pasādāvaho’’ti. Pavattasaddhāyiko vāti atthoti āha ‘‘saddhātabbavacano’’ti.
ಪೀಳಕಾ ನಾಮ ಬಾಹಿರತೋ ಪಟ್ಠಾಯ ಅಟ್ಠಿಂ ಭಿನ್ದತಿ, ಇಮಾ ಪನ ಪಠಮಂಯೇವ ಅಟ್ಠಿಂ ಭಿನ್ದಿತ್ವಾ ಉಗ್ಗತಾ। ತರುಣಬೇಲುವಮತ್ತಿಯೋತಿ ತರುಣಬಿಲ್ಲಫಲಮತ್ತಿಯೋ। ವಿಸಗಿಲಿತೋತಿ ಖಿತ್ತಪಹರಣೋ। ತಞ್ಚ ಬಳಿಸಂ ವಿಸಸಮಞ್ಞಾ ಲೋಕೇ। ‘‘ಆರಕ್ಖದೇವತಾನಂ ಸುತ್ವಾ’’ತಿ ಪದಂ ಆನೇತ್ವಾ ಸಮ್ಬನ್ಧೋ।
Pīḷakā nāma bāhirato paṭṭhāya aṭṭhiṃ bhindati, imā pana paṭhamaṃyeva aṭṭhiṃ bhinditvā uggatā. Taruṇabeluvamattiyoti taruṇabillaphalamattiyo. Visagilitoti khittapaharaṇo. Tañca baḷisaṃ visasamaññā loke. ‘‘Ārakkhadevatānaṃ sutvā’’ti padaṃ ānetvā sambandho.
ಮಗಧರಟ್ಠೇ ಸಂವೋಹಾರತೋ ಮಾಗಧಕೋ ಪತ್ತೋ, ತೇನ। ತಿಲಸಕಟಂ ತಿಲವಾಹಾಏತಿ ವುತ್ತೋ। ಪಚ್ಚಿತಬ್ಬಟ್ಠಾನಸ್ಸಾತಿ ನಿರಯದುಕ್ಖೇನ ಪಚ್ಚಿತಬ್ಬಪದೇಸಸ್ಸ। ಏತಂ ‘‘ಅಬ್ಬುದೋ’’ತಿ ನಾಮಂ।
Magadharaṭṭhe saṃvohārato māgadhako patto, tena. Tilasakaṭaṃ tilavāhāeti vutto. Paccitabbaṭṭhānassāti nirayadukkhena paccitabbapadesassa. Etaṃ ‘‘abbudo’’ti nāmaṃ.
ವಸ್ಸಗಣನಾತಿ ಏಕತೋ ಪಟ್ಠಾಯ ದಸಗುಣಿತಂ ಅಬ್ಬುದಆಯುಮ್ಹಿ, ತತೋ ಪರಂ ವೀಸತಿಗುಣಂ ನಿರಬ್ಬುದಾದೀಸು ವಸ್ಸಗಣನಾ ವೇದಿತಬ್ಬಾ। ಸಬ್ಬತ್ಥಾತಿ ಅಬಬಾದೀಸು ಪದುಮಪರಿಯೋಸಾನೇಸು ಸಬ್ಬೇಸು ನಿರಯೇಸು। ಏಸೇವ ನಯೋತಿ ಹೇಟ್ಠಿಮತೋ ಉಪರಿಮಸ್ಸ ಉಪರಿಮಸ್ಸ ವೀಸತಿಗುಣತಂ ಅತಿದಿಸತಿ।
Vassagaṇanāti ekato paṭṭhāya dasaguṇitaṃ abbudaāyumhi, tato paraṃ vīsatiguṇaṃ nirabbudādīsu vassagaṇanā veditabbā. Sabbatthāti ababādīsu padumapariyosānesu sabbesu nirayesu. Eseva nayoti heṭṭhimato uparimassa uparimassa vīsatiguṇataṃ atidisati.
ಕೋಕಾಲಿಕಸುತ್ತವಣ್ಣನಾ ನಿಟ್ಠಿತಾ।
Kokālikasuttavaṇṇanā niṭṭhitā.
ಪಠಮವಗ್ಗವಣ್ಣನಾ ನಿಟ್ಠಿತಾ।
Paṭhamavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೦. ಕೋಕಾಲಿಕಸುತ್ತಂ • 10. Kokālikasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧೦. ಕೋಕಾಲಿಕಸುತ್ತವಣ್ಣನಾ • 10. Kokālikasuttavaṇṇanā
