| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
175. කොටිගාමෙ සච්‌චකථා
175. Koṭigāme saccakathā
287. අථ ඛො භගවා යෙන කොටිගාමො තෙනුපසඞ්‌කමි. තත්‍ර සුදං භගවා කොටිගාමෙ විහරති. තත්‍ර ඛො භගවා භික්‌ඛූ ආමන්‌තෙසි – 1 ‘‘චතුන්‌නං, භික්‌ඛවෙ, අරියසච්‌චානං අනනුබොධා අප්‌පටිවෙධා එවමිදං දීඝමද්‌ධානං සන්‌ධාවිතං සංසරිතං මමඤ්‌චෙව තුම්‌හාකඤ්‌ච. කතමෙසං චතුන්‌නං? දුක්‌ඛස්‌ස, භික්‌ඛවෙ, අරියසච්‌චස්‌ස අනනුබොධා අප්‌පටිවෙධා එවමිදං දීඝමද්‌ධානං සන්‌ධාවිතං සංසරිතං මමඤ්‌චෙව තුම්‌හාකඤ්‌ච. දුක්‌ඛසමුදයස්‌ස අරියසච්‌චස්‌ස…පෙ.… දුක්‌ඛනිරොධස්‌ස අරියසච්‌චස්‌ස…පෙ.… දුක්‌ඛනිරොධගාමිනියා පටිපදාය අරියසච්‌චස්‌ස අනනුබොධා අප්‌පටිවෙධා එවමිදං දීඝමද්‌ධානං සන්‌ධාවිතං සංසරිතං මමඤ්‌චෙව තුම්‌හාකඤ්‌ච. තයිදං, භික්‌ඛවෙ, දුක්‌ඛං අරියසච්‌චං අනුබුද්‌ධං පටිවිද්‌ධං, දුක්‌ඛසමුදයං 2 අරියසච්‌චං අනුබුද්‌ධං පටිවිද්‌ධං, දුක්‌ඛනිරොධං 3 අරියසච්‌චං අනුබුද්‌ධං පටිවිද්‌ධං, දුක්‌ඛනිරොධගාමිනී පටිපදා අරියසච්‌චං අනුබුද්‌ධං පටිවිද්‌ධං, උච්‌ඡින්‌නා භවතණ්‌හා, ඛීණා භවනෙත්‌ති, නත්‌ථිදානි පුනබ්‌භවො’’ති.
287. Atha kho bhagavā yena koṭigāmo tenupasaṅkami. Tatra sudaṃ bhagavā koṭigāme viharati. Tatra kho bhagavā bhikkhū āmantesi – 4 ‘‘catunnaṃ, bhikkhave, ariyasaccānaṃ ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca. Katamesaṃ catunnaṃ? Dukkhassa, bhikkhave, ariyasaccassa ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca. Dukkhasamudayassa ariyasaccassa…pe… dukkhanirodhassa ariyasaccassa…pe… dukkhanirodhagāminiyā paṭipadāya ariyasaccassa ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca. Tayidaṃ, bhikkhave, dukkhaṃ ariyasaccaṃ anubuddhaṃ paṭividdhaṃ, dukkhasamudayaṃ 5 ariyasaccaṃ anubuddhaṃ paṭividdhaṃ, dukkhanirodhaṃ 6 ariyasaccaṃ anubuddhaṃ paṭividdhaṃ, dukkhanirodhagāminī paṭipadā ariyasaccaṃ anubuddhaṃ paṭividdhaṃ, ucchinnā bhavataṇhā, khīṇā bhavanetti, natthidāni punabbhavo’’ti.
චතුන්‌නං අරියසච්‌චානං, යථාභූතං අදස්‌සනා;
Catunnaṃ ariyasaccānaṃ, yathābhūtaṃ adassanā;
සංසිතං දීඝමද්‌ධානං, තාසු තාස්‌වෙව ජාතිසු.
Saṃsitaṃ dīghamaddhānaṃ, tāsu tāsveva jātisu.
තානි එතානි දිට්‌ඨානි, භවනෙත්‌ති සමූහතා;
Tāni etāni diṭṭhāni, bhavanetti samūhatā;
උච්‌ඡින්‌නං මූලං දුක්‌ඛස්‌ස, නත්‌ථිදානි පුනබ්‌භවොති.
Ucchinnaṃ mūlaṃ dukkhassa, natthidāni punabbhavoti.
කොටිගාමෙ සච්‌චකථා නිට්‌ඨිතා.
Koṭigāme saccakathā niṭṭhitā.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / පාටලිගාමවත්‌ථුකථා • Pāṭaligāmavatthukathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / කොටිගාමෙ සච්‌චකථාවණ්‌ණනා • Koṭigāme saccakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / කොටිගාමෙසච්‌චකථාවණ්‌ණනා • Koṭigāmesaccakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 173. පාටලිගාමවත්‌ථුකථා • 173. Pāṭaligāmavatthukathā
