| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya |
༨. ཀོསམྦིཡསུཏྟཾ
8. Kosambiyasuttaṃ
༤༩༡. ཨེཝཾ མེ སུཏཾ – ཨེཀཾ སམཡཾ བྷགཝཱ ཀོསམྦིཡཾ ཝིཧརཏི གྷོསིཏཱརཱམེ། ཏེན ཁོ པན སམཡེན ཀོསམྦིཡཾ བྷིཀྑཱུ བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརནྟི། ཏེ ན ཙེཝ ཨཉྙམཉྙཾ སཉྙཱཔེནྟི ན ཙ སཉྙཏྟིཾ ཨུཔེནྟི, ན ཙ ཨཉྙམཉྙཾ ནིཛ྄ཛྷཱཔེནྟི, ན ཙ ནིཛ྄ཛྷཏྟིཾ ཨུཔེནྟི། ཨཐ ཁོ ཨཉྙཏརོ བྷིཀྑུ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ སོ བྷིཀྑུ བྷགཝནྟཾ ཨེཏདཝོཙ – ‘‘ཨིདྷ, བྷནྟེ, ཀོསམྦིཡཾ བྷིཀྑཱུ བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརནྟི, ཏེ ན ཙེཝ ཨཉྙམཉྙཾ སཉྙཱཔེནྟི, ན ཙ སཉྙཏྟིཾ ཨུཔེནྟི, ན ཙ ཨཉྙམཉྙཾ ནིཛ྄ཛྷཱཔེནྟི, ན ཙ ནིཛ྄ཛྷཏྟིཾ ཨུཔེནྟཱི’’ཏི།
491. Evaṃ me sutaṃ – ekaṃ samayaṃ bhagavā kosambiyaṃ viharati ghositārāme. Tena kho pana samayena kosambiyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Te na ceva aññamaññaṃ saññāpenti na ca saññattiṃ upenti, na ca aññamaññaṃ nijjhāpenti, na ca nijjhattiṃ upenti. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘idha, bhante, kosambiyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti, te na ceva aññamaññaṃ saññāpenti, na ca saññattiṃ upenti, na ca aññamaññaṃ nijjhāpenti, na ca nijjhattiṃ upentī’’ti.
ཨཐ ཁོ བྷགཝཱ ཨཉྙཏརཾ བྷིཀྑུཾ ཨཱམནྟེསི – ‘‘ཨེཧི ཏྭཾ, བྷིཀྑུ, མམ ཝཙནེན ཏེ བྷིཀྑཱུ ཨཱམནྟེཧི – ‘སཏྠཱ ཝོ ཨཱཡསྨནྟེ ཨཱམནྟེཏཱི’’’ཏི། ‘‘ཨེཝཾ , བྷནྟེ’’ཏི ཁོ སོ བྷིཀྑུ བྷགཝཏོ པཊིསྶུཏྭཱ ཡེན ཏེ བྷིཀྑཱུ ཏེནུཔསངྐམི; ཨུཔསངྐམིཏྭཱ ཏེ བྷིཀྑཱུ ཨེཏདཝོཙ – ‘‘སཏྠཱ ཨཱཡསྨནྟེ ཨཱམནྟེཏཱི’’ཏི། ‘‘ཨེཝམཱཝུསོ’’ཏི ཁོ ཏེ བྷིཀྑཱུ ཏསྶ བྷིཀྑུནོ པཊིསྶུཏྭཱ ཡེན བྷགཝཱ ཏེནུཔསངྐམིཾསུ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣེ ཁོ ཏེ བྷིཀྑཱུ བྷགཝཱ ཨེཏདཝོཙ – ‘‘སཙྩཾ ཀིར ཏུམྷེ, བྷིཀྑཝེ, བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརཐ, ཏེ ན ཙེཝ ཨཉྙམཉྙཾ སཉྙཱཔེཐ, ན ཙ སཉྙཏྟིཾ ཨུཔེཐ, ན ཙ ཨཉྙམཉྙཾ ནིཛ྄ཛྷཱཔེཐ, ན ཙ ནིཛ྄ཛྷཏྟིཾ ཨུཔེཐཱ’’ཏི? ‘‘ཨེཝཾ, བྷནྟེ’’། ‘‘ཏཾ ཀིཾ མཉྙཐ, བྷིཀྑཝེ, ཡསྨིཾ ཏུམྷེ སམཡེ བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརཐ, ཨཔི ནུ ཏུམྷཱཀཾ ཏསྨིཾ སམཡེ མེཏྟཾ ཀཱཡཀམྨཾ པཙྩུཔཊྛིཏཾ ཧོཏི སབྲཧྨཙཱརཱིསུ ཨཱཝི ཙེཝ རཧོ ཙ, མེཏྟཾ ཝཙཱིཀམྨཾ…པེ॰… མེཏྟཾ མནོཀམྨཾ པཙྩུཔཊྛིཏཾ ཧོཏི སབྲཧྨཙཱརཱིསུ ཨཱཝི ཙེཝ རཧོ ཙཱ’’ཏི? ‘‘ནོ ཧེཏཾ, བྷནྟེ’’། ‘‘ཨིཏི ཀིར, བྷིཀྑཝེ, ཡསྨིཾ ཏུམྷེ སམཡེ བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརཐ, ནེཝ ཏུམྷཱཀཾ ཏསྨིཾ སམཡེ མེཏྟཾ ཀཱཡཀམྨཾ པཙྩུཔཊྛིཏཾ ཧོཏི སབྲཧྨཙཱརཱིསུ ཨཱཝི ཙེཝ རཧོ ཙ, ན མེཏྟཾ ཝཙཱིཀམྨཾ…པེ॰… ན མེཏྟཾ མནོཀམྨཾ པཙྩུཔཊྛིཏཾ ཧོཏི སབྲཧྨཙཱརཱིསུ ཨཱཝི ཙེཝ རཧོ ཙ། ཨཐ ཀིཉྩརཧི ཏུམྷེ, མོགྷཔུརིསཱ, ཀིཾ ཛཱནནྟཱ ཀིཾ པསྶནྟཱ བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརཐ, ཏེ ན ཙེཝ ཨཉྙམཉྙཾ སཉྙཱཔེཐ, ན ཙ སཉྙཏྟིཾ ཨུཔེཐ, ན ཙ ཨཉྙམཉྙཾ ནིཛ྄ཛྷཱཔེཐ, ན ཙ ནིཛ྄ཛྷཏྟིཾ ཨུཔེཐ ? ཏཉྷི ཏུམྷཱཀཾ, མོགྷཔུརིསཱ, བྷཝིསྶཏི དཱིགྷརཏྟཾ ཨཧིཏཱཡ དུཀྑཱཡཱ’’ཏི།
Atha kho bhagavā aññataraṃ bhikkhuṃ āmantesi – ‘‘ehi tvaṃ, bhikkhu, mama vacanena te bhikkhū āmantehi – ‘satthā vo āyasmante āmantetī’’’ti. ‘‘Evaṃ , bhante’’ti kho so bhikkhu bhagavato paṭissutvā yena te bhikkhū tenupasaṅkami; upasaṅkamitvā te bhikkhū etadavoca – ‘‘satthā āyasmante āmantetī’’ti. ‘‘Evamāvuso’’ti kho te bhikkhū tassa bhikkhuno paṭissutvā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinne kho te bhikkhū bhagavā etadavoca – ‘‘saccaṃ kira tumhe, bhikkhave, bhaṇḍanajātā kalahajātā vivādāpannā aññamaññaṃ mukhasattīhi vitudantā viharatha, te na ceva aññamaññaṃ saññāpetha, na ca saññattiṃ upetha, na ca aññamaññaṃ nijjhāpetha, na ca nijjhattiṃ upethā’’ti? ‘‘Evaṃ, bhante’’. ‘‘Taṃ kiṃ maññatha, bhikkhave, yasmiṃ tumhe samaye bhaṇḍanajātā kalahajātā vivādāpannā aññamaññaṃ mukhasattīhi vitudantā viharatha, api nu tumhākaṃ tasmiṃ samaye mettaṃ kāyakammaṃ paccupaṭṭhitaṃ hoti sabrahmacārīsu āvi ceva raho ca, mettaṃ vacīkammaṃ…pe… mettaṃ manokammaṃ paccupaṭṭhitaṃ hoti sabrahmacārīsu āvi ceva raho cā’’ti? ‘‘No hetaṃ, bhante’’. ‘‘Iti kira, bhikkhave, yasmiṃ tumhe samaye bhaṇḍanajātā kalahajātā vivādāpannā aññamaññaṃ mukhasattīhi vitudantā viharatha, neva tumhākaṃ tasmiṃ samaye mettaṃ kāyakammaṃ paccupaṭṭhitaṃ hoti sabrahmacārīsu āvi ceva raho ca, na mettaṃ vacīkammaṃ…pe… na mettaṃ manokammaṃ paccupaṭṭhitaṃ hoti sabrahmacārīsu āvi ceva raho ca. Atha kiñcarahi tumhe, moghapurisā, kiṃ jānantā kiṃ passantā bhaṇḍanajātā kalahajātā vivādāpannā aññamaññaṃ mukhasattīhi vitudantā viharatha, te na ceva aññamaññaṃ saññāpetha, na ca saññattiṃ upetha, na ca aññamaññaṃ nijjhāpetha, na ca nijjhattiṃ upetha ? Tañhi tumhākaṃ, moghapurisā, bhavissati dīgharattaṃ ahitāya dukkhāyā’’ti.
༤༩༢. ཨཐ ཁོ བྷགཝཱ བྷིཀྑཱུ ཨཱམནྟེསི – ‘‘ཚཡིམེ, བྷིཀྑཝེ, དྷམྨཱ སཱརཎཱིཡཱ པིཡཀརཎཱ གརུཀརཎཱ སངྒཧཱཡ ཨཝིཝཱདཱཡ སཱམགྒིཡཱ ཨེཀཱིབྷཱཝཱཡ སཾཝཏྟནྟི། ཀཏམེ ཚ? ཨིདྷ, བྷིཀྑཝེ, བྷིཀྑུནོ མེཏྟཾ ཀཱཡཀམྨཾ པཙྩུཔཊྛིཏཾ ཧོཏི སབྲཧྨཙཱརཱིསུ ཨཱཝི ཙེཝ རཧོ ཙ། ཨཡམྤི དྷམྨོ སཱརཎཱིཡོ པིཡཀརཎོ གརུཀརཎོ སངྒཧཱཡ ཨཝིཝཱདཱཡ སཱམགྒིཡཱ ཨེཀཱིབྷཱཝཱཡ སཾཝཏྟཏི།
492. Atha kho bhagavā bhikkhū āmantesi – ‘‘chayime, bhikkhave, dhammā sāraṇīyā piyakaraṇā garukaraṇā saṅgahāya avivādāya sāmaggiyā ekībhāvāya saṃvattanti. Katame cha? Idha, bhikkhave, bhikkhuno mettaṃ kāyakammaṃ paccupaṭṭhitaṃ hoti sabrahmacārīsu āvi ceva raho ca. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati.
‘‘པུན ཙཔརཾ, བྷིཀྑཝེ, བྷིཀྑུནོ མེཏྟཾ ཝཙཱིཀམྨཾ པཙྩུཔཊྛིཏཾ ཧོཏི སབྲཧྨཙཱརཱིསུ ཨཱཝི ཙེཝ རཧོ ཙ། ཨཡམྤི དྷམྨོ སཱརཎཱིཡོ པིཡཀརཎོ གརུཀརཎོ སངྒཧཱཡ ཨཝིཝཱདཱཡ སཱམགྒིཡཱ ཨེཀིབྷཱཝཱཡ སཾཝཏྟཏི།
‘‘Puna caparaṃ, bhikkhave, bhikkhuno mettaṃ vacīkammaṃ paccupaṭṭhitaṃ hoti sabrahmacārīsu āvi ceva raho ca. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekibhāvāya saṃvattati.
‘‘པུན ཙཔརཾ, བྷིཀྑཝེ, བྷིཀྑུནོ མེཏྟཾ མནོཀམྨཾ པཙྩུཔཊྛིཏཾ ཧོཏི སབྲཧྨཙཱརཱིསུ ཨཱཝི ཙེཝ རཧོ ཙ། ཨཡམྤི དྷམྨོ སཱརཎཱིཡོ པིཡཀརཎོ གརུཀརཎོ སངྒཧཱཡ ཨཝིཝཱདཱཡ སཱམགྒིཡཱ ཨེཀཱིབྷཱཝཱཡ སཾཝཏྟཏི།
‘‘Puna caparaṃ, bhikkhave, bhikkhuno mettaṃ manokammaṃ paccupaṭṭhitaṃ hoti sabrahmacārīsu āvi ceva raho ca. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati.
‘‘པུན ཙཔརཾ, བྷིཀྑཝེ, བྷིཀྑུ ཡེ ཏེ ལཱབྷཱ དྷམྨིཀཱ དྷམྨལདྡྷཱ ཨནྟམསོ པཏྟཔརིཡཱཔནྣམཏྟམྤི, ཏཐཱརཱུཔེཧི ལཱབྷེཧི ཨཔྤཊིཝིབྷཏྟབྷོགཱི ཧོཏི སཱིལཝནྟེཧི སབྲཧྨཙཱརཱིཧི སཱདྷཱརཎབྷོགཱི། ཨཡམྤི དྷམྨོ སཱརཎཱིཡོ པིཡཀརཎོ གརུཀརཎོ སངྒཧཱཡ ཨཝིཝཱདཱཡ སཱམགྒིཡཱ ཨེཀཱིབྷཱཝཱཡ སཾཝཏྟཏི།
‘‘Puna caparaṃ, bhikkhave, bhikkhu ye te lābhā dhammikā dhammaladdhā antamaso pattapariyāpannamattampi, tathārūpehi lābhehi appaṭivibhattabhogī hoti sīlavantehi sabrahmacārīhi sādhāraṇabhogī. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati.
‘‘པུན ཙཔརཾ, བྷིཀྑཝེ, བྷིཀྑུ ཡཱནི ཏཱནི སཱིལཱནི ཨཁཎྜཱནི ཨཙྪིདྡཱནི ཨསབལཱནི ཨཀམྨཱསཱནི བྷུཛིསྶཱནི ཝིཉྙུཔྤསཏྠཱནི ཨཔརཱམཊྛཱནི སམཱདྷིསཾཝཏྟནིཀཱནི ཏཐཱརཱུཔེསུ སཱིལེསུ སཱིལསཱམཉྙགཏོ ཝིཧརཏི སབྲཧྨཙཱརཱིཧི ཨཱཝི ཙེཝ རཧོ ཙ། ཨཡམྤི དྷམྨོ སཱརཎཱིཡོ པིཡཀརཎོ གརུཀརཎོ སངྒཧཱཡ ཨཝིཝཱདཱཡ སཱམགྒིཡཱ ཨེཀཱིབྷཱཝཱཡ སཾཝཏྟཏི།
‘‘Puna caparaṃ, bhikkhave, bhikkhu yāni tāni sīlāni akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṃvattanikāni tathārūpesu sīlesu sīlasāmaññagato viharati sabrahmacārīhi āvi ceva raho ca. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati.
‘‘པུན ཙཔརཾ, བྷིཀྑཝེ, བྷིཀྑུ ཡཱཡཾ དིཊྛི ཨརིཡཱ ནིཡྻཱནིཀཱ ནིཡྻཱཏི ཏཀྐརསྶ སམྨཱ དུཀྑཀྑཡཱཡ ཏཐཱརཱུཔཱཡ དིཊྛིཡཱ དིཊྛིསཱམཉྙགཏོ ཝིཧརཏི སབྲཧྨཙཱརཱིཧི ཨཱཝི ཙེཝ རཧོ ཙ། ཨཡམྤི དྷམྨོ སཱརཎཱིཡོ པིཡཀརཎོ གརུཀརཎོ སངྒཧཱཡ ཨཝིཝཱདཱཡ སཱམགྒིཡཱ ཨེཀཱིབྷཱཝཱཡ སཾཝཏྟཏི།
‘‘Puna caparaṃ, bhikkhave, bhikkhu yāyaṃ diṭṭhi ariyā niyyānikā niyyāti takkarassa sammā dukkhakkhayāya tathārūpāya diṭṭhiyā diṭṭhisāmaññagato viharati sabrahmacārīhi āvi ceva raho ca. Ayampi dhammo sāraṇīyo piyakaraṇo garukaraṇo saṅgahāya avivādāya sāmaggiyā ekībhāvāya saṃvattati.
‘‘ཨིམེ ཁོ, བྷིཀྑཝེ, ཚ སཱརཎཱིཡཱ དྷམྨཱ པིཡཀརཎཱ གརུཀརཎཱ སངྒཧཱཡ ཨཝིཝཱདཱཡ སཱམགྒིཡཱ ཨེཀཱིབྷཱཝཱཡ སཾཝཏྟནྟི། ཨིམེསཾ ཁོ, བྷིཀྑཝེ, ཚནྣཾ སཱརཎཱིཡཱནཾ དྷམྨཱནཾ ཨེཏཾ ཨགྒཾ ཨེཏཾ སངྒཱཧིཀཾ 1 ཨེཏཾ སངྒྷཱཊནིཀཾ – ཡདིདཾ ཡཱཡཾ དིཊྛི ཨརིཡཱ ནིཡྻཱནིཀཱ ནིཡྻཱཏི ཏཀྐརསྶ སམྨཱ དུཀྑཀྑཡཱཡ། སེཡྻཐཱཔི, བྷིཀྑཝེ, ཀཱུཊཱགཱརསྶ ཨེཏཾ ཨགྒཾ ཨེཏཾ སངྒཱཧིཀཾ ཨེཏཾ སངྒྷཱཊནིཀཾ ཡདིདཾ ཀཱུཊཾ; ཨེཝམེཝ ཁོ, བྷིཀྑཝེ , ཨིམེསཾ ཚནྣཾ སཱརཎཱིཡཱནཾ དྷམྨཱནཾ ཨེཏཾ ཨགྒཾ ཨེཏཾ སངྒཱཧིཀཾ ཨེཏཾ སངྒྷཱཊནིཀཾ ཡདིདཾ ཡཱཡཾ དིཊྛི ཨརིཡཱ ནིཡྻཱནིཀཱ ནིཡྻཱཏི ཏཀྐརསྶ སམྨཱ དུཀྑཀྑཡཱཡ།
‘‘Ime kho, bhikkhave, cha sāraṇīyā dhammā piyakaraṇā garukaraṇā saṅgahāya avivādāya sāmaggiyā ekībhāvāya saṃvattanti. Imesaṃ kho, bhikkhave, channaṃ sāraṇīyānaṃ dhammānaṃ etaṃ aggaṃ etaṃ saṅgāhikaṃ 2 etaṃ saṅghāṭanikaṃ – yadidaṃ yāyaṃ diṭṭhi ariyā niyyānikā niyyāti takkarassa sammā dukkhakkhayāya. Seyyathāpi, bhikkhave, kūṭāgārassa etaṃ aggaṃ etaṃ saṅgāhikaṃ etaṃ saṅghāṭanikaṃ yadidaṃ kūṭaṃ; evameva kho, bhikkhave , imesaṃ channaṃ sāraṇīyānaṃ dhammānaṃ etaṃ aggaṃ etaṃ saṅgāhikaṃ etaṃ saṅghāṭanikaṃ yadidaṃ yāyaṃ diṭṭhi ariyā niyyānikā niyyāti takkarassa sammā dukkhakkhayāya.
༤༩༣. ‘‘ཀཐཉྩ, བྷིཀྑཝེ, ཡཱཡཾ དིཊྛི ཨརིཡཱ ནིཡྻཱནིཀཱ ནིཡྻཱཏི ཏཀྐརསྶ སམྨཱ དུཀྑཀྑཡཱཡ? ཨིདྷ, བྷིཀྑཝེ, བྷིཀྑུ ཨརཉྙགཏོ ཝཱ རུཀྑམཱུལགཏོ ཝཱ སུཉྙཱགཱརགཏོ ཝཱ ཨིཏི པཊིསཉྩིཀྑཏི – ‘ཨཏྠི ནུ ཁོ མེ ཏཾ པརིཡུཊྛཱནཾ ཨཛ྄ཛྷཏྟཾ ཨཔྤཧཱིནཾ, ཡེནཱཧཾ པརིཡུཊྛཱནེན པརིཡུཊྛིཏཙིཏྟོ ཡཐཱབྷཱུཏཾ ནཔྤཛཱནེཡྻཾ ན པསྶེཡྻ’ནྟི? སཙེ, བྷིཀྑཝེ, བྷིཀྑུ ཀཱམརཱགཔརིཡུཊྛིཏོ ཧོཏི, པརིཡུཊྛིཏཙིཏྟོཝ ཧོཏི། སཙེ, བྷིཀྑཝེ, བྷིཀྑུ བྱཱཔཱདཔརིཡུཊྛིཏོ ཧོཏི, པརིཡུཊྛིཏཙིཏྟོཝ ཧོཏི། སཙེ, བྷིཀྑཝེ, བྷིཀྑུ ཐཱིནམིདྡྷཔརིཡུཊྛིཏོ ཧོཏི, པརིཡུཊྛིཏཙིཏྟོཝ ཧོཏི། སཙེ, བྷིཀྑཝེ, བྷིཀྑུ ཨུདྡྷཙྩཀུཀྐུཙྩཔརིཡུཊྛིཏོ ཧོཏི, པརིཡུཊྛིཏཙིཏྟོཝ ཧོཏི། སཙེ, བྷིཀྑཝེ, བྷིཀྑུ ཝིཙིཀིཙྪཱཔརིཡུཊྛིཏོ ཧོཏི, པརིཡུཊྛིཏཙིཏྟོཝ ཧོཏི། སཙེ, བྷིཀྑཝེ, བྷིཀྑུ ཨིདྷལོཀཙིནྟཱཡ པསུཏོ ཧོཏི, པརིཡུཊྛིཏཙིཏྟོཝ ཧོཏི། སཙེ, བྷིཀྑཝེ, བྷིཀྑུ པརལོཀཙིནྟཱཡ པསུཏོ ཧོཏི, པརིཡུཊྛིཏཙིཏྟོཝ ཧོཏི། སཙེ, བྷིཀྑཝེ, བྷིཀྑུ བྷཎྜནཛཱཏོ ཀལཧཛཱཏོ ཝིཝཱདཱཔནྣོ ཨཉྙམཉྙཾ མུཁསཏྟཱིཧི ཝིཏུདནྟོ ཝིཧརཏི, པརིཡུཊྛིཏཙིཏྟོཝ ཧོཏི ། སོ ཨེཝཾ པཛཱནཱཏི – ‘ནཏྠི ཁོ མེ ཏཾ པརིཡུཊྛཱནཾ ཨཛ྄ཛྷཏྟཾ ཨཔྤཧཱིནཾ, ཡེནཱཧཾ པརིཡུཊྛཱནེན པརིཡུཊྛིཏཙིཏྟོ ཡཐཱབྷཱུཏཾ ནཔྤཛཱནེཡྻཾ ན པསྶེཡྻཾ། སུཔྤཎིཧིཏཾ མེ མཱནསཾ སཙྩཱནཾ བོདྷཱཡཱ’ཏི། ཨིདམསྶ པཋམཾ ཉཱཎཾ ཨདྷིགཏཾ ཧོཏི ཨརིཡཾ ལོཀུཏྟརཾ ཨསཱདྷཱརཎཾ པུཐུཛྫནེཧི།
493. ‘‘Kathañca, bhikkhave, yāyaṃ diṭṭhi ariyā niyyānikā niyyāti takkarassa sammā dukkhakkhayāya? Idha, bhikkhave, bhikkhu araññagato vā rukkhamūlagato vā suññāgāragato vā iti paṭisañcikkhati – ‘atthi nu kho me taṃ pariyuṭṭhānaṃ ajjhattaṃ appahīnaṃ, yenāhaṃ pariyuṭṭhānena pariyuṭṭhitacitto yathābhūtaṃ nappajāneyyaṃ na passeyya’nti? Sace, bhikkhave, bhikkhu kāmarāgapariyuṭṭhito hoti, pariyuṭṭhitacittova hoti. Sace, bhikkhave, bhikkhu byāpādapariyuṭṭhito hoti, pariyuṭṭhitacittova hoti. Sace, bhikkhave, bhikkhu thīnamiddhapariyuṭṭhito hoti, pariyuṭṭhitacittova hoti. Sace, bhikkhave, bhikkhu uddhaccakukkuccapariyuṭṭhito hoti, pariyuṭṭhitacittova hoti. Sace, bhikkhave, bhikkhu vicikicchāpariyuṭṭhito hoti, pariyuṭṭhitacittova hoti. Sace, bhikkhave, bhikkhu idhalokacintāya pasuto hoti, pariyuṭṭhitacittova hoti. Sace, bhikkhave, bhikkhu paralokacintāya pasuto hoti, pariyuṭṭhitacittova hoti. Sace, bhikkhave, bhikkhu bhaṇḍanajāto kalahajāto vivādāpanno aññamaññaṃ mukhasattīhi vitudanto viharati, pariyuṭṭhitacittova hoti . So evaṃ pajānāti – ‘natthi kho me taṃ pariyuṭṭhānaṃ ajjhattaṃ appahīnaṃ, yenāhaṃ pariyuṭṭhānena pariyuṭṭhitacitto yathābhūtaṃ nappajāneyyaṃ na passeyyaṃ. Suppaṇihitaṃ me mānasaṃ saccānaṃ bodhāyā’ti. Idamassa paṭhamaṃ ñāṇaṃ adhigataṃ hoti ariyaṃ lokuttaraṃ asādhāraṇaṃ puthujjanehi.
༤༩༤. ‘‘པུན ཙཔརཾ, བྷིཀྑཝེ, ཨརིཡསཱཝཀོ ཨིཏི པཊིསཉྩིཀྑཏི – ‘ཨིམཾ ནུ ཁོ ཨཧཾ དིཊྛིཾ ཨཱསེཝནྟོ བྷཱཝེནྟོ བཧུལཱིཀརོནྟོ ལབྷཱམི པཙྩཏྟཾ སམཐཾ, ལབྷཱམི པཙྩཏྟཾ ནིབྦུཏི’ནྟི? སོ ཨེཝཾ པཛཱནཱཏི – ‘ཨིམཾ ཁོ ཨཧཾ དིཊྛིཾ ཨཱསེཝནྟོ བྷཱཝེནྟོ བཧུལཱིཀརོནྟོ ལབྷཱམི པཙྩཏྟཾ སམཐཾ, ལབྷཱམི པཙྩཏྟཾ ནིབྦུཏི’ནྟི། ཨིདམསྶ དུཏིཡཾ ཉཱཎཾ ཨདྷིགཏཾ ཧོཏི ཨརིཡཾ ལོཀུཏྟརཾ ཨསཱདྷཱརཎཾ པུཐུཛྫནེཧི།
494. ‘‘Puna caparaṃ, bhikkhave, ariyasāvako iti paṭisañcikkhati – ‘imaṃ nu kho ahaṃ diṭṭhiṃ āsevanto bhāvento bahulīkaronto labhāmi paccattaṃ samathaṃ, labhāmi paccattaṃ nibbuti’nti? So evaṃ pajānāti – ‘imaṃ kho ahaṃ diṭṭhiṃ āsevanto bhāvento bahulīkaronto labhāmi paccattaṃ samathaṃ, labhāmi paccattaṃ nibbuti’nti. Idamassa dutiyaṃ ñāṇaṃ adhigataṃ hoti ariyaṃ lokuttaraṃ asādhāraṇaṃ puthujjanehi.
༤༩༥. ‘‘པུན ཙཔརཾ, བྷིཀྑཝེ, ཨརིཡསཱཝཀོ ཨིཏི པཊིསཉྩིཀྑཏི – ‘ཡཐཱ རཱུཔཱཡཱཧཾ དིཊྛིཡཱ སམནྣཱགཏོ, ཨཏྠི ནུ ཁོ ཨིཏོ བཧིདྡྷཱ ཨཉྙོ སམཎོ ཝཱ བྲཱཧྨཎོ ཝཱ ཏཐཱརཱུཔཱཡ དིཊྛིཡཱ སམནྣཱགཏོ’ཏི? སོ ཨེཝཾ པཛཱནཱཏི – ‘ཡཐཱརཱུཔཱཡཱཧཾ དིཊྛིཡཱ སམནྣཱགཏོ, ནཏྠི ཨིཏོ བཧིདྡྷཱ ཨཉྙོ སམཎོ ཝཱ བྲཱཧྨཎོ ཝཱ ཏཐཱརཱུཔཱཡ དིཊྛིཡཱ སམནྣཱགཏོ’ཏི། ཨིདམསྶ ཏཏིཡཾ ཉཱཎཾ ཨདྷིགཏཾ ཧོཏི ཨརིཡཾ ལོཀུཏྟརཾ ཨསཱདྷཱརཎཾ པུཐུཛྫནེཧི།
495. ‘‘Puna caparaṃ, bhikkhave, ariyasāvako iti paṭisañcikkhati – ‘yathā rūpāyāhaṃ diṭṭhiyā samannāgato, atthi nu kho ito bahiddhā añño samaṇo vā brāhmaṇo vā tathārūpāya diṭṭhiyā samannāgato’ti? So evaṃ pajānāti – ‘yathārūpāyāhaṃ diṭṭhiyā samannāgato, natthi ito bahiddhā añño samaṇo vā brāhmaṇo vā tathārūpāya diṭṭhiyā samannāgato’ti. Idamassa tatiyaṃ ñāṇaṃ adhigataṃ hoti ariyaṃ lokuttaraṃ asādhāraṇaṃ puthujjanehi.
༤༩༦. ‘‘པུན ཙཔརཾ, བྷིཀྑཝེ, ཨརིཡསཱཝཀོ ཨིཏི པཊིསཉྩིཀྑཏི – ‘ཡཐཱརཱུཔཱཡ དྷམྨཏཱཡ དིཊྛིསམྤནྣོ པུགྒལོ སམནྣཱགཏོ, ཨཧམྤི ཏཐཱརཱུཔཱཡ དྷམྨཏཱཡ སམནྣཱགཏོ’ཏི། ཀཐཾརཱུཔཱཡ ཙ, བྷིཀྑཝེ, དྷམྨཏཱཡ དིཊྛིསམྤནྣོ པུགྒལོ སམནྣཱགཏོ? དྷམྨཏཱ ཨེསཱ, བྷིཀྑཝེ, དིཊྛིསམྤནྣསྶ པུགྒལསྶ – ‘ཀིཉྩཱཔི ཏཐཱརཱུཔིཾ ཨཱཔཏྟིཾ ཨཱཔཛྫཏི, ཡཐཱརཱུཔཱཡ ཨཱཔཏྟིཡཱ ཝུཊྛཱནཾ པཉྙཱཡཏི, ཨཐ ཁོ ནཾ ཁིཔྤམེཝ སཏྠརི ཝཱ ཝིཉྙཱུསུ ཝཱ སབྲཧྨཙཱརཱིསུ དེསེཏི ཝིཝརཏི ཨུཏྟཱནཱིཀརོཏི; དེསེཏྭཱ ཝིཝརིཏྭཱ ཨུཏྟཱནཱིཀཏྭཱ ཨཱཡཏིཾ སཾཝརཾ ཨཱཔཛྫཏི’། སེཡྻཐཱཔི, བྷིཀྑཝེ, དཧརོ ཀུམཱརོ མནྡོ ཨུཏྟཱནསེཡྻཀོ ཧཏྠེན ཝཱ པཱདེན ཝཱ ཨངྒཱརཾ ཨཀྐམིཏྭཱ ཁིཔྤམེཝ པཊིསཾཧརཏི; ཨེཝམེཝ ཁོ, བྷིཀྑཝེ, དྷམྨཏཱ ཨེསཱ དིཊྛིསམྤནྣསྶ པུགྒལསྶ – ‘ཀིཉྩཱཔི ཏཐཱརཱུཔིཾ ཨཱཔཏྟིཾ ཨཱཔཛྫཏི ཡཐཱརཱུཔཱཡ ཨཱཔཏྟིཡཱ ཝུཊྛཱནཾ པཉྙཱཡཏི, ཨཐ ཁོ ནཾ ཁིཔྤམེཝ སཏྠརི ཝཱ ཝིཉྙཱུསུ ཝཱ སབྲཧྨཙཱརཱིསུ དེསེཏི ཝིཝརཏི ཨུཏྟཱནཱིཀརོཏི; དེསེཏྭཱ ཝིཝརིཏྭཱ ཨུཏྟཱནཱིཀཏྭཱ ཨཱཡཏིཾ སཾཝརཾ ཨཱཔཛྫཏི’། སོ ཨེཝཾ པཛཱནཱཏི – ‘ཡཐཱརཱུཔཱཡ དྷམྨཏཱཡ དིཊྛིསམྤནྣོ པུགྒལོ སམནྣཱགཏོ, ཨཧམྤི ཏཐཱརཱུཔཱཡ དྷམྨཏཱཡ སམནྣཱགཏོ’ཏི། ཨིདམསྶ ཙཏུཏྠཾ ཉཱཎཾ ཨདྷིགཏཾ ཧོཏི ཨརིཡཾ ལོཀུཏྟརཾ ཨསཱདྷཱརཎཾ པུཐུཛྫནེཧི།
496. ‘‘Puna caparaṃ, bhikkhave, ariyasāvako iti paṭisañcikkhati – ‘yathārūpāya dhammatāya diṭṭhisampanno puggalo samannāgato, ahampi tathārūpāya dhammatāya samannāgato’ti. Kathaṃrūpāya ca, bhikkhave, dhammatāya diṭṭhisampanno puggalo samannāgato? Dhammatā esā, bhikkhave, diṭṭhisampannassa puggalassa – ‘kiñcāpi tathārūpiṃ āpattiṃ āpajjati, yathārūpāya āpattiyā vuṭṭhānaṃ paññāyati, atha kho naṃ khippameva satthari vā viññūsu vā sabrahmacārīsu deseti vivarati uttānīkaroti; desetvā vivaritvā uttānīkatvā āyatiṃ saṃvaraṃ āpajjati’. Seyyathāpi, bhikkhave, daharo kumāro mando uttānaseyyako hatthena vā pādena vā aṅgāraṃ akkamitvā khippameva paṭisaṃharati; evameva kho, bhikkhave, dhammatā esā diṭṭhisampannassa puggalassa – ‘kiñcāpi tathārūpiṃ āpattiṃ āpajjati yathārūpāya āpattiyā vuṭṭhānaṃ paññāyati, atha kho naṃ khippameva satthari vā viññūsu vā sabrahmacārīsu deseti vivarati uttānīkaroti; desetvā vivaritvā uttānīkatvā āyatiṃ saṃvaraṃ āpajjati’. So evaṃ pajānāti – ‘yathārūpāya dhammatāya diṭṭhisampanno puggalo samannāgato, ahampi tathārūpāya dhammatāya samannāgato’ti. Idamassa catutthaṃ ñāṇaṃ adhigataṃ hoti ariyaṃ lokuttaraṃ asādhāraṇaṃ puthujjanehi.
༤༩༧. ‘‘པུན ཙཔརཾ, བྷིཀྑཝེ, ཨརིཡསཱཝཀོ ཨིཏི པཊིསཉྩིཀྑཏི – ‘ཡཐཱརཱུཔཱཡ དྷམྨཏཱཡ དིཊྛིསམྤནྣོ པུགྒལོ སམནྣཱགཏོ, ཨཧམྤི ཏཐཱརཱུཔཱཡ དྷམྨཏཱཡ སམནྣཱགཏོ’ཏི། ཀཐཾརཱུཔཱཡ ཙ, བྷིཀྑཝེ, དྷམྨཏཱཡ དིཊྛིསམྤནྣོ པུགྒལོ སམནྣཱགཏོ? དྷམྨཏཱ ཨེསཱ, བྷིཀྑཝེ, དིཊྛིསམྤནྣསྶ པུགྒལསྶ – ‘ཀིཉྩཱཔི ཡཱནི ཏཱནི སབྲཧྨཙཱརཱིནཾ ཨུཙྩཱཝཙཱནི ཀིཾཀརཎཱིཡཱནི ཏཏྠ ཨུསྶུཀྐཾ ཨཱཔནྣོ ཧོཏི, ཨཐ ཁྭཱསྶ ཏིབྦཱཔེཀྑཱ ཧོཏི ཨདྷིསཱིལསིཀྑཱཡ ཨདྷིཙིཏྟསིཀྑཱཡ ཨདྷིཔཉྙཱསིཀྑཱཡ’། སེཡྻཐཱཔི, བྷིཀྑཝེ, གཱཝཱི ཏརུཎཝཙྪཱ ཐམྦཉྩ ཨཱལུམྤཏི ཝཙྪཀཉྩ ཨཔཙིནཏི; ཨེཝམེཝ ཁོ, བྷིཀྑཝེ , དྷམྨཏཱ ཨེསཱ དིཊྛིསམྤནྣསྶ པུགྒལསྶ – ‘ཀིཉྩཱཔི ཡཱནི ཏཱནི སབྲཧྨཙཱརཱིནཾ ཨུཙྩཱཝཙཱནི ཀིཾཀརཎཱིཡཱནི ཏཏྠ ཨུསྶུཀྐཾ ཨཱཔནྣོ ཧོཏི, ཨཐ ཁྭཱསྶ ཏིབྦཱཔེཀྑཱ ཧོཏི ཨདྷིསཱིལསིཀྑཱཡ ཨདྷིཙིཏྟསིཀྑཱཡ ཨདྷིཔཉྙཱསིཀྑཱཡ’། སོ ཨེཝཾ པཛཱནཱཏི – ‘ཡཐཱརཱུཔཱཡ དྷམྨཏཱཡ དིཊྛིསམྤནྣོ པུགྒལོ སམནྣཱགཏོ, ཨཧམྤི ཏཐཱརཱུཔཱཡ དྷམྨཏཱཡ སམནྣཱགཏོ’ཏི། ཨིདམསྶ པཉྩམཾ ཉཱཎཾ ཨདྷིགཏཾ ཧོཏི ཨརིཡཾ ལོཀུཏྟརཾ ཨསཱདྷཱརཎཾ པུཐུཛྫནེཧི།
497. ‘‘Puna caparaṃ, bhikkhave, ariyasāvako iti paṭisañcikkhati – ‘yathārūpāya dhammatāya diṭṭhisampanno puggalo samannāgato, ahampi tathārūpāya dhammatāya samannāgato’ti. Kathaṃrūpāya ca, bhikkhave, dhammatāya diṭṭhisampanno puggalo samannāgato? Dhammatā esā, bhikkhave, diṭṭhisampannassa puggalassa – ‘kiñcāpi yāni tāni sabrahmacārīnaṃ uccāvacāni kiṃkaraṇīyāni tattha ussukkaṃ āpanno hoti, atha khvāssa tibbāpekkhā hoti adhisīlasikkhāya adhicittasikkhāya adhipaññāsikkhāya’. Seyyathāpi, bhikkhave, gāvī taruṇavacchā thambañca ālumpati vacchakañca apacinati; evameva kho, bhikkhave , dhammatā esā diṭṭhisampannassa puggalassa – ‘kiñcāpi yāni tāni sabrahmacārīnaṃ uccāvacāni kiṃkaraṇīyāni tattha ussukkaṃ āpanno hoti, atha khvāssa tibbāpekkhā hoti adhisīlasikkhāya adhicittasikkhāya adhipaññāsikkhāya’. So evaṃ pajānāti – ‘yathārūpāya dhammatāya diṭṭhisampanno puggalo samannāgato, ahampi tathārūpāya dhammatāya samannāgato’ti. Idamassa pañcamaṃ ñāṇaṃ adhigataṃ hoti ariyaṃ lokuttaraṃ asādhāraṇaṃ puthujjanehi.
༤༩༨. ‘‘པུན ཙཔརཾ, བྷིཀྑཝེ, ཨརིཡསཱཝཀོ ཨིཏི པཊིསཉྩིཀྑཏི – ‘ཡཐཱརཱུཔཱཡ བལཏཱཡ དིཊྛིསམྤནྣོ པུགྒལོ སམནྣཱགཏོ, ཨཧམྤི ཏཐཱརཱུཔཱཡ བལཏཱཡ སམནྣཱགཏོ’ཏི། ཀཐཾརཱུཔཱཡ ཙ, བྷིཀྑཝེ, བལཏཱཡ དིཊྛིསམྤནྣོ པུགྒལོ སམནྣཱགཏོ? བལཏཱ ཨེསཱ, བྷིཀྑཝེ, དིཊྛིསམྤནྣསྶ པུགྒལསྶ ཡཾ ཏཐཱགཏཔྤཝེདིཏེ དྷམྨཝིནཡེ དེསིཡམཱནེ ཨཊྛིཾཀཏྭཱ མནསིཀཏྭཱ སབྦཙེཏསཱ 3 སམནྣཱཧརིཏྭཱ ཨོཧིཏསོཏོ དྷམྨཾ སུཎཱཏི། སོ ཨེཝཾ པཛཱནཱཏི – ‘ཡཐཱརཱུཔཱཡ བལཏཱཡ དིཊྛིསམྤནྣོ པུགྒལོ སམནྣཱགཏོ, ཨཧམྤི ཏཐཱརཱུཔཱཡ བལཏཱཡ སམནྣཱགཏོ’ཏི། ཨིདམསྶ ཚཊྛཾ ཉཱཎཾ ཨདྷིགཏཾ ཧོཏི ཨརིཡཾ ལོཀུཏྟརཾ ཨསཱདྷཱརཎཾ པུཐུཛྫནེཧི།
498. ‘‘Puna caparaṃ, bhikkhave, ariyasāvako iti paṭisañcikkhati – ‘yathārūpāya balatāya diṭṭhisampanno puggalo samannāgato, ahampi tathārūpāya balatāya samannāgato’ti. Kathaṃrūpāya ca, bhikkhave, balatāya diṭṭhisampanno puggalo samannāgato? Balatā esā, bhikkhave, diṭṭhisampannassa puggalassa yaṃ tathāgatappavedite dhammavinaye desiyamāne aṭṭhiṃkatvā manasikatvā sabbacetasā 4 samannāharitvā ohitasoto dhammaṃ suṇāti. So evaṃ pajānāti – ‘yathārūpāya balatāya diṭṭhisampanno puggalo samannāgato, ahampi tathārūpāya balatāya samannāgato’ti. Idamassa chaṭṭhaṃ ñāṇaṃ adhigataṃ hoti ariyaṃ lokuttaraṃ asādhāraṇaṃ puthujjanehi.
༤༩༩. ‘‘པུན ཙཔརཾ, བྷིཀྑཝེ, ཨརིཡསཱཝཀོ ཨིཏི པཊིསཉྩིཀྑཏི – ‘ཡཐཱརཱུཔཱཡ བལཏཱཡ དིཊྛིསམྤནྣོ པུགྒལོ སམནྣཱགཏོ, ཨཧམྤི ཏཐཱརཱུཔཱཡ བལཏཱཡ སམནྣཱགཏོ’ཏི། ཀཐཾརཱུཔཱཡ ཙ, བྷིཀྑཝེ, བལཏཱཡ དིཊྛིསམྤནྣོ པུགྒལོ སམནྣཱགཏོ? བལཏཱ ཨེསཱ, བྷིཀྑཝེ, དིཊྛིསམྤནྣསྶ པུགྒལསྶ ཡཾ ཏཐཱགཏཔྤཝེདིཏེ དྷམྨཝིནཡེ དེསིཡམཱནེ ལབྷཏི ཨཏྠཝེདཾ, ལབྷཏི དྷམྨཝེདཾ, ལབྷཏི དྷམྨཱུཔསཾཧིཏཾ པཱམོཛྫཾ། སོ ཨེཝཾ པཛཱནཱཏི – ‘ཡཐཱརཱུཔཱཡ བལཏཱཡ དིཊྛིསམྤནྣོ པུགྒལོ སམནྣཱགཏོ, ཨཧམྤི ཏཐཱརཱུཔཱཡ བལཏཱཡ སམནྣཱགཏོ’ཏི། ཨིདམསྶ སཏྟམཾ ཉཱཎཾ ཨདྷིགཏཾ ཧོཏི ཨརིཡཾ ལོཀུཏྟརཾ ཨསཱདྷཱརཎཾ པུཐུཛྫནེཧི།
499. ‘‘Puna caparaṃ, bhikkhave, ariyasāvako iti paṭisañcikkhati – ‘yathārūpāya balatāya diṭṭhisampanno puggalo samannāgato, ahampi tathārūpāya balatāya samannāgato’ti. Kathaṃrūpāya ca, bhikkhave, balatāya diṭṭhisampanno puggalo samannāgato? Balatā esā, bhikkhave, diṭṭhisampannassa puggalassa yaṃ tathāgatappavedite dhammavinaye desiyamāne labhati atthavedaṃ, labhati dhammavedaṃ, labhati dhammūpasaṃhitaṃ pāmojjaṃ. So evaṃ pajānāti – ‘yathārūpāya balatāya diṭṭhisampanno puggalo samannāgato, ahampi tathārūpāya balatāya samannāgato’ti. Idamassa sattamaṃ ñāṇaṃ adhigataṃ hoti ariyaṃ lokuttaraṃ asādhāraṇaṃ puthujjanehi.
༥༠༠. ‘‘ཨེཝཾ སཏྟངྒསམནྣཱགཏསྶ ཁོ, བྷིཀྑཝེ, ཨརིཡསཱཝཀསྶ དྷམྨཏཱ སུསམནྣིཊྛཱ ཧོཏི སོཏཱཔཏྟིཕལསཙྪིཀིརིཡཱཡ། ཨེཝཾ སཏྟངྒསམནྣཱགཏོ ཁོ, བྷིཀྑཝེ, ཨརིཡསཱཝཀོ སོཏཱཔཏྟིཕལསམནྣཱགཏོ ཧོཏཱི’’ཏི།
500. ‘‘Evaṃ sattaṅgasamannāgatassa kho, bhikkhave, ariyasāvakassa dhammatā susamanniṭṭhā hoti sotāpattiphalasacchikiriyāya. Evaṃ sattaṅgasamannāgato kho, bhikkhave, ariyasāvako sotāpattiphalasamannāgato hotī’’ti.
ཨིདམཝོཙ བྷགཝཱ། ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི།
Idamavoca bhagavā. Attamanā te bhikkhū bhagavato bhāsitaṃ abhinandunti.
ཀོསམྦིཡསུཏྟཾ ནིཊྛིཏཾ ཨཊྛམཾ།
Kosambiyasuttaṃ niṭṭhitaṃ aṭṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༨. ཀོསམྦིཡསུཏྟཝཎྞནཱ • 8. Kosambiyasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༨. ཀོསམྦིཡསུཏྟཝཎྞནཱ • 8. Kosambiyasuttavaṇṇanā
