| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. கோகனுத³ஸுத்தவண்ணனா
6. Kokanudasuttavaṇṇanā
96. ச²ட்டே² புப்³பா³பயமானோதி புப்³ப³ஸதி³ஸானி நிருத³கானி குருமானோ. க்வெத்த², ஆவுஸோதி கோ எத்த², ஆவுஸோ. யாவதா, ஆவுஸோ, தி³ட்டீ²தி யத்திகா த்³வாஸட்டி²விதா⁴பி தி³ட்டி² நாம அத்தி². யாவதா தி³ட்டி²ட்டா²னந்தி ‘‘க²ந்தா⁴பி தி³ட்டி²ட்டா²னங், அவிஜ்ஜாபி, ப²ஸ்ஸோபி, ஸஞ்ஞாபி, விதக்கோபி அயோனிஸோமனஸிகாரோபி, பாபமித்தோபி , பரதோகோ⁴ஸோபி தி³ட்டி²ட்டா²ன’’ந்தி ஏவங் யத்தகங் அட்ட²வித⁴ம்பி தி³ட்டி²ட்டா²னங் தி³ட்டி²காரணங் நாம அத்தி². தி³ட்டா²தி⁴ட்டா²னந்தி தி³ட்டீ²னங் அதி⁴ட்டா²னங், அதி⁴ட²த்வா அதி⁴ப⁴வித்வா பவத்தாய தி³ட்டி²யா ஏதங் நாமங். தி³ட்டி²பரியுட்டா²னந்தி ‘‘கதமானி அட்டா²ரஸ தி³ட்டி²பரியுட்டா²னானி? யா தி³ட்டி² தி³ட்டி²க³தங் தி³ட்டி²க³ஹனங் தி³ட்டி²கந்தாரங் தி³ட்டி²விஸூகங் தி³ட்டி²விப்ப²ந்தி³தங் தி³ட்டி²ஸங்யோஜனங் தி³ட்டி²ஸல்லங் தி³ட்டி²ஸம்பா³தோ⁴ தி³ட்டி²பலிபோ³தோ⁴ தி³ட்டி²ப³ந்த⁴னங் தி³ட்டி²பபாதோ தி³ட்டா²னுஸயோ தி³ட்டி²ஸந்தாபோ தி³ட்டி²பரிளாஹோ தி³ட்டி²க³ந்தோ² தி³ட்டு²பாதா³னங் தி³ட்டா²பி⁴னிவேஸோ தி³ட்டி²பராமாஸோ. இமானி அட்டா²ரஸ தி³ட்டி²பரியுட்டா²னானீ’’தி ஏவங் வுத்தங் தி³ட்டி²பரியுட்டா²னங். ஸமுட்டா²னந்தி தி³ட்டி²ட்டா²னஸ்ஸேவ வேவசனங். வுத்தஞ்ஹேதங் – ‘‘க²ந்தா⁴ பச்சயோ தி³ட்டீ²னங் உபாதா³ய ஸமுட்டா²னட்டே²னா’’தி (படி॰ ம॰ 1.124) ஸப்³ப³ங் வித்தா²ரேதப்³ப³ங். ஸோதாபத்திமக்³கோ³ பன தி³ட்டி²ஸமுக்³கா⁴தோ நாம ஸப்³ப³தி³ட்டீ²னங் ஸமுக்³கா⁴தகத்தா. தமஹந்தி தங் ஸப்³ப³ங் அஹங் ஜானாமி. க்யாஹங் வக்கா²மீதி கிங்காரணா அஹங் வக்கா²மி.
96. Chaṭṭhe pubbāpayamānoti pubbasadisāni nirudakāni kurumāno. Kvettha, āvusoti ko ettha, āvuso. Yāvatā, āvuso, diṭṭhīti yattikā dvāsaṭṭhividhāpi diṭṭhi nāma atthi. Yāvatā diṭṭhiṭṭhānanti ‘‘khandhāpi diṭṭhiṭṭhānaṃ, avijjāpi, phassopi, saññāpi, vitakkopi ayonisomanasikāropi, pāpamittopi , paratoghosopi diṭṭhiṭṭhāna’’nti evaṃ yattakaṃ aṭṭhavidhampi diṭṭhiṭṭhānaṃ diṭṭhikāraṇaṃ nāma atthi. Diṭṭhādhiṭṭhānanti diṭṭhīnaṃ adhiṭṭhānaṃ, adhiṭhatvā adhibhavitvā pavattāya diṭṭhiyā etaṃ nāmaṃ. Diṭṭhipariyuṭṭhānanti ‘‘katamāni aṭṭhārasa diṭṭhipariyuṭṭhānāni? Yā diṭṭhi diṭṭhigataṃ diṭṭhigahanaṃ diṭṭhikantāraṃ diṭṭhivisūkaṃ diṭṭhivipphanditaṃ diṭṭhisaṃyojanaṃ diṭṭhisallaṃ diṭṭhisambādho diṭṭhipalibodho diṭṭhibandhanaṃ diṭṭhipapāto diṭṭhānusayo diṭṭhisantāpo diṭṭhipariḷāho diṭṭhigantho diṭṭhupādānaṃ diṭṭhābhiniveso diṭṭhiparāmāso. Imāni aṭṭhārasa diṭṭhipariyuṭṭhānānī’’ti evaṃ vuttaṃ diṭṭhipariyuṭṭhānaṃ. Samuṭṭhānanti diṭṭhiṭṭhānasseva vevacanaṃ. Vuttañhetaṃ – ‘‘khandhā paccayo diṭṭhīnaṃ upādāya samuṭṭhānaṭṭhenā’’ti (paṭi. ma. 1.124) sabbaṃ vitthāretabbaṃ. Sotāpattimaggo pana diṭṭhisamugghāto nāma sabbadiṭṭhīnaṃ samugghātakattā. Tamahanti taṃ sabbaṃ ahaṃ jānāmi. Kyāhaṃ vakkhāmīti kiṃkāraṇā ahaṃ vakkhāmi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. கோகனுத³ஸுத்தங் • 6. Kokanudasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6-8. கோகனுத³ஸுத்தாதி³வண்ணனா • 6-8. Kokanudasuttādivaṇṇanā
