| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
2. ஏளகலோமவக்³கோ³
2. Eḷakalomavaggo
1. கோஸியஸிக்கா²பத³வண்ணனா
1. Kosiyasikkhāpadavaṇṇanā
கோஸியமிஸ்ஸகந்தி ‘‘கோஸகாரகா’’தி லத்³த⁴வோஹாரானங் பாணகானங் கோஸதோ நிப்³ப³த்தங் அங்ஸு கோஸியங், தேன மிஸ்ஸங் கோஸியமிஸ்ஸகங். தேன பன கோஸியேன அப்பகேனாபி மிஸ்ஸிதங் கோஸியமிஸ்ஸகமேவ, ந இத³ங் அப்³போ³ஹாரிகந்தி வத்துங் லப்³பா⁴. தேனாஹ ‘‘ஏகேனாபீ’’திஆதி³. கோஸியங்ஸுனாதி கிமிகோஸஸம்ப⁴வேன அங்ஸுனா. ‘‘அந்தமஸோ’’திஆதி³கங் பன இமஸ்ஸ ஸிக்கா²பத³ஸ்ஸ அசித்தகத்தா வுத்தங். ஸந்த²தங் நாம ஸந்த²ரித்வா கதங் அவாயிமங். தேனாஹ ‘‘ஸமே பூ⁴மிபா⁴கே³’’திஆதி³. இமஸ்ஸேவ வசனஸ்ஸ அனுஸாரேனாதி இமஸ்ஸேவ பட²மஸந்த²தஸ்ஸ நிஸ்ஸஜ்ஜனவிதா⁴னவசனானுஸாரேன. ஸப்³ப³ஸந்த²தந்தி ஸப்³ப³ஸந்த²தனிஸ்ஸஜ்ஜனவிதா⁴னங்.
Kosiyamissakanti ‘‘kosakārakā’’ti laddhavohārānaṃ pāṇakānaṃ kosato nibbattaṃ aṃsu kosiyaṃ, tena missaṃ kosiyamissakaṃ. Tena pana kosiyena appakenāpi missitaṃ kosiyamissakameva, na idaṃ abbohārikanti vattuṃ labbhā. Tenāha ‘‘ekenāpī’’tiādi. Kosiyaṃsunāti kimikosasambhavena aṃsunā. ‘‘Antamaso’’tiādikaṃ pana imassa sikkhāpadassa acittakattā vuttaṃ. Santhataṃ nāma santharitvā kataṃ avāyimaṃ. Tenāha ‘‘same bhūmibhāge’’tiādi. Imasseva vacanassa anusārenāti imasseva paṭhamasanthatassa nissajjanavidhānavacanānusārena. Sabbasanthatanti sabbasanthatanissajjanavidhānaṃ.
அஞ்ஞஸ்ஸத்தா²ய காராபனே து³க்கடத்தா அத்தனோ அத்தா²ய காராபனவஸேன ‘‘ஸாணத்திக’’ந்தி வுத்தங். அத்தனா விப்பகதபரியோஸாபனநயேனாதி ‘‘அத்தனா விப்பகதங் அத்தனா பரியோஸாபேதி, நிஸ்ஸக்³கி³யங் பாசித்தியங். அத்தனா விப்பகதங் பரேஹி பரியோஸாபேதி, நிஸ்ஸக்³கி³யங் பாசித்தியங். பரேஹி விப்பகதங் அத்தனா பரியோஸாபேதி, நிஸ்ஸக்³கி³யங் பாசித்தியங். பரேஹி விப்பகதங் பரேஹி பரியோஸாபேதி, நிஸ்ஸக்³கி³யங் பாசித்திய’’ந்தி (பாரா॰ 545) இமினா நயேன. விதானாதி³கரணேதி விதானபூ⁴மத்த²ரணஸாணிபாகாரபி⁴ஸிபி³ப்³போ³ஹனகரணே. யதா² ச விதானாதி³கரணே, ஏவங் தேனாகாரேன பரிபோ⁴கே³பி அனாபத்தி. ‘‘அவாயிம’’ந்தி (பாரா॰ 544) வுத்தத்தா வாயித்வா கரொந்தஸ்ஸாபி அனாபத்தி.
Aññassatthāya kārāpane dukkaṭattā attano atthāya kārāpanavasena ‘‘sāṇattika’’nti vuttaṃ. Attanā vippakatapariyosāpananayenāti ‘‘attanā vippakataṃ attanā pariyosāpeti, nissaggiyaṃ pācittiyaṃ. Attanā vippakataṃ parehi pariyosāpeti, nissaggiyaṃ pācittiyaṃ. Parehi vippakataṃ attanā pariyosāpeti, nissaggiyaṃ pācittiyaṃ. Parehi vippakataṃ parehi pariyosāpeti, nissaggiyaṃ pācittiya’’nti (pārā. 545) iminā nayena. Vitānādikaraṇeti vitānabhūmattharaṇasāṇipākārabhisibibbohanakaraṇe. Yathā ca vitānādikaraṇe, evaṃ tenākārena paribhogepi anāpatti. ‘‘Avāyima’’nti (pārā. 544) vuttattā vāyitvā karontassāpi anāpatti.
கோஸியஸிக்கா²பத³வண்ணனா நிட்டி²தா.
Kosiyasikkhāpadavaṇṇanā niṭṭhitā.
