| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. কোট্ঠিকঅনিচ্চসুত্তং
7. Koṭṭhikaaniccasuttaṃ
১৬২. অথ খো আযস্মা মহাকোট্ঠিকো যেন ভগৰা তেনুপসঙ্কমি…পে॰… একমন্তং নিসিন্নো খো আযস্মা কোট্ঠিকো ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি।
162. Atha kho āyasmā mahākoṭṭhiko yena bhagavā tenupasaṅkami…pe… ekamantaṃ nisinno kho āyasmā koṭṭhiko bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu, yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti.
‘‘যং খো, কোট্ঠিক, অনিচ্চং তত্র তে ছন্দো পহাতব্বো। কিঞ্চ, কোট্ঠিক, অনিচ্চং? চক্খু খো, কোট্ঠিক, অনিচ্চং; তত্র তে ছন্দো পহাতব্বো। রূপা অনিচ্চা; তত্র তে ছন্দো পহাতব্বো। চক্খুৰিঞ্ঞাণং অনিচ্চং; তত্র তে ছন্দো পহাতব্বো। চক্খুসম্ফস্সো অনিচ্চো; তত্র তে ছন্দো পহাতব্বো। যম্পিদং চক্খুসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং; তত্র তে ছন্দো পহাতব্বো…পে॰… জিৰ্হা অনিচ্চা; তত্র তে ছন্দো পহাতব্বো। রসা অনিচ্চা; তত্র তে ছন্দো পহাতব্বো। জিৰ্হাৰিঞ্ঞাণং অনিচ্চং; তত্র তে ছন্দো পহাতব্বো। জিৰ্হাসম্ফস্সো অনিচ্চো; তত্র তে ছন্দো পহাতব্বো। যম্পিদং জিৰ্হাসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং; তত্র তে ছন্দো পহাতব্বো…পে॰… মনো অনিচ্চো; তত্র তে ছন্দো পহাতব্বো। ধম্মা অনিচ্চা; তত্র তে ছন্দো পহাতব্বো। মনোৰিঞ্ঞাণং অনিচ্চং; তত্র তে ছন্দো পহাতব্বো। মনোসম্ফস্সো অনিচ্চো; তত্র তে ছন্দো পহাতব্বো। যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি অনিচ্চং; তত্র তে ছন্দো পহাতব্বো। যং খো, কোট্ঠিক, অনিচ্চং তত্র তে ছন্দো পহাতব্বো’’তি। সত্তমং।
‘‘Yaṃ kho, koṭṭhika, aniccaṃ tatra te chando pahātabbo. Kiñca, koṭṭhika, aniccaṃ? Cakkhu kho, koṭṭhika, aniccaṃ; tatra te chando pahātabbo. Rūpā aniccā; tatra te chando pahātabbo. Cakkhuviññāṇaṃ aniccaṃ; tatra te chando pahātabbo. Cakkhusamphasso anicco; tatra te chando pahātabbo. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo…pe… jivhā aniccā; tatra te chando pahātabbo. Rasā aniccā; tatra te chando pahātabbo. Jivhāviññāṇaṃ aniccaṃ; tatra te chando pahātabbo. Jivhāsamphasso anicco; tatra te chando pahātabbo. Yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo…pe… mano anicco; tatra te chando pahātabbo. Dhammā aniccā; tatra te chando pahātabbo. Manoviññāṇaṃ aniccaṃ; tatra te chando pahātabbo. Manosamphasso anicco; tatra te chando pahātabbo. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo. Yaṃ kho, koṭṭhika, aniccaṃ tatra te chando pahātabbo’’ti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭-৯. কোট্ঠিকঅনিচ্চসুত্তাদিৰণ্ণনা • 7-9. Koṭṭhikaaniccasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭-৯. কোট্ঠিকঅনিচ্চসুত্তাদিৰণ্ণনা • 7-9. Koṭṭhikaaniccasuttādivaṇṇanā
