| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. கொட்டி²கஅனிச்சஸுத்தங்
7. Koṭṭhikaaniccasuttaṃ
162. அத² கோ² ஆயஸ்மா மஹாகொட்டி²கோ யேன ப⁴க³வா தேனுபஸங்கமி…பே॰… ஏகமந்தங் நிஸின்னோ கோ² ஆயஸ்மா கொட்டி²கோ ப⁴க³வந்தங் ஏதத³வோச – ‘‘ஸாது⁴ மே, ப⁴ந்தே, ப⁴க³வா ஸங்கி²த்தேன த⁴ம்மங் தே³ஸேது, யமஹங் ப⁴க³வதோ த⁴ம்மங் ஸுத்வா ஏகோ வூபகட்டோ² அப்பமத்தோ ஆதாபீ பஹிதத்தோ விஹரெய்ய’’ந்தி.
162. Atha kho āyasmā mahākoṭṭhiko yena bhagavā tenupasaṅkami…pe… ekamantaṃ nisinno kho āyasmā koṭṭhiko bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu, yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti.
‘‘யங் கோ², கொட்டி²க, அனிச்சங் தத்ர தே ச²ந்தோ³ பஹாதப்³போ³. கிஞ்ச, கொட்டி²க, அனிச்சங்? சக்கு² கோ², கொட்டி²க, அனிச்சங்; தத்ர தே ச²ந்தோ³ பஹாதப்³போ³. ரூபா அனிச்சா; தத்ர தே ச²ந்தோ³ பஹாதப்³போ³. சக்கு²விஞ்ஞாணங் அனிச்சங்; தத்ர தே ச²ந்தோ³ பஹாதப்³போ³. சக்கு²ஸம்ப²ஸ்ஸோ அனிச்சோ; தத்ர தே ச²ந்தோ³ பஹாதப்³போ³. யம்பித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி அனிச்சங்; தத்ர தே ச²ந்தோ³ பஹாதப்³போ³…பே॰… ஜிவ்ஹா அனிச்சா; தத்ர தே ச²ந்தோ³ பஹாதப்³போ³. ரஸா அனிச்சா; தத்ர தே ச²ந்தோ³ பஹாதப்³போ³. ஜிவ்ஹாவிஞ்ஞாணங் அனிச்சங்; தத்ர தே ச²ந்தோ³ பஹாதப்³போ³. ஜிவ்ஹாஸம்ப²ஸ்ஸோ அனிச்சோ; தத்ர தே ச²ந்தோ³ பஹாதப்³போ³. யம்பித³ங் ஜிவ்ஹாஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி அனிச்சங்; தத்ர தே ச²ந்தோ³ பஹாதப்³போ³…பே॰… மனோ அனிச்சோ; தத்ர தே ச²ந்தோ³ பஹாதப்³போ³. த⁴ம்மா அனிச்சா; தத்ர தே ச²ந்தோ³ பஹாதப்³போ³. மனோவிஞ்ஞாணங் அனிச்சங்; தத்ர தே ச²ந்தோ³ பஹாதப்³போ³. மனோஸம்ப²ஸ்ஸோ அனிச்சோ; தத்ர தே ச²ந்தோ³ பஹாதப்³போ³. யம்பித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி அனிச்சங்; தத்ர தே ச²ந்தோ³ பஹாதப்³போ³. யங் கோ², கொட்டி²க, அனிச்சங் தத்ர தே ச²ந்தோ³ பஹாதப்³போ³’’தி. ஸத்தமங்.
‘‘Yaṃ kho, koṭṭhika, aniccaṃ tatra te chando pahātabbo. Kiñca, koṭṭhika, aniccaṃ? Cakkhu kho, koṭṭhika, aniccaṃ; tatra te chando pahātabbo. Rūpā aniccā; tatra te chando pahātabbo. Cakkhuviññāṇaṃ aniccaṃ; tatra te chando pahātabbo. Cakkhusamphasso anicco; tatra te chando pahātabbo. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo…pe… jivhā aniccā; tatra te chando pahātabbo. Rasā aniccā; tatra te chando pahātabbo. Jivhāviññāṇaṃ aniccaṃ; tatra te chando pahātabbo. Jivhāsamphasso anicco; tatra te chando pahātabbo. Yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo…pe… mano anicco; tatra te chando pahātabbo. Dhammā aniccā; tatra te chando pahātabbo. Manoviññāṇaṃ aniccaṃ; tatra te chando pahātabbo. Manosamphasso anicco; tatra te chando pahātabbo. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo. Yaṃ kho, koṭṭhika, aniccaṃ tatra te chando pahātabbo’’ti. Sattamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7-9. கொட்டி²கஅனிச்சஸுத்தாதி³வண்ணனா • 7-9. Koṭṭhikaaniccasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7-9. கொட்டி²கஅனிச்சஸுத்தாதி³வண்ணனா • 7-9. Koṭṭhikaaniccasuttādivaṇṇanā
