| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೨೫. ಕೋಣಾಗಮನಬುದ್ಧವಂಸೋ
25. Koṇāgamanabuddhavaṃso
೧.
1.
ಕಕುಸನ್ಧಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ।
Kakusandhassa aparena, sambuddho dvipaduttamo;
ಕೋಣಾಗಮನೋ ನಾಮ ಜಿನೋ, ಲೋಕಜೇಟ್ಠೋ ನರಾಸಭೋ॥
Koṇāgamano nāma jino, lokajeṭṭho narāsabho.
೨.
2.
ದಸಧಮ್ಮೇ ಪೂರಯಿತ್ವಾನ, ಕನ್ತಾರಂ ಸಮತಿಕ್ಕಮಿ।
Dasadhamme pūrayitvāna, kantāraṃ samatikkami;
ಪವಾಹಿಯ ಮಲಂ ಸಬ್ಬಂ, ಪತ್ತೋ ಸಮ್ಬೋಧಿಮುತ್ತಮಂ॥
Pavāhiya malaṃ sabbaṃ, patto sambodhimuttamaṃ.
೩.
3.
ಧಮ್ಮಚಕ್ಕಂ ಪವತ್ತೇನ್ತೇ, ಕೋಣಾಗಮನನಾಯಕೇ।
Dhammacakkaṃ pavattente, koṇāgamananāyake;
ತಿಂಸಕೋಟಿಸಹಸ್ಸಾನಂ, ಪಠಮಾಭಿಸಮಯೋ ಅಹು॥
Tiṃsakoṭisahassānaṃ, paṭhamābhisamayo ahu.
೪.
4.
ಪಾಟಿಹೀರಂ ಕರೋನ್ತೇ ಚ, ಪರವಾದಪ್ಪಮದ್ದನೇ।
Pāṭihīraṃ karonte ca, paravādappamaddane;
ವೀಸತಿಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು॥
Vīsatikoṭisahassānaṃ, dutiyābhisamayo ahu.
೫.
5.
ತತೋ ವಿಕುಬ್ಬನಂ ಕತ್ವಾ, ಜಿನೋ ದೇವಪುರಂ ಗತೋ।
Tato vikubbanaṃ katvā, jino devapuraṃ gato;
ವಸತೇ ತತ್ಥ ಸಮ್ಬುದ್ಧೋ, ಸಿಲಾಯ ಪಣ್ಡುಕಮ್ಬಲೇ॥
Vasate tattha sambuddho, silāya paṇḍukambale.
೬.
6.
ಪಕರಣೇ ಸತ್ತ ದೇಸೇನ್ತೋ, ವಸ್ಸಂ ವಸತಿ ಸೋ ಮುನಿ।
Pakaraṇe satta desento, vassaṃ vasati so muni;
ದಸಕೋಟಿಸಹಸ್ಸಾನಂ, ತತಿಯಾಭಿಸಮಯೋ ಅಹು॥
Dasakoṭisahassānaṃ, tatiyābhisamayo ahu.
೭.
7.
ತಸ್ಸಾಪಿ ದೇವದೇವಸ್ಸ, ಏಕೋ ಆಸಿ ಸಮಾಗಮೋ।
Tassāpi devadevassa, eko āsi samāgamo;
ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ॥
Khīṇāsavānaṃ vimalānaṃ, santacittāna tādinaṃ.
೮.
8.
ತಿಂಸಭಿಕ್ಖುಸಹಸ್ಸಾನಂ , ತದಾ ಆಸಿ ಸಮಾಗಮೋ।
Tiṃsabhikkhusahassānaṃ , tadā āsi samāgamo;
ಓಘಾನಮತಿಕ್ಕನ್ತಾನಂ, ಭಿಜ್ಜಿತಾನಞ್ಚ ಮಚ್ಚುಯಾ॥
Oghānamatikkantānaṃ, bhijjitānañca maccuyā.
೯.
9.
ಅಹಂ ತೇನ ಸಮಯೇನ, ಪಬ್ಬತೋ ನಾಮ ಖತ್ತಿಯೋ।
Ahaṃ tena samayena, pabbato nāma khattiyo;
ಮಿತ್ತಾಮಚ್ಚೇಹಿ ಸಮ್ಪನ್ನೋ, ಅನನ್ತಬಲವಾಹನೋ॥
Mittāmaccehi sampanno, anantabalavāhano.
೧೦.
10.
ಸಮ್ಬುದ್ಧದಸ್ಸನಂ ಗನ್ತ್ವಾ, ಸುತ್ವಾ ಧಮ್ಮಮನುತ್ತರಂ।
Sambuddhadassanaṃ gantvā, sutvā dhammamanuttaraṃ;
ನಿಮನ್ತೇತ್ವಾ ಸಜಿನಸಙ್ಘಂ, ದಾನಂ ದತ್ವಾ ಯದಿಚ್ಛಕಂ॥
Nimantetvā sajinasaṅghaṃ, dānaṃ datvā yadicchakaṃ.
೧೧.
11.
ಪಟ್ಟುಣ್ಣಂ ಚೀನಪಟ್ಟಞ್ಚ, ಕೋಸೇಯ್ಯಂ ಕಮ್ಬಲಮ್ಪಿ ಚ।
Paṭṭuṇṇaṃ cīnapaṭṭañca, koseyyaṃ kambalampi ca;
ಸೋವಣ್ಣಪಾದುಕಞ್ಚೇವ, ಅದಾಸಿಂ ಸತ್ಥುಸಾವಕೇ॥
Sovaṇṇapādukañceva, adāsiṃ satthusāvake.
೧೨.
12.
ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಸಙ್ಘಮಜ್ಝೇ ನಿಸೀದಿಯ।
Sopi maṃ buddho byākāsi, saṅghamajjhe nisīdiya;
‘‘ಇಮಮ್ಹಿ ಭದ್ದಕೇ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Imamhi bhaddake kappe, ayaṃ buddho bhavissati.
೧೩.
13.
‘‘ಅಹು ಕಪಿಲವ್ಹಯಾ ರಮ್ಮಾ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Ahu kapilavhayā rammā…pe… hessāma sammukhā imaṃ’’.
೧೪.
14.
ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāpi vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೧೫.
15.
ಸಬ್ಬಞ್ಞುತಂ ಗವೇಸನ್ತೋ, ದಾನಂ ದತ್ವಾ ನರುತ್ತಮೇ।
Sabbaññutaṃ gavesanto, dānaṃ datvā naruttame;
೧೬.
16.
ನಗರಂ ಸೋಭವತೀ ನಾಮ, ಸೋಭೋ ನಾಮಾಸಿ ಖತ್ತಿಯೋ।
Nagaraṃ sobhavatī nāma, sobho nāmāsi khattiyo;
ವಸತೇ ತತ್ಥ ನಗರೇ, ಸಮ್ಬುದ್ಧಸ್ಸ ಮಹಾಕುಲಂ॥
Vasate tattha nagare, sambuddhassa mahākulaṃ.
೧೭.
17.
ಬ್ರಾಹ್ಮಣೋ ಯಞ್ಞದತ್ತೋ ಚ, ಆಸಿ ಬುದ್ಧಸ್ಸ ಸೋ ಪಿತಾ।
Brāhmaṇo yaññadatto ca, āsi buddhassa so pitā;
ಉತ್ತರಾ ನಾಮ ಜನಿಕಾ, ಕೋಣಾಗಮನಸ್ಸ ಸತ್ಥುನೋ॥
Uttarā nāma janikā, koṇāgamanassa satthuno.
೧೮.
18.
ತೀಣಿ ವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ।
Tīṇi vassasahassāni, agāraṃ ajjha so vasi;
ತುಸಿತಸನ್ತುಸಿತಸನ್ತುಟ್ಠಾ, ತಯೋ ಪಾಸಾದಮುತ್ತಮಾ॥
Tusitasantusitasantuṭṭhā, tayo pāsādamuttamā.
೧೯.
19.
ಅನೂನಸೋಳಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Anūnasoḷasasahassāni, nāriyo samalaṅkatā;
ರುಚಿಗತ್ತಾ ನಾಮ ನಾರೀ, ಸತ್ಥವಾಹೋ ನಾಮ ಅತ್ರಜೋ॥
Rucigattā nāma nārī, satthavāho nāma atrajo.
೨೦.
20.
ನಿಮಿತ್ತೇ ಚತುರೋ ದಿಸ್ವಾ, ಹತ್ಥಿಯಾನೇನ ನಿಕ್ಖಮಿ।
Nimitte caturo disvā, hatthiyānena nikkhami;
ಛಮಾಸಂ ಪಧಾನಚಾರಂ, ಅಚರೀ ಪುರಿಸುತ್ತಮೋ॥
Chamāsaṃ padhānacāraṃ, acarī purisuttamo.
೨೧.
21.
ಬ್ರಹ್ಮುನಾ ಯಾಚಿತೋ ಸನ್ತೋ, ಕೋಣಾಗಮನನಾಯಕೋ।
Brahmunā yācito santo, koṇāgamananāyako;
ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ॥
Vatti cakkaṃ mahāvīro, migadāye naruttamo.
೨೨.
22.
ಭಿಯ್ಯಸೋ ಉತ್ತರೋ ನಾಮ, ಅಹೇಸುಂ ಅಗ್ಗಸಾವಕಾ।
Bhiyyaso uttaro nāma, ahesuṃ aggasāvakā;
ಸೋತ್ಥಿಜೋ ನಾಮುಪಟ್ಠಾಕೋ, ಕೋಣಾಗಮನಸ್ಸ ಸತ್ಥುನೋ॥
Sotthijo nāmupaṭṭhāko, koṇāgamanassa satthuno.
೨೩.
23.
ಸಮುದ್ದಾ ಉತ್ತರಾ ಚೇವ, ಅಹೇಸುಂ ಅಗ್ಗಸಾವಿಕಾ।
Samuddā uttarā ceva, ahesuṃ aggasāvikā;
ಬೋಧಿ ತಸ್ಸ ಭಗವತೋ, ಉದುಮ್ಬರೋತಿ ಪವುಚ್ಚತಿ॥
Bodhi tassa bhagavato, udumbaroti pavuccati.
೨೪.
24.
ಉಗ್ಗೋ ಚ ಸೋಮದೇವೋ ಚ, ಅಹೇಸುಂ ಅಗ್ಗುಪಟ್ಠಕಾ।
Uggo ca somadevo ca, ahesuṃ aggupaṭṭhakā;
ಸೀವಲಾ ಚೇವ ಸಾಮಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Sīvalā ceva sāmā ca, ahesuṃ aggupaṭṭhikā.
೨೫.
25.
ಉಚ್ಚತ್ತನೇನ ಸೋ ಬುದ್ಧೋ, ತಿಂಸಹತ್ಥಸಮುಗ್ಗತೋ।
Uccattanena so buddho, tiṃsahatthasamuggato;
ಉಕ್ಕಾಮುಖೇ ಯಥಾ ಕಮ್ಬು, ಏವಂ ರಂಸೀಹಿ ಮಣ್ಡಿತೋ॥
Ukkāmukhe yathā kambu, evaṃ raṃsīhi maṇḍito.
೨೬.
26.
ತಿಂಸವಸ್ಸಸಹಸ್ಸಾನಿ, ಆಯು ಬುದ್ಧಸ್ಸ ತಾವದೇ।
Tiṃsavassasahassāni, āyu buddhassa tāvade;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೨೭.
27.
ಧಮ್ಮಚೇತಿಂ ಸಮುಸ್ಸೇತ್ವಾ, ಧಮ್ಮದುಸ್ಸವಿಭೂಸಿತಂ।
Dhammacetiṃ samussetvā, dhammadussavibhūsitaṃ;
ಧಮ್ಮಪುಪ್ಫಗುಳಂ ಕತ್ವಾ, ನಿಬ್ಬುತೋ ಸೋ ಸಸಾವಕೋ॥
Dhammapupphaguḷaṃ katvā, nibbuto so sasāvako.
೨೮.
28.
ಮಹಾವಿಲಾಸೋ ತಸ್ಸ ಜನೋ, ಸಿರಿಧಮ್ಮಪ್ಪಕಾಸನೋ।
Mahāvilāso tassa jano, siridhammappakāsano;
ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ॥
Sabbaṃ tamantarahitaṃ, nanu rittā sabbasaṅkhārā.
೨೯.
29.
ಕೋಣಾಗಮನೋ ಸಮ್ಬುದ್ಧೋ, ಪಬ್ಬತಾರಾಮಮ್ಹಿ ನಿಬ್ಬುತೋ।
Koṇāgamano sambuddho, pabbatārāmamhi nibbuto;
ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋತಿ॥
Dhātuvitthārikaṃ āsi, tesu tesu padesatoti.
ಕೋಣಾಗಮನಸ್ಸ ಭಗವತೋ ವಂಸೋ ತೇವೀಸತಿಮೋ।
Koṇāgamanassa bhagavato vaṃso tevīsatimo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೨೫. ಕೋಣಾಗಮನಬುದ್ಧವಂಸವಣ್ಣನಾ • 25. Koṇāgamanabuddhavaṃsavaṇṇanā
