| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
10. කොකාලිකසුත්‌තවණ්‌ණනා
10. Kokālikasuttavaṇṇanā
181. ද්‌වෙ කොකාලිකනාමකා භික්‌ඛූ, තතො ඉධ අධිප්‌පෙතං නිද්‌ධාරෙත්‌වා දස්‌සෙතුං – ‘‘කො අයං කොකාලිකො’’ති? පුච්‌ඡා. සුත්‌තස්‌ස අට්‌ඨුප්‌පත්‌තිං දස්‌සෙතුං – ‘‘කස්‌මා ච උපසඞ්‌කමී’’ති? පුච්‌ඡා . අයං කිරාතිආදි යථාක්‌කමං තාසං විස්‌සජ්‌ජනං. විවෙකවාසං වසිතුකාමත්‌තා අප්‌පිච්‌ඡතාය ච මා කස්‌සචි…පෙ.… වසිංසු.
181. Dve kokālikanāmakā bhikkhū, tato idha adhippetaṃ niddhāretvā dassetuṃ – ‘‘ko ayaṃ kokāliko’’ti? Pucchā. Suttassa aṭṭhuppattiṃ dassetuṃ – ‘‘kasmā ca upasaṅkamī’’ti? Pucchā . Ayaṃ kirātiādi yathākkamaṃ tāsaṃ vissajjanaṃ. Vivekavāsaṃ vasitukāmattā appicchatāya ca mā kassaci…pe… vasiṃsu.
පක්‌කමිස්‌සන්‌තීති ආඝාතං උප්‌පාදෙසි අත්‌තනො ඉච්‌ඡාවිඝාතනතො. ථෙරා භික්‌ඛුසඞ්‌ඝස්‌ස නිය්‍යාදයිංසු පයුත්‌තවාචාය අකතත්‌තා ථෙරෙහි ච අදීපිතත්‌තා. පුබ්‌බෙපි…පෙ.… මඤ්‌ඤෙති ඉමිනා ථෙරානං කොහඤ්‌ඤෙ ඨිතභාවං ආසඞ්‌කති අවණෙ වණං පස්‌සන්‌තො විය, සුද්‌ධෙ ආදාසතලෙ ලෙඛං උට්‌ඨාපෙන්‌තො විය ච.
Pakkamissantīti āghātaṃ uppādesi attano icchāvighātanato. Therā bhikkhusaṅghassa niyyādayiṃsu payuttavācāya akatattā therehi ca adīpitattā. Pubbepi…pe… maññeti iminā therānaṃ kohaññe ṭhitabhāvaṃ āsaṅkati avaṇe vaṇaṃ passanto viya, suddhe ādāsatale lekhaṃ uṭṭhāpento viya ca.
අපරජ්‌ඣිත්‌වාති භගවතො සම්‌මුඛා ‘‘පාපභික්‌ඛූ ජාතා’’ති වත්‌වා. ආහ ‘‘සද්‌ධාය ආකරො පසාදාවහො’’ති. පවත්‌තසද්‌ධායිකො වාති අත්‌ථොති ආහ ‘‘සද්‌ධාතබ්‌බවචනො’’ති.
Aparajjhitvāti bhagavato sammukhā ‘‘pāpabhikkhū jātā’’ti vatvā. Āha ‘‘saddhāya ākaro pasādāvaho’’ti. Pavattasaddhāyiko vāti atthoti āha ‘‘saddhātabbavacano’’ti.
පීළකා නාම බාහිරතො පට්‌ඨාය අට්‌ඨිං භින්‌දති, ඉමා පන පඨමංයෙව අට්‌ඨිං භින්‌දිත්‌වා උග්‌ගතා. තරුණබෙලුවමත්‌තියොති තරුණබිල්‌ලඵලමත්‌තියො. විසගිලිතොති ඛිත්‌තපහරණො. තඤ්‌ච බළිසං විසසමඤ්‌ඤා ලොකෙ. ‘‘ආරක්‌ඛදෙවතානං සුත්‌වා’’ති පදං ආනෙත්‌වා සම්‌බන්‌ධො.
Pīḷakā nāma bāhirato paṭṭhāya aṭṭhiṃ bhindati, imā pana paṭhamaṃyeva aṭṭhiṃ bhinditvā uggatā. Taruṇabeluvamattiyoti taruṇabillaphalamattiyo. Visagilitoti khittapaharaṇo. Tañca baḷisaṃ visasamaññā loke. ‘‘Ārakkhadevatānaṃ sutvā’’ti padaṃ ānetvā sambandho.
මගධරට්‌ඨෙ සංවොහාරතො මාගධකො පත්‌තො, තෙන. තිලසකටං තිලවාහාඑති වුත්‌තො. පච්‌චිතබ්‌බට්‌ඨානස්‌සාති නිරයදුක්‌ඛෙන පච්‌චිතබ්‌බපදෙසස්‌ස. එතං ‘‘අබ්‌බුදො’’ති නාමං.
Magadharaṭṭhe saṃvohārato māgadhako patto, tena. Tilasakaṭaṃ tilavāhāeti vutto. Paccitabbaṭṭhānassāti nirayadukkhena paccitabbapadesassa. Etaṃ ‘‘abbudo’’ti nāmaṃ.
වස්‌සගණනාති එකතො පට්‌ඨාය දසගුණිතං අබ්‌බුදආයුම්‌හි, තතො පරං වීසතිගුණං නිරබ්‌බුදාදීසු වස්‌සගණනා වෙදිතබ්‌බා. සබ්‌බත්‌ථාති අබබාදීසු පදුමපරියොසානෙසු සබ්‌බෙසු නිරයෙසු. එසෙව නයොති හෙට්‌ඨිමතො උපරිමස්‌ස උපරිමස්‌ස වීසතිගුණතං අතිදිසති.
Vassagaṇanāti ekato paṭṭhāya dasaguṇitaṃ abbudaāyumhi, tato paraṃ vīsatiguṇaṃ nirabbudādīsu vassagaṇanā veditabbā. Sabbatthāti ababādīsu padumapariyosānesu sabbesu nirayesu. Eseva nayoti heṭṭhimato uparimassa uparimassa vīsatiguṇataṃ atidisati.
කොකාලිකසුත්‌තවණ්‌ණනා නිට්‌ඨිතා.
Kokālikasuttavaṇṇanā niṭṭhitā.
පඨමවග්‌ගවණ්‌ණනා නිට්‌ඨිතා.
Paṭhamavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 10. කොකාලිකසුත්‌තං • 10. Kokālikasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. කොකාලිකසුත්‌තවණ්‌ණනා • 10. Kokālikasuttavaṇṇanā
