| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. කොට්‌ඨිකඅනිච්‌චසුත්‌තං
7. Koṭṭhikaaniccasuttaṃ
162. අථ ඛො ආයස්‌මා මහාකොට්‌ඨිකො යෙන භගවා තෙනුපසඞ්‌කමි…පෙ.… එකමන්‌තං නිසින්‌නො ඛො ආයස්‌මා කොට්‌ඨිකො භගවන්‌තං එතදවොච – ‘‘සාධු මෙ, භන්‌තෙ, භගවා සංඛිත්‌තෙන ධම්‌මං දෙසෙතු, යමහං භගවතො ධම්‌මං සුත්‌වා එකො වූපකට්‌ඨො අප්‌පමත්‌තො ආතාපී පහිතත්‌තො විහරෙය්‍ය’’න්‌ති.
162. Atha kho āyasmā mahākoṭṭhiko yena bhagavā tenupasaṅkami…pe… ekamantaṃ nisinno kho āyasmā koṭṭhiko bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu, yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti.
‘‘යං ඛො, කොට්‌ඨික, අනිච්‌චං තත්‍ර තෙ ඡන්‌දො පහාතබ්‌බො. කිඤ්‌ච, කොට්‌ඨික, අනිච්‌චං? චක්‌ඛු ඛො, කොට්‌ඨික, අනිච්‌චං; තත්‍ර තෙ ඡන්‌දො පහාතබ්‌බො. රූපා අනිච්‌චා; තත්‍ර තෙ ඡන්‌දො පහාතබ්‌බො. චක්‌ඛුවිඤ්‌ඤාණං අනිච්‌චං; තත්‍ර තෙ ඡන්‌දො පහාතබ්‌බො. චක්‌ඛුසම්‌ඵස්‌සො අනිච්‌චො; තත්‍ර තෙ ඡන්‌දො පහාතබ්‌බො. යම්‌පිදං චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චං; තත්‍ර තෙ ඡන්‌දො පහාතබ්‌බො…පෙ.… ජිව්‌හා අනිච්‌චා; තත්‍ර තෙ ඡන්‌දො පහාතබ්‌බො. රසා අනිච්‌චා; තත්‍ර තෙ ඡන්‌දො පහාතබ්‌බො. ජිව්‌හාවිඤ්‌ඤාණං අනිච්‌චං; තත්‍ර තෙ ඡන්‌දො පහාතබ්‌බො. ජිව්‌හාසම්‌ඵස්‌සො අනිච්‌චො; තත්‍ර තෙ ඡන්‌දො පහාතබ්‌බො. යම්‌පිදං ජිව්‌හාසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චං; තත්‍ර තෙ ඡන්‌දො පහාතබ්‌බො…පෙ.… මනො අනිච්‌චො; තත්‍ර තෙ ඡන්‌දො පහාතබ්‌බො. ධම්‌මා අනිච්‌චා; තත්‍ර තෙ ඡන්‌දො පහාතබ්‌බො. මනොවිඤ්‌ඤාණං අනිච්‌චං; තත්‍ර තෙ ඡන්‌දො පහාතබ්‌බො. මනොසම්‌ඵස්‌සො අනිච්‌චො; තත්‍ර තෙ ඡන්‌දො පහාතබ්‌බො. යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චං; තත්‍ර තෙ ඡන්‌දො පහාතබ්‌බො. යං ඛො, කොට්‌ඨික, අනිච්‌චං තත්‍ර තෙ ඡන්‌දො පහාතබ්‌බො’’ති. සත්‌තමං.
‘‘Yaṃ kho, koṭṭhika, aniccaṃ tatra te chando pahātabbo. Kiñca, koṭṭhika, aniccaṃ? Cakkhu kho, koṭṭhika, aniccaṃ; tatra te chando pahātabbo. Rūpā aniccā; tatra te chando pahātabbo. Cakkhuviññāṇaṃ aniccaṃ; tatra te chando pahātabbo. Cakkhusamphasso anicco; tatra te chando pahātabbo. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo…pe… jivhā aniccā; tatra te chando pahātabbo. Rasā aniccā; tatra te chando pahātabbo. Jivhāviññāṇaṃ aniccaṃ; tatra te chando pahātabbo. Jivhāsamphasso anicco; tatra te chando pahātabbo. Yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo…pe… mano anicco; tatra te chando pahātabbo. Dhammā aniccā; tatra te chando pahātabbo. Manoviññāṇaṃ aniccaṃ; tatra te chando pahātabbo. Manosamphasso anicco; tatra te chando pahātabbo. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo. Yaṃ kho, koṭṭhika, aniccaṃ tatra te chando pahātabbo’’ti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7-9. කොට්‌ඨිකඅනිච්‌චසුත්‌තාදිවණ්‌ණනා • 7-9. Koṭṭhikaaniccasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7-9. කොට්‌ඨිකඅනිච්‌චසුත්‌තාදිවණ්‌ණනා • 7-9. Koṭṭhikaaniccasuttādivaṇṇanā
