| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. কোট্ঠিকসুত্তং
8. Koṭṭhikasuttaṃ
১৩৩. বারাণসিযং ৰিহরন্তি ইসিপতনে মিগদাযে। অথ খো আযস্মা সারিপুত্তো সাযন্হসমযং…পে॰… একমন্তং নিসিন্নো খো আযস্মা সারিপুত্তো আযস্মন্তং মহাকোট্ঠিকং এতদৰোচ – ‘‘‘অৰিজ্জা, অৰিজ্জা’তি, আৰুসো কোট্ঠিক, ৰুচ্চতি। কতমা নু খো, আৰুসো, অৰিজ্জা, কিত্তাৰতা চ অৰিজ্জাগতো হোতী’’তি?
133. Bārāṇasiyaṃ viharanti isipatane migadāye. Atha kho āyasmā sāriputto sāyanhasamayaṃ…pe… ekamantaṃ nisinno kho āyasmā sāriputto āyasmantaṃ mahākoṭṭhikaṃ etadavoca – ‘‘‘avijjā, avijjā’ti, āvuso koṭṭhika, vuccati. Katamā nu kho, āvuso, avijjā, kittāvatā ca avijjāgato hotī’’ti?
‘‘ইধাৰুসো, অস্সুতৰা পুথুজ্জনো রূপস্স অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানাতি। ৰেদনায…পে॰… সঞ্ঞায… সঙ্খারানং… ৰিঞ্ঞাণস্স অস্সাদঞ্চ আদীনৰঞ্চ নিস্সরণঞ্চ যথাভূতং নপ্পজানাতি। অযং ৰুচ্চতাৰুসো, অৰিজ্জা; এত্তাৰতা চ অৰিজ্জাগতো হোতী’’তি।
‘‘Idhāvuso, assutavā puthujjano rūpassa assādañca ādīnavañca nissaraṇañca yathābhūtaṃ nappajānāti. Vedanāya…pe… saññāya… saṅkhārānaṃ… viññāṇassa assādañca ādīnavañca nissaraṇañca yathābhūtaṃ nappajānāti. Ayaṃ vuccatāvuso, avijjā; ettāvatā ca avijjāgato hotī’’ti.
এৰং ৰুত্তে, আযস্মা সারিপুত্তো আযস্মন্তং মহাকোট্ঠিকং এতদৰোচ – ‘‘‘ৰিজ্জা, ৰিজ্জা’তি, আৰুসো কোট্ঠিক, ৰুচ্চতি। কতমা নু খো, আৰুসো, ৰিজ্জা, কিত্তাৰতা চ ৰিজ্জাগতো হোতী’’তি?
Evaṃ vutte, āyasmā sāriputto āyasmantaṃ mahākoṭṭhikaṃ etadavoca – ‘‘‘vijjā, vijjā’ti, āvuso koṭṭhika, vuccati. Katamā nu kho, āvuso, vijjā, kittāvatā ca vijjāgato hotī’’ti?
‘‘ইধাৰুসো সুতৰা অরিযসাৰকো রূপস্স অস্সাদঞ্চ আদীনৰঞ্চ নিস্সরণঞ্চ যথাভূতং পজানাতি। ৰেদনায…পে॰… সঞ্ঞায… সঙ্খারানং… ৰিঞ্ঞাণস্স অস্সাদঞ্চ আদীনৰঞ্চ নিস্সরণঞ্চ যথাভূতং পজানাতি। অযং ৰুচ্চতাৰুসো, ৰিজ্জা; এত্তাৰতা চ ৰিজ্জাগতো হোতী’’তি। অট্ঠমং।
‘‘Idhāvuso sutavā ariyasāvako rūpassa assādañca ādīnavañca nissaraṇañca yathābhūtaṃ pajānāti. Vedanāya…pe… saññāya… saṅkhārānaṃ… viññāṇassa assādañca ādīnavañca nissaraṇañca yathābhūtaṃ pajānāti. Ayaṃ vuccatāvuso, vijjā; ettāvatā ca vijjāgato hotī’’ti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১-১০. সমুদযধম্মসুত্তাদিৰণ্ণনা • 1-10. Samudayadhammasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১-১০. সমুদযধম্মসুত্তাদিৰণ্ণনা • 1-10. Samudayadhammasuttādivaṇṇanā
