கோஸம்ப³கவிவாத³கதா²

Kosambakavivādakathā

451. கோஸம்ப³கக்க²ந்த⁴கே – தங் பி⁴க்கு²ங் ஆபத்தியா அத³ஸ்ஸனே உக்கி²பிங்ஸூதி எத்த² அயமனுபுப்³பி³கதா² – த்³வே கிர பி⁴க்கூ² ஏகஸ்மிங் ஆவாஸே வஸந்தி வினயத⁴ரோ ச ஸுத்தந்திகோ ச. தேஸு ஸுத்தந்திகோ பி⁴க்கு² ஏகதி³வஸங் வச்சகுடிங் பவிட்டோ² ஆசமனஉத³காவஸேஸங் பா⁴ஜனே ட²பெத்வாவ நிக்க²மி. வினயத⁴ரோ பச்சா² பவிட்டோ² தங் உத³கங் தி³ஸ்வா நிக்க²மித்வா தங் பி⁴க்கு²ங் புச்சி² – ‘‘ஆவுஸோ, தயா இத³ங் உத³கங் ட²பித’’ந்தி? ‘‘ஆமாவுஸோ’’தி. ‘‘கிங் த்வங் எத்த² ஆபத்திபா⁴வங் ந ஜானாஸீ’’தி? ‘‘ஆம, ந ஜானாமீ’’தி. ‘‘ஹோதி, ஆவுஸோ எத்த² ஆபத்தீ’’தி? ‘‘ஸசே ஹோதி, தே³ஸிஸ்ஸாமீ’’தி. ‘‘ஸசே பன தே, ஆவுஸோ, அஸஞ்சிச்ச அஸதியா கதங், நத்தி² ஆபத்தீ’’தி. ஸோ தஸ்ஸா ஆபத்தியா அனாபத்திதி³ட்டி² அஹோஸி.

451. Kosambakakkhandhake – taṃ bhikkhuṃ āpattiyā adassane ukkhipiṃsūti ettha ayamanupubbikathā – dve kira bhikkhū ekasmiṃ āvāse vasanti vinayadharo ca suttantiko ca. Tesu suttantiko bhikkhu ekadivasaṃ vaccakuṭiṃ paviṭṭho ācamanaudakāvasesaṃ bhājane ṭhapetvāva nikkhami. Vinayadharo pacchā paviṭṭho taṃ udakaṃ disvā nikkhamitvā taṃ bhikkhuṃ pucchi – ‘‘āvuso, tayā idaṃ udakaṃ ṭhapita’’nti? ‘‘Āmāvuso’’ti. ‘‘Kiṃ tvaṃ ettha āpattibhāvaṃ na jānāsī’’ti? ‘‘Āma, na jānāmī’’ti. ‘‘Hoti, āvuso ettha āpattī’’ti? ‘‘Sace hoti, desissāmī’’ti. ‘‘Sace pana te, āvuso, asañcicca asatiyā kataṃ, natthi āpattī’’ti. So tassā āpattiyā anāpattidiṭṭhi ahosi.

வினயத⁴ரோபி அத்தனோ நிஸ்ஸிதகானங் ‘‘அயங் ஸுத்தந்திகோ ஆபத்திங் ஆபஜ்ஜமானோபி ந ஜானாதீ’’தி ஆரோசேஸி. தே தஸ்ஸ நிஸ்ஸிதகே தி³ஸ்வா ‘‘தும்ஹாகங் உபஜ்ஜா²யோ ஆபத்திங் ஆபஜ்ஜித்வாபி ஆபத்திபா⁴வங் ந ஜானாதீ’’தி ஆஹங்ஸு. தே க³ந்த்வா அத்தனோ உபஜ்ஜா²யஸ்ஸ ஆரோசேஸுங். ஸோ ஏவமாஹ – ‘‘அயங் வினயத⁴ரோ புப்³பே³ அனாபத்தீ’’தி வத்வா ‘‘இதா³னி ஆபத்தீ’’தி வத³தி. முஸாவாதீ³ ஏஸோதி. தே க³ந்த்வா ‘‘தும்ஹாகங் உபஜ்ஜா²யோ முஸாவாதீ³’’தி ஏவங் அஞ்ஞமஞ்ஞங் கலஹங் வட்³ட⁴யிங்ஸு. ததோ வினயத⁴ரோ ஓகாஸங் லபி⁴த்வா தஸ்ஸ ஆபத்தியா அத³ஸ்ஸனே உக்கே²பனீயகம்மங் அகாஸி. தேன வுத்தங் – ‘‘தங் பி⁴க்கு²ங் ஆபத்தியா அத³ஸ்ஸனே உக்கி²பிங்ஸூ’’தி.

Vinayadharopi attano nissitakānaṃ ‘‘ayaṃ suttantiko āpattiṃ āpajjamānopi na jānātī’’ti ārocesi. Te tassa nissitake disvā ‘‘tumhākaṃ upajjhāyo āpattiṃ āpajjitvāpi āpattibhāvaṃ na jānātī’’ti āhaṃsu. Te gantvā attano upajjhāyassa ārocesuṃ. So evamāha – ‘‘ayaṃ vinayadharo pubbe anāpattī’’ti vatvā ‘‘idāni āpattī’’ti vadati. Musāvādī esoti. Te gantvā ‘‘tumhākaṃ upajjhāyo musāvādī’’ti evaṃ aññamaññaṃ kalahaṃ vaḍḍhayiṃsu. Tato vinayadharo okāsaṃ labhitvā tassa āpattiyā adassane ukkhepanīyakammaṃ akāsi. Tena vuttaṃ – ‘‘taṃ bhikkhuṃ āpattiyā adassane ukkhipiṃsū’’ti.

453. பி⁴ன்னோ பி⁴க்கு²ஸங்கோ⁴ பி⁴ன்னோ பி⁴க்கு²ஸங்கோ⁴தி எத்த² ந தாவ பி⁴ன்னோ; அபிச கோ² யதா² தே³வே வுட்டே² ‘‘இதா³னி ஸஸ்ஸங் நிப்ப²ன்ன’’ந்தி வுச்சதி, அவஸ்ஸஞ்ஹி தங் நிப்ப²ஜ்ஜிஸ்ஸதி, ஏவமேவ இமினா காரணேன ஆயதிங் அவஸ்ஸங் பி⁴ஜ்ஜிஸ்ஸதி, ஸோ ச கோ² கலஹவஸேன ந ஸங்க⁴பே⁴த³வஸேன, தஸ்மா ‘‘பி⁴ன்னோ’’தி வுத்தங். ஸம்ப⁴மஅத்த²வஸேன செத்த² ஆமேடி³தங் வேதி³தப்³ப³ங்.

453.Bhinno bhikkhusaṅgho bhinno bhikkhusaṅghoti ettha na tāva bhinno; apica kho yathā deve vuṭṭhe ‘‘idāni sassaṃ nipphanna’’nti vuccati, avassañhi taṃ nipphajjissati, evameva iminā kāraṇena āyatiṃ avassaṃ bhijjissati, so ca kho kalahavasena na saṅghabhedavasena, tasmā ‘‘bhinno’’ti vuttaṃ. Sambhamaatthavasena cettha āmeḍitaṃ veditabbaṃ.

454. ஏதமத்த²ங் பா⁴ஸித்வா உட்டா²யாஸனா பக்காமீதி கஸ்மா ஏவங் பா⁴ஸித்வா பக்காமி? ஸசே ஹி ப⁴க³வா உக்கே²பகே வா ‘‘அகாரணே தும்ஹேஹி ஸோ பி⁴க்கு² உக்கி²த்தோ’’தி வதெ³ய்ய, உக்கி²த்தானுவத்தகே வா ‘‘தும்ஹே ஆபத்திங் ஆபன்னா’’தி வதெ³ய்ய, ‘‘ஏதேஸங் ப⁴க³வா பக்கோ², ஏதேஸங் ப⁴க³வா பக்கோ²’’தி வத்வா ஆகா⁴தங் ப³ந்தெ⁴ய்யுங், தஸ்மா தந்திமேவ ட²பெத்வா ஏதமத்த²ங் பா⁴ஸித்வா உட்டா²யாஸனா பக்காமி.

454.Etamatthaṃbhāsitvā uṭṭhāyāsanā pakkāmīti kasmā evaṃ bhāsitvā pakkāmi? Sace hi bhagavā ukkhepake vā ‘‘akāraṇe tumhehi so bhikkhu ukkhitto’’ti vadeyya, ukkhittānuvattake vā ‘‘tumhe āpattiṃ āpannā’’ti vadeyya, ‘‘etesaṃ bhagavā pakkho, etesaṃ bhagavā pakkho’’ti vatvā āghātaṃ bandheyyuṃ, tasmā tantimeva ṭhapetvā etamatthaṃ bhāsitvā uṭṭhāyāsanā pakkāmi.

455. அத்தனா வா அத்தானந்தி எத்த² யோ ஸங்கே⁴ன உக்கே²பனீயகதானங் அத⁴ம்மவாதீ³னங் பக்கே² நிஸின்னோ ‘‘தும்ஹே கிங் ப⁴ணதா²’’தி தேஸஞ்ச இதரேஸஞ்ச லத்³தி⁴ங் ஸுத்வா ‘‘இமே அத⁴ம்மவாதி³னோ, இதரே த⁴ம்மவாதி³னோ’’தி சித்தங் உப்பாதே³தி, அயங் தேஸங் மஜ்ஜே² நிஸின்னோவ தேஸங் நானாஸங்வாஸகோ ஹோதி, கம்மங் கோபேதி, இதரேஸம்பி ஹத்த²பாஸங் அனாக³தத்தா கோபேதி. ஏவங் அத்தனா வா அத்தானங் நானாஸங்வாஸகங் கரோதி. ஸமானஸங்வாஸகந்தி எத்தா²பி யோ அத⁴ம்மவாதீ³னங் பக்கே² நிஸின்னோ ‘‘அத⁴ம்மவாதி³னோ இமே, இதரே த⁴ம்மவாதி³னோ’’தி தேஸங் மஜ்ஜ²ங் பவிஸதி, யத்த² வா தத்த² வா பன பக்கே² நிஸின்னோ ‘‘இமே த⁴ம்மவாதி³னோ’’தி க³ண்ஹாதி, அயங் அத்தனா வா அத்தானங் ஸமானஸங்வாஸகங் கரோதீதி வேதி³தப்³போ³.

455.Attanā vā attānanti ettha yo saṅghena ukkhepanīyakatānaṃ adhammavādīnaṃ pakkhe nisinno ‘‘tumhe kiṃ bhaṇathā’’ti tesañca itaresañca laddhiṃ sutvā ‘‘ime adhammavādino, itare dhammavādino’’ti cittaṃ uppādeti, ayaṃ tesaṃ majjhe nisinnova tesaṃ nānāsaṃvāsako hoti, kammaṃ kopeti, itaresampi hatthapāsaṃ anāgatattā kopeti. Evaṃ attanā vā attānaṃ nānāsaṃvāsakaṃ karoti. Samānasaṃvāsakanti etthāpi yo adhammavādīnaṃ pakkhe nisinno ‘‘adhammavādino ime, itare dhammavādino’’ti tesaṃ majjhaṃ pavisati, yattha vā tattha vā pana pakkhe nisinno ‘‘ime dhammavādino’’ti gaṇhāti, ayaṃ attanā vā attānaṃ samānasaṃvāsakaṃ karotīti veditabbo.

456. காயகம்மங் வசீகம்மந்தி எத்த² காயேன பஹரந்தா காயகம்மங் உபத³ங்ஸெந்தி, ப²ருஸங் வத³ந்தா வசீகம்மங் உபத³ங்ஸெந்தீதி வேதி³தப்³பா³. ஹத்த²பராமாஸங் கரொந்தீதி கோத⁴வஸேன ஹத்தே²ஹி அஞ்ஞமஞ்ஞங் பராமஸனங் கரொந்தி. அத⁴ம்மியாயமானேதி அத⁴ம்மியானி கிச்சானி குருமானே. அஸம்மோதி³காவத்தமானாயாதி அஸம்மோதி³காய வத்தமானாய. அயமேவ வா பாடோ². ஸம்மோத³னகதா²ய அவத்தமானாயாதி அத்தோ². எத்தாவதா ந அஞ்ஞமஞ்ஞந்தி எத்த² த்³வே பந்தியோ கத்வா உபசாரங் முஞ்சித்வா நிஸீதி³தப்³ப³ங், த⁴ம்மியாயமானே பன ஸம்மோதி³காய வத்தமானாய ஆஸனந்தரிகாய நிஸீதி³தப்³ப³ங், ஏகேகங் ஆஸனங் அந்தரங் கத்வா நிஸீதி³தப்³ப³ங்.

456.Kāyakammaṃ vacīkammanti ettha kāyena paharantā kāyakammaṃ upadaṃsenti, pharusaṃ vadantā vacīkammaṃ upadaṃsentīti veditabbā. Hatthaparāmāsaṃ karontīti kodhavasena hatthehi aññamaññaṃ parāmasanaṃ karonti. Adhammiyāyamāneti adhammiyāni kiccāni kurumāne. Asammodikāvattamānāyāti asammodikāya vattamānāya. Ayameva vā pāṭho. Sammodanakathāya avattamānāyāti attho. Ettāvatā na aññamaññanti ettha dve pantiyo katvā upacāraṃ muñcitvā nisīditabbaṃ, dhammiyāyamāne pana sammodikāya vattamānāya āsanantarikāya nisīditabbaṃ, ekekaṃ āsanaṃ antaraṃ katvā nisīditabbaṃ.

457-458. மா ப⁴ண்ட³னந்திஆதீ³ஸு ‘‘அகத்தா²’’தி பாட²ஸேஸங் க³ஹெத்வா ‘‘மா ப⁴ண்ட³னங் அகத்தா²’’தி ஏவமத்தோ² த³ட்ட²ப்³போ³. அத⁴ம்மவாதீ³தி உக்கி²த்தானுவத்தகேஸு அஞ்ஞதரோ. அயங் பன பி⁴க்கு² ப⁴க³வதோ அத்த²காமோ, அயங் கிரஸ்ஸ அதி⁴ப்பாயோ ‘‘இமே பி⁴க்கூ² கோதா⁴பி⁴பூ⁴தா ஸத்து² வசனங் ந க³ண்ஹந்தி, மா ப⁴க³வா ஏதே ஓவத³ந்தோ கிலமித்தா²’’தி தஸ்மா ஏவமாஹ. ப⁴க³வா பன ‘‘பச்சா²பி ஸஞ்ஞங் லபி⁴த்வா ஓரமிஸ்ஸந்தீ’’தி தேஸங் அனுகம்பாய அதீதவத்து²ங் ஆஹரித்வா கதே²ஸி. தத்த² அனத்த²தோதி அனத்தோ² அதோ; ஏதஸ்மா மே புரிஸா அனத்தோ²தி வுத்தங் ஹோதி. அத² வா அனத்த²தோதி அனத்த²தோ³. ஸேஸங் பாகடமேவ.

457-458.Mā bhaṇḍanantiādīsu ‘‘akatthā’’ti pāṭhasesaṃ gahetvā ‘‘mā bhaṇḍanaṃ akatthā’’ti evamattho daṭṭhabbo. Adhammavādīti ukkhittānuvattakesu aññataro. Ayaṃ pana bhikkhu bhagavato atthakāmo, ayaṃ kirassa adhippāyo ‘‘ime bhikkhū kodhābhibhūtā satthu vacanaṃ na gaṇhanti, mā bhagavā ete ovadanto kilamitthā’’ti tasmā evamāha. Bhagavā pana ‘‘pacchāpi saññaṃ labhitvā oramissantī’’ti tesaṃ anukampāya atītavatthuṃ āharitvā kathesi. Tattha anatthatoti anattho ato; etasmā me purisā anatthoti vuttaṃ hoti. Atha vā anatthatoti anatthado. Sesaṃ pākaṭameva.

464. புது²ஸத்³தோ³திஆதி³கா³தா²ஸு பன புது² மஹா ஸத்³தோ³ அஸ்ஸாதி புது²ஸத்³தோ³. ஸமஜனோதி ஸமானோ ஏகஸதி³ஸோ ஜனோ; ஸப்³போ³ சாயங் ப⁴ண்ட³னகாரகோஜனோ ஸமந்ததோ ஸத்³த³னிச்சா²ரணேன புது²ஸத்³தோ³ சேவ ஸதி³ஸோ சாதி வுத்தங் ஹோதி. ந பா³லோ கோசி மஞ்ஞதா²தி தத்த² கோசி ஏகோபி ‘‘அஹங் பா³லோ’’தி ந மஞ்ஞித்த²; ஸப்³பே³பி பண்டி³தமானினோயேவ. நாஞ்ஞங் பி⁴ய்யோ அமஞ்ஞருந்தி கோசி ஏகோபி ‘‘அஹங் பா³லோ’’தி ச ந மஞ்ஞித்த²; பி⁴ய்யோ ச ஸங்க⁴ஸ்மிங் பி⁴ஜ்ஜமானே அஞ்ஞம்பி ஏகங் ‘‘மய்ஹங் காரணா ஸங்கோ⁴ பி⁴ஜ்ஜதீ’’தி இத³ங் காரணங் ந மஞ்ஞித்தா²தி அத்தோ².

464.Puthusaddotiādigāthāsu pana puthu mahā saddo assāti puthusaddo. Samajanoti samāno ekasadiso jano; sabbo cāyaṃ bhaṇḍanakārakojano samantato saddanicchāraṇena puthusaddo ceva sadiso cāti vuttaṃ hoti. Na bālo koci maññathāti tattha koci ekopi ‘‘ahaṃ bālo’’ti na maññittha; sabbepi paṇḍitamāninoyeva. Nāññaṃ bhiyyo amaññarunti koci ekopi ‘‘ahaṃ bālo’’ti ca na maññittha; bhiyyo ca saṅghasmiṃ bhijjamāne aññampi ekaṃ ‘‘mayhaṃ kāraṇā saṅgho bhijjatī’’ti idaṃ kāraṇaṃ na maññitthāti attho.

பரிமுட்டா²தி பரிமுட்ட²ஸ்ஸதினோ. வாசாகோ³சரபா⁴ணினோதி ராகாரஸ்ஸ ரஸ்ஸாதே³ஸோ கதோ , வாசாகோ³சரா ந ஸதிபட்டா²னாதி³கோ³சரா. பா⁴ணினோ ச கத²ங் பா⁴ணினோ? யாவிச்ச²ந்தி முகா²யாமங் யாவ முக²ங் பஸாரேதுங் இச்ச²ந்தி, தாவ பஸாரெத்வா பா⁴ணினோ, ஏகோபி ஸங்க⁴கா³ரவேன முக²ஸங்கோசங் ந கரோதீதி அத்தோ². யேன நீதாதி யேன கலஹேன இமங் நில்லஜ்ஜபா⁴வங் நீதா. ந தங் விதூ³தி ந தங் ஜானந்தி, ‘‘ஏவங் ஸாதீ³னவோ அய’’ந்தி.

Parimuṭṭhāti parimuṭṭhassatino. Vācāgocarabhāṇinoti rākārassa rassādeso kato , vācāgocarā na satipaṭṭhānādigocarā. Bhāṇino ca kathaṃ bhāṇino? Yāvicchanti mukhāyāmaṃ yāva mukhaṃ pasāretuṃ icchanti, tāva pasāretvā bhāṇino, ekopi saṅghagāravena mukhasaṅkocaṃ na karotīti attho. Yena nītāti yena kalahena imaṃ nillajjabhāvaṃ nītā. Na taṃ vidūti na taṃ jānanti, ‘‘evaṃ sādīnavo aya’’nti.

யே ச தங் உபனய்ஹந்தீதி தங் ‘‘அக்கொச்சி² மங், அவதி⁴ ம’’ந்திஆதி³கங் ஆகாரங் யே ச உபனய்ஹந்தி. ஸனந்தனோதி போராணோ.

Ye ca taṃ upanayhantīti taṃ ‘‘akkocchi maṃ, avadhi ma’’ntiādikaṃ ākāraṃ ye ca upanayhanti. Sanantanoti porāṇo.

பரேதி பண்டி³தே ட²பெத்வா ததோ அஞ்ஞே ப⁴ண்ட³னகாரகா பரே நாம. தே எத்த² ஸங்க⁴மஜ்ஜே² கலஹங் கரொந்தா ‘‘மயங் யமாமஸே உபயமாம; ஸததங் ஸமிதங் மச்சுஸந்திகங் க³ச்சா²மா’’தி ந ஜானந்தி. யே ச தத்த² விஜானந்தீதி யே தத்த² பண்டி³தா ‘‘மயங் மச்சுஸமீபங் க³ச்சா²மா’’தி விஜானந்தி. ததோ ஸம்மந்தி மேத⁴கா³தி ஏவஞ்ஹி தே ஜானந்தா யோனிஸோமனஸிகாரங் உப்பாதெ³த்வா மேத⁴கா³னங் கலஹானங் வூபஸமாய படிபஜ்ஜந்தி.

Pareti paṇḍite ṭhapetvā tato aññe bhaṇḍanakārakā pare nāma. Te ettha saṅghamajjhe kalahaṃ karontā ‘‘mayaṃ yamāmase upayamāma; satataṃ samitaṃ maccusantikaṃ gacchāmā’’ti na jānanti. Ye ca tattha vijānantīti ye tattha paṇḍitā ‘‘mayaṃ maccusamīpaṃ gacchāmā’’ti vijānanti. Tatosammanti medhagāti evañhi te jānantā yonisomanasikāraṃ uppādetvā medhagānaṃ kalahānaṃ vūpasamāya paṭipajjanti.

அட்டி²ச்சி²ன்னாதி அயங் கா³தா² ப்³ரஹ்மத³த்தஞ்ச தீ³கா⁴வுகுமாரஞ்ச ஸந்தா⁴ய வுத்தா. தேஸம்பி ஹோதி ஸங்க³தி, கஸ்மா தும்ஹாகங் ந ஹோதி, யேஸங் வோ நேவ மாதாபிதூனங் அட்டீ²னி சி²ன்னானி, ந பாணா ஹதா, ந க³வாஸ்ஸத⁴னானி ஹடானீதி.

Aṭṭhicchinnāti ayaṃ gāthā brahmadattañca dīghāvukumārañca sandhāya vuttā. Tesampi hoti saṅgati, kasmā tumhākaṃ na hoti, yesaṃ vo neva mātāpitūnaṃ aṭṭhīni chinnāni, na pāṇā hatā, na gavāssadhanāni haṭānīti.

ஸசே லபே⁴தா²திஆதி³கா³தா² பண்டி³தஸஹாயஸ்ஸ ச பா³லஸஹாயஸ்ஸ ச வண்ணாவண்ணதீ³பனத்த²ங் வுத்தா. அபி⁴பு⁴ய்ய ஸப்³பா³னி பரிஸ்ஸயானீதி பாகடபரிஸ்ஸயே ச படிச்ச²ன்னபரிஸ்ஸயே ச அபி⁴ப⁴வித்வா தேன ஸத்³தி⁴ங் அத்தமனோ ஸதிமா சரெய்ய.

Sace labhethātiādigāthā paṇḍitasahāyassa ca bālasahāyassa ca vaṇṇāvaṇṇadīpanatthaṃ vuttā. Abhibhuyya sabbāni parissayānīti pākaṭaparissaye ca paṭicchannaparissaye ca abhibhavitvā tena saddhiṃ attamano satimā careyya.

ராஜாவ ரட்ட²ங் விஜிதந்தி யதா² அத்தனோ விஜிதங் ரட்ட²ங் மஹாஜனகராஜா ச அரிந்த³மமஹாராஜா ச பஹாய ஏககா சரிங்ஸு; ஏவங் சரெய்யாதி அத்தோ². மாதங்க³ரஞ்ஞேவ நாகோ³தி மாதங்கோ³ அரஞ்ஞே நாகோ³வ. மாதங்கோ³தி ஹத்தீ² வுச்சதி; நாகோ³தி மஹந்தாதி⁴வசனமேதங். யதா² ஹி மாதுபோஸகோ மாதங்க³னாகோ³ அரஞ்ஞே ஏகோ சரி, ந ச பாபானி அகாஸி. யதா² ச பாலிலெய்யகோ, ஏவங் ஏகோ சரே, ந ச பாபானி கயிராதி வுத்தங் ஹோதி.

Rājāvaraṭṭhaṃ vijitanti yathā attano vijitaṃ raṭṭhaṃ mahājanakarājā ca arindamamahārājā ca pahāya ekakā cariṃsu; evaṃ careyyāti attho. Mātaṅgaraññeva nāgoti mātaṅgo araññe nāgova. Mātaṅgoti hatthī vuccati; nāgoti mahantādhivacanametaṃ. Yathā hi mātuposako mātaṅganāgo araññe eko cari, na ca pāpāni akāsi. Yathā ca pālileyyako, evaṃ eko care, na ca pāpāni kayirāti vuttaṃ hoti.

Next: பாலிலெய்யகக³மனகதா² • Pālileyyakagamanakathā

Related texts:

திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
271. கோஸம்ப³கவிவாத³கதா² • 271. Kosambakavivādakathā
272. தீ³கா⁴வுவத்து² • 272. Dīghāvuvatthu

டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
கோஸம்ப³கவிவாத³கதா²வண்ணனா • Kosambakavivādakathāvaṇṇanā
தீ³கா⁴வுவத்து²கதா²வண்ணனா • Dīghāvuvatthukathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
கோஸம்ப³கவிவாத³கதா²வண்ணனா • Kosambakavivādakathāvaṇṇanā
தீ³கா⁴வுவத்து²கதா²வண்ணனா • Dīghāvuvatthukathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கோஸம்ப³கவிவாத³கதா²வண்ணனா • Kosambakavivādakathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 271. கோஸம்ப³கவிவாத³கதா² • 271. Kosambakavivādakathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact