੨੭੧. ਕੋਸਮ੍ਬਕવਿવਾਦਕਥਾ

271. Kosambakavivādakathā

੪੫੧. ਤੇਨ ਸਮਯੇਨ ਬੁਦ੍ਧੋ ਭਗવਾ ਕੋਸਮ੍ਬਿਯਂ વਿਹਰਤਿ ਘੋਸਿਤਾਰਾਮੇ। ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ। ਸੋ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿ ¹ ਹੋਤਿ; ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿਨੋ ਹੋਨ੍ਤਿ। ਸੋ ਅਪਰੇਨ ਸਮਯੇਨ ਤਸ੍ਸਾ ਆਪਤ੍ਤਿਯਾ ਅਨਾ ਪਤ੍ਤਿਦਿਟ੍ਠਿ ਹੋਤਿ; ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ। ਅਥ ਖੋ ਤੇ ਭਿਕ੍ਖੂ ਤਂ ਭਿਕ੍ਖੁਂ ਏਤਦવੋਚੁਂ – ‘‘ਆਪਤ੍ਤਿਂ ਤ੍વਂ, ਆવੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿ’’ਨ੍ਤਿ? ‘‘ਨਤ੍ਥਿ ਮੇ, ਆવੁਸੋ, ਆਪਤ੍ਤਿ ਯਮਹਂ ਪਸ੍ਸੇਯ੍ਯ’’ਨ੍ਤਿ। ਅਥ ਖੋ ਤੇ ਭਿਕ੍ਖੂ ਸਾਮਗ੍ਗਿਂ ਲਭਿਤ੍વਾ ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ। ਸੋ ਚ ਭਿਕ੍ਖੁ ਬਹੁਸ੍ਸੁਤੋ ਹੋਤਿ ਆਗਤਾਗਮੋ ਧਮ੍ਮਧਰੋ વਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾવੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ। ਅਥ ਖੋ ਸੋ ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਉਪਸਙ੍ਕਮਿਤ੍વਾ ਏਤਦવੋਚ – ‘‘ਅਨਾਪਤ੍ਤਿ ਏਸਾ, ਆવੁਸੋ, ਨੇਸਾ ਆਪਤ੍ਤਿ। ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ। ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ। ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ। ਹੋਥ ਮੇ ਆਯਸ੍ਮਨ੍ਤੋ ਧਮ੍ਮਤੋ વਿਨਯਤੋ ਪਕ੍ਖਾ’’ਤਿ। ਅਲਭਿ ਖੋ ਸੋ ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ। ਜਾਨਪਦਾਨਮ੍ਪਿ ਸਨ੍ਦਿਟ੍ਠਾਨਂ ਸਮ੍ਭਤ੍ਤਾਨਂ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ਅਨਾਪਤ੍ਤਿ ਏਸਾ, ਆવੁਸੋ, ਨੇਸਾ ਆਪਤ੍ਤਿ। ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ। ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ। ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ। ਹੋਨ੍ਤੁ ਮੇ ਆਯਸ੍ਮਨ੍ਤੋ ਧਮ੍ਮਤੋ વਿਨਯਤੋ ਪਕ੍ਖਾ’’ਤਿ। ਅਲਭਿ ਖੋ ਸੋ ਭਿਕ੍ਖੁ ਜਾਨਪਦੇਪਿ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ। ਅਥ ਖੋ ਤੇ ਉਕ੍ਖਿਤ੍ਤਾਨੁવਤ੍ਤਕਾ ਭਿਕ੍ਖੂ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍વਾ ਉਕ੍ਖੇਪਕੇ ਭਿਕ੍ਖੂ ਏਤਦવੋਚੁਂ – ‘‘ਅਨਾਪਤ੍ਤਿ ਏਸਾ, ਆવੁਸੋ, ਨੇਸਾ ਆਪਤ੍ਤਿ। ਅਨਾਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਆਪਨ੍ਨੋ। ਅਨੁਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਉਕ੍ਖਿਤ੍ਤੋ । ਅਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨਾ’’ਤਿ। ਏવਂ વੁਤ੍ਤੇ ਉਕ੍ਖੇਪਕਾ ਭਿਕ੍ਖੂ ਉਕ੍ਖਿਤ੍ਤਾਨੁવਤ੍ਤਕੇ ਭਿਕ੍ਖੂ ਏਤਦવੋਚੁਂ – ‘‘ਆਪਤ੍ਤਿ ਏਸਾ ਆવੁਸੋ, ਨੇਸਾ ਅਨਾਪਤ੍ਤਿ। ਆਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨਾਪਨ੍ਨੋ। ਉਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨੁਕ੍ਖਿਤ੍ਤੋ। ਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ। ਮਾ ਖੋ ਤੁਮ੍ਹੇ ਆਯਸ੍ਮਨ੍ਤੋ ਏਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁવਤ੍ਤਿਤ੍ਥ ਅਨੁਪਰਿવਾਰੇਥਾ’’ਤਿ। ਏવਮ੍ਪਿ ਖੋ ਤੇ ਉਕ੍ਖਿਤ੍ਤਾਨੁવਤ੍ਤਕਾ ਭਿਕ੍ਖੂ ਉਕ੍ਖੇਪਕੇਹਿ ਭਿਕ੍ਖੂਹਿ વੁਚ੍ਚਮਾਨਾ ਤਥੇવ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁવਤ੍ਤਿਂਸੁ ਅਨੁਪਰਿવਾਰੇਸੁਂ।

451. Tena samayena buddho bhagavā kosambiyaṃ viharati ghositārāme. Tena kho pana samayena aññataro bhikkhu āpattiṃ āpanno hoti. So tassā āpattiyā āpattidiṭṭhi ² hoti; aññe bhikkhū tassā āpattiyā anāpattidiṭṭhino honti. So aparena samayena tassā āpattiyā anā pattidiṭṭhi hoti; aññe bhikkhū tassā āpattiyā āpattidiṭṭhino honti. Atha kho te bhikkhū taṃ bhikkhuṃ etadavocuṃ – ‘‘āpattiṃ tvaṃ, āvuso, āpanno, passasetaṃ āpatti’’nti? ‘‘Natthi me, āvuso, āpatti yamahaṃ passeyya’’nti. Atha kho te bhikkhū sāmaggiṃ labhitvā taṃ bhikkhuṃ āpattiyā adassane ukkhipiṃsu. So ca bhikkhu bahussuto hoti āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo. Atha kho so bhikkhu sandiṭṭhe sambhatte bhikkhū upasaṅkamitvā etadavoca – ‘‘anāpatti esā, āvuso, nesā āpatti. Anāpannomhi, namhi āpanno. Anukkhittomhi, namhi ukkhitto. Adhammikenamhi kammena ukkhitto kuppena aṭṭhānārahena. Hotha me āyasmanto dhammato vinayato pakkhā’’ti. Alabhi kho so bhikkhu sandiṭṭhe sambhatte bhikkhū pakkhe. Jānapadānampi sandiṭṭhānaṃ sambhattānaṃ bhikkhūnaṃ santike dūtaṃ pāhesi – anāpatti esā, āvuso, nesā āpatti. Anāpannomhi, namhi āpanno. Anukkhittomhi, namhi ukkhitto. Adhammikenamhi kammena ukkhitto kuppena aṭṭhānārahena. Hontu me āyasmanto dhammato vinayato pakkhā’’ti. Alabhi kho so bhikkhu jānapadepi sandiṭṭhe sambhatte bhikkhū pakkhe. Atha kho te ukkhittānuvattakā bhikkhū yena ukkhepakā bhikkhū tenupasaṅkamiṃsu, upasaṅkamitvā ukkhepake bhikkhū etadavocuṃ – ‘‘anāpatti esā, āvuso, nesā āpatti. Anāpanno eso bhikkhu, neso bhikkhu āpanno. Anukkhitto eso bhikkhu, neso bhikkhu ukkhitto . Adhammikena kammena ukkhitto kuppena aṭṭhānārahenā’’ti. Evaṃ vutte ukkhepakā bhikkhū ukkhittānuvattake bhikkhū etadavocuṃ – ‘‘āpatti esā āvuso, nesā anāpatti. Āpanno eso bhikkhu, neso bhikkhu anāpanno. Ukkhitto eso bhikkhu, neso bhikkhu anukkhitto. Dhammikena kammena ukkhitto akuppena ṭhānārahena. Mā kho tumhe āyasmanto etaṃ ukkhittakaṃ bhikkhuṃ anuvattittha anuparivārethā’’ti. Evampi kho te ukkhittānuvattakā bhikkhū ukkhepakehi bhikkhūhi vuccamānā tatheva taṃ ukkhittakaṃ bhikkhuṃ anuvattiṃsu anuparivāresuṃ.

੪੫੨. ਅਥ ਖੋ ਅਞ੍ਞਤਰੋ ਭਿਕ੍ਖੁ ਯੇਨ ਭਗવਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍વਾ ਭਗવਨ੍ਤਂ ਅਭਿવਾਦੇਤ੍વਾ ਏਕਮਨ੍ਤਂ ਨਿਸੀਦਿ। ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗવਨ੍ਤਂ ਏਤਦવੋਚ – ‘‘ਇਧ, ਭਨ੍ਤੇ, ਅਞ੍ਞਤਰੋ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਅਹੋਸਿ। ਸੋ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿ ਅਹੋਸਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿਨੋ ਅਹੇਸੁਂ। ਸੋ ਅਪਰੇਨ ਸਮਯੇਨ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਅਹੋਸਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਅਹੇਸੁਂ। ਅਥ ਖੋ ਤੇ, ਭਨ੍ਤੇ, ਭਿਕ੍ਖੂ ਤਂ ਭਿਕ੍ਖੁਂ ਏਤਦવੋਚੁਂ – ‘ਆਪਤ੍ਤਿਂ ਤ੍વਂ, ਆવੁਸੋ, ਆਪਨ੍ਨੋ, ਪਸ੍ਸਸੇਤਂ ਆਪਤ੍ਤਿ’ਨ੍ਤਿ? ‘‘ਨਤ੍ਥਿ ਮੇ, ਆવੁਸੋ, ਆਪਤ੍ਤਿ ਯਮਹਂ ਪਸ੍ਸੇਯ੍ਯ’’ਨ੍ਤਿ। ਅਥ ਖੋ ਤੇ, ਭਨ੍ਤੇ, ਭਿਕ੍ਖੂ ਸਾਮਗ੍ਗਿਂ ਲਭਿਤ੍વਾ ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ। ਸੋ ਚ, ਭਨ੍ਤੇ, ਭਿਕ੍ਖੁ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ વਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾવੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ। ਅਥ ਖੋ ਸੋ, ਭਨ੍ਤੇ, ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਉਪਸਙ੍ਕਮਿਤ੍વਾ ਏਤਦવੋਚ – ‘ਅਨਾਪਤ੍ਤਿ ਏਸਾ, ਆવੁਸੋ; ਨੇਸਾ ਆਪਤ੍ਤਿ। ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ। ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ। ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ। ਹੋਥ ਮੇ ਆਯਸ੍ਮਨ੍ਤੋ ਧਮ੍ਮਤੋ વਿਨਯਤੋ ਪਕ੍ਖਾ’ਤਿ। ਅਲਭਿ ਖੋ ਸੋ, ਭਨ੍ਤੇ, ਭਿਕ੍ਖੁ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ। ਜਾਨਪਦਾਨਮ੍ਪਿ ਸਨ੍ਦਿਟ੍ਠਾਨਂ ਸਮ੍ਭਤ੍ਤਾਨਂ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ‘ਅਨਾਪਤ੍ਤਿ ਏਸਾ, ਆવੁਸੋ; ਨੇਸਾ ਆਪਤ੍ਤਿ। ਅਨਾਪਨ੍ਨੋਮ੍ਹਿ, ਨਮ੍ਹਿ ਆਪਨ੍ਨੋ। ਅਨੁਕ੍ਖਿਤ੍ਤੋਮ੍ਹਿ, ਨਮ੍ਹਿ ਉਕ੍ਖਿਤ੍ਤੋ। ਅਧਮ੍ਮਿਕੇਨਮ੍ਹਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ। ਹੋਨ੍ਤੁ ਮੇ ਆਯਸ੍ਮਨ੍ਤੋ ਧਮ੍ਮਤੋ વਿਨਯਤੋ ਪਕ੍ਖਾ’ਤਿ। ਅਲਭਿ ਖੋ ਸੋ, ਭਨ੍ਤੇ, ਭਿਕ੍ਖੁ ਜਾਨਪਦੇਪਿ ਸਨ੍ਦਿਟ੍ਠੇ ਸਮ੍ਭਤ੍ਤੇ ਭਿਕ੍ਖੂ ਪਕ੍ਖੇ। ਅਥ ਖੋ ਤੇ, ਭਨ੍ਤੇ, ਉਕ੍ਖਿਤ੍ਤਾਨੁવਤ੍ਤਕਾ ਭਿਕ੍ਖੂ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍વਾ ਉਕ੍ਖੇਪਕੇ ਭਿਕ੍ਖੂ ਏਤਦવੋਚੁਂ – ‘ਅਨਾਪਤ੍ਤਿ ਏਸਾ, ਆવੁਸੋ; ਨੇਸਾ ਆਪਤ੍ਤਿ। ਅਨਾਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਆਪਨ੍ਨੋ। ਅਨੁਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਉਕ੍ਖਿਤ੍ਤੋ। ਅਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨਾ’ਤਿ। ਏવਂ વੁਤ੍ਤੇ ਤੇ, ਭਨ੍ਤੇ, ਉਕ੍ਖੇਪਕਾ ਭਿਕ੍ਖੂ ਉਕ੍ਖਿਤ੍ਤਾਨੁવਤ੍ਤਕੇ ਭਿਕ੍ਖੂ ਏਤਦવੋਚੁਂ – ‘ਆਪਤ੍ਤਿ ਏਸਾ, ਆવੁਸੋ; ਨੇਸਾ ਅਨਾਪਤ੍ਤਿ। ਆਪਨ੍ਨੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨਾਪਨ੍ਨੋ। ਉਕ੍ਖਿਤ੍ਤੋ ਏਸੋ ਭਿਕ੍ਖੁ, ਨੇਸੋ ਭਿਕ੍ਖੁ ਅਨੁਕ੍ਖਿਤ੍ਤੋ। ਧਮ੍ਮਿਕੇਨ ਕਮ੍ਮੇਨ ਉਕ੍ਖਿਤ੍ਤੋ ਅਕੁਪ੍ਪੇਨ ਠਾਨਾਰਹੇਨ। ਮਾ ਖੋ ਤੁਮ੍ਹੇ ਆਯਸ੍ਮਨ੍ਤੋ ਏਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁવਤ੍ਤਿਤ੍ਥ ਅਨੁਪਰਿવਾਰੇਥਾ’ਤਿ। ਏવਮ੍ਪਿ ਖੋ ਤੇ, ਭਨ੍ਤੇ, ਉਕ੍ਖਿਤ੍ਤਾਨੁવਤ੍ਤਕਾ ਭਿਕ੍ਖੂ ਉਕ੍ਖੇਪਕੇਹਿ ਭਿਕ੍ਖੂਹਿ વੁਚ੍ਚਮਾਨਾ ਤਥੇવ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਅਨੁવਤ੍ਤਨ੍ਤਿ ਅਨੁਪਰਿવਾਰੇਨ੍ਤੀ’’ਤਿ।

452. Atha kho aññataro bhikkhu yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘idha, bhante, aññataro bhikkhu āpattiṃ āpanno ahosi. So tassā āpattiyā āpattidiṭṭhi ahosi, aññe bhikkhū tassā āpattiyā anāpattidiṭṭhino ahesuṃ. So aparena samayena tassā āpattiyā anāpattidiṭṭhi ahosi, aññe bhikkhū tassā āpattiyā āpattidiṭṭhino ahesuṃ. Atha kho te, bhante, bhikkhū taṃ bhikkhuṃ etadavocuṃ – ‘āpattiṃ tvaṃ, āvuso, āpanno, passasetaṃ āpatti’nti? ‘‘Natthi me, āvuso, āpatti yamahaṃ passeyya’’nti. Atha kho te, bhante, bhikkhū sāmaggiṃ labhitvā taṃ bhikkhuṃ āpattiyā adassane ukkhipiṃsu. So ca, bhante, bhikkhu bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo. Atha kho so, bhante, bhikkhu sandiṭṭhe sambhatte bhikkhū upasaṅkamitvā etadavoca – ‘anāpatti esā, āvuso; nesā āpatti. Anāpannomhi, namhi āpanno. Anukkhittomhi, namhi ukkhitto. Adhammikenamhi kammena ukkhitto kuppena aṭṭhānārahena. Hotha me āyasmanto dhammato vinayato pakkhā’ti. Alabhi kho so, bhante, bhikkhu sandiṭṭhe sambhatte bhikkhū pakkhe. Jānapadānampi sandiṭṭhānaṃ sambhattānaṃ bhikkhūnaṃ santike dūtaṃ pāhesi – ‘anāpatti esā, āvuso; nesā āpatti. Anāpannomhi, namhi āpanno. Anukkhittomhi, namhi ukkhitto. Adhammikenamhi kammena ukkhitto kuppena aṭṭhānārahena. Hontu me āyasmanto dhammato vinayato pakkhā’ti. Alabhi kho so, bhante, bhikkhu jānapadepi sandiṭṭhe sambhatte bhikkhū pakkhe. Atha kho te, bhante, ukkhittānuvattakā bhikkhū yena ukkhepakā bhikkhū tenupasaṅkamiṃsu, upasaṅkamitvā ukkhepake bhikkhū etadavocuṃ – ‘anāpatti esā, āvuso; nesā āpatti. Anāpanno eso bhikkhu, neso bhikkhu āpanno. Anukkhitto eso bhikkhu, neso bhikkhu ukkhitto. Adhammikena kammena ukkhitto kuppena aṭṭhānārahenā’ti. Evaṃ vutte te, bhante, ukkhepakā bhikkhū ukkhittānuvattake bhikkhū etadavocuṃ – ‘āpatti esā, āvuso; nesā anāpatti. Āpanno eso bhikkhu, neso bhikkhu anāpanno. Ukkhitto eso bhikkhu, neso bhikkhu anukkhitto. Dhammikena kammena ukkhitto akuppena ṭhānārahena. Mā kho tumhe āyasmanto etaṃ ukkhittakaṃ bhikkhuṃ anuvattittha anuparivārethā’ti. Evampi kho te, bhante, ukkhittānuvattakā bhikkhū ukkhepakehi bhikkhūhi vuccamānā tatheva taṃ ukkhittakaṃ bhikkhuṃ anuvattanti anuparivārentī’’ti.

੪੫੩. ਅਥ ਖੋ ਭਗવਾ ‘ਭਿਨ੍ਨੋ ਭਿਕ੍ਖੁਸਙ੍ਘੋ, ਭਿਨ੍ਨੋ ਭਿਕ੍ਖੁਸਙ੍ਘੋ’ਤਿ – ਉਟ੍ਠਾਯਾਸਨਾ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍વਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਭਗવਾ ਉਕ੍ਖੇਪਕੇ ਭਿਕ੍ਖੂ ਏਤਦવੋਚ – ‘‘ਮਾ ਖੋ ਤੁਮ੍ਹੇ, ਭਿਕ੍ਖવੇ, ‘ਪਟਿਭਾਤਿ ਨੋ, ਪਟਿਭਾਤਿ ਨੋ’ਤਿ ਯਸ੍ਮਿਂ વਾ ਤਸ੍ਮਿਂ વਾ ਭਿਕ੍ਖੁਂ ਉਕ੍ਖਿਪਿਤਬ੍ਬਂ ਮਞ੍ਞਿਤ੍ਥ’’।

453. Atha kho bhagavā ‘bhinno bhikkhusaṅgho, bhinno bhikkhusaṅgho’ti – uṭṭhāyāsanā yena ukkhepakā bhikkhū tenupasaṅkami, upasaṅkamitvā paññatte āsane nisīdi, nisajja kho bhagavā ukkhepake bhikkhū etadavoca – ‘‘mā kho tumhe, bhikkhave, ‘paṭibhāti no, paṭibhāti no’ti yasmiṃ vā tasmiṃ vā bhikkhuṃ ukkhipitabbaṃ maññittha’’.

‘‘ਇਧ ਪਨ, ਭਿਕ੍ਖવੇ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ। ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ। ਤੇ ਚੇ, ਭਿਕ੍ਖવੇ, ਭਿਕ੍ਖੂ ਤਂ ਭਿਕ੍ਖੁਂ ਏવਂ ਜਾਨਨ੍ਤਿ – ‘ਅਯਂ ਖੋ ਆਯਸ੍ਮਾ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ વਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾવੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ। ਸਚੇ ਮਯਂ ਇਮਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਾਮ, ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਪવਾਰੇਸ੍ਸਾਮ, વਿਨਾ ਇਮਿਨਾ ਭਿਕ੍ਖੁਨਾ ਪવਾਰੇਸ੍ਸਾਮ। ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਸਙ੍ਘਕਮ੍ਮਂ ਕਰਿਸ੍ਸਾਮ, વਿਨਾ ਇਮਿਨਾ ਭਿਕ੍ਖੁਨਾ ਸਙ੍ਘਕਮ੍ਮਂ ਕਰਿਸ੍ਸਾਮ। ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਆਸਨੇ ਨਿਸੀਦਿਸ੍ਸਾਮ, વਿਨਾ ਇਮਿਨਾ ਭਿਕ੍ਖੁਨਾ ਆਸਨੇ ਨਿਸੀਦਿਸ੍ਸਾਮ। ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਯਾਗੁਪਾਨੇ ਨਿਸੀਦਿਸ੍ਸਾਮ, વਿਨਾ ਇਮਿਨਾ ਭਿਕ੍ਖੁਨਾ ਯਾਗੁਪਾਨੇ ਨਿਸੀਦਿਸ੍ਸਾਮ । ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਭਤ੍ਤਗ੍ਗੇ ਨਿਸੀਦਿਸ੍ਸਾਮ, વਿਨਾ ਇਮਿਨਾ ਭਿਕ੍ਖੁਨਾ ਭਤ੍ਤਗ੍ਗੇ ਨਿਸੀਦਿਸ੍ਸਾਮ। ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਏਕਚ੍ਛਨ੍ਨੇ વਸਿਸ੍ਸਾਮ, વਿਨਾ ਇਮਿਨਾ ਭਿਕ੍ਖੁਨਾ ਏਕਚ੍ਛਨ੍ਨੇ વਸਿਸ੍ਸਾਮ। ਨ ਮਯਂ ਇਮਿਨਾ ਭਿਕ੍ਖੁਨਾ ਸਦ੍ਧਿਂ ਯਥਾવੁਡ੍ਢਂ ਅਭਿવਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਾਮ, વਿਨਾ ਇਮਿਨਾ ਭਿਕ੍ਖੁਨਾ ਯਥਾવੁਡ੍ਢਂ ਅਭਿવਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਾਮ। ਭવਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਂ ਕਲਹੋ વਿਗ੍ਗਹੋ વਿવਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘવવਤ੍ਥਾਨਂ ਸਙ੍ਘਨਾਨਾਕਰਣ’ਨ੍ਤਿ, ਭੇਦਗਰੁਕੇਹਿ, ਭਿਕ੍ਖવੇ, ਭਿਕ੍ਖੂਹਿ ਨ ਸੋ ਭਿਕ੍ਖੁ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਤਬ੍ਬੋ’’ਤਿ।

‘‘Idha pana, bhikkhave, bhikkhu āpattiṃ āpanno hoti. So tassā āpattiyā anāpattidiṭṭhi hoti, aññe bhikkhū tassā āpattiyā āpattidiṭṭhino honti. Te ce, bhikkhave, bhikkhū taṃ bhikkhuṃ evaṃ jānanti – ‘ayaṃ kho āyasmā bahussuto āgatāgamo dhammadharo vinayadharo mātikādharo paṇḍito byatto medhāvī lajjī kukkuccako sikkhākāmo. Sace mayaṃ imaṃ bhikkhuṃ āpattiyā adassane ukkhipissāma, na mayaṃ iminā bhikkhunā saddhiṃ pavāressāma, vinā iminā bhikkhunā pavāressāma. Na mayaṃ iminā bhikkhunā saddhiṃ saṅghakammaṃ karissāma, vinā iminā bhikkhunā saṅghakammaṃ karissāma. Na mayaṃ iminā bhikkhunā saddhiṃ āsane nisīdissāma, vinā iminā bhikkhunā āsane nisīdissāma. Na mayaṃ iminā bhikkhunā saddhiṃ yāgupāne nisīdissāma, vinā iminā bhikkhunā yāgupāne nisīdissāma . Na mayaṃ iminā bhikkhunā saddhiṃ bhattagge nisīdissāma, vinā iminā bhikkhunā bhattagge nisīdissāma. Na mayaṃ iminā bhikkhunā saddhiṃ ekacchanne vasissāma, vinā iminā bhikkhunā ekacchanne vasissāma. Na mayaṃ iminā bhikkhunā saddhiṃ yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissāma, vinā iminā bhikkhunā yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissāma. Bhavissati saṅghassa tatonidānaṃ bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇa’nti, bhedagarukehi, bhikkhave, bhikkhūhi na so bhikkhu āpattiyā adassane ukkhipitabbo’’ti.

੪੫੪. ਅਥ ਖੋ ਭਗવਾ ਉਕ੍ਖੇਪਕਾਨਂ ਭਿਕ੍ਖੂਨਂ ਏਤਮਤ੍ਥਂ ਭਾਸਿਤ੍વਾ ਉਟ੍ਠਾਯਾਸਨਾ ਯੇਨ ਉਕ੍ਖਿਤ੍ਤਾਨੁવਤ੍ਤਕਾ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍વਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਭਗવਾ ਉਕ੍ਖਿਤ੍ਤਾਨੁવਤ੍ਤਕੇ ਭਿਕ੍ਖੂ ਏਤਦવੋਚ – ‘‘ਮਾ ਖੋ ਤੁਮ੍ਹੇ, ਭਿਕ੍ਖવੇ, ਆਪਤ੍ਤਿਂ ਆਪਜ੍ਜਿਤ੍વਾ ‘ਨਾਮ੍ਹ ਆਪਨ੍ਨਾ, ਨਾਮ੍ਹ ਆਪਨ੍ਨਾ’ਤਿ ਆਪਤ੍ਤਿਂ ਨ ਪਟਿਕਾਤਬ੍ਬਂ ਮਞ੍ਞਿਤ੍ਥ’’।

454. Atha kho bhagavā ukkhepakānaṃ bhikkhūnaṃ etamatthaṃ bhāsitvā uṭṭhāyāsanā yena ukkhittānuvattakā bhikkhū tenupasaṅkami, upasaṅkamitvā paññatte āsane nisīdi, nisajja kho bhagavā ukkhittānuvattake bhikkhū etadavoca – ‘‘mā kho tumhe, bhikkhave, āpattiṃ āpajjitvā ‘nāmha āpannā, nāmha āpannā’ti āpattiṃ na paṭikātabbaṃ maññittha’’.

‘‘ਇਧ ਪਨ, ਭਿਕ੍ਖવੇ, ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ। ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਹੋਤਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਹੋਨ੍ਤਿ। ਸੋ ਚੇ, ਭਿਕ੍ਖવੇ, ਭਿਕ੍ਖੁ ਤੇ ਭਿਕ੍ਖੂ ਏવਂ ਜਾਨਾਤਿ – ‘ਇਮੇ ਖੋ ਆਯਸ੍ਮਨ੍ਤੋ ਬਹੁਸ੍ਸੁਤਾ ਆਗਤਾਗਮਾ ਧਮ੍ਮਧਰਾ વਿਨਯਧਰਾ ਮਾਤਿਕਾਧਰਾ ਪਣ੍ਡਿਤਾ ਬ੍ਯਤ੍ਤਾ ਮੇਧਾવਿਨੋ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ, ਨਾਲਂ ਮਮਂ વਾ ਕਾਰਣਾ ਅਞ੍ਞੇਸਂ વਾ ਕਾਰਣਾ ਛਨ੍ਦਾ ਦੋਸਾ ਮੋਹਾ ਭਯਾ ਅਗਤਿਂ ਗਨ੍ਤੁਂ। ਸਚੇ ਮਂ ਇਮੇ ਭਿਕ੍ਖੂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਸ੍ਸਨ੍ਤਿ, ਨ ਮਯਾ ਸਦ੍ਧਿਂ ਪવਾਰੇਸ੍ਸਨ੍ਤਿ , વਿਨਾ ਮਯਾ ਪવਾਰੇਸ੍ਸਨ੍ਤਿ। ਨ ਮਯਾ ਸਦ੍ਧਿਂ ਸਙ੍ਘਕਮ੍ਮਂ ਕਰਿਸ੍ਸਨ੍ਤਿ, વਿਨਾ ਮਯਾ ਸਙ੍ਘਕਮ੍ਮਂ ਕਰਿਸ੍ਸਨ੍ਤਿ। ਨ ਮਯਾ ਸਦ੍ਧਿਂ ਆਸਨੇ ਨਿਸੀਦਿਸ੍ਸਨ੍ਤਿ, વਿਨਾ ਮਯਾ ਆਸਨੇ ਨਿਸੀਦਿਸ੍ਸਨ੍ਤਿ। ਨ ਮਯਾ ਸਦ੍ਧਿਂ ਯਾਗੁਪਾਨੇ ਨਿਸੀਦਿਸ੍ਸਨ੍ਤਿ, વਿਨਾ ਮਯਾ ਯਾਗੁਪਾਨੇ ਨਿਸੀਦਿਸ੍ਸਨ੍ਤਿ। ਨ ਮਯਾ ਸਦ੍ਧਿਂ ਭਤ੍ਤਗ੍ਗੇ ਨਿਸੀਦਿਸ੍ਸਨ੍ਤਿ વਿਨਾ ਮਯਾ ਭਤ੍ਤਗ੍ਗੇ ਨਿਸੀਦਿਸ੍ਸਨ੍ਤਿ। ਨ ਮਯਾ ਸਦ੍ਧਿਂ ਏਕਚ੍ਛਨ੍ਨੇ વਸਿਸ੍ਸਨ੍ਤਿ, વਿਨਾ ਮਯਾ ਏਕਚ੍ਛਨ੍ਨੇ વਸਿਸ੍ਸਨ੍ਤਿ। ਨ ਮਯਾ ਸਦ੍ਧਿਂ ਯਥਾવੁਡ੍ਢਂ ਅਭਿવਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਨ੍ਤਿ, વਿਨਾ ਮਯਾ ਯਥਾવੁਡ੍ਢਂ ਅਭਿવਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਰਿਸ੍ਸਨ੍ਤਿ, ਭવਿਸ੍ਸਤਿ ਸਙ੍ਘਸ੍ਸ ਤਤੋਨਿਦਾਨਂ ਭਣ੍ਡਨਂ ਕਲਹੋ વਿਗ੍ਗਹੋ વਿવਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘવવਤ੍ਥਾਨਂ ਸਙ੍ਘਨਾਨਾਕਰਣ’ਨ੍ਤਿ , ਭੇਦਗਰੁਕੇਨ, ਭਿਕ੍ਖવੇ, ਭਿਕ੍ਖੁਨਾ ਪਰੇਸਮ੍ਪਿ ਸਦ੍ਧਾਯ ਸਾ ਆਪਤ੍ਤਿ ਦੇਸੇਤਬ੍ਬਾ’’ਤਿ। ਅਥ ਖੋ ਭਗવਾ ਉਕ੍ਖਿਤ੍ਤਾਨੁવਤ੍ਤਕਾਨਂ ਭਿਕ੍ਖੂਨਂ ਏਤਮਤ੍ਥਂ ਭਾਸਿਤ੍વਾ ਉਟ੍ਠਾਯਾਸਨਾ ਪਕ੍ਕਾਮਿ।

‘‘Idha pana, bhikkhave, bhikkhu āpattiṃ āpanno hoti. So tassā āpattiyā anāpattidiṭṭhi hoti, aññe bhikkhū tassā āpattiyā āpattidiṭṭhino honti. So ce, bhikkhave, bhikkhu te bhikkhū evaṃ jānāti – ‘ime kho āyasmanto bahussutā āgatāgamā dhammadharā vinayadharā mātikādharā paṇḍitā byattā medhāvino lajjino kukkuccakā sikkhākāmā, nālaṃ mamaṃ vā kāraṇā aññesaṃ vā kāraṇā chandā dosā mohā bhayā agatiṃ gantuṃ. Sace maṃ ime bhikkhū āpattiyā adassane ukkhipissanti, na mayā saddhiṃ pavāressanti , vinā mayā pavāressanti. Na mayā saddhiṃ saṅghakammaṃ karissanti, vinā mayā saṅghakammaṃ karissanti. Na mayā saddhiṃ āsane nisīdissanti, vinā mayā āsane nisīdissanti. Na mayā saddhiṃ yāgupāne nisīdissanti, vinā mayā yāgupāne nisīdissanti. Na mayā saddhiṃ bhattagge nisīdissanti vinā mayā bhattagge nisīdissanti. Na mayā saddhiṃ ekacchanne vasissanti, vinā mayā ekacchanne vasissanti. Na mayā saddhiṃ yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissanti, vinā mayā yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikammaṃ karissanti, bhavissati saṅghassa tatonidānaṃ bhaṇḍanaṃ kalaho viggaho vivādo saṅghabhedo saṅgharāji saṅghavavatthānaṃ saṅghanānākaraṇa’nti , bhedagarukena, bhikkhave, bhikkhunā paresampi saddhāya sā āpatti desetabbā’’ti. Atha kho bhagavā ukkhittānuvattakānaṃ bhikkhūnaṃ etamatthaṃ bhāsitvā uṭṭhāyāsanā pakkāmi.

੪੫੫. ਤੇਨ ਖੋ ਪਨ ਸਮਯੇਨ ਉਕ੍ਖਿਤ੍ਤਾਨੁવਤ੍ਤਕਾ ਭਿਕ੍ਖੂ ਤਤ੍ਥੇવ ਅਨ੍ਤੋਸੀਮਾਯ ਉਪੋਸਥਂ ਕਰੋਨ੍ਤਿ, ਸਙ੍ਘਕਮ੍ਮਂ ਕਰੋਨ੍ਤਿ। ਉਕ੍ਖੇਪਕਾ ਪਨ ਭਿਕ੍ਖੂ ਨਿਸ੍ਸੀਮਂ ਗਨ੍ਤ੍વਾ ਉਪੋਸਥਂ ਕਰੋਨ੍ਤਿ, ਸਙ੍ਘਕਮ੍ਮਂ ਕਰੋਨ੍ਤਿ। ਅਥ ਖੋ ਅਞ੍ਞਤਰੋ ਉਕ੍ਖੇਪਕੋ ਭਿਕ੍ਖੁ ਯੇਨ ਭਗવਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍વਾ ਭਗવਨ੍ਤਂ ਅਭਿવਾਦੇਤ੍વਾ ਏਕਮਨ੍ਤਂ ਨਿਸੀਦਿ। ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਭਿਕ੍ਖੁ ਭਗવਨ੍ਤਂ ਏਤਦવੋਚ – ‘‘ਤੇ, ਭਨ੍ਤੇ, ਉਕ੍ਖਿਤ੍ਤਾਨੁવਤ੍ਤਕਾ ਭਿਕ੍ਖੂ ਤਤ੍ਥੇવ ਅਨ੍ਤੋਸੀਮਾਯ ਉਪੋਸਥਂ ਕਰੋਨ੍ਤਿ, ਸਙ੍ਘਕਮ੍ਮਂ ਕਰੋਨ੍ਤਿ। ਮਯਂ ਪਨ ਉਕ੍ਖੇਪਕਾ ਭਿਕ੍ਖੂ ਨਿਸ੍ਸੀਮਂ ਗਨ੍ਤ੍વਾ ਉਪੋਸਥਂ ਕਰੋਮ, ਸਙ੍ਘਕਮ੍ਮਂ ਕਰੋਮਾ’’ਤਿ। ‘‘ਤੇ ਚੇ, ਭਿਕ੍ਖੁ, ਉਕ੍ਖਿਤ੍ਤਾਨੁવਤ੍ਤਕਾ ਭਿਕ੍ਖੂ ਤਤ੍ਥੇવ ਅਨ੍ਤੋਸੀਮਾਯ ਉਪੋਸਥਂ ਕਰਿਸ੍ਸਨ੍ਤਿ, ਸਙ੍ਘਕਮ੍ਮਂ ਕਰਿਸ੍ਸਨ੍ਤਿ, ਯਥਾ ਮਯਾ ਞਤ੍ਤਿ ਚ ਅਨੁਸ੍ਸਾવਨਾ ਚ ਪਞ੍ਞਤ੍ਤਾ, ਤੇਸਂ ਤਾਨਿ ਕਮ੍ਮਾਨਿ ਧਮ੍ਮਿਕਾਨਿ ਕਮ੍ਮਾਨਿ ਭવਿਸ੍ਸ’’ਨ੍ਤਿ ਅਕੁਪ੍ਪਾਨਿ ਠਾਨਾਰਹਾਨਿ। ਤੁਮ੍ਹੇ ਚੇ, ਭਿਕ੍ਖੁ, ਉਕ੍ਖੇਪਕਾ ਭਿਕ੍ਖੂ ਤਤ੍ਥੇવ ਅਨ੍ਤੋਸੀਮਾਯ ਉਪੋਸਥਂ ਕਰਿਸ੍ਸਥ, ਸਙ੍ਘਕਮ੍ਮਂ ਕਰਿਸ੍ਸਥ, ਯਥਾ ਮਯਾ ਞਤ੍ਤਿ ਚ ਅਨੁਸ੍ਸਾવਨਾ ਚ ਪਞ੍ਞਤ੍ਤਾ, ਤੁਮ੍ਹਾਕਮ੍ਪਿ ਤਾਨਿ ਕਮ੍ਮਾਨਿ ਧਮ੍ਮਿਕਾਨਿ ਕਮ੍ਮਾਨਿ ਭવਿਸ੍ਸਨ੍ਤਿ ਅਕੁਪ੍ਪਾਨਿ ਠਾਨਾਰਹਾਨਿ। ਤਂ ਕਿਸ੍ਸ ਹੇਤੁ? ਨਾਨਾਸਂવਾਸਕਾ ਏਤੇ ⁵ ਭਿਕ੍ਖੂ ⁶ ਤੁਮ੍ਹੇਹਿ, ਤੁਮ੍ਹੇ ਚ ਤੇਹਿ ਨਾਨਾਸਂવਾਸਕਾ।

455. Tena kho pana samayena ukkhittānuvattakā bhikkhū tattheva antosīmāya uposathaṃ karonti, saṅghakammaṃ karonti. Ukkhepakā pana bhikkhū nissīmaṃ gantvā uposathaṃ karonti, saṅghakammaṃ karonti. Atha kho aññataro ukkhepako bhikkhu yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘te, bhante, ukkhittānuvattakā bhikkhū tattheva antosīmāya uposathaṃ karonti, saṅghakammaṃ karonti. Mayaṃ pana ukkhepakā bhikkhū nissīmaṃ gantvā uposathaṃ karoma, saṅghakammaṃ karomā’’ti. ‘‘Te ce, bhikkhu, ukkhittānuvattakā bhikkhū tattheva antosīmāya uposathaṃ karissanti, saṅghakammaṃ karissanti, yathā mayā ñatti ca anussāvanā ca paññattā, tesaṃ tāni kammāni dhammikāni kammāni bhavissa’’nti akuppāni ṭhānārahāni. Tumhe ce, bhikkhu, ukkhepakā bhikkhū tattheva antosīmāya uposathaṃ karissatha, saṅghakammaṃ karissatha, yathā mayā ñatti ca anussāvanā ca paññattā, tumhākampi tāni kammāni dhammikāni kammāni bhavissanti akuppāni ṭhānārahāni. Taṃ kissa hetu? Nānāsaṃvāsakā ete ⁷ bhikkhū ⁸ tumhehi, tumhe ca tehi nānāsaṃvāsakā.

‘‘ਦ੍વੇਮਾ, ਭਿਕ੍ਖੁ, ਨਾਨਾਸਂવਾਸਕਭੂਮਿਯੋ – ਅਤ੍ਤਨਾ વਾ ਅਤ੍ਤਾਨਂ ਨਾਨਾਸਂવਾਸਕਂ ਕਰੋਤਿ, ਸਮਗ੍ਗੋ વਾ ਨਂ ਸਙ੍ਘੋ ਉਕ੍ਖਿਪਤਿ ਅਦਸ੍ਸਨੇ વਾ ਅਪ੍ਪਟਿਕਮ੍ਮੇ વਾ ਅਪ੍ਪਟਿਨਿਸ੍ਸਗ੍ਗੇ વਾ। ਇਮਾ ਖੋ, ਭਿਕ੍ਖੁ, ਦ੍વੇ ਨਾਨਾਸਂવਾਸਕਭੂਮਿਯੋ। ਦ੍વੇਮਾ, ਭਿਕ੍ਖੁ, ਸਮਾਨਸਂવਾਸਕਭੂਮਿਯੋ – ਅਤ੍ਤਨਾ વਾ ਅਤ੍ਤਾਨਂ ਸਮਾਨਸਂવਾਸਂ ਕਰੋਤਿ, ਸਮਗ੍ਗੋ વਾ ਨਂ ਸਙ੍ਘੋ ਉਕ੍ਖਿਤ੍ਤਂ ਓਸਾਰੇਤਿ ਅਦਸ੍ਸਨੇ વਾ ਅਪ੍ਪਟਿਕਮ੍ਮੇ વਾ ਅਪ੍ਪਟਿਨਿਸ੍ਸਗ੍ਗੇ વਾ। ਇਮਾ ਖੋ, ਭਿਕ੍ਖੁ, ਦ੍વੇ ਸਮਾਨਸਂવਾਸਕਭੂਮਿਯੋ’’ਤਿ।

‘‘Dvemā, bhikkhu, nānāsaṃvāsakabhūmiyo – attanā vā attānaṃ nānāsaṃvāsakaṃ karoti, samaggo vā naṃ saṅgho ukkhipati adassane vā appaṭikamme vā appaṭinissagge vā. Imā kho, bhikkhu, dve nānāsaṃvāsakabhūmiyo. Dvemā, bhikkhu, samānasaṃvāsakabhūmiyo – attanā vā attānaṃ samānasaṃvāsaṃ karoti, samaggo vā naṃ saṅgho ukkhittaṃ osāreti adassane vā appaṭikamme vā appaṭinissagge vā. Imā kho, bhikkhu, dve samānasaṃvāsakabhūmiyo’’ti.

੪੫੬. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ ਕਲਹਜਾਤਾ વਿવਾਦਾਪਨ੍ਨਾ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ વਚੀਕਮ੍ਮਂ ਉਪਦਂਸੇਨ੍ਤਿ, ਹਤ੍ਥਪਰਾਮਾਸਂ ਕਰੋਨ੍ਤਿ। ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ ਕਲਹਜਾਤਾ વਿવਾਦਾਪਨ੍ਨਾ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ વਚੀਕਮ੍ਮਂ ਉਪਦਂਸੇਸ੍ਸਨ੍ਤਿ, ਹਤ੍ਥਪਰਾਮਾਸਂ ਕਰਿਸ੍ਸਨ੍ਤੀ’’ਤਿ। ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ વਿਪਾਚੇਨ੍ਤਾਨਂ। ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ ਕਲਹਜਾਤਾ વਿવਾਦਾਪਨ੍ਨਾ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ વਚੀਕਮ੍ਮਂ ਉਪਦਂਸੇਸ੍ਸਨ੍ਤਿ , ਹਤ੍ਥਪਰਾਮਾਸਂ ਕਰਿਸ੍ਸਨ੍ਤੀ’’ਤਿ। ਅਥ ਖੋ ਤੇ ਭਿਕ੍ਖੂ ਭਗવਤੋ ਏਤਮਤ੍ਥਂ ਆਰੋਚੇਸੁਂ…ਪੇ॰… ‘‘ਸਚ੍ਚਂ ਕਿਰ, ਭਿਕ੍ਖવੇ, ਭਿਕ੍ਖੂ ਭਤ੍ਤਗ੍ਗੇ ਅਨ੍ਤਰਘਰੇ ਭਣ੍ਡਨਜਾਤਾ…ਪੇ॰… ਹਤ੍ਥਪਰਾਮਾਸਂ ਕਰੋਨ੍ਤੀ’’ਤਿ? ‘‘ਸਚ੍ਚਂ, ਭਗવਾ’’ਤਿ। વਿਗਰਹਿ ਬੁਦ੍ਧੋ ਭਗવਾ…ਪੇ॰… વਿਗਰਹਿਤ੍વਾ ਧਮ੍ਮਿਂ ਕਥਂ ਕਤ੍વਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਨ੍ਨੇ, ਭਿਕ੍ਖવੇ, ਸਙ੍ਘੇ ਅਧਮ੍ਮਿਯਾਯਮਾਨੇ ⁹ ਅਸਮ੍ਮੋਦਿਕਾਯ વਤ੍ਤਮਾਨਾਯ ¹⁰ ‘ਏਤ੍ਤਾવਤਾ ਨ ਅਞ੍ਞਮਞ੍ਞਂ ਅਨਨੁਲੋਮਿਕਂ ਕਾਯਕਮ੍ਮਂ વਚੀਕਮ੍ਮਂ ਉਪਦਂਸੇਸ੍ਸਾਮ, ਹਤ੍ਥਪਰਾਮਾਸਂ ਕਰਿਸ੍ਸਾਮਾ’ਤਿ ਆਸਨੇ ਨਿਸੀਦਿਤਬ੍ਬਂ। ਭਿਨ੍ਨੇ, ਭਿਕ੍ਖવੇ, ਸਙ੍ਘੇ ਧਮ੍ਮਿਯਾਯਮਾਨੇ ਸਮ੍ਮੋਦਿਕਾਯ વਤ੍ਤਮਾਨਾਯ ਆਸਨਨ੍ਤਰਿਕਾਯ ਨਿਸੀਦਿਤਬ੍ਬ’’ਨ੍ਤਿ।

456. Tena kho pana samayena bhikkhū bhattagge antaraghare bhaṇḍanajātā kalahajātā vivādāpannā aññamaññaṃ ananulomikaṃ kāyakammaṃ vacīkammaṃ upadaṃsenti, hatthaparāmāsaṃ karonti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā bhattagge antaraghare bhaṇḍanajātā kalahajātā vivādāpannā aññamaññaṃ ananulomikaṃ kāyakammaṃ vacīkammaṃ upadaṃsessanti, hatthaparāmāsaṃ karissantī’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā te ujjhāyanti khiyyanti vipācenti – ‘‘kathañhi nāma bhikkhū bhattagge antaraghare bhaṇḍanajātā kalahajātā vivādāpannā aññamaññaṃ ananulomikaṃ kāyakammaṃ vacīkammaṃ upadaṃsessanti , hatthaparāmāsaṃ karissantī’’ti. Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, bhikkhū bhattagge antaraghare bhaṇḍanajātā…pe… hatthaparāmāsaṃ karontī’’ti? ‘‘Saccaṃ, bhagavā’’ti. Vigarahi buddho bhagavā…pe… vigarahitvā dhammiṃ kathaṃ katvā bhikkhū āmantesi – ‘‘bhinne, bhikkhave, saṅghe adhammiyāyamāne ¹¹ asammodikāya vattamānāya ¹² ‘ettāvatā na aññamaññaṃ ananulomikaṃ kāyakammaṃ vacīkammaṃ upadaṃsessāma, hatthaparāmāsaṃ karissāmā’ti āsane nisīditabbaṃ. Bhinne, bhikkhave, saṅghe dhammiyāyamāne sammodikāya vattamānāya āsanantarikāya nisīditabba’’nti.

੪੫੭. ¹³ ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸਙ੍ਘਮਜ੍ਝੇ ਭਣ੍ਡਨਜਾਤਾ ਕਲਹਜਾਤਾ વਿવਾਦਾਪਨ੍ਨਾ ਅਞ੍ਞਮਞ੍ਞਂ ਮੁਖਸਤ੍ਤੀਹਿ વਿਤੁਦਨ੍ਤਾ વਿਹਰਨ੍ਤਿ। ਤੇ ਨ ਸਕ੍ਕੋਨ੍ਤਿ ਤਂ ਅਧਿਕਰਣਂ વੂਪਸਮੇਤੁਂ। ਅਥ ਖੋ ਅਞ੍ਞਤਰੋ ਭਿਕ੍ਖੁ ਯੇਨ ਭਗવਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍વਾ ਭਗવਨ੍ਤਂ ਅਭਿવਾਦੇਤ੍વਾ ਏਕਮਨ੍ਤਂ ਅਟ੍ਠਾਸਿ। ਏਕਮਨ੍ਤਂ ਠਿਤੋ ਖੋ ਸੋ ਭਿਕ੍ਖੁ ਭਗવਨ੍ਤਂ ਏਤਦવੋਚ – ‘‘ਇਧ, ਭਨ੍ਤੇ, ਭਿਕ੍ਖੂ ਸਙ੍ਘਮਜ੍ਝੇ ਭਣ੍ਡਨਜਾਤਾ ਕਲਹਜਾਤਾ વਿવਾਦਾਪਨ੍ਨਾ ਅਞ੍ਞਮਞ੍ਞਂ ਮੁਖਸਤ੍ਤੀਹਿ વਿਤੁਦਨ੍ਤਾ વਿਹਰਨ੍ਤਿ। ਤੇ ਨ ਸਕ੍ਕੋਨ੍ਤਿ ਤਂ ਅਧਿਕਰਣਂ વੂਪਸਮੇਤੁਂ। ਸਾਧੁ, ਭਨ੍ਤੇ, ਭਗવਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਤੁ ਅਨੁਕਮ੍ਪਂ ਉਪਾਦਾਯਾ’’ਤਿ। ਅਧਿવਾਸੇਸਿ ਭਗવਾ ਤੁਣ੍ਹੀਭਾવੇਨ। ਅਥ ਖੋ ਭਗવਾ ਯੇਨ ਤੇ ਭਿਕ੍ਖੂ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍વਾ ਪਞ੍ਞਤ੍ਤੇ ਆਸਨੇ ਨਿਸੀਦਿ, ਨਿਸਜ੍ਜ ਖੋ ਭਗવਾ ਤੇ ਭਿਕ੍ਖੂ ਏਤਦવੋਚ – ‘‘ਅਲਂ, ਭਿਕ੍ਖવੇ, ਮਾ ਭਣ੍ਡਨਂ ਮਾ ਕਲਹਂ ਮਾ વਿਗ੍ਗਹਂ ਮਾ વਿવਾਦ’’ਨ੍ਤਿ। ਏવਂ વੁਤ੍ਤੇ ਅਞ੍ਞਤਰੋ ਅਧਮ੍ਮવਾਦੀ ਭਿਕ੍ਖੁ ਭਗવਨ੍ਤਂ ਏਤਦવੋਚ – ‘‘ਆਗਮੇਤੁ, ਭਨ੍ਤੇ, ਭਗવਾ ਧਮ੍ਮਸ੍ਸਾਮੀ; ਅਪ੍ਪੋਸ੍ਸੁਕ੍ਕੋ, ਭਨ੍ਤੇ, ਭਗવਾ ਦਿਟ੍ਠਧਮ੍ਮਸੁਖવਿਹਾਰਮਨੁਯੁਤ੍ਤੋ વਿਹਰਤੁ। ਮਯਮੇਤੇਨ ਭਣ੍ਡਨੇਨ ਕਲਹੇਨ વਿਗ੍ਗਹੇਨ વਿવਾਦੇਨ ਪਞ੍ਞਾਯਿਸ੍ਸਾਮਾ’’ਤਿ। ਦੁਤਿਯਮ੍ਪਿ ਖੋ ਭਗવਾ ਤੇ ਭਿਕ੍ਖੂ ਏਤਦવੋਚ – ‘‘ਅਲਂ, ਭਿਕ੍ਖવੇ, ਮਾ ਭਣ੍ਡਨਂ ਮਾ ਕਲਹਂ ਮਾ વਿਗ੍ਗਹਂ ਮਾ વਿવਾਦ’’ਨ੍ਤਿ। ਦੁਤਿਯਮ੍ਪਿ ਖੋ ਸੋ ਅਧਮ੍ਮવਾਦੀ ਭਿਕ੍ਖੁ ਭਗવਨ੍ਤਂ ਏਤਦવੋਚ – ‘‘ਆਗਮੇਤੁ , ਭਨ੍ਤੇ, ਭਗવਾ ਧਮ੍ਮਸ੍ਸਾਮੀ; ਅਪ੍ਪੋਸ੍ਸੁਕ੍ਕੋ, ਭਨ੍ਤੇ , ਭਗવਾ ਦਿਟ੍ਠਧਮ੍ਮਸੁਖવਿਹਾਰਮਨੁਯੁਤ੍ਤੋ વਿਹਰਤੁ। ਮਯਮੇਤੇਨ ਭਣ੍ਡਨੇਨ ਕਲਹੇਨ વਿਗ੍ਗਹੇਨ વਿવਾਦੇਨ ਪਞ੍ਞਾਯਿਸ੍ਸਾਮਾ’’ਤਿ।

457.¹⁴ Tena kho pana samayena bhikkhū saṅghamajjhe bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Te na sakkonti taṃ adhikaraṇaṃ vūpasametuṃ. Atha kho aññataro bhikkhu yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho so bhikkhu bhagavantaṃ etadavoca – ‘‘idha, bhante, bhikkhū saṅghamajjhe bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Te na sakkonti taṃ adhikaraṇaṃ vūpasametuṃ. Sādhu, bhante, bhagavā yena te bhikkhū tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena. Atha kho bhagavā yena te bhikkhū tenupasaṅkami, upasaṅkamitvā paññatte āsane nisīdi, nisajja kho bhagavā te bhikkhū etadavoca – ‘‘alaṃ, bhikkhave, mā bhaṇḍanaṃ mā kalahaṃ mā viggahaṃ mā vivāda’’nti. Evaṃ vutte aññataro adhammavādī bhikkhu bhagavantaṃ etadavoca – ‘‘āgametu, bhante, bhagavā dhammassāmī; appossukko, bhante, bhagavā diṭṭhadhammasukhavihāramanuyutto viharatu. Mayametena bhaṇḍanena kalahena viggahena vivādena paññāyissāmā’’ti. Dutiyampi kho bhagavā te bhikkhū etadavoca – ‘‘alaṃ, bhikkhave, mā bhaṇḍanaṃ mā kalahaṃ mā viggahaṃ mā vivāda’’nti. Dutiyampi kho so adhammavādī bhikkhu bhagavantaṃ etadavoca – ‘‘āgametu , bhante, bhagavā dhammassāmī; appossukko, bhante , bhagavā diṭṭhadhammasukhavihāramanuyutto viharatu. Mayametena bhaṇḍanena kalahena viggahena vivādena paññāyissāmā’’ti.

ਕੋਸਮ੍ਬਕવਿવਾਦਕਥਾ ਨਿਟ੍ਠਿਤਾ।

Kosambakavivādakathā niṭṭhitā.

Next: ੨੭੨. ਦੀਘਾવੁવਤ੍ਥੁ • 272. Dīghāvuvatthu

Footnotes:

1. ਆਪਤ੍ਤਿਦਿਟ੍ਠੀ (ਸੀ॰)

2. āpattidiṭṭhī (sī.)

3. ਆਯਸ੍ਮਨ੍ਤਾ (ਕ॰)

4. āyasmantā (ka.)

5. ਤੇ (ਸ੍ਯਾ॰)

6. ਭਿਕ੍ਖੁ (ਸੀ॰ ਸ੍ਯਾ॰)

7. te (syā.)

8. bhikkhu (sī. syā.)

9. ਅਧਮ੍ਮਿਯਮਾਨੇ (ਸੀ॰ ਸ੍ਯਾ॰ ਕਤ੍ਥਚਿ) ਅਧਮ੍ਮੀਯਮਾਨੇ (ਕ॰)

10. -‘‘ਅਸਮ੍ਮੋਦਿਕਾવਤ੍ਤਮਾਨਾਯ’’ ਇਤਿ ਅਟ੍ਠਕਥਾਯਂ ਸਂવਣ੍ਣੇਤਬ੍ਬਪਾਠੋ

11. adhammiyamāne (sī. syā. katthaci) adhammīyamāne (ka.)

12. -‘‘asammodikāvattamānāya’’ iti aṭṭhakathāyaṃ saṃvaṇṇetabbapāṭho

13. ਮ॰ ਨਿ॰ ੩.੨੩੬ ਥੋਕਂ વਿਸਦਿਸਂ

14. ma. ni. 3.236 thokaṃ visadisaṃ

Related texts:

ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਗ੍ਗ-ਅਟ੍ਠਕਥਾ • Mahāvagga-aṭṭhakathā / ਕੋਸਮ੍ਬਕવਿવਾਦਕਥਾ • Kosambakavivādakathā

ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਕੋਸਮ੍ਬਕવਿવਾਦਕਥਾવਣ੍ਣਨਾ • Kosambakavivādakathāvaṇṇanā

ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ਕੋਸਮ੍ਬਕવਿવਾਦਕਥਾવਣ੍ਣਨਾ • Kosambakavivādakathāvaṇṇanā

ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਕੋਸਮ੍ਬਕવਿવਾਦਕਥਾવਣ੍ਣਨਾ • Kosambakavivādakathāvaṇṇanā

ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ੨੭੧. ਕੋਸਮ੍ਬਕવਿવਾਦਕਥਾ • 271. Kosambakavivādakathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact