271. கோஸம்ப³கவிவாத³கதா²

271. Kosambakavivādakathā

451. தேன ஸமயேன பு³த்³தோ⁴ ப⁴க³வா கோஸம்பி³யங் விஹரதி கோ⁴ஸிதாராமே. தேன கோ² பன ஸமயேன அஞ்ஞதரோ பி⁴க்கு² ஆபத்திங் ஆபன்னோ ஹோதி. ஸோ தஸ்ஸா ஆபத்தியா ஆபத்திதி³ட்டி² ¹ ஹோதி; அஞ்ஞே பி⁴க்கூ² தஸ்ஸா ஆபத்தியா அனாபத்திதி³ட்டி²னோ ஹொந்தி. ஸோ அபரேன ஸமயேன தஸ்ஸா ஆபத்தியா அனா பத்திதி³ட்டி² ஹோதி; அஞ்ஞே பி⁴க்கூ² தஸ்ஸா ஆபத்தியா ஆபத்திதி³ட்டி²னோ ஹொந்தி. அத² கோ² தே பி⁴க்கூ² தங் பி⁴க்கு²ங் ஏதத³வோசுங் – ‘‘ஆபத்திங் த்வங், ஆவுஸோ, ஆபன்னோ, பஸ்ஸஸேதங் ஆபத்தி’’ந்தி? ‘‘நத்தி² மே, ஆவுஸோ, ஆபத்தி யமஹங் பஸ்ஸெய்ய’’ந்தி. அத² கோ² தே பி⁴க்கூ² ஸாமக்³கி³ங் லபி⁴த்வா தங் பி⁴க்கு²ங் ஆபத்தியா அத³ஸ்ஸனே உக்கி²பிங்ஸு. ஸோ ச பி⁴க்கு² ப³ஹுஸ்ஸுதோ ஹோதி ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ ப்³யத்தோ மேதா⁴வீ லஜ்ஜீ குக்குச்சகோ ஸிக்கா²காமோ. அத² கோ² ஸோ பி⁴க்கு² ஸந்தி³ட்டே² ஸம்ப⁴த்தே பி⁴க்கூ² உபஸங்கமித்வா ஏதத³வோச – ‘‘அனாபத்தி ஏஸா, ஆவுஸோ, நேஸா ஆபத்தி. அனாபன்னொம்ஹி, நம்ஹி ஆபன்னோ. அனுக்கி²த்தொம்ஹி, நம்ஹி உக்கி²த்தோ. அத⁴ம்மிகேனம்ஹி கம்மேன உக்கி²த்தோ குப்பேன அட்டா²னாரஹேன. ஹோத² மே ஆயஸ்மந்தோ த⁴ம்மதோ வினயதோ பக்கா²’’தி. அலபி⁴ கோ² ஸோ பி⁴க்கு² ஸந்தி³ட்டே² ஸம்ப⁴த்தே பி⁴க்கூ² பக்கே². ஜானபதா³னம்பி ஸந்தி³ட்டா²னங் ஸம்ப⁴த்தானங் பி⁴க்கூ²னங் ஸந்திகே தூ³தங் பாஹேஸி – அனாபத்தி ஏஸா, ஆவுஸோ, நேஸா ஆபத்தி. அனாபன்னொம்ஹி, நம்ஹி ஆபன்னோ. அனுக்கி²த்தொம்ஹி, நம்ஹி உக்கி²த்தோ. அத⁴ம்மிகேனம்ஹி கம்மேன உக்கி²த்தோ குப்பேன அட்டா²னாரஹேன. ஹொந்து மே ஆயஸ்மந்தோ த⁴ம்மதோ வினயதோ பக்கா²’’தி. அலபி⁴ கோ² ஸோ பி⁴க்கு² ஜானபதே³பி ஸந்தி³ட்டே² ஸம்ப⁴த்தே பி⁴க்கூ² பக்கே². அத² கோ² தே உக்கி²த்தானுவத்தகா பி⁴க்கூ² யேன உக்கே²பகா பி⁴க்கூ² தேனுபஸங்கமிங்ஸு, உபஸங்கமித்வா உக்கே²பகே பி⁴க்கூ² ஏதத³வோசுங் – ‘‘அனாபத்தி ஏஸா, ஆவுஸோ, நேஸா ஆபத்தி. அனாபன்னோ ஏஸோ பி⁴க்கு², நேஸோ பி⁴க்கு² ஆபன்னோ. அனுக்கி²த்தோ ஏஸோ பி⁴க்கு², நேஸோ பி⁴க்கு² உக்கி²த்தோ . அத⁴ம்மிகேன கம்மேன உக்கி²த்தோ குப்பேன அட்டா²னாரஹேனா’’தி. ஏவங் வுத்தே உக்கே²பகா பி⁴க்கூ² உக்கி²த்தானுவத்தகே பி⁴க்கூ² ஏதத³வோசுங் – ‘‘ஆபத்தி ஏஸா ஆவுஸோ, நேஸா அனாபத்தி. ஆபன்னோ ஏஸோ பி⁴க்கு², நேஸோ பி⁴க்கு² அனாபன்னோ. உக்கி²த்தோ ஏஸோ பி⁴க்கு², நேஸோ பி⁴க்கு² அனுக்கி²த்தோ. த⁴ம்மிகேன கம்மேன உக்கி²த்தோ அகுப்பேன டா²னாரஹேன. மா கோ² தும்ஹே ஆயஸ்மந்தோ ஏதங் உக்கி²த்தகங் பி⁴க்கு²ங் அனுவத்தித்த² அனுபரிவாரேதா²’’தி. ஏவம்பி கோ² தே உக்கி²த்தானுவத்தகா பி⁴க்கூ² உக்கே²பகேஹி பி⁴க்கூ²ஹி வுச்சமானா ததே²வ தங் உக்கி²த்தகங் பி⁴க்கு²ங் அனுவத்திங்ஸு அனுபரிவாரேஸுங்.

451. Tena samayena buddho bhagavā kosambiyaṃ viharati ghositārāme. Tena kho pana samayena aññataro bhikkhu āpattiṃ āpanno hoti. So tassā āpattiyā āpattidiṭṭhi ² hoti; aññe bhikkhū tassā āpattiyā anāpattidiṭṭhino honti. So aparena samayena tassā āpattiyā anā pattidiṭṭhi hoti; aññe bhikkhū tassā āpattiyā āpattidiṭṭhino honti. Atha kho te bhikkhū taṃ bhikkhuṃ etadavocuṃ – ‘‘āpattiṃ tvaṃ, āvuso, āpanno, passasetaṃ āpatti’’nti? ‘‘Natthi me, āvuso, āpatti yamahaṃ passeyya’’nti. Atha kho te bhikkhū sāmaggiṃ labhitvā taṃ bhikkhuṃ āpattiyā adassane ukkhipiṃsu. So ca bhikkhu bahussuto hoti āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo. Atha kho so bhikkhu sandiṭṭhe sambhatte bhikkhū upasaṅkamitvā etadavoca – ‘‘anāpatti esā, āvuso, nesā āpatti. Anāpannomhi, namhi āpanno. Anukkhittomhi, namhi ukkhitto. Adhammikenamhi kammena ukkhitto kuppena aṭṭhānārahena. Hotha me āyasmanto dhammato vinayato pakkhā’’ti. Alabhi kho so bhikkhu sandiṭṭhe sambhatte bhikkhū pakkhe. Jānapadānampi sandiṭṭhānaṃ sambhattānaṃ bhikkhūnaṃ santike dūtaṃ pāhesi – anāpatti esā, āvuso, nesā āpatti. Anāpannomhi, namhi āpanno. Anukkhittomhi, namhi ukkhitto. Adhammikenamhi kammena ukkhitto kuppena aṭṭhānārahena. Hontu me āyasmanto dhammato vinayato pakkhā’’ti. Alabhi kho so bhikkhu jānapadepi sandiṭṭhe sambhatte bhikkhū pakkhe. Atha kho te ukkhittānuvattakā bhikkhū yena ukkhepakā bhikkhū tenupasaṅkamiṃsu, upasaṅkamitvā ukkhepake bhikkhū etadavocuṃ – ‘‘anāpatti esā, āvuso, nesā āpatti. Anāpanno eso bhikkhu, neso bhikkhu āpanno. Anukkhitto eso bhikkhu, neso bhikkhu ukkhitto . Adhammikena kammena ukkhitto kuppena aṭṭhānārahenā’’ti. Evaṃ vutte ukkhepakā bhikkhū ukkhittānuvattake bhikkhū etadavocuṃ – ‘‘āpatti esā āvuso, nesā anāpatti. Āpanno eso bhikkhu, neso bhikkhu anāpanno. Ukkhitto eso bhikkhu, neso bhikkhu anukkhitto. Dhammikena kammena ukkhitto akuppena ṭhānārahena. Mā kho tumhe āyasmanto etaṃ ukkhittakaṃ bhikkhuṃ anuvattittha anuparivārethā’’ti. Evampi kho te ukkhittānuvattakā bhikkhū ukkhepakehi bhikkhūhi vuccamānā tatheva taṃ ukkhittakaṃ bhikkhuṃ anuvattiṃsu anuparivāresuṃ.

452. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘இத⁴, ப⁴ந்தே, அஞ்ஞதரோ பி⁴க்கு² ஆபத்திங் ஆபன்னோ அஹோஸி. ஸோ தஸ்ஸா ஆபத்தியா ஆபத்திதி³ட்டி² அஹோஸி, அஞ்ஞே பி⁴க்கூ² தஸ்ஸா ஆபத்தியா அனாபத்திதி³ட்டி²னோ அஹேஸுங். ஸோ அபரேன ஸமயேன தஸ்ஸா ஆபத்தியா அனாபத்திதி³ட்டி² அஹோஸி, அஞ்ஞே பி⁴க்கூ² தஸ்ஸா ஆபத்தியா ஆபத்திதி³ட்டி²னோ அஹேஸுங். அத² கோ² தே, ப⁴ந்தே, பி⁴க்கூ² தங் பி⁴க்கு²ங் ஏதத³வோசுங் – ‘ஆபத்திங் த்வங், ஆவுஸோ, ஆபன்னோ, பஸ்ஸஸேதங் ஆபத்தி’ந்தி? ‘‘நத்தி² மே, ஆவுஸோ, ஆபத்தி யமஹங் பஸ்ஸெய்ய’’ந்தி. அத² கோ² தே, ப⁴ந்தே, பி⁴க்கூ² ஸாமக்³கி³ங் லபி⁴த்வா தங் பி⁴க்கு²ங் ஆபத்தியா அத³ஸ்ஸனே உக்கி²பிங்ஸு. ஸோ ச, ப⁴ந்தே, பி⁴க்கு² ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ ப்³யத்தோ மேதா⁴வீ லஜ்ஜீ குக்குச்சகோ ஸிக்கா²காமோ. அத² கோ² ஸோ, ப⁴ந்தே, பி⁴க்கு² ஸந்தி³ட்டே² ஸம்ப⁴த்தே பி⁴க்கூ² உபஸங்கமித்வா ஏதத³வோச – ‘அனாபத்தி ஏஸா, ஆவுஸோ; நேஸா ஆபத்தி. அனாபன்னொம்ஹி, நம்ஹி ஆபன்னோ. அனுக்கி²த்தொம்ஹி, நம்ஹி உக்கி²த்தோ. அத⁴ம்மிகேனம்ஹி கம்மேன உக்கி²த்தோ குப்பேன அட்டா²னாரஹேன. ஹோத² மே ஆயஸ்மந்தோ த⁴ம்மதோ வினயதோ பக்கா²’தி. அலபி⁴ கோ² ஸோ, ப⁴ந்தே, பி⁴க்கு² ஸந்தி³ட்டே² ஸம்ப⁴த்தே பி⁴க்கூ² பக்கே². ஜானபதா³னம்பி ஸந்தி³ட்டா²னங் ஸம்ப⁴த்தானங் பி⁴க்கூ²னங் ஸந்திகே தூ³தங் பாஹேஸி – ‘அனாபத்தி ஏஸா, ஆவுஸோ; நேஸா ஆபத்தி. அனாபன்னொம்ஹி, நம்ஹி ஆபன்னோ. அனுக்கி²த்தொம்ஹி, நம்ஹி உக்கி²த்தோ. அத⁴ம்மிகேனம்ஹி கம்மேன உக்கி²த்தோ குப்பேன அட்டா²னாரஹேன. ஹொந்து மே ஆயஸ்மந்தோ த⁴ம்மதோ வினயதோ பக்கா²’தி. அலபி⁴ கோ² ஸோ, ப⁴ந்தே, பி⁴க்கு² ஜானபதே³பி ஸந்தி³ட்டே² ஸம்ப⁴த்தே பி⁴க்கூ² பக்கே². அத² கோ² தே, ப⁴ந்தே, உக்கி²த்தானுவத்தகா பி⁴க்கூ² யேன உக்கே²பகா பி⁴க்கூ² தேனுபஸங்கமிங்ஸு, உபஸங்கமித்வா உக்கே²பகே பி⁴க்கூ² ஏதத³வோசுங் – ‘அனாபத்தி ஏஸா, ஆவுஸோ; நேஸா ஆபத்தி. அனாபன்னோ ஏஸோ பி⁴க்கு², நேஸோ பி⁴க்கு² ஆபன்னோ. அனுக்கி²த்தோ ஏஸோ பி⁴க்கு², நேஸோ பி⁴க்கு² உக்கி²த்தோ. அத⁴ம்மிகேன கம்மேன உக்கி²த்தோ குப்பேன அட்டா²னாரஹேனா’தி. ஏவங் வுத்தே தே, ப⁴ந்தே, உக்கே²பகா பி⁴க்கூ² உக்கி²த்தானுவத்தகே பி⁴க்கூ² ஏதத³வோசுங் – ‘ஆபத்தி ஏஸா, ஆவுஸோ; நேஸா அனாபத்தி. ஆபன்னோ ஏஸோ பி⁴க்கு², நேஸோ பி⁴க்கு² அனாபன்னோ. உக்கி²த்தோ ஏஸோ பி⁴க்கு², நேஸோ பி⁴க்கு² அனுக்கி²த்தோ. த⁴ம்மிகேன கம்மேன உக்கி²த்தோ அகுப்பேன டா²னாரஹேன. மா கோ² தும்ஹே ஆயஸ்மந்தோ ஏதங் உக்கி²த்தகங் பி⁴க்கு²ங் அனுவத்தித்த² அனுபரிவாரேதா²’தி. ஏவம்பி கோ² தே, ப⁴ந்தே, உக்கி²த்தானுவத்தகா பி⁴க்கூ² உக்கே²பகேஹி பி⁴க்கூ²ஹி வுச்சமானா ததே²வ தங் உக்கி²த்தகங் பி⁴க்கு²ங் அனுவத்தந்தி அனுபரிவாரெந்தீ’’தி.

452. Atha kho aññataro bhikkhu yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘idha, bhante, aññataro bhikkhu āpattiṃ āpanno ahosi. So tassā āpattiyā āpattidiṭṭhi ahosi, aññe bhikkhū tassā āpattiyā anāpattidiṭṭhino ahesuṃ. So aparena samayena tassā āpattiyā anāpattidiṭṭhi ahosi, aññe bhikkhū tassā āpattiyā āpattidiṭṭhino ahesuṃ. Atha kho te, bhante, bhikkhū taṃ bhikkhuṃ etadavocuṃ – ‘āpattiṃ tvaṃ, āvuso, āpanno, passasetaṃ āpatti’nti? ‘‘Natthi me, āvuso, āpatti yamahaṃ passeyya’’nti. Atha kho te, bhante, bhikkhū sāmaggiṃ labhitvā taṃ bhikkhuṃ āpattiyā adassane ukkhipiṃsu. So ca, bhante, bhikkhu bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo. Atha kho so, bhante, bhikkhu sandiṭṭhe sambhatte bhikkhū upasaṅkamitvā etadavoca – ‘anāpatti esā, āvuso; nesā āpatti. Anāpannomhi, namhi āpanno. Anukkhittomhi, namhi ukkhitto. Adhammikenamhi kammena ukkhitto kuppena aṭṭhānārahena. Hotha me āyasmanto dhammato vinayato pakkhā’ti. Alabhi kho so, bhante, bhikkhu sandiṭṭhe sambhatte bhikkhū pakkhe. Jānapadānampi sandiṭṭhānaṃ sambhattānaṃ bhikkhūnaṃ santike dūtaṃ pāhesi – ‘anāpatti esā, āvuso; nesā āpatti. Anāpannomhi, namhi āpanno. Anukkhittomhi, namhi ukkhitto. Adhammikenamhi kammena ukkhitto kuppena aṭṭhānārahena. Hontu me āyasmanto dhammato vinayato pakkhā’ti. Alabhi kho so, bhante, bhikkhu jānapadepi sandiṭṭhe sambhatte bhikkhū pakkhe. Atha kho te, bhante, ukkhittānuvattakā bhikkhū yena ukkhepakā bhikkhū tenupasaṅkamiṃsu, upasaṅkamitvā ukkhepake bhikkhū etadavocuṃ – ‘anāpatti esā, āvuso; nesā āpatti. Anāpanno eso bhikkhu, neso bhikkhu āpanno. Anukkhitto eso bhikkhu, neso bhikkhu ukkhitto. Adhammikena kammena ukkhitto kuppena aṭṭhānārahenā’ti. Evaṃ vutte te, bhante, ukkhepakā bhikkhū ukkhittānuvattake bhikkhū etadavocuṃ – ‘āpatti esā, āvuso; nesā anāpatti. Āpanno eso bhikkhu, neso bhikkhu anāpanno. Ukkhitto eso bhikkhu, neso bhikkhu anukkhitto. Dhammikena kammena ukkhitto akuppena ṭhānārahena. Mā kho tumhe āyasmanto etaṃ ukkhittakaṃ bhikkhuṃ anuvattittha anuparivārethā’ti. Evampi kho te, bhante, ukkhittānuvattakā bhikkhū ukkhepakehi bhikkhūhi vuccamānā tatheva taṃ ukkhittakaṃ bhikkhuṃ anuvattanti anuparivārentī’’ti.

453. அத² கோ² ப⁴க³வா ‘பி⁴ன்னோ பி⁴க்கு²ஸங்கோ⁴, பி⁴ன்னோ பி⁴க்கு²ஸங்கோ⁴’தி – உட்டா²யாஸனா யேன உக்கே²பகா பி⁴க்கூ² தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³, நிஸஜ்ஜ கோ² ப⁴க³வா உக்கே²பகே பி⁴க்கூ² ஏதத³வோச – ‘‘மா கோ² தும்ஹே, பி⁴க்க²வே, ‘படிபா⁴தி நோ, படிபா⁴தி நோ’தி யஸ்மிங் வா தஸ்மிங் வா பி⁴க்கு²ங் உக்கி²பிதப்³ப³ங் மஞ்ஞித்த²’’.

453. Atha kho bhagavā ‘bhinno bhikkhusaṅgho, bhinno bhikkhusaṅgho’ti – uṭṭhāyāsanā yena ukkhepakā bhikkhū tenupasaṅkami, upasaṅkamitvā paññatte āsane nisīdi, nisajja kho bhagavā ukkhepake bhikkhū etadavoca – ‘‘mā kho tumhe, bhikkhave, ‘paṭibhāti no, paṭibhāti no’ti yasmiṃ vā tasmiṃ vā bhikkhuṃ ukkhipitabbaṃ maññittha’’.

‘‘இத⁴ பன, பி⁴க்க²வே, பி⁴க்கு² ஆபத்திங் ஆபன்னோ ஹோதி. ஸோ தஸ்ஸா ஆபத்தியா அனாபத்திதி³ட்டி² ஹோதி, அஞ்ஞே பி⁴க்கூ² தஸ்ஸா ஆபத்தியா ஆபத்திதி³ட்டி²னோ ஹொந்தி. தே சே, பி⁴க்க²வே, பி⁴க்கூ² தங் பி⁴க்கு²ங் ஏவங் ஜானந்தி – ‘அயங் கோ² ஆயஸ்மா ப³ஹுஸ்ஸுதோ ஆக³தாக³மோ த⁴ம்மத⁴ரோ வினயத⁴ரோ மாதிகாத⁴ரோ பண்டி³தோ ப்³யத்தோ மேதா⁴வீ லஜ்ஜீ குக்குச்சகோ ஸிக்கா²காமோ. ஸசே மயங் இமங் பி⁴க்கு²ங் ஆபத்தியா அத³ஸ்ஸனே உக்கி²பிஸ்ஸாம, ந மயங் இமினா பி⁴க்கு²னா ஸத்³தி⁴ங் பவாரெஸ்ஸாம, வினா இமினா பி⁴க்கு²னா பவாரெஸ்ஸாம. ந மயங் இமினா பி⁴க்கு²னா ஸத்³தி⁴ங் ஸங்க⁴கம்மங் கரிஸ்ஸாம, வினா இமினா பி⁴க்கு²னா ஸங்க⁴கம்மங் கரிஸ்ஸாம. ந மயங் இமினா பி⁴க்கு²னா ஸத்³தி⁴ங் ஆஸனே நிஸீதி³ஸ்ஸாம, வினா இமினா பி⁴க்கு²னா ஆஸனே நிஸீதி³ஸ்ஸாம. ந மயங் இமினா பி⁴க்கு²னா ஸத்³தி⁴ங் யாகு³பானே நிஸீதி³ஸ்ஸாம, வினா இமினா பி⁴க்கு²னா யாகு³பானே நிஸீதி³ஸ்ஸாம . ந மயங் இமினா பி⁴க்கு²னா ஸத்³தி⁴ங் ப⁴த்தக்³கே³ நிஸீதி³ஸ்ஸாம, வினா இமினா பி⁴க்கு²னா ப⁴த்தக்³கே³ நிஸீதி³ஸ்ஸாம. ந மயங் இமினா பி⁴க்கு²னா ஸத்³தி⁴ங் ஏகச்ச²ன்னே வஸிஸ்ஸாம, வினா இமினா பி⁴க்கு²னா ஏகச்ச²ன்னே வஸிஸ்ஸாம. ந மயங் இமினா பி⁴க்கு²னா ஸத்³தி⁴ங் யதா²வுட்³ட⁴ங் அபி⁴வாத³னங் பச்சுட்டா²னங் அஞ்ஜலிகம்மங் ஸாமீசிகம்மங் கரிஸ்ஸாம, வினா இமினா பி⁴க்கு²னா யதா²வுட்³ட⁴ங் அபி⁴வாத³னங் பச்சுட்டா²னங் அஞ்ஜலிகம்மங் ஸாமீசிகம்மங் கரிஸ்ஸாம. ப⁴விஸ்ஸதி ஸங்க⁴ஸ்ஸ ததோனிதா³னங் ப⁴ண்ட³னங் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னங் ஸங்க⁴னானாகரண’ந்தி, பே⁴த³க³ருகேஹி, பி⁴க்க²வே, பி⁴க்கூ²ஹி ந ஸோ பி⁴க்கு² ஆபத்தியா அத³ஸ்ஸனே உக்கி²பிதப்³போ³’’தி.

‘‘Idha pana, bhikkhave, bhikkhu āpattiṃ āpanno hoti. So tassā āpattiyā anāpattidiṭṭhi hoti, aññe bhikkhū tassā āpattiyā āpattidiṭṭhino honti. Te ce, bhikkhave, bhikkhū taṃ bhikkhuṃ evaṃ jānanti – ‘ayaṃ kho āyasmā bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo. Sace mayaṃ imaṃ bhikkhuṃ āpattiyā adassane ukkhipissāma, na mayaṃ iminā bhikkhunā saddhiṃ pavāressāma, vinā iminā bhikkhunā pavāressāma. Na mayaṃ iminā bhikkhunā saddhiṃ saṅghakammaṃ karissāma, vinā iminā bhikkhunā saṅghakammaṃ karissāma. Na mayaṃ iminā bhikkhunā saddhiṃ āsane nisīdissāma, vinā iminā bhikkhunā āsane nisīdissāma. Na mayaṃ iminā bhikkhunā saddhiṃ yāgupāne nisīdissāma, vinā iminā bhikkhunā yāgupāne nisīdissāma . Na mayaṃ iminā bhikkhunā saddhiṃ bhattagge nisīdissāma, vinā iminā bhikkhunā bhattagge nisīdissāma. Na mayaṃ iminā bhikkhunā saddhiṃ ekacchanne vasissāma, vinā iminā bhikkhunā ekacchanne vasissāma. Na mayaṃ iminā bhikkhunā saddhiṃ yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissāma, vinā iminā bhikkhunā yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissāma. Bhavissati saṅghassa tatonidānaṃ bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇa’nti, bhedagarukehi, bhikkhave, bhikkhūhi na so bhikkhu āpattiyā adassane ukkhipitabbo’’ti.

454. அத² கோ² ப⁴க³வா உக்கே²பகானங் பி⁴க்கூ²னங் ஏதமத்த²ங் பா⁴ஸித்வா உட்டா²யாஸனா யேன உக்கி²த்தானுவத்தகா பி⁴க்கூ² தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³, நிஸஜ்ஜ கோ² ப⁴க³வா உக்கி²த்தானுவத்தகே பி⁴க்கூ² ஏதத³வோச – ‘‘மா கோ² தும்ஹே, பி⁴க்க²வே, ஆபத்திங் ஆபஜ்ஜித்வா ‘நாம்ஹ ஆபன்னா, நாம்ஹ ஆபன்னா’தி ஆபத்திங் ந படிகாதப்³ப³ங் மஞ்ஞித்த²’’.

454. Atha kho bhagavā ukkhepakānaṃ bhikkhūnaṃ etamatthaṃ bhāsitvā uṭṭhāyāsanā yena ukkhittānuvattakā bhikkhū tenupasaṅkami, upasaṅkamitvā paññatte āsane nisīdi, nisajja kho bhagavā ukkhittānuvattake bhikkhū etadavoca – ‘‘mā kho tumhe, bhikkhave, āpattiṃ āpajjitvā ‘nāmha āpannā, nāmha āpannā’ti āpattiṃ na paṭikātabbaṃ maññittha’’.

‘‘இத⁴ பன, பி⁴க்க²வே, பி⁴க்கு² ஆபத்திங் ஆபன்னோ ஹோதி. ஸோ தஸ்ஸா ஆபத்தியா அனாபத்திதி³ட்டி² ஹோதி, அஞ்ஞே பி⁴க்கூ² தஸ்ஸா ஆபத்தியா ஆபத்திதி³ட்டி²னோ ஹொந்தி. ஸோ சே, பி⁴க்க²வே, பி⁴க்கு² தே பி⁴க்கூ² ஏவங் ஜானாதி – ‘இமே கோ² ஆயஸ்மந்தோ ப³ஹுஸ்ஸுதா ஆக³தாக³மா த⁴ம்மத⁴ரா வினயத⁴ரா மாதிகாத⁴ரா பண்டி³தா ப்³யத்தா மேதா⁴வினோ லஜ்ஜினோ குக்குச்சகா ஸிக்கா²காமா, நாலங் மமங் வா காரணா அஞ்ஞேஸங் வா காரணா ச²ந்தா³ தோ³ஸா மோஹா ப⁴யா அக³திங் க³ந்துங். ஸசே மங் இமே பி⁴க்கூ² ஆபத்தியா அத³ஸ்ஸனே உக்கி²பிஸ்ஸந்தி, ந மயா ஸத்³தி⁴ங் பவாரெஸ்ஸந்தி , வினா மயா பவாரெஸ்ஸந்தி. ந மயா ஸத்³தி⁴ங் ஸங்க⁴கம்மங் கரிஸ்ஸந்தி, வினா மயா ஸங்க⁴கம்மங் கரிஸ்ஸந்தி. ந மயா ஸத்³தி⁴ங் ஆஸனே நிஸீதி³ஸ்ஸந்தி, வினா மயா ஆஸனே நிஸீதி³ஸ்ஸந்தி. ந மயா ஸத்³தி⁴ங் யாகு³பானே நிஸீதி³ஸ்ஸந்தி, வினா மயா யாகு³பானே நிஸீதி³ஸ்ஸந்தி. ந மயா ஸத்³தி⁴ங் ப⁴த்தக்³கே³ நிஸீதி³ஸ்ஸந்தி வினா மயா ப⁴த்தக்³கே³ நிஸீதி³ஸ்ஸந்தி. ந மயா ஸத்³தி⁴ங் ஏகச்ச²ன்னே வஸிஸ்ஸந்தி, வினா மயா ஏகச்ச²ன்னே வஸிஸ்ஸந்தி. ந மயா ஸத்³தி⁴ங் யதா²வுட்³ட⁴ங் அபி⁴வாத³னங் பச்சுட்டா²னங் அஞ்ஜலிகம்மங் ஸாமீசிகம்மங் கரிஸ்ஸந்தி, வினா மயா யதா²வுட்³ட⁴ங் அபி⁴வாத³னங் பச்சுட்டா²னங் அஞ்ஜலிகம்மங் ஸாமீசிகம்மங் கரிஸ்ஸந்தி, ப⁴விஸ்ஸதி ஸங்க⁴ஸ்ஸ ததோனிதா³னங் ப⁴ண்ட³னங் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னங் ஸங்க⁴னானாகரண’ந்தி , பே⁴த³க³ருகேன, பி⁴க்க²வே, பி⁴க்கு²னா பரேஸம்பி ஸத்³தா⁴ய ஸா ஆபத்தி தே³ஸேதப்³பா³’’தி. அத² கோ² ப⁴க³வா உக்கி²த்தானுவத்தகானங் பி⁴க்கூ²னங் ஏதமத்த²ங் பா⁴ஸித்வா உட்டா²யாஸனா பக்காமி.

‘‘Idha pana, bhikkhave, bhikkhu āpattiṃ āpanno hoti. So tassā āpattiyā anāpattidiṭṭhi hoti, aññe bhikkhū tassā āpattiyā āpattidiṭṭhino honti. So ce, bhikkhave, bhikkhu te bhikkhū evaṃ jānāti – ‘ime kho āyasmanto bahussutā āgatāgamā dhammadharā vinayadharā mātikādharā paṇḍitā byattā medhāvino lajjino kukkuccakā sikkhākāmā, nālaṃ mamaṃ vā kāraṇā aññesaṃ vā kāraṇā chandā dosā mohā bhayā agatiṃ gantuṃ. Sace maṃ ime bhikkhū āpattiyā adassane ukkhipissanti, na mayā saddhiṃ pavāressanti , vinā mayā pavāressanti. Na mayā saddhiṃ saṅghakammaṃ karissanti, vinā mayā saṅghakammaṃ karissanti. Na mayā saddhiṃ āsane nisīdissanti, vinā mayā āsane nisīdissanti. Na mayā saddhiṃ yāgupāne nisīdissanti, vinā mayā yāgupāne nisīdissanti. Na mayā saddhiṃ bhattagge nisīdissanti vinā mayā bhattagge nisīdissanti. Na mayā saddhiṃ ekacchanne vasissanti, vinā mayā ekacchanne vasissanti. Na mayā saddhiṃ yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissanti, vinā mayā yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissanti, bhavissati saṅghassa tatonidānaṃ bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇa’nti , bhedagarukena, bhikkhave, bhikkhunā paresampi saddhāya sā āpatti desetabbā’’ti. Atha kho bhagavā ukkhittānuvattakānaṃ bhikkhūnaṃ etamatthaṃ bhāsitvā uṭṭhāyāsanā pakkāmi.

455. தேன கோ² பன ஸமயேன உக்கி²த்தானுவத்தகா பி⁴க்கூ² தத்தே²வ அந்தோஸீமாய உபோஸத²ங் கரொந்தி, ஸங்க⁴கம்மங் கரொந்தி. உக்கே²பகா பன பி⁴க்கூ² நிஸ்ஸீமங் க³ந்த்வா உபோஸத²ங் கரொந்தி, ஸங்க⁴கம்மங் கரொந்தி. அத² கோ² அஞ்ஞதரோ உக்கே²பகோ பி⁴க்கு² யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘தே, ப⁴ந்தே, உக்கி²த்தானுவத்தகா பி⁴க்கூ² தத்தே²வ அந்தோஸீமாய உபோஸத²ங் கரொந்தி, ஸங்க⁴கம்மங் கரொந்தி. மயங் பன உக்கே²பகா பி⁴க்கூ² நிஸ்ஸீமங் க³ந்த்வா உபோஸத²ங் கரோம, ஸங்க⁴கம்மங் கரோமா’’தி. ‘‘தே சே, பி⁴க்கு², உக்கி²த்தானுவத்தகா பி⁴க்கூ² தத்தே²வ அந்தோஸீமாய உபோஸத²ங் கரிஸ்ஸந்தி, ஸங்க⁴கம்மங் கரிஸ்ஸந்தி, யதா² மயா ஞத்தி ச அனுஸ்ஸாவனா ச பஞ்ஞத்தா, தேஸங் தானி கம்மானி த⁴ம்மிகானி கம்மானி ப⁴விஸ்ஸ’’ந்தி அகுப்பானி டா²னாரஹானி. தும்ஹே சே, பி⁴க்கு², உக்கே²பகா பி⁴க்கூ² தத்தே²வ அந்தோஸீமாய உபோஸத²ங் கரிஸ்ஸத², ஸங்க⁴கம்மங் கரிஸ்ஸத², யதா² மயா ஞத்தி ச அனுஸ்ஸாவனா ச பஞ்ஞத்தா, தும்ஹாகம்பி தானி கம்மானி த⁴ம்மிகானி கம்மானி ப⁴விஸ்ஸந்தி அகுப்பானி டா²னாரஹானி. தங் கிஸ்ஸ ஹேது? நானாஸங்வாஸகா ஏதே ⁵ பி⁴க்கூ² ⁶ தும்ஹேஹி, தும்ஹே ச தேஹி நானாஸங்வாஸகா.

455. Tena kho pana samayena ukkhittānuvattakā bhikkhū tattheva antosīmāya uposathaṃ karonti, saṅghakammaṃ karonti. Ukkhepakā pana bhikkhū nissīmaṃ gantvā uposathaṃ karonti, saṅghakammaṃ karonti. Atha kho aññataro ukkhepako bhikkhu yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘te, bhante, ukkhittānuvattakā bhikkhū tattheva antosīmāya uposathaṃ karonti, saṅghakammaṃ karonti. Mayaṃ pana ukkhepakā bhikkhū nissīmaṃ gantvā uposathaṃ karoma, saṅghakammaṃ karomā’’ti. ‘‘Te ce, bhikkhu, ukkhittānuvattakā bhikkhū tattheva antosīmāya uposathaṃ karissanti, saṅghakammaṃ karissanti, yathā mayā ñatti ca anussāvanā ca paññattā, tesaṃ tāni kammāni dhammikāni kammāni bhavissa’’nti akuppāni ṭhānārahāni. Tumhe ce, bhikkhu, ukkhepakā bhikkhū tattheva antosīmāya uposathaṃ karissatha, saṅghakammaṃ karissatha, yathā mayā ñatti ca anussāvanā ca paññattā, tumhākampi tāni kammāni dhammikāni kammāni bhavissanti akuppāni ṭhānārahāni. Taṃ kissa hetu? Nānāsaṃvāsakā ete ⁷ bhikkhū ⁸ tumhehi, tumhe ca tehi nānāsaṃvāsakā.

‘‘த்³வேமா, பி⁴க்கு², நானாஸங்வாஸகபூ⁴மியோ – அத்தனா வா அத்தானங் நானாஸங்வாஸகங் கரோதி, ஸமக்³கோ³ வா நங் ஸங்கோ⁴ உக்கி²பதி அத³ஸ்ஸனே வா அப்படிகம்மே வா அப்படினிஸ்ஸக்³கே³ வா. இமா கோ², பி⁴க்கு², த்³வே நானாஸங்வாஸகபூ⁴மியோ. த்³வேமா, பி⁴க்கு², ஸமானஸங்வாஸகபூ⁴மியோ – அத்தனா வா அத்தானங் ஸமானஸங்வாஸங் கரோதி, ஸமக்³கோ³ வா நங் ஸங்கோ⁴ உக்கி²த்தங் ஓஸாரேதி அத³ஸ்ஸனே வா அப்படிகம்மே வா அப்படினிஸ்ஸக்³கே³ வா. இமா கோ², பி⁴க்கு², த்³வே ஸமானஸங்வாஸகபூ⁴மியோ’’தி.

‘‘Dvemā, bhikkhu, nānāsaṃvāsakabhūmiyo – attanā vā attānaṃ nānāsaṃvāsakaṃ karoti, samaggo vā naṃ saṅgho ukkhipati adassane vā appaṭikamme vā appaṭinissagge vā. Imā kho, bhikkhu, dve nānāsaṃvāsakabhūmiyo. Dvemā, bhikkhu, samānasaṃvāsakabhūmiyo – attanā vā attānaṃ samānasaṃvāsaṃ karoti, samaggo vā naṃ saṅgho ukkhittaṃ osāreti adassane vā appaṭikamme vā appaṭinissagge vā. Imā kho, bhikkhu, dve samānasaṃvāsakabhūmiyo’’ti.

456. தேன கோ² பன ஸமயேன பி⁴க்கூ² ப⁴த்தக்³கே³ அந்தரக⁴ரே ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் அனநுலோமிகங் காயகம்மங் வசீகம்மங் உபத³ங்ஸெந்தி, ஹத்த²பராமாஸங் கரொந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ப⁴த்தக்³கே³ அந்தரக⁴ரே ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் அனநுலோமிகங் காயகம்மங் வசீகம்மங் உபத³ங்ஸெஸ்ஸந்தி, ஹத்த²பராமாஸங் கரிஸ்ஸந்தீ’’தி. அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா² தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கூ² ப⁴த்தக்³கே³ அந்தரக⁴ரே ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் அனநுலோமிகங் காயகம்மங் வசீகம்மங் உபத³ங்ஸெஸ்ஸந்தி , ஹத்த²பராமாஸங் கரிஸ்ஸந்தீ’’தி. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, பி⁴க்கூ² ப⁴த்தக்³கே³ அந்தரக⁴ரே ப⁴ண்ட³னஜாதா…பே॰… ஹத்த²பராமாஸங் கரொந்தீ’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… விக³ரஹித்வா த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘பி⁴ன்னே, பி⁴க்க²வே, ஸங்கே⁴ அத⁴ம்மியாயமானே ⁹ அஸம்மோதி³காய வத்தமானாய ¹⁰ ‘எத்தாவதா ந அஞ்ஞமஞ்ஞங் அனநுலோமிகங் காயகம்மங் வசீகம்மங் உபத³ங்ஸெஸ்ஸாம, ஹத்த²பராமாஸங் கரிஸ்ஸாமா’தி ஆஸனே நிஸீதி³தப்³ப³ங். பி⁴ன்னே, பி⁴க்க²வே, ஸங்கே⁴ த⁴ம்மியாயமானே ஸம்மோதி³காய வத்தமானாய ஆஸனந்தரிகாய நிஸீதி³தப்³ப³’’ந்தி.

456. Tena kho pana samayena bhikkhū bhattagge antaraghare bhaṇḍanajātā kalahajātā vivādāpannā aññamaññaṃ ananulomikaṃ kāyakammaṃ vacīkammaṃ upadaṃsenti, hatthaparāmāsaṃ karonti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā bhattagge antaraghare bhaṇḍanajātā kalahajātā vivādāpannā aññamaññaṃ ananulomikaṃ kāyakammaṃ vacīkammaṃ upadaṃsessanti, hatthaparāmāsaṃ karissantī’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā te ujjhāyanti khiyyanti vipācenti – ‘‘kathañhi nāma bhikkhū bhattagge antaraghare bhaṇḍanajātā kalahajātā vivādāpannā aññamaññaṃ ananulomikaṃ kāyakammaṃ vacīkammaṃ upadaṃsessanti , hatthaparāmāsaṃ karissantī’’ti. Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, bhikkhū bhattagge antaraghare bhaṇḍanajātā…pe… hatthaparāmāsaṃ karontī’’ti? ‘‘Saccaṃ, bhagavā’’ti. Vigarahi buddho bhagavā…pe… vigarahitvā dhammiṃ kathaṃ katvā bhikkhū āmantesi – ‘‘bhinne, bhikkhave, saṅghe adhammiyāyamāne ¹¹ asammodikāya vattamānāya ¹² ‘ettāvatā na aññamaññaṃ ananulomikaṃ kāyakammaṃ vacīkammaṃ upadaṃsessāma, hatthaparāmāsaṃ karissāmā’ti āsane nisīditabbaṃ. Bhinne, bhikkhave, saṅghe dhammiyāyamāne sammodikāya vattamānāya āsanantarikāya nisīditabba’’nti.

457. ¹³ தேன கோ² பன ஸமயேன பி⁴க்கூ² ஸங்க⁴மஜ்ஜே² ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹரந்தி. தே ந ஸக்கொந்தி தங் அதி⁴கரணங் வூபஸமேதுங். அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ கோ² ஸோ பி⁴க்கு² ப⁴க³வந்தங் ஏதத³வோச – ‘‘இத⁴, ப⁴ந்தே, பி⁴க்கூ² ஸங்க⁴மஜ்ஜே² ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹரந்தி. தே ந ஸக்கொந்தி தங் அதி⁴கரணங் வூபஸமேதுங். ஸாது⁴, ப⁴ந்தே, ப⁴க³வா யேன தே பி⁴க்கூ² தேனுபஸங்கமது அனுகம்பங் உபாதா³யா’’தி. அதி⁴வாஸேஸி ப⁴க³வா துண்ஹீபா⁴வேன. அத² கோ² ப⁴க³வா யேன தே பி⁴க்கூ² தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³, நிஸஜ்ஜ கோ² ப⁴க³வா தே பி⁴க்கூ² ஏதத³வோச – ‘‘அலங், பி⁴க்க²வே, மா ப⁴ண்ட³னங் மா கலஹங் மா விக்³க³ஹங் மா விவாத³’’ந்தி. ஏவங் வுத்தே அஞ்ஞதரோ அத⁴ம்மவாதீ³ பி⁴க்கு² ப⁴க³வந்தங் ஏதத³வோச – ‘‘ஆக³மேது, ப⁴ந்தே, ப⁴க³வா த⁴ம்மஸ்ஸாமீ; அப்பொஸ்ஸுக்கோ, ப⁴ந்தே, ப⁴க³வா தி³ட்ட²த⁴ம்மஸுக²விஹாரமனுயுத்தோ விஹரது. மயமேதேன ப⁴ண்ட³னேன கலஹேன விக்³க³ஹேன விவாதே³ன பஞ்ஞாயிஸ்ஸாமா’’தி. து³தியம்பி கோ² ப⁴க³வா தே பி⁴க்கூ² ஏதத³வோச – ‘‘அலங், பி⁴க்க²வே, மா ப⁴ண்ட³னங் மா கலஹங் மா விக்³க³ஹங் மா விவாத³’’ந்தி. து³தியம்பி கோ² ஸோ அத⁴ம்மவாதீ³ பி⁴க்கு² ப⁴க³வந்தங் ஏதத³வோச – ‘‘ஆக³மேது , ப⁴ந்தே, ப⁴க³வா த⁴ம்மஸ்ஸாமீ; அப்பொஸ்ஸுக்கோ, ப⁴ந்தே , ப⁴க³வா தி³ட்ட²த⁴ம்மஸுக²விஹாரமனுயுத்தோ விஹரது. மயமேதேன ப⁴ண்ட³னேன கலஹேன விக்³க³ஹேன விவாதே³ன பஞ்ஞாயிஸ்ஸாமா’’தி.

457.¹⁴ Tena kho pana samayena bhikkhū saṅghamajjhe bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Te na sakkonti taṃ adhikaraṇaṃ vūpasametuṃ. Atha kho aññataro bhikkhu yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho so bhikkhu bhagavantaṃ etadavoca – ‘‘idha, bhante, bhikkhū saṅghamajjhe bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Te na sakkonti taṃ adhikaraṇaṃ vūpasametuṃ. Sādhu, bhante, bhagavā yena te bhikkhū tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena. Atha kho bhagavā yena te bhikkhū tenupasaṅkami, upasaṅkamitvā paññatte āsane nisīdi, nisajja kho bhagavā te bhikkhū etadavoca – ‘‘alaṃ, bhikkhave, mā bhaṇḍanaṃ mā kalahaṃ mā viggahaṃ mā vivāda’’nti. Evaṃ vutte aññataro adhammavādī bhikkhu bhagavantaṃ etadavoca – ‘‘āgametu, bhante, bhagavā dhammassāmī; appossukko, bhante, bhagavā diṭṭhadhammasukhavihāramanuyutto viharatu. Mayametena bhaṇḍanena kalahena viggahena vivādena paññāyissāmā’’ti. Dutiyampi kho bhagavā te bhikkhū etadavoca – ‘‘alaṃ, bhikkhave, mā bhaṇḍanaṃ mā kalahaṃ mā viggahaṃ mā vivāda’’nti. Dutiyampi kho so adhammavādī bhikkhu bhagavantaṃ etadavoca – ‘‘āgametu , bhante, bhagavā dhammassāmī; appossukko, bhante , bhagavā diṭṭhadhammasukhavihāramanuyutto viharatu. Mayametena bhaṇḍanena kalahena viggahena vivādena paññāyissāmā’’ti.

கோஸம்ப³கவிவாத³கதா² நிட்டி²தா.

Kosambakavivādakathā niṭṭhitā.

Next: 272. தீ³கா⁴வுவத்து² • 272. Dīghāvuvatthu

Footnotes:

1. ஆபத்திதி³ட்டீ² (ஸீ॰)

2. āpattidiṭṭhī (sī.)

3. ஆயஸ்மந்தா (க॰)

4. āyasmantā (ka.)

5. தே (ஸ்யா॰)

6. பி⁴க்கு² (ஸீ॰ ஸ்யா॰)

7. te (syā.)

8. bhikkhu (sī. syā.)

9. அத⁴ம்மியமானே (ஸீ॰ ஸ்யா॰ கத்த²சி) அத⁴ம்மீயமானே (க॰)

10. -‘‘அஸம்மோதி³காவத்தமானாய’’ இதி அட்ட²கதா²யங் ஸங்வண்ணேதப்³ப³பாடோ²

11. adhammiyamāne (sī. syā. katthaci) adhammīyamāne (ka.)

12. -‘‘asammodikāvattamānāya’’ iti aṭṭhakathāyaṃ saṃvaṇṇetabbapāṭho

13. ம॰ நி॰ 3.236 தோ²கங் விஸதி³ஸங்

14. ma. ni. 3.236 thokaṃ visadisaṃ

Related texts:

அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கோஸம்ப³கவிவாத³கதா² • Kosambakavivādakathā

டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / கோஸம்ப³கவிவாத³கதா²வண்ணனா • Kosambakavivādakathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / கோஸம்ப³கவிவாத³கதா²வண்ணனா • Kosambakavivādakathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கோஸம்ப³கவிவாத³கதா²வண்ணனா • Kosambakavivādakathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 271. கோஸம்ப³கவிவாத³கதா² • 271. Kosambakavivādakathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact