| Library / Tipiṭaka / ತಿಪಿಟಕ • Tipiṭaka / ಥೇರಗಾಥಾಪಾಳಿ • Theragāthāpāḷi |
೧೨. ಕೋಸಿಯತ್ಥೇರಗಾಥಾ
12. Kosiyattheragāthā
೩೭೦.
370.
‘‘ಯೋ ವೇ ಗರೂನಂ ವಚನಞ್ಞು ಧೀರೋ, ವಸೇ ಚ ತಮ್ಹಿ ಜನಯೇಥ ಪೇಮಂ।
‘‘Yo ve garūnaṃ vacanaññu dhīro, vase ca tamhi janayetha pemaṃ;
ಸೋ ಭತ್ತಿಮಾ ನಾಮ ಚ ಹೋತಿ ಪಣ್ಡಿತೋ, ಞತ್ವಾ ಚ ಧಮ್ಮೇಸು ವಿಸೇಸಿ ಅಸ್ಸ॥
So bhattimā nāma ca hoti paṇḍito, ñatvā ca dhammesu visesi assa.
೩೭೧.
371.
‘‘ಯಂ ಆಪದಾ ಉಪ್ಪತಿತಾ ಉಳಾರಾ, ನಕ್ಖಮ್ಭಯನ್ತೇ ಪಟಿಸಙ್ಖಯನ್ತಂ।
‘‘Yaṃ āpadā uppatitā uḷārā, nakkhambhayante paṭisaṅkhayantaṃ;
ಸೋ ಥಾಮವಾ ನಾಮ ಚ ಹೋತಿ ಪಣ್ಡಿತೋ, ಞತ್ವಾ ಚ ಧಮ್ಮೇಸು ವಿಸೇಸಿ ಅಸ್ಸ॥
So thāmavā nāma ca hoti paṇḍito, ñatvā ca dhammesu visesi assa.
೩೭೨.
372.
‘‘ಯೋ ವೇ ಸಮುದ್ದೋವ ಠಿತೋ ಅನೇಜೋ, ಗಮ್ಭೀರಪಞ್ಞೋ ನಿಪುಣತ್ಥದಸ್ಸೀ।
‘‘Yo ve samuddova ṭhito anejo, gambhīrapañño nipuṇatthadassī;
ಅಸಂಹಾರಿಯೋ ನಾಮ ಚ ಹೋತಿ ಪಣ್ಡಿತೋ, ಞತ್ವಾ ಚ ಧಮ್ಮೇಸು ವಿಸೇಸಿ ಅಸ್ಸ॥
Asaṃhāriyo nāma ca hoti paṇḍito, ñatvā ca dhammesu visesi assa.
೩೭೩.
373.
‘‘ಬಹುಸ್ಸುತೋ ಧಮ್ಮಧರೋ ಚ ಹೋತಿ, ಧಮ್ಮಸ್ಸ ಹೋತಿ ಅನುಧಮ್ಮಚಾರೀ।
‘‘Bahussuto dhammadharo ca hoti, dhammassa hoti anudhammacārī;
ಸೋ ತಾದಿಸೋ ನಾಮ ಚ ಹೋತಿ ಪಣ್ಡಿತೋ, ಞತ್ವಾ ಚ ಧಮ್ಮೇಸು ವಿಸೇಸಿ ಅಸ್ಸ॥
So tādiso nāma ca hoti paṇḍito, ñatvā ca dhammesu visesi assa.
೩೭೪.
374.
‘‘ಅತ್ಥಞ್ಚ ಯೋ ಜಾನಾತಿ ಭಾಸಿತಸ್ಸ, ಅತ್ಥಞ್ಚ ಞತ್ವಾನ ತಥಾ ಕರೋತಿ।
‘‘Atthañca yo jānāti bhāsitassa, atthañca ñatvāna tathā karoti;
ಅತ್ಥನ್ತರೋ ನಾಮ ಸ ಹೋತಿ ಪಣ್ಡಿತೋ, ಞತ್ವಾ ಚ ಧಮ್ಮೇಸು ವಿಸೇಸಿ ಅಸ್ಸಾ’’ತಿ॥
Atthantaro nāma sa hoti paṇḍito, ñatvā ca dhammesu visesi assā’’ti.
… ಕೋಸಿಯೋ ಥೇರೋ…।
… Kosiyo thero….
ಪಞ್ಚಕನಿಪಾತೋ ನಿಟ್ಠಿತೋ।
Pañcakanipāto niṭṭhito.
ತತ್ರುದ್ದಾನಂ –
Tatruddānaṃ –
ರಾಜದತ್ತೋ ಸುಭೂತೋ ಚ, ಗಿರಿಮಾನನ್ದಸುಮನಾ।
Rājadatto subhūto ca, girimānandasumanā;
ವಡ್ಢೋ ಚ ಕಸ್ಸಪೋ ಥೇರೋ, ಗಯಾಕಸ್ಸಪವಕ್ಕಲೀ॥
Vaḍḍho ca kassapo thero, gayākassapavakkalī.
ವಿಜಿತೋ ಯಸದತ್ತೋ ಚ, ಸೋಣೋ ಕೋಸಿಯಸವ್ಹಯೋ।
Vijito yasadatto ca, soṇo kosiyasavhayo;
ಸಟ್ಠಿ ಚ ಪಞ್ಚ ಗಾಥಾಯೋ, ಥೇರಾ ಚ ಏತ್ಥ ದ್ವಾದಸಾತಿ॥
Saṭṭhi ca pañca gāthāyo, therā ca ettha dvādasāti.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಥೇರಗಾಥಾ-ಅಟ್ಠಕಥಾ • Theragāthā-aṭṭhakathā / ೧೨. ಕೋಸಿಯತ್ಥೇರಗಾಥಾವಣ್ಣನಾ • 12. Kosiyattheragāthāvaṇṇanā
