| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
கோணாக³மனோ பு³த்³தோ⁴
Koṇāgamano buddho
தஸ்ஸ அபரபா⁴கே³ கோணாக³மனோ நாம ஸத்தா² உத³பாதி³. தஸ்ஸாபி ஏகோவ ஸாவகஸன்னிபாதோ, தத்த² திங்ஸ பி⁴க்கு²ஸஹஸ்ஸானி அஹேஸுங். ததா³ போ³தி⁴ஸத்தோ பப்³ப³தோ நாம ராஜா ஹுத்வா அமச்சக³ணபரிவுதோ ஸத்து² ஸந்திகங் க³ந்த்வா த⁴ம்மதே³ஸனங் ஸுத்வா பு³த்³த⁴ப்பமுக²ங் பி⁴க்கு²ஸங்க⁴ங் நிமந்தெத்வா மஹாதா³னங் பவத்தெத்வா பத்துண்ணசீனபடகோஸெய்யகம்ப³லது³கூலானி சேவ ஸுவண்ணபடிகஞ்ச த³த்வா ஸத்து² ஸந்திகே பப்³ப³ஜி. ஸோபி நங் ஸத்தா² ‘‘பு³த்³தோ⁴ ப⁴விஸ்ஸதீ’’தி ப்³யாகாஸி. தஸ்ஸ ப⁴க³வதோ ஸோப⁴வதீ நாம நக³ரங் அஹோஸி, யஞ்ஞத³த்தோ நாம ப்³ராஹ்மணோ பிதா, உத்தரா நாம ப்³ராஹ்மணீ மாதா, பி⁴ய்யஸோ ச உத்தரோ ச த்³வே அக்³க³ஸாவகா, ஸொத்தி²ஜோ நாமுபட்டா²கோ, ஸமுத்³தா³ ச உத்தரா ச த்³வே அக்³க³ஸாவிகா, உது³ம்ப³ரருக்கோ² போ³தி⁴, ஸரீரங் திங்ஸஹத்து²ப்³பே³த⁴ங் அஹோஸி, திங்ஸ வஸ்ஸஸஹஸ்ஸானி ஆயூதி.
Tassa aparabhāge koṇāgamano nāma satthā udapādi. Tassāpi ekova sāvakasannipāto, tattha tiṃsa bhikkhusahassāni ahesuṃ. Tadā bodhisatto pabbato nāma rājā hutvā amaccagaṇaparivuto satthu santikaṃ gantvā dhammadesanaṃ sutvā buddhappamukhaṃ bhikkhusaṅghaṃ nimantetvā mahādānaṃ pavattetvā pattuṇṇacīnapaṭakoseyyakambaladukūlāni ceva suvaṇṇapaṭikañca datvā satthu santike pabbaji. Sopi naṃ satthā ‘‘buddho bhavissatī’’ti byākāsi. Tassa bhagavato sobhavatī nāma nagaraṃ ahosi, yaññadatto nāma brāhmaṇo pitā, uttarā nāma brāhmaṇī mātā, bhiyyaso ca uttaro ca dve aggasāvakā, sotthijo nāmupaṭṭhāko, samuddā ca uttarā ca dve aggasāvikā, udumbararukkho bodhi, sarīraṃ tiṃsahatthubbedhaṃ ahosi, tiṃsa vassasahassāni āyūti.
‘‘ககுஸந்த⁴ஸ்ஸ அபரேன, ஸம்பு³த்³தோ⁴ த்³விபது³த்தமோ;
‘‘Kakusandhassa aparena, sambuddho dvipaduttamo;
கோணாக³மனோ நாம ஜினோ, லோகஜெட்டோ² நராஸபோ⁴’’தி. (பு³॰ வங்॰ 25.1);
Koṇāgamano nāma jino, lokajeṭṭho narāsabho’’ti. (bu. vaṃ. 25.1);
