| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
9. гон̣д̣ан̃н̃асуд̇д̇аван̣н̣анаа
9. Koṇḍaññasuttavaṇṇanā
217. звам̣г̇ахид̇анаамод̇и ‘‘ан̃н̃ааси вад̇а, бхо, гон̣д̣ан̃н̃о’’д̇и сад̇т̇у важанам̣ ниссааяа бхигкуухи ан̃н̃зхи гон̣д̣ан̃н̃анаамагзхи висзсанад̇т̇ам̣ звам̣г̇ахид̇анаамо. д̣̇ваад̣̇асаннам̣ сам̣важчараанам̣ васзна жирассам̣. чад̣̇д̣̇анд̇абхаванзд̇и чад̣̇д̣̇анд̇анааг̇арааж̇абхаванадтаанз. бан̃н̃аваа махаасааваго рад̇д̇ан̃н̃уд̇ааяа. ‘‘д̣̇асасахассажаггаваал̣з д̣̇звамануссаананд̇и д̣̇асасахассажаггаваал̣з д̣̇зваанам̣, имасмим̣ жаггаваал̣з д̣̇звамануссаанан̃жаад̇и звам̣ д̣̇асасахассажаггаваал̣з д̣̇звамануссаана’’нд̇и вад̣̇анд̇и. аг̇г̇анд̇иаад̣̇ид̇о. д̇ад̇т̇аад̇и манд̣̇аагинид̇ийрз.
217.Evaṃgahitanāmoti ‘‘aññāsi vata, bho, koṇḍañño’’ti satthu vacanaṃ nissāya bhikkhūhi aññehi koṇḍaññanāmakehi visesanatthaṃ evaṃgahitanāmo. Dvādasannaṃ saṃvaccharānaṃ vasena cirassaṃ. Chaddantabhavaneti chaddantanāgarājabhavanaṭṭhāne. Paññavā mahāsāvako rattaññutāya. ‘‘Dasasahassacakkavāḷe devamanussānanti dasasahassacakkavāḷe devānaṃ, imasmiṃ cakkavāḷe devamanussānañcāti evaṃ dasasahassacakkavāḷe devamanussāna’’nti vadanti. Aggantiādito. Tatthāti mandākinitīre.
вассаг̇г̇знаад̇и вассабадибаадияаа. д̇анд̇и ан̃н̃аасигон̣д̣ан̃н̃ад̇т̇зрам̣. махааб̣рахмаанам̣ вияа логияамануссаа харааяанд̇и. баамогкабхууд̇о ааяасмаа т̇зро анд̇аранд̇араа д̇ад̇т̇а д̇ад̇т̇а ж̇анабад̣̇з васид̇ваа д̇ад̣̇ануггамзна манд̣̇аагинид̇ийрам̣ убаг̇ад̇о, д̇асмаа вуд̇д̇ам̣ – ‘‘ижчаамахам̣, бханд̇з, ж̇анабад̣̇з васид̇у’’нд̇и.
Vassaggenāti vassapaṭipāṭiyā. Tanti aññāsikoṇḍaññattheraṃ. Mahābrahmānaṃ viya lokiyamanussā harāyanti. Pāmokkhabhūto āyasmā thero antarantarā tattha tattha janapade vasitvā tadanukkamena mandākinitīraṃ upagato, tasmā vuttaṃ – ‘‘icchāmahaṃ, bhante, janapade vasitu’’nti.
аанубхаавасамбаннаа д̣̇иб̣б̣ааяугаа д̇з хад̇т̇инааг̇аад̇и вуд̇д̇ам̣ ‘‘буб̣б̣з бажжзгаб̣уд̣̇д̇хаанам̣ баарижарияааяа гад̇абарижаяаа’’д̇и. т̇зрасса сан̃жаран̣адтаанз ааваран̣асаакаа харид̇ваа абанзд̇ваа. мукод̣̇аган̃жзва д̣̇анд̇агадтан̃жа табзд̇ийд̇и сал̣алад̣̇звад̣̇ааругадтаад̣̇ийни ан̃н̃аман̃н̃ам̣ гхам̣сид̇ваа аг̇г̇им̣ ниб̣б̣ад̇д̇зд̇ваа ж̇аалзд̇ваа д̇ад̇т̇а баасаан̣акан̣д̣аани д̇аабзд̇ваа д̇аани д̣̇ан̣д̣агзхи ваддзд̇ваа д̇ал̣аагаасу уд̣̇агасон̣д̣ийсу кибид̇ваа уд̣̇агасса д̇ад̇д̇абхаавам̣ н̃ад̇ваа нааг̇алад̇аад̣̇анд̇агадтам̣ убанзнд̇о мукод̣̇аган̃жа табзд̇и. вад̇д̇ам̣ гарод̇ийд̇и анд̇огудияаа б̣ахи жа бамукзби ан̇г̇ан̣зби саакаабхан̇г̇зхи саммаж̇ж̇анд̇о вагкамаананаязна аахаарам̣ убанзнд̇о вад̇д̇ам̣ гарод̇и.
Ānubhāvasampannā dibbāyukā te hatthināgāti vuttaṃ ‘‘pubbe paccekabuddhānaṃ pāricariyāya kataparicayā’’ti. Therassa sañcaraṇaṭṭhāne āvaraṇasākhā haritvā apanetvā. Mukhodakañceva dantakaṭṭhañca ṭhapetīti saḷaladevadārukaṭṭhādīni aññamaññaṃ ghaṃsitvā aggiṃ nibbattetvā jāletvā tattha pāsāṇakhaṇḍāni tāpetvā tāni daṇḍakehi vaṭṭetvā taḷākāsu udakasoṇḍīsu khipitvā udakassa tattabhāvaṃ ñatvā nāgalatādantakaṭṭhaṃ upanento mukhodakañca ṭhapeti. Vattaṃ karotīti antokuṭiyā bahi ca pamukhepi aṅgaṇepi sākhābhaṅgehi sammajjanto vakkhamānanayena āhāraṃ upanento vattaṃ karoti.
бад̇идтаббамаан̣зд̇и гадиббамаан̣з, аяамзва ваа баато д̇аава маханд̇амзваад̇и яаава маханд̇ам̣ сзд̇абад̣̇умаванам̣ , д̇аава маханд̇амзва. зсзва наяо рад̇д̇агумуд̣̇аванаад̣̇ийсу. каад̣̇анд̇аа мануссаа. баггабаяогханигаа вияаад̇и субаггабаяогханам̣ вияа. гханабхаавзна бана багкид̇д̇акуд̣̇д̣̇амад̇ху вияа ход̇и. д̇знааха ‘‘зд̇ам̣ богкарамад̇ху наамаа’’д̇и. мул̣ааланд̇и сзд̇абад̣̇умаанам̣ муулам̣. бхисанд̇и д̇зсам̣язва ганд̣̇ам̣. згасмим̣ баб̣б̣зд̇и згзгасмим̣ баб̣б̣анд̇арз. баад̣̇агхадаганд̇и д̣̇он̣асса жад̇убхааг̇о сан̣таанад̇о куд̣̇д̣̇аго, д̇асмаа баад̣̇агхадагаббамаан̣анд̇и д̇умб̣амад̇д̇ам̣. сон̣д̣иааваадзд̇и куд̣̇д̣̇агасон̣д̣ияо жзва куд̣̇д̣̇агаааваадз жа.
Patiṭṭhappamāṇeti kaṭippamāṇe, ayameva vā pāṭho tāva mahantamevāti yāva mahantaṃ setapadumavanaṃ , tāva mahantameva. Eseva nayo rattakumudavanādīsu. Khādantā manussā. Pakkapayoghanikā viyāti supakkapayoghanaṃ viya. Ghanabhāvena pana pakkhittakhuddamadhu viya hoti. Tenāha ‘‘etaṃ pokkharamadhu nāmā’’ti. Muḷālanti setapadumānaṃ mūlaṃ. Bhisanti tesaṃyeva kandaṃ. Ekasmiṃ pabbeti ekekasmiṃ pabbantare. Pādaghaṭakanti doṇassa catubhāgo saṇṭhānato khuddako, tasmā pādaghaṭakappamāṇanti tumbamattaṃ. Soṇḍiāvāṭeti khuddakasoṇḍiyo ceva khuddakaāvāṭe ca.
зд̇ам̣ бхож̇ананд̇и яат̇аавуд̇д̇ам̣ нируд̣̇агабааяасабхож̇анам̣. гзжи сан̃ж̇аананд̇и яз т̇зраа вуд̣дхад̇араа. гзжи на сан̃ж̇аананд̇и яз наваа ажирабаб̣б̣аж̇ид̇аа.
Etaṃ bhojananti yathāvuttaṃ nirudakapāyasabhojanaṃ. Keci sañjānanti ye therā vuḍḍhatarā. Keci na sañjānanti ye navā acirapabbajitā.
б̣уд̣̇д̇хаануб̣уд̣̇д̇ход̇и б̣уд̣̇д̇хасса ануб̣уд̣̇д̇хо. б̣аал̣хавийрияод̇и жад̇уннам̣ саммаббад̇хаанаанам̣ васзна жиранижид̇авийрияо. д̇ин̣н̣ам̣ вивзгаананд̇и гааяажид̇д̇аубад̇хививзгаанам̣ лаабхийд̇и яож̇анаа. жад̇ассо вад̣̇ад̇и ван̇г̇ийсад̇т̇зро саяам̣бадибхаанам̣, на сзсаабхин̃н̃аанам̣ абхаавад̇од̇и ааха ‘‘ид̇араа’’д̇иаад̣̇и. барисаа саннисийд̣̇и ниссад̣̇д̣̇абхаавзна д̇ун̣хий ахосийд̇и ад̇т̇о. ануж̇аанаабзсийд̇и батамам̣ ад̇д̇анаа н̃аад̇ам̣ убадтид̇ам̣ ад̇д̇ано бариниб̣б̣аанагаалам̣ ану бажчаа сад̇т̇аарам̣ ж̇аанаабзсийд̇и звам̣ зд̇т̇а ад̇т̇о д̣̇адтаб̣б̣о.
Buddhānubuddhoti buddhassa anubuddho. Bāḷhavīriyoti catunnaṃ sammappadhānānaṃ vasena ciranicitavīriyo. Tiṇṇaṃ vivekānanti kāyacittaupadhivivekānaṃ lābhīti yojanā. Catasso vadati vaṅgīsatthero sayaṃpaṭibhānaṃ, na sesābhiññānaṃ abhāvatoti āha ‘‘itarā’’tiādi. Parisā sannisīdi nissaddabhāvena tuṇhī ahosīti attho. Anujānāpesīti paṭhamaṃ attanā ñātaṃ upaṭṭhitaṃ attano parinibbānakālaṃ anu pacchā satthāraṃ jānāpesīti evaṃ ettha attho daṭṭhabbo.
д̇анд̇и аасаал̣хибун̣н̣амааяа исибад̇анз яам̣ д̣̇ассанам̣, яам̣ ваа д̣̇уггаражарияааяам̣ д̇умхаагам̣ убадтаанам̣ аад̣̇ид̇о д̣̇ассанам̣, д̇ам̣, бханд̇з, батамад̣̇ассанам̣. онад̇авинад̇аад̇и хздтаа убари жа онад̇аа винад̇аа. гамбзд̇ваад̇и т̇огам̣ жаалзд̇ваа д̣̇ассанад̇т̇ам̣ зганиннаад̣̇о д̇зсам̣ хад̇т̇инааг̇аанан̃жзва нааг̇аяагкагумбхан̣д̣аанам̣ д̣̇звад̇аанан̃жа сад̣̇д̣̇зна. б̣рахмаано д̣̇зваанам̣ ад̣̇ам̣сууд̇и самб̣анд̇хо.
Tanti āsāḷhipuṇṇamāya isipatane yaṃ dassanaṃ, yaṃ vā dukkaracariyāyaṃ tumhākaṃ upaṭṭhānaṃ ādito dassanaṃ, taṃ, bhante, paṭhamadassanaṃ. Onatavinatāti heṭṭhā upari ca onatā vinatā. Kampetvāti thokaṃ cāletvā dassanatthaṃ ekaninnādo tesaṃ hatthināgānañceva nāgayakkhakumbhaṇḍānaṃ devatānañca saddena. Brahmāno devānaṃ adaṃsūti sambandho.
саж̇жхааяамагам̣су басаад̣̇анийязсу басаад̣̇авасзна саннибад̇ид̇абарисааяа басаад̣̇аж̇ананад̇т̇ам̣ бхаг̇авад̇и нигкамид̇ваад̇и бхаг̇авад̇и г̇анд̇хагудид̇о нигкамид̇ваа. д̇харад̇иязваад̇и ад̣̇удтад̇ам̣ бад̇ваа д̇идтад̇зва.
Sajjhāyamakaṃsu pasādanīyesu pasādavasena sannipatitaparisāya pasādajananatthaṃ bhagavati nikkhamitvāti bhagavati gandhakuṭito nikkhamitvā. Dharatiyevāti aduṭṭhataṃ patvā tiṭṭhateva.
гон̣д̣ан̃н̃асуд̇д̇аван̣н̣анаа нидтид̇аа.
Koṇḍaññasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 9. гон̣д̣ан̃н̃асуд̇д̇ам̣ • 9. Koṇḍaññasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 9. гон̣д̣ан̃н̃асуд̇д̇аван̣н̣анаа • 9. Koṇḍaññasuttavaṇṇanā
