| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
कोटिगामेसच्चकथावण्णना
Koṭigāmesaccakathāvaṇṇanā
२८७. पाळियं सन्धावितन्ति भवतो भवं पटिसन्धिग्गहणवसेन सन्धावनं कतं। संसरितन्ति तस्सेव वेवचनं। ममञ्चेव तुम्हाकञ्चाति मया च तुम्हेहि च, सामिवसेनेव वा मम च तुम्हाकञ्च सन्धावनं अहोसीति अत्थो गहेतब्बो। संसरितन्ति संसरि। भवतण्हा एव भवतो भवं नेतीति भवनेत्तीति वुत्ता।
287. Pāḷiyaṃ sandhāvitanti bhavato bhavaṃ paṭisandhiggahaṇavasena sandhāvanaṃ kataṃ. Saṃsaritanti tasseva vevacanaṃ. Mamañceva tumhākañcāti mayā ca tumhehi ca, sāmivaseneva vā mama ca tumhākañca sandhāvanaṃ ahosīti attho gahetabbo. Saṃsaritanti saṃsari. Bhavataṇhā eva bhavato bhavaṃ netīti bhavanettīti vuttā.
२८९. ‘‘नीला होन्ती’’ति वुत्तमेवत्थं विवरितुं ‘‘नीलवण्णा’’तिआदि वुत्तं। नीलवण्णाति नीलविलेपना। एस नयो सब्बत्थ। पटिवट्टेसीति पहरि। अम्बकायाति अम्बाय। उपचारवचनञ्हेतं, मातुगामेनाति अत्थो। उपसंहरथाति उपनेथ, ‘‘ईदिसा तावतिंसा’’ति परिकप्पेथाति अत्थो। इदञ्च भिक्खूनं संवेगजननत्थं वुत्तं, न निमित्तग्गाहत्थं। लिच्छविराजानो हि सब्बे न चिरस्सेव अजातसत्तुना विनासं पापुणिस्सन्ति।
289. ‘‘Nīlā hontī’’ti vuttamevatthaṃ vivarituṃ ‘‘nīlavaṇṇā’’tiādi vuttaṃ. Nīlavaṇṇāti nīlavilepanā. Esa nayo sabbattha. Paṭivaṭṭesīti pahari. Ambakāyāti ambāya. Upacāravacanañhetaṃ, mātugāmenāti attho. Upasaṃharathāti upanetha, ‘‘īdisā tāvatiṃsā’’ti parikappethāti attho. Idañca bhikkhūnaṃ saṃvegajananatthaṃ vuttaṃ, na nimittaggāhatthaṃ. Licchavirājāno hi sabbe na cirasseva ajātasattunā vināsaṃ pāpuṇissanti.
कोटिगामेसच्चकथावण्णना निट्ठिता।
Koṭigāmesaccakathāvaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi
१७५. कोटिगामे सच्चकथा • 175. Koṭigāme saccakathā
१७७. लिच्छवीवत्थु • 177. Licchavīvatthu
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / पाटलिगामवत्थुकथा • Pāṭaligāmavatthukathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā
कोटिगामे सच्चकथावण्णना • Koṭigāme saccakathāvaṇṇanā
लिच्छवीवत्थुकथावण्णना • Licchavīvatthukathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १७३. पाटलिगामवत्थुकथा • 173. Pāṭaligāmavatthukathā
