| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၇၅. ကောဋိဂာမေ သစ္စကထာ
175. Koṭigāme saccakathā
၂၈၇. အထ ခော ဘဂဝာ ယေန ကောဋိဂာမော တေနုပသင္ကမိ။ တတ္ရ သုဒံ ဘဂဝာ ကောဋိဂာမေ ဝိဟရတိ။ တတ္ရ ခော ဘဂဝာ ဘိက္ခူ အာမန္တေသိ – 1 ‘‘စတုန္နံ, ဘိက္ခဝေ, အရိယသစ္စာနံ အနနုဗောဓာ အပ္ပဋိဝေဓာ ဧဝမိဒံ ဒီဃမဒ္ဓာနံ သန္ဓာဝိတံ သံသရိတံ မမဉ္စေဝ တုမ္ဟာကဉ္စ။ ကတမေသံ စတုန္နံ? ဒုက္ခသ္သ, ဘိက္ခဝေ, အရိယသစ္စသ္သ အနနုဗောဓာ အပ္ပဋိဝေဓာ ဧဝမိဒံ ဒီဃမဒ္ဓာနံ သန္ဓာဝိတံ သံသရိတံ မမဉ္စေဝ တုမ္ဟာကဉ္စ။ ဒုက္ခသမုဒယသ္သ အရိယသစ္စသ္သ။ပေ.။ ဒုက္ခနိရောဓသ္သ အရိယသစ္စသ္သ။ပေ.။ ဒုက္ခနိရောဓဂာမိနိယာ ပဋိပဒာယ အရိယသစ္စသ္သ အနနုဗောဓာ အပ္ပဋိဝေဓာ ဧဝမိဒံ ဒီဃမဒ္ဓာနံ သန္ဓာဝိတံ သံသရိတံ မမဉ္စေဝ တုမ္ဟာကဉ္စ။ တယိဒံ, ဘိက္ခဝေ, ဒုက္ခံ အရိယသစ္စံ အနုဗုဒ္ဓံ ပဋိဝိဒ္ဓံ, ဒုက္ခသမုဒယံ 2 အရိယသစ္စံ အနုဗုဒ္ဓံ ပဋိဝိဒ္ဓံ, ဒုက္ခနိရောဓံ 3 အရိယသစ္စံ အနုဗုဒ္ဓံ ပဋိဝိဒ္ဓံ, ဒုက္ခနိရောဓဂာမိနီ ပဋိပဒာ အရိယသစ္စံ အနုဗုဒ္ဓံ ပဋိဝိဒ္ဓံ, ဥစ္ဆိန္နာ ဘဝတဏ္ဟာ, ခီဏာ ဘဝနေတ္တိ, နတ္ထိဒာနိ ပုနဗ္ဘဝော’’တိ။
287. Atha kho bhagavā yena koṭigāmo tenupasaṅkami. Tatra sudaṃ bhagavā koṭigāme viharati. Tatra kho bhagavā bhikkhū āmantesi – 4 ‘‘catunnaṃ, bhikkhave, ariyasaccānaṃ ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca. Katamesaṃ catunnaṃ? Dukkhassa, bhikkhave, ariyasaccassa ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca. Dukkhasamudayassa ariyasaccassa…pe… dukkhanirodhassa ariyasaccassa…pe… dukkhanirodhagāminiyā paṭipadāya ariyasaccassa ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca. Tayidaṃ, bhikkhave, dukkhaṃ ariyasaccaṃ anubuddhaṃ paṭividdhaṃ, dukkhasamudayaṃ 5 ariyasaccaṃ anubuddhaṃ paṭividdhaṃ, dukkhanirodhaṃ 6 ariyasaccaṃ anubuddhaṃ paṭividdhaṃ, dukkhanirodhagāminī paṭipadā ariyasaccaṃ anubuddhaṃ paṭividdhaṃ, ucchinnā bhavataṇhā, khīṇā bhavanetti, natthidāni punabbhavo’’ti.
စတုန္နံ အရိယသစ္စာနံ၊ ယထာဘူတံ အဒသ္သနာ။
Catunnaṃ ariyasaccānaṃ, yathābhūtaṃ adassanā;
သံသိတံ ဒီဃမဒ္ဓာနံ၊ တာသု တာသ္ဝေဝ ဇာတိသု။
Saṃsitaṃ dīghamaddhānaṃ, tāsu tāsveva jātisu.
တာနိ ဧတာနိ ဒိဋ္ဌာနိ၊ ဘဝနေတ္တိ သမူဟတာ။
Tāni etāni diṭṭhāni, bhavanetti samūhatā;
ဥစ္ဆိန္နံ မူလံ ဒုက္ခသ္သ၊ နတ္ထိဒာနိ ပုနဗ္ဘဝောတိ။
Ucchinnaṃ mūlaṃ dukkhassa, natthidāni punabbhavoti.
ကောဋိဂာမေ သစ္စကထာ နိဋ္ဌိတာ။
Koṭigāme saccakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ပာဋလိဂာမဝတ္ထုကထာ • Pāṭaligāmavatthukathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ကောဋိဂာမေ သစ္စကထာဝဏ္ဏနာ • Koṭigāme saccakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ကောဋိဂာမေသစ္စကထာဝဏ္ဏနာ • Koṭigāmesaccakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၇၃. ပာဋလိဂာမဝတ္ထုကထာ • 173. Pāṭaligāmavatthukathā
