| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
២៥. កោណាគមនពុទ្ធវំសោ
25. Koṇāgamanabuddhavaṃso
១.
1.
កកុសន្ធស្ស អបរេន, សម្ពុទ្ធោ ទ្វិបទុត្តមោ;
Kakusandhassa aparena, sambuddho dvipaduttamo;
កោណាគមនោ នាម ជិនោ, លោកជេដ្ឋោ នរាសភោ។
Koṇāgamano nāma jino, lokajeṭṭho narāsabho.
២.
2.
ទសធម្មេ បូរយិត្វាន, កន្តារំ សមតិក្កមិ;
Dasadhamme pūrayitvāna, kantāraṃ samatikkami;
បវាហិយ មលំ សព្ពំ, បត្តោ សម្ពោធិមុត្តមំ។
Pavāhiya malaṃ sabbaṃ, patto sambodhimuttamaṃ.
៣.
3.
ធម្មចក្កំ បវត្តេន្តេ, កោណាគមននាយកេ;
Dhammacakkaṃ pavattente, koṇāgamananāyake;
តិំសកោដិសហស្សានំ, បឋមាភិសមយោ អហុ។
Tiṃsakoṭisahassānaṃ, paṭhamābhisamayo ahu.
៤.
4.
បាដិហីរំ ករោន្តេ ច, បរវាទប្បមទ្ទនេ;
Pāṭihīraṃ karonte ca, paravādappamaddane;
វីសតិកោដិសហស្សានំ, ទុតិយាភិសមយោ អហុ។
Vīsatikoṭisahassānaṃ, dutiyābhisamayo ahu.
៥.
5.
តតោ វិកុព្ពនំ កត្វា, ជិនោ ទេវបុរំ គតោ;
Tato vikubbanaṃ katvā, jino devapuraṃ gato;
វសតេ តត្ថ សម្ពុទ្ធោ, សិលាយ បណ្ឌុកម្ពលេ។
Vasate tattha sambuddho, silāya paṇḍukambale.
៦.
6.
បករណេ សត្ត ទេសេន្តោ, វស្សំ វសតិ សោ មុនិ;
Pakaraṇe satta desento, vassaṃ vasati so muni;
ទសកោដិសហស្សានំ, តតិយាភិសមយោ អហុ។
Dasakoṭisahassānaṃ, tatiyābhisamayo ahu.
៧.
7.
តស្សាបិ ទេវទេវស្ស, ឯកោ អាសិ សមាគមោ;
Tassāpi devadevassa, eko āsi samāgamo;
ខីណាសវានំ វិមលានំ, សន្តចិត្តាន តាទិនំ។
Khīṇāsavānaṃ vimalānaṃ, santacittāna tādinaṃ.
៨.
8.
តិំសភិក្ខុសហស្សានំ , តទា អាសិ សមាគមោ;
Tiṃsabhikkhusahassānaṃ , tadā āsi samāgamo;
ឱឃានមតិក្កន្តានំ, ភិជ្ជិតានញ្ច មច្ចុយា។
Oghānamatikkantānaṃ, bhijjitānañca maccuyā.
៩.
9.
អហំ តេន សមយេន, បព្ពតោ នាម ខត្តិយោ;
Ahaṃ tena samayena, pabbato nāma khattiyo;
មិត្តាមច្ចេហិ សម្បន្នោ, អនន្តពលវាហនោ។
Mittāmaccehi sampanno, anantabalavāhano.
១០.
10.
សម្ពុទ្ធទស្សនំ គន្ត្វា, សុត្វា ធម្មមនុត្តរំ;
Sambuddhadassanaṃ gantvā, sutvā dhammamanuttaraṃ;
និមន្តេត្វា សជិនសង្ឃំ, ទានំ ទត្វា យទិច្ឆកំ។
Nimantetvā sajinasaṅghaṃ, dānaṃ datvā yadicchakaṃ.
១១.
11.
បដ្ដុណ្ណំ ចីនបដ្ដញ្ច, កោសេយ្យំ កម្ពលម្បិ ច;
Paṭṭuṇṇaṃ cīnapaṭṭañca, koseyyaṃ kambalampi ca;
សោវណ្ណបាទុកញ្ចេវ, អទាសិំ សត្ថុសាវកេ។
Sovaṇṇapādukañceva, adāsiṃ satthusāvake.
១២.
12.
សោបិ មំ ពុទ្ធោ ព្យាកាសិ, សង្ឃមជ្ឈេ និសីទិយ;
Sopi maṃ buddho byākāsi, saṅghamajjhe nisīdiya;
‘‘ឥមម្ហិ ភទ្ទកេ កប្បេ, អយំ ពុទ្ធោ ភវិស្សតិ។
‘‘Imamhi bhaddake kappe, ayaṃ buddho bhavissati.
១៣.
13.
‘‘អហុ កបិលវ្ហយា រម្មា…បេ.… ហេស្សាម សម្មុខា ឥមំ’’។
‘‘Ahu kapilavhayā rammā…pe… hessāma sammukhā imaṃ’’.
១៤.
14.
តស្សាបិ វចនំ សុត្វា, ភិយ្យោ ចិត្តំ បសាទយិំ;
Tassāpi vacanaṃ sutvā, bhiyyo cittaṃ pasādayiṃ;
ឧត្តរិំ វតមធិដ្ឋាសិំ, ទសបារមិបូរិយា។
Uttariṃ vatamadhiṭṭhāsiṃ, dasapāramipūriyā.
១៥.
15.
សព្ពញ្ញុតំ គវេសន្តោ, ទានំ ទត្វា នរុត្តមេ;
Sabbaññutaṃ gavesanto, dānaṃ datvā naruttame;
១៦.
16.
នគរំ សោភវតី នាម, សោភោ នាមាសិ ខត្តិយោ;
Nagaraṃ sobhavatī nāma, sobho nāmāsi khattiyo;
វសតេ តត្ថ នគរេ, សម្ពុទ្ធស្ស មហាកុលំ។
Vasate tattha nagare, sambuddhassa mahākulaṃ.
១៧.
17.
ព្រាហ្មណោ យញ្ញទត្តោ ច, អាសិ ពុទ្ធស្ស សោ បិតា;
Brāhmaṇo yaññadatto ca, āsi buddhassa so pitā;
ឧត្តរា នាម ជនិកា, កោណាគមនស្ស សត្ថុនោ។
Uttarā nāma janikā, koṇāgamanassa satthuno.
១៨.
18.
តីណិ វស្សសហស្សានិ, អគារំ អជ្ឈ សោ វសិ;
Tīṇi vassasahassāni, agāraṃ ajjha so vasi;
តុសិតសន្តុសិតសន្តុដ្ឋា, តយោ បាសាទមុត្តមា។
Tusitasantusitasantuṭṭhā, tayo pāsādamuttamā.
១៩.
19.
អនូនសោឡសសហស្សានិ, នារិយោ សមលង្កតា;
Anūnasoḷasasahassāni, nāriyo samalaṅkatā;
រុចិគត្តា នាម នារី, សត្ថវាហោ នាម អត្រជោ។
Rucigattā nāma nārī, satthavāho nāma atrajo.
២០.
20.
និមិត្តេ ចតុរោ ទិស្វា, ហត្ថិយានេន និក្ខមិ;
Nimitte caturo disvā, hatthiyānena nikkhami;
ឆមាសំ បធានចារំ, អចរី បុរិសុត្តមោ។
Chamāsaṃ padhānacāraṃ, acarī purisuttamo.
២១.
21.
ព្រហ្មុនា យាចិតោ សន្តោ, កោណាគមននាយកោ;
Brahmunā yācito santo, koṇāgamananāyako;
វត្តិ ចក្កំ មហាវីរោ, មិគទាយេ នរុត្តមោ។
Vatti cakkaṃ mahāvīro, migadāye naruttamo.
២២.
22.
ភិយ្យសោ ឧត្តរោ នាម, អហេសុំ អគ្គសាវកា;
Bhiyyaso uttaro nāma, ahesuṃ aggasāvakā;
សោត្ថិជោ នាមុបដ្ឋាកោ, កោណាគមនស្ស សត្ថុនោ។
Sotthijo nāmupaṭṭhāko, koṇāgamanassa satthuno.
២៣.
23.
សមុទ្ទា ឧត្តរា ចេវ, អហេសុំ អគ្គសាវិកា;
Samuddā uttarā ceva, ahesuṃ aggasāvikā;
ពោធិ តស្ស ភគវតោ, ឧទុម្ពរោតិ បវុច្ចតិ។
Bodhi tassa bhagavato, udumbaroti pavuccati.
២៤.
24.
ឧគ្គោ ច សោមទេវោ ច, អហេសុំ អគ្គុបដ្ឋកា;
Uggo ca somadevo ca, ahesuṃ aggupaṭṭhakā;
សីវលា ចេវ សាមា ច, អហេសុំ អគ្គុបដ្ឋិកា។
Sīvalā ceva sāmā ca, ahesuṃ aggupaṭṭhikā.
២៥.
25.
ឧច្ចត្តនេន សោ ពុទ្ធោ, តិំសហត្ថសមុគ្គតោ;
Uccattanena so buddho, tiṃsahatthasamuggato;
ឧក្កាមុខេ យថា កម្ពុ, ឯវំ រំសីហិ មណ្ឌិតោ។
Ukkāmukhe yathā kambu, evaṃ raṃsīhi maṇḍito.
២៦.
26.
តិំសវស្សសហស្សានិ, អាយុ ពុទ្ធស្ស តាវទេ;
Tiṃsavassasahassāni, āyu buddhassa tāvade;
តាវតា តិដ្ឋមានោ សោ, តារេសិ ជនតំ ពហុំ។
Tāvatā tiṭṭhamāno so, tāresi janataṃ bahuṃ.
២៧.
27.
ធម្មចេតិំ សមុស្សេត្វា, ធម្មទុស្សវិភូសិតំ;
Dhammacetiṃ samussetvā, dhammadussavibhūsitaṃ;
ធម្មបុប្ផគុឡំ កត្វា, និព្ពុតោ សោ សសាវកោ។
Dhammapupphaguḷaṃ katvā, nibbuto so sasāvako.
២៨.
28.
មហាវិលាសោ តស្ស ជនោ, សិរិធម្មប្បកាសនោ;
Mahāvilāso tassa jano, siridhammappakāsano;
សព្ពំ តមន្តរហិតំ, ននុ រិត្តា សព្ពសង្ខារា។
Sabbaṃ tamantarahitaṃ, nanu rittā sabbasaṅkhārā.
២៩.
29.
កោណាគមនោ សម្ពុទ្ធោ, បព្ពតារាមម្ហិ និព្ពុតោ;
Koṇāgamano sambuddho, pabbatārāmamhi nibbuto;
ធាតុវិត្ថារិកំ អាសិ, តេសុ តេសុ បទេសតោតិ។
Dhātuvitthārikaṃ āsi, tesu tesu padesatoti.
កោណាគមនស្ស ភគវតោ វំសោ តេវីសតិមោ។
Koṇāgamanassa bhagavato vaṃso tevīsatimo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ២៥. កោណាគមនពុទ្ធវំសវណ្ណនា • 25. Koṇāgamanabuddhavaṃsavaṇṇanā
