| Library / Tipiṭaka / திபிடக • Tipiṭaka / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā |
கொட்டா²ஸவாரவண்ணனா
Koṭṭhāsavāravaṇṇanā
58-120. நித்³தே³ஸவாரே புச்சா²தீ³னங் பச்சேகங் அனேகத்தேபி புச்சா²தி³பா⁴வேன ஏகத்தங் உபனெத்வா சதுபரிச்சே²த³தா வுத்தா. சத்தாரோ த்³வேதி ஏவமாதி³கங் ஸங்கி²பித்வா ஸஹ வா க³ஹணங் ஸங்க³ஹோ. ட²பெத்வா யேவாபனகேதி ஸங்க³ஹேதப்³பே³ ஸந்தா⁴ய வுத்தங். தே ஹி விஸுங் விஸுங் உத்³தி³ட்ட²த்தா நித்³தி³ட்ட²த்தா ச விப்பகிண்ணாதி ஸங்க³ஹேதப்³பா³ ஹொந்தி, ந யேவாபனகா ஸங்க³ஹக³மனேனேவ ததா² அவிப்பகிண்ணத்தா. யஸ்மா பன ஸங்கா²ரக்க²ந்த⁴பரியாபன்னா ஹொந்தி, தஸ்மா தங்னித்³தே³ஸே அக²ந்த⁴பா⁴வனிவாரணத்த²ங் யேவாபனாத்வேவ வுத்தாதி ந யேவாபனகா ட²பேதப்³பா³தி. பச்சயஸங்கா²தேனாதி ஆஹாரபச்சயஸங்கா²தேனாதி வுத்தங் ஹோதி. அத² வா ‘‘ஹேது பச்சயோ’’தி ஏதேஸு த்³வீஸு ஜனகோ ஹேது உபத்த²ம்ப⁴கோ பச்சயோதி ஏவங் விஸேஸவந்தேஸு பச்சயஸங்கா²தேன. யதா² ஹி கப³ளீகாராஹாரோ ஓஜட்ட²மகரூபாஹரணேன ரூபகாயங் உபத்த²ம்பே⁴தி, ஏவமிமேபி வேத³னாதி³ஆஹரணேன நாமகாயந்தி. ததா² ச ஹொந்தீதி ஸாதா⁴ரணே ஸஹஜாதாதி³பச்சயே ஸந்தா⁴யாஹ. அஞ்ஞதா² சாதி அஞ்ஞேன ச ஏகேனாகாரேன பச்சயா ஹொந்தியேவாதி ஆஹாராதி வுச்சந்தீதி அத்தோ². தஸ்மா ஆஹரணகிச்சரஹிதானங் ஹேதுஅதி⁴பதிஆதீ³னங் நத்தி² ஆஹாரபா⁴வப்பஸங்கோ³. திஸ்ஸோ ச வேத³னா ஆஹரதீதிஆதி³ யதா²ஸம்ப⁴வவஸேன வுத்தங், ந இமஸ்மிங்யேவ சித்தே ப²ஸ்ஸாதி³வஸேன. தயோ ச ப⁴வேதி காமாதி³ப⁴வபூ⁴தங் விஞ்ஞாணங் விஸேஸேன, அவிஸேஸேன ச பஞ்சுபாதா³னக்க²ந்தே⁴.
58-120. Niddesavāre pucchādīnaṃ paccekaṃ anekattepi pucchādibhāvena ekattaṃ upanetvā catuparicchedatā vuttā. Cattāro dveti evamādikaṃ saṅkhipitvā saha vā gahaṇaṃ saṅgaho. Ṭhapetvā yevāpanaketi saṅgahetabbe sandhāya vuttaṃ. Te hi visuṃ visuṃ uddiṭṭhattā niddiṭṭhattā ca vippakiṇṇāti saṅgahetabbā honti, na yevāpanakā saṅgahagamaneneva tathā avippakiṇṇattā. Yasmā pana saṅkhārakkhandhapariyāpannā honti, tasmā taṃniddese akhandhabhāvanivāraṇatthaṃ yevāpanātveva vuttāti na yevāpanakā ṭhapetabbāti. Paccayasaṅkhātenāti āhārapaccayasaṅkhātenāti vuttaṃ hoti. Atha vā ‘‘hetu paccayo’’ti etesu dvīsu janako hetu upatthambhako paccayoti evaṃ visesavantesu paccayasaṅkhātena. Yathā hi kabaḷīkārāhāro ojaṭṭhamakarūpāharaṇena rūpakāyaṃ upatthambheti, evamimepi vedanādiāharaṇena nāmakāyanti. Tathā ca hontīti sādhāraṇe sahajātādipaccaye sandhāyāha. Aññathā cāti aññena ca ekenākārena paccayā hontiyevāti āhārāti vuccantīti attho. Tasmā āharaṇakiccarahitānaṃ hetuadhipatiādīnaṃ natthi āhārabhāvappasaṅgo. Tisso ca vedanā āharatītiādi yathāsambhavavasena vuttaṃ, na imasmiṃyeva citte phassādivasena. Tayo ca bhaveti kāmādibhavabhūtaṃ viññāṇaṃ visesena, avisesena ca pañcupādānakkhandhe.
ஆரம்மணங் உபக³ந்த்வா நிஜ்ஜா²யனங் சிந்தனங் உபனிஜ்ஜா²யனங். ஹெத்வட்டே²னாதி உபாயத்தே²ன, ந மூலத்தே²ன. புப்³ப³பா⁴கே³ க³தோ படிபன்னோ நானாக்க²ணிகோ அட்ட²ங்கி³கோ மக்³கோ³ லோகுத்தரக்க²ணேவ ஸஹ பவத்தோ யதா²க³தமக்³கோ³தி வுத்தோ. விபஸ்ஸனாக்க²ணதோ புப்³பே³வ காயகம்மாதீ³னங் ஸுபரிஸுத்³த⁴தாய அட்ட²ங்கி³கமக்³கு³பனிஸ்ஸயஸ்ஸ ‘‘அரியோ அட்ட²ங்கி³கோ மக்³கோ³ பா⁴வனாபாரிபூரிங் க³ச்ச²தீ’’தி (ம॰ நி॰ 3.431) ஏவங் வுத்தேன பரியாயேன புப்³ப³பா⁴க³மக்³க³ஸ்ஸ அட்ட²ங்கி³கதா யதா²க³தவசனேன தீ³பிதா, ந ஏகக்க²ணே அட்ட²ன்னங் அங்கா³னங் ஸப்³பா⁴வாதி ஏவமஸ்ஸபி பரியாயதே³ஸனதா வேதி³தப்³பா³. விஜானநமேவ சித்தவிசித்ததாதி ‘‘சித்தவிசித்தட்டே²ன ஏகோவ த⁴ம்மோ விஞ்ஞாணக்க²ந்தோ⁴’’தி ஆஹ. சத்தாரோ க²ந்தா⁴ ஹொந்தீதிஆதீ³ஸு வேத³னாக்க²ந்தா⁴தீ³னங் ஸங்க³ஹே கதேபி புன ‘‘ஏகோ வேத³னாக்க²ந்தோ⁴ ஹோதீ’’திஆதி³வசனங் ந அனேகே வேத³னாக்க²ந்தா⁴த³யோ ஜாதினித்³தே³ஸேன இத⁴ வுத்தாதி த³ஸ்ஸனத்த²ங். இந்த்³ரியேஸு ச ஏகஸ்ஸ ஜாதினித்³தே³ஸபா⁴வே படிக்கி²த்தே அஞ்ஞேஸங் இந்த்³ரியானங் ஆஹாராதீ³னஞ்ச தப்படிக்கே²போ கதோ ஹோதீதி புப்³ப³ங்க³மஸ்ஸ மனிந்த்³ரியஸ்ஸேவ கதோதி த³ட்ட²ப்³போ³.
Ārammaṇaṃ upagantvā nijjhāyanaṃ cintanaṃ upanijjhāyanaṃ. Hetvaṭṭhenāti upāyatthena, na mūlatthena. Pubbabhāge gato paṭipanno nānākkhaṇiko aṭṭhaṅgiko maggo lokuttarakkhaṇeva saha pavatto yathāgatamaggoti vutto. Vipassanākkhaṇato pubbeva kāyakammādīnaṃ suparisuddhatāya aṭṭhaṅgikamaggupanissayassa ‘‘ariyo aṭṭhaṅgiko maggo bhāvanāpāripūriṃ gacchatī’’ti (ma. ni. 3.431) evaṃ vuttena pariyāyena pubbabhāgamaggassa aṭṭhaṅgikatā yathāgatavacanena dīpitā, na ekakkhaṇe aṭṭhannaṃ aṅgānaṃ sabbhāvāti evamassapi pariyāyadesanatā veditabbā. Vijānanameva cittavicittatāti ‘‘cittavicittaṭṭhena ekova dhammo viññāṇakkhandho’’ti āha. Cattāro khandhā hontītiādīsu vedanākkhandhādīnaṃ saṅgahe katepi puna ‘‘eko vedanākkhandho hotī’’tiādivacanaṃ na aneke vedanākkhandhādayo jātiniddesena idha vuttāti dassanatthaṃ. Indriyesu ca ekassa jātiniddesabhāve paṭikkhitte aññesaṃ indriyānaṃ āhārādīnañca tappaṭikkhepo kato hotīti pubbaṅgamassa manindriyasseva katoti daṭṭhabbo.
கொட்டா²ஸவாரவண்ணனா நிட்டி²தா.
Koṭṭhāsavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / காமாவசரகுஸலங் • Kāmāvacarakusalaṃ
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā / கொட்டா²ஸவாரோ • Koṭṭhāsavāro
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / கொட்டா²ஸவாரகதா²வண்ணனா • Koṭṭhāsavārakathāvaṇṇanā
