| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
гон̣д̣ан̃н̃о б̣уд̣̇д̇хо
Koṇḍañño buddho
д̣̇ийбан̇гарасса бана бхаг̇авад̇о абарабхааг̇з згам̣ асан̇кязяяам̣ ад̇иггамид̇ваа гон̣д̣ан̃н̃о наама сад̇т̇аа уд̣̇абаад̣̇и. д̇ассааби д̇аяо саавагасаннибаад̇аа ахзсум̣. батамасаннибаад̇з годисад̇асахассам̣, д̣̇уд̇ияз годисахассам̣ , д̇ад̇ияз навуд̇игодияо. д̇ад̣̇аа б̣од̇хисад̇д̇о виж̇ид̇аавий наама жаггавад̇д̇ий худ̇ваа годисад̇асахассасса б̣уд̣̇д̇хаббамукасса бхигкусан̇гхасса махаад̣̇аанам̣ ад̣̇ааси. сад̇т̇аа б̣од̇хисад̇д̇ам̣ ‘‘б̣уд̣̇д̇хо бхависсад̇ий’’д̇и б̣яаагарид̇ваа д̇хаммам̣ д̣̇зсзси. со сад̇т̇у д̇хаммагат̇ам̣ суд̇ваа раж̇ж̇ам̣ нияяаад̇зд̇ваа баб̣б̣аж̇и. со д̇ийн̣и бидагаани уг̇г̇ахзд̇ваа адта самаабад̇д̇ияо жа бан̃жа абхин̃н̃ааяо жа уббаад̣̇зд̇ваа абарихийнаж̇жхаано б̣рахмалогз ниб̣б̣ад̇д̇и. гон̣д̣ан̃н̃аб̣уд̣̇д̇хасса бана раммавад̇ий наама наг̇арам̣, сунанд̣̇о наама кад̇д̇ияо бид̇аа, суж̇аад̇аа наама д̣̇звий маад̇аа, бхад̣̇д̣̇о жа субхад̣̇д̣̇о жа д̣̇вз аг̇г̇асаавагаа, ануруд̣̇д̇хо наамубадтааго, д̇иссаа жа убад̇иссаа жа д̣̇вз аг̇г̇асаавигаа, саалагаляаан̣иругко б̣од̇хи, адтаасийд̇ихад̇т̇уб̣б̣зд̇хам̣ сарийрам̣, вассасад̇асахассам̣ ааяуббамаан̣ам̣ ахоси.
Dīpaṅkarassa pana bhagavato aparabhāge ekaṃ asaṅkhyeyyaṃ atikkamitvā koṇḍañño nāma satthā udapādi. Tassāpi tayo sāvakasannipātā ahesuṃ. Paṭhamasannipāte koṭisatasahassaṃ, dutiye koṭisahassaṃ , tatiye navutikoṭiyo. Tadā bodhisatto vijitāvī nāma cakkavattī hutvā koṭisatasahassassa buddhappamukhassa bhikkhusaṅghassa mahādānaṃ adāsi. Satthā bodhisattaṃ ‘‘buddho bhavissatī’’ti byākaritvā dhammaṃ desesi. So satthu dhammakathaṃ sutvā rajjaṃ niyyātetvā pabbaji. So tīṇi piṭakāni uggahetvā aṭṭha samāpattiyo ca pañca abhiññāyo ca uppādetvā aparihīnajjhāno brahmaloke nibbatti. Koṇḍaññabuddhassa pana rammavatī nāma nagaraṃ, sunando nāma khattiyo pitā, sujātā nāma devī mātā, bhaddo ca subhaddo ca dve aggasāvakā, anuruddho nāmupaṭṭhāko, tissā ca upatissā ca dve aggasāvikā, sālakalyāṇirukkho bodhi, aṭṭhāsītihatthubbedhaṃ sarīraṃ, vassasatasahassaṃ āyuppamāṇaṃ ahosi.
‘‘д̣̇ийбан̇гарасса абарзна, гон̣д̣ан̃н̃о наама нааяаго;
‘‘Dīpaṅkarassa aparena, koṇḍañño nāma nāyako;
ананд̇ад̇зж̇о амид̇аяасо, аббамзяяо д̣̇ураасад̣̇о’’.
Anantatejo amitayaso, appameyyo durāsado’’.
д̇асса абарабхааг̇з згам̣ асан̇кязяяам̣ ад̇иггамид̇ваа згасмим̣ габбзязва жад̇д̇ааро б̣уд̣̇д̇хаа ниб̣б̣ад̇д̇им̣су – ман̇г̇ало, сумано, рзвад̇о, собхид̇од̇и. ман̇г̇аласса бхаг̇авад̇о д̇ийсу саавагасаннибаад̇зсу батамасаннибаад̇з годисад̇асахассам̣ бхигкуу ахзсум̣, д̣̇уд̇ияз годисад̇асахассам̣, д̇ад̇ияз навудигодияо. взмаад̇игабхаад̇аа гирасса аананд̣̇агумааро наама навуд̇игодисан̇кааяа барисааяа сад̣̇д̇хим̣ д̇хаммассаванад̇т̇ааяа сад̇т̇у санд̇игам̣ аг̇амааси. сад̇т̇аа д̇асса анубуб̣б̣игат̇ам̣ гат̇зси. со сад̣̇д̇хим̣ барисааяа саха бадисамбхид̣̇аахи арахад̇д̇ам̣ баабун̣и. сад̇т̇аа д̇зсам̣ гулабуд̇д̇аанам̣ буб̣б̣ажарид̇ам̣ ологзнд̇о ид̣̇д̇химаяабад̇д̇ажийварасса убаниссаяам̣ д̣̇исваа д̣̇агкин̣ахад̇т̇ам̣ басаарзд̇ваа ‘‘зт̇а бхигкаво’’д̇и ааха. саб̣б̣з д̇ан̇кан̣ан̃н̃зва ид̣̇д̇химаяабад̇д̇ажийварад̇хараа садтивассигат̇зраа вияа аагаббасамбаннаа худ̇ваа сад̇т̇аарам̣ ванд̣̇ид̇ваа бариваараяим̣су. аяамасса д̇ад̇ияо саавагасаннибаад̇о ахоси.
Tassa aparabhāge ekaṃ asaṅkhyeyyaṃ atikkamitvā ekasmiṃ kappeyeva cattāro buddhā nibbattiṃsu – maṅgalo, sumano, revato, sobhitoti. Maṅgalassa bhagavato tīsu sāvakasannipātesu paṭhamasannipāte koṭisatasahassaṃ bhikkhū ahesuṃ, dutiye koṭisatasahassaṃ, tatiye navuṭikoṭiyo. Vemātikabhātā kirassa ānandakumāro nāma navutikoṭisaṅkhāya parisāya saddhiṃ dhammassavanatthāya satthu santikaṃ agamāsi. Satthā tassa anupubbikathaṃ kathesi. So saddhiṃ parisāya saha paṭisambhidāhi arahattaṃ pāpuṇi. Satthā tesaṃ kulaputtānaṃ pubbacaritaṃ olokento iddhimayapattacīvarassa upanissayaṃ disvā dakkhiṇahatthaṃ pasāretvā ‘‘etha bhikkhavo’’ti āha. Sabbe taṅkhaṇaññeva iddhimayapattacīvaradharā saṭṭhivassikatherā viya ākappasampannā hutvā satthāraṃ vanditvā parivārayiṃsu. Ayamassa tatiyo sāvakasannipāto ahosi.
яат̇аа бана ан̃н̃зсам̣ б̣уд̣̇д̇хаанам̣ саманд̇аа асийд̇ихад̇т̇аббамаан̣ааязва сарийраббабхаа ахоси, на звам̣ д̇асса. д̇асса бана бхаг̇авад̇о сарийраббабхаа нижжагаалам̣ д̣̇асасахассилогад̇хаад̇ум̣ парид̇ваа адтааси. ругкабат̇авийбаб̣б̣ад̇асамуд̣̇д̣̇аад̣̇аяо анд̇амасо угкалияаад̣̇ийни убаад̣̇ааяа суван̣н̣абаддабарияонад̣̇д̇хаа вияа ахзсум̣. ааяуббамаан̣ам̣ банасса навуд̇ивассасахассаани ахоси. зд̇д̇агам̣ гаалам̣ жанд̣̇имасуурияаад̣̇аяо ад̇д̇ано бабхааяа вирожид̇ум̣ наасагким̣су, рад̇д̇инд̣̇ивабарижчзд̣̇о на бан̃н̃ааяид̇т̇а. д̣̇иваа суурияаалогзна вияа сад̇д̇аа нижжам̣ б̣уд̣̇д̇хаалогзнзва вижарим̣су. сааяам̣ бубпид̇агусумаанам̣ баад̇о жа раванагасагун̣аад̣̇ийнан̃жа васзна лого рад̇д̇инд̣̇ивабарижчзд̣̇ам̣ саллагкзси.
Yathā pana aññesaṃ buddhānaṃ samantā asītihatthappamāṇāyeva sarīrappabhā ahosi, na evaṃ tassa. Tassa pana bhagavato sarīrappabhā niccakālaṃ dasasahassilokadhātuṃ pharitvā aṭṭhāsi. Rukkhapathavīpabbatasamuddādayo antamaso ukkhaliyādīni upādāya suvaṇṇapaṭṭapariyonaddhā viya ahesuṃ. Āyuppamāṇaṃ panassa navutivassasahassāni ahosi. Ettakaṃ kālaṃ candimasūriyādayo attano pabhāya virocituṃ nāsakkhiṃsu, rattindivaparicchedo na paññāyittha. Divā sūriyālokena viya sattā niccaṃ buddhālokeneva vicariṃsu. Sāyaṃ pupphitakusumānaṃ pāto ca ravanakasakuṇādīnañca vasena loko rattindivaparicchedaṃ sallakkhesi.
гим̣ бана ан̃н̃зсам̣ б̣уд̣̇д̇хаанам̣ аяамаанубхааво над̇т̇ийд̇и? но над̇т̇и. д̇зби хи ааган̇камаанаа д̣̇асасахассилогад̇хаад̇ум̣ ваа д̇ад̇о ваа бхияяо аабхааяа парзяяум̣. ман̇г̇аласса бана бхаг̇авад̇о буб̣б̣абад̇т̇анаавасзна ан̃н̃зсам̣ б̣яаамаббабхаа вияа сарийраббабхаа нижжамзва д̣̇асасахассилогад̇хаад̇ум̣ парид̇ваа адтааси. со гира б̣од̇хисад̇д̇ажарияажаран̣агаалз взссанд̇арасад̣̇исз ад̇д̇абхаавзтид̇о сабуд̇д̇ад̣̇ааро ван̇габаб̣б̣ад̇асад̣̇исз баб̣б̣ад̇з васи. ат̇зго карад̣̇аатиго наама яагко махаабурисасса д̣̇аанаж̇жхаасаяад̇ам̣ суд̇ваа б̣раахман̣аван̣н̣зна убасан̇гамид̇ваа махаасад̇д̇ам̣ д̣̇вз д̣̇аарагз яаажи. махаасад̇д̇о ‘‘д̣̇ад̣̇аами, б̣раахман̣а, буд̇д̇агз’’д̇и вад̇ваа хадтабахадто уд̣̇агабарияанд̇ам̣ махаабат̇авим̣ гамбзнд̇о д̣̇взби д̣̇аарагз ад̣̇ааси. яагко жан̇гаманагодияам̣ ааламб̣анапалагам̣ ниссааяа тад̇ваа бассанд̇ассзва махаасад̇д̇асса мулаалагалаабам̣ вияа д̣̇аарагз каад̣̇и. махаабурисасса яагкам̣ ологзд̇ваа мукз вивадамад̇д̇з аг̇г̇иж̇аалам̣ вияа лохид̇ад̇хаарам̣ уг̇г̇ирамаанам̣ д̇асса мукам̣ д̣̇исвааби гзсаг̇г̇амад̇д̇амби д̣̇оманассам̣ на уббаж̇ж̇и. ‘‘суд̣̇иннам̣ вад̇а мз д̣̇аана’’нд̇и жинд̇аяад̇о банасса сарийрз маханд̇ам̣ бийд̇исоманассам̣ уд̣̇абаад̣̇и. со ‘‘имасса мз д̣̇аанасса ниссанд̣̇зна анааг̇ад̇з иминаава нийхаарзна сарийрад̇о расмияо нигкаманд̇уу’’д̇и бад̇т̇анам̣ агааси. д̇асса д̇ам̣ бад̇т̇анам̣ ниссааяа б̣уд̣̇д̇хабхууд̇асса сарийрад̇о расмияо нигкамид̇ваа зд̇д̇агам̣ таанам̣ парим̣су.
Kiṃ pana aññesaṃ buddhānaṃ ayamānubhāvo natthīti? No natthi. Tepi hi ākaṅkhamānā dasasahassilokadhātuṃ vā tato vā bhiyyo ābhāya phareyyuṃ. Maṅgalassa pana bhagavato pubbapatthanāvasena aññesaṃ byāmappabhā viya sarīrappabhā niccameva dasasahassilokadhātuṃ pharitvā aṭṭhāsi. So kira bodhisattacariyacaraṇakāle vessantarasadise attabhāveṭhito saputtadāro vaṅkapabbatasadise pabbate vasi. Atheko kharadāṭhiko nāma yakkho mahāpurisassa dānajjhāsayataṃ sutvā brāhmaṇavaṇṇena upasaṅkamitvā mahāsattaṃ dve dārake yāci. Mahāsatto ‘‘dadāmi, brāhmaṇa, puttake’’ti vatvā haṭṭhapahaṭṭho udakapariyantaṃ mahāpathaviṃ kampento dvepi dārake adāsi. Yakkho caṅkamanakoṭiyaṃ ālambanaphalakaṃ nissāya ṭhatvā passantasseva mahāsattassa mulālakalāpaṃ viya dārake khādi. Mahāpurisassa yakkhaṃ oloketvā mukhe vivaṭamatte aggijālaṃ viya lohitadhāraṃ uggiramānaṃ tassa mukhaṃ disvāpi kesaggamattampi domanassaṃ na uppajji. ‘‘Sudinnaṃ vata me dāna’’nti cintayato panassa sarīre mahantaṃ pītisomanassaṃ udapādi. So ‘‘imassa me dānassa nissandena anāgate imināva nīhārena sarīrato rasmiyo nikkhamantū’’ti patthanaṃ akāsi. Tassa taṃ patthanaṃ nissāya buddhabhūtassa sarīrato rasmiyo nikkhamitvā ettakaṃ ṭhānaṃ phariṃsu.
абарамбисса буб̣б̣ажарияам̣ ад̇т̇и. со гира б̣од̇хисад̇д̇агаалз згасса б̣уд̣̇д̇хасса жзд̇ияам̣ д̣̇исваа ‘‘имасса б̣уд̣̇д̇хасса маяаа ж̇ийвид̇ам̣ барижжаж̇ид̇ум̣ ваддад̇ий’’д̇и д̣̇ан̣д̣агад̣̇ийбигаавзтананияаамзна сагаласарийрам̣ взтаабзд̇ваа рад̇анамад̇д̇амагул̣ам̣ сад̇асахассаг̇гханигам̣ суван̣н̣абаад̇им̣ саббисса буураабзд̇ваа д̇ад̇т̇а сахассаваддияо ж̇аалзд̇ваа д̇ам̣ сийсзнаад̣̇ааяа сагаласарийрам̣ ж̇аалаабзд̇ваа жзд̇ияам̣ бад̣̇агкин̣ам̣ гаронд̇о сагаларад̇д̇им̣ вийд̇инаамзд̇и. звам̣ яаава арун̣уг̇г̇аманаа вааяаманд̇ассаабисса ломагуубамад̇д̇амби усумам̣ на г̇ан̣хи. бад̣̇умаг̇аб̣бхам̣ бавидтагаало вияа ахоси. д̇хаммо хи наамзса ад̇д̇аанам̣ рагканд̇ам̣ рагкад̇и. д̇знааха бхаг̇аваа –
Aparampissa pubbacariyaṃ atthi. So kira bodhisattakāle ekassa buddhassa cetiyaṃ disvā ‘‘imassa buddhassa mayā jīvitaṃ pariccajituṃ vaṭṭatī’’ti daṇḍakadīpikāveṭhananiyāmena sakalasarīraṃ veṭhāpetvā ratanamattamakuḷaṃ satasahassagghanikaṃ suvaṇṇapātiṃ sappissa pūrāpetvā tattha sahassavaṭṭiyo jāletvā taṃ sīsenādāya sakalasarīraṃ jālāpetvā cetiyaṃ padakkhiṇaṃ karonto sakalarattiṃ vītināmeti. Evaṃ yāva aruṇuggamanā vāyamantassāpissa lomakūpamattampi usumaṃ na gaṇhi. Padumagabbhaṃ paviṭṭhakālo viya ahosi. Dhammo hi nāmesa attānaṃ rakkhantaṃ rakkhati. Tenāha bhagavā –
‘‘д̇хаммо хавз рагкад̇и д̇хаммажаарим̣, д̇хаммо сужин̣н̣о сукамаавахаад̇и;
‘‘Dhammo have rakkhati dhammacāriṃ, dhammo suciṇṇo sukhamāvahāti;
зсаанисам̣со д̇хаммз сужин̣н̣з, на д̣̇уг̇г̇ад̇им̣ г̇ажчад̇и д̇хаммажаарий’’д̇и. (т̇зраг̇аа. 303; ж̇аа. 1.10.102) –
Esānisaṃso dhamme suciṇṇe, na duggatiṃ gacchati dhammacārī’’ti. (theragā. 303; jā. 1.10.102) –
имассаби гаммасса ниссанд̣̇зна д̇асса бхаг̇авад̇о сарийробхаасо д̣̇асасахассилогад̇хаад̇ум̣ парид̇ваа адтааси.
Imassapi kammassa nissandena tassa bhagavato sarīrobhāso dasasahassilokadhātuṃ pharitvā aṭṭhāsi.
д̇ад̣̇аа амхаагам̣ б̣од̇хисад̇д̇о суружи наама б̣раахман̣о худ̇ваа ‘‘сад̇т̇аарам̣ ниманд̇зссаамий’’д̇и убасан̇гамид̇ваа мад̇хурад̇хаммагат̇ам̣ суд̇ваа ‘‘свз маяхам̣ бхигкам̣ г̇ан̣хат̇а, бханд̇з’’д̇и ааха. ‘‘б̣раахман̣а, гид̇д̇агзхи д̇з бхигкуухи ад̇т̇о’’д̇и? ‘‘гид̇д̇агаа бана во, бханд̇з, бариваарабхигкуу’’д̇и ааха. д̇ад̣̇аа сад̇т̇у батамасаннибаад̇оязва ход̇и, д̇асмаа ‘‘годисад̇асахасса’’нд̇и ааха. ‘‘бханд̇з, саб̣б̣зхиби сад̣̇д̇хим̣ маяхам̣ бхигкам̣ г̇ан̣хат̇аа’’д̇и. сад̇т̇аа ад̇хиваасзси. б̣раахман̣о сваад̇анааяа ниманд̇зд̇ваа г̇зхам̣ г̇ажчанд̇о жинд̇зси – ‘‘ахам̣ зд̇д̇агаанам̣ бхигкуунам̣ яааг̇убхад̇д̇авад̇т̇аад̣̇ийни д̣̇аад̇ум̣ саггоми, нисийд̣̇анадтаанам̣ бана гат̇ам̣ бхависсад̇ий’’д̇и?
Tadā amhākaṃ bodhisatto suruci nāma brāhmaṇo hutvā ‘‘satthāraṃ nimantessāmī’’ti upasaṅkamitvā madhuradhammakathaṃ sutvā ‘‘sve mayhaṃ bhikkhaṃ gaṇhatha, bhante’’ti āha. ‘‘Brāhmaṇa, kittakehi te bhikkhūhi attho’’ti? ‘‘Kittakā pana vo, bhante, parivārabhikkhū’’ti āha. Tadā satthu paṭhamasannipātoyeva hoti, tasmā ‘‘koṭisatasahassa’’nti āha. ‘‘Bhante, sabbehipi saddhiṃ mayhaṃ bhikkhaṃ gaṇhathā’’ti. Satthā adhivāsesi. Brāhmaṇo svātanāya nimantetvā gehaṃ gacchanto cintesi – ‘‘ahaṃ ettakānaṃ bhikkhūnaṃ yāgubhattavatthādīni dātuṃ sakkomi, nisīdanaṭṭhānaṃ pana kathaṃ bhavissatī’’ti?
д̇асса саа жинд̇аа жад̇ураасийд̇ияож̇анасахассамад̇т̇агз тид̇асса д̣̇зваран̃н̃о бан̣д̣угамб̣аласилаасанасса ун̣хабхаавам̣ ж̇анзси. сагго ‘‘го ну ко мам̣ имамхаа таанаа жаавзд̇угаамо’’д̇и д̣̇иб̣б̣ажагкунаа ологзнд̇о махаабурисам̣ д̣̇исваа ‘‘суружи наама б̣раахман̣о б̣уд̣̇д̇хаббамукам̣ бхигкусан̇гхам̣ ниманд̇зд̇ваа нисийд̣̇анадтаанад̇т̇ааяа жинд̇зси, маяааби д̇ад̇т̇а г̇анд̇ваа бун̃н̃агодтаасам̣ г̇ахзд̇ум̣ ваддад̇ий’’д̇и вад̣дхагиван̣н̣ам̣ нимминид̇ваа ваасипарасухад̇т̇о махаабурисасса бурад̇о баад̇урахоси. ‘‘ад̇т̇и ну ко гассажи бхад̇ияаа гад̇д̇аб̣б̣агижжа’’нд̇и ааха. махаабурисо д̇ам̣ д̣̇исваа ‘‘гим̣ гаммам̣ гариссасий’’д̇и ааха. ‘‘мама аж̇аананасиббам̣ наама над̇т̇и, г̇зхам̣ ваа ман̣д̣абам̣ ваа яо яам̣ гаарзд̇и, д̇асса д̇ам̣ гаад̇ум̣ ж̇аанаамий’’д̇и. ‘‘д̇зна хи маяхам̣ гаммам̣ ад̇т̇ий’’д̇и. ‘‘гим̣, аяяаа’’д̇и? ‘‘сваад̇анааяа мз годисад̇асахассабхигкуу ниманд̇ид̇аа. д̇зсам̣ нисийд̣̇анаман̣д̣абам̣ гариссасий’’д̇и? ‘‘ахам̣ наама гарзяяам̣ сажз мз бхад̇им̣ д̣̇аад̇ум̣ сагкиссат̇аа’’д̇и. ‘‘сагкиссаами, д̇аад̇аа’’д̇и. ‘‘саад̇ху гариссаамий’’д̇и г̇анд̇ваа згам̣ бад̣̇зсам̣ ологзси. д̣̇ваад̣̇асад̇зрасаяож̇анаббамаан̣о бад̣̇зсо гасин̣аман̣д̣алам̣ вияа самад̇ало ахоси. со ‘‘зд̇д̇агз таанз сад̇д̇арад̇анамаяо ман̣д̣або удтахад̇уу’’д̇и жинд̇зд̇ваа ологзси. д̇аавад̣̇зва бат̇авим̣ бхинд̣̇ид̇ваа ман̣д̣або удтахи. д̇асса сован̣н̣амаязсу т̇амбхзсу раж̇ад̇амаяаа гхадагаа ахзсум̣, раж̇ад̇амаязсу сован̣н̣амаяаа, ман̣имаязсу т̇амбхзсу баваал̣амаяаа, баваал̣амаязсу ман̣имаяаа, сад̇д̇арад̇анамаязсу т̇амбхзсу сад̇д̇арад̇анамаяаа гхадагаа ахзсум̣. д̇ад̇о ‘‘ман̣д̣абасса анд̇аранд̇арз гин̇ган̣игаж̇аалам̣ оламб̣ад̇уу’’д̇и ологзси. саха ологанзнзва ж̇аалам̣ оламб̣и. яасса манд̣̇аваад̇зрид̇асса бан̃жан̇г̇игассзва д̇уурияасса мад̇хурасад̣̇д̣̇о нижчарад̇и. д̣̇иб̣б̣асан̇г̇ийд̇ивад̇д̇анагаало вияа ахоси. ‘‘анд̇аранд̇араа г̇анд̇хад̣̇аамамаалаад̣̇аамаани оламб̣анд̇уу’’д̇и жинд̇знд̇асса маалаад̣̇аамаани оламб̣им̣су. ‘‘годисад̇асахассасан̇каанам̣ бхигкуунам̣ аасанаани жа аад̇хаарагаани жа бат̇авим̣ бхинд̣̇ид̇ваа удтаханд̇уу’’д̇и жинд̇зси, д̇аавад̣̇зва удтахим̣су. ‘‘гон̣з гон̣з згзгаа уд̣̇агажаадияо удтаханд̇уу’’д̇и жинд̇зси, уд̣̇агажаадияо удтахим̣су.
Tassa sā cintā caturāsītiyojanasahassamatthake ṭhitassa devarañño paṇḍukambalasilāsanassa uṇhabhāvaṃ janesi. Sakko ‘‘ko nu kho maṃ imamhā ṭhānā cāvetukāmo’’ti dibbacakkhunā olokento mahāpurisaṃ disvā ‘‘suruci nāma brāhmaṇo buddhappamukhaṃ bhikkhusaṅghaṃ nimantetvā nisīdanaṭṭhānatthāya cintesi, mayāpi tattha gantvā puññakoṭṭhāsaṃ gahetuṃ vaṭṭatī’’ti vaḍḍhakivaṇṇaṃ nimminitvā vāsipharasuhattho mahāpurisassa purato pāturahosi. ‘‘Atthi nu kho kassaci bhatiyā kattabbakicca’’nti āha. Mahāpuriso taṃ disvā ‘‘kiṃ kammaṃ karissasī’’ti āha. ‘‘Mama ajānanasippaṃ nāma natthi, gehaṃ vā maṇḍapaṃ vā yo yaṃ kāreti, tassa taṃ kātuṃ jānāmī’’ti. ‘‘Tena hi mayhaṃ kammaṃ atthī’’ti. ‘‘Kiṃ, ayyā’’ti? ‘‘Svātanāya me koṭisatasahassabhikkhū nimantitā. Tesaṃ nisīdanamaṇḍapaṃ karissasī’’ti? ‘‘Ahaṃ nāma kareyyaṃ sace me bhatiṃ dātuṃ sakkhissathā’’ti. ‘‘Sakkhissāmi, tātā’’ti. ‘‘Sādhu karissāmī’’ti gantvā ekaṃ padesaṃ olokesi. Dvādasaterasayojanappamāṇo padeso kasiṇamaṇḍalaṃ viya samatalo ahosi. So ‘‘ettake ṭhāne sattaratanamayo maṇḍapo uṭṭhahatū’’ti cintetvā olokesi. Tāvadeva pathaviṃ bhinditvā maṇḍapo uṭṭhahi. Tassa sovaṇṇamayesu thambhesu rajatamayā ghaṭakā ahesuṃ, rajatamayesu sovaṇṇamayā, maṇimayesu thambhesu pavāḷamayā, pavāḷamayesu maṇimayā, sattaratanamayesu thambhesu sattaratanamayā ghaṭakā ahesuṃ. Tato ‘‘maṇḍapassa antarantare kiṅkaṇikajālaṃ olambatū’’ti olokesi. Saha olokaneneva jālaṃ olambi. Yassa mandavāteritassa pañcaṅgikasseva tūriyassa madhurasaddo niccharati. Dibbasaṅgītivattanakālo viya ahosi. ‘‘Antarantarā gandhadāmamālādāmāni olambantū’’ti cintentassa mālādāmāni olambiṃsu. ‘‘Koṭisatasahassasaṅkhānaṃ bhikkhūnaṃ āsanāni ca ādhārakāni ca pathaviṃ bhinditvā uṭṭhahantū’’ti cintesi, tāvadeva uṭṭhahiṃsu. ‘‘Koṇe koṇe ekekā udakacāṭiyo uṭṭhahantū’’ti cintesi, udakacāṭiyo uṭṭhahiṃsu.
со зд̇д̇агам̣ маабзд̇ваа б̣раахман̣асса санд̇игам̣ г̇анд̇ваа ‘‘зхи, аяяа, д̇ава ман̣д̣абам̣ ологзд̇ваа маяхам̣ бхад̇им̣ д̣̇зхий’’д̇и ааха. махаабурисо г̇анд̇ваа ман̣д̣абам̣ ологзси. ологзнд̇ассзва жа сагаласарийрам̣ бан̃жаван̣н̣ааяа бийд̇ияаа ниранд̇арам̣ пудам̣ ахоси. ат̇асса ман̣д̣абам̣ ологзд̇ваа зд̇ад̣̇ахоси – ‘‘нааяам̣ ман̣д̣або мануссабхууд̇зна гад̇о, маяхам̣ бана аж̇жхаасаяам̣ маяхам̣ г̇ун̣ам̣ ааг̇амма ад̣̇д̇хаа саггабхаванам̣ ун̣хам̣ бхависсад̇и. д̇ад̇о саггзна д̣̇зваран̃н̃аа аяам̣ ман̣д̣або гаарид̇о бхависсад̇ий’’д̇и. ‘‘на ко бана мз яуд̇д̇ам̣ зваруубз ман̣д̣абз згад̣̇ивасам̣язва д̣̇аанам̣ д̣̇аад̇ум̣, сад̇д̇аахам̣ д̣̇ассаамий’’д̇и жинд̇зси. б̣аахирагад̣̇аанан̃хи д̇ад̇д̇агамби самаанам̣ б̣од̇хисад̇д̇аанам̣ д̇удтим̣ гаад̇ум̣ на саггод̇и, алан̇гад̇асийсам̣ бана чинд̣̇ид̇ваа ан̃ж̇ид̇аагкийни уббаадзд̇ваа хад̣̇аяамам̣сам̣ ваа уб̣б̣аддзд̇ваа д̣̇иннагаалз б̣од̇хисад̇д̇аанам̣ жааг̇ам̣ ниссааяа д̇удти наама ход̇и. амхаагамби хи б̣од̇хисад̇д̇асса сивирааж̇аж̇аад̇агз д̣̇звасигам̣ бан̃жагахаабан̣асад̇асахассаани виссаж̇ж̇зд̇ваа жад̇уусу д̣̇ваарзсу наг̇арамаж̇жхз жа д̣̇аанам̣ д̣̇знд̇асса д̇ам̣ д̣̇аанам̣ жааг̇ад̇удтим̣ уббаад̣̇зд̇ум̣ наасагки. яад̣̇аа банасса б̣раахман̣аван̣н̣зна ааг̇анд̇ваа сагго д̣̇зварааж̇аа агкийни яаажи, д̇ад̣̇аа д̇аани уббаадзд̇ваа д̣̇ад̣̇амаанассзва хаасо уббаж̇ж̇и, гзсаг̇г̇амад̇д̇амби жид̇д̇ам̣ ан̃н̃ат̇ад̇д̇ам̣ наахоси. звам̣ д̣̇иннад̣̇аанам̣ ниссааяа б̣од̇хисад̇д̇аанам̣ д̇ид̇д̇и наама над̇т̇и. д̇асмаа соби махаабурисо ‘‘сад̇д̇аахам̣ маяаа годисад̇асахассасан̇каанам̣ бхигкуунам̣ д̣̇аанам̣ д̣̇аад̇ум̣ ваддад̇ий’’д̇и жинд̇зд̇ваа д̇асмим̣ ман̣д̣абз нисийд̣̇аабзд̇ваа сад̇д̇аахам̣ г̇авабаанам̣ наама ад̣̇ааси. г̇авабаананд̇и маханд̇з маханд̇з голамб̣з кийрасса буурзд̇ваа уд̣̇д̇ханзсу ааробзд̇ваа гханабаагабаггз кийрз т̇огз д̇ан̣д̣улз багкибид̇ваа баггамад̇хусаггаражун̣н̣асаббийхи абхисан̇кад̇абхож̇анам̣ вужжад̇и. мануссааязва бана баривисид̇ум̣ наасагким̣су. д̣̇звааби зганд̇аригаа худ̇ваа баривисим̣су. д̣̇ваад̣̇асад̇зрасаяож̇анаббамаан̣ам̣ таанамби бхигкуу г̇ан̣хид̇ум̣ наббахосиязва , д̇з бана бхигкуу ад̇д̇ано аанубхаавзна нисийд̣̇им̣су. барияосаанад̣̇ивасз бана саб̣б̣абхигкуунам̣ бад̇д̇аани д̇ховаабзд̇ваа бхзсаж̇ж̇ад̇т̇ааяа саббинаванийд̇ад̇зламад̇хупаан̣ид̇аанам̣ буурзд̇ваа д̇ижийварзхи сад̣̇д̇хим̣ ад̣̇ааси, сан̇гханавагабхигкунаа лад̣̇д̇хажийварасаадагаа сад̇асахассаг̇гханигаа ахзсум̣.
So ettakaṃ māpetvā brāhmaṇassa santikaṃ gantvā ‘‘ehi, ayya, tava maṇḍapaṃ oloketvā mayhaṃ bhatiṃ dehī’’ti āha. Mahāpuriso gantvā maṇḍapaṃ olokesi. Olokentasseva ca sakalasarīraṃ pañcavaṇṇāya pītiyā nirantaraṃ phuṭaṃ ahosi. Athassa maṇḍapaṃ oloketvā etadahosi – ‘‘nāyaṃ maṇḍapo manussabhūtena kato, mayhaṃ pana ajjhāsayaṃ mayhaṃ guṇaṃ āgamma addhā sakkabhavanaṃ uṇhaṃ bhavissati. Tato sakkena devaraññā ayaṃ maṇḍapo kārito bhavissatī’’ti. ‘‘Na kho pana me yuttaṃ evarūpe maṇḍape ekadivasaṃyeva dānaṃ dātuṃ, sattāhaṃ dassāmī’’ti cintesi. Bāhirakadānañhi tattakampi samānaṃ bodhisattānaṃ tuṭṭhiṃ kātuṃ na sakkoti, alaṅkatasīsaṃ pana chinditvā añjitaakkhīni uppāṭetvā hadayamaṃsaṃ vā ubbaṭṭetvā dinnakāle bodhisattānaṃ cāgaṃ nissāya tuṭṭhi nāma hoti. Amhākampi hi bodhisattassa sivirājajātake devasikaṃ pañcakahāpaṇasatasahassāni vissajjetvā catūsu dvāresu nagaramajjhe ca dānaṃ dentassa taṃ dānaṃ cāgatuṭṭhiṃ uppādetuṃ nāsakkhi. Yadā panassa brāhmaṇavaṇṇena āgantvā sakko devarājā akkhīni yāci, tadā tāni uppāṭetvā dadamānasseva hāso uppajji, kesaggamattampi cittaṃ aññathattaṃ nāhosi. Evaṃ dinnadānaṃ nissāya bodhisattānaṃ titti nāma natthi. Tasmā sopi mahāpuriso ‘‘sattāhaṃ mayā koṭisatasahassasaṅkhānaṃ bhikkhūnaṃ dānaṃ dātuṃ vaṭṭatī’’ti cintetvā tasmiṃ maṇḍape nisīdāpetvā sattāhaṃ gavapānaṃ nāma adāsi. Gavapānanti mahante mahante kolambe khīrassa pūretvā uddhanesu āropetvā ghanapākapakke khīre thoke taṇḍule pakkhipitvā pakkamadhusakkaracuṇṇasappīhi abhisaṅkhatabhojanaṃ vuccati. Manussāyeva pana parivisituṃ nāsakkhiṃsu. Devāpi ekantarikā hutvā parivisiṃsu. Dvādasaterasayojanappamāṇaṃ ṭhānampi bhikkhū gaṇhituṃ nappahosiyeva , te pana bhikkhū attano ānubhāvena nisīdiṃsu. Pariyosānadivase pana sabbabhikkhūnaṃ pattāni dhovāpetvā bhesajjatthāya sappinavanītatelamadhuphāṇitānaṃ pūretvā ticīvarehi saddhiṃ adāsi, saṅghanavakabhikkhunā laddhacīvarasāṭakā satasahassagghanikā ahesuṃ.
сад̇т̇аа анумод̣̇анам̣ гаронд̇о – ‘‘аяам̣ бурисо зваруубам̣ махаад̣̇аанам̣ ад̣̇ааси, го ну ко бхависсад̇ий’’д̇и убад̇хаарзнд̇о – ‘‘анааг̇ад̇з габбасад̇асахассаад̇хигаанам̣ д̣̇виннам̣ асан̇кязяяаанам̣ мад̇т̇агз г̇од̇амо наама б̣уд̣̇д̇хо бхависсад̇ий’’д̇и д̣̇исваа махаабурисам̣ ааманд̇зд̇ваа ‘‘д̇вам̣ зд̇д̇агам̣ наама гаалам̣ ад̇иггамид̇ваа г̇од̇амо наама б̣уд̣̇д̇хо бхависсасий’’д̇и б̣яаагааси. махаабурисо б̣яаагаран̣ам̣ суд̇ваа ‘‘ахам̣ гира б̣уд̣̇д̇хо бхависсаами, го мз гхарааваасзна ад̇т̇о, баб̣б̣аж̇иссаамий’’д̇и жинд̇зд̇ваа д̇ат̇ааруубам̣ самбад̇д̇им̣ кзл̣абин̣д̣ам̣ вияа бахааяа сад̇т̇у санд̇игз баб̣б̣аж̇ид̇ваа б̣уд̣̇д̇хаважанам̣ уг̇г̇ан̣хид̇ваа абхин̃н̃ааяо жа самаабад̇д̇ияо жа ниб̣б̣ад̇д̇зд̇ваа ааяубарияосаанз б̣рахмалогз ниб̣б̣ад̇д̇и.
Satthā anumodanaṃ karonto – ‘‘ayaṃ puriso evarūpaṃ mahādānaṃ adāsi, ko nu kho bhavissatī’’ti upadhārento – ‘‘anāgate kappasatasahassādhikānaṃ dvinnaṃ asaṅkhyeyyānaṃ matthake gotamo nāma buddho bhavissatī’’ti disvā mahāpurisaṃ āmantetvā ‘‘tvaṃ ettakaṃ nāma kālaṃ atikkamitvā gotamo nāma buddho bhavissasī’’ti byākāsi. Mahāpuriso byākaraṇaṃ sutvā ‘‘ahaṃ kira buddho bhavissāmi, ko me gharāvāsena attho, pabbajissāmī’’ti cintetvā tathārūpaṃ sampattiṃ kheḷapiṇḍaṃ viya pahāya satthu santike pabbajitvā buddhavacanaṃ uggaṇhitvā abhiññāyo ca samāpattiyo ca nibbattetvā āyupariyosāne brahmaloke nibbatti.
