| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6-8. கோகனுத³ஸுத்தாதி³வண்ணனா
6-8. Kokanudasuttādivaṇṇanā
96-98. ச²ட்டே² க²ந்தா⁴பி தி³ட்டி²ட்டா²னங் ஆரம்மணட்டே²ன ‘‘ரூபங் அத்ததோ ஸமனுபஸ்ஸதீ’’திஆதி³வசனதோ. அவிஜ்ஜாபி தி³ட்டி²ட்டா²னங் உபனிஸ்ஸயாதி³பா⁴வேன பவத்தனதோ. யதா²ஹ ‘‘அஸ்ஸுதவா, பி⁴க்க²வே, புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³’’திஆதி³ (த⁴॰ ஸ॰ 1007). ப²ஸ்ஸோபி தி³ட்டி²ட்டா²னங். யதா² சாஹ ‘‘தத³பி ப²ஸ்ஸபச்சயா (தீ³॰ நி॰ 1.118-130) பு²ஸ்ஸ பு²ஸ்ஸ படிஸங்வேதி³யந்தீ’’தி (தீ³॰ நி॰ 1.144) ச. ஸஞ்ஞாபி தி³ட்டி²ட்டா²னங். வுத்தஞ்ஹேதங் ‘‘ஸஞ்ஞானிதா³னா ஹி பபஞ்சஸங்கா² (ஸு॰ நி॰ 880; மஹானி॰ 109), பத²விதோ ஸஞ்ஞத்வா’’தி (ம॰ நி॰ 1.2) ச ஆதி³. விதக்கோபி தி³ட்டி²ட்டா²னங். வுத்தம்பி சேதங் ‘‘தக்கஞ்ச தி³ட்டீ²ஸு பகப்பயித்வா, ஸச்சங் முஸாதி த்³வயத⁴ம்மமாஹூ’’தி (ஸு॰ நி॰ 892; மஹானி॰ 121), ‘‘தக்கீ ஹோதி வீமங்ஸீ’’தி (தீ³॰ நி॰ 1.34) ச ஆதி³. அயோனிஸோமனஸிகாரோபி தி³ட்டி²ட்டா²னங். தேனாஹ ப⁴க³வா – ‘‘தஸ்ஸேவங் அயோனிஸோ மனஸிகரோதோ ச²ன்னங் தி³ட்டீ²னங் அஞ்ஞதரா தி³ட்டி² உப்பஜ்ஜதி, அத்தி² மே அத்தாதி தஸ்ஸ ஸச்சதோ தே²ததோ தி³ட்டி² உப்பஜ்ஜதீ’’திஆதி³ (ம॰ நி॰ 1.19).
96-98. Chaṭṭhe khandhāpi diṭṭhiṭṭhānaṃ ārammaṇaṭṭhena ‘‘rūpaṃ attato samanupassatī’’tiādivacanato. Avijjāpi diṭṭhiṭṭhānaṃ upanissayādibhāvena pavattanato. Yathāha ‘‘assutavā, bhikkhave, puthujjano ariyānaṃ adassāvī ariyadhammassa akovido’’tiādi (dha. sa. 1007). Phassopi diṭṭhiṭṭhānaṃ. Yathā cāha ‘‘tadapi phassapaccayā (dī. ni. 1.118-130) phussa phussa paṭisaṃvediyantī’’ti (dī. ni. 1.144) ca. Saññāpi diṭṭhiṭṭhānaṃ. Vuttañhetaṃ ‘‘saññānidānā hi papañcasaṅkhā (su. ni. 880; mahāni. 109), pathavito saññatvā’’ti (ma. ni. 1.2) ca ādi. Vitakkopi diṭṭhiṭṭhānaṃ. Vuttampi cetaṃ ‘‘takkañca diṭṭhīsu pakappayitvā, saccaṃ musāti dvayadhammamāhū’’ti (su. ni. 892; mahāni. 121), ‘‘takkī hoti vīmaṃsī’’ti (dī. ni. 1.34) ca ādi. Ayonisomanasikāropi diṭṭhiṭṭhānaṃ. Tenāha bhagavā – ‘‘tassevaṃ ayoniso manasikaroto channaṃ diṭṭhīnaṃ aññatarā diṭṭhi uppajjati, atthi me attāti tassa saccato thetato diṭṭhi uppajjatī’’tiādi (ma. ni. 1.19).
யா தி³ட்டீ²தி இதா³னி வுச்சமானானங் அட்டா²ரஸன்னங் பதா³னங் ஸாதா⁴ரணங் மூலபத³ங். தி³ட்டி²யேவ தி³ட்டி²க³தங் கூ³த²க³தங் விய, தி³ட்டீ²ஸு வா க³தங் இத³ங் த³ஸ்ஸனங் த்³வாஸட்டி²தி³ட்டீ²ஸு அந்தோக³த⁴த்தாதிபி தி³ட்டி²க³தங், தி³ட்டி²யா வா க³தங் தி³ட்டி²க³தங். இத³ஞ்ஹி ‘‘அத்தி² மே அத்தா’’திஆதி³ தி³ட்டி²யா க³மனமத்தமேவ , நத்தெ²த்த² அத்தா வா நிச்சோ வா கோசீதி வுத்தங் ஹோதி. ஸா சாயங் தி³ட்டி² து³ன்னிக்³க³மனட்டே²ன க³ஹனங். து³ரதிக்கமட்டே²ன ஸப்படிப⁴யட்டே²ன ச கந்தாரோ து³ப்³பி⁴க்க²கந்தாரவாளகந்தாராத³யோ விய. ஸம்மாதி³ட்டி²யா வினிவிஜ்ஜ²னட்டே²ன, விலோமனட்டே²ன வா விஸூகங். கதா³சி ஸஸ்ஸதஸ்ஸ, கதா³சி உச்சே²த³ஸ்ஸ வா க³ஹணதோ விரூபங் ப²ந்தி³தந்தி விப்ப²ந்தி³தங். ப³ந்த⁴னட்டே²ன ஸங்யோஜனங். தி³ட்டி²யேவ அந்தோ துத³னட்டே²ன து³ன்னீஹரணீயட்டே²ன ச ஸல்லந்தி தி³ட்டி²ஸல்லங். தி³ட்டி²யேவ பீளாகரணட்டே²ன ஸம்பா³தோ⁴தி தி³ட்டி²ஸம்பா³தோ⁴. தி³ட்டி²யேவ மொக்கா²வரணட்டே²ன பலிபோ³தோ⁴தி தி³ட்டி²பலிபோ³தோ⁴. தி³ட்டி²யேவ து³ம்மோசனீயட்டே²ன ப³ந்த⁴னந்தி தி³ட்டி²ப³ந்த⁴னங். தி³ட்டி²யேவ து³ருத்தரணட்டே²ன பபாதோதி தி³ட்டி²பபாதோ. தி³ட்டி²யேவ தா²மக³தட்டே²ன அனுஸயோதி தி³ட்டா²னுஸயோ. தி³ட்டி²யேவ அத்தானங் ஸந்தாபேதீதி தி³ட்டி²ஸந்தாபோ. தி³ட்டி²யேவ அத்தானங் அனுத³ஹதீதி தி³ட்டி²பரிளாஹோ. தி³ட்டி²யேவ கிலேஸகாயங் க³ந்தே²தீதி தி³ட்டி²க³ந்தோ². தி³ட்டி²யேவ பு⁴ஸங் ஆதி³யதீதி தி³ட்டு²பாதா³னங். தி³ட்டி²யேவ ‘‘ஸச்ச’’ந்திஆதி³வஸேன அபி⁴னிவிஸதீதி தி³ட்டா²பி⁴னிவேஸோ. தி³ட்டி²யேவ ‘‘இத³ங் பர’’ந்தி ஆமஸதி, பரதோ வா ஆமஸதீதி தி³ட்டி²பராமாஸோ, ஸமுட்டா²தி ஏதேனாதி ஸமுட்டா²னங், காரணங். ஸமுட்டா²னஸ்ஸ பா⁴வோ ஸமுட்டா²னட்டோ², தேன ஸமுட்டா²னட்டே²ன, காரணபா⁴வேனாதி அத்தோ². ஸத்தமட்ட²மேஸு நத்தி² வத்தப்³ப³ங்.
Yā diṭṭhīti idāni vuccamānānaṃ aṭṭhārasannaṃ padānaṃ sādhāraṇaṃ mūlapadaṃ. Diṭṭhiyeva diṭṭhigataṃ gūthagataṃ viya, diṭṭhīsu vā gataṃ idaṃ dassanaṃ dvāsaṭṭhidiṭṭhīsu antogadhattātipi diṭṭhigataṃ, diṭṭhiyā vā gataṃ diṭṭhigataṃ. Idañhi ‘‘atthi me attā’’tiādi diṭṭhiyā gamanamattameva , natthettha attā vā nicco vā kocīti vuttaṃ hoti. Sā cāyaṃ diṭṭhi dunniggamanaṭṭhena gahanaṃ. Duratikkamaṭṭhena sappaṭibhayaṭṭhena ca kantāro dubbhikkhakantāravāḷakantārādayo viya. Sammādiṭṭhiyā vinivijjhanaṭṭhena, vilomanaṭṭhena vā visūkaṃ. Kadāci sassatassa, kadāci ucchedassa vā gahaṇato virūpaṃ phanditanti vipphanditaṃ. Bandhanaṭṭhena saṃyojanaṃ. Diṭṭhiyeva anto tudanaṭṭhena dunnīharaṇīyaṭṭhena ca sallanti diṭṭhisallaṃ. Diṭṭhiyeva pīḷākaraṇaṭṭhena sambādhoti diṭṭhisambādho. Diṭṭhiyeva mokkhāvaraṇaṭṭhena palibodhoti diṭṭhipalibodho. Diṭṭhiyeva dummocanīyaṭṭhena bandhananti diṭṭhibandhanaṃ. Diṭṭhiyeva duruttaraṇaṭṭhena papātoti diṭṭhipapāto. Diṭṭhiyeva thāmagataṭṭhena anusayoti diṭṭhānusayo. Diṭṭhiyeva attānaṃ santāpetīti diṭṭhisantāpo. Diṭṭhiyeva attānaṃ anudahatīti diṭṭhipariḷāho. Diṭṭhiyeva kilesakāyaṃ ganthetīti diṭṭhigantho. Diṭṭhiyeva bhusaṃ ādiyatīti diṭṭhupādānaṃ. Diṭṭhiyeva ‘‘sacca’’ntiādivasena abhinivisatīti diṭṭhābhiniveso. Diṭṭhiyeva ‘‘idaṃ para’’nti āmasati, parato vā āmasatīti diṭṭhiparāmāso, samuṭṭhāti etenāti samuṭṭhānaṃ, kāraṇaṃ. Samuṭṭhānassa bhāvo samuṭṭhānaṭṭho, tena samuṭṭhānaṭṭhena, kāraṇabhāvenāti attho. Sattamaṭṭhamesu natthi vattabbaṃ.
கோகனுத³ஸுத்தாதி³வண்ணனா நிட்டி²தா.
Kokanudasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
6. கோகனுத³ஸுத்தங் • 6. Kokanudasuttaṃ
7. ஆஹுனெய்யஸுத்தங் • 7. Āhuneyyasuttaṃ
8. தே²ரஸுத்தங் • 8. Therasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
6. கோகனுத³ஸுத்தவண்ணனா • 6. Kokanudasuttavaṇṇanā
7-8. ஆஹுனெய்யஸுத்தாதி³வண்ணனா • 7-8. Āhuneyyasuttādivaṇṇanā
