| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. ভিক্খুসংযুত্তং
10. Bhikkhusaṃyuttaṃ
১. কোলিতসুত্তৰণ্ণনা
1. Kolitasuttavaṇṇanā
২৩৫. সাৰকানং আলাপোতি সাৰকানং সব্রহ্মচারিং উদ্দিস্স আলাপো। বুদ্ধেহি সদিসা মা হোমাতি বুদ্ধাচিণ্ণং সমুদাচারং অকথেন্তেহি সাৰকেহি, ‘‘আৰুসো ভিক্খৰে’’তি আলপিতা ভিক্খূ, ‘‘আৰুসো’’তি পটিৰচনং দেন্তি, ন, ‘‘ভন্তে’’তি। দুতিযজ্ঝানে ৰিতক্কৰিচারা নিরুজ্ঝন্তি তেসং নিরোধেনেৰ তস্স ঝানস্স উপ্পাদেতব্বতো। যেসং নিরোধাতি যেসং ৰচীসঙ্গারানং ৰিতক্কৰিচারানং নিরুজ্ঝনেন সুৰিক্খম্ভিতভাৰেন সদ্দাযতনং অপ্পৰত্তিং গচ্ছতি কারণস্স দূরতো পস্সম্ভিতত্তা। অরিযোতি নিদ্দোসো। পরিসুদ্ধো তুণ্হীভাৰো, ন তিত্থিযানং মূগব্বতগ্গহণং ৰিয অপরিসুদ্ধোতি অধিপ্পাযো। পঠমজ্ঝানাদীনীতি আদি-সদ্দেন ততিযজ্ঝানাদীনি সঙ্গণ্হাতি।
235.Sāvakānaṃālāpoti sāvakānaṃ sabrahmacāriṃ uddissa ālāpo. Buddhehi sadisā mā homāti buddhāciṇṇaṃ samudācāraṃ akathentehi sāvakehi, ‘‘āvuso bhikkhave’’ti ālapitā bhikkhū, ‘‘āvuso’’ti paṭivacanaṃ denti, na, ‘‘bhante’’ti. Dutiyajjhāne vitakkavicārā nirujjhanti tesaṃ nirodheneva tassa jhānassa uppādetabbato. Yesaṃ nirodhāti yesaṃ vacīsaṅgārānaṃ vitakkavicārānaṃ nirujjhanena suvikkhambhitabhāvena saddāyatanaṃ appavattiṃ gacchati kāraṇassa dūrato passambhitattā. Ariyoti niddoso. Parisuddho tuṇhībhāvo, na titthiyānaṃ mūgabbataggahaṇaṃ viya aparisuddhoti adhippāyo. Paṭhamajjhānādīnīti ādi-saddena tatiyajjhānādīni saṅgaṇhāti.
আরম্মণভূতেন ৰিতক্কেন সহ গতা পৰত্তাতি ৰিতক্কসহগতাতি আহ ‘‘ৰিতক্কারম্মণা’’তি। ৰিতক্কারম্মণতা চ সঞ্ঞামনসিকারানং সুখুমআরম্মণগ্গহণৰসেন দট্ঠব্বা। তেনাহ ‘‘ন সন্ততো উপট্ঠহিংসূ’’তি। ন পগুণং সম্মদেৰ ৰসীভাৰস্স অনাপাদিতত্তা। সঞ্ঞামনসিকারাপীতি ততিযজ্ঝানাধিগমায পৰত্তিযমানা সঞ্ঞামনসিকারাপি হানভাগিযাৰ অহেসুং, ন ৰিসেসভাগিযা। সম্মা ঠপেহীতি বহিদ্ধা ৰিক্খেপং পহায সম্মা অজ্ঝত্তমেৰ চিত্তং ঠপেহি। একগ্গং করোহীতি তেনেৰ ৰিক্খেপপটিবাহনেন অৰিহতমানসতায চিত্তসমাধানৰসেন একগ্গং করোহি। আরোপেহীতি ঈসকম্পি বহুম্পি অপতিতং কত্ৰা কম্মট্ঠানারম্মণে আরোপেহি। দুতিযঅগ্গসাৰকভূমিযা পারিপূরিযা আযস্মা মহাভিঞ্ঞো, ন যথা তথাতি আহ ‘‘মহাভিঞ্ঞতন্তি ছল়ভিঞ্ঞত’’ন্তি। ইমিনা উপাযেনাতি ইমিনা ‘‘অথ খো মং, আৰুসো’’তিআদিনা ৰুত্তেন উপাযেন। ৰড্ঢেত্ৰাতি উত্তরি উত্তরি ৰিসেসভাগিযভাৰাপাদনেন সমাধিং পঞ্ঞঞ্চ ব্রূহেত্ৰা ব্রূহেত্ৰা।
Ārammaṇabhūtena vitakkena saha gatā pavattāti vitakkasahagatāti āha ‘‘vitakkārammaṇā’’ti. Vitakkārammaṇatā ca saññāmanasikārānaṃ sukhumaārammaṇaggahaṇavasena daṭṭhabbā. Tenāha ‘‘na santato upaṭṭhahiṃsū’’ti. Na paguṇaṃ sammadeva vasībhāvassa anāpāditattā. Saññāmanasikārāpīti tatiyajjhānādhigamāya pavattiyamānā saññāmanasikārāpi hānabhāgiyāva ahesuṃ, na visesabhāgiyā. Sammā ṭhapehīti bahiddhā vikkhepaṃ pahāya sammā ajjhattameva cittaṃ ṭhapehi. Ekaggaṃ karohīti teneva vikkhepapaṭibāhanena avihatamānasatāya cittasamādhānavasena ekaggaṃ karohi. Āropehīti īsakampi bahumpi apatitaṃ katvā kammaṭṭhānārammaṇe āropehi. Dutiyaaggasāvakabhūmiyā pāripūriyā āyasmā mahābhiñño, na yathā tathāti āha ‘‘mahābhiññatanti chaḷabhiññata’’nti. Iminā upāyenāti iminā ‘‘atha kho maṃ, āvuso’’tiādinā vuttena upāyena. Vaḍḍhetvāti uttari uttari visesabhāgiyabhāvāpādanena samādhiṃ paññañca brūhetvā brūhetvā.
কোলিতসুত্তৰণ্ণনা নিট্ঠিতা।
Kolitasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. কোলিতসুত্তং • 1. Kolitasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. কোলিতসুত্তৰণ্ণনা • 1. Kolitasuttavaṇṇanā
