| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༡༧༥. ཀོཊིགཱམེ སཙྩཀཐཱ
175. Koṭigāme saccakathā
༢༨༧. ཨཐ ཁོ བྷགཝཱ ཡེན ཀོཊིགཱམོ ཏེནུཔསངྐམི། ཏཏྲ སུདཾ བྷགཝཱ ཀོཊིགཱམེ ཝིཧརཏི། ཏཏྲ ཁོ བྷགཝཱ བྷིཀྑཱུ ཨཱམནྟེསི – 1 ‘‘ཙཏུནྣཾ, བྷིཀྑཝེ, ཨརིཡསཙྩཱནཾ ཨནནུབོདྷཱ ཨཔྤཊིཝེདྷཱ ཨེཝམིདཾ དཱིགྷམདྡྷཱནཾ སནྡྷཱཝིཏཾ སཾསརིཏཾ མམཉྩེཝ ཏུམྷཱཀཉྩ། ཀཏམེསཾ ཙཏུནྣཾ? དུཀྑསྶ, བྷིཀྑཝེ, ཨརིཡསཙྩསྶ ཨནནུབོདྷཱ ཨཔྤཊིཝེདྷཱ ཨེཝམིདཾ དཱིགྷམདྡྷཱནཾ སནྡྷཱཝིཏཾ སཾསརིཏཾ མམཉྩེཝ ཏུམྷཱཀཉྩ། དུཀྑསམུདཡསྶ ཨརིཡསཙྩསྶ…པེ॰… དུཀྑནིརོདྷསྶ ཨརིཡསཙྩསྶ…པེ॰… དུཀྑནིརོདྷགཱམིནིཡཱ པཊིཔདཱཡ ཨརིཡསཙྩསྶ ཨནནུབོདྷཱ ཨཔྤཊིཝེདྷཱ ཨེཝམིདཾ དཱིགྷམདྡྷཱནཾ སནྡྷཱཝིཏཾ སཾསརིཏཾ མམཉྩེཝ ཏུམྷཱཀཉྩ། ཏཡིདཾ, བྷིཀྑཝེ, དུཀྑཾ ཨརིཡསཙྩཾ ཨནུབུདྡྷཾ པཊིཝིདྡྷཾ, དུཀྑསམུདཡཾ 2 ཨརིཡསཙྩཾ ཨནུབུདྡྷཾ པཊིཝིདྡྷཾ, དུཀྑནིརོདྷཾ 3 ཨརིཡསཙྩཾ ཨནུབུདྡྷཾ པཊིཝིདྡྷཾ, དུཀྑནིརོདྷགཱམིནཱི པཊིཔདཱ ཨརིཡསཙྩཾ ཨནུབུདྡྷཾ པཊིཝིདྡྷཾ, ཨུཙྪིནྣཱ བྷཝཏཎྷཱ, ཁཱིཎཱ བྷཝནེཏྟི, ནཏྠིདཱནི པུནབྦྷཝོ’’ཏི།
287. Atha kho bhagavā yena koṭigāmo tenupasaṅkami. Tatra sudaṃ bhagavā koṭigāme viharati. Tatra kho bhagavā bhikkhū āmantesi – 4 ‘‘catunnaṃ, bhikkhave, ariyasaccānaṃ ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca. Katamesaṃ catunnaṃ? Dukkhassa, bhikkhave, ariyasaccassa ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca. Dukkhasamudayassa ariyasaccassa…pe… dukkhanirodhassa ariyasaccassa…pe… dukkhanirodhagāminiyā paṭipadāya ariyasaccassa ananubodhā appaṭivedhā evamidaṃ dīghamaddhānaṃ sandhāvitaṃ saṃsaritaṃ mamañceva tumhākañca. Tayidaṃ, bhikkhave, dukkhaṃ ariyasaccaṃ anubuddhaṃ paṭividdhaṃ, dukkhasamudayaṃ 5 ariyasaccaṃ anubuddhaṃ paṭividdhaṃ, dukkhanirodhaṃ 6 ariyasaccaṃ anubuddhaṃ paṭividdhaṃ, dukkhanirodhagāminī paṭipadā ariyasaccaṃ anubuddhaṃ paṭividdhaṃ, ucchinnā bhavataṇhā, khīṇā bhavanetti, natthidāni punabbhavo’’ti.
ཙཏུནྣཾ ཨརིཡསཙྩཱནཾ, ཡཐཱབྷཱུཏཾ ཨདསྶནཱ།
Catunnaṃ ariyasaccānaṃ, yathābhūtaṃ adassanā;
སཾསིཏཾ དཱིགྷམདྡྷཱནཾ, ཏཱསུ ཏཱསྭེཝ ཛཱཏིསུ༎
Saṃsitaṃ dīghamaddhānaṃ, tāsu tāsveva jātisu.
ཏཱནི ཨེཏཱནི དིཊྛཱནི, བྷཝནེཏྟི སམཱུཧཏཱ།
Tāni etāni diṭṭhāni, bhavanetti samūhatā;
ཨུཙྪིནྣཾ མཱུལཾ དུཀྑསྶ, ནཏྠིདཱནི པུནབྦྷཝོཏི༎
Ucchinnaṃ mūlaṃ dukkhassa, natthidāni punabbhavoti.
ཀོཊིགཱམེ སཙྩཀཐཱ ནིཊྛིཏཱ།
Koṭigāme saccakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / པཱཊལིགཱམཝཏྠུཀཐཱ • Pāṭaligāmavatthukathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཀོཊིགཱམེ སཙྩཀཐཱཝཎྞནཱ • Koṭigāme saccakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཀོཊིགཱམེསཙྩཀཐཱཝཎྞནཱ • Koṭigāmesaccakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༧༣. པཱཊལིགཱམཝཏྠུཀཐཱ • 173. Pāṭaligāmavatthukathā
