| Library / Tipiṭaka / তিপিটক • Tipiṭaka / বুদ্ধৰংসপাল়ি • Buddhavaṃsapāḷi |
২৫. কোণাগমনবুদ্ধৰংসো
25. Koṇāgamanabuddhavaṃso
১.
1.
ককুসন্ধস্স অপরেন, সম্বুদ্ধো দ্ৰিপদুত্তমো।
Kakusandhassa aparena, sambuddho dvipaduttamo;
কোণাগমনো নাম জিনো, লোকজেট্ঠো নরাসভো॥
Koṇāgamano nāma jino, lokajeṭṭho narāsabho.
২.
2.
দসধম্মে পূরযিত্ৰান, কন্তারং সমতিক্কমি।
Dasadhamme pūrayitvāna, kantāraṃ samatikkami;
পৰাহিয মলং সব্বং, পত্তো সম্বোধিমুত্তমং॥
Pavāhiya malaṃ sabbaṃ, patto sambodhimuttamaṃ.
৩.
3.
ধম্মচক্কং পৰত্তেন্তে, কোণাগমননাযকে।
Dhammacakkaṃ pavattente, koṇāgamananāyake;
তিংসকোটিসহস্সানং, পঠমাভিসমযো অহু॥
Tiṃsakoṭisahassānaṃ, paṭhamābhisamayo ahu.
৪.
4.
পাটিহীরং করোন্তে চ, পরৰাদপ্পমদ্দনে।
Pāṭihīraṃ karonte ca, paravādappamaddane;
ৰীসতিকোটিসহস্সানং, দুতিযাভিসমযো অহু॥
Vīsatikoṭisahassānaṃ, dutiyābhisamayo ahu.
৫.
5.
ততো ৰিকুব্বনং কত্ৰা, জিনো দেৰপুরং গতো।
Tato vikubbanaṃ katvā, jino devapuraṃ gato;
ৰসতে তত্থ সম্বুদ্ধো, সিলায পণ্ডুকম্বলে॥
Vasate tattha sambuddho, silāya paṇḍukambale.
৬.
6.
পকরণে সত্ত দেসেন্তো, ৰস্সং ৰসতি সো মুনি।
Pakaraṇe satta desento, vassaṃ vasati so muni;
দসকোটিসহস্সানং, ততিযাভিসমযো অহু॥
Dasakoṭisahassānaṃ, tatiyābhisamayo ahu.
৭.
7.
তস্সাপি দেৰদেৰস্স, একো আসি সমাগমো।
Tassāpi devadevassa, eko āsi samāgamo;
খীণাসৰানং ৰিমলানং, সন্তচিত্তান তাদিনং॥
Khīṇāsavānaṃ vimalānaṃ, santacittāna tādinaṃ.
৮.
8.
তিংসভিক্খুসহস্সানং , তদা আসি সমাগমো।
Tiṃsabhikkhusahassānaṃ , tadā āsi samāgamo;
ওঘানমতিক্কন্তানং, ভিজ্জিতানঞ্চ মচ্চুযা॥
Oghānamatikkantānaṃ, bhijjitānañca maccuyā.
৯.
9.
অহং তেন সমযেন, পব্বতো নাম খত্তিযো।
Ahaṃ tena samayena, pabbato nāma khattiyo;
মিত্তামচ্চেহি সম্পন্নো, অনন্তবলৰাহনো॥
Mittāmaccehi sampanno, anantabalavāhano.
১০.
10.
সম্বুদ্ধদস্সনং গন্ত্ৰা, সুত্ৰা ধম্মমনুত্তরং।
Sambuddhadassanaṃ gantvā, sutvā dhammamanuttaraṃ;
নিমন্তেত্ৰা সজিনসঙ্ঘং, দানং দত্ৰা যদিচ্ছকং॥
Nimantetvā sajinasaṅghaṃ, dānaṃ datvā yadicchakaṃ.
১১.
11.
পট্টুণ্ণং চীনপট্টঞ্চ, কোসেয্যং কম্বলম্পি চ।
Paṭṭuṇṇaṃ cīnapaṭṭañca, koseyyaṃ kambalampi ca;
সোৰণ্ণপাদুকঞ্চেৰ, অদাসিং সত্থুসাৰকে॥
Sovaṇṇapādukañceva, adāsiṃ satthusāvake.
১২.
12.
সোপি মং বুদ্ধো ব্যাকাসি, সঙ্ঘমজ্ঝে নিসীদিয।
Sopi maṃ buddho byākāsi, saṅghamajjhe nisīdiya;
‘‘ইমম্হি ভদ্দকে কপ্পে, অযং বুদ্ধো ভৰিস্সতি॥
‘‘Imamhi bhaddake kappe, ayaṃ buddho bhavissati.
১৩.
13.
‘‘অহু কপিলৰ্হযা রম্মা…পে॰… হেস্সাম সম্মুখা ইমং’’॥
‘‘Ahu kapilavhayā rammā…pe… hessāma sammukhā imaṃ’’.
১৪.
14.
তস্সাপি ৰচনং সুত্ৰা, ভিয্যো চিত্তং পসাদযিং।
Tassāpi vacanaṃ sutvā, bhiyyo cittaṃ pasādayiṃ;
উত্তরিং ৰতমধিট্ঠাসিং, দসপারমিপূরিযা॥
Uttariṃ vatamadhiṭṭhāsiṃ, dasapāramipūriyā.
১৫.
15.
সব্বঞ্ঞুতং গৰেসন্তো, দানং দত্ৰা নরুত্তমে।
Sabbaññutaṃ gavesanto, dānaṃ datvā naruttame;
১৬.
16.
নগরং সোভৰতী নাম, সোভো নামাসি খত্তিযো।
Nagaraṃ sobhavatī nāma, sobho nāmāsi khattiyo;
ৰসতে তত্থ নগরে, সম্বুদ্ধস্স মহাকুলং॥
Vasate tattha nagare, sambuddhassa mahākulaṃ.
১৭.
17.
ব্রাহ্মণো যঞ্ঞদত্তো চ, আসি বুদ্ধস্স সো পিতা।
Brāhmaṇo yaññadatto ca, āsi buddhassa so pitā;
উত্তরা নাম জনিকা, কোণাগমনস্স সত্থুনো॥
Uttarā nāma janikā, koṇāgamanassa satthuno.
১৮.
18.
তীণি ৰস্সসহস্সানি, অগারং অজ্ঝ সো ৰসি।
Tīṇi vassasahassāni, agāraṃ ajjha so vasi;
তুসিতসন্তুসিতসন্তুট্ঠা, তযো পাসাদমুত্তমা॥
Tusitasantusitasantuṭṭhā, tayo pāsādamuttamā.
১৯.
19.
অনূনসোল়সসহস্সানি, নারিযো সমলঙ্কতা।
Anūnasoḷasasahassāni, nāriyo samalaṅkatā;
রুচিগত্তা নাম নারী, সত্থৰাহো নাম অত্রজো॥
Rucigattā nāma nārī, satthavāho nāma atrajo.
২০.
20.
নিমিত্তে চতুরো দিস্ৰা, হত্থিযানেন নিক্খমি।
Nimitte caturo disvā, hatthiyānena nikkhami;
ছমাসং পধানচারং, অচরী পুরিসুত্তমো॥
Chamāsaṃ padhānacāraṃ, acarī purisuttamo.
২১.
21.
ব্রহ্মুনা যাচিতো সন্তো, কোণাগমননাযকো।
Brahmunā yācito santo, koṇāgamananāyako;
ৰত্তি চক্কং মহাৰীরো, মিগদাযে নরুত্তমো॥
Vatti cakkaṃ mahāvīro, migadāye naruttamo.
২২.
22.
ভিয্যসো উত্তরো নাম, অহেসুং অগ্গসাৰকা।
Bhiyyaso uttaro nāma, ahesuṃ aggasāvakā;
সোত্থিজো নামুপট্ঠাকো, কোণাগমনস্স সত্থুনো॥
Sotthijo nāmupaṭṭhāko, koṇāgamanassa satthuno.
২৩.
23.
সমুদ্দা উত্তরা চেৰ, অহেসুং অগ্গসাৰিকা।
Samuddā uttarā ceva, ahesuṃ aggasāvikā;
বোধি তস্স ভগৰতো, উদুম্বরোতি পৰুচ্চতি॥
Bodhi tassa bhagavato, udumbaroti pavuccati.
২৪.
24.
উগ্গো চ সোমদেৰো চ, অহেসুং অগ্গুপট্ঠকা।
Uggo ca somadevo ca, ahesuṃ aggupaṭṭhakā;
সীৰলা চেৰ সামা চ, অহেসুং অগ্গুপট্ঠিকা॥
Sīvalā ceva sāmā ca, ahesuṃ aggupaṭṭhikā.
২৫.
25.
উচ্চত্তনেন সো বুদ্ধো, তিংসহত্থসমুগ্গতো।
Uccattanena so buddho, tiṃsahatthasamuggato;
উক্কামুখে যথা কম্বু, এৰং রংসীহি মণ্ডিতো॥
Ukkāmukhe yathā kambu, evaṃ raṃsīhi maṇḍito.
২৬.
26.
তিংসৰস্সসহস্সানি, আযু বুদ্ধস্স তাৰদে।
Tiṃsavassasahassāni, āyu buddhassa tāvade;
তাৰতা তিট্ঠমানো সো, তারেসি জনতং বহুং॥
Tāvatā tiṭṭhamāno so, tāresi janataṃ bahuṃ.
২৭.
27.
ধম্মচেতিং সমুস্সেত্ৰা, ধম্মদুস্সৰিভূসিতং।
Dhammacetiṃ samussetvā, dhammadussavibhūsitaṃ;
ধম্মপুপ্ফগুল়ং কত্ৰা, নিব্বুতো সো সসাৰকো॥
Dhammapupphaguḷaṃ katvā, nibbuto so sasāvako.
২৮.
28.
মহাৰিলাসো তস্স জনো, সিরিধম্মপ্পকাসনো।
Mahāvilāso tassa jano, siridhammappakāsano;
সব্বং তমন্তরহিতং, ননু রিত্তা সব্বসঙ্খারা॥
Sabbaṃ tamantarahitaṃ, nanu rittā sabbasaṅkhārā.
২৯.
29.
কোণাগমনো সম্বুদ্ধো, পব্বতারামম্হি নিব্বুতো।
Koṇāgamano sambuddho, pabbatārāmamhi nibbuto;
ধাতুৰিত্থারিকং আসি, তেসু তেসু পদেসতোতি॥
Dhātuvitthārikaṃ āsi, tesu tesu padesatoti.
কোণাগমনস্স ভগৰতো ৰংসো তেৰীসতিমো।
Koṇāgamanassa bhagavato vaṃso tevīsatimo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / বুদ্ধৰংস-অট্ঠকথা • Buddhavaṃsa-aṭṭhakathā / ২৫. কোণাগমনবুদ্ধৰংসৰণ্ণনা • 25. Koṇāgamanabuddhavaṃsavaṇṇanā
