| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
2. கோஸியவக்³கோ³
2. Kosiyavaggo
34. கோஸியமிஸ்ஸகங் ஸந்த²தங் காராபெந்தஸ்ஸ நிஸ்ஸக்³கி³யங் பாசித்தியங் கத்த² பஞ்ஞத்தந்தி? ஆளவியங் பஞ்ஞத்தங். கங் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ச²ப்³ப³க்³கி³யா பி⁴க்கூ² கோஸியகாரகே உபஸங்கமித்வா ஏவமாஹங்ஸு ‘‘ப³ஹூ, ஆவுஸோ, கோஸகாரகே பசத². அம்ஹாகம்பி த³ஸ்ஸத². மயம்பி இச்சா²ம கோஸியமிஸ்ஸகங் ஸந்த²தங் காது’’ந்தி, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
34. Kosiyamissakaṃ santhataṃ kārāpentassa nissaggiyaṃ pācittiyaṃ kattha paññattanti? Āḷaviyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū kosiyakārake upasaṅkamitvā evamāhaṃsu ‘‘bahū, āvuso, kosakārake pacatha. Amhākampi dassatha. Mayampi icchāma kosiyamissakaṃ santhataṃ kātu’’nti, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
35. ஸுத்³த⁴காளகானங் ஏளகலோமானங் ஸந்த²தங் காராபெந்தஸ்ஸ நிஸ்ஸக்³கி³யங் பாசித்தியங் கத்த² பஞ்ஞத்தந்தி? வேஸாலியங் பஞ்ஞத்தங். கங் ஆரப்³பா⁴தி ? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ச²ப்³ப³க்³கி³யா பி⁴க்கூ² ஸுத்³த⁴காளகானங் ஏளகலோமானங் ஸந்த²தங் காராபேஸுங், தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
35. Suddhakāḷakānaṃ eḷakalomānaṃ santhataṃ kārāpentassa nissaggiyaṃ pācittiyaṃ kattha paññattanti? Vesāliyaṃ paññattaṃ. Kaṃ ārabbhāti ? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū suddhakāḷakānaṃ eḷakalomānaṃ santhataṃ kārāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
36. அனாதி³யித்வா துலங் ஓதா³தானங் துலங் கோ³சரியானங் நவங் ஸந்த²தங் காராபெந்தஸ்ஸ நிஸ்ஸக்³கி³யங் பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ச²ப்³ப³க்³கி³யா பி⁴க்கூ² தோ²கஞ்ஞேவ ஓதா³தங் அந்தே 1 ஆதி³யித்வா ததே²வ ஸுத்³த⁴காளகானங் ஏளகலோமானங் ஸந்த²தங் காராபேஸுங், தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
36. Anādiyitvā tulaṃ odātānaṃ tulaṃ gocariyānaṃ navaṃ santhataṃ kārāpentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū thokaññeva odātaṃ ante 2 ādiyitvā tatheva suddhakāḷakānaṃ eḷakalomānaṃ santhataṃ kārāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
37. அனுவஸ்ஸங் ஸந்த²தங் காராபெந்தஸ்ஸ நிஸ்ஸக்³கி³யங் பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? ஸம்ப³ஹுலே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ஸம்ப³ஹுலா பி⁴க்கூ² அனுவஸ்ஸங் ஸந்த²தங் காராபேஸுங், தஸ்மிங் வத்து²ஸ்மிங் . ஏகா பஞ்ஞத்தி, ஏகா அனுபஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
37. Anuvassaṃ santhataṃ kārāpentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū anuvassaṃ santhataṃ kārāpesuṃ, tasmiṃ vatthusmiṃ . Ekā paññatti, ekā anupaññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
38. அனாதி³யித்வா புராணஸந்த²தஸ்ஸ ஸாமந்தா ஸுக³தவித³த்தி²ங் நவங் நிஸீத³னஸந்த²தங் காராபெந்தஸ்ஸ நிஸ்ஸக்³கி³யங் பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? ஸம்ப³ஹுலே பி⁴க்கூ² ஆரப்³ப⁴ . கிஸ்மிங் வத்து²ஸ்மிந்தி? ஸம்ப³ஹுலா பி⁴க்கூ² ஸந்த²தானி உஜ்ஜி²த்வா ஆரஞ்ஞிகங்க³ங் பிண்ட³பாதிகங்க³ங் பங்ஸுகூலிகங்க³ங் ஸமாதி³யிங்ஸு, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
38. Anādiyitvā purāṇasanthatassa sāmantā sugatavidatthiṃ navaṃ nisīdanasanthataṃ kārāpentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha . Kismiṃ vatthusminti? Sambahulā bhikkhū santhatāni ujjhitvā āraññikaṅgaṃ piṇḍapātikaṅgaṃ paṃsukūlikaṅgaṃ samādiyiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
39. ஏளகலோமானி படிக்³க³ஹெத்வா தியோஜனங் அதிக்காமெந்தஸ்ஸ நிஸ்ஸக்³கி³யங் பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? அஞ்ஞதரங் பி⁴க்கு²ங் ஆரப்³ப⁴. கிஸ்மிங் வத்து²ஸ்மிந்தி? அஞ்ஞதரோ பி⁴க்கு² ஏளகலோமானி படிக்³க³ஹெத்வா தியோஜனங் அதிக்காமேஸி, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் த்³வீஹி ஸமுட்டா²னேஹி ஸமுட்டா²தி – ஸியா காயதோ ஸமுட்டா²தி, ந வாசதோ ந சித்ததோ; ஸியா காயதோ ச சித்ததோ ச ஸமுட்டா²தி, ந வாசதோ…பே॰….
39. Eḷakalomāni paṭiggahetvā tiyojanaṃ atikkāmentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Aññataraṃ bhikkhuṃ ārabbha. Kismiṃ vatthusminti? Aññataro bhikkhu eḷakalomāni paṭiggahetvā tiyojanaṃ atikkāmesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca cittato ca samuṭṭhāti, na vācato…pe….
40. அஞ்ஞாதிகாய பி⁴க்கு²னியா ஏளகலோமானி தோ⁴வாபெந்தஸ்ஸ நிஸ்ஸக்³கி³யங் பாசித்தியங் கத்த² பஞ்ஞத்தந்தி? ஸக்கேஸு பஞ்ஞத்தங். கங் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ச²ப்³ப³க்³கி³யா பி⁴க்கூ² அஞ்ஞாதிகாஹி பி⁴க்கு²னீஹி ஏளகலோமானி தோ⁴வாபேஸுங், தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
40. Aññātikāya bhikkhuniyā eḷakalomāni dhovāpentassa nissaggiyaṃ pācittiyaṃ kattha paññattanti? Sakkesu paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū aññātikāhi bhikkhunīhi eḷakalomāni dhovāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
41. ரூபியங் படிக்³க³ண்ஹந்தஸ்ஸ நிஸ்ஸக்³கி³யங் பாசித்தியங் கத்த² பஞ்ஞத்தந்தி? ராஜக³ஹே பஞ்ஞத்தங் . கங் ஆரப்³பா⁴தி? ஆயஸ்மந்தங் உபனந்த³ங் ஸக்யபுத்தங் ஆரப்³ப⁴. கிஸ்மிங் வத்து²ஸ்மிந்தி? ஆயஸ்மா உபனந்தோ³ ஸக்யபுத்தோ ரூபியங் படிக்³க³ஹேஸி, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
41. Rūpiyaṃ paṭiggaṇhantassa nissaggiyaṃ pācittiyaṃ kattha paññattanti? Rājagahe paññattaṃ . Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto rūpiyaṃ paṭiggahesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
42. நானப்பகாரகங் ரூபியஸங்வோஹாரங் ஸமாபஜ்ஜந்தஸ்ஸ நிஸ்ஸக்³கி³யங் பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ச²ப்³ப³க்³கி³யா பி⁴க்கூ² நானப்பகாரகங் ரூபியஸங்வோஹாரங் ஸமாபஜ்ஜிங்ஸு, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
42. Nānappakārakaṃ rūpiyasaṃvohāraṃ samāpajjantassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū nānappakārakaṃ rūpiyasaṃvohāraṃ samāpajjiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
43. நானப்பகாரகங் கயவிக்கயங் ஸமாபஜ்ஜந்தஸ்ஸ நிஸ்ஸக்³கி³யங் பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? ஆயஸ்மந்தங் உபனந்த³ங் ஸக்யபுத்தங் ஆரப்³ப⁴. கிஸ்மிங் வத்து²ஸ்மிந்தி? ஆயஸ்மா உபனந்தோ³ ஸக்யபுத்தோ பரிப்³பா³ஜகேன ஸத்³தி⁴ங் கயவிக்கயங் ஸமாபஜ்ஜி, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
43. Nānappakārakaṃ kayavikkayaṃ samāpajjantassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto paribbājakena saddhiṃ kayavikkayaṃ samāpajji, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
கோஸியவக்³கோ³ து³தியோ.
Kosiyavaggo dutiyo.
Footnotes:
