| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
2. කොසියවග්‌ගො
2. Kosiyavaggo
34. කොසියමිස්‌සකං සන්‌ථතං කාරාපෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? ආළවියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ කොසියකාරකෙ උපසඞ්‌කමිත්‌වා එවමාහංසු ‘‘බහූ, ආවුසො, කොසකාරකෙ පචථ. අම්‌හාකම්‌පි දස්‌සථ. මයම්‌පි ඉච්‌ඡාම කොසියමිස්‌සකං සන්‌ථතං කාතු’’න්‌ති, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
34. Kosiyamissakaṃ santhataṃ kārāpentassa nissaggiyaṃ pācittiyaṃ kattha paññattanti? Āḷaviyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū kosiyakārake upasaṅkamitvā evamāhaṃsu ‘‘bahū, āvuso, kosakārake pacatha. Amhākampi dassatha. Mayampi icchāma kosiyamissakaṃ santhataṃ kātu’’nti, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
35. සුද්‌ධකාළකානං එළකලොමානං සන්‌ථතං කාරාපෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? වෙසාලියං පඤ්‌ඤත්‌තං. කං ආරබ්‌භාති ? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ සුද්‌ධකාළකානං එළකලොමානං සන්‌ථතං කාරාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
35. Suddhakāḷakānaṃ eḷakalomānaṃ santhataṃ kārāpentassa nissaggiyaṃ pācittiyaṃ kattha paññattanti? Vesāliyaṃ paññattaṃ. Kaṃ ārabbhāti ? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū suddhakāḷakānaṃ eḷakalomānaṃ santhataṃ kārāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
36. අනාදියිත්‌වා තුලං ඔදාතානං තුලං ගොචරියානං නවං සන්‌ථතං කාරාපෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ ථොකඤ්‌ඤෙව ඔදාතං අන්‌තෙ 1 ආදියිත්‌වා තථෙව සුද්‌ධකාළකානං එළකලොමානං සන්‌ථතං කාරාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
36. Anādiyitvā tulaṃ odātānaṃ tulaṃ gocariyānaṃ navaṃ santhataṃ kārāpentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū thokaññeva odātaṃ ante 2 ādiyitvā tatheva suddhakāḷakānaṃ eḷakalomānaṃ santhataṃ kārāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
37. අනුවස්‌සං සන්‌ථතං කාරාපෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? සම්‌බහුලා භික්‌ඛූ අනුවස්‌සං සන්‌ථතං කාරාපෙසුං, තස්‌මිං වත්‌ථුස්‌මිං . එකා පඤ්‌ඤත්‌ති, එකා අනුපඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
37. Anuvassaṃ santhataṃ kārāpentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū anuvassaṃ santhataṃ kārāpesuṃ, tasmiṃ vatthusmiṃ . Ekā paññatti, ekā anupaññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
38. අනාදියිත්‌වා පුරාණසන්‌ථතස්‌ස සාමන්‌තා සුගතවිදත්‌ථිං නවං නිසීදනසන්‌ථතං කාරාපෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? සම්‌බහුලෙ භික්‌ඛූ ආරබ්‌භ . කිස්‌මිං වත්‌ථුස්‌මින්‌ති? සම්‌බහුලා භික්‌ඛූ සන්‌ථතානි උජ්‌ඣිත්‌වා ආරඤ්‌ඤිකඞ්‌ගං පිණ්‌ඩපාතිකඞ්‌ගං පංසුකූලිකඞ්‌ගං සමාදියිංසු, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
38. Anādiyitvā purāṇasanthatassa sāmantā sugatavidatthiṃ navaṃ nisīdanasanthataṃ kārāpentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha . Kismiṃ vatthusminti? Sambahulā bhikkhū santhatāni ujjhitvā āraññikaṅgaṃ piṇḍapātikaṅgaṃ paṃsukūlikaṅgaṃ samādiyiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
39. එළකලොමානි පටිග්‌ගහෙත්‌වා තියොජනං අතික්‌කාමෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? අඤ්‌ඤතරං භික්‌ඛුං ආරබ්‌භ. කිස්‌මිං වත්‌ථුස්‌මින්‌ති? අඤ්‌ඤතරො භික්‌ඛු එළකලොමානි පටිග්‌ගහෙත්‌වා තියොජනං අතික්‌කාමෙසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ද්‌වීහි සමුට්‌ඨානෙහි සමුට්‌ඨාති – සියා කායතො සමුට්‌ඨාති, න වාචතො න චිත්‌තතො; සියා කායතො ච චිත්‌තතො ච සමුට්‌ඨාති, න වාචතො…පෙ.….
39. Eḷakalomāni paṭiggahetvā tiyojanaṃ atikkāmentassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Aññataraṃ bhikkhuṃ ārabbha. Kismiṃ vatthusminti? Aññataro bhikkhu eḷakalomāni paṭiggahetvā tiyojanaṃ atikkāmesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca cittato ca samuṭṭhāti, na vācato…pe….
40. අඤ්‌ඤාතිකාය භික්‌ඛුනියා එළකලොමානි ධොවාපෙන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සක්‌කෙසු පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ අඤ්‌ඤාතිකාහි භික්‌ඛුනීහි එළකලොමානි ධොවාපෙසුං, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
40. Aññātikāya bhikkhuniyā eḷakalomāni dhovāpentassa nissaggiyaṃ pācittiyaṃ kattha paññattanti? Sakkesu paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū aññātikāhi bhikkhunīhi eḷakalomāni dhovāpesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
41. රූපියං පටිග්‌ගණ්‌හන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? රාජගහෙ පඤ්‌ඤත්‌තං . කං ආරබ්‌භාති? ආයස්‌මන්‌තං උපනන්‌දං සක්‍යපුත්‌තං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා උපනන්‌දො සක්‍යපුත්‌තො රූපියං පටිග්‌ගහෙසි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
41. Rūpiyaṃ paṭiggaṇhantassa nissaggiyaṃ pācittiyaṃ kattha paññattanti? Rājagahe paññattaṃ . Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto rūpiyaṃ paṭiggahesi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
42. නානප්‌පකාරකං රූපියසංවොහාරං සමාපජ්‌ජන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ඡබ්‌බග්‌ගියෙ භික්‌ඛූ ආරබ්‌භ. කිස්‌මිං වත්‌ථුස්‌මින්‌ති? ඡබ්‌බග්‌ගියා භික්‌ඛූ නානප්‌පකාරකං රූපියසංවොහාරං සමාපජ්‌ජිංසු, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
42. Nānappakārakaṃ rūpiyasaṃvohāraṃ samāpajjantassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū nānappakārakaṃ rūpiyasaṃvohāraṃ samāpajjiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
43. නානප්‌පකාරකං කයවික්‌කයං සමාපජ්‌ජන්‌තස්‌ස නිස්‌සග්‌ගියං පාචිත්‌තියං කත්‌ථ පඤ්‌ඤත්‌තන්‌ති? සාවත්‌ථියං පඤ්‌ඤත්‌තං. කං ආරබ්‌භාති? ආයස්‌මන්‌තං උපනන්‌දං සක්‍යපුත්‌තං ආරබ්‌භ. කිස්‌මිං වත්‌ථුස්‌මින්‌ති? ආයස්‌මා උපනන්‌දො සක්‍යපුත්‌තො පරිබ්‌බාජකෙන සද්‌ධිං කයවික්‌කයං සමාපජ්‌ජි, තස්‌මිං වත්‌ථුස්‌මිං. එකා පඤ්‌ඤත්‌ති. ඡන්‌නං ආපත්‌තිසමුට්‌ඨානානං ඡහි සමුට්‌ඨානෙහි සමුට්‌ඨාති…පෙ.….
43. Nānappakārakaṃ kayavikkayaṃ samāpajjantassa nissaggiyaṃ pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Āyasmantaṃ upanandaṃ sakyaputtaṃ ārabbha. Kismiṃ vatthusminti? Āyasmā upanando sakyaputto paribbājakena saddhiṃ kayavikkayaṃ samāpajji, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
කොසියවග්‌ගො දුතියො.
Kosiyavaggo dutiyo.
Footnotes:
