| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൭. കോട്ഠികഅനിച്ചസുത്തം
7. Koṭṭhikaaniccasuttaṃ
൧൬൨. അഥ ഖോ ആയസ്മാ മഹാകോട്ഠികോ യേന ഭഗവാ തേനുപസങ്കമി…പേ॰… ഏകമന്തം നിസിന്നോ ഖോ ആയസ്മാ കോട്ഠികോ ഭഗവന്തം ഏതദവോച – ‘‘സാധു മേ, ഭന്തേ, ഭഗവാ സംഖിത്തേന ധമ്മം ദേസേതു, യമഹം ഭഗവതോ ധമ്മം സുത്വാ ഏകോ വൂപകട്ഠോ അപ്പമത്തോ ആതാപീ പഹിതത്തോ വിഹരേയ്യ’’ന്തി.
162. Atha kho āyasmā mahākoṭṭhiko yena bhagavā tenupasaṅkami…pe… ekamantaṃ nisinno kho āyasmā koṭṭhiko bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu, yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti.
‘‘യം ഖോ, കോട്ഠിക, അനിച്ചം തത്ര തേ ഛന്ദോ പഹാതബ്ബോ. കിഞ്ച, കോട്ഠിക, അനിച്ചം? ചക്ഖു ഖോ, കോട്ഠിക, അനിച്ചം; തത്ര തേ ഛന്ദോ പഹാതബ്ബോ. രൂപാ അനിച്ചാ; തത്ര തേ ഛന്ദോ പഹാതബ്ബോ. ചക്ഖുവിഞ്ഞാണം അനിച്ചം; തത്ര തേ ഛന്ദോ പഹാതബ്ബോ. ചക്ഖുസമ്ഫസ്സോ അനിച്ചോ; തത്ര തേ ഛന്ദോ പഹാതബ്ബോ. യമ്പിദം ചക്ഖുസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി അനിച്ചം; തത്ര തേ ഛന്ദോ പഹാതബ്ബോ…പേ॰… ജിവ്ഹാ അനിച്ചാ; തത്ര തേ ഛന്ദോ പഹാതബ്ബോ. രസാ അനിച്ചാ; തത്ര തേ ഛന്ദോ പഹാതബ്ബോ. ജിവ്ഹാവിഞ്ഞാണം അനിച്ചം; തത്ര തേ ഛന്ദോ പഹാതബ്ബോ. ജിവ്ഹാസമ്ഫസ്സോ അനിച്ചോ; തത്ര തേ ഛന്ദോ പഹാതബ്ബോ. യമ്പിദം ജിവ്ഹാസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി അനിച്ചം; തത്ര തേ ഛന്ദോ പഹാതബ്ബോ…പേ॰… മനോ അനിച്ചോ; തത്ര തേ ഛന്ദോ പഹാതബ്ബോ. ധമ്മാ അനിച്ചാ; തത്ര തേ ഛന്ദോ പഹാതബ്ബോ. മനോവിഞ്ഞാണം അനിച്ചം; തത്ര തേ ഛന്ദോ പഹാതബ്ബോ. മനോസമ്ഫസ്സോ അനിച്ചോ; തത്ര തേ ഛന്ദോ പഹാതബ്ബോ. യമ്പിദം മനോസമ്ഫസ്സപച്ചയാ ഉപ്പജ്ജതി വേദയിതം സുഖം വാ ദുക്ഖം വാ അദുക്ഖമസുഖം വാ തമ്പി അനിച്ചം; തത്ര തേ ഛന്ദോ പഹാതബ്ബോ. യം ഖോ, കോട്ഠിക, അനിച്ചം തത്ര തേ ഛന്ദോ പഹാതബ്ബോ’’തി. സത്തമം.
‘‘Yaṃ kho, koṭṭhika, aniccaṃ tatra te chando pahātabbo. Kiñca, koṭṭhika, aniccaṃ? Cakkhu kho, koṭṭhika, aniccaṃ; tatra te chando pahātabbo. Rūpā aniccā; tatra te chando pahātabbo. Cakkhuviññāṇaṃ aniccaṃ; tatra te chando pahātabbo. Cakkhusamphasso anicco; tatra te chando pahātabbo. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo…pe… jivhā aniccā; tatra te chando pahātabbo. Rasā aniccā; tatra te chando pahātabbo. Jivhāviññāṇaṃ aniccaṃ; tatra te chando pahātabbo. Jivhāsamphasso anicco; tatra te chando pahātabbo. Yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo…pe… mano anicco; tatra te chando pahātabbo. Dhammā aniccā; tatra te chando pahātabbo. Manoviññāṇaṃ aniccaṃ; tatra te chando pahātabbo. Manosamphasso anicco; tatra te chando pahātabbo. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ; tatra te chando pahātabbo. Yaṃ kho, koṭṭhika, aniccaṃ tatra te chando pahātabbo’’ti. Sattamaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൭-൯. കോട്ഠികഅനിച്ചസുത്താദിവണ്ണനാ • 7-9. Koṭṭhikaaniccasuttādivaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൭-൯. കോട്ഠികഅനിച്ചസുത്താദിവണ്ണനാ • 7-9. Koṭṭhikaaniccasuttādivaṇṇanā
