| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
10. கோஸம்ப³கக்க²ந்த⁴கோ
10. Kosambakakkhandhako
கோஸம்ப³கவிவாத³கதா²வண்ணனா
Kosambakavivādakathāvaṇṇanā
451. கோஸம்ப³கக்க²ந்த⁴கே ஸசே ஹோதி, தே³ஸெஸ்ஸாமீதி வினயத⁴ரஸ்ஸ வசனேன ஆபத்திதி³ட்டி²ங் படிலபி⁴த்வா ஏவமாஹ. தேனேவ பாளியங் ‘‘ஸோ தஸ்ஸா ஆபத்தியா அனாபத்திதி³ட்டி² ஹோதீ’’தி வுத்தங். நத்தி² ஆபத்தீதி உத³கஸ்ஸ ட²பனபா⁴வங் அஜானித்வா வா ட²பிதங் ச²ட்³டெ³த்வா விஸ்ஸரித்வா வா க³மனே அஸஞ்சிச்ச அஸதியா அனாபத்திபக்கோ²பி ஸம்ப⁴வதீதி வினயத⁴ரோ தத்த² அனாபத்திதி³ட்டி²ங் படிலபி⁴த்வா ஏவமாஹ. தேனேவ பாளியங் ‘‘அஞ்ஞே பி⁴க்கூ² தஸ்ஸ ஆபத்தியா அனாபத்திதி³ட்டி²னோ ஹொந்தீ’’தி வுத்தங். பரிஸாயபிஸ்ஸ அனாபத்திதி³ட்டி²யா உப்பன்னத்தா ‘‘அஞ்ஞே’’தி ப³ஹுவசனங் கதங். அனாபத்திதி³ட்டி² அஹோஸீதி ஸுத்தந்திகத்தே²ரஸ்ஸ வினயே அபகதஞ்ஞுதாய வினயத⁴ரஸ்ஸ வசனமத்தேன ஸோ ஏவமஹோஸி, ஸா பனஸ்ஸ ஆபத்தி ஏவ உத³காவஸேஸஸ்ஸ ட²பனபா⁴வங் ஞத்வா ட²பிதத்தா. வத்து²மத்தஜானநே ஏவ ஹி ஸேகி²யா ஸசித்தகா, ந பண்ணத்திவிஜானநே. தேனேவ பாளியங் ‘‘தஸ்ஸா ஆபத்தியா அனாபத்திதி³ட்டி² ஹோதீ’’தி ஸப்³ப³த்த² ஆபத்தி இச்சேவ வுத்தங். ‘‘ஆபத்திங் ஆபஜ்ஜமானோ’’தி இத³ங் வினயத⁴ரத்தே²ரோ ‘‘தயா இத³ங் உத³கங் ட²பித’’ந்தி அத்தனா புட்டே²ன ஸுத்தந்திகத்தே²ரேன ‘‘ஆமாவுஸோ’’தி வுத்தவசனங் ஸரித்வா பண்ணத்திஅகோவித³தாய ஸஞ்சிச்சேவ அகாஸீதி ஆபத்திதி³ட்டி² ஹுத்வாவ அவோச. தேனேவ பாளியங் ‘‘அஞ்ஞே பி⁴க்கூ² தஸ்ஸா ஆபத்தியா ஆபத்திதி³ட்டி²னோ ஹொந்தீ’’தி வுத்தங்.
451. Kosambakakkhandhake sace hoti, desessāmīti vinayadharassa vacanena āpattidiṭṭhiṃ paṭilabhitvā evamāha. Teneva pāḷiyaṃ ‘‘so tassā āpattiyā anāpattidiṭṭhi hotī’’ti vuttaṃ. Natthi āpattīti udakassa ṭhapanabhāvaṃ ajānitvā vā ṭhapitaṃ chaḍḍetvā vissaritvā vā gamane asañcicca asatiyā anāpattipakkhopi sambhavatīti vinayadharo tattha anāpattidiṭṭhiṃ paṭilabhitvā evamāha. Teneva pāḷiyaṃ ‘‘aññe bhikkhū tassa āpattiyā anāpattidiṭṭhino hontī’’ti vuttaṃ. Parisāyapissa anāpattidiṭṭhiyā uppannattā ‘‘aññe’’ti bahuvacanaṃ kataṃ. Anāpattidiṭṭhi ahosīti suttantikattherassa vinaye apakataññutāya vinayadharassa vacanamattena so evamahosi, sā panassa āpatti eva udakāvasesassa ṭhapanabhāvaṃ ñatvā ṭhapitattā. Vatthumattajānane eva hi sekhiyā sacittakā, na paṇṇattivijānane. Teneva pāḷiyaṃ ‘‘tassā āpattiyā anāpattidiṭṭhi hotī’’ti sabbattha āpatti icceva vuttaṃ. ‘‘Āpattiṃ āpajjamāno’’ti idaṃ vinayadharatthero ‘‘tayā idaṃ udakaṃ ṭhapita’’nti attanā puṭṭhena suttantikattherena ‘‘āmāvuso’’ti vuttavacanaṃ saritvā paṇṇattiakovidatāya sañcicceva akāsīti āpattidiṭṭhi hutvāva avoca. Teneva pāḷiyaṃ ‘‘aññe bhikkhū tassā āpattiyā āpattidiṭṭhino hontī’’ti vuttaṃ.
453. ‘‘ந தாவ பி⁴ன்னோ’’தி இத³ங் உக்கி²பனதத³னுவத்தனமத்தேன ஸங்கோ⁴ பி⁴ன்னோ நாம ந ஹோதி, தங் நிஸ்ஸாய பன உப⁴யபக்கி²கானங் பக்க²ங் பரியேஸித்வா அஞ்ஞமஞ்ஞங் கோத⁴வஸேன காயவசீகலஹவட்³ட⁴னேனேவ ஹோதீதி இமமத்த²ங் ஸந்தா⁴ய வுத்தங். தேனாஹ ‘‘ஸோ ச கோ² கலஹவஸேனா’’தி. ஸம்ப⁴மஅத்த²வஸேனாதி துரிதத்த²வஸேன.
453.‘‘Na tāva bhinno’’ti idaṃ ukkhipanatadanuvattanamattena saṅgho bhinno nāma na hoti, taṃ nissāya pana ubhayapakkhikānaṃ pakkhaṃ pariyesitvā aññamaññaṃ kodhavasena kāyavacīkalahavaḍḍhaneneva hotīti imamatthaṃ sandhāya vuttaṃ. Tenāha ‘‘so ca kho kalahavasenā’’ti. Sambhamaatthavasenāti turitatthavasena.
454. அகாரணேதிஆதி³ அனுக்கி²பித்வாவ உபாயேன ஸஞ்ஞாபெத்வா ஹிதேஸிதாய ஆபத்திதோ மோசேதுங் யுத்தட்டா²னே கோத⁴சித்தவஸேன விஹேட²னத்தா²ய கதபா⁴வங் ஸந்தா⁴ய வுத்தங், ந பன கம்மங்க³ஸ்ஸ அபா⁴வங் ஸந்தா⁴ய. தேனேவ பாளியங் ‘‘ஆபத்தி ஏஸா, பி⁴க்க²வே, நேஸா அனாபத்தி…பே॰… உக்கி²த்தோ ஏஸோ பி⁴க்கூ²’’திஆதி³ வுத்தங்.
454.Akāraṇetiādi anukkhipitvāva upāyena saññāpetvā hitesitāya āpattito mocetuṃ yuttaṭṭhāne kodhacittavasena viheṭhanatthāya katabhāvaṃ sandhāya vuttaṃ, na pana kammaṅgassa abhāvaṃ sandhāya. Teneva pāḷiyaṃ ‘‘āpatti esā, bhikkhave, nesā anāpatti…pe… ukkhitto eso bhikkhū’’tiādi vuttaṃ.
455. ‘‘அத⁴ம்மவாதீ³னங் பக்கே² நிஸின்னோ’’தி இத³ங் உபலக்க²ணமத்தங், த⁴ம்மவாதீ³னங் பக்கே² நிஸீதி³த்வா அத⁴ம்மவாதீ³னங் லத்³தி⁴ங் க³ண்ஹந்தோபி த⁴ம்மவாதீ³னங் நானாஸங்வாஸகோ ஹோதி ஏவ. கம்மங் கோபேதீதி தங் வினா க³ணஸ்ஸ அபூரணபக்க²ங் ஸந்தா⁴ய வுத்தங். யத்த² வா தத்த² வாதி த⁴ம்மவாதீ³னங் பக்கே² வா அத⁴ம்மவாதீ³னங் பக்கே² வாதி அத்தோ². இமே த⁴ம்மவாதி³னோதி க³ண்ஹாதீதி தங்தங்பக்க²க³தே பி⁴க்கூ² யாதா²வதோ வா அயாதா²வதோ வா ‘‘இமே த⁴ம்மவாதி³னோ’’தி க³ண்ஹாதி, அயங் தங்தங்பக்க²க³தானங் அத்தானங் ஸமானஸங்வாஸகங் கரோதி.
455.‘‘Adhammavādīnaṃ pakkhe nisinno’’ti idaṃ upalakkhaṇamattaṃ, dhammavādīnaṃ pakkhe nisīditvā adhammavādīnaṃ laddhiṃ gaṇhantopi dhammavādīnaṃ nānāsaṃvāsako hoti eva. Kammaṃ kopetīti taṃ vinā gaṇassa apūraṇapakkhaṃ sandhāya vuttaṃ. Yattha vā tattha vāti dhammavādīnaṃ pakkhe vā adhammavādīnaṃ pakkhe vāti attho. Ime dhammavādinoti gaṇhātīti taṃtaṃpakkhagate bhikkhū yāthāvato vā ayāthāvato vā ‘‘ime dhammavādino’’ti gaṇhāti, ayaṃ taṃtaṃpakkhagatānaṃ attānaṃ samānasaṃvāsakaṃ karoti.
456. உபத³ங்ஸெந்தீதி பவத்தெந்தி. பாளியங் எத்தாவதாதி ‘‘எத்தகபதே³ஸங் முஞ்சித்வா நிஸின்னா மயங் கோத⁴சித்தே உப்பன்னேபி அஞ்ஞமஞ்ஞங் அனநுலோமிகங் காயகம்மாதி³ங் பவத்தேதுங் ந ஸக்கி²ஸ்ஸாமா’’தி ஸல்லெக்கெ²த்வா தூ³ரே நிஸீதி³தப்³ப³ந்தி அதி⁴ப்பாயோ. தேனாஹ ‘‘உபசாரங் முஞ்சித்வா’’தி.
456.Upadaṃsentīti pavattenti. Pāḷiyaṃ ettāvatāti ‘‘ettakapadesaṃ muñcitvā nisinnā mayaṃ kodhacitte uppannepi aññamaññaṃ ananulomikaṃ kāyakammādiṃ pavattetuṃ na sakkhissāmā’’ti sallekkhetvā dūre nisīditabbanti adhippāyo. Tenāha ‘‘upacāraṃ muñcitvā’’ti.
457. பாளியங் ப⁴ண்ட³னஜாதாதிஆதீ³ஸு கலஹஸ்ஸ புப்³ப³பா⁴கோ³ ப⁴ண்ட³னங் நாம. ஹத்த²பராமாஸாதி³ கலஹோ நாம. விருத்³த⁴வாதோ³ விவாதோ³ நாம.
457. Pāḷiyaṃ bhaṇḍanajātātiādīsu kalahassa pubbabhāgo bhaṇḍanaṃ nāma. Hatthaparāmāsādi kalaho nāma. Viruddhavādo vivādo nāma.
458. பரிபுண்ணகோஸகொட்டா²கா³ரோதி எத்த² கோஸோ நாம ஸுவண்ணமணிஆதி³ப⁴ண்டா³கா³ரஸாரக³ப்³போ⁴. கொட்ட²ங் வுச்சதி த⁴ஞ்ஞஸ்ஸ ஆவஸனட்டா²னங், கொட்ட²பூ⁴தங் அகா³ரங் கொட்டா²கா³ரங், த⁴ஞ்ஞஸங்க³ஹட்டா²னங். அப்³பு⁴ய்யாஸீதி யுத்³தா⁴ய அபி⁴முகோ² நிக்க²மீதி அத்தோ². ஏகஸங்கா⁴தம்பீதி ஏகயுத்³த⁴ம்பி. தோ⁴வனந்தி தோ⁴வனுத³கங்.
458.Paripuṇṇakosakoṭṭhāgāroti ettha koso nāma suvaṇṇamaṇiādibhaṇḍāgārasāragabbho. Koṭṭhaṃ vuccati dhaññassa āvasanaṭṭhānaṃ, koṭṭhabhūtaṃ agāraṃ koṭṭhāgāraṃ, dhaññasaṅgahaṭṭhānaṃ. Abbhuyyāsīti yuddhāya abhimukho nikkhamīti attho. Ekasaṅghātampīti ekayuddhampi. Dhovananti dhovanudakaṃ.
463. பரியாதி³ன்னரூபாதி கோத⁴சித்தேன பரிக்³க³ஹிதஸபா⁴வா.
463.Pariyādinnarūpāti kodhacittena pariggahitasabhāvā.
464. தங் ந ஜானந்தீதி தங் கலஹங் ந ஜானந்தி. யே உபனய்ஹந்தீதி யதா²வுத்தங் கோதா⁴காரங் சித்தே ப³ந்த⁴ந்தி. பாகடபரிஸ்ஸயேதி ஸீஹாதி³கே. படிச்ச²ன்னபரிஸ்ஸயேதி ராகா³தி³கே. பாளியங் நத்தி² பா³லே 97 ஸஹாயதாதி பா³லங் நிஸ்ஸாய ஸீலாதி³கு³ணஸங்கா²தா ஸஹாயதா நத்தி², ந ஸக்கா லத்³து⁴ந்தி அத்தோ².
464.Taṃ na jānantīti taṃ kalahaṃ na jānanti. Ye upanayhantīti yathāvuttaṃ kodhākāraṃ citte bandhanti. Pākaṭaparissayeti sīhādike. Paṭicchannaparissayeti rāgādike. Pāḷiyaṃ natthi bāle 97 sahāyatāti bālaṃ nissāya sīlādiguṇasaṅkhātā sahāyatā natthi, na sakkā laddhunti attho.
466. அத்தகாமரூபாதி அத்தனோ ஹிதகாமயமானஸபா⁴வா. அனுருத்³தா⁴தி ஏகஸேஸனயேன திண்ணம்பி குலபுத்தானங் ஆலபனங், தேனேவ ப³ஹுவசனநித்³தே³ஸோ கதோ. க²மனீயங் ஸரீரங் யாபனீயங் ஜீவிதங் ‘‘கச்சி வோ ஸரீரஞ்ச தா⁴ரேதுங், ஜீவிதஞ்ச யாபேதுங் ஸக்கா’’தி புச்ச²தி. தக்³கா⁴தி ஏகங்ஸத்தே² நிபாதோ, ஏகங்ஸேன மயங் ப⁴ந்தேதி அத்தோ². யதா² கத²ந்தி எத்த² யதா²தி நிபாதமத்தங், யதா²கத²ந்தி வா ஏகோ நிபாதோ காரணபுச்ச²னத்தோ², கேன பகாரேனாதி அத்தோ². ஏகஞ்ச பன மஞ்ஞே சித்தந்தி ஏகஸ்ஸ சித்தவஸேன இதரேஸம்பி பவத்தனதோ ஸப்³பே³ஸங் நோ ஏகங் விய சித்தந்தி அத்தோ². கச்சி பன வோ அனுருத்³தா⁴தி எத்த² வோதி நிபாதமத்தங், பச்சத்தவசனங் வா, கச்சி தும்ஹேதி அத்தோ². அம்ஹாகந்தி நித்³தா⁴ரணே ஸாமிவசனங், அம்ஹேஸு தீஸு யோ பட²மங் படிக்கமதீதி அத்தோ².
466.Attakāmarūpāti attano hitakāmayamānasabhāvā. Anuruddhāti ekasesanayena tiṇṇampi kulaputtānaṃ ālapanaṃ, teneva bahuvacananiddeso kato. Khamanīyaṃ sarīraṃ yāpanīyaṃ jīvitaṃ ‘‘kacci vo sarīrañca dhāretuṃ, jīvitañca yāpetuṃ sakkā’’ti pucchati. Tagghāti ekaṃsatthe nipāto, ekaṃsena mayaṃ bhanteti attho. Yathā kathanti ettha yathāti nipātamattaṃ, yathākathanti vā eko nipāto kāraṇapucchanattho, kena pakārenāti attho. Ekañca pana maññe cittanti ekassa cittavasena itaresampi pavattanato sabbesaṃ no ekaṃ viya cittanti attho. Kacci pana vo anuruddhāti ettha voti nipātamattaṃ, paccattavacanaṃ vā, kacci tumheti attho. Amhākanti niddhāraṇe sāmivacanaṃ, amhesu tīsu yo paṭhamaṃ paṭikkamatīti attho.
கோஸம்ப³கவிவாத³கதா²வண்ணனா நிட்டி²தா.
Kosambakavivādakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
271. கோஸம்ப³கவிவாத³கதா² • 271. Kosambakavivādakathā
272. தீ³கா⁴வுவத்து² • 272. Dīghāvuvatthu
274. பாசீனவங்ஸதா³யக³மனகதா² • 274. Pācīnavaṃsadāyagamanakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கோஸம்ப³கவிவாத³கதா² • Kosambakavivādakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
கோஸம்ப³கவிவாத³கதா²வண்ணனா • Kosambakavivādakathāvaṇṇanā
தீ³கா⁴வுவத்து²கதா²வண்ணனா • Dīghāvuvatthukathāvaṇṇanā
பாசீனவங்ஸதா³யக³மனகதா²வண்ணனா • Pācīnavaṃsadāyagamanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā
கோஸம்ப³கவிவாத³கதா²வண்ணனா • Kosambakavivādakathāvaṇṇanā
தீ³கா⁴வுவத்து²கதா²வண்ணனா • Dīghāvuvatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 271. கோஸம்ப³கவிவாத³கதா² • 271. Kosambakavivādakathā
