| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
8. госамб̣ияасуд̇д̇аван̣н̣анаа
8. Kosambiyasuttavaṇṇanā
491. звам̣ мз суд̇анд̇и госамб̣ияасуд̇д̇ам̣. д̇ад̇т̇а госамб̣ияанд̇и звам̣наамагз наг̇арз. д̇асса гира наг̇арасса аараамабогкаран̣ийаад̣̇ийсу д̇зсу д̇зсу таанзсу госамб̣аругкаава уссаннаа ахзсум̣, д̇асмаа госамб̣ийд̇и сан̇кам̣ аг̇амааси. гусамб̣асса наама исино ассамад̇о авид̣̇уурз маабид̇ад̇д̇аад̇иби згз. гхосид̇аараамзд̇и гхосид̇асздтинаа гаарид̇з аараамз.
491.Evaṃme sutanti kosambiyasuttaṃ. Tattha kosambiyanti evaṃnāmake nagare. Tassa kira nagarassa ārāmapokkharaṇīādīsu tesu tesu ṭhānesu kosambarukkhāva ussannā ahesuṃ, tasmā kosambīti saṅkhaṃ agamāsi. Kusambassa nāma isino assamato avidūre māpitattātipi eke. Ghositārāmeti ghositaseṭṭhinā kārite ārāme.
буб̣б̣з гира ад̣̇д̣̇иларадтам̣ наама ахоси. д̇ад̇о год̇уухалаго наама д̣̇алид̣̇д̣̇о чаад̇агабхаязна сабуд̇д̇ад̣̇ааро гзд̣̇аарабарижчиннам̣ субхигкам̣ радтам̣ г̇ажчанд̇о буд̇д̇ам̣ вахид̇ум̣ асаггонд̇о чад̣д̣зд̇ваа аг̇амааси. маад̇аа нивад̇д̇ид̇ваа д̇ам̣ г̇ахзд̇ваа г̇ад̇аа. д̇з згам̣ г̇обаалагаг̇аамагам̣ бависим̣су, г̇обаалагаанан̃жа д̇ад̣̇аа бахад̇абааяасо бадияад̇д̇о ход̇и, д̇ад̇о бааяасам̣ лабхид̇ваа бхун̃ж̇им̣су. ат̇а со бурисо бахууд̇абааяасам̣ бхун̃ж̇ид̇ваа ж̇ираабзд̇ум̣ асаггонд̇о рад̇д̇ибхааг̇з гаалам̣ гад̇ваа д̇ад̇т̇зва сунакияаа гужчимхи бадисанд̇хим̣ г̇ахзд̇ваа гуггуро ж̇аад̇о. со г̇обаалагасса бияо ахоси манаабо, г̇обаалаго жа бажжзгаб̣уд̣̇д̇хам̣ убадтааси. бажжзгаб̣уд̣̇д̇хоби бхад̇д̇агижжаавасаанз гуггурасса згам̣ бин̣д̣ам̣ д̣̇зд̇и. со бажжзгаб̣уд̣̇д̇хз синзхам̣ уббаад̣̇зд̇ваа г̇обаалагзна сад̣̇д̇хим̣ бан̣н̣асааламби г̇ажчад̇и.
Pubbe kira addilaraṭṭhaṃ nāma ahosi. Tato kotūhalako nāma daliddo chātakabhayena saputtadāro kedāraparicchinnaṃ subhikkhaṃ raṭṭhaṃ gacchanto puttaṃ vahituṃ asakkonto chaḍḍetvā agamāsi. Mātā nivattitvā taṃ gahetvā gatā. Te ekaṃ gopālakagāmakaṃ pavisiṃsu, gopālakānañca tadā pahatapāyaso paṭiyatto hoti, tato pāyasaṃ labhitvā bhuñjiṃsu. Atha so puriso pahūtapāyasaṃ bhuñjitvā jirāpetuṃ asakkonto rattibhāge kālaṃ katvā tattheva sunakhiyā kucchimhi paṭisandhiṃ gahetvā kukkuro jāto. So gopālakassa piyo ahosi manāpo, gopālako ca paccekabuddhaṃ upaṭṭhāsi. Paccekabuddhopi bhattakiccāvasāne kukkurassa ekaṃ piṇḍaṃ deti. So paccekabuddhe sinehaṃ uppādetvā gopālakena saddhiṃ paṇṇasālampi gacchati.
со г̇обаалагз асаннихид̇з бхад̇д̇авзлааяа саяамзва г̇анд̇ваа гаалаарожанад̇т̇ам̣ бан̣н̣асаалад̣̇ваарз бхуссад̇и, анд̇араамаг̇г̇зби жан̣д̣амиг̇з д̣̇исваа бхуссид̇ваа балаабзд̇и. со бажжзгаб̣уд̣̇д̇хз муд̣̇угзна жид̇д̇зна гаалам̣ гад̇ваа д̣̇звалогз ниб̣б̣ад̇д̇и. д̇ад̇расса гхосагад̣̇звабуд̇д̇од̇взва наамам̣ ахоси. со д̣̇звалогад̇о жавид̇ваа госамб̣ияам̣ згасмим̣ гулагхарз ниб̣б̣ад̇д̇и. д̇ам̣ абуд̇д̇аго сздти д̇асса маад̇аабид̇уунам̣ д̇ханам̣ д̣̇ад̇ваа буд̇д̇ам̣ гад̇ваа аг̇г̇ахзси. ат̇а со ад̇д̇ано буд̇д̇з ж̇аад̇з сад̇д̇агкад̇д̇ум̣ маараабзд̇ум̣ убаггами. со бун̃н̃аванд̇ад̇ааяа сад̇д̇асуби таанзсу маран̣ам̣ аббад̇ваа авасаанз згааяа сздтид̇хийд̇ааяа взяяад̇д̇иязна лад̣̇д̇хаж̇ийвиго абарабхааг̇з бид̇уажжаязна сздтидтаанам̣ бад̇ваа гхосид̇асздти наама ж̇аад̇о. ан̃н̃зби госамб̣ияам̣ гуггудасздти баавааригасздтийд̇и д̣̇вз сздтино санд̇и. имзхи сад̣̇д̇хим̣ д̇аяо ахзсум̣.
So gopālake asannihite bhattavelāya sayameva gantvā kālārocanatthaṃ paṇṇasāladvāre bhussati, antarāmaggepi caṇḍamige disvā bhussitvā palāpeti. So paccekabuddhe mudukena cittena kālaṃ katvā devaloke nibbatti. Tatrassa ghosakadevaputtotveva nāmaṃ ahosi. So devalokato cavitvā kosambiyaṃ ekasmiṃ kulaghare nibbatti. Taṃ aputtako seṭṭhi tassa mātāpitūnaṃ dhanaṃ datvā puttaṃ katvā aggahesi. Atha so attano putte jāte sattakkhattuṃ mārāpetuṃ upakkami. So puññavantatāya sattasupi ṭhānesu maraṇaṃ appatvā avasāne ekāya seṭṭhidhītāya veyyattiyena laddhajīviko aparabhāge pituaccayena seṭṭhiṭṭhānaṃ patvā ghositaseṭṭhi nāma jāto. Aññepi kosambiyaṃ kukkuṭaseṭṭhi pāvārikaseṭṭhīti dve seṭṭhino santi. Imehi saddhiṃ tayo ahesuṃ.
д̇зна жа самаязна д̇зсам̣ сахааяагаанам̣ сздтийнам̣ гулуубагаа бан̃жасад̇аа исаяо баб̣б̣ад̇абаад̣̇з васим̣су. д̇з гаалзна гаалам̣ лон̣амб̣иласзванад̇т̇ааяа мануссабат̇ам̣ ааг̇ажчанд̇и. ат̇згасмим̣ ваарз г̇имхасамаяз мануссабат̇ам̣ ааг̇ажчанд̇аа нируд̣̇агамахааганд̇аарам̣ ад̇иггамид̇ваа ганд̇аарабарияосаанз маханд̇ам̣ ниг̇род̇харугкам̣ д̣̇исваа жинд̇зсум̣ – ‘‘яаад̣̇исо аяам̣ ругко, ад̣̇д̇хаа зд̇т̇а махзсагкааяа д̣̇звад̇ааяа бхавид̇аб̣б̣ам̣, саад̇ху вад̇асса, сажз но баанийяам̣ ваа бхож̇анийяам̣ ваа д̣̇ад̣̇зяяаа’’д̇и. д̣̇звад̇аа исийнам̣ аж̇жхаасаяам̣ вид̣̇ид̇ваа имзсам̣ сан̇г̇ахам̣ гариссаамийд̇и ад̇д̇ано аанубхаавзна видабанд̇арад̇о нан̇г̇аласийсамад̇д̇ам̣ уд̣̇агад̇хаарам̣ бавад̇д̇зси. исиг̇ан̣о раж̇ад̇агканд̇хасад̣̇исам̣ уд̣̇агаваддим̣ д̣̇исваа ад̇д̇ано бхааж̇анзхи уд̣̇агам̣ г̇ахзд̇ваа барибхог̇ам̣ гад̇ваа жинд̇зси – ‘‘д̣̇звад̇ааяа амхаагам̣ барибхог̇ауд̣̇агам̣ д̣̇иннам̣, ид̣̇ам̣ бана аг̇аамагам̣ махаааран̃н̃ам̣, саад̇ху вад̇асса, сажз но аахаарамби д̣̇ад̣̇зяяаа’’д̇и. д̣̇звад̇аа исийнам̣ убасам̣габбанавасзна д̣̇иб̣б̣аани яааг̇укаж̇ж̇агаад̣̇ийни д̣̇ад̇ваа санд̇аббзси. исаяо жинд̇аяим̣су – ‘‘д̣̇звад̇ааяа амхаагам̣ барибхог̇ауд̣̇агамби бхож̇анамби саб̣б̣ам̣ д̣̇иннам̣, саад̇ху вад̇асса, сажз но ад̇д̇аанам̣ д̣̇ассзяяаа’’д̇и.
Tena ca samayena tesaṃ sahāyakānaṃ seṭṭhīnaṃ kulūpakā pañcasatā isayo pabbatapāde vasiṃsu. Te kālena kālaṃ loṇambilasevanatthāya manussapathaṃ āgacchanti. Athekasmiṃ vāre gimhasamaye manussapathaṃ āgacchantā nirudakamahākantāraṃ atikkamitvā kantārapariyosāne mahantaṃ nigrodharukkhaṃ disvā cintesuṃ – ‘‘yādiso ayaṃ rukkho, addhā ettha mahesakkhāya devatāya bhavitabbaṃ, sādhu vatassa, sace no pānīyaṃ vā bhojanīyaṃ vā dadeyyā’’ti. Devatā isīnaṃ ajjhāsayaṃ viditvā imesaṃ saṅgahaṃ karissāmīti attano ānubhāvena viṭapantarato naṅgalasīsamattaṃ udakadhāraṃ pavattesi. Isigaṇo rajatakkhandhasadisaṃ udakavaṭṭiṃ disvā attano bhājanehi udakaṃ gahetvā paribhogaṃ katvā cintesi – ‘‘devatāya amhākaṃ paribhogaudakaṃ dinnaṃ, idaṃ pana agāmakaṃ mahāaraññaṃ, sādhu vatassa, sace no āhārampi dadeyyā’’ti. Devatā isīnaṃ upasaṃkappanavasena dibbāni yāgukhajjakādīni datvā santappesi. Isayo cintayiṃsu – ‘‘devatāya amhākaṃ paribhogaudakampi bhojanampi sabbaṃ dinnaṃ, sādhu vatassa, sace no attānaṃ dasseyyā’’ti.
д̣̇звад̇аа д̇зсам̣ аж̇жхаасаяам̣ вид̣̇ид̇ваа убад̣дхагааяам̣ д̣̇ассзси. д̇з аахам̣су – ‘‘д̣̇звад̇з, махад̇ий д̇з самбад̇д̇и, гим̣ гаммам̣ гад̇ваа имам̣ самбад̇д̇им̣ ад̇хиг̇ад̇аасий’’д̇и? бханд̇з, наад̇имаханд̇ам̣ барид̇д̇агам̣ гаммам̣ гад̇ваад̇и. убад̣дхаубосат̇агаммам̣ ниссааяа хи д̣̇звад̇ааяа саа самбад̇д̇и лад̣̇д̇хаа.
Devatā tesaṃ ajjhāsayaṃ viditvā upaḍḍhakāyaṃ dassesi. Te āhaṃsu – ‘‘devate, mahatī te sampatti, kiṃ kammaṃ katvā imaṃ sampattiṃ adhigatāsī’’ti? Bhante, nātimahantaṃ parittakaṃ kammaṃ katvāti. Upaḍḍhauposathakammaṃ nissāya hi devatāya sā sampatti laddhā.
анаат̇абин̣д̣игасса гира г̇зхз аяам̣ д̣̇звабуд̇д̇о гаммагааро ахоси. сздтисса хи г̇зхз убосат̇ад̣̇ивасзсу анд̇амасо д̣̇аасагаммагаарз убаад̣̇ааяа саб̣б̣о ж̇ано убосат̇иго ход̇и. згад̣̇ивасам̣ аяам̣ гаммагааро згагова баад̇о удтааяа гамманд̇ам̣ г̇ад̇о. махаасздти ниваабам̣ лабханамануссз саллагкзнд̇о зд̇ассзвзгасса аран̃н̃ам̣ г̇ад̇абхаавам̣ н̃ад̇ваа асса сааяамаасад̇т̇ааяа ниваабам̣ ад̣̇ааси. бхад̇д̇агааригаа д̣̇аасий згассзва бхад̇д̇ам̣ бажид̇ваа аран̃н̃ад̇о ааг̇ад̇асса бхад̇д̇ам̣ вад̣дхзд̇ваа ад̣̇ааси, гаммагааро ааха – ‘‘ан̃н̃зсу д̣̇ивасзсу имасмим̣ гаалз г̇зхам̣ згасад̣̇д̣̇ам̣ ахоси, аж̇ж̇а ад̇ивияа саннисиннам̣, гим̣ ну ко зд̇а’’нд̇и ? д̇асса саа аажигки – ‘‘аж̇ж̇а имасмим̣ г̇зхз саб̣б̣з мануссаа убосат̇игаа, махаасздти д̇уяхзвзгасса ниваабам̣ ад̣̇аасий’’д̇и. звам̣ аммаад̇и? аама саамийд̇и. имасмим̣ гаалз убосат̇ам̣ самаад̣̇иннасса убосат̇агаммам̣ ход̇и на ход̇ийд̇и махаасздтим̣ бужча аммаад̇и? д̇ааяа г̇анд̇ваа бужчид̇о махаасздти ааха – ‘‘сагалаубосат̇агаммам̣ на ход̇и, убад̣дхагаммам̣ бана ход̇и, убосат̇иго ход̇уу’’д̇и . гаммагааро бхад̇д̇ам̣ абхун̃ж̇ид̇ваа мукам̣ вигкаалзд̇ваа убосат̇иго худ̇ваа васанадтаанам̣ г̇анд̇ваа нибаж̇ж̇и. д̇асса аахаарабаригкийн̣агааяасса рад̇д̇им̣ ваад̇о губби. со бажжуусасамаяз гаалам̣ гад̇ваа убад̣дхаубосат̇агамманиссанд̣̇зна махаавадданиадавияам̣ ниг̇род̇харугкз д̣̇звабуд̇д̇о худ̇ваа ниб̣б̣ад̇д̇и. со д̇ам̣ бавад̇д̇им̣ исийнам̣ аарожзси.
Anāthapiṇḍikassa kira gehe ayaṃ devaputto kammakāro ahosi. Seṭṭhissa hi gehe uposathadivasesu antamaso dāsakammakāre upādāya sabbo jano uposathiko hoti. Ekadivasaṃ ayaṃ kammakāro ekakova pāto uṭṭhāya kammantaṃ gato. Mahāseṭṭhi nivāpaṃ labhanamanusse sallakkhento etassevekassa araññaṃ gatabhāvaṃ ñatvā assa sāyamāsatthāya nivāpaṃ adāsi. Bhattakārikā dāsī ekasseva bhattaṃ pacitvā araññato āgatassa bhattaṃ vaḍḍhetvā adāsi, kammakāro āha – ‘‘aññesu divasesu imasmiṃ kāle gehaṃ ekasaddaṃ ahosi, ajja ativiya sannisinnaṃ, kiṃ nu kho eta’’nti ? Tassa sā ācikkhi – ‘‘ajja imasmiṃ gehe sabbe manussā uposathikā, mahāseṭṭhi tuyhevekassa nivāpaṃ adāsī’’ti. Evaṃ ammāti? Āma sāmīti. Imasmiṃ kāle uposathaṃ samādinnassa uposathakammaṃ hoti na hotīti mahāseṭṭhiṃ puccha ammāti? Tāya gantvā pucchito mahāseṭṭhi āha – ‘‘sakalauposathakammaṃ na hoti, upaḍḍhakammaṃ pana hoti, uposathiko hotū’’ti . Kammakāro bhattaṃ abhuñjitvā mukhaṃ vikkhāletvā uposathiko hutvā vasanaṭṭhānaṃ gantvā nipajji. Tassa āhāraparikkhīṇakāyassa rattiṃ vāto kuppi. So paccūsasamaye kālaṃ katvā upaḍḍhauposathakammanissandena mahāvaṭṭaniaṭaviyaṃ nigrodharukkhe devaputto hutvā nibbatti. So taṃ pavattiṃ isīnaṃ ārocesi.
исаяо д̇умхзхи маяам̣ б̣уд̣̇д̇хо, д̇хаммо, сан̇гход̇и асуд̇абуб̣б̣ам̣ саавид̇аа, уббанно ну ко логз б̣уд̣̇д̇ход̇и? аама, бханд̇з, уббаннод̇и. ид̣̇аани гухим̣ васад̇ийд̇и? саавад̇т̇им̣ ниссааяа ж̇зд̇аванз, бханд̇зд̇и. исаяо д̇идтат̇а д̇аава д̇умхз маяам̣ сад̇т̇аарам̣ бассиссаамаад̇и хадтад̇удтаа нигкамид̇ваа анубуб̣б̣зна госамб̣инаг̇арам̣ самбаабун̣им̣су. махаасздтино, ‘‘исаяо ааг̇ад̇аа’’д̇и бажжуг̇г̇аманам̣ гад̇ваа, ‘‘свз амхаагам̣ бхигкам̣ г̇ан̣хат̇а, бханд̇з’’д̇и ниманд̇зд̇ваа бунад̣̇ивасз исиг̇ан̣асса махаад̣̇аанам̣ ад̣̇ам̣су. исаяо бхун̃ж̇ид̇ваава г̇ажчаамаад̇и аабужчим̣су. д̇умхз, бханд̇з, ан̃н̃асмим̣ гаалз згамби маасам̣ д̣̇взби д̇аяоби жад̇д̇аароби маасз васид̇ваа г̇ажчат̇а. имасмим̣ бана ваарз хияяо ааг̇анд̇ваа аж̇ж̇зва г̇ажчаамаад̇и вад̣̇ат̇а, гимид̣̇анд̇и? аама г̇ахабад̇аяо б̣уд̣̇д̇хо логз уббанно, на ко бана саггаа ж̇ийвид̇анд̇арааяо вид̣̇ид̇ум̣, д̇зна маяам̣ д̇урид̇аа г̇ажчаамаад̇и. д̇зна хи, бханд̇з, маяамби г̇ажчаама, амхзхи сад̣̇д̇хим̣язва г̇ажчат̇аад̇и. д̇умхз аг̇аарияаа наама махааж̇адаа, д̇идтат̇а д̇умхз, маяам̣ бурзд̇арам̣ г̇амиссаамаад̇и нигкамид̇ваа згасмим̣ таанз д̣̇взби д̣̇ивасаани авасид̇ваа д̇урид̇аг̇аманзнзва саавад̇т̇им̣ бад̇ваа ж̇зд̇аванавихаарз сад̇т̇у санд̇игамзва аг̇амам̣су. сад̇т̇у мад̇хурад̇хаммагат̇ам̣ суд̇ваа саб̣б̣зва баб̣б̣аж̇ид̇ваа арахад̇д̇ам̣ баабун̣им̣су.
Isayo tumhehi mayaṃ buddho, dhammo, saṅghoti asutapubbaṃ sāvitā, uppanno nu kho loke buddhoti? Āma, bhante, uppannoti. Idāni kuhiṃ vasatīti? Sāvatthiṃ nissāya jetavane, bhanteti. Isayo tiṭṭhatha tāva tumhe mayaṃ satthāraṃ passissāmāti haṭṭhatuṭṭhā nikkhamitvā anupubbena kosambinagaraṃ sampāpuṇiṃsu. Mahāseṭṭhino, ‘‘isayo āgatā’’ti paccuggamanaṃ katvā, ‘‘sve amhākaṃ bhikkhaṃ gaṇhatha, bhante’’ti nimantetvā punadivase isigaṇassa mahādānaṃ adaṃsu. Isayo bhuñjitvāva gacchāmāti āpucchiṃsu. Tumhe, bhante, aññasmiṃ kāle ekampi māsaṃ dvepi tayopi cattāropi māse vasitvā gacchatha. Imasmiṃ pana vāre hiyyo āgantvā ajjeva gacchāmāti vadatha, kimidanti? Āma gahapatayo buddho loke uppanno, na kho pana sakkā jīvitantarāyo vidituṃ, tena mayaṃ turitā gacchāmāti. Tena hi, bhante, mayampi gacchāma, amhehi saddhiṃyeva gacchathāti. Tumhe agāriyā nāma mahājaṭā, tiṭṭhatha tumhe, mayaṃ puretaraṃ gamissāmāti nikkhamitvā ekasmiṃ ṭhāne dvepi divasāni avasitvā turitagamaneneva sāvatthiṃ patvā jetavanavihāre satthu santikameva agamaṃsu. Satthu madhuradhammakathaṃ sutvā sabbeva pabbajitvā arahattaṃ pāpuṇiṃsu.
д̇зби д̇аяо сздтино бан̃жахи бан̃жахи сагадасад̇зхи саббимад̇хупаан̣ид̇аад̣̇ийни жзва баддуннад̣̇угуулаад̣̇ийни жа аад̣̇ааяа госамб̣ид̇о нигкамид̇ваа анубуб̣б̣зна саавад̇т̇им̣ бад̇ваа ж̇зд̇аванасааманд̇з канд̇хааваарам̣ б̣анд̇хид̇ваа сад̇т̇у санд̇игам̣ г̇анд̇ваа ванд̣̇ид̇ваа бадисант̇аарам̣ гад̇ваа згаманд̇ам̣ нисийд̣̇им̣су. сад̇т̇аа д̇ин̣н̣амби сахааяагаанам̣ мад̇хурад̇хаммагат̇ам̣ гат̇зси. д̇з б̣алавасоманассаж̇аад̇аа сад̇т̇аарам̣ ниманд̇зд̇ваа бунад̣̇ивасз махаад̣̇аанам̣ ад̣̇ам̣су. буна ниманд̇зд̇ваа бунад̣̇ивасзд̇и звам̣ ад̣дхамаасам̣ д̣̇аанам̣ д̣̇ад̇ваа, ‘‘амхаагам̣ ж̇анабад̣̇ам̣ ааг̇аманааяа бадин̃н̃ам̣ д̣̇зт̇аа’’д̇и баад̣̇амуулз нибаж̇ж̇им̣су. бхаг̇аваа, ‘‘сун̃н̃ааг̇аарз ко г̇ахабад̇аяо д̇ат̇ааг̇ад̇аа абхираманд̇ий’’д̇и ааха. зд̇д̇аавад̇аа бадин̃н̃аа д̣̇иннаа наама ход̇ийд̇и г̇ахабад̇аяо саллагкзд̇ваа д̣̇иннаа но бхаг̇авад̇аа бадин̃н̃аад̇и д̣̇асаб̣алам̣ ванд̣̇ид̇ваа нигкамид̇ваа анд̇араамаг̇г̇з яож̇анз яож̇анз таанз вихаарам̣ гаарзд̇ваа анубуб̣б̣зна госамб̣им̣ бад̇ваа, ‘‘логз б̣уд̣̇д̇хо уббанно’’д̇и гат̇аяим̣су. д̇аяоби ж̇анаа ад̇д̇ано ад̇д̇ано аараамз маханд̇ам̣ д̇ханабарижжааг̇ам̣ гад̇ваа бхаг̇авад̇о васанад̇т̇ааяа вихаарз гаараабаяим̣су. д̇ад̇т̇а гуггудасздтинаа гаарид̇о гуггудаараамо наама ахоси. баавааригасздтинаа амб̣аванз гаарид̇о баавааригамб̣авано наама ахоси. гхосид̇зна гаарид̇о гхосид̇аараамо наама ахоси. д̇ам̣ санд̇хааяа вуд̇д̇ам̣ – ‘‘гхосид̇асздтинаа гаарид̇з аараамз’’д̇и.
Tepi tayo seṭṭhino pañcahi pañcahi sakaṭasatehi sappimadhuphāṇitādīni ceva paṭṭunnadukūlādīni ca ādāya kosambito nikkhamitvā anupubbena sāvatthiṃ patvā jetavanasāmante khandhāvāraṃ bandhitvā satthu santikaṃ gantvā vanditvā paṭisanthāraṃ katvā ekamantaṃ nisīdiṃsu. Satthā tiṇṇampi sahāyakānaṃ madhuradhammakathaṃ kathesi. Te balavasomanassajātā satthāraṃ nimantetvā punadivase mahādānaṃ adaṃsu. Puna nimantetvā punadivaseti evaṃ aḍḍhamāsaṃ dānaṃ datvā, ‘‘amhākaṃ janapadaṃ āgamanāya paṭiññaṃ dethā’’ti pādamūle nipajjiṃsu. Bhagavā, ‘‘suññāgāre kho gahapatayo tathāgatā abhiramantī’’ti āha. Ettāvatā paṭiññā dinnā nāma hotīti gahapatayo sallakkhetvā dinnā no bhagavatā paṭiññāti dasabalaṃ vanditvā nikkhamitvā antarāmagge yojane yojane ṭhāne vihāraṃ kāretvā anupubbena kosambiṃ patvā, ‘‘loke buddho uppanno’’ti kathayiṃsu. Tayopi janā attano attano ārāme mahantaṃ dhanapariccāgaṃ katvā bhagavato vasanatthāya vihāre kārāpayiṃsu. Tattha kukkuṭaseṭṭhinā kārito kukkuṭārāmo nāma ahosi. Pāvārikaseṭṭhinā ambavane kārito pāvārikambavano nāma ahosi. Ghositena kārito ghositārāmo nāma ahosi. Taṃ sandhāya vuttaṃ – ‘‘ghositaseṭṭhinā kārite ārāme’’ti.
бхан̣д̣анаж̇аад̇аад̇иаад̣̇ийсу галахасса буб̣б̣абхааг̇о бхан̣д̣анам̣ наама, д̇ам̣ ж̇аад̇ам̣ зд̇зсанд̇и бхан̣д̣анаж̇аад̇аа. хад̇т̇абараамаасаад̣̇ивасзна мад̇т̇агам̣ бад̇д̇о галахо ж̇аад̇о зд̇зсанд̇и галахаж̇аад̇аа. вируд̣̇д̇хабхууд̇ам̣ ваад̣̇анд̇и виваад̣̇ам̣, д̇ам̣ аабаннаад̇и виваад̣̇аабаннаа. мукасад̇д̇ийхийд̇и ваажаасад̇д̇ийхи. вид̇уд̣̇анд̇аад̇и виж̇жханд̇аа. д̇з на жзва ан̃н̃аман̃н̃ам̣ сан̃н̃аабзнд̇и на жа сан̃н̃ад̇д̇им̣ убзнд̇ийд̇и д̇з ад̇т̇ан̃жа гааран̣ан̃жа д̣̇ассзд̇ваа нзва ан̃н̃аман̃н̃ам̣ ж̇аанаабзнд̇и. сажзби сан̃н̃аабзд̇ум̣ аарабханд̇и, д̇ат̇ааби сан̃н̃ад̇д̇им̣ на убзнд̇и, ж̇аанид̇ум̣ на ижчанд̇ийд̇и ад̇т̇о. ниж̇жхад̇д̇ияааби зсзва наяо. зд̇т̇а жа ниж̇жхад̇д̇ийд̇и сан̃н̃ад̇д̇ивзважанамзвзд̇ам̣. гасмаа банзд̇з бхан̣д̣анаж̇аад̇аа ахзсунд̇и? аббамад̇д̇агзна гааран̣зна.
Bhaṇḍanajātātiādīsu kalahassa pubbabhāgo bhaṇḍanaṃ nāma, taṃ jātaṃ etesanti bhaṇḍanajātā. Hatthaparāmāsādivasena matthakaṃ patto kalaho jāto etesanti kalahajātā. Viruddhabhūtaṃ vādanti vivādaṃ, taṃ āpannāti vivādāpannā. Mukhasattīhīti vācāsattīhi. Vitudantāti vijjhantā. Te na ceva aññamaññaṃ saññāpenti na ca saññattiṃ upentīti te atthañca kāraṇañca dassetvā neva aññamaññaṃ jānāpenti. Sacepi saññāpetuṃ ārabhanti, tathāpi saññattiṃ na upenti, jānituṃ na icchantīti attho. Nijjhattiyāpi eseva nayo. Ettha ca nijjhattīti saññattivevacanamevetaṃ. Kasmā panete bhaṇḍanajātā ahesunti? Appamattakena kāraṇena.
д̣̇вз гира бхигкуу згасмим̣ ааваасз васанд̇и винаяад̇харо жа суд̇д̇анд̇иго жа. д̇зсу суд̇д̇анд̇иго бхигку згад̣̇ивасам̣ важжагудим̣ бавидто аажаманауд̣̇агаавасзсам̣ бхааж̇анз табзд̇ваава нигками. винаяад̇харо бажчаа бавидто д̇ам̣ уд̣̇агам̣ д̣̇исваа нигкамид̇ваа д̇ам̣ бхигкум̣ бужчи, аавусо, д̇аяаа ид̣̇ам̣ уд̣̇агам̣ табид̇анд̇и? аама, аавусод̇и. д̇вамзд̇т̇а аабад̇д̇ибхаавам̣ на ж̇аанаасийд̇и? аама на ж̇аанаамийд̇и. ход̇и, аавусо, зд̇т̇а аабад̇д̇ийд̇и. сажз ход̇и д̣̇зсзссаамийд̇и. сажз бана д̇з, аавусо, асан̃жижжа асад̇ияаа гад̇ам̣, над̇т̇и д̇з аабад̇д̇ийд̇и. со д̇ассаа аабад̇д̇ияаа анаабад̇д̇ид̣̇идти ахоси.
Dve kira bhikkhū ekasmiṃ āvāse vasanti vinayadharo ca suttantiko ca. Tesu suttantiko bhikkhu ekadivasaṃ vaccakuṭiṃ paviṭṭho ācamanaudakāvasesaṃ bhājane ṭhapetvāva nikkhami. Vinayadharo pacchā paviṭṭho taṃ udakaṃ disvā nikkhamitvā taṃ bhikkhuṃ pucchi, āvuso, tayā idaṃ udakaṃ ṭhapitanti? Āma, āvusoti. Tvamettha āpattibhāvaṃ na jānāsīti? Āma na jānāmīti. Hoti, āvuso, ettha āpattīti. Sace hoti desessāmīti. Sace pana te, āvuso, asañcicca asatiyā kataṃ, natthi te āpattīti. So tassā āpattiyā anāpattidiṭṭhi ahosi.
винаяад̇харо ад̇д̇ано ниссид̇агаанам̣, ‘‘аяам̣ суд̇д̇анд̇иго аабад̇д̇им̣ аабаж̇ж̇амааноби на ж̇аанаад̇ий’’д̇и аарожзси. д̇з д̇асса ниссид̇агз д̣̇исваа – ‘‘д̇умхаагам̣ убаж̇жхааяо аабад̇д̇им̣ аабаж̇ж̇ид̇вааби аабад̇д̇ибхаавам̣ на ж̇аанаад̇ий’’д̇и аахам̣су. д̇з г̇анд̇ваа ад̇д̇ано убаж̇жхааяасса аарожзсум̣. со звамааха – ‘‘аяам̣ винаяад̇харо буб̣б̣з ‘анаабад̇д̇ий’д̇и вад̇ваа ид̣̇аани ‘аабад̇д̇ий’д̇и вад̣̇ад̇и, мусааваад̣̇ий зсо’’д̇и. д̇з г̇анд̇ваа, ‘‘д̇умхаагам̣ убаж̇жхааяо мусааваад̣̇ий’’д̇и звам̣ ан̃н̃аман̃н̃ам̣ галахам̣ вад̣дхаяим̣су, д̇ам̣ санд̇хааязд̇ам̣ вуд̇д̇ам̣.
Vinayadharo attano nissitakānaṃ, ‘‘ayaṃ suttantiko āpattiṃ āpajjamānopi na jānātī’’ti ārocesi. Te tassa nissitake disvā – ‘‘tumhākaṃ upajjhāyo āpattiṃ āpajjitvāpi āpattibhāvaṃ na jānātī’’ti āhaṃsu. Te gantvā attano upajjhāyassa ārocesuṃ. So evamāha – ‘‘ayaṃ vinayadharo pubbe ‘anāpattī’ti vatvā idāni ‘āpattī’ti vadati, musāvādī eso’’ti. Te gantvā, ‘‘tumhākaṃ upajjhāyo musāvādī’’ti evaṃ aññamaññaṃ kalahaṃ vaḍḍhayiṃsu, taṃ sandhāyetaṃ vuttaṃ.
бхаг̇аванд̇ам̣ зд̇ад̣̇авожаад̇и зд̇ам̣, ‘‘ид̇ха, бханд̇з, госамб̣ияам̣ бхигкуу бхан̣д̣анаж̇аад̇аа’’д̇иаад̣̇иважанам̣ авожа. д̇ан̃жа ко нзва бияагамяад̇ааяа на бхзд̣̇аад̇хиббааязна, ат̇а ко ад̇т̇агаамад̇ааяа хид̇агаамад̇ааяа. саамаг̇г̇игаараго гирзса бхигку, д̇асмаасса зд̇ад̣̇ахоси – ‘‘яат̇аа имз бхигкуу виваад̣̇ам̣ аарад̣̇д̇хаа, на саггаа маяаа, нааби ан̃н̃зна бхигкунаа самаг̇г̇аа гаад̇ум̣, аббзва наама сад̣̇звагз логз аббадибуг̇г̇ало бхаг̇аваа саяам̣ ваа г̇анд̇ваа, ад̇д̇ано ваа санд̇игам̣ баггосаабзд̇ваа зд̇зсам̣ бхигкуунам̣ канд̇имзд̇д̇аабадисам̣яуд̇д̇ам̣ сааран̣ийяад̇хаммад̣̇зсанам̣ гат̇зд̇ваа саамаг̇г̇им̣ гарзяяаа’’д̇и ад̇т̇агаамад̇ааяа хид̇агаамад̇ааяа г̇анд̇ваа авожа.
Bhagavantaṃ etadavocāti etaṃ, ‘‘idha, bhante, kosambiyaṃ bhikkhū bhaṇḍanajātā’’tiādivacanaṃ avoca. Tañca kho neva piyakamyatāya na bhedādhippāyena, atha kho atthakāmatāya hitakāmatāya. Sāmaggikārako kiresa bhikkhu, tasmāssa etadahosi – ‘‘yathā ime bhikkhū vivādaṃ āraddhā, na sakkā mayā, nāpi aññena bhikkhunā samaggā kātuṃ, appeva nāma sadevake loke appaṭipuggalo bhagavā sayaṃ vā gantvā, attano vā santikaṃ pakkosāpetvā etesaṃ bhikkhūnaṃ khantimettāpaṭisaṃyuttaṃ sāraṇīyadhammadesanaṃ kathetvā sāmaggiṃ kareyyā’’ti atthakāmatāya hitakāmatāya gantvā avoca.
492. чаяимз, бхигкавз, д̇хаммаа сааран̣ийяаад̇и хздтаа галахабхан̣д̣анавасзна д̣̇зсанаа аарад̣̇д̇хаа. имасмим̣ таанз ча сааран̣ийяаа д̇хаммаа ааг̇ад̇аад̇и звамид̣̇ам̣ госамб̣ияасуд̇д̇ам̣ яат̇аанусанд̇хинаава г̇ад̇ам̣ ход̇и. д̇ад̇т̇а сааран̣ийяаад̇и сарид̇аб̣б̣аяуд̇д̇аа ад̣̇д̇хаанз ад̇игганд̇зби на бамуссид̇аб̣б̣аа. яо д̇з д̇хаммз буурзд̇и, д̇ам̣ саб̣рахмажаарийнам̣ бияам̣ гаронд̇ийд̇и бияагаран̣аа. г̇арум̣ гаронд̇ийд̇и г̇аругаран̣аа. сан̇г̇ахааяаад̇и сан̇г̇ахан̣ад̇т̇ааяа. авиваад̣̇ааяаад̇и авиваад̣̇анад̇т̇ааяа. саамаг̇г̇ияаад̇и самаг̇г̇абхаавад̇т̇ааяа . згийбхаавааяаад̇и згийбхаавад̇т̇ааяа ниннаанаагаран̣ааяа. сам̣вад̇д̇анд̇ийд̇и бхаванд̇и. мзд̇д̇ам̣ гааяагамманд̇и мзд̇д̇ажид̇д̇зна гад̇д̇аб̣б̣ам̣ гааяагаммам̣. важийгаммаманогаммзсуби зсзва наяо. имаани бхигкуунам̣ васзна ааг̇ад̇аани, г̇ихийсуби лаб̣бханд̇иязва. бхигкуунан̃хи мзд̇д̇ажид̇д̇зна аабхисамаажааригад̇хаммабууран̣ам̣ мзд̇д̇ам̣ гааяагаммам̣ наама. г̇ихийнам̣ жзд̇ияаванд̣̇анад̇т̇ааяа б̣од̇хиванд̣̇анад̇т̇ааяа сан̇гханиманд̇анад̇т̇ааяа г̇аманам̣ г̇аамам̣ бин̣д̣ааяа бавидтз бхигкуу д̣̇исваа бажжуг̇г̇аманам̣ бад̇д̇абадиг̇г̇ахан̣ам̣ аасанабан̃н̃аабанам̣ ануг̇амананд̇и звамаад̣̇игам̣ мзд̇д̇ам̣ гааяагаммам̣ наама.
492.Chayime, bhikkhave, dhammā sāraṇīyāti heṭṭhā kalahabhaṇḍanavasena desanā āraddhā. Imasmiṃ ṭhāne cha sāraṇīyā dhammā āgatāti evamidaṃ kosambiyasuttaṃ yathānusandhināva gataṃ hoti. Tattha sāraṇīyāti saritabbayuttā addhāne atikkantepi na pamussitabbā. Yo te dhamme pūreti, taṃ sabrahmacārīnaṃ piyaṃ karontīti piyakaraṇā. Garuṃ karontīti garukaraṇā. Saṅgahāyāti saṅgahaṇatthāya. Avivādāyāti avivādanatthāya. Sāmaggiyāti samaggabhāvatthāya . Ekībhāvāyāti ekībhāvatthāya ninnānākaraṇāya. Saṃvattantīti bhavanti. Mettaṃ kāyakammanti mettacittena kattabbaṃ kāyakammaṃ. Vacīkammamanokammesupi eseva nayo. Imāni bhikkhūnaṃ vasena āgatāni, gihīsupi labbhantiyeva. Bhikkhūnañhi mettacittena ābhisamācārikadhammapūraṇaṃ mettaṃ kāyakammaṃ nāma. Gihīnaṃ cetiyavandanatthāya bodhivandanatthāya saṅghanimantanatthāya gamanaṃ gāmaṃ piṇḍāya paviṭṭhe bhikkhū disvā paccuggamanaṃ pattapaṭiggahaṇaṃ āsanapaññāpanaṃ anugamananti evamādikaṃ mettaṃ kāyakammaṃ nāma.
бхигкуунам̣ мзд̇д̇ажид̇д̇зна аажаарабан̃н̃ад̇д̇исигкаабад̣̇ам̣, гаммадтаанагат̇анам̣ д̇хаммад̣̇зсанаа д̇збидагамби б̣уд̣̇д̇хаважанам̣ мзд̇д̇ам̣ важийгаммам̣ наама. г̇ихийнан̃жа, ‘‘жзд̇ияаванд̣̇анад̇т̇ааяа г̇ажчаама, б̣од̇хиванд̣̇анад̇т̇ааяа г̇ажчаама, д̇хаммассаванам̣ гариссаама, бад̣̇ийбамаалаабубпабууж̇ам̣ гариссаама, д̇ийн̣и сужарид̇аани самаад̣̇ааяа вад̇д̇иссаама, салаагабхад̇д̇аад̣̇ийни д̣̇ассаама, вассааваасигам̣ д̣̇ассаама, аж̇ж̇а сан̇гхасса жад̇д̇ааро бажжаяз д̣̇ассаама, сан̇гхам̣ ниманд̇зд̇ваа каад̣̇анийяаад̣̇ийни сам̣вид̣̇ахат̇а, аасанаани бан̃н̃аабзт̇а, баанийяам̣ убадтабзт̇а, сан̇гхам̣ бажжуг̇г̇анд̇ваа аанзт̇а, бан̃н̃ад̇д̇аасанз нисийд̣̇аабзд̇ваа чанд̣̇аж̇аад̇аа уссаахаж̇аад̇аа взяяааважжам̣ гарот̇аа’’д̇иаад̣̇игат̇анагаалз мзд̇д̇ам̣ важийгаммам̣ наама.
Bhikkhūnaṃ mettacittena ācārapaññattisikkhāpadaṃ, kammaṭṭhānakathanaṃ dhammadesanā tepiṭakampi buddhavacanaṃ mettaṃ vacīkammaṃ nāma. Gihīnañca, ‘‘cetiyavandanatthāya gacchāma, bodhivandanatthāya gacchāma, dhammassavanaṃ karissāma, padīpamālāpupphapūjaṃ karissāma, tīṇi sucaritāni samādāya vattissāma, salākabhattādīni dassāma, vassāvāsikaṃ dassāma, ajja saṅghassa cattāro paccaye dassāma, saṅghaṃ nimantetvā khādanīyādīni saṃvidahatha, āsanāni paññāpetha, pānīyaṃ upaṭṭhapetha, saṅghaṃ paccuggantvā ānetha, paññattāsane nisīdāpetvā chandajātā ussāhajātā veyyāvaccaṃ karothā’’tiādikathanakāle mettaṃ vacīkammaṃ nāma.
бхигкуунам̣ баад̇ова удтааяа сарийрабадиж̇аг̇г̇анам̣ жзд̇ияан̇г̇ан̣авад̇д̇аад̣̇ийни жа гад̇ваа вивид̇д̇аасанз нисийд̣̇ид̇ваа, ‘‘имасмим̣ вихаарз бхигкуу сукий хонд̇у, авзраа аб̣яаабаж̇жхаа’’д̇и жинд̇анам̣ мзд̇д̇ам̣ маногаммам̣ наама. г̇ихийнам̣ ‘‘аяяаа сукий хонд̇у, авзраа аб̣яаабаж̇жхаа’’д̇и жинд̇анам̣ мзд̇д̇ам̣ маногаммам̣ наама.
Bhikkhūnaṃ pātova uṭṭhāya sarīrapaṭijagganaṃ cetiyaṅgaṇavattādīni ca katvā vivittāsane nisīditvā, ‘‘imasmiṃ vihāre bhikkhū sukhī hontu, averā abyāpajjhā’’ti cintanaṃ mettaṃ manokammaṃ nāma. Gihīnaṃ ‘‘ayyā sukhī hontu, averā abyāpajjhā’’ti cintanaṃ mettaṃ manokammaṃ nāma.
аави жзва рахо жаад̇и саммукаа жа бараммукаа жа. д̇ад̇т̇а навагаанам̣ жийварагаммаад̣̇ийсу сахааяабхаавуубаг̇аманам̣ саммукаа мзд̇д̇ам̣ гааяагаммам̣ наама. т̇зраанам̣ бана баад̣̇ад̇хованаванд̣̇анаб̣ийж̇анад̣̇аанаад̣̇ибхзд̣̇амби саб̣б̣ам̣ саамийжигаммам̣ саммукаа мзд̇д̇ам̣ гааяагаммам̣ наама. убхаязхиби д̣̇уннигкид̇д̇аанам̣ д̣̇аарубхан̣д̣аад̣̇ийнам̣ д̇зсу аваман̃н̃ам̣ агад̇ваа ад̇д̇анаа д̣̇уннигкид̇д̇аанам̣ вияа бадисааманам̣ бараммукаа мзд̇д̇ам̣ гааяагаммам̣ наама. д̣̇звад̇т̇зро д̇иссад̇т̇зрод̇и звам̣ баг̇г̇аяха важанам̣ саммукаа мзд̇д̇ам̣ важийгаммам̣ наама. вихаарз асанд̇ам̣ бана барибужчанд̇асса, гухим̣ амхаагам̣ д̣̇звад̇т̇зро, амхаагам̣ д̇иссад̇т̇зро гад̣̇аа ну ко ааг̇амиссад̇ийд̇и звам̣ мамааяанаважанам̣ бараммукаа мзд̇д̇ам̣ важийгаммам̣ наама. мзд̇д̇аасинзхасинид̣̇д̇хаани бана наяанаани уммийлзд̇ваа суббасаннзна мукзна ологанам̣ саммукаа мзд̇д̇ам̣ маногаммам̣ наама. д̣̇звад̇т̇зро, д̇иссад̇т̇зро арог̇о ход̇у аббааб̣аад̇ход̇и саманнаахаран̣ам̣ бараммукаа мзд̇д̇ам̣ маногаммам̣ наама.
Āvi ceva raho cāti sammukhā ca parammukhā ca. Tattha navakānaṃ cīvarakammādīsu sahāyabhāvūpagamanaṃ sammukhā mettaṃ kāyakammaṃ nāma. Therānaṃ pana pādadhovanavandanabījanadānādibhedampi sabbaṃ sāmīcikammaṃ sammukhā mettaṃ kāyakammaṃ nāma. Ubhayehipi dunnikkhittānaṃ dārubhaṇḍādīnaṃ tesu avamaññaṃ akatvā attanā dunnikkhittānaṃ viya paṭisāmanaṃ parammukhā mettaṃ kāyakammaṃ nāma. Devatthero tissattheroti evaṃ paggayha vacanaṃ sammukhā mettaṃ vacīkammaṃ nāma. Vihāre asantaṃ pana paripucchantassa, kuhiṃ amhākaṃ devatthero, amhākaṃ tissatthero kadā nu kho āgamissatīti evaṃ mamāyanavacanaṃ parammukhā mettaṃ vacīkammaṃ nāma. Mettāsinehasiniddhāni pana nayanāni ummīletvā suppasannena mukhena olokanaṃ sammukhā mettaṃ manokammaṃ nāma. Devatthero, tissatthero arogo hotu appābādhoti samannāharaṇaṃ parammukhā mettaṃ manokammaṃ nāma.
лаабхаад̇и жийвараад̣̇аяо лад̣̇д̇хабажжаяаа. д̇хаммигаад̇и гуханаад̣̇ибхзд̣̇ам̣ мижчааж̇ийвам̣ важ̇ж̇зд̇ваа д̇хаммзна самзна бхигкаажарияавад̇д̇зна уббаннаа. анд̇амасо бад̇д̇абарияаабаннамад̇д̇амбийд̇и бажчимагодияаа бад̇д̇з барияаабаннам̣ бад̇д̇асса анд̇ог̇ад̇ам̣ д̣̇вад̇д̇игадажчубхигкаамад̇д̇амби. аббадивибхад̇д̇абхог̇ийд̇и зд̇т̇а д̣̇вз бадивибхад̇д̇аани наама аамисабадивибхад̇д̇ам̣ буг̇г̇алабадивибхад̇д̇ан̃жа. д̇ад̇т̇а, ‘‘зд̇д̇агам̣ д̣̇ассаами, зд̇д̇агам̣ на д̣̇ассаамий’’д̇и звам̣ жид̇д̇зна вибхаж̇анам̣ аамисабадивибхад̇д̇ам̣ наама. ‘‘асугасса д̣̇ассаами, асугасса на д̣̇ассаамий’’д̇и звам̣ жид̇д̇зна вибхаж̇анам̣ бана буг̇г̇алабадивибхад̇д̇ам̣ наама. д̇ад̣̇убхаяамби агад̇ваа яо аббадивибхад̇д̇ам̣ бхун̃ж̇ад̇и, аяам̣ аббадивибхад̇д̇абхог̇ий наама.
Lābhāti cīvarādayo laddhapaccayā. Dhammikāti kuhanādibhedaṃ micchājīvaṃ vajjetvā dhammena samena bhikkhācariyavattena uppannā. Antamaso pattapariyāpannamattampīti pacchimakoṭiyā patte pariyāpannaṃ pattassa antogataṃ dvattikaṭacchubhikkhāmattampi. Appaṭivibhattabhogīti ettha dve paṭivibhattāni nāma āmisapaṭivibhattaṃ puggalapaṭivibhattañca. Tattha, ‘‘ettakaṃ dassāmi, ettakaṃ na dassāmī’’ti evaṃ cittena vibhajanaṃ āmisapaṭivibhattaṃ nāma. ‘‘Asukassa dassāmi, asukassa na dassāmī’’ti evaṃ cittena vibhajanaṃ pana puggalapaṭivibhattaṃ nāma. Tadubhayampi akatvā yo appaṭivibhattaṃ bhuñjati, ayaṃ appaṭivibhattabhogī nāma.
сийлаванд̇зхи саб̣рахмажаарийхи саад̇хааран̣абхог̇ийд̇и зд̇т̇а саад̇хааран̣абхог̇ино ид̣̇ам̣ лагкан̣ам̣, яам̣ яам̣ бан̣ийд̇ам̣ лаб̣бхад̇и, д̇ам̣ д̇ам̣ нзва лаабхзна лаабхам̣ ж̇иг̇ийсанаамукзна г̇ихийнам̣ д̣̇зд̇и, на ад̇д̇анаа барибхун̃ж̇ад̇и; бадиг̇г̇ан̣ханд̇ова сан̇гхзна саад̇хааран̣ам̣ ход̇ууд̇и г̇ахзд̇ваа г̇ан̣д̣им̣ бахарид̇ваа барибхун̃ж̇ид̇аб̣б̣ам̣ сан̇гхасанд̇агам̣ вияа бассад̇и. ид̣̇ам̣ бана сааран̣ийяад̇хаммам̣ го буурзд̇и, го на буурзд̇ийд̇и? д̣̇уссийло д̇аава на буурзд̇и. на хи д̇асса санд̇агам̣ сийлаванд̇аа г̇ан̣ханд̇и. барисуд̣̇д̇хасийло бана вад̇д̇ам̣ акан̣д̣знд̇о буурзд̇и.
Sīlavantehisabrahmacārīhi sādhāraṇabhogīti ettha sādhāraṇabhogino idaṃ lakkhaṇaṃ, yaṃ yaṃ paṇītaṃ labbhati, taṃ taṃ neva lābhena lābhaṃ jigīsanāmukhena gihīnaṃ deti, na attanā paribhuñjati; paṭiggaṇhantova saṅghena sādhāraṇaṃ hotūti gahetvā gaṇḍiṃ paharitvā paribhuñjitabbaṃ saṅghasantakaṃ viya passati. Idaṃ pana sāraṇīyadhammaṃ ko pūreti, ko na pūretīti? Dussīlo tāva na pūreti. Na hi tassa santakaṃ sīlavantā gaṇhanti. Parisuddhasīlo pana vattaṃ akhaṇḍento pūreti.
д̇ад̇рид̣̇ам̣ вад̇д̇ам̣ – яо хи од̣̇иссагам̣ гад̇ваа маад̇у ваа бид̇у ваа аажарияубаж̇жхааяаад̣̇ийнам̣ ваа д̣̇зд̇и, со д̣̇аад̇аб̣б̣ам̣ д̣̇зд̇и, сааран̣ийяад̇хаммо банасса на ход̇и, балиб̣од̇хаж̇аг̇г̇анам̣ наама ход̇и. сааран̣ийяад̇хаммо хи муд̇д̇абалиб̣од̇хассзва ваддад̇и, д̇зна бана од̣̇иссагам̣ д̣̇знд̇зна г̇илаанаг̇илаанубадтаагаааг̇анд̇угаг̇амигаанан̃жзва навабаб̣б̣аж̇ид̇асса жа сан̇гхаадибад̇д̇аг̇г̇ахан̣ам̣ аж̇аананд̇асса д̣̇аад̇аб̣б̣ам̣. зд̇зсам̣ д̣̇ад̇ваа авасзсам̣ т̇зраасанад̇о бадтааяа т̇огам̣ т̇огам̣ ад̣̇ад̇ваа яо яад̇д̇агам̣ г̇ан̣хаад̇и, д̇асса д̇ад̇д̇агам̣ д̣̇аад̇аб̣б̣ам̣. авасидтз асад̇и буна бин̣д̣ааяа жарид̇ваа т̇зраасанад̇о бадтааяа яам̣ яам̣ бан̣ийд̇ам̣, д̇ам̣ д̇ам̣ д̣̇ад̇ваа сзсам̣ барибхун̃ж̇ид̇аб̣б̣ам̣, ‘‘сийлаванд̇зхий’’д̇и важанад̇о д̣̇уссийласса ад̣̇аад̇умби ваддад̇и.
Tatridaṃ vattaṃ – yo hi odissakaṃ katvā mātu vā pitu vā ācariyupajjhāyādīnaṃ vā deti, so dātabbaṃ deti, sāraṇīyadhammo panassa na hoti, palibodhajagganaṃ nāma hoti. Sāraṇīyadhammo hi muttapalibodhasseva vaṭṭati, tena pana odissakaṃ dentena gilānagilānupaṭṭhākaāgantukagamikānañceva navapabbajitassa ca saṅghāṭipattaggahaṇaṃ ajānantassa dātabbaṃ. Etesaṃ datvā avasesaṃ therāsanato paṭṭhāya thokaṃ thokaṃ adatvā yo yattakaṃ gaṇhāti, tassa tattakaṃ dātabbaṃ. Avasiṭṭhe asati puna piṇḍāya caritvā therāsanato paṭṭhāya yaṃ yaṃ paṇītaṃ, taṃ taṃ datvā sesaṃ paribhuñjitabbaṃ, ‘‘sīlavantehī’’ti vacanato dussīlassa adātumpi vaṭṭati.
аяам̣ бана сааран̣ийяад̇хаммо сусигкид̇ааяа барисааяа субууро ход̇и, но асигкид̇ааяа барисааяа. сусигкид̇ааяа хи барисааяа яо ан̃н̃ад̇о лабхад̇и, со на г̇ан̣хаад̇и, ан̃н̃ад̇о алабханд̇оби бамаан̣аяуд̇д̇амзва г̇ан̣хаад̇и, на ад̇ирзгам̣. аяан̃жа бана сааран̣ийяад̇хаммо звам̣ бунаббунам̣ бин̣д̣ааяа жарид̇ваа лад̣̇д̇хам̣ лад̣̇д̇хам̣ д̣̇знд̇ассааби д̣̇ваад̣̇асахи вассзхи буурад̇и, на д̇ад̇о орам̣. сажз хи д̣̇ваад̣̇асамзби вассз сааран̣ийяад̇хаммабуураго бин̣д̣абаад̇абуурам̣ бад̇д̇ам̣ аасанасаалааяам̣ табзд̇ваа нахааяид̇ум̣ г̇ажчад̇и, сан̇гхад̇т̇зро жа гассзсо бад̇д̇од̇и? сааран̣ийяад̇хаммабуурагассаад̇и вуд̇д̇з – ‘‘аахарат̇а на’’нд̇и саб̣б̣ам̣ бин̣д̣абаад̇ам̣ вижаарзд̇ваа бхун̃ж̇ид̇ваа жа рид̇д̇абад̇д̇ам̣ табзд̇и. ат̇а со бхигку рид̇д̇абад̇д̇ам̣ д̣̇исваа, ‘‘маяхам̣ асзсзд̇ваава барибхун̃ж̇им̣суу’’д̇и д̣̇оманассам̣ уббаад̣̇зд̇и, сааран̣ийяад̇хаммо бхиж̇ж̇ад̇и, буна д̣̇ваад̣̇аса вассаани буурзд̇аб̣б̣о ход̇и, д̇ид̇т̇ияабариваасасад̣̇исо хзса. сагим̣ кан̣д̣з ж̇аад̇з буна буурзд̇аб̣б̣ова. яо бана, ‘‘лаабхаа вад̇а мз, сулад̣̇д̇хам̣ вад̇а мз, яасса мз бад̇д̇аг̇ад̇ам̣ анаабужчаава саб̣рахмажаарий барибхун̃ж̇анд̇ий’’д̇и соманассам̣ ж̇анзд̇и, д̇асса бун̣н̣о наама ход̇и.
Ayaṃ pana sāraṇīyadhammo susikkhitāya parisāya supūro hoti, no asikkhitāya parisāya. Susikkhitāya hi parisāya yo aññato labhati, so na gaṇhāti, aññato alabhantopi pamāṇayuttameva gaṇhāti, na atirekaṃ. Ayañca pana sāraṇīyadhammo evaṃ punappunaṃ piṇḍāya caritvā laddhaṃ laddhaṃ dentassāpi dvādasahi vassehi pūrati, na tato oraṃ. Sace hi dvādasamepi vasse sāraṇīyadhammapūrako piṇḍapātapūraṃ pattaṃ āsanasālāyaṃ ṭhapetvā nahāyituṃ gacchati, saṅghatthero ca kasseso pattoti? Sāraṇīyadhammapūrakassāti vutte – ‘‘āharatha na’’nti sabbaṃ piṇḍapātaṃ vicāretvā bhuñjitvā ca rittapattaṃ ṭhapeti. Atha so bhikkhu rittapattaṃ disvā, ‘‘mayhaṃ asesetvāva paribhuñjiṃsū’’ti domanassaṃ uppādeti, sāraṇīyadhammo bhijjati, puna dvādasa vassāni pūretabbo hoti, titthiyaparivāsasadiso hesa. Sakiṃ khaṇḍe jāte puna pūretabbova. Yo pana, ‘‘lābhā vata me, suladdhaṃ vata me, yassa me pattagataṃ anāpucchāva sabrahmacārī paribhuñjantī’’ti somanassaṃ janeti, tassa puṇṇo nāma hoti.
звам̣ буурид̇асааран̣ийяад̇хаммасса бана нзва иссаа, на мажчарияам̣ ход̇и, со мануссаанам̣ бияо ход̇и, сулабхабажжаяо; бад̇д̇аг̇ад̇амасса д̣̇ийяамаанамби на кийяад̇и, бхааж̇анийяабхан̣д̣адтаанз аг̇г̇абхан̣д̣ам̣ лабхад̇и, бхаяз ваа чаад̇агз ваа самбад̇д̇з д̣̇звад̇аа уссуггам̣ аабаж̇ж̇анд̇и.
Evaṃ pūritasāraṇīyadhammassa pana neva issā, na macchariyaṃ hoti, so manussānaṃ piyo hoti, sulabhapaccayo; pattagatamassa dīyamānampi na khīyati, bhājanīyabhaṇḍaṭṭhāne aggabhaṇḍaṃ labhati, bhaye vā chātake vā sampatte devatā ussukkaṃ āpajjanti.
д̇ад̇римаани вад̇т̇ууни – лзн̣аг̇ириваасий д̇иссад̇т̇зро гира махааг̇ириг̇аамам̣ убаниссааяа васад̇и. бан̃н̃ааса махаат̇зраа нааг̇ад̣̇ийбам̣ жзд̇ияаванд̣̇анад̇т̇ааяа г̇ажчанд̇аа г̇ириг̇аамз бин̣д̣ааяа жарид̇ваа гин̃жи алад̣̇д̇хаа нигкамим̣су. т̇зро бависанд̇о д̇з д̣̇исваа бужчи – ‘‘лад̣̇д̇хам̣, бханд̇з’’д̇и? вижаримхаа, аавусод̇и. со алад̣̇д̇хабхаавам̣ н̃ад̇ваа ааха – ‘‘яааваахам̣, бханд̇з, ааг̇ажчаами, д̇аава ид̇хзва хот̇аа’’д̇и. маяам̣, аавусо, бан̃н̃ааса ж̇анаа бад̇д̇ад̇зманамад̇д̇амби на лабхимхаад̇и. нзваасигаа наама, бханд̇з, бадиб̣алаа хонд̇и, алабханд̇ааби бхигкаажаарамаг̇г̇асабхаавам̣ ж̇аананд̇ийд̇и. т̇зраа ааг̇амим̣су. т̇зро г̇аамам̣ баависи. д̇хураг̇зхзязва махааубаасигаа кийрабхад̇д̇ам̣ саж̇ж̇зд̇ваа т̇зрам̣ ологаяамаанаа тид̇аа т̇зрасса д̣̇ваарам̣ самбад̇д̇ассзва бад̇д̇ам̣ буурзд̇ваа ад̣̇ааси. со д̇ам̣ аад̣̇ааяа т̇зраанам̣ санд̇игам̣ г̇анд̇ваа, ‘‘г̇ан̣хат̇а, бханд̇з’’д̇и сан̇гхад̇т̇зрамааха. т̇зро, ‘‘амхзхи зд̇д̇агзхи гин̃жи на лад̣̇д̇хам̣, аяам̣ сийгхамзва г̇ахзд̇ваа ааг̇ад̇о, гим̣ ну ко’’д̇и сзсаанам̣ мукам̣ ологзси. т̇зро ологанаагаарзнзва н̃ад̇ваа – ‘‘д̇хаммзна самзна лад̣̇д̇хабин̣д̣абаад̇о, ниггуггужжаа г̇ан̣хат̇а бханд̇з’’д̇иаад̣̇ид̇о бадтааяа саб̣б̣зсам̣ яаавад̣̇ад̇т̇ам̣ д̣̇ад̇ваа ад̇д̇анааби яаавад̣̇ад̇т̇ам̣ бхун̃ж̇и.
Tatrimāni vatthūni – leṇagirivāsī tissatthero kira mahāgirigāmaṃ upanissāya vasati. Paññāsa mahātherā nāgadīpaṃ cetiyavandanatthāya gacchantā girigāme piṇḍāya caritvā kiñci aladdhā nikkhamiṃsu. Thero pavisanto te disvā pucchi – ‘‘laddhaṃ, bhante’’ti? Vicarimhā, āvusoti. So aladdhabhāvaṃ ñatvā āha – ‘‘yāvāhaṃ, bhante, āgacchāmi, tāva idheva hothā’’ti. Mayaṃ, āvuso, paññāsa janā pattatemanamattampi na labhimhāti. Nevāsikā nāma, bhante, paṭibalā honti, alabhantāpi bhikkhācāramaggasabhāvaṃ jānantīti. Therā āgamiṃsu. Thero gāmaṃ pāvisi. Dhurageheyeva mahāupāsikā khīrabhattaṃ sajjetvā theraṃ olokayamānā ṭhitā therassa dvāraṃ sampattasseva pattaṃ pūretvā adāsi. So taṃ ādāya therānaṃ santikaṃ gantvā, ‘‘gaṇhatha, bhante’’ti saṅghattheramāha. Thero, ‘‘amhehi ettakehi kiñci na laddhaṃ, ayaṃ sīghameva gahetvā āgato, kiṃ nu kho’’ti sesānaṃ mukhaṃ olokesi. Thero olokanākāreneva ñatvā – ‘‘dhammena samena laddhapiṇḍapāto, nikkukkuccā gaṇhatha bhante’’tiādito paṭṭhāya sabbesaṃ yāvadatthaṃ datvā attanāpi yāvadatthaṃ bhuñji.
ат̇а нам̣ бхад̇д̇агижжаавасаанз т̇зраа бужчим̣су – ‘‘гад̣̇аа, аавусо, логуд̇д̇арад̇хаммам̣ бадивиж̇жхий’’д̇и? над̇т̇и мз, бханд̇з, логуд̇д̇арад̇хаммод̇и. жхааналаабхийси, аавусод̇и? зд̇амби мз, бханд̇з, над̇т̇ийд̇и. нану, аавусо, баадихаарияанд̇и? сааран̣ийяад̇хаммо мз, бханд̇з, буурид̇о, д̇асса мз д̇хаммасса буурид̇агаалад̇о бадтааяа сажзби бхигкусад̇асахассам̣ ход̇и, бад̇д̇аг̇ад̇ам̣ на кийяад̇ийд̇и. саад̇ху саад̇ху, саббуриса, анужчавигамид̣̇ам̣ д̇уяханд̇и. ид̣̇ам̣ д̇аава бад̇д̇аг̇ад̇ам̣ на кийяад̇ийд̇и зд̇т̇а вад̇т̇у.
Atha naṃ bhattakiccāvasāne therā pucchiṃsu – ‘‘kadā, āvuso, lokuttaradhammaṃ paṭivijjhī’’ti? Natthi me, bhante, lokuttaradhammoti. Jhānalābhīsi, āvusoti? Etampi me, bhante, natthīti. Nanu, āvuso, pāṭihāriyanti? Sāraṇīyadhammo me, bhante, pūrito, tassa me dhammassa pūritakālato paṭṭhāya sacepi bhikkhusatasahassaṃ hoti, pattagataṃ na khīyatīti. Sādhu sādhu, sappurisa, anucchavikamidaṃ tuyhanti. Idaṃ tāva pattagataṃ na khīyatīti ettha vatthu.
аяамзва бана т̇зро жзд̇ияабаб̣б̣ад̇з г̇ирибхан̣д̣амахаабууж̇ааяа д̣̇аанадтаанам̣ г̇анд̇ваа, ‘‘имасмим̣ таанз гим̣ варабхан̣д̣а’’нд̇и бужчад̇и. д̣̇вз саадагаа, бханд̇зд̇и. зд̇з маяхам̣ баабун̣иссанд̇ийд̇и. д̇ам̣ суд̇ваа амажжо ран̃н̃о аарожзси – ‘‘зго д̣̇ахаро звам̣ вад̣̇ад̇ий’’д̇и. ‘‘д̣̇ахарассзвам̣ жид̇д̇ам̣, махаат̇зраанам̣ бана сукумасаадагаа вадданд̇ий’’д̇и вад̇ваа, ‘‘махаат̇зраанам̣ д̣̇ассаамий’’д̇и табзси. д̇асса бхигкусан̇гхз бадибаадияаа тид̇з д̣̇знд̇асса мад̇т̇агз табид̇ааби д̇з саадагаа хад̇т̇ам̣ наароханд̇и, ан̃н̃зва аароханд̇и. д̣̇ахарасса д̣̇аанагаалз бана хад̇т̇ам̣ аарул̣хаа. со д̇асса хад̇т̇з табзд̇ваа амажжасса мукам̣ ологзд̇ваа д̣̇ахарам̣ нисийд̣̇аабзд̇ваа д̣̇аанам̣ д̣̇ад̇ваа сан̇гхам̣ виссаж̇ж̇зд̇ваа д̣̇ахарасса санд̇игз нисийд̣̇ид̇ваа, ‘‘гад̣̇аа, бханд̇з, имам̣ д̇хаммам̣ бадивиж̇жхид̇т̇аа’’д̇и ааха. со барияааязнаби асанд̇ам̣ авад̣̇анд̇о, ‘‘над̇т̇и маяхам̣, махаарааж̇а, логуд̇д̇арад̇хаммо’’д̇и ааха. нану, бханд̇з, буб̣б̣зва аважуд̇т̇аад̇и? аама, махаарааж̇а, сааран̣ийяад̇хаммабуураго ахам̣, д̇асса мз д̇хаммасса буурид̇агаалад̇о бадтааяа бхааж̇анийяабхан̣д̣адтаанз аг̇г̇абхан̣д̣ам̣ баабун̣аад̇ийд̇и. саад̇ху саад̇ху, бханд̇з, анужчавигамид̣̇ам̣ д̇умхааганд̇и ванд̣̇ид̇ваа баггаами. ид̣̇ам̣ бхааж̇анийяабхан̣д̣адтаанз аг̇г̇абхан̣д̣ам̣ баабун̣аад̇ийд̇и зд̇т̇а вад̇т̇у.
Ayameva pana thero cetiyapabbate giribhaṇḍamahāpūjāya dānaṭṭhānaṃ gantvā, ‘‘imasmiṃ ṭhāne kiṃ varabhaṇḍa’’nti pucchati. Dve sāṭakā, bhanteti. Ete mayhaṃ pāpuṇissantīti. Taṃ sutvā amacco rañño ārocesi – ‘‘eko daharo evaṃ vadatī’’ti. ‘‘Daharassevaṃ cittaṃ, mahātherānaṃ pana sukhumasāṭakā vaṭṭantī’’ti vatvā, ‘‘mahātherānaṃ dassāmī’’ti ṭhapesi. Tassa bhikkhusaṅghe paṭipāṭiyā ṭhite dentassa matthake ṭhapitāpi te sāṭakā hatthaṃ nārohanti, aññeva ārohanti. Daharassa dānakāle pana hatthaṃ āruḷhā. So tassa hatthe ṭhapetvā amaccassa mukhaṃ oloketvā daharaṃ nisīdāpetvā dānaṃ datvā saṅghaṃ vissajjetvā daharassa santike nisīditvā, ‘‘kadā, bhante, imaṃ dhammaṃ paṭivijjhitthā’’ti āha. So pariyāyenapi asantaṃ avadanto, ‘‘natthi mayhaṃ, mahārāja, lokuttaradhammo’’ti āha. Nanu, bhante, pubbeva avacutthāti? Āma, mahārāja, sāraṇīyadhammapūrako ahaṃ, tassa me dhammassa pūritakālato paṭṭhāya bhājanīyabhaṇḍaṭṭhāne aggabhaṇḍaṃ pāpuṇātīti. Sādhu sādhu, bhante, anucchavikamidaṃ tumhākanti vanditvā pakkāmi. Idaṃ bhājanīyabhaṇḍaṭṭhāne aggabhaṇḍaṃ pāpuṇātīti ettha vatthu.
б̣раахман̣ад̇иссабхаяз бана бхаад̇араг̇аамаваасино нааг̇ад̇т̇зрияаа анаарожзд̇ваава балааяим̣су. т̇зрий бажжуусагаалз, ‘‘ад̇ивияа аббаниг̇гхосо г̇аамо, убад̇хаарзт̇а д̇ааваа’’д̇и д̣̇ахарабхигкунияо ааха. д̇аа г̇анд̇ваа саб̣б̣зсам̣ г̇ад̇абхаавам̣ н̃ад̇ваа ааг̇амма т̇зрияаа аарожзсум̣. саа суд̇ваа, ‘‘маа д̇умхз д̇зсам̣ г̇ад̇абхаавам̣ жинд̇аяид̇т̇а, ад̇д̇ано уд̣̇д̣̇зсабарибужчааяонисоманасигаарзсуязва яог̇ам̣ гарот̇аа’’д̇и вад̇ваа бхигкаажааравзлааяа баарубид̇ваа ад̇д̇ад̣̇ваад̣̇асамаа г̇аамад̣̇ваарз ниг̇род̇харугкамуулз адтааси. ругкз ад̇хивад̇т̇аа д̣̇звад̇аа д̣̇ваад̣̇асаннамби бхигкунийнам̣ бин̣д̣абаад̇ам̣ д̣̇ад̇ваа, ‘‘аяяз, ан̃н̃ад̇т̇а маа г̇ажчат̇а, нижжам̣ ид̇хзва зт̇аа’’д̇и ааха. т̇зрияаа бана ганидтабхаад̇аа нааг̇ад̇т̇зро наама ад̇т̇и. со, ‘‘маханд̇ам̣ бхаяам̣, на саггаа ид̇ха яаабзд̇ум̣, барад̇ийрам̣ г̇амиссаамаад̇и ад̇д̇ад̣̇ваад̣̇асамова ад̇д̇ано васанадтаанаа нигканд̇о т̇зрим̣ д̣̇исваа г̇амиссаамий’’д̇и бхаад̇араг̇аамам̣ ааг̇ад̇о. т̇зрий, ‘‘т̇зраа ааг̇ад̇аа’’д̇и суд̇ваа д̇зсам̣ санд̇игам̣ г̇анд̇ваа, гим̣ аяяаад̇и бужчи. со д̇ам̣ бавад̇д̇им̣ аажигки. саа, ‘‘аж̇ж̇а згад̣̇ивасам̣ вихаарзязва васид̇ваа свзва г̇амиссат̇аа’’д̇и ааха. т̇зраа вихаарам̣ аг̇амам̣су.
Brāhmaṇatissabhaye pana bhātaragāmavāsino nāgattheriyā anārocetvāva palāyiṃsu. Therī paccūsakāle, ‘‘ativiya appanigghoso gāmo, upadhāretha tāvā’’ti daharabhikkhuniyo āha. Tā gantvā sabbesaṃ gatabhāvaṃ ñatvā āgamma theriyā ārocesuṃ. Sā sutvā, ‘‘mā tumhe tesaṃ gatabhāvaṃ cintayittha, attano uddesaparipucchāyonisomanasikāresuyeva yogaṃ karothā’’ti vatvā bhikkhācāravelāya pārupitvā attadvādasamā gāmadvāre nigrodharukkhamūle aṭṭhāsi. Rukkhe adhivatthā devatā dvādasannampi bhikkhunīnaṃ piṇḍapātaṃ datvā, ‘‘ayye, aññattha mā gacchatha, niccaṃ idheva ethā’’ti āha. Theriyā pana kaniṭṭhabhātā nāgatthero nāma atthi. So, ‘‘mahantaṃ bhayaṃ, na sakkā idha yāpetuṃ, paratīraṃ gamissāmāti attadvādasamova attano vasanaṭṭhānā nikkhanto theriṃ disvā gamissāmī’’ti bhātaragāmaṃ āgato. Therī, ‘‘therā āgatā’’ti sutvā tesaṃ santikaṃ gantvā, kiṃ ayyāti pucchi. So taṃ pavattiṃ ācikkhi. Sā, ‘‘ajja ekadivasaṃ vihāreyeva vasitvā sveva gamissathā’’ti āha. Therā vihāraṃ agamaṃsu.
т̇зрий бунад̣̇ивасз ругкамуулз бин̣д̣ааяа жарид̇ваа т̇зрам̣ убасан̇гамид̇ваа, ‘‘имам̣ бин̣д̣абаад̇ам̣ барибхун̃ж̇ат̇аа’’д̇и ааха. т̇зро, ‘‘ваддиссад̇и т̇зрий’’д̇и вад̇ваа д̇ун̣хий адтааси. д̇хаммиго д̇аад̇аа бин̣д̣абаад̇о гуггужжам̣ агад̇ваа барибхун̃ж̇ат̇аад̇и. ваддиссад̇и т̇зрийд̇и. саа бад̇д̇ам̣ г̇ахзд̇ваа аагаасз киби, бад̇д̇о аагаасз адтааси. т̇зро, ‘‘сад̇д̇ад̇ааламад̇д̇з тид̇амби бхигкунийбхад̇д̇амзва, т̇зрийд̇и вад̇ваа бхаяам̣ наама саб̣б̣агаалам̣ на ход̇и, бхаяз вуубасанд̇з арияавам̣сам̣ гат̇аяамаано, ‘бхо бин̣д̣абаад̇ига бхигкунийбхад̇д̇ам̣ бхун̃ж̇ид̇ваа вийд̇инаамаяид̇т̇аа’д̇и жид̇д̇зна анувад̣̇ияамаано сант̇амбхзд̇ум̣ на сагкиссаами, аббамад̇д̇аа хот̇а т̇зрияо’’д̇и маг̇г̇ам̣ аарухи.
Therī punadivase rukkhamūle piṇḍāya caritvā theraṃ upasaṅkamitvā, ‘‘imaṃ piṇḍapātaṃ paribhuñjathā’’ti āha. Thero, ‘‘vaṭṭissati therī’’ti vatvā tuṇhī aṭṭhāsi. Dhammiko tātā piṇḍapāto kukkuccaṃ akatvā paribhuñjathāti. Vaṭṭissati therīti. Sā pattaṃ gahetvā ākāse khipi, patto ākāse aṭṭhāsi. Thero, ‘‘sattatālamatte ṭhitampi bhikkhunībhattameva, therīti vatvā bhayaṃ nāma sabbakālaṃ na hoti, bhaye vūpasante ariyavaṃsaṃ kathayamāno, ‘bho piṇḍapātika bhikkhunībhattaṃ bhuñjitvā vītināmayitthā’ti cittena anuvadiyamāno santhambhetuṃ na sakkhissāmi, appamattā hotha theriyo’’ti maggaṃ āruhi.
ругкад̣̇звад̇ааби, ‘‘сажз т̇зро т̇зрияаа хад̇т̇ад̇о бин̣д̣абаад̇ам̣ барибхун̃ж̇иссад̇и, на нам̣ нивад̇д̇зссаами, сажз бана на барибхун̃ж̇иссад̇и, нивад̇д̇зссаамий’’д̇и жинд̇аяамаанаа тад̇ваа т̇зрасса г̇аманам̣ д̣̇исваа ругкаа оруяха бад̇д̇ам̣, бханд̇з, д̣̇зт̇аад̇и бад̇д̇ам̣ г̇ахзд̇ваа т̇зрам̣ ругкамуулам̣язва аанзд̇ваа аасанам̣ бан̃н̃аабзд̇ваа бин̣д̣абаад̇ам̣ д̣̇ад̇ваа гад̇абхад̇д̇агижжам̣ бадин̃н̃ам̣ гаарзд̇ваа д̣̇ваад̣̇аса бхигкунияо, д̣̇ваад̣̇аса жа бхигкуу сад̇д̇а вассаани убадтахи. ид̣̇ам̣ д̣̇звад̇аа уссуггам̣ аабаж̇ж̇анд̇ийд̇и зд̇т̇а вад̇т̇у, д̇ад̇ра хи т̇зрий сааран̣ийяад̇хаммабууригаа ахоси.
Rukkhadevatāpi, ‘‘sace thero theriyā hatthato piṇḍapātaṃ paribhuñjissati, na naṃ nivattessāmi, sace pana na paribhuñjissati, nivattessāmī’’ti cintayamānā ṭhatvā therassa gamanaṃ disvā rukkhā oruyha pattaṃ, bhante, dethāti pattaṃ gahetvā theraṃ rukkhamūlaṃyeva ānetvā āsanaṃ paññāpetvā piṇḍapātaṃ datvā katabhattakiccaṃ paṭiññaṃ kāretvā dvādasa bhikkhuniyo, dvādasa ca bhikkhū satta vassāni upaṭṭhahi. Idaṃ devatā ussukkaṃ āpajjantīti ettha vatthu, tatra hi therī sāraṇīyadhammapūrikā ahosi.
акан̣д̣аанийд̇иаад̣̇ийсу яасса сад̇д̇асу аабад̇д̇игканд̇хзсу аад̣̇имхи ваа анд̇з ваа сигкаабад̣̇ам̣ бхиннам̣ ход̇и, д̇асса сийлам̣ барияанд̇з чиннасаадаго вияа кан̣д̣ам̣ наама. яасса бана взмаж̇жхз бхиннам̣, д̇асса маж̇жхз чид̣̇д̣̇асаадаго вияа чид̣̇д̣̇ам̣ наама ход̇и. яасса бана бадибаадияаа д̣̇вз д̇ийн̣и бхиннаани, д̇асса бидтияам̣ ваа гужчияам̣ ваа удтид̇зна висабхааг̇аван̣н̣зна гаал̣арад̇д̇аад̣̇ийнам̣ ан̃н̃ад̇араван̣н̣аа г̇аавий вияа саб̣алам̣ наама ход̇и. яасса бана анд̇аранд̇араа бхиннаани, д̇асса анд̇аранд̇араа висабхааг̇аб̣инд̣̇ужид̇раа г̇аавий вияа гаммаасам̣ наама ход̇и. яасса бана саб̣б̣зна саб̣б̣ам̣ абхиннаани, д̇асса д̇аани сийлаани акан̣д̣аани ажчид̣̇д̣̇аани асаб̣алаани агаммаасаани наама хонд̇и. д̇аани банзд̇аани д̇ан̣хаад̣̇аасаб̣яад̇о можзд̇ваа бхуж̇иссабхаавагаран̣ад̇о бхуж̇иссаани. б̣уд̣̇д̇хаад̣̇ийхи вин̃н̃уухи басад̇т̇ад̇д̇аа вин̃н̃уббасад̇т̇аани. д̇ан̣хаад̣̇идтийхи абараамадтад̇д̇аа, ‘‘ид̣̇ам̣ наама д̇вам̣ аабаннабуб̣б̣о’’д̇и гзнажи бараамадтум̣ асаггун̣зяяад̇д̇аа жа абараамадтаани. убажаарасамаад̇хим̣ ваа аббанаасамаад̇хим̣ ваа сам̣вад̇д̇аяанд̇ийд̇и самаад̇хисам̣вад̇д̇анигаанийд̇и вужжанд̇и. сийласааман̃н̃аг̇ад̇о вихарад̇ийд̇и д̇зсу д̇зсу д̣̇исаабхааг̇зсу вихаранд̇зхи бхигкуухи сад̣̇д̇хим̣ самаанабхаавуубаг̇ад̇асийло вихарад̇и . сод̇аабаннаад̣̇ийнан̃хи сийлам̣ самуд̣̇д̣̇анд̇арзби д̣̇звалогзби васанд̇аанам̣ ан̃н̃зсам̣ сод̇аабаннаад̣̇ийнам̣ сийлзна самаанамзва ход̇и, над̇т̇и маг̇г̇асийлз наанад̇д̇ам̣, д̇ам̣ санд̇хааязд̇ам̣ вуд̇д̇ам̣.
Akhaṇḍānītiādīsu yassa sattasu āpattikkhandhesu ādimhi vā ante vā sikkhāpadaṃ bhinnaṃ hoti, tassa sīlaṃ pariyante chinnasāṭako viya khaṇḍaṃ nāma. Yassa pana vemajjhe bhinnaṃ, tassa majjhe chiddasāṭako viya chiddaṃ nāma hoti. Yassa pana paṭipāṭiyā dve tīṇi bhinnāni, tassa piṭṭhiyaṃ vā kucchiyaṃ vā uṭṭhitena visabhāgavaṇṇena kāḷarattādīnaṃ aññataravaṇṇā gāvī viya sabalaṃ nāma hoti. Yassa pana antarantarā bhinnāni, tassa antarantarā visabhāgabinducitrā gāvī viya kammāsaṃ nāma hoti. Yassa pana sabbena sabbaṃ abhinnāni, tassa tāni sīlāni akhaṇḍāni acchiddāni asabalāni akammāsāni nāma honti. Tāni panetāni taṇhādāsabyato mocetvā bhujissabhāvakaraṇato bhujissāni. Buddhādīhi viññūhi pasatthattā viññuppasatthāni. Taṇhādiṭṭhīhi aparāmaṭṭhattā, ‘‘idaṃ nāma tvaṃ āpannapubbo’’ti kenaci parāmaṭṭhuṃ asakkuṇeyyattā ca aparāmaṭṭhāni. Upacārasamādhiṃ vā appanāsamādhiṃ vā saṃvattayantīti samādhisaṃvattanikānīti vuccanti. Sīlasāmaññagatoviharatīti tesu tesu disābhāgesu viharantehi bhikkhūhi saddhiṃ samānabhāvūpagatasīlo viharati . Sotāpannādīnañhi sīlaṃ samuddantarepi devalokepi vasantānaṃ aññesaṃ sotāpannādīnaṃ sīlena samānameva hoti, natthi maggasīle nānattaṃ, taṃ sandhāyetaṃ vuttaṃ.
яааяам̣ д̣̇идтийд̇и маг̇г̇асамбаяуд̇д̇аа саммаад̣̇идти. арияаад̇и нид̣̇д̣̇осаа. нияяаад̇ийд̇и нияяаанигаа. д̇аггарассаад̇и яо д̇ат̇аагаарий ход̇и. д̣̇угкагкаяааяаад̇и саб̣б̣ад̣̇угкагкаяад̇т̇ам̣. д̣̇идтисааман̃н̃аг̇ад̇од̇и самаанад̣̇идтибхаавам̣ убаг̇ад̇о худ̇ваа вихарад̇и. аг̇г̇анд̇и ж̇здтагам̣. саб̣б̣аг̇обаанасияо сан̇г̇ан̣хаад̇ийд̇и сан̇г̇аахигам̣. саб̣б̣аг̇обаанасийнам̣ сан̇гхаадам̣ гарод̇ийд̇и сан̇гхааданигам̣. сан̇гхааданияанд̇и ад̇т̇о. яад̣̇ид̣̇ам̣ гууданд̇и яамзд̇ам̣ гуудааг̇аараган̣н̣игаасан̇каад̇ам̣ гуудам̣ наама. бан̃жабхуумигаад̣̇ибаасаад̣̇аа хи гуудаб̣ад̣̇д̇хаава д̇идтанд̇и. яасмим̣ бад̇ид̇з мад̇д̇игам̣ аад̣̇им̣ гад̇ваа саб̣б̣з бад̇анд̇и. д̇асмаа звамааха. звамзва код̇и яат̇аа гуудам̣ гуудааг̇аарасса, звам̣ имзсамби сааран̣ийяад̇хаммаанам̣ яаа аяам̣ арияаа д̣̇идти, саа аг̇г̇аа жа сан̇г̇аахигаа жа сан̇гхааданияаа жаад̇и д̣̇адтаб̣б̣аа.
Yāyaṃ diṭṭhīti maggasampayuttā sammādiṭṭhi. Ariyāti niddosā. Niyyātīti niyyānikā. Takkarassāti yo tathākārī hoti. Dukkhakkhayāyāti sabbadukkhakkhayatthaṃ. Diṭṭhisāmaññagatoti samānadiṭṭhibhāvaṃ upagato hutvā viharati. Agganti jeṭṭhakaṃ. Sabbagopānasiyo saṅgaṇhātīti saṅgāhikaṃ. Sabbagopānasīnaṃ saṅghāṭaṃ karotīti saṅghāṭanikaṃ. Saṅghāṭaniyanti attho. Yadidaṃ kūṭanti yametaṃ kūṭāgārakaṇṇikāsaṅkhātaṃ kūṭaṃ nāma. Pañcabhūmikādipāsādā hi kūṭabaddhāva tiṭṭhanti. Yasmiṃ patite mattikaṃ ādiṃ katvā sabbe patanti. Tasmā evamāha. Evameva khoti yathā kūṭaṃ kūṭāgārassa, evaṃ imesampi sāraṇīyadhammānaṃ yā ayaṃ ariyā diṭṭhi, sā aggā ca saṅgāhikā ca saṅghāṭaniyā cāti daṭṭhabbā.
493. гат̇ан̃жа, бхигкавз, яааяам̣ д̣̇идтийд̇и зд̇т̇а, бхигкавз, яааяам̣ сод̇аабад̇д̇имаг̇г̇ад̣̇идти арияаа нияяаанигаа нияяаад̇и д̇аггарасса саммаа д̣̇угкагкаяааяаад̇и вуд̇д̇аа, саа гат̇ам̣ гзна гааран̣зна нияяаад̇ийд̇и ад̇т̇о. барияудтид̇ажид̇д̇ова ход̇ийд̇и зд̇д̇аавад̇ааби барияудтид̇ажид̇д̇оязва наама ход̇ийд̇и ад̇т̇о. зса наяо саб̣б̣ад̇т̇а. суббан̣ихид̇ам̣ мз маанасанд̇и маяхам̣ жид̇д̇ам̣ судту табид̇ам̣. сажжаанам̣ б̣од̇хааяаад̇и жад̇уннам̣ сажжаанам̣ б̣од̇хад̇т̇ааяа. арияанд̇иаад̣̇ийсу д̇ам̣ н̃аан̣ам̣ яасмаа арияаанам̣ ход̇и, на бут̇уж̇ж̇анаанам̣, д̇асмаа арияанд̇и вуд̇д̇ам̣. язсам̣ бана логуд̇д̇арад̇хаммоби ад̇т̇и, д̇зсам̣язва ход̇и, на ан̃н̃зсам̣, д̇асмаа логуд̇д̇аранд̇и вуд̇д̇ам̣. бут̇уж̇ж̇анаанам̣ бана абхаавад̇о асаад̇хааран̣ам̣ бут̇уж̇ж̇анзхийд̇и вуд̇д̇ам̣. зса наяо саб̣б̣аваарзсу.
493.Kathañca, bhikkhave, yāyaṃ diṭṭhīti ettha, bhikkhave, yāyaṃ sotāpattimaggadiṭṭhi ariyā niyyānikā niyyāti takkarassa sammā dukkhakkhayāyāti vuttā, sā kathaṃ kena kāraṇena niyyātīti attho. Pariyuṭṭhitacittova hotīti ettāvatāpi pariyuṭṭhitacittoyeva nāma hotīti attho. Esa nayo sabbattha. Suppaṇihitaṃ me mānasanti mayhaṃ cittaṃ suṭṭhu ṭhapitaṃ. Saccānaṃ bodhāyāti catunnaṃ saccānaṃ bodhatthāya. Ariyantiādīsu taṃ ñāṇaṃ yasmā ariyānaṃ hoti, na puthujjanānaṃ, tasmā ariyanti vuttaṃ. Yesaṃ pana lokuttaradhammopi atthi, tesaṃyeva hoti, na aññesaṃ, tasmā lokuttaranti vuttaṃ. Puthujjanānaṃ pana abhāvato asādhāraṇaṃ puthujjanehīti vuttaṃ. Esa nayo sabbavāresu.
494. лабхаами бажжад̇д̇ам̣ самат̇анд̇и ад̇д̇ано жид̇д̇з самат̇ам̣ лабхаамийд̇и ад̇т̇о. ниб̣б̣уд̇ияамби зсзва наяо. зд̇т̇а жа самат̇од̇и згаг̇г̇ад̇аа. ниб̣б̣уд̇ийд̇и гилзсавуубасамо.
494.Labhāmi paccattaṃ samathanti attano citte samathaṃ labhāmīti attho. Nibbutiyampi eseva nayo. Ettha ca samathoti ekaggatā. Nibbutīti kilesavūpasamo.
495. д̇ат̇ааруубааяа д̣̇идтияаад̇и зваруубааяа сод̇аабад̇д̇имаг̇г̇ад̣̇идтияаа.
495.Tathārūpāya diṭṭhiyāti evarūpāya sotāpattimaggadiṭṭhiyā.
496. д̇хаммад̇ааяаад̇и сабхаавзна. д̇хаммад̇аа зсаад̇и сабхааво зса. вудтаанам̣ бан̃н̃ааяад̇ийд̇и сан̇гхагаммавасзна ваа д̣̇зсанааяа ваа вудтаанам̣ д̣̇иссад̇и. арияасааваго хи аабад̇д̇им̣ аабаж̇ж̇анд̇о г̇аругаабад̇д̇ийсу гудигаарасад̣̇исам̣, лахугаабад̇д̇ийсу сахасзяяаад̣̇исад̣̇исам̣ ажид̇д̇агаабад̇д̇им̣язва аабаж̇ж̇ад̇и, д̇амби асан̃жижжа, но сан̃жижжа, аабаннам̣ на бадижчаад̣̇зд̇и. д̇асмаа ат̇а ко нам̣ киббамзваад̇иаад̣̇имааха. д̣̇ахарод̇и д̇арун̣о. гумаарод̇и на махаллаго. манд̣̇од̇и жагкусод̇аад̣̇ийнам̣ манд̣̇ад̇ааяа манд̣̇о. уд̇д̇аанасзяяагод̇и ад̇ид̣̇ахарад̇ааяа уд̇д̇аанасзяяаго, д̣̇агкин̣зна ваа ваамзна ваа бассзна саяид̇ум̣ на саггод̇ийд̇и ад̇т̇о. ан̇г̇аарам̣ аггамид̇ваад̇и ид̇о жид̇о жа басаарид̇зна хад̇т̇зна ваа баад̣̇зна ваа пусид̇ваа. звам̣ пусанд̇аанам̣ бана мануссаанам̣ на сийгхам̣ хад̇т̇о жхааяад̇и, д̇ат̇аа хи згажжз хад̇т̇зна ан̇г̇аарам̣ г̇ахзд̇ваа баривад̇д̇амаанаа д̣̇уурамби г̇ажчанд̇и. д̣̇ахарасса бана хад̇т̇абаад̣̇аа сукумаалаа хонд̇и, со пудтамад̇д̇знзва д̣̇аяхамаано жирийд̇и сад̣̇д̣̇ам̣ гаронд̇о киббам̣ бадисам̣харад̇и, д̇асмаа ид̇ха д̣̇ахарова д̣̇ассид̇о. махаллаго жа д̣̇аяханд̇оби ад̇хиваасзд̇и, аяам̣ бана ад̇хиваасзд̇ум̣ на саггод̇и. д̇асмааби д̣̇ахарова д̣̇ассид̇о. д̣̇зсзд̇ийд̇и аабад̇д̇ибадиг̇г̇аахагз сабхааг̇абуг̇г̇алз сад̇и згам̣ д̣̇ивасам̣ ваа рад̇д̇им̣ ваа анад̇хиваасзд̇ваа рад̇д̇им̣ жад̇уран̇г̇зби д̇амз сабхааг̇абхигкуно васанадтаанам̣ г̇анд̇ваа д̣̇зсзд̇иязва.
496.Dhammatāyāti sabhāvena. Dhammatā esāti sabhāvo esa. Vuṭṭhānaṃ paññāyatīti saṅghakammavasena vā desanāya vā vuṭṭhānaṃ dissati. Ariyasāvako hi āpattiṃ āpajjanto garukāpattīsu kuṭikārasadisaṃ, lahukāpattīsu sahaseyyādisadisaṃ acittakāpattiṃyeva āpajjati, tampi asañcicca, no sañcicca, āpannaṃ na paṭicchādeti. Tasmā atha kho naṃ khippamevātiādimāha. Daharoti taruṇo. Kumāroti na mahallako. Mandoti cakkhusotādīnaṃ mandatāya mando. Uttānaseyyakoti atidaharatāya uttānaseyyako, dakkhiṇena vā vāmena vā passena sayituṃ na sakkotīti attho. Aṅgāraṃ akkamitvāti ito cito ca pasāritena hatthena vā pādena vā phusitvā. Evaṃ phusantānaṃ pana manussānaṃ na sīghaṃ hattho jhāyati, tathā hi ekacce hatthena aṅgāraṃ gahetvā parivattamānā dūrampi gacchanti. Daharassa pana hatthapādā sukhumālā honti, so phuṭṭhamatteneva dayhamāno cirīti saddaṃ karonto khippaṃ paṭisaṃharati, tasmā idha daharova dassito. Mahallako ca dayhantopi adhivāseti, ayaṃ pana adhivāsetuṃ na sakkoti. Tasmāpi daharova dassito. Desetīti āpattipaṭiggāhake sabhāgapuggale sati ekaṃ divasaṃ vā rattiṃ vā anadhivāsetvā rattiṃ caturaṅgepi tame sabhāgabhikkhuno vasanaṭṭhānaṃ gantvā desetiyeva.
497. ужжааважаанийд̇и ужжанийжаани. гим̣ гаран̣ийяаанийд̇и гим̣ гаромийд̇и звам̣ вад̇ваа гад̇д̇аб̣б̣агаммаани. д̇ад̇т̇а ужжагаммам̣ наама жийварасса гаран̣ам̣ раж̇анам̣ жзд̇ияз суд̇хаагаммам̣ убосат̇ааг̇ааражзд̇ияагхараб̣од̇хигхарзсу гад̇д̇аб̣б̣агамманд̇и звамаад̣̇и. аважагаммам̣ наама баад̣̇ад̇хованамагканаад̣̇икуд̣̇д̣̇агагаммам̣, ат̇а ваа жзд̇ияз суд̇хаагаммаад̣̇и ужжагаммам̣ наама. д̇ад̇т̇зва гасаавабажанауд̣̇агаанаяанагужчагаран̣а нияяаасаб̣анд̇ханаад̣̇и аважагаммам̣ наама. уссуггам̣ аабанно ход̇ийд̇и уссуггабхаавам̣ гад̇д̇аб̣б̣ад̇ам̣ бадибанно ход̇и. д̇иб̣б̣аабзгко ход̇ийд̇и б̣ахалабад̇т̇ано ход̇и. т̇амб̣ан̃жа аалумбад̇ийд̇и д̇ин̣ан̃жа аалумбамаанаа каад̣̇ад̇и. важчаган̃жа абажинаад̇ийд̇и важчаган̃жа абалогзд̇и. д̇арун̣аважчаа хи г̇аавий аран̃н̃з згад̇о ааг̇ад̇ам̣ важчагам̣ згасмим̣ таанз нибаннам̣ бахааяа д̣̇уурам̣ на г̇ажчад̇и, важчагасса аасаннадтаанз жарамаанаа д̇ин̣ам̣ аалумбид̇ваа г̇ийвам̣ угкибид̇ваа зганд̇ам̣ важчагамзва жа вилогзд̇и, звамзва сод̇аабанно ужжааважаани гим̣ гаран̣ийяаани гаронд̇о д̇аннинно ход̇и, асит̇илабуураго д̇иб̣б̣ажчанд̣̇о б̣ахалабад̇т̇ано худ̇ваава гарод̇и.
497.Uccāvacānīti uccanīcāni. Kiṃ karaṇīyānīti kiṃ karomīti evaṃ vatvā kattabbakammāni. Tattha uccakammaṃ nāma cīvarassa karaṇaṃ rajanaṃ cetiye sudhākammaṃ uposathāgāracetiyagharabodhigharesu kattabbakammanti evamādi. Avacakammaṃ nāma pādadhovanamakkhanādikhuddakakammaṃ, atha vā cetiye sudhākammādi uccakammaṃ nāma. Tattheva kasāvapacanaudakānayanakucchakaraṇa niyyāsabandhanādi avacakammaṃ nāma. Ussukkaṃ āpanno hotīti ussukkabhāvaṃ kattabbataṃ paṭipanno hoti. Tibbāpekkho hotīti bahalapatthano hoti. Thambañcaālumpatīti tiṇañca ālumpamānā khādati. Vacchakañca apacinātīti vacchakañca apaloketi. Taruṇavacchā hi gāvī araññe ekato āgataṃ vacchakaṃ ekasmiṃ ṭhāne nipannaṃ pahāya dūraṃ na gacchati, vacchakassa āsannaṭṭhāne caramānā tiṇaṃ ālumpitvā gīvaṃ ukkhipitvā ekantaṃ vacchakameva ca viloketi, evameva sotāpanno uccāvacāni kiṃ karaṇīyāni karonto tanninno hoti, asithilapūrako tibbacchando bahalapatthano hutvāva karoti.
д̇ад̇рид̣̇ам̣ вад̇т̇у – махаажзд̇ияз гира суд̇хаагаммз гарияамаанз зго арияасааваго згзна хад̇т̇зна суд̇хаабхааж̇анам̣, згзна гужчам̣ г̇ахзд̇ваа суд̇хаагаммам̣ гариссаамийд̇и жзд̇ияан̇г̇ан̣ам̣ аарул̣хо. зго гааяад̣̇ал̣хиб̣ахуло бхигку г̇анд̇ваа т̇зрасса санд̇игз адтааси. т̇зро ан̃н̃асмим̣ сад̇и бабан̃жо ход̇ийд̇и д̇асмаа таанаа ан̃н̃ам̣ таанам̣ г̇ад̇о. соби бхигку д̇ад̇т̇зва аг̇амааси. т̇зро буна ан̃н̃ам̣ таананд̇и звам̣ гад̇ибаяадтаанз ааг̇ад̇ам̣, – ‘‘саббуриса маханд̇ам̣ жзд̇ияан̇г̇ан̣ам̣ гим̣ ан̃н̃асмим̣ таанз огаасам̣ на лабхат̇аа’’д̇и ааха. на ид̇аро баггаамийд̇и.
Tatridaṃ vatthu – mahācetiye kira sudhākamme kariyamāne eko ariyasāvako ekena hatthena sudhābhājanaṃ, ekena kucchaṃ gahetvā sudhākammaṃ karissāmīti cetiyaṅgaṇaṃ āruḷho. Eko kāyadaḷhibahulo bhikkhu gantvā therassa santike aṭṭhāsi. Thero aññasmiṃ sati papañco hotīti tasmā ṭhānā aññaṃ ṭhānaṃ gato. Sopi bhikkhu tattheva agamāsi. Thero puna aññaṃ ṭhānanti evaṃ katipayaṭṭhāne āgataṃ, – ‘‘sappurisa mahantaṃ cetiyaṅgaṇaṃ kiṃ aññasmiṃ ṭhāne okāsaṃ na labhathā’’ti āha. Na itaro pakkāmīti.
498. б̣алад̇ааяа саманнааг̇ад̇од̇и б̣алзна саманнааг̇ад̇о. адтим̣ гад̇ваад̇и ад̇т̇игабхаавам̣ гад̇ваа, ад̇т̇иго худ̇ваад̇и ад̇т̇о. манасигад̇ваад̇и манасмим̣ гарид̇ваа. саб̣б̣ажзд̇асаа саманнаахарид̇ваад̇и аббамад̇д̇агамби вигкзбам̣ агаронд̇о сагалажид̇д̇зна саманнаахарид̇ваа. охид̇асод̇од̇и табид̇асод̇о. арияасаавагаа хи бияад̇хаммассаванаа хонд̇и, д̇хаммассаванаг̇г̇ам̣ г̇анд̇ваа нид̣̇д̣̇ааяамаанаа ваа язна гзнажи сад̣̇д̇хим̣ саллабамаанаа ваа вигкид̇д̇ажид̇д̇аа ваа на нисийд̣̇анд̇и, ат̇а ко амад̇ам̣ барибхун̃ж̇анд̇аа вияа ад̇ид̇д̇аава хонд̇и д̇хаммассаванз, ат̇а арун̣ам̣ уг̇г̇ажчад̇и. д̇асмаа звамааха.
498.Balatāya samannāgatoti balena samannāgato. Aṭṭhiṃ katvāti atthikabhāvaṃ katvā, atthiko hutvāti attho. Manasikatvāti manasmiṃ karitvā. Sabbacetasā samannāharitvāti appamattakampi vikkhepaṃ akaronto sakalacittena samannāharitvā. Ohitasototi ṭhapitasoto. Ariyasāvakā hi piyadhammassavanā honti, dhammassavanaggaṃ gantvā niddāyamānā vā yena kenaci saddhiṃ sallapamānā vā vikkhittacittā vā na nisīdanti, atha kho amataṃ paribhuñjantā viya atittāva honti dhammassavane, atha aruṇaṃ uggacchati. Tasmā evamāha.
500. д̇хаммад̇аа сусаманнидтаа ход̇ийд̇и сабхааво судту саманнзсид̇о ход̇и. сод̇аабад̇д̇ипаласажчигирияааяаад̇и гаран̣аважанам̣ , сод̇аабад̇д̇ипаласажчигад̇ан̃аан̣знаад̇и ад̇т̇о. звам̣ сад̇д̇ан̇г̇асаманнааг̇ад̇од̇и звам̣ имзхи сад̇д̇ахи махаабажжавзгкан̣ан̃аан̣зхи саманнааг̇ад̇о. аяам̣ д̇аава аажарияаанам̣ самаанагат̇аа. логуд̇д̇арамаг̇г̇о хи б̣ахужид̇д̇агкан̣иго наама над̇т̇и.
500.Dhammatāsusamanniṭṭhā hotīti sabhāvo suṭṭhu samannesito hoti. Sotāpattiphalasacchikiriyāyāti karaṇavacanaṃ , sotāpattiphalasacchikatañāṇenāti attho. Evaṃ sattaṅgasamannāgatoti evaṃ imehi sattahi mahāpaccavekkhaṇañāṇehi samannāgato. Ayaṃ tāva ācariyānaṃ samānakathā. Lokuttaramaggo hi bahucittakkhaṇiko nāma natthi.
вид̇ан̣д̣аваад̣̇ий бана згажид̇д̇агкан̣иго наама маг̇г̇о над̇т̇и, ‘‘звам̣ бхаавзяяа сад̇д̇а вассааний’’д̇и хи важанад̇о сад̇д̇аби вассаани маг̇г̇абхааванаа хонд̇и. гилзсаа бана лаху чиж̇ж̇анд̇аа сад̇д̇ахи н̃аан̣зхи чиж̇ж̇анд̇ийд̇и вад̣̇ад̇и. со суд̇д̇ам̣ аахараад̇и вад̇д̇аб̣б̣о, ад̣̇д̇хаа ан̃н̃ам̣ суд̇д̇ам̣ абассанд̇о, ‘‘ид̣̇амасса батамам̣ н̃аан̣ам̣ ад̇хиг̇ад̇ам̣ ход̇и, ид̣̇амасса д̣̇уд̇ияам̣ н̃аан̣ам̣…бз… ид̣̇амасса сад̇д̇амам̣ н̃аан̣ам̣ ад̇хиг̇ад̇ам̣ ход̇ий’’д̇и имамзва аахарид̇ваа д̣̇ассзссад̇и. д̇ад̇о вад̇д̇аб̣б̣о гим̣ банид̣̇ам̣ суд̇д̇ам̣ нзяяад̇т̇ам̣ нийд̇ад̇т̇анд̇и. д̇ад̇о вагкад̇и – ‘‘нийд̇ад̇т̇ад̇т̇ам̣, яат̇аасуд̇д̇ам̣ д̇ат̇зва ад̇т̇о’’д̇и. со вад̇д̇аб̣б̣о – ‘‘д̇хаммад̇аа сусаманнидтаа ход̇и сод̇аабад̇д̇ипаласажчигирияааяаад̇и зд̇т̇а го ад̇т̇о’’д̇и? ад̣̇д̇хаа сод̇аабад̇д̇ипаласажчигирияааяад̇т̇од̇и вагкад̇и. д̇ад̇о бужчид̇аб̣б̣о, ‘‘маг̇г̇асаман̇г̇ий палам̣ сажчигарод̇и, паласаман̇г̇ий’’д̇и. ж̇аананд̇о, ‘‘паласаман̇г̇ий сажчигарод̇ий’’д̇и вагкад̇и. д̇ад̇о вад̇д̇аб̣б̣о, – ‘‘звам̣ сад̇д̇ан̇г̇асаманнааг̇ад̇о ко, бхигкавз, арияасааваго сод̇аабад̇д̇ипаласаманнааг̇ад̇о ход̇ийд̇и ид̇ха маг̇г̇ам̣ абхаавзд̇ваа ман̣д̣ууго вияа уббад̇ид̇ваа арияасааваго паламзва г̇ан̣хиссад̇и. маа суд̇д̇ам̣ мз лад̣̇д̇ханд̇и яам̣ ваа д̇ам̣ ваа аважа. бан̃хам̣ виссаж̇ж̇знд̇зна наама аажарияасанд̇игз васид̇ваа б̣уд̣̇д̇хаважанам̣ уг̇г̇ан̣хид̇ваа ад̇т̇арасам̣ вид̣̇ид̇ваа вад̇д̇аб̣б̣ам̣ ход̇ий’’д̇и. ‘‘имаани сад̇д̇а н̃аан̣аани арияасаавагасса бажжавзгкан̣ан̃аан̣аанзва, логуд̇д̇арамаг̇г̇о б̣ахужид̇д̇агкан̣иго наама над̇т̇и, згажид̇д̇агкан̣игоязваа’’д̇и сан̃н̃аабзд̇аб̣б̣о. сажз сан̃ж̇аанаад̇и сан̃ж̇аанаад̇у. но жз сан̃ж̇аанаад̇и, ‘‘г̇ажча баад̇ова вихаарам̣ бависид̇ваа яааг̇ум̣ биваахий’’д̇и уяяож̇зд̇аб̣б̣о. сзсам̣ саб̣б̣ад̇т̇а уд̇д̇аанамзваад̇и.
Vitaṇḍavādī pana ekacittakkhaṇiko nāma maggo natthi, ‘‘evaṃ bhāveyya satta vassānī’’ti hi vacanato sattapi vassāni maggabhāvanā honti. Kilesā pana lahu chijjantā sattahi ñāṇehi chijjantīti vadati. So suttaṃ āharāti vattabbo, addhā aññaṃ suttaṃ apassanto, ‘‘idamassa paṭhamaṃ ñāṇaṃ adhigataṃ hoti, idamassa dutiyaṃ ñāṇaṃ…pe… idamassa sattamaṃ ñāṇaṃ adhigataṃ hotī’’ti imameva āharitvā dassessati. Tato vattabbo kiṃ panidaṃ suttaṃ neyyatthaṃ nītatthanti. Tato vakkhati – ‘‘nītatthatthaṃ, yathāsuttaṃ tatheva attho’’ti. So vattabbo – ‘‘dhammatā susamanniṭṭhā hoti sotāpattiphalasacchikiriyāyāti ettha ko attho’’ti? Addhā sotāpattiphalasacchikiriyāyatthoti vakkhati. Tato pucchitabbo, ‘‘maggasamaṅgī phalaṃ sacchikaroti, phalasamaṅgī’’ti. Jānanto, ‘‘phalasamaṅgī sacchikarotī’’ti vakkhati. Tato vattabbo, – ‘‘evaṃ sattaṅgasamannāgato kho, bhikkhave, ariyasāvako sotāpattiphalasamannāgato hotīti idha maggaṃ abhāvetvā maṇḍūko viya uppatitvā ariyasāvako phalameva gaṇhissati. Mā suttaṃ me laddhanti yaṃ vā taṃ vā avaca. Pañhaṃ vissajjentena nāma ācariyasantike vasitvā buddhavacanaṃ uggaṇhitvā attharasaṃ viditvā vattabbaṃ hotī’’ti. ‘‘Imāni satta ñāṇāni ariyasāvakassa paccavekkhaṇañāṇāneva, lokuttaramaggo bahucittakkhaṇiko nāma natthi, ekacittakkhaṇikoyevā’’ti saññāpetabbo. Sace sañjānāti sañjānātu. No ce sañjānāti, ‘‘gaccha pātova vihāraṃ pavisitvā yāguṃ pivāhī’’ti uyyojetabbo. Sesaṃ sabbattha uttānamevāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
госамб̣ияасуд̇д̇аван̣н̣анаа нидтид̇аа.
Kosambiyasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 8. госамб̣ияасуд̇д̇ам̣ • 8. Kosambiyasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 8. госамб̣ияасуд̇д̇аван̣н̣анаа • 8. Kosambiyasuttavaṇṇanā
